Marcos
“Oteipõecʉre” jã́ri dápiarĩ ne đarãjiyepe aino
4 Apejãravʉ Jesús buedejameđa cojedeca macajitabʉ ʉrabʉ ẽcarʉi. Aru obedivʉ põeva cójijidejaimađa ʉ̃i yebai. Que baru jiađocũ ẽcarʉ joabenoi cʉricũre jã́ri, jaturĩ dobarejameđa dicũra, buecʉyʉ põevare. Aru caivʉ ina põeva cʉrejaimađa macajitabʉ ʉrabʉ ẽcarʉi. 2 Náre buedejameđa jã́ri dápiarĩ ne đarãjiyepe ayʉ caijĩe apejĩene. Aru arejameđa ʉ̃i bueiyeque:
3 —Jápiajarã. Yui oteipõecʉ otecʉnʉquemavʉ. 4 Ʉ̃i oteiyede ape oteiye tʉquemavʉ ma ẽcarʉi. Aru míjina darĩ, ãradaquemavʉ caiye iye oteiyede. 5 Ape oteiye tʉquemavʉ joborõ edubenoi cʉ̃raboa pʉenoi. Nore joborõ yaʉrijĩe cʉbeniburu, maumejiena pĩarí etaquemavʉ. 6 Ʉbenita aviá ʉ̃i boiyede ẽ́quemavʉ. Aru nʉomua ʉ̃mʉjʉrimua cʉbeni, yaiquémavʉ. 7 Ape oteiye tʉquemavʉ miucʉa jẽneboi. Aru yóboi miucʉa bʉcʉrĩ, muiní, chĩoiyede, jẽiye jẽmetequemavʉ. 8 Aru ape oteiye tʉquemavʉ mearo joborõi. Aru jẽiye jẽquemavʉ, apeñʉ jẽiñʉ treinta paivʉa, aru apeñʉ jẽiñʉ sesenta paivʉa, aru apeñʉ jẽiñʉ cien paivʉa, caiye oteiyabea coapa, náre arĩ buedejameđa Jesús.
9 Dinʉmʉ Jesús arejameđa náre:
—Me jápiajarã mʉja iye ji bueiyede, arejameđa Jesús.
Aipe aiyʉrõre Jesús ʉ̃i jã́ri dápiarĩ ne đarãjiyepe aino
10 Jesús ʉ̃i cʉede cũinácʉva, apevʉ ʉ̃i yebai joabenoi cʉrivʉ aru ʉ̃i bueimara máre jẽniari jã́rejaimađa ʉ̃́re:
—¿Aipe teni bueyʉrʉ̃ mʉ jã́ri dápiarĩ ñʉje đarãjiyepe ayʉ mi coyʉiyeque? arejaimađa.
11 4:11-12 Jesús arejameđa náre:
—Mʉjare coyʉrĩ majide đayʉbu yʉ Jʉ̃menijicʉ ʉ̃i coyʉicõjeme máquede. Ʉ̃ jaboteibi mʉjare, ʉ̃i põevare. Ʉbenita ina ʉ̃i jaboteimara ãmevʉ, yópe jedevai cʉrivʉpe, diede majibema. Quéda jã́ri dápiarĩ ne đarãjiyepe ayʉ bueyʉbu yʉ náre, jã́ivʉreca, ne jã́ri majibenajiyepe ayʉ aipe aiyʉrõre ne jã́iyede, aru jápiaivʉreca, ne jápiarĩ majibenajiyepe ayʉ aipe aiyʉrõre ne jápiaiyede. Na majidivʉ baru, chĩori oatʉvajebu ne đaiyede. Jʉ̃menijicʉre jʉ aru, ãrʉmetejebu ʉ̃ ne ãmeina teiyede, arejameđa Jesús. 12 —
Jesús ʉ̃i coyʉino aipe aiyʉrõre “oteipõecʉre” jã́ri dápiarĩ ne đarãjiyepe aino
13 Yópe arĩ, Jesús coyʉrejameđa ʉ̃i bueimarare:
—¿Majibenarʉ yo jã́ri dápiarĩ mʉje đarãjiyepe ayʉ ji ainore? ¿Aipe đarĩ majinajivʉrʉ̃ caiye ji jã́ri dápiarĩ mʉje đarãjiyepe ayʉ arĩ bueiyede? 14 Iye oteiye Jʉ̃menijicʉi yávaiyepe paiyebu. Aru ñai oteipõecʉ Jʉ̃menijicʉi yávaiyede coyʉipõecʉpe páyʉbe. 15 Aru inamu ma ẽcarʉi oteiye tʉrĩduiye báquepe paivʉ. Náre coyʉiyede Jʉ̃menijicʉi yávaiyede jápiađama, ʉbenita coreóvarĩ eabevʉva. Que baru ne jápiarĩburu yóboi, ñai abujuvai jabocʉ darĩ, ãrʉmetede đaibi Jʉ̃menijicʉi yávaiyede, ne jápiaiye báquede. 16 Aru inamu joborõ edubenoi, cʉ̃raboa pʉenoi, oteiye tʉrĩduiye báquepe paivʉ. Jʉ̃menijicʉi yávaiyede jápiarĩ, torojʉma me. 17 Ʉbenita Jʉ̃menijicʉi yávaiyede jʉ arĩduyama. Que baru quĩ́jino yóboi, põeva ne cãrijovaru aru ñájine đaru náre, ne jʉ aiye boje, maumena dajocađama ne jʉ aiyede Jʉ̃menijicʉi yávaiyede. Que teni jʉ abema na. 18 4:18-19Aru inamu miucʉa jẽneboi oteiye tʉrĩduiye báquepe paivʉ. Na máre jápiaivʉ Jʉ̃menijicʉi yávaiyede, ʉbenita cãrijiñama ijãravʉquede. Torojʉma tãutʉraque. Aru cʉvaiyʉma caijĩe apejĩene. Que baru dápiađama caiye diede. Ʉbenita dápiabema Jʉ̃menijicʉi yávaiyede. Que baru Jʉ̃menijicʉ cađatebebi náre ʉ̃i yávaiyeque yópe ʉ̃i ʉrõpe. 19 — 20 Ʉbenita inamu mearo joborõi oteiye tʉiye báquepe paivʉ. Jʉ̃menijicʉi yávaiyede jápiađama. Aru diede jʉ ađama. Nárecabu jʉ are đaivʉ apevʉ põevare, apevʉ treinta paivʉre, apevʉ sesenta paivʉre, aru apevʉ cien paivʉre, arĩ buedejameđa Jesús.
“Pẽoibʉre” jã́ri dápiarĩ ne đarãjiyepe aino
(Mt 5.15, 7.2, 10.26, 13.12, 25.29; Lc 6.38, 8.16-18, 11.33, 12.2, 19.26)
21 Cojedeca Jesús, yópe arĩ, buedejameđa náre:
—¿Põecʉ davaidi pẽoibʉre, ñócʉyʉ dibʉre pʉebʉ cãchinoi o paraino cãchinoi? Bi, quénora tʉoibi dibʉre jocʉve pʉenora. 22 Que baru caiye yaveiye báque jároquiyebu. Aru dupióvaiye báquede máre jã́rajarama caivʉ põeva. 23 Me jápiajarã mʉja iye ji bueiyede, arejameđa Jesús.
24 Aru cojedeca, yópe arĩ, buedejameđa náre:
—Me dápiajarã mʉje jápiaiyede ji bueiyede. Yópe põeva ađama: “Mi corevacaru apecʉre cũinárʉ jororʉque, didʉmica Jʉ̃menijicʉ corevacacʉyʉme mʉre. Aru jícʉyʉme pʉeno baju”. 25 Nopedeca ñai jápiayʉre Jʉ̃menijicʉi yávaiyede Jʉ̃menijicʉ pʉeno baju ʉ̃i majiéquede jícʉyʉme ʉ̃́re. Ʉbenita ñai jápiabecʉre Jʉ̃menijicʉi yávaiyede, iye ʉ̃i quĩ́jino majiéde Jʉ̃menijicʉ ʉ̃́re ĩcʉyʉme, arejameđa Jesús.
“Oteiye bʉcʉinore” jã́ri dápiarĩ ne đarãjiyepe aino
26 4:26-27 Cojedeca Jesús arĩ coyʉrejameđa:
—Jʉ̃menijicʉi jaboteino yópe painotamu. Cũinácʉ ʉ̃mʉ ʉ̃i oteiye epeiye joborõi, oteni bʉojarĩ cãimi ʉ̃ ñamiá coapa aru coedaibi jãravʉa coapa. Que teni ãrʉmemi diede, oteiye báquede. Ʉ̃i oteiye bʉcʉivʉ, ʉbenita ʉ̃i majibedeca. 27 — 28 No joborõ bʉcʉre đaivʉ no bajumia. Mamarʉmʉ etaivʉ cainiñʉ. No yóboi etaivʉ yoca. No yóbo baji etaivʉ diñʉ jẽiyoa. 29 Aru jẽijãravʉ eaiyede, jẽiyoa coboiyede, põeva jẽñaima divʉáre, arejameđa Jesús.
“Oteiyabe mostazare” jã́ri dápiarĩ ne đarãjiyepe aino
30 Jesús arejameđa:
—¿Yépe ãrojari yo Jʉ̃menijicʉi jaboteino? ¿Yéque jã́ri coyʉrãjidi maja nore? 31 Yópe mostaza ãmicʉriyabe oteiyabepebu. Cũinácʉ ʉ̃mʉ diyabede ĩni, oteibi joborõi. Diyabedecabu oteiyabe quĩ́jiyabe caiye oteiye pʉeno. 32 Ʉbenita ʉ̃i oteniburu yóboi, bʉcʉrĩ mʉivʉ ʉracʉ ape oteiye pʉeno. Aru dicʉ cavabʉa ʉracavabʉa nʉivʉ. Dicʉ taino cãchinoi, míjina ne juaiboa đađama, arejameđa Jesús.
Nopedeca mamarʉmʉre Jʉ̃menijicʉi jaboteino quĩ́jinotamu, põeva obebevʉ ne cʉe boje noi. Ʉbenita Jʉ̃menijicʉi yávaiye méne coyʉrĩburu yóboi, ʉrarõtamu no Jʉ̃menijicʉi jaboteino, obedivʉ põeva ne cʉe boje noi.
Aipe teni Jesús ʉ̃i bueino jã́ri dápiarĩ ne đarãjiyepe aiyede
33 Yópe arĩ, buedejameđa Jesús Jʉ̃menijicʉi yávaiyede jã́ri dápiarĩ ne đarãjiyepe ayʉ. Ne jápiarĩ coreóvarãjiyepe ayʉ buedejameđa náre cainʉmʉa. 34 Coyʉre curejameđa cainʉmʉa jã́ri dápiarĩ ne đarãjiyepe aiyeque ʉ̃i bueinore. Ʉbenita coyʉrejameđa ʉ̃i bueimarare aipe aiyʉede iye jã́ri dápiarĩ ne đarãjiyepe aiyede.
Jesús ũmevʉre ʉ̃i bíjaroino
35 Dijãravʉmica nainújie baji Jesús arejameđa ʉ̃i bueimarare:
—Jã́rica, macajitabʉ ʉrabʉ apedʉvei nʉrevʉ, arejameđa náre.
36 Quénora dajocarĩ nʉrejaimađa, nʉvaivʉ Jesúre põevare jocarĩ jiađocũi. Apevʉ põeva nʉrejaimađa jiađocũai, náre coapa yóvaivʉ náre. 37 Aru jataivʉre japurejavʉ̃ya ũmevʉ parʉrõ baju. Pãcaiboa coiye boje jiađocũi, buidéjavʉ̃ya dicũre oco. 38 Ʉbenita Jesús cãñʉ marejámeđa japʉvaino yebai. Tʉorejameđa jabʉóvaiboi. Aru coedavarĩ, arejaimađa ʉ̃́re:
—¿Mʉ jidʉbecʉrʉ̃ maje corãjinore? arejaimađa.
39 Jesús coedarĩ jararejameđa ũmevʉre. Aru arejameđa macajitabʉre:
—Quénora, pãcamejabʉ, arejameđa Jesús.
Que aiyede, ũmevʉ bíjacʉnʉri, pãcamenejavʉ̃ya dibʉ macajitabʉ. 40 Que teni Jesús arejameđa ʉ̃i bueimarare:
—¿Aipe teni jidʉrivʉrʉ̃ mʉja? ¿Aipe teni “Jesús meađacʉyʉme ñʉjare”, abevʉrʉ̃ mʉja? arejameđa.
41 Jesús ʉ̃i que aiyede, cuecumari arejaimađa ne bajumia:
—¿Yécʉba ñai yópe đayʉ, ũmevʉ aru macajitabʉ máre jʉ aimʉ? arejaimađa na.