Cheʼ an tsʌts bʌ cʼamʌjel

Linda, 71 bʌ i jabilel, miʼ yʌl: «Cheʼ bʌ tsaʼ tajbentiyon cáncer tic pulmón yicʼot tic soytaʼ, muqʼuix caj c chʌmel (sajtel) tsaʼ cubi. Pero cheʼ bʌ tsaʼ cʼotiyon ti cotot, tsaʼ c ñaʼta: ‹Weno, mach pijtʌbilic c chaʼan iliyi, pero yomʌch mic sʌclan bajcheʼ mic lʌtʼ ili c wocol›».

Elise, 49 bʌ i jabilel, miʼ yʌl: «An jumpʼejl tsʌts bʌ j cʼamʌjel muʼ bʌ i tʌcʼlan jiñi c chijil tac am bʌ tiʼ tsʼejtʌlel c choj. Wen chʼijiyem mi cubin c bʌ cheʼ bʌ an tac i yorajlel wen mucʼ ti cʼux. An qʼuiñil c bajñel mi cubin c bʌ i anto c ñaʼta c tsʌnsan c bʌ».

Juntiquil wiñic am bʌ ti silla de rueda joyol tiʼ tojlel muʼ bʌ i cʼuxbiñob

MI JATET o juntiquil ti a familia tsaʼ tajbenti jumpʼejl cʼamʌjel muʼ bʌ i mejlel i tsʌnsañonla, a wujilix chaʼan wen wocolʌch. Mach cojach wocol jiñi cʼamʌjel, cheʼto jeʼel miʼ mejlel a wubin yan tac bʌ wocol tiʼ caj jiñi. Jiñi bʌqʼuen yicʼot cʌlʌx pensal miʼ mejlel ti ñumen pʼojlel chaʼan belbelñayet ti doctor, chaʼan bajcheʼ maʼ tajben o maʼ tojben i tsʼʌcal yicʼot chaʼan i wocolel muʼ bʌ i yʌcʼ jiñi tsʼac tac. Jiñi cʼojol tac muʼ bʌ i tilel tiʼ caj jumpʼejl tsʌts bʌ cʼamʌjel miʼ mejlel i wen ticʼlañonla.

¿Chuqui miʼ mejlel i coltañonla ti jimbʌ ora? Am bʌ i ñuqʼuesʌbeyob i pusicʼal cabʌl lac piʼʌlob jiñʌch jiñi oración yicʼot i pejcʌntel texto tac loqʼuem bʌ ti Biblia. Yambʌ muʼ bʌ i mejlel i ñuqʼuesan lac pusicʼal jiñʌch jiñi i cʼuxbiya yicʼot i coltaya lac familia yicʼot la camigojob.

AM BɅ I MELEYOB CHAʼTIQUIL UXTIQUILOB

Robert, juntiquil wiñic 58 bʌ i jabilel, miʼ yʌl: «Chaʼan maʼ lʌtʼ jiñi a cʼamʌjel, ñopo tiʼ tojlel Dios, jiñʌch muʼ bʌ caj i coltañet a lʌtʼ a wocol. Suben Jehová ti oración bajcheʼ yubil maʼ wubin a bʌ. Cʼajtiben chʼujul bʌ i yespíritu yicʼot chaʼan pʼʌtʌl maʼ wajñel tiʼ tojlel a familia i chaʼan wen jach bajcheʼ maʼ lʌtʼ a cʼamʌjel».

Robert miʼ bej al: «Wen ñucʌch i cʼʌjñibal cheʼ bʌ jiñi a familia yaʼʌch añob chaʼan miʼ coltañetob. Ti jujumpʼejl qʼuin, juntiquil tic familia miʼ pejcañon chaʼan miʼ cʼajtibeñon bajcheʼ quilal. Cheʼ jaʼel, miʼ ñuqʼuesañob c pusicʼal jiñi camigojob chʼoyoloʼ bʌ ti yambʌ tejclum. Jiñi miʼ tijicñesañon yicʼot miʼ coltañon chaʼan maʼañic mic lujbʼan».

¿Am ba juntiquil cʼam bʌ a wamigo woli (choncol) bʌ a ñaʼtan a julaʼtan? Qʼuele chuqui miʼ yʌl Linda: «Jiñi cʼam bʌ yom i chaʼlen wersa chaʼan cheʼʌch miʼ chumtʌl bajcheʼ ti ñaxan yicʼot an qʼuiñil mach yomic i taj ti tʼan jiñi i cʼamʌjel. Jin chaʼan, miʼ mejlel laʼ wʌl chuqui jach».

Jiñi pʼʌtʌlel muʼ bʌ i yʌcʼ Dios, i ñuqʼuesʌntel a pusicʼal muʼ bʌ i yʌcʼ jiñi Biblia, jiñi i cʼuxbiya a familia yicʼot a wamigojob jiñʌch muʼ bʌ i mejlel i coltañet a qʼuel chaʼan añʌch i sujmlel jiñi a cuxtʌlel anquese woli (yʌquel) a ñusan tsʌts bʌ cʼamʌjel.

Texto tac muʼ bʌ i mejlel i coltañet

Coltan a bʌ ti Dios

«Tsac sajca lac Yum. Tsiʼ yubiyon. Tsiʼ locʼsʌbeyon pejtelel c bʌqʼuen. Cheʼ bʌ tsiʼ chaʼle uqʼuel ili pʼumpʼun bʌ, lac Yum tsiʼ yubi» (Salmo 34:4, 6).

Linda miʼ yʌl: «Maʼañic mij cʼajtiben Dios chaʼan miʼ cʼoqʼuesañon. Mij cʼajtiben chaʼan miʼ yʌqʼueñon c pʼʌtʌlel yicʼot chaʼan mic lʌtʼ jiñi j cʼamʌjel».

Pejcan jiñi Biblia chaʼan maʼ pʼʌtʼesan a bʌ

«Maʼanix mi juntiquilic muʼ bʌ caj i yʌl: ‹Cʼamon›» (Isaías 33:24).

Wen ñaʼtan muʼ bʌ caj i mel Dios ti talto bʌ qʼuin. Jiñi mi caj i pʼʌtʼesan a pijtaya yicʼot mi caj i coltañet chaʼan maʼañic maʼ lujbʼan.

Sʌclan a coltʌntel ti a familia yicʼot ti a wamigojob

«Mi isujm miʼ cʼuxbiñonla laj cʌñʌ bʌ maʼanic miʼ cʌy i cʼuxbiñonla tiʼ pejtelel ora. Junlajalʌch bajcheʼ lac piʼʌl baʼ ora woli la cubin wocol» (Proverbios 17:17).

Elise miʼ yʌl: «Mach bajñel ajñiquet. Acʼʌ a bʌ ti coltʌntel ti a wamigojob. An qʼuiñil a bajñel mi caj a wubin a bʌ yicʼot mi caj a ñaʼtan chaʼan maʼañic woliʼ ñʌchʼtañet Dios. Pero mach bajñel ajñiquet».