Laʼ laj coltañob jiñi muʼ bʌ i ñusañob wocol tac

1. ¿Chuqui tac miʼ mel Jehová chaʼan miʼ jacʼben i yoración jiñi i wiñicob?

¿A WUJIL ba chaʼan Jehová miʼ mejlel i cʼʌñet chaʼan miʼ jacʼben i yoración juntiquil hermano? Mach yʌlʌlic mi ancianojonla, siervo ministerial, precursor, publicador, chʼitoñontola, añix lac jabilel, mi wiñiconla o xʼixiconla. Cheʼ bʌ juntiquil muʼ bʌ i cʼuxbin Jehová miʼ cʼajtiben i coltaya, jiñi lac Dios miʼ cʼʌn jiñi ancianojob yicʼot yambʌ i wiñicob chaʼan miʼ chaʼleñob coltaya (Col. 4:11). Jumpʼejlʌch ñuc bʌ lac majtan cheʼ bʌ Jehová miʼ cʼʌñonla chaʼan mi laj coltan jiñi la quermañujob. Miʼ mejlel lac mel cheʼ bʌ miʼ tejchel jumpʼejl cʼamʌjel, yambʌ wocol o cheʼ bʌ an ticʼlʌntel.

CHEʼ BɅ MIʼ TEJCHEL JUMPʼEJL CʼAMɅJEL

2. ¿Chucoch tajol wocol mi la cubin chaʼan mi laj coltan jiñi hermanojob cheʼ bʌ miʼ tejchel jumpʼejl cʼamʌjel?

² Ñumen wocol chaʼan mi laj coltan lac bʌ cheʼ bʌ an jumpʼejl cʼamʌjel muʼ bʌ i pam pujquel. Jumpʼejl ejemplo, tajol la comʌch lac julaʼtan jiñi hermanojob, pero mach yomic mi lac mel (chaʼlen). O la com lac pʌy ti cʼux waj jiñi maʼañobic bʌ i taqʼuin, pero mach mejlic lac mel jaʼel. Tajol la comʌch laj coltan jiñi yañoʼ bʌ, pero woli (choncol) i ñusan wocol jiñi lac familia jaʼel. La comʌch laj coltan jiñi hermanojob, i Jehová tijicña miʼ yubin cheʼ bʌ miʼ qʼuel chaʼan mi lac chaʼlen wersa lac mel cheʼ bajcheʼ cʼamel mi lac mejlel (Pr. 3:27; 19:17). Cheʼ jiñi, ¿chuqui miʼ mejlel lac mel?

3. ¿Chuqui mi laj cʌn tiʼ tojlel jiñi ancianojob tiʼ congregación Desi? (Jeremías 23:4).

³ Muʼ bʌ i mejlel i melob jiñi ancianojob. Mi jatet ancianojet, cʌñʌ ti wen jiñi tiñʌmeʼ tac (pejcan Jeremías 23:4). Desi, tsaʼ bʌ lac taja ti tʼan yaʼ ti yambʌ estudio, miʼ yʌl: «Jiñi ancianojob ti jiñi j grupo chaʼan subtʼan toj ñʌmʌlobix ti subtʼan yicʼoton i yicʼotob jiñi hermanojob, i an chuqui tac mij comol mel lojon».b Cheʼ bajcheʼ jiñi, jiñi ancianojob mach wocolic tsiʼ yubiyob chaʼan miʼ coltañob Desi cheʼ bʌ tsaʼ tejchi jiñi pandemia chaʼan COVID-19 i an i familia tac tsaʼ bʌ chʌmi tiʼ caj jiñi.

4. ¿Chucoch jiñi ancianojob tsaʼʌch mejli i coltañob Desi, i chuqui miʼ mejlel i cʌñob jiñi ancianojob?

⁴ Desi miʼ yʌl: «Jiñi ancianojob camigojobix, jin chaʼan mach wocolic tsaʼ cubi chaʼan mic subeñob bajcheʼ yubil mi cubin c bʌ yicʼot jiñi muʼ bʌ c pensarin». ¿Chuqui miʼ mejlel i cʌñob jiñi ancianojob? Cʌntanla jiñi tiñʌmeʼ tac yicʼot sujtenla tiʼ yamigojob cheʼ bʌ maxto añic jiñi wocol tac. Mi maʼañic miʼ mejlel laʼ julaʼtañob tiʼ caj jumpʼejl cʼamʌjel, sʌclanla bajcheʼ yambʌ miʼ mejlel laʼ pejcañob. Desi miʼ cʼajtesan: «An i tajol, mach juntiquilic jach anciano miʼ pejcañon o miʼ chocbeñon tilel mensaje ti jiñi jach bʌ qʼuin. Tsaʼʌch cʼoti tic pusicʼal jiñi texto tac tsaʼ bʌ i pejcʌbeyoñob, anquese wen j cʌñʌyix».

5. ¿Bajcheʼ miʼ mejlel i ñaʼtañob jiñi ancianojob chuqui i cʼʌjñibal i chaʼan jiñi hermanojob, i bajcheʼ miʼ mejlel i coltañob?

⁵ Junchajp bajcheʼ jiñi ancianojob miʼ mejlel i ñaʼtañob chuqui i cʼʌjñibal i chaʼan jiñi hermanojob jiñʌch cheʼ bʌ miʼ melbeñob cʼajtiya tac i tsajal yom miʼ melob (Pr. 20:5, TNM). ¿Añʌch ba jiñi i cʼʌjñibal bʌ i chaʼañob, bajcheʼ bʌl i ñʌcʼob o tsʼac tac? ¿Muʼ ba i mejlel i sʌtob i yeʼtel (troñel) o i yotot? ¿Yomoʼ ba chaʼan mi laj coltañob chaʼan miʼ cʼajtiñob coltʌntel ti jiñi yumʌlob? An hermanojob tsaʼ bʌ i coltayob Desi ti jiñi i cʼʌjñibal bʌ i chaʼan. Pero jiñi tsaʼ bʌ i ñumen colta jiñʌch cheʼ bʌ jiñi ancianojob tsiʼ coltayob cheʼ bʌ chʼijyem yicʼot chaʼan maʼañic miʼ ñajtʼesan i bʌ ti Dios. Miʼ yʌl: «Jiñi ancianojob miʼ chaʼleñob oración yicʼoton. Maʼañic cʼajal c chaʼan chuqui tsiʼ yʌlʌyob, pero cʼajalʌch c chaʼan bajcheʼ yubil mi cubin c bʌ. Lajalʌch bajcheʼ Jehová tiʼ subeyon ‹Mach a bajñelic›» (Is. 41:10, 13).

6. ¿Bajcheʼ miʼ mejlel laj comol coltan lac bʌ yaʼ ti congregación? (Qʼuele jiñi foto tac).

⁶ Muʼ bʌ i mejlel i mel jiñi congregación. La cujil chaʼan jiñi ancianojob jiñʌch ñaxam bʌ yom miʼ qʼuelob chuqui i cʼʌjñibal i chaʼan jiñi hermanojob. Pero Jehová miʼ subeñonla ti lac pejtelel chaʼan miʼ mejlel laj coltan yañoʼ bʌ (Gál. 6:10). Anquese mach wen ñuquic chuqui mi lac mel mucʼʌch i mejlel i wen coltan juntiquil cʼam bʌ. Jiñi alʌlob miʼ mejlel i melob (pʌtob) jumpʼejl tarjeta o jumpʼejl dibujo chaʼan miʼ tijicñesañob juntiquil hermano. Jiñi xcolelob miʼ mejlel i coltañob ti mʌñoñel juntiquil hermana. Yañoʼ bʌ miʼ mejlel i melob chuqui miʼ cʼuxob jiñi cʼamoʼ bʌ yicʼot miʼ majlel i cʌybeñob tiʼ yotot. I sujmʌch chaʼan pejtelel jiñi congregación yomʌch coltʌntel cheʼ bʌ tsaʼix wen pujqui jumpʼejl cʼamʌjel. Jin chaʼan, weñʌch cheʼ bʌ mi lac jumucʼ cʌytʌl cheʼ bʌ tsaʼix ujti jiñi tempa bʌ chaʼan mi lac chaʼlen tʼan la quicʼot jiñi hermanojob, mach yʌlʌyic mi yaʼ tiʼ Yotlel tempa bʌ o ti videoconferencia. I jiñi ancianojob yomʌch miʼ tijicñesʌntelob jaʼel. An hermanojob muʼ bʌ i tsʼijbubeñob jun jiñi ancianojob chaʼan miʼ yʌqʼueñob wocolix i yʌlʌ, come ñumen añobto i yeʼtel cheʼ bʌ an jumpʼejl cʼamʌjel. Weñʌch cheʼ ti lac pejtelel mi lac chaʼlen wersa chaʼan mi lac jacʼ ili ticʼojel: «Chʌn tijicñesan laʼ bʌ yicʼot comol pʼʌtʼesan laʼ bʌ» (1 Tes. 5:11).

CHEʼ BɅ MIʼ YUJTEL JUMPʼEJL WOCOL

7. ¿Chuqui tac miʼ mejlel ti ujtel tiʼ caj jumpʼejl wocol?

⁷ Cheʼ bʌ miʼ yujtel jumpʼejl wocol orajach miʼ mejlel i qʼuextʌben i cuxtʌlel juntiquil lac piʼʌl. Tajol miʼ mejlel i sʌt chuqui an i chaʼan, i yotot o juntiquil tiʼ familia. I jiñi cheʼʌch miʼ mejlel ti ujtel tiʼ tojlel jiñi hermanojob jaʼel. ¿Bajcheʼ miʼ mejlel laj coltañob?

8. ¿Chuqui yom miʼ melob jiñi ancianojob yicʼot jiñi tatʌlob chaʼan chajpʌbilob chaʼan jumpʼejl wocol?

⁸ Muʼ bʌ i mejlel i melob jiñi ancianojob. Ancianojob, coltañonla jiñi hermanojob chaʼan miʼ chajpañob i bʌ chaʼan jumpʼejl wocol. Wen qʼuelela mi jiñi congregación yujilʌch chuqui yom miʼ melob chaʼan maʼañic chuqui miʼ chaʼleñob yicʼot chaʼan miʼ pejcañetobla. Margaret, tsaʼ bʌ lac taja ti tʼan ti jiñi yambʌ estudio, miʼ yʌl: «Ti jiñi yomto bʌ melol ti congregación, jiñi ancianojob tsiʼ yʌlʌyob chaʼan maxto ñumeñic jiñi i yorajlel tojcʌlel, i chaʼan orajach yom mi lon c loqʼuel mi jiñi añoʼ bʌ i yeʼtel miʼ subeñon lojon o cheʼ bʌ ñumen wocolix». Weñʌch cheʼ bʌ tsaʼ ñusʌnti jiñi discurso come tsaʼ jach ñumi joʼpʼejl semana i tsaʼ chaʼ caji ti ochel cʼajc. Tatʌlob, ti jiñi laʼ chʼujutesaya ti familia, alʌla chuqui yom mi laʼ mel ti jujuntiquil cheʼ bʌ miʼ tejchel jumpʼejl wocol. Mi chajpʌbiletʌchla laʼ wicʼot laʼ walobil, maʼañic mi caj laʼ sʌt laʼ ñʌchʼtʌlel.

9. ¿Chuqui yom miʼ melob jiñi ancianojob cheʼ bʌ maxto tejchi jumpʼejl wocol yicʼot cheʼ bʌ tsaʼix ñumi?

⁹ Mi jatet an ti a wenta jumpʼejl grupo, mach a pijtan chaʼan jinto miʼ yujtel jumpʼejl wocol chaʼan maʼ qʼuel mi añʌch a chaʼan i número jiñi hermanojob añoʼ bʌ ti a grupo. Mele jumpʼejl lista i chʌcʌ tsijibtesan. Cheʼ bajcheʼ jiñi, mi tsaʼ ujti jumpʼejl wocol, mi caj i mejlel a pejcan jujuntiquil publicador yicʼot maʼ qʼuel chuqui i cʼʌjñibal i chaʼan. Ili información yom maʼ ñusʌben jiñi coordinador chaʼan ancianojob, i jiñi mi caj i suben jiñi superintendente chaʼan circuito. Weñʌch mi caj i loqʼuel jiñi eʼtel mi mucʼʌch laʼ comol mel. Cheʼ bʌ tsaʼix lajmi jiñi cʼajc, jiñi superintendente chaʼan circuito baqui an Margaret 36 hora maʼañic tsaʼ wʌyi chaʼan miʼ qʼuel jiñi eʼtel woli (yʌquel) bʌ i melob jiñi ancianojob chaʼan miʼ pejcañob jiñi 450 hermanojob tsaʼ bʌ loqʼuiyob tiʼ yotot (2 Cor. 11:27). Cheʼ bajcheʼ iliyi, tsaʼ tajle baqui miʼ mejlelob ti cʌytʌl jiñi hermanojob.

10. ¿Chucoch ñuc i cʼʌjñibal i chaʼan jiñi ancianojob cheʼ miʼ cʌntañob jiñi hermanojob? (Juan 21:15).

¹⁰ Jiñi ancianojob añob tiʼ wenta miʼ ñuqʼuesʌbeñob i pusicʼal jiñi hermanojob yicʼot chaʼan miʼ coltañob chaʼan lʌcʼʌl miʼ yajñelob yicʼot Jehová (1 Ped. 5:2). Cheʼ bʌ miʼ yujtel jumpʼejl wocol, ñaxan yom miʼ qʼuelob mi juntiquil hermano maʼañic chuqui tsiʼ chaʼle yicʼot mi añʌch chuqui miʼ cʼux, i pislel yicʼot baqui miʼ cʌytʌl. Pero tajol cabʌl uw yom miʼ coltʌntel jiñi tsaʼ bʌ i ñusayob wocol (pejcan Juan 21:15). Harold, ochem bʌ ti jiñi Comité chaʼan sucursal i pejcʌbil bʌ i chaʼan cabʌl am bʌ ñusayob wocol, miʼ yʌl: «Mach ti orajic miʼ chaʼ ubiñob i tijicñʌyel jiñi hermanojob. Tajol miʼ chaʼ tech i melob jiñi ñʌmʌl bʌ i melob, pero miʼ chʌn cʼajtesañob chaʼan an majqui tsaʼ chʌmiyob (sajtiyob) i chaʼan, an chuqui tiʼ sʌtʌyob o chaʼan wen bʌbʌqʼuen jax bajcheʼ tsiʼ ñusayob. Jiñi miʼ mejlel i chaʼ aqʼueñob i chʼijyemlel. Pero iliyi mach yomic i yʌl chaʼan maʼañic miʼ ñopob Dios, i tilelʌch cheʼ miʼ yubiñob i bʌ bajcheʼ jiñi».

11. ¿Bajcheʼ yom miʼ coltʌntelob jiñi familia tac?

¹¹ Ñuc i cʼʌjñibal cheʼ jiñi ancianojob miʼ jacʼob ili ticʼojel: «Chaʼlenla uqʼuel laʼ wicʼot jiñi woliyoʼ bʌ ti uqʼuel» (Rom. 12:15). Jiñi am bʌ i ñusayob jumpʼejl wocol yom miʼ chʌn subentelob chaʼan Jehová yicʼot jiñi hermanojob mucʼʌch i bej cʼuxbiñob. Jiñi ancianojob miʼ mejlel i coltañob jiñi familia tac chaʼan miʼ chaʼleñob oración, estudio, miʼ majlelob ti tempa bʌ yicʼot chaʼan miʼ chaʼleñob subtʼan. Cheʼ jaʼel, miʼ mejlel laʼ suben jiñi tatʌlob chaʼan miʼ coltañob i yalobil chaʼan miʼ cʼajtesañob chaʼan an chuqui tac maʼañic miʼ mejlel i jisan jumpʼejl wocol. Tatʌlob, cʼajtesʌbenla jiñi laʼ walobilob chaʼan Jehová juntiquilʌch amigo tiʼ pejtelel ora yicʼot maʼañic mi caj i cʌyob. Tsictesʌbeñobla chaʼan tiʼ pejtelel ora an hermanojob chajpʌbiloʼ bʌ chaʼan miʼ coltañob (1 Ped. 2:17).

12. ¿Chuqui miʼ mejlel i mel jiñi congregación chaʼan miʼ chaʼlen coltaya cheʼ bʌ miʼ yujtel jumpʼejl wocol? (Qʼuele jiñi foto).

¹² Muʼ bʌ i mejlel i mel jiñi congregación. Mi tsaʼ ujti jumpʼejl wocol yaʼ baqui lʌcʼʌ chumulet, cʼajtiben jiñi ancianojob bajcheʼ miʼ mejlel a chaʼlen coltaya. Tajol miʼ mejlel a wʌqʼuen ti majan a wotot jiñi hermanojob tsaʼ bʌ loqʼuiyob tiʼ yotot o jiñi woliyoʼ bʌ ti coltaya. Tajol miʼ mejlel a puc bʌlñʌcʼʌl yicʼot yan tac bʌ ñuc bʌ i cʼʌjñibal. I mi ñajt baqui tsaʼ ujti jiñi wocol, mucʼʌch i mejlel a chaʼlen coltaya jaʼel. ¿Bajcheʼ? Tajayob ti tʼan ti a woración jiñi tsaʼ bʌ i ñusayob wocol yicʼot acʼʌ a donación (2 Cor. 1:8-11; 8:2-5). I mi maʼ mejlel ti majlel yaʼ baqui tsaʼ ujti jiñi wocol, cʼajtiben jiñi ancianojob bajcheʼ maʼ mejlel ti coltaya. Mi tsaʼ pʌjyiyet, tajol mi caj wʌqʼuentel capacitación chaʼan maʼ mejlel ti coltaya yaʼ baqui maʼ chojquel majlel.

CHEʼ BɅ AN LAC TSʼAʼLENTEL

13. ¿Chuqui tac ti wocol miʼ ñusañob jiñi hermanojob yaʼ baqui mʌctʌbil jiñi la queʼtel?

¹³ Ñumen wocol jax miʼ ñusañob jiñi hermanojob cheʼ bʌ an tsʼaʼlentel. Jiñi chumuloʼ bʌ yaʼ baqui mʌctʌbil la queʼtel mucʼʌch i bej ñusañob wocol tiʼ caj taqʼuin, miʼ cʼamʼañob yicʼot an majqui miʼ chʌmel i chaʼañob. Tiʼ caj lac mʌctʌntel, jiñi ancianojob maʼañic miʼ mejlel i wen coltañob o i pejcañob jiñi yomoʼ bʌ coltʌntel. Jiñʌch tsaʼ bʌ i ñusa Andréi, tsaʼ bʌ lac taja ti tʼan ti jiñi yambʌ estudio. Juntiquil hermana tiʼ grupo tsiʼ ñusa wocol tiʼ caj taqʼuin i ti wiʼil tsiʼ taja jumpʼejl accidente. Tsiʼ wen chʼʌmʌ operación i maʼañic tsaʼ mejli ti eʼtel. Anquese mʌctʌbil jiñi la queʼtel yicʼot woliʼ ñumel jiñi pandemia, jiñi hermanojob tsiʼ chaʼleyob wersa chaʼan miʼ coltañob, i Jehová maʼañic tsiʼ cʌyʌyob.

14. ¿Bajcheʼ miʼ pʌsob jiñi ancianojob chaʼan miʼ ñopob ti Jehová?

¹⁴ Muʼ bʌ i mejlel i melob jiñi ancianojob. Andréi tsiʼ pejca Jehová ti oración i tsiʼ mele cheʼ bajcheʼ cʼamel miʼ mejlel. ¿I bajcheʼ tsiʼ jacʼʌ Jehová? Tsiʼ cʼʌñʌ yambʌ hermanojob ñumen cabʌl bʌ chuqui miʼ mejlel i melob chaʼan miʼ coltañob. An tsaʼ bʌ i pʌyʌyob majlel tiʼ cita jiñi hermana i yambʌyob tsiʼ yʌqʼueyob taqʼuin. Jehová tsiʼ yʌqʼueyob i bendición chaʼan temel tsaʼ ajñiyob yicʼot chaʼan pejtelel tsaʼ bʌ i meleyob (Heb. 13:16). Ancianojob, cheʼ bʌ miʼ mʌctʌntel jiñi la queʼtel, cʼajtibenla jiñi yañoʼ bʌ chaʼan miʼ coltañetobla (Jer. 36:5, 6). Pero ñumen cʼajtibenla i coltaya Jehová. Mi caj i coltañetla chaʼan miʼ mejlel laʼ coltan jiñi hermanojob.

15. ¿Chuqui yom mi lac mel chaʼan chʌn temel mi la cajñel cheʼ bʌ an ticʼlʌntel?

¹⁵ Muʼ bʌ i mejlel i mel jiñi congregación. Cheʼ bʌ an ticʼlʌntel, tajol mach cabʌlic mi caj lac tempan lac bʌ. Jin chaʼan, ñuc i cʼʌjñibal cheʼ wen añonla la quicʼot yambʌlob. Laʼ la cʌcʼ lac bʌ tiʼ contra Satanás, mach jiñic ti jiñi la quermañujob. Laʼ lac ñusʌben i mul jiñi la quermañujob, i ti ora yom mi lac tojʼesan jiñi lac wocol tac (Pr. 19:11; Efes. 4:26). Laʼ lac tech laj coltan lac bʌ (Tito 3:14). Cheʼ jiñi grupo baqui an Andréi tsiʼ coltayob jiñi hermana, tsaʼʌch i tajayob i wenlel tiʼ pejtelelob. Ñumen temel tsaʼ ajñiyob bajcheʼ jumpʼejl familia (Sal. 133:1).

16. Cheʼ bajcheʼ miʼ yʌl Colosenses 4:3, 18, ¿chuqui miʼ mejlel lac mel tiʼ tojlel jiñi hermanojob woli bʌ i ticʼlʌntelob?

¹⁶ Cabʌl la quermañujob miʼ melbeñob i yeʼtel Jehová anquese jiñi añoʼ bʌ i yeʼtel miʼ mʌctañob. An añoʼ bʌ ti cárcel. Laʼ lac tajob ti tʼan ti la coración, jiñi i familiajob yicʼot muʼ bʌ i chaʼleñob wersa chaʼan miʼ coltañob chaʼan pʼʌtʌl miʼ yajñelob, wen miʼ yajñelob yicʼot chaʼan miʼ loqʼuelob ti cárcel (pejcan Colosenses 4:3, 18).c Laʼ lac chʌn cʼajtesan bajcheʼ cʼamel i pʼʌtʌlel jiñi oración (2 Tes. 3:1, 2; 1 Tim. 2:1, 2).

17. ¿Bajcheʼ miʼ mejlel lac chajpan lac bʌ ili ora chaʼan jiñi ticʼlʌntel?

¹⁷ Jatet yicʼot a familia miʼ mejlel laʼ chajpan laʼ bʌ ti ili ora chaʼan jiñi ticʼlʌntel (Hech. 14:22). Mach laʼ ñaʼtan jiñi mach tac bʌ weñic muʼ bʌ i mejlel ti ujtel. Ñumen lʌcʼtesan laʼ bʌ ti Jehová yicʼot coltan jiñi a walobilob chaʼan cheʼʌch miʼ melob jaʼel. Mi tsaʼ cajiyetla ti pensar, pejcanla Jehová ti oración (Sal. 62:7, 8). Alʌ a wicʼot a familia chucoch yom mi laʼ ñop tiʼ tojlel.d Mi chajpʌbiletʌch chaʼan jumpʼejl wocol i maʼ ñop ti Jehová, mi caj i coltan jiñi a walobilob chaʼan miʼ pʌsob i chʼejlel yicʼot chaʼan maʼañic miʼ sʌtob i ñʌchʼtʌlel.

18. ¿Bajcheʼ yilal mi caj lac chumtʌl ti talto bʌ qʼuin?

¹⁸ Jiñi i ñʌchʼtʌlel Dios miʼ coltañonla chaʼan maʼañic chuqui mi lac bʌcʼñan (Filip. 4:6, 7). Jehová miʼ cʼʌn chaʼan maʼañic mi lac wen chaʼlen pensar cheʼ bʌ miʼ tejchel jumpʼejl cʼamʌjel, jumpʼejl wocol o jiñi ticʼlʌntel. Miʼ cʼʌn jiñi ancianojob añoʼ bʌ tiʼ wenta i cʌntan jiñi tʌñʌmeʼ tac, i miʼ yʌqʼueñonla jiñi ñuc bʌ majtan chaʼan mi laj comol coltan lac bʌ. Ili ñʌchʼtʌlel miʼ chajpañonla chaʼan mi lac ñusan ñumen tsʌts tac bʌ wocol ti talto bʌ qʼuin, bajcheʼ jiñi «i yorajlel cabʌl wocol» (Mat. 24:21). Ti jiñi bʌ ora ñuc i cʼʌjñibal cheʼ maʼañic mi lac sʌt lac ñʌchʼtʌlel yicʼot chaʼan mi laj coltan yambʌlob chaʼan cheʼʌch miʼ melob jaʼel. Pero cheʼ bʌ miʼ ñumel jiñi i yorajlel cabʌl wocol maʼañix mi caj lac chʌn chaʼlen pensar. Muqʼuix caj lac taj jiñi ñaʼtʌbil i chaʼan Jehová chaʼañonla: Ñʌchʼtʌlel tiʼ pejtelel ora (Is. 26:3, 4).