Jehová miʼ chʼʌm jiñi añoʼ bʌ i ñopoñel tiʼ tojlel

1, 2. ¿Chuqui tsiʼ ñusa Jefté yicʼot i yixicpʼeñal?

JUNTIQUIL wiñic cʼotel mucʼ tiʼ yotot, tsajñi ti jumpʼejl guerra tsaʼ bʌ i mʌlʌ (joto). Cheʼ bʌ i yixicʼal (yixicpʼeñal) tsiʼ qʼuele, wen tijicña tsiʼ yubi i bʌ i tsaʼ caji ti cʼay yicʼot son cheʼ bʌ tsaʼ majli i taj. Pero toj sajtel i pusicʼal chaʼan tsaʼ bʌ i mele i tat ti wiʼil. Tsiʼ jetʼ tsili i bujc tiʼ chʼijiyemlel i ti wiʼil tsiʼ chaʼle tsʌts bʌ tʼan: «Calobil». Tiʼ tsictesʌbe i yixicpʼeñal chaʼan an jumpʼejl tʼan tsaʼ bʌ i yʌqʼue Jehová. Chaʼan jiñi, maʼañic baqui ora mi caj i mejlel ti ñujpuñel yicʼot miʼ tilel i yalobil. ¿Bajcheʼ tsiʼ jacʼʌ? Ti jimbʌ ora tsiʼ sube i tat chaʼan yom miʼ tsʼʌctesan i tʼan. Cheʼʌch tsiʼ pʌsʌ chaʼan miʼ ñop chaʼan Jehová maʼañic baqui ora miʼ cʼajtiben i mel mach bʌ weñic (Jueces 11:34-37). Wen tijicña jiñi wiñic cheʼ bʌ tsiʼ qʼuele chaʼan añʌch i ñopoñel (chʼujbiya) i yixicʼal. Yujil chaʼan wen tijicña Jehová tiʼ tojlel jiñi i yixicʼal.

² Ili wiñic jiñʌch Jefté. Tiʼ chaʼticlelob tsiʼ wen ñopoyob Jehová yicʼot chaʼan muʼ bʌ i mel tac. Anquese woli (choncol) i ñusañob tsʌts tac bʌ wocol, tsiʼ pʌsʌyob i chʼujbiya ti Dios. Tsiʼ meleyob chuqui jach yom melol come yom i tajob i bendición Jehová.

3. ¿Chuqui mi laj cʌn tiʼ tojlel Jefté yicʼot i yixicʼal?

³ An i tajol wocolʌch chaʼan pʼʌtʌl miʼ yajñel lac ñopoñel ti Jehová. Mi la com chʌn pʼʌtʌl miʼ yajñel, yom mi lac chaʼlen wersa (Judas 3). Jin chaʼan, ti ili temaj mi caj laj cʌn jiñi ejemplo i chaʼan Jefté yicʼot i yixicʼal. Cheʼ bʌ tsiʼ ñusayob wocol, ¿bajcheʼ tsiʼ pʌsʌyob chaʼan añobʌch i ñopoñel ti Dios?

PʼɅTɅL I ÑOPOÑELOB TI DIOS ANQUESE CABɅL MACH BɅ WEÑIC

4, 5. a) ¿Chuqui yom miʼ mel tsaʼ subenti jiñi israelob cheʼ miʼ yochelob yaʼ ti Lum tsaʼ bʌ wʌn Subentiyob? b) Cheʼ bajcheʼ miʼ yʌl Salmo 106, ¿chuqui tsiʼ chaʼleyob jiñi israelob tiʼ caj i ñusatʼañob?

⁴ Jefté yicʼot i yixicʼal tsiʼ wen qʼueleyob bajcheʼ tsiʼ ñusayob wocol tsaʼ bʌ i ñusʌbeyob i tʼan Jehová. Cheʼ anto yom lʌcʼʌl 300 jab tiʼ yorajlel Jefté, Dios tsiʼ sube jiñi israelob chaʼan miʼ tsʌnsañob tiʼ pejtelel muʼ bʌ i chʼujutesañob diosteʼ tac chumuloʼ bʌ ti jiñi Lum tsaʼ bʌ wʌn Subentiyob. Pero maʼañic tsiʼ jacʼʌyob (Deuteronomio 7:1-4). Cabʌl tsaʼ caji i chʼujutesañob diosteʼ tac yicʼot i melob tsʼiʼlel, cheʼ bajcheʼ yañoʼ bʌ (pejcan Salmo 106:34-39).

⁵ Chaʼan i ñusatʼañob, Dios maʼañic tsiʼ colta jiñi israelob tiʼ tojlel i contrajob (Jueces 2:1-3, 11-15; Salmo 106:40-43). Wocolʌch tsiʼ yubi jiñi familia tac muʼ bʌ i cʼuxbiñob Jehová chaʼan miʼ pʌsob i ñopoñel ti jiñi bʌ ora. Pero jiñi Biblia miʼ taj ti tʼan tsaʼʌch bʌ i yʌqʼueyob i tijicñʌyel Jehová. Jiñobʌch Jefté yicʼot i yixicʼal, Elcana (Elqaná), Ana yicʼot Samuel (1 Samuel 1:20-28; 2:26).

6. a) ¿Chuqui miʼ wen mulan jiñi quixtañujob ili ora? b) ¿Chuqui yom mi lac mel chaʼan jiñi?

⁶ Ili ora, cabʌl lajaloʼ bʌ bajcheʼ tsaʼ bʌ chumleyob ti Canaán. Miʼ wen mulañob piʼleya, tsʌnsa, jatsʼ yicʼot taqʼuin. Pero Jehová miʼ subeñonla chaʼan yom tsajilonla. Yom i cʌntañonla chaʼan maʼañic mi lac mel jiñi mach bʌ weñic bajcheʼ yañoʼ bʌ, cheʼ bajcheʼ tsiʼ ñopo i cʌntan jiñi israelob. ¿Muʼ ba caj laj cʌn ti jiñi mach bʌ weñic tsiʼ mele jiñi israelob? (1 Corintios 10:6-11). Yom mi lac chaʼlen wersa chaʼan maʼañic mi lac lajin i melbal jiñi wiñicob xʼixicob (quixtañujob) (Romanos 12:2).

JEFTÉ PʼɅTɅL TSAʼ AJÑI I ÑOPOÑEL TI DIOS ANQUESE TSAʼ MELBENTI MACH BɅ WEÑIC

7. a) ¿Chuqui tsaʼ melbenti Jefté tiʼ piʼʌlob? b) ¿Chuqui tsiʼ mele Jefté?

⁷ Come maʼañic tsiʼ jacʼbeyob i tʼan Jehová jiñi israelob, tsaʼ contrajintiyob ti filisteojob yicʼot amoñob cheʼ tiʼ yorajlel Jefté (Jueces 10:7, 8). Cheʼ jaʼel, i yerañob yicʼot jiñi ancianojob tsiʼ yʌqʼueyob wocol jiñi Jefté. Tiʼ tsʼaʼleyob Jefté yicʼot maʼañic tsiʼ mulayob chuqui miʼ mel. Jin chaʼan, tsiʼ xiqʼuiyob loqʼuel yaʼ ti lum (Jueces 11:1-3). Pero Jefté maʼañic tsiʼ ñajtʼesa i bʌ chaʼan tsaʼ wen ticʼlʌnti. ¿Chucoch la cujil? Come cheʼ bʌ jiñi ancianojob ti Israel tsiʼ cʼajtibeyob i coltaya, ti jumpʼejl i pusicʼal tsiʼ mele (Jueces 11:4-11). ¿Chucoch cheʼ tsiʼ mele bajcheʼ jiñi?

8, 9. a) ¿Baqui bʌ principio tac am bʌ tiʼ Mandar Moisés tsaʼ mejli i coltan Jefté? b) ¿Chuqui ñumen ñuc bʌ tsiʼ qʼuele Jefté?

⁸ Jefté juntiquilʌch wen chajpʌbil bʌ chaʼan guerra. Wen yujil bajcheʼ tsiʼ ñusa jiñi israelob yicʼot i cʌñʌ i Mandar Moisés. Cheʼ tsiʼ wen ñaʼta bajcheʼ Jehová tsiʼ qʼuele i tejclum, tsiʼ cʌñʌ chuqui wen yicʼot mach bʌ weñic (Jueces 11:12-27). Tsiʼ cʼʌñʌ jiñi principio tac chaʼan miʼ ñaʼtan chuqui yom miʼ mel. Yujil chaʼan Jehová mach yomic chaʼan miʼ chaʼ sutqʼuiñob chuqui miʼ melbentel jiñi i wiñicob, yom bʌ jiñʌch miʼ cʼuxbiñob i bʌ. Cheʼ jeʼel, tsiʼ cʌñʌ yaʼ ti mandar bajcheʼ yilal yom ti yañoʼ bʌ, jinto jiñi muʼ bʌ i tsʼaʼleñob (pejcan Éxodo 23:5 yicʼot Levítico 19:17, 18).

⁹ Jiñi yujil bʌ chaʼan José, tajol jiñʌch tsaʼ bʌ i colta jeʼel jiñi Jefté. Yujil chaʼan anquese José tsaʼ tsʼaʼlenti tiʼ yerañob, pero tsaʼʌch i pʼuntayob (Génesis 37:4; 45:4, 5). Tajol Jefté tsiʼ ñaʼta tsaʼ bʌ i mele José, i jiñʌch tsiʼ colta i mel cheʼ bajcheʼ yom Jehová. Jefté wen wocolʌch tsiʼ ñusa tiʼ caj bajcheʼ tsiʼ mele i yerañob. Pero maʼañic tsiʼ wen acʼʌ tiʼ pusicʼal jiñi. Ñumen ñuc tsiʼ qʼuele cheʼ miʼ coltʌben i cʼabaʼ Jehová yicʼot i tejclum (Jueces 11:9). Jefté tsiʼ mulaj i pʌs i ñopoñel ti Jehová. Jin chaʼan, Dios tsiʼ yʌqʼue bendición yicʼot jiñi tejclum (Hebreos 11:32, 33).

10. ¿Bajcheʼ miʼ coltañonla waʼli jiñi principio tac chaʼan mi lac pʌs lac melbal bajcheʼ xñoptʼan?

¹⁰ ¿Bajcheʼ miʼ mejlel lac lajin Jefté? Laʼ lac ñaʼtan: ¿Chuqui mi lac mel mi juntiquil hermano mach weñic muʼ bʌ i mel ti lac tojlel? Yom mi lac mel bajcheʼ Jefté yicʼot mi laj cʼʌn jiñi principio tac am bʌ ti Biblia chaʼan mi lac ñaʼtan yom bʌ mi lac mel. Anquese cʼux mi la cubin, laʼ lac chʌn melben i yeʼtel (troñel) Jehová. Mach laj cʌy jiñi tempa bʌ mi yomic mi laj cʌy lac ñochtan jiñi hermanojob. Laʼ lac chʼujbiben i tʼan Jehová. Ili mi caj i coltañonla lac ñusan tsʌts bʌ wocol i chaʼan miʼ lajiñob jiñi wem bʌ lac melbal (Romanos 12:20, 21; Colosenses 3:13).

MUʼ BɅ I PɅS CHAʼAN PʼɅTɅLɅCH LAC ÑOPOÑEL

11, 12. a) ¿Chuqui ti trato tsiʼ mele Jefté? b) ¿Chuqui yom miʼ mel Jefté chaʼan miʼ tsʼʌctesan i tʼan?

¹¹ Jefté yujil chaʼan jiñi tejclum Israel miʼ mejlel i mʌlben i contrajob tiʼ coltaya Dios. Jin chaʼan tsiʼ mele jumpʼejl trato yicʼot Jehová (qʼuele jiñi recuadro «¿Chuqui yom i yʌl?»). Tsiʼ sube chaʼan mi tsiʼ coltayob, mi caj i yʌqʼuen «bajcheʼ pulbil bʌ i majtan» jiñi ñaxam bʌ miʼ loqʼuel i taj cheʼ sujtelix mucʼ tiʼ yotot (Jueces 11:30, 31). ¿Chuqui yom i yʌl?

¹² Jefté maʼañic tsiʼ ñaʼta chaʼan miʼ tsʌnsan jiñi ñaxam bʌ miʼ loqʼuel i taj. ¿Bajcheʼ la cujil? Come yujil chaʼan Jehová maʼañic miʼ mulan cheʼ juntiquil quixtañu miʼ tsʌnsʌbentel bajcheʼ i majtan (Deuteronomio 18:9, 10). Tiʼ yorajlel israelob, jumpʼejl pulbil bʌ majtañʌl jiñʌch wen ñuc bʌ muʼ bʌ i yʌqʼuentel Jehová (qʼuele jiñi recuadro «¿Chuqui yom i yʌl?»). Jin chaʼan, tsaʼ bʌ i yʌlʌ Jefté jiñʌch chaʼan jiñi quixtañu muʼ bʌ caj i yʌqʼuen Jehová chaʼañʌch miʼ melben i yeʼtel tiʼ pejtelel ora yaʼ ti tabernáculo. Jehová tsiʼ jacʼbe i tʼan Jefté yicʼot tsiʼ colta chaʼan miʼ mʌlben i contrajob (Jueces 11:32, 33). Pero ¿majqui jiñi muʼ bʌ caj i yʌcʼ Jefté bajcheʼ majtañʌl?

13, 14. ¿Chuqui miʼ cʌntesañonla chaʼan bʌ i ñopoñel Jefté yaʼ bʌ tsʼijbubil ti Jueces 11:35?

¹³ Cheʼ bajcheʼ tsaʼ laj qʼuele ti ñaxam bʌ párrafo, jiñi cojach bʌ i yixicʼal, jiñi wen cʼuxbibil bʌ i chaʼan, jiñʌch tsaʼ bʌ ñaxan loqʼui i taj. ¿Chuqui mi caj i mel Jefté? ¿Muʼ ba caj i tsʼʌctesan jiñi trato tsaʼ bʌ i mele? ¿Muʼ ba caj i yʌcʼ cojach bʌ i yixicʼal chaʼan tiʼ pejtelel ora miʼ chaʼlen eʼtel yaʼ ti tabernáculo?

¹⁴ Tiʼ sujm, Jefté tsaʼʌch i chʼʌmʌ ti ñuc jiñi principio tac tsaʼ bʌ i cʌñʌ tiʼ mandar Dios. Tajol tsiʼ cʼajtesa chaʼan yaʼ ti mandar miʼ yʌl chaʼan jiñi israelob yom miʼ yʌqʼueñob Jehová jiñi ñumen wem bʌ (Éxodo 23:19). Tajol tsiʼ cʼajtesa jaʼel chaʼan cheʼ bʌ juntiquil miʼ yʌcʼ i tʼan ti Jehová, jiñi mandar miʼ yʌl: «Mach yomic cheʼ jach miʼ cʌytʌl. Yom miʼ wersa tsʼʌctesan i tʼan» (Números 30:2). Jin chaʼan, Jefté tsiʼ mele bajcheʼ Ana, tajol tsaʼ bʌ chumle ti jiñi bʌ ora jeʼel. Jefté yomʌch miʼ tsʼʌctesan i tʼan, anquese yujil chaʼan wocolʌch mi caj i yubin yicʼot i yixicʼal. Mach wis mejlic ti ñujpuñel yicʼot i taj i yalobil come tiʼ pejtelel ora miʼ cajel ti troñel yaʼ ti tabernáculo. Jin chaʼan, i familia Jefté maʼañix miʼ cajel yicʼot maʼañix majqui mi caj i chʼʌm tiʼ wenta jiñi i lum (Jueces 11:34). Pero Jefté tsiʼ yʌlʌ: «Tsac chaʼle trato tiʼ tojlel lac Yum. Mach mejlix c chʌn yʌn c tʼan» (Jueces 11:35). Ili tʼan miʼ pʌsbeñonla chaʼan wen pʼʌtʌlʌch i ñopoñel Jefté. Jehová tsiʼ chʼʌmʌ jiñi majtan tsaʼ bʌ i yʌcʼʌ Jefté yicʼot tsiʼ yʌqʼue bendición. ¿Cheʼ ba tsaʼ lac pʌsʌ lac chʼujbiya bajcheʼ Jefté cheʼ joñoñicla?

15. a) ¿Chuqui tsaʼ la cʌlʌ cheʼ tsaʼ la cʌcʼʌ lac bʌ ti Jehová? b) ¿Bajcheʼ miʼ mejlel lac pʌs chaʼan añʌch lac ñopoñel?

¹⁵ Cheʼ mi la cʌcʼ lac bʌ ti Jehová, mi la cʌcʼ lac tʼan chaʼan cojach mi caj la cʌcʼ ti ñuc tiʼ melol chuqui yom. La cujil chaʼan an i tajol wocolʌch tiʼ melol. Pero ¿chuqui mi la cʌl cheʼ bʌ an chuqui miʼ cʼajtibeñonla Jehová maʼañic bʌ mi lac mulan? Mi lajalʌch lac ñopoñel bajcheʼ Jefté, mi caj lac tsʼʌctesan lac tʼan tsaʼ bʌ la cʌqʼue Jehová yicʼot tiʼ pejtelel lac pusicʼal mi caj lac jacʼ. La cujil chaʼan jiñi ñumen ñuc bʌ jiñʌch i bendición Dios, mach jiñic muʼ bʌ lac mel joñonla (Malaquías 3:10). ¿Chuqui tsaʼ ujti tiʼ tojlel i yixicʼal Jefté? ¿Chuqui tsiʼ yʌlʌ cheʼ bʌ tsiʼ yubi tsaʼ bʌ i mele i tat?

16. ¿Chuqui tsiʼ mele i yixicʼal Jefté chaʼan jiñi tʼan tsaʼ bʌ i waʼchoco i tat? (Qʼuele jiñi dibujo am bʌ tiʼ tejchibal).

¹⁶ Jiñi tʼan tsaʼ bʌ i yʌcʼʌ Jefté mach lajalic bajcheʼ i chaʼan Ana. Ana tsiʼ yʌlʌ chaʼan miʼ yʌcʼ i yalobil chaʼan miʼ chaʼlen eʼtel bajcheʼ nazareo yaʼ ti tabernáculo (1 Samuel 1:11) (qʼuele jiñi recuadro «¿Chuqui yom i yʌl?»). Juntiquil nazareo miʼ mejlel ti ñujpuñel yicʼot i taj i yalobil. Pero i yixicʼal Jefté maʼañic miʼ mejlel, come tsiʼ yʌlʌ i tat chaʼan miʼ yʌcʼ bajcheʼ «pulbil bʌ majtan» (Jueces 11:37-40). Laʼ lac ñaʼtan chaʼan jiñʌch i yixicʼal juntiquil ñuc bʌ i yeʼtel ti Israel, jin chaʼan miʼ mejlel ti ñujpuñel yicʼot jiñi ñumen wem bʌ wiñic. Pero tsaʼ sujti ti juntiquil xʼeʼtel i chaʼan Dios yaʼ ti tabernáculo. ¿Chuqui tsiʼ mele? An chuqui tsiʼ sube i tat tsaʼ bʌ i pʌsʌ chaʼan jiñi ñumen ñuc bʌ jiñʌch miʼ melben i yeʼtel Dios: «Mele cheʼ bajcheʼ tsaʼ wʌlʌ chaʼan maʼ tsʼʌctesan a tʼan» (Jueces 11:36). Chaʼan miʼ melben i troñel Jehová, maʼañic tsaʼ ñujpuñi i maʼañic i yalobil. ¿Bajcheʼ miʼ mejlel lac sajcʌben i melbal?

17. a) ¿Bajcheʼ miʼ mejlel lac lajin i ñopoñel ti Dios Jefté yicʼot i yixicpʼeñal? b) ¿Chucoch miʼ ñijcan a pusicʼal muʼ bʌ i yʌl ti Hebreos 6:10-12?

¹⁷ ¿Bajcheʼ miʼ mejlel lac lajin i ñopoñel ti Dios Jefté yicʼot i yixicpʼeñal? Ili ora, yonlel Testigojob xcolelob to bʌ maʼañic miʼ ñujpuñelob yicʼot maʼañobic i yalobil, tajol ti wiʼil to miʼ melob. ¿Chucoch? Come cojach yom i ñumen acʼob i pensar tiʼ melol i chaʼan bʌ Jehová. Cabʌl hermanojob añobix bʌ i jabilel tajol miʼ mejlelob ti ñumen ajñel yicʼotob i yalobil o jiñi i butsob pero mach cheʼic miʼ melob. ¿Chucoch? Come tsaʼix i ñaʼtayob chaʼan yom i yʌqʼueñob Jehová i yorajlel am bʌ i chaʼañob yicʼotob i pʼʌtʌlel. Yambʌ miʼ chaʼleñob coltaya tiʼ melol i Yotlel Tempa bʌ tac. Yañoʼ bʌ miʼ majlelob yaʼ ti Cʌntesʌntel chaʼan xSubtʼañob chaʼan bʌ i Yumʌntel Dios i miʼ majlelob ti congregación baqui yom to cabʌl xsubtʼañob. An muʼ bʌ i chajpañob jaʼel chaʼan miʼ ñumen chaʼleñob subtʼan cheʼ tiʼ yorajlel i Cʼajtesʌntel i chʌmel Jesús. Jehová maʼañic mi caj i ñajʌyel i chaʼan chuqui woli (yʌquel) i mel jiñi xucʼul bʌ i wiñicob tiʼ cʼuxbiya (pejcan Hebreos 6:10-12). ¿Ixcu jatet? ¿Am ba chuqui choncol a cʌy a mel chaʼan maʼ ñumen melben i yeʼtel Jehová?

¿CHUQUI TSAʼ LAJ CɅÑɅ?

18, 19. a) ¿Chuqui tsaʼ laj cʌñʌ chaʼan Jefté yicʼot i yixicʼal? b) ¿Bajcheʼ miʼ mejlel lac tsajcañob?

¹⁸ Cabʌl chuqui miʼ mejlel laj cʌn tsaʼ bʌ i mele Jefté yicʼot i yixicpʼeñal. Jumpʼejl ejemplo, cheʼ bʌ Jefté an chuqui choncol i ñaʼtan i mel tiʼ cuxtʌlel, tsiʼ mele bajcheʼ yom Jehová. Tsiʼ chaʼle wersa chaʼan maʼañic miʼ mel bajcheʼ yambʌ quixtañujob. Cheʼ bʌ jiñi yañoʼ bʌ tsiʼ meleyob tsaʼ bʌ i yʌqʼue i chʼijiyemlel, tsiʼ pʌsʌ chaʼan añʌch i ñopoñel ti Dios. Jefté yicʼot i yixicʼal tsiʼ pʌsʌyob chaʼan pʼʌtʌlobʌch anquese jiñi yañoʼ bʌ maʼañic bʌ tsiʼ jacʼbeyob i tʼan Dios. Jehová tsiʼ yʌqʼueyob bendición chaʼan tsaʼ bʌ i meleyob ti jumpʼejlob i pusicʼal. Cheʼ jaʼel, tsiʼ cʼʌñʌyob chaʼan miʼ coltañob yañoʼ bʌ.

¹⁹ Jiñi Biblia miʼ yʌl: «Tsajcanla majlel jini woli bʌ i yʌqʼuentelob pejtelel jini albil bʌ i chaʼan Dios, come miʼ chʌn chaʼleñob pijt tiʼ xucʼtʌlel i pusicʼal woli bʌ i ñopob» (Hebreos 6:12). Jin chaʼan, laʼ lac tsajcan bajcheʼ tsiʼ mele Jefté yicʼot i yixicʼal yicʼot laʼ lac chʌn pʌs chaʼan pʼʌtʌl lac ñopoñel. Yom mi laj cʼajtesan chaʼan Jehová cojach miʼ chʼʌm jiñi muʼ bʌ i ñopob.