2 | «Miʼ ñuqʼuesʌntel lac pusicʼal ti jiñi Tsʼijbujel»

JIÑI BIBLIA MIʼ YɅL: «Pejtelel tsaʼ bʌ tsʼijbunti ti wajali tsaʼ tsʼijbunti chaʼan laj cʌntesʌntel, chaʼan mi lac taj lac pijtaya cheʼ mi laj cuch wocol yicʼot cheʼ miʼ ñuqʼuesʌntel lac pusicʼal ti jiñi Tsʼijbujel» (ROMANOS 15:4).

¿Chuqui yom i yʌl?

Jiñi Biblia miʼ subeñonla muʼ bʌ i ñuqʼuesan lac pusicʼal, muʼ bʌ i coltañonla lac lʌtʼ jiñi wocol yicʼot miʼ yʌqʼueñonla lac pʼʌtʌlel chaʼan mi lac mʌlben (jotben) jiñi mach tac bʌ weñic lac pensar. Miʼ subeñonla jaʼel chaʼan lʌcʼʌlix mi caj i jilel jiñi muʼ tac bʌ i yʌqʼueñonla lac chʼijyemlel.

¿Bajcheʼ miʼ coltañonla?

I tilelʌch cheʼ an i tajol mi lac taj lac chʼijyemlel o mi lac chaʼlen pensar, pero jiñi añoʼ bʌ i chaʼan depresión o ansiedad tajol ti jujumpʼejl qʼuin cheʼ miʼ yubiñob bajcheʼ jiñi. ¿Bajcheʼ miʼ mejlel i coltañob jiñi Biblia?

Yaʼ ti Biblia mi lac taj wen tac bʌ tʼan muʼ bʌ i coltañonla lac locʼsan jiñi mach tac bʌ weñic lac pensar (Filipenses 4:8). Cheʼ bajcheʼ jiñi, miʼ mejlel la cotsan jiñi muʼ tac bʌ i mejlel i yʌqʼueñonla lac ñʌchʼtʌlel i miʼ coltañonla ti bajcheʼ yubil mi la cubin (Salmo 94:18, 19).
Jiñi Biblia miʼ coltañonla laj cʌy lac ñaʼtan chaʼan maʼañic laj cʼʌjñibal (Lucas 12:6, 7).
Yaʼ ti Biblia mi lac taj cabʌl relato muʼ bʌ i pʌsbeñonla chaʼan mach lac bajñelic i chaʼan Dios miʼ chʼʌmben i sujm bajcheʼ yubil mi la cubin (Salmo 34:18; 1 Juan 3:19, 20).
Jiñi Biblia miʼ subeñonla chaʼan Dios mi caj i coltañonla chaʼan maʼañix mi laj cʼajtesan jiñi mach tac bʌ weñic tsaʼ bʌ lac ñusa muʼ bʌ i yʌqʼueñonla lac chʼijyemlel (Isaías 65:17; Apocalipsis 21:4). Mi woli lac chaʼlen wersa chaʼan maʼañic miʼ mʌlbeñonla jiñi mach tac bʌ weñic lac pensar, iliyi miʼ mejlel i coltañonla chaʼan mi laj cuch.

Bajcheʼ miʼ coltan jiñi Biblia jiñi Jessica

¿Bajcheʼ miʼ ticʼlañon jiñi depresión?

«Cheʼ bʌ 25 c jabilel, tsaʼ caji c wen ubin c chʼijyemlel i tsaʼ subentiyon chaʼan an c chaʼan tsʌts bʌ depresión. Miʼ waʼ tilel tic jol jiñi mach tac bʌ weñic tsaʼ c ñusa i maʼañic miʼ mejlel c locʼsan. Jiñi doctorob tiʼ subeyoñob chaʼan tiʼ caj jiñi tsaʼ tac bʌ c ñusa miʼ tilel mach tac bʌ weñic c pensar, jin chaʼan an c chaʼan depresión. Tsaʼ caji c chʼʌm tsʼac yicʼot terapia tsaʼ bʌ i coltayon j qʼuel chucoch cheʼ mi cubin bajcheʼ jiñi yicʼot chuqui yom mic mel (chaʼlen)».

¿Bajcheʼ miʼ coltañon jiñi Biblia?

«Cheʼ bʌ miʼ wen ticʼlañon jiñi depresión, lajal bajcheʼ an chuqui mic bʌcʼñan, miʼ wen aqʼueñon ansiedad i maʼañic mic mejlel ti wʌyel. Cheʼ ti acʼʌlel tac muqʼuix c lujbʼan tiʼ caj cʌlʌxix chuqui mic ñaʼtan i mach ñʌchʼʌlix jiñi c jol. Pero, cheʼ bajcheʼ miʼ yʌl Salmo 94:19, Dios miʼ ñuqʼuesan c pusicʼal i miʼ yʌqʼueñon c ñʌchʼtʌlel cheʼ bʌ cabʌl chuqui mic pensarin. Jin chaʼan, yaʼ tiʼ tʼejl c wʌyib an jumpʼejl c Biblia yicʼot jumpʼejl c libreta baqui an texto tac muʼ bʌ i coltañon. I cheʼ bʌ maʼañic mic mejlel ti wʌyel, mi cʌcʼ chaʼan Dios miʼ ñuqʼuesan c pusicʼal ti i Tʼan».

«Jiñi Biblia miʼ subeñonla chaʼan yom mi lac locʼsan jiñi mach tac bʌ weñic lac pensar maʼañic bʌ miʼ mulan Dios. Jumpʼejl ejemplo, ti ñaxan mic ñaʼtan chaʼan maʼañic j cʼʌjñibal yicʼot chaʼan maʼañic majqui yom miʼ cʼuxbiñon. Pero tsaʼ j qʼuele chaʼan an tiʼ contra muʼ bʌ i yʌl jiñi Biblia. Jiñi Biblia miʼ yʌl chaʼan Dios lajal bajcheʼ juntiquil Tatʌl yujil bʌ cʼuxbiya, miʼ pʼuntañonla yicʼot miʼ ñaʼtañonla ti jujuntiquilonla. Cʼunteʼ cʼunteʼ tsaʼ caji c mʌlben jiñi mach tac bʌ weñic c pensar i mach jiñix miʼ mʌlbeñon. Cheʼ tsaʼ caj j qʼuel c bʌ bajcheʼ miʼ qʼuelon Dios. Iliyi an i coltayon c locʼsan jiñi mach tac bʌ weñic mic ñaʼtan tic tojlel».

«Comix j qʼuel cheʼ bʌ miʼ cʼotel jiñi qʼuin cheʼ bʌ maʼañix mij cʼajtesan jiñi mach tac bʌ weñic tsaʼ c ñusa yicʼot jiñi mach bʌ weñic mic pensarin. Cujil chaʼan ti talto bʌ qʼuin mi caj i lajmel jiñi j cʼamʌjel i jiñi miʼ coltañon c lʌtʼ jinto cheʼ bʌ miʼ cʼotel i yorajlel chaʼan maʼañix jiñi depresión».