3 | Experiencia tac am bʌ ti Biblia

TI BIBLIA MI LAC TAJ: Utsoʼ bʌ lac piʼʌlob «cheʼ bʌ tsiʼ yubi i bʌ bajcheʼ joñonla» (SANTIAGO 5:17).

¿Chuqui yom i yʌl?

Yaʼ ti Biblia mi lac taj cabʌl relato chaʼan wiñicob xʼixicob (quixtañujob) mach bʌ junsujmic jach bajcheʼ yubil tsiʼ yubiyob. Cheʼ mi lac pejcan tsaʼ bʌ i ñusayob, tajol mi lac taj juntiquil cheʼ bʌ tsiʼ yubi i bʌ bajcheʼ joñonla.

¿Bajcheʼ miʼ coltañonla?

Ti lac pejtelel la com cheʼ añic majqui miʼ chʼʌmbeñonla i sujm, ñumento cheʼ bʌ an la chaʼan ansiedad, depresión o yambʌ cʼamʌjel cheʼ bʌ bajcheʼ iliyi. Cheʼ bʌ mi lac pejcan bajcheʼ yubil tsiʼ yubiyob o chuqui tsiʼ ñaʼtayob jiñi muʼ bʌ i yʌjlelob ti Biblia tajol mi laj qʼuel chaʼan cheʼ yubil mi la cubin jaʼel. Mach joñoñic jachla woli (choncol) lac ñusan ansiedad, mucʼonla ti pensar o mi lac ñaʼtan mach bʌ weñic ti lac tojlel.

Jiñi Biblia miʼ yʌl chuqui tsiʼ yʌlʌ chaʼtiqui uxtiquil cheʼ bʌ mach cujchix i chaʼañob tsiʼ yubiñob yicʼot cheʼ bʌ maʼañobix i pʼʌtʌlel. ¿Am ba a ñaʼta bajcheʼ iliyi: «Mach c bej lʌtʼʌx, mach mejloñix ti ajñel bajcheʼ ili»? Cheʼʌch tsiʼ yubi i bʌ Moisés, Elías yicʼot David (Números 11:14; 1 Reyes 19:4; Salmo 55:4).
Jiñi Biblia miʼ taj ti tʼan Ana, juntiquil xʼixic wen chʼijyem bʌ tsiʼ yubi i bʌ come maʼañic i yalobil i mi wajlentel ti yambʌ i yijñam i ñoxiʼal (1 Samuel 1:6, 10).
Tajol cheʼ maʼ yubin a bʌ bajcheʼ Job, juntiquil wiñic muʼ bʌ i yʌjlel yaʼ ti Biblia. Anquese añʌch i ñopoñel, mach cujchix tsiʼ yubi i tsiʼ yʌlʌ: «Cʼojyemonix. Mach comic jalijel tiʼ pejtelel ora» (Job 7:16).

Pejtelelob iliyi tsaʼʌch mejli i locʼsañob jiñi mach tac bʌ weñic i pensar. Joñonla jaʼel mucʼʌch i mejlel lac mel cheʼ bʌ mi laj qʼuelbeñob i yejemplo.

Bajcheʼ miʼ coltan jiñi Biblia jiñi Kevin

¿Bajcheʼ miʼ ticʼlañon jiñi trastorno bipolar?

«Cheʼ bʌ añix lʌcʼʌ 50 c jabilel tsaʼ subentiyon chaʼan an c chaʼan transtorno bipolar, ili miʼ yʌcʼ chaʼan jujumujcʼ miʼ qʼuextʌyel bajcheʼ yilalon. An i tajol miʼ mejlel c mel (chaʼlen) chuqui jach com mi cubin, pero miʼ waʼ tilel tic pusicʼal jaʼel chaʼan mach comix cheʼ cuxulon».

¿Bajcheʼ miʼ coltañon jiñi Biblia?

«Ñoj lajalon bajcheʼ jiñi apóstol Pedro mi cubin. An i tajol maʼañic i cʼʌjñibal tsiʼ yubi i bʌ tiʼ caj jiñi mach tac bʌ weñic tsiʼ mele. Pero tsiʼ cʼajtibe i coltaya i yamigojob i mach jin jach tiʼ joy ñaʼta jiñi mach bʌ weñic. Tiʼ caj jiñi wocol am bʌ c chaʼan an i tajol mach tijicñayoñic. I ti jin tac bʌ ora mic wen qʼuel jiñi c sajtemal i maʼañic j cʼʌjñibal mi cubin c bʌ. Pero, cheʼ bajcheʼ Pedro, an j cʌñʌ j cʼajtiben i coltaya wem bʌ camigojob ti jimbʌ ora. An i coltayoñob chaʼan mic bej chaʼlen wersa».

«Cheʼ jaʼel mic ñaʼtan bajcheʼ yubil tsiʼ yubi jiñi rey David. An i tajol wen chʼijyem tsiʼ yubi i bʌ tiʼ caj jiñi tsaʼ bʌ i ñusa i mach tijicñayic tiʼ caj jiñi mach tac bʌ weñic tsiʼ mele. Bixel cheʼʌch mi cubin c bʌ jaʼel bajcheʼ jiñi: Mach tijicñayoñic tiʼ caj tsaʼ bʌ c mele o tsaʼ bʌ cʌlʌ. Jin chaʼan, miʼ wen tijicñesañon tsaʼ bʌ i tsʼijbu David ti Salmo 51. Ti versículo 3, tsiʼ yʌlʌ: ‹Cujil tsac ñusʌbeyet a mandar. Mic ñaʼtan c mul tiʼ pejtelel ora›. Cheʼʌch mi cubin c bʌ cheʼ bʌ chʼijyemon, maʼañix chuqui wem bʌ mij qʼuel tic tojlel. Pero mij cʼajtesan tsaʼ bʌ i yʌlʌ David ti versículo 10: ‹Dios, chaʼ melbeñon c pusicʼal ti sʌc. Chaʼ mele quespíritu ti tsijib yicʼot ti toj›. Jiñʌch muʼ bʌ j cʼajtiben Dios jaʼel: Chaʼan miʼ coltañon chaʼan tijicñayon. Miʼ wen coltañon jaʼel jiñi versículo 17. Yaʼi miʼ yʌl: ‹Dios, maʼanic maʼ tsʼaʼlen jini juʼsʌbilix bʌ i pusicʼal muʼ bʌ i cʌy i mul›. Jajayajl mic pejcan ili, mij cʼajtesan chaʼan Jehová miʼ cʼuxbiñon».

«Miʼ ñumen pʼʌtʼan jiñi c pijtaya cheʼ bʌ mic ñaʼtan ili ejemplo tac am bʌ ti Biblia yicʼot chuqui tac an i yʌqʼueyon Dios. Mucʼʌch i mejlel c lʌtʼ jiñi c wocol come i sujmʌch mij qʼuel jiñi albil bʌ ti Biblia».