Romanos
“Ãmenamu”, arĩ yávabejarã mʉjacavʉre
14 Me copʉ etajarã mʉja ina Jesúre jʉ aivʉ coreóvabevʉre cãreja aipe ne jʉ aiyede Jesúre. Aru, “Majibevʉ mʉja”, arĩ yávabejarã náre. 2 Apevʉ Jesúre jʉ aipõeva me coreóvaivʉ aipe ne jʉ aiyede Jesúre, ãđama áđe ãiyede. Ʉbenita apevʉ Jesúre jʉ aipõeva coreóvabevʉ cãreja iye ne jʉ aiyede Jesúre, ãmema ãimajiarʉare, ne dápiaiye boje Jʉ̃menijicʉ ʉbecʉre náre ãimajiarʉare ãivʉre. 3 Mʉja caijĩene ãivʉ ãmeina jã́mejara ina ãimajiarʉare ãmevʉre. Quédeca mʉja ãimajiarʉare ãmevʉ ãmeina yávabejarã ina caijĩene ãivʉre. Jʉ̃menijicʉvacari me jã́ñʉ coatebebi ina caijĩene ãivʉre ʉ̃ jinare jocarĩ. 4 Jarʉvarĩ bʉojabevʉ mʉ apecʉ ʉ̃mʉre memecayʉre. Quénora ñai ʉ̃i memecaimʉ quécʉ cũinácʉrabe bʉojarĩ jarʉvayʉ o mautede đayʉ ʉ̃́re. Nópe mi jarʉvarĩ bʉojabepedeca apecʉ mʉ́cacʉre, Jʉ̃menijicʉvacari, caivʉ ne jabocʉ, jarʉvacʉyʉme o mautede đacʉyʉme ʉ̃́re.
5 Aru apevʉ Jesúre jʉ aipõeva ãrʉrivʉbu cũinájãravʉre me apejãravʉa pʉeno. Ʉbenita apevʉ Jesúre jʉ aipõeva ãrʉrivʉbu cũinátʉrʉ jãravʉa coapa. Majijarãri caivʉre jãvene ne dápiainore. 6 Majacavʉ me ãrʉrivʉ baru cũinájãravʉre apejãravʉa pʉeno đađama nópe, pueđarãjivʉ Jʉ̃menijicʉre. Aru majacavʉ ãrʉrivʉ baru cũinátʉrʉ jãravʉa coapa đađama nópe, pueđarãjivʉ Jʉ̃menijicʉre. Aru majacavʉ caijĩene ãivʉ nópe đađama, pueđarãjivʉ Jʉ̃menijicʉre, aru torojʉede jíyama ʉ̃́re, ʉ̃i jíye boje náre ne ãiyeva. Aru majacavʉ ãimajiarʉare ãmevʉ máre nópe đađama, pueđarãjivʉ Jʉ̃menijicʉre, aru torojʉede jíyama ʉ̃́re, ʉ̃i jíye boje náre ne ãiyeva.
7 Põecʉ cʉbebi majacavʉ jẽneboi jaboteyʉ ʉ̃i baju ʉ̃i apʉéde cãreja. Jesúre jʉ aipõecʉ cʉbebi cũinácʉva. Quédeca põecʉ cʉbebi jaboteyʉ ʉ̃i baju ʉ̃i yaiyede máre. Jesúre jʉ aipõecʉ yaibébi cũinácʉva. 8 Maje apʉéde cãreja maje jabocʉ jinamu maja, pueđarãjivʉ ʉ̃́re. Aru maje yaiyede máre maje jabocʉ jinamu maja, pueđarãjivʉ ʉ̃́re. Que teni apʉrivʉ baru maja cãreja, Cristo jinamu maja. Aru yaivʉ bácavʉ baru máre, Cristo jina márajivʉbu maja. 9 Cristoi yaiye báque boje aru ʉ̃i nacajaiye báque boje yainore jarʉvarĩ, jaboteyʉbe ʉ̃ caivʉre, apʉrivʉre aru yaivʉ bácavʉre máre.
10 ¿Aipe teni apevʉ mʉjacavʉ ãmeina yávaivʉrʉ̃ apevʉ Jesúre jʉ aipõevare, mívʉpe paivʉre? ¿Aru aipe teni apevʉ mʉjacavʉ ãmeina jã́ivʉrʉ̃ apevʉ Jesúre jʉ aipõevare, mívʉpe paivʉre? Nópe đabejarã mʉje baju. Caivʉ maja núrajaramu Cristoi coyʉquiyede maje đaiye báquede méne o ãmene ʉ̃i jã́inoi. 11 Yópe arĩ, Jʉ̃menijicʉ toivaicõjenejaquemavʉ ʉ̃i yávaiyede:
Yópe aibi maje jabocʉ: “Ji cainʉmʉa cʉe boje, coyʉyʉbu mʉjare yópe vaiquíyede jãve. Caivʉ ijãravʉcavʉ ñʉatutarĩ mearore jínajarama yʉre. Caivʉ ijãravʉcavʉ coyʉrãjarama yʉre, ‘Jʉ̃menijicʉtamu mʉ. Ñʉje jabocʉbu mʉ’, arãjarama caivʉ”, arejaquemavʉ Jʉ̃menijicʉ.
12 Que baru caivʉ majavacari coyʉrãjaramu Jʉ̃menijicʉre maje borore, caiye maje đaiye báquede.
Ãmeno đare đabejarã mʉjevʉre
13 Que baru ãmeina yávabenajarevʉ majevʉre. Quénora majijarã mʉje ũme mʉja ãmeina teivʉre. Que baru mearo đajarã, mʉjevʉ ne vainí tʉbenajiyepe aivʉ, ne jã́iye boje mʉje ãmeina teiyede. 14 Yʉ jãve coreóvaivʉ ye ãiye cʉbede yʉre ãmeđaiye, yʉre coavaiye Jʉ̃menijicʉre jarʉvarĩ. Nópe buedejaquemavʉ maje jabocʉ Jesucristo. Ʉbenita apecʉ “Ãmetede đaivʉ yʉre”, ʉ̃i arĩ dápiaru apejĩene, diedecabu ãmetede đaiye ʉ̃́re. Que baru maja coapa dápiarĩ majidivʉbu ãmeina teiyede. 15 Ãiyeque mʉje chĩore đaru apevʉ Jesúre jʉ aipõevare ne ũmei, meamejebu no. Mʉje nópe đaiyeque, jã́đovajebu mʉja ʉbevʉpe náre. Jesucristo yaidéjaquemavʉ bojeđayʉ náre máre. Que baru bíjarobejarã mʉja náre, ne coatenajiyepe aivʉ Jʉ̃menijicʉre jarʉvarĩ, mʉje apejĩene ãiyʉe boje. 16 Que baru mʉja đaivʉ baru apejĩene, méne mʉje jã́iyede, “Boropatebevʉ yʉ”, mʉje arĩ dápiaiyede mʉje đaiyede diede, aru põevare cađateiyede máre, ʉbenita apecʉ Jesúre jʉ aipõecʉi ãmeina jã́ru, o ãmeina yávaru diede, dajocajarã mʉje đaiyede. Quénora đabejarã mʉja diede. 17 Jʉ̃menijicʉ maje jabocʉbe. Ʉbenita majare jabotebebi maje ãri aru ũcuri teiye boje. Quénora cʉjarã me nurié đaivʉ, cãrijimena, aru torojʉrivʉ, yópe ñai Espíritu Santoi cõjeiyepe majare. Nópe đaru, Jʉ̃menijicʉ jaboteibi majare. 18 Aru caivʉ ina memecaivʉ Cristore nópe đaivʉ, nárecabu me Jʉ̃menijicʉre torojʉre đaivʉ, aru põevare máre me jã́re đaivʉ, aru me yávare đaivʉ náre.
19 Que baru cainʉmʉa cãrijimene đarãjarevʉ maja apevʉre. Aru cainʉmʉa cađatenajarevʉ maja apevʉ majacavʉre, pʉeno parʉrõreca ne jʉ are nʉrajiyepe aivʉ Jesúre aru pʉeno me ne cʉrãjiyepe aivʉ ʉ̃́que. 20 Jʉ̃menijicʉ põevare jʉ are nʉre đaibi pʉeno parʉrõreca Jesúre. Que baru mʉjacapũravʉ ãmeđabejarã náre ne jʉ aiyede Jesúre, mʉje apejĩene ãiyʉe boje. Ãiye cʉbevʉ ãmeđaiye põevare, náre coavaiye Jʉ̃menijicʉre jarʉvarĩ. Ne ãru mʉje ãiyepedeca aru “Ãmeina đaiyebu ñʉjare”, arĩ dápiaru, mʉjacapũravʉ ãmeno đajebu náre, mʉje ãiye boje. 21 Que baru ãmejara mʉja ãimajiarʉare, aru ũcumejara boqueiyede máre, aru đabejarã caiye apejĩene, mʉjacacʉ Jesúre jʉ aipõecʉ vainí tʉrĩ ʉ̃i đabequiyepe aivʉ ãmenore mʉje đaiyede jã́ri. 22 Mʉje dápiainore mʉje ãiyede, mʉje ũcuiyede, aru mʉje đaiyede máre coyʉbejarã apevʉre. Quénora Jʉ̃menijicʉvacari coreóvacʉyʉme diede. Ñai põecʉ caiyede đayʉ baru, “Boropatebevʉ yʉ”, arĩ dápiarĩ, ʉ̃́recabe Jʉ̃menijicʉi torojʉre đaimʉ. 23 Ʉbenita ñai põecʉ “Majibevʉ yʉ mearore ji ãino, ji ũcuino, aru ji đaino” arĩ dápiayʉ baru, ʉ̃́recabe Jʉ̃menijicʉi ãmeina jã́imʉ. Ʉ̃i nópe đaiyede, “Majibevʉ yʉ Jʉ̃menijicʉ ʉcʉre diede” arĩ dápiayʉ baru, boropateyʉbe ʉ̃ Jʉ̃menijicʉi jã́inore. Caiye maje đaiyede, “Meaquiyebu” arĩ dápiabevʉ baru, ãmeina teivʉbu maja.