Mateo
Jesús ʉ̃i nacajaino yainore jarʉvarĩ
(Mr 16.1-8; Lc 24.1-12; Jn 20.1-10)
28 No judíovai jabʉóvaijãravʉ sábado yóbocajãravʉ, sumana bʉijãravʉ, domingo, miađáe tʉquiye jipocai, María Magdalacaco apeco Maríamaque jã́ranʉrejaimađa Jesús bácʉi baju bácarõre ne jarʉvainore. 2 Aru ʉrarõ baju joborõ cújidejavʉ̃ya, ángele ʉ̃i ẽmeni daiye boje cavarõ mearo Jʉ̃menijicʉi cʉrõre jocarĩ. Ñai ángele, Jʉ̃menijicʉi daroimʉ, ẽmeni, darĩ jãturuvarejameđa diva cʉ̃rava ʉravare, no cʉ̃racobede bieitʉrava bácarõre. Ditʉravare ʉ̃i jãturuvariburu yóboi, dobarejameđa ditʉrava pʉenora. 3 Ñai ángele pẽoñʉpe páyʉ ãrojacʉ barejámeđa, yópe yaroinope. Ʉ̃i cuitótecaje boricaje baju barejávʉ̃ya. 4 Ʉ̃́re jã́ivʉ, ina churarava dicobede jã́ri coreniduivʉ jidʉrivʉ bididejaimađa, ne jidʉé boje. Bidini, tʉrejaimađa joborõi, yópe yaivʉ bácavʉpe. 5 Aru ñai ángele arejameđa ina nomivare:
—Jidʉbejarã mʉja. Coreóvaivʉ yʉ voivʉre Jesúre, ne jocʉcʉjaravena pẽvaimʉ mácʉre. 6 Yore cʉbebi ʉ̃. Javeta nacajami, yópe ʉ̃i aiye báquepedeca. Dajarã. Jã́rijide apa. Ʉ̃i baju bácarõre ne jarʉvaino mácarõre jã́jara mʉja. 7 Maumena nʉjara mʉja. Yópe arĩ, coyʉjarã ʉ̃i bueimarare: “Jesús nacajaimi yainore jarʉvarĩ. Nʉcʉyʉme mʉje jipocai Galilea ãmicʉrijoborõi. Noi jã́rajaramu mʉja ʉ̃́re”, coyʉjarã. Jede, quénoramu ji coyʉino mʉjare, arejameđa náre.
8 Que arĩburu yóboi, maumejiena dicobede etarĩ, nʉrejaimađa ina nomiva, jidʉrivʉ ʉbenita pare torojʉrivʉ. Cúyarĩ coyʉrãnʉrejaimađa iye borore ʉ̃i bueimarare. 9 Ne nʉiyede, Jesúvacari náre copʉrejameđa. Aru náre jacoyʉrejameđa. Ʉ̃i yebai nʉri, mori tʉrejaimađa joborõi ʉ̃i jipocai. Aru ʉ̃i cʉbobare jẽni, mearore jídejaimađa ʉ̃́re, yópe judíova ne đarĩ cõmajiyepe. 10 Que teni Jesús arejameđa náre:
—Jidʉbejarã mʉja. Jívʉre yópe arĩ, coyʉrãnʉjara mʉja, “Galileai nʉri, noi yʉre jã́ranʉjara mʉja, aibi Jesús”, náre ajarã mʉja, arejameđa dinomivare Jesús.
Churarava Jesús bácʉi baju bácarõre jã́ri coreniduivʉ bácavʉ ne coyʉino borocʉrõ
11 Ina nomiva ne nʉiyedeca, apevʉ ina churarava, Jesús bácʉi baju bácarõre jã́ri coreniduivʉ bácavʉ, Jerusalén ãmicʉriĩmaroi nʉrejaimađa. Coyʉrãnʉrejaimađa ina sacerdotevare jaboteipõevare caiye iye vaiye báquede náre. 12 Ina churarava ne coyʉiyede jápiaivʉ bácavʉ, ina sacerdotevare jaboteipõeva ina judíova bʉcʉvaque cójijidejaimađa, majicarãjivʉ ne bajumia. Cójijini bʉojarĩ, ʉrarõ tãutʉrare jídejaimađa ina churaravare. 13 Aru yópe arĩ, borocʉicõjenejaimađa náre:
—Yópe ajarã mʉja põevare, “Jesús bácʉi bueimara ñamine darĩ, ñʉje cãiyede, ñavarama ʉ̃ mácʉi baju bácarõre”, ajarã mʉja. 14 Aru ñai jabocʉ ʉ̃i jápiaru diede, “Ina churarava boropateivʉbu ne jã́ri corebe boje” arĩ dápiaru, ñʉjavacari meađarãjaramu caiyede ʉ̃́que, ʉ̃i ñájine đabequiyepe aivʉ mʉjare, arejaimađa ina judíovai jabova.
15 Que baru iye tãutʉrare ĩni, borocʉrĩ coyʉrejaimađa ina churarava, yópe ina sacerdotevare jaboteipõeva ne coyʉicõjeiye báquepe. Aru no coyʉino borocʉrõre coyʉvaivʉbu judíova ne bajumia pʉ caride máre.
Jesús ʉ̃i coyʉicõjeino ʉ̃i yávaiye méne
(Mt 26.32; Mr 14.28, 16.14-18; Lc 24.36-49; Jn 20.19-23; Hch 1.8)
16 Ñʉja once paivʉ Jesúi bueimara Galilea ãmicʉrijoborõi nʉrejacarã. Yópe Jesús ʉ̃i nʉicõjeiye báquepe, cʉ̃racũi nʉrejacarã ñʉja. 17 Noi ʉ̃́re jã́ri, mearore jídejacarã. Ʉbenita apevʉ ñʉjacavʉ, “Jesús ãmemi” arĩ, jʉ abedejaima. 18 Aru Jesús arejame ñʉjare:
—Caiye parʉéde cʉvavʉ yʉ. Jipacʉ Jʉ̃menijicʉ parʉre đaibi yʉre, ji cõjequiyepe ayʉ caivʉ cavarõ mearocavʉre aru caivʉ ijãravʉcavʉre máre. 19 Que baru jaroivʉ yʉ mʉjare. Buenanʉjara caivʉ ijãravʉcavʉre ji yávaiye méne, ne jʉ arãjiyepe aivʉ diede, aru ne đarãjiyepe aivʉ ji ʉrõre. Ocoque jã́đovajara ina jʉ aivʉre jipacʉ Jʉ̃menijicʉre; aru yʉre, Jʉ̃menijicʉi mácʉre; aru ñai Espíritu Santore máre. 20 Buejarã náre, ne đarãjiyepe aivʉ caiyede yópe ji đaicõjeiye báquepe mʉjare. Aru yʉ́vacari cʉcʉyʉmu mʉjaque cainʉmʉa, pʉ ijãravʉ bʉojaiyeta, arejame ñʉjare Jesús.
Quénoramu.