Marcos
Jesús ʉ̃i meađaino ʉ̃mʉ ãmuve jiacʉbecʉre
3 Bedióva Jesús ecorejameđa cojedeca judíovai cójijiñami. Noi cʉrejameđa cũinácʉ ʉ̃mʉ, ãmuve cũinápũravʉ jiacʉbecʉ. 2 Aru fariseovacavʉ Jesúre coreni jã́rejaimađa. Jesús ʉ̃i meađaru ñai ʉ̃mʉre, ãmuve jiacʉbecʉre, judíovai jabʉóvaijãravʉ sábadoi, jã́iyʉrivʉ, boro coyʉrĩ ađaiyʉrĩduivʉ barejáimađa ʉ̃́re. 3 Dinʉmʉma Jesús arejameđa ñai ʉ̃mʉ ãmuve jiacʉbecʉre:
—Nacajari nújacʉ põeva jẽneboi, arejameđa Jesús.
4 Aru arejameđa apevʉ noi cʉrivʉre:
—Jẽniari jã́quijivʉ cũináro mʉjare. ¿Yéde đaicõjeini Jʉ̃menijicʉ jabʉóvaijãravʉre, mearore o ãmenore; meađaru põevare o boarĩ́ jarʉvaru náre? arejameđa Jesús.
Ʉbenita bi arejaimađa na. 5 Que baru Jesús jararĩ chĩorejameđa, ne coreóvabe boje. Aru arejameđa ñai ʉ̃mʉ ãmuve jiacʉbecʉre:
—Jabióvajacʉ mi ãmuvede, arejameđa Jesús.
Ʉ̃i jabióvaiyede meatedejavʉ̃ya ʉ̃i ãmuve. 6 Que teni ina fariseova etaivʉ bácavʉ cójijidejaimađa Herodede cađateipõevaque. “Boarĩ́ jarʉvarãjarevʉ”, arĩ dápiaivʉ barejáimađa Jesúre.
Jesús ʉ̃i meađaino obedivʉ põevare macajitabʉ ʉrabʉ ẽcarʉi
7 3:7-8 Jesús apevʉre dajocarĩ nʉrejameđa macajitabʉ ʉrabʉ ẽcarʉi ʉ̃i bueimaraque. Obedivʉ põeva cujurejaimađa ʉ̃i yóboi, Galilea aru Judea ãmicʉrijoborõacavʉ, Jerusalén ãmicʉriĩmarocavʉ, Idumea ãmicʉrijoborõcavʉ, aru Jordán ãmicʉriya jia apedʉvecavʉ: Tiro aru Sidón ãmicʉriĩmaroacavʉ máre. Obediyajuboa põeyajuboa nʉrejaimađa ʉ̃i yebai, jápiaivʉ đayʉre ʉrarõ põeva ne đarĩ majibede. 8 — 9 Aru Jesús arejameđa ʉ̃i bueimarare:
—Meađarĩ corejarã jiađocũre, põeva obedivʉ ne darĩburu, jatujivarĩ, ne chĩtomenajiyepe yʉre, arejameđa Jesús.
10 Obedivʉre ʉ̃i meađaiye báque boje, apevʉ ijimara ʉ̃́re chĩtorejaimađa, tʉoiyʉrĩduivʉ ʉ̃́re. 11 Aru ina abujuva ne ĩmamara máre Jesúre jã́ri, mori tʉrĩ cođoboborejaimađa ʉ̃́re:
—Mʉrecabu Jʉ̃menijicʉi mácʉ, arĩ cođoboborejaimađa.
12 Ʉbenita Jesús yávaicõjemenejameđa parʉrõque, apevʉ ne coreóvabenajiyepe ayʉ ʉ̃i đaiyede.
Jesús ʉ̃i beoino ʉ̃i yávaiye méne coyʉicõjeimarava
13 No yóboi Jesús mʉri nʉrejameđa cʉ̃racũi. Aru órejarejameđa ʉ̃i ʉmarare. 14 3:14-15 Beorejameđa doce paivʉre. Aru epedejameđa náre ʉ̃i yávaiye méne beorĩ coyʉicõjeimarare, ne yóvarãjiyepe ayʉ ʉ̃́re aru jarocʉyʉ náre ne coyʉrãjiyepe ayʉ Jʉ̃menijicʉi yávaiyede. Parʉéde jídejameđa náre, ne jaetovarãjiyepe ayʉ abujuvare. 15 — 16 Jesús epedejameđa ina doce paivʉre: Simón ãmicʉcʉ bácʉre ãmidorejameđa Pedro. 17 Zebedeoi mácʉ Santiago, aru Santiagoi yócʉ Juan máre, ãmidorejameđa náre Boanerges, õpo tʉinoi mára ayʉ. 18 3:18-19 Apevʉre máre beorejameđa Jesús: Andrés, Felipe, Bartolomé, Mateo, Tomás, Alfeoi mácʉ Santiago, Tadeo, Simón ãmicʉcʉ Celote, aru Judas Iscariote máre. Ñai marejámeđa jẽni jícʉyʉ Jesúre ʉ̃i mauvare. Que teniburu yóboi, Jesús ecorejameđa cʉ̃rami. 19 —
“Abujuvai jabocʉi parʉéde cʉvabi ʉ̃” arĩ, ne boro coyʉrĩ ađarĩduino Jesúre
(Mt 9.34, 10.25, 12.22-32; Lc 11.14-23, 12.10)
20 Bedióva cójijidejaimađa obedivʉ põeva. Aru ãicõjemenejaimađa Jesúre, ʉ̃i bueimarare máre. 21 Põeva “Ãrʉmemi” ne are cuiye boje ʉ̃́re, ʉ̃ jivʉ jápiarĩ, nʉrejaimađa, ʉ̃́re jẽnanʉivʉ. 22 Ʉbenita ina Jʉ̃menijicʉi yávaiye báquede bueipõeva, ẽmeni daivʉ bácavʉ Jerusalén ãmicʉriĩmarore jocarĩ, arejaimađa:
—Cʉvabi Beelzebúre. Que baru abujuvai jabocʉi parʉéque jaetovaibi abujuvare, arejaimađa.
23 Jesús náre órejayʉ bácʉ ʉ̃i yebai, yópe coyʉrejameđa:
—¿Aipe teni bʉojaidica abujuvai jabocʉ jaetovayʉ ʉ̃i baju? 24 Cũináro jaborõcavʉ ãđamateivʉ baru ne bajumia, ina jaborõcavʉ cũinájarama na. 25 Aru nopedeca cũináđami cʉ̃ramicavʉ ãđamateivʉ baru ne bajumia, diñamicavʉ cũinájarama na. 26 Aru nopedeca bájebu ñai abujuvai jabocʉ, jaetovayʉ baru abujuvai jabocʉre. Ãđamateyʉ bájebu ʉ̃i bajuma. Aru jaetovayʉ baru abujuvare, joe parʉcʉ cʉbejebu ʉ̃.
27 ’Ʉbenita bʉojaino ãmevʉ ecoivʉ ñai ʉ̃mʉ parʉcʉi cʉ̃ramine, ñavarajivʉ ʉ̃i cʉvaede. Mamarʉmʉre ʉ̃́re bʉorĩ, que đaivʉ bácavʉta bʉojaivʉ ñavaivʉ ʉ̃i cʉvaede, arejameđa Jesús.
Nópe ayʉ, Jesús yópe aiyʉcʉ barejaquémavʉ: Ʉ̃́vacari parʉbi abujuvai jabocʉ pʉeno, ʉ̃i jaetovaiye boje abujuvare põevare jocarĩ.
28 Aru Jesús arejameđa:
—Jãve coyʉyʉbu mʉjare: Jʉ̃menijicʉ ãrʉmetecʉyʉme caiye iye mʉje ãmeina teiyede, aru caiye iye Jʉ̃menijicʉre ãmeina yávaiyede máre. 29 Ʉbenita ácʉ põecʉ ʉ̃i yávaru ãmeina ñai Espíritu Santore, aipinʉmʉ Jʉ̃menijicʉ ãrʉmetebecʉbe ʉ̃i ãmeina teiyede. Quédata boropatecʉyʉme, bíjacʉyʉ Jʉ̃menijicʉre jocarĩ cainʉmʉa, náre arĩ buedejameđa Jesús.
30 Nópe arejameđa Jesús, ina Jʉ̃menijicʉi yávaiye báquede bueipõeva “Ñai ʉ̃mʉ cʉvabi abujucʉre”, ne borocʉrĩ yávaiye boje ʉ̃i borore.
Jesús ʉ̃ jina ne voino ʉ̃́re
31 Dinʉmʉre Jesúi yóva aru jípaco máre earĩ, jedevamia mauteni órejaicõjenejaimađa ʉ̃́re. 32 Aru ina põeva obedivʉ dobarivʉ ʉ̃i cʉrõi arejaimađa ʉ̃́re:
—Mipaco aru míyova máre jedevai cʉma. Aru vođama mʉre, arejaimađa ʉ̃́re.
33 Aru Jesús arejameđa:
—¿Ñamema jipaco aru jíyova? jẽniari jã́rejameđa Jesús.
34 Ina põeva obedivʉ dobarivʉre ʉ̃i cʉrõi jã́ri, arejameđa:
—Yuibu jipaco aru jíyova máre. 35 Que baru caivʉ ina đaivʉ Jʉ̃menijicʉi ʉrõpe, nárecabu jíyocʉpe páyʉ, aru jíyocope páđo, aru jipacope páđo máre, arejameđa náre Jesús.