Cheʼ bʌ mach lʌjtʼix a chaʼan maʼ wubin

Adriana, chʼoyol bʌ ti Brasil, miʼ yʌl: «Ti bele ora mic wen chaʼlen cʼojol i tsaʼto c ñaʼta c tsʌnsan c bʌ».

¿AM BA a wubi cabʌl chʼijiyemlel i tsaʼto cʼoti a ñaʼtan chaʼan ñumen wen cheʼ maʼañix cuxulet? Mi añʌch, tajol mi caj a chʼʌmben i sujm bajcheʼ yubil miʼ yubin i bʌ Adriana. Miʼ cʌlʌx pensalin i bʌ, wen chʼijiyem yicʼot joybajcʼ miʼ yubin i bʌ. Ti wiʼil, tsaʼ subenti chaʼan an i chaʼan tsʌts bʌ depresión.

Qʼuele tsaʼ bʌ ujti tiʼ tojlel Kaoru, juntiquil wiñic chʼoyol bʌ ti Japón tsaʼ bʌ i cʌnta i tat i ñaʼ cʼamoʼ bʌ cheʼ bʌ añobix i jabilel. Miʼ yʌl: «Ti jimbʌ ora cabʌl chuqui mij cʼajtibentel tic troñel. Ti wiʼil, maʼañix tsaʼ caji c mulan c weʼsan c bʌ yicʼot maʼañic tsaʼ mejliyon ti wʌyel. Comix chʌmel (sajtel) tsaʼ cubi chaʼan maʼañic mic bej ubin wocol».

Juntiquil wiñic chʼoyol bʌ ti Nigeria i cʼabaʼ Ojebode miʼ yʌl: «Joy ora chʼijiyemon, i chuqui jach miʼ yʌcʼon ti uqʼuel. Tsaʼto c ñaʼta c tsʌnsan c bʌ». Ojebode, Kaoru yicʼot Adriana maʼañic tiʼ tsʌnsayob i bʌ, pero ti jujumpʼejl jab ñumen ti 800 mil wiñicob xʼixicob (quixtañujob) mucʼʌch bʌ i melob (chaʼleñob).

¿BAQUI MIʼ MEJLEL A TAJ A COLTɅNTEL?

Lʌcʼʌl tiʼ pejtelel muʼ bʌ i tsʌnsañob i bʌ jiñʌch jiñi wiñicob, i cabʌl maʼañic bʌ miʼ cʼajtiñob i coltʌntel tiʼ caj quisin. Pero Jesucristo tsiʼ yʌlʌ chaʼan i cʼʌjñibalʌch i chaʼañob doctor jiñi cʼamoʼ bʌ (Lucas 5:31). Jin chaʼan, mi an a depresión, mach a quisñin a cʼajtin a coltʌntel. Cabʌl añoʼ bʌ i cʌlʌx pensal an i tajayob i tijicñʌyel cheʼ bʌ miʼ chʼʌmbeñob i tsʼʌcal. Ojebode, Kaoru yicʼot Adriana tsaʼʌch i chʼʌmʌyob i coltʌntel i waʼli ñumen tijicñayobix.

An doctorob tsʼac bʌ miʼ cʼʌñob, an mucʼ jach bʌ i wen ñʌchʼtañob jiñi cʼamoʼ bʌ chaʼan miʼ coltʌntelob o an tiʼ chaʼchajplel bʌ miʼ cʼʌñob. Cheʼ jaʼel, jiñi cʼamoʼ bʌ cʼʌñʌlʌch miʼ coltʌntelob tiʼ familia yicʼot i yamigojob, miʼ chʼʌmbentelob i sujm yicʼot maʼañic miʼ cʼojyel yicʼotob. Jehová jiñʌch ñumen wem bʌ la camigo i miʼ yʌqʼueñonla wen ñuc bʌ laj coltaya: Jiñʌch i Tʼan, jiñi Biblia.

¿AM BA I TSʼɅCAL CHAʼAN PEJTELEL ORA?

Lʌcʼʌ tiʼ pejtelel ora, jal yom miʼ chʼʌmob i tsʼʌcʌntel jiñi añoʼ bʌ i depresión yicʼot añʌch chuqui yom miʼ qʼuextañob tiʼ cuxtʌlel chaʼan miʼ lʌtʼob majlel. Pero mi jatet woli (choncol) a chaʼlen wersa a lʌtʼ jiñi cʼamʌjel, miʼ mejlel a ñop chaʼan ti talto bʌ qʼuin utsʼatax miʼ cajel. Cheʼʌch miʼ ñaʼtan Ojebode, miʼ yʌl: «Wen comix j qʼuel cheʼ bʌ miʼ tsʼʌctiyel Isaías 33:24, baqui miʼ yʌl chaʼan mi caj i cʼotel jiñi qʼuin cheʼ bʌ maʼañix majqui mi caj i yʌl: ‹Cʼamon›». Tijicña mi caj a wubin jeʼel cheʼ maʼ cʌn chaʼan Dios tsiʼ wʌn alʌ chaʼan mi caj i mel «tsijiʼ bʌ pañimil» baqui maʼañix miʼ cajel «wocol», chʼijiyemlel yicʼot cʼojol tac (Apocalipsis [Revelación] 21:1, 4). Mi caj i junyajl jisʌntel jiñi wocol woli (yʌquel) bʌ a ñusan. Maʼañix baʼ ora mi caj a wubin a chʼijiyemlel, mi muqʼuicto caj a cʼajtesan (Isaías 65:17).

Texto tac muʼ bʌ i mejlel i coltañet

Dios miʼ chʼʌmben i sujm bajcheʼ yubil maʼ wubin

«Come joñon a Yumon, a Dioson. Mi caj c chuquet ti ñoj bʌ a cʼʌb. Mach a chaʼlen bʌqʼuen, come mi caj j coltañet» (Isaías 41:13).

Jehová jiñʌch muʼ bʌ i ñumen chʼʌmben i sujm bajcheʼ yubil mi la cubin i yomʌch i coltañonla.

Wen ñaʼtan chuqui miʼ yʌl i Tʼan Dios

Elías «tsiʼ chaʼle oración chaʼan miʼ chʌmel. Tsiʼ yʌlʌ: Jasʌlix, c Yum, tsʌnsañonix» (1 Reyes 19:4).

Ojebode miʼ yʌl: «Tsaʼ bʌ i wen coltayon jiñʌch cheʼ tsaʼ c wen ñaʼta muʼ bʌ i yʌl i Tʼan Dios. Tsaʼ j cʌñʌ chaʼan jiñi xʼaltʼan Elías cheʼʌch tsiʼ yubi i bʌ jaʼel bajcheʼ joñon».

Cʌñʌ tiʼ tojlel muʼ bʌ i yʌjlelob ti Biblia

Jesús tiʼ sube Pedro: «Joñon tsac tajayet ti oración ame a cʌy a ñopon» (Lucas 22:32).

Cheʼ bʌ Pedro uxyajix i yʌlʌ chaʼan mach i cʌñʌyic Jesús, wen chʼijiyem tsiʼ yubi i bʌ i tsaʼ majli ti uqʼuel. Kaoru miʼ yʌl: «Tsiʼ wen ñuqʼuesa c pusicʼal cheʼ tsaʼ j cʌñʌ chaʼan Jehová yicʼot Jesús tsaʼʌch i qʼueleyob ti ñuc bajcheʼ yubil tsiʼ yubi i bʌ Pedro».

Maʼañix baʼ ora mi caj a wubin a chʼijiyemlel, mi muqʼuicto caj a cʼajtesan (Isaías 65:17).