Jiñi xpejcaya juñob miʼ cʼajtibeñob i bʌ

Cheʼ baqui ora tiʼ sube satanás jiñi eva chaʼan miʼ cʼuxben i wut jiñi teʼ muʼ bʌ i yʌcʼ ti cʌñol chuqui utsʼat yicʼot chuqui jontol, ¿jimba jiñi ñaxam bʌ baqui tsiʼ taja ti tʼan chaʼan maʼañic miʼ chʌmel jiñi lac chʼujlel, cheʼ bajcheʼ miʼ ñaʼtʌntel ili ora?

Maʼañic. Satanás maʼañic tiʼ sube Eva chaʼan an i chʼujlel mach bʌ yujilic chʌmel. Maʼañic tiʼ sube chaʼan an chuqui cuxul, mach bʌ mejlic ti qʼuelol, mi caj i cʌytʌl cheʼ miʼ chʌmel i miʼ majlel ti chumtʌl ti yambʌ parte. Satanás tsiʼ cʼʌñʌ juncojt lucum chaʼan miʼ suben chaʼan maʼañic mi caj i junyajl chʌmel. Tsiʼ yʌqʼue i chʼʌmben i sujm chaʼan chʌn cuxul mi caj i yajñel i chaʼan mi caj i ñusan i bʌ tiʼ cuxtʌlel ila ti Pañimil, mach bʌ lajalic bajcheʼ tsaʼ subenti ti Dios (Gn. 2:17; 3:3-5).

Jin chaʼan, mi mach yaʼic ti pʌcʼʌbʌl Edén tsaʼ tejchi jiñi cʌntesʌntel chaʼan maʼañic miʼ chʌmel jiñi lac chʼujlel, ¿baqui ora tsaʼ tejchi? Maʼañic miʼ mejlel lac ñoj al jalix tsaʼ tejchi. Mi lac ñaʼtan chaʼan jiñi mach bʌ weñic ñopbalʌl tac tsaʼ jili cheʼ bʌ tsaʼ ñumi jiñi ñuc bʌ Butʼjaʼ tiʼ yorajlel Noé. Come jin jach Noé yicʼot i familia tsaʼ coliyob i miʼ chʼujutesañob Dios, pejtelel jiñi i ñaʼtʌbal mach tac bʌ i sujmic ñopbalʌl tac tsaʼ luʼ jili.

Jin chaʼan, jiñi cʌntesʌntel am bʌ ili ora chaʼan maʼañic miʼ chʌmel lac chʼujlel, miʼ mejlel la cʌl chaʼan tsaʼ tejchi cheʼ ñumeñix jiñi ñuc bʌ Butʼjaʼ. Cheʼ baqui ora Dios tsiʼ socbeyob i tan yaʼ ti Babel jiñi wiñicob xʼixicob tsaʼ pam pujquiyob «ti pejtelel pañimil», miʼ mejlel la cʌl chaʼan tsiʼ chʼʌmʌyob majlel jiñi ñaʼtʌbalʌl chaʼan jiñi quixtañujob an i chaʼañob i chʼujlel mach bʌ yujilic chʌmel (Gn. 11:8, 9). Anquese cabʌl chuqui miʼ yʌjlel chaʼan jalixqui tsaʼ tejchi jiñi mach bʌ i sujmic cʌntesa, muʼ bʌ i mejlel lac ñop jiñʌch chaʼan jiñi Satanás, baqui «chʼoyol [...] pejtelel lot», i mulʌch yicʼot tsiʼ taja i tijicñʌyel cheʼ tsaʼ pam pujqui ili mach bʌ i sujmic ñaʼtʌbalʌl (Jn. 8:44).