1 | Jiñi oración Acʼʌla «pejtelel chuqui mi laʼ cʼojoʼtan tiʼ tojlel»

JIÑI BIBLIA MIʼ YɅL: «I mi laʼ wʌcʼ pejtelel chuqui mi laʼ cʼojoʼtan tiʼ tojlel, come Dios mucʼʌch i ñaʼtañetla» (1 PEDRO 5:7).

¿Chuqui yom i yʌl?

Jehová miʼ subeñonla chaʼan mi lac suben pejtelel lac wocol yicʼot chuqui mi lac pensarin (Salmo 55:22). Dios miʼ mejlel lac suben baqui jach bʌ lac wocol. Mi joñonla mucʼʌch lac pensarin, miʼ mejlel lac ñop chaʼan Jehová mucʼʌch jaʼel. Jiñi oración jiñʌch yom bʌ mi lac ñaxan mel chaʼan mi lac chaʼ taj lac ñʌchʼtʌlel (Filipenses 4:6, 7).

¿Bajcheʼ miʼ coltañonla?

Cheʼ bʌ an lac chaʼan ansiedad o depresión tajol lac bajñel mi la cubin lac bʌ come mach tiʼ pejtelel miʼ ñaʼtañob bajcheʼ yubil mi la cubin (Proverbios 14:10). Pero mucʼʌch i mejlel lac jamʌ suben Dios bajcheʼ yubil mi la cubin come mucʼʌch i chʼʌmbeñonla i sujm i miʼ qʼuelonla ti ñuc. Jehová mucʼʌch i qʼuelonla, yujil chuqui cʼux mi la cubin yicʼot bajcheʼ mi lac chaʼlen wersa, jin chaʼan yom mi lac pejcan chaʼan mi lac suben pejtelel chuqui mi lac pensarin (2 Crónicas 6:29, 30).

Cheʼ bʌ mi lac pejcan Jehová, mucʼʌch lac ñumen ñop chaʼan yom i cʌntañonla. Cheʼʌch miʼ mejlel la cubin bajcheʼ juntiquil tsaʼ bʌ i tsʼijbu jiñi Biblia, tiʼ sube Dios: «Tsaʼ qʼueleyon ti wocol. Tsaʼ cʌmbeyon c pusicʼal ti wocol» (Salmo 31:7). Cheʼ la cujil chaʼan Jehová mucʼʌch i qʼuel ti ñuc woli bʌ (choncol bʌ) lac ñusan, miʼ mejlel i coltañonla chaʼan mi lac bej chaʼlen wersa. Mach cojach miʼ qʼuel chaʼan woli (yʌquel) lac ñusan wocol, miʼ wen ñaʼtan chuqui woli lac ñusan i miʼ coltañonla lac taj lac ñʌchʼtʌlel yicʼot i ñuqʼuesʌntel lac pusicʼal yaʼ ti Biblia.

Bajcheʼ miʼ coltan jiñi Biblia jiñi Julián

¿Bajcheʼ miʼ ticʼlañon jiñi ansiedad?

«Mic chaʼlen wersa chaʼan mic mʌlben (jotben) jiñi ansiedad yicʼot chaʼan maʼañic miʼ tilel tic jol jiñi mach tac bʌ comic c ñaʼtan. Mach pijtʌbilic c chaʼan miʼ waʼ ticʼlañon jiñi ansiedad anquese lon tijicñayon. Mi cujtel bajcheʼ ili cheʼ bʌ joyolon ti lac piʼʌlob come mic wen pensarin chuqui miʼ mejlel i yʌlob tic tojlel».

«Jiñi yujiloʼ bʌ chuqui mic ñusan miʼ chaʼleñob wersa chaʼan miʼ coltañoñob. An i tajol maʼañic miʼ wen coltañon jiñi muʼ bʌ i subeñoñob, pero mi cʌqʼueñob wocolix i yʌlʌ cheʼ miʼ chaʼleñob wersa i coltañoñob».

«An i tajol, wocol mi cubin chaʼan mic mel (chaʼlen) oración tiʼ caj miʼ waʼ tilel tic jol jiñi mach tac bʌ comic c ñaʼtan. Yomʌch mic xucʼchocon c ñaʼtʌbal chaʼan mic pejcan Jehová. Chuqui jach miʼ waʼ tilel tic pensar. Cheʼ bʌ maʼañic mic mejlel c xucʼchocon c ñaʼtʌbal, wocol mi cubin chaʼan mic suben Jehová chuqui mic ñaʼtan yicʼot bajcheʼ yubil mi cubin».

¿Bajcheʼ an i coltayon jiñi Biblia?

«Yaʼ ti Biblia an j cʌñʌ chaʼan jiñi coración mach cʼʌñʌl cʌlʌx tam o wen chajpʌbil chaʼan miʼ ñʌchʼtan Dios. An i tajol, cheʼ bʌ maʼañic mic taj chuqui mic suben Jehová, mucʼ jach cʌl: ‹Jehová, a wocolic, coltañon›. Anquese jin jach mi cʌl jiñi, cujil chaʼan Jehová mucʼʌch i chʼʌmbeñon i sujm i miʼ yʌqʼueñon i cʼʌjñibal bʌ c chaʼan. Mach cojach mic mel oración, cheʼ jaʼel añʌch c sʌcla j coltʌntel ti doctor. Ili chaʼchajp añʌch i coltayon, jin chaʼan tijicña mi cubin c bʌ. Yomʌch mic chaʼlen wersa chaʼan mic lʌcʼtesan c bʌ ti jiñi c Tat am bʌ ti panchan, i mucʼʌch c mel come cujil chaʼan mucʼʌch i cʼuxbiñon yicʼot yom i coltañon».