LECCION 14
¿Igi ega arbaed Bab Dummad anmar abege?
Leccion nasadgi anmar dagsad, Jehova bela dulemar ega arbadiye sogmalad nued dagmasurye. Auggi, anmar e sogedba ega arbaerdina, Jehova nabir yeer anmar dagmai gusaled. ¿Igi “ega arbaed” Jehova anmar abesunna? (Santiago 1:27; nota, TNM). Dagmaloena, igi Bibliagi soglenai.
1. ¿Bia soglenai igi ega arbaed Jehova anmar abege?
Bibliagi soglenaid igi ega arbaed Jehova anmar abege. Jesus, Bab Dummadga sogsad: “Be gaya burba nabbiragwadid” (Juan 17:17). Auggi, abar Bab igargi emar odurdagmaladdi Biblia sogedba ibmar imagsurdamalad, agga bur dulemar igar mamaidba ibmar imaddamalad. Jehova nued dagsulid dulemar Biblia sogedba igar imagsulir (Marcos 7:9 absogo). Auggi, anmar Biblia sogedba igar imaggerdina, Jehova yeer anmar dagmaoed.
2. ¿Doagarbi unnila anmar arbaed abelege?
Jehova anmar obinyisadsoggua, unnila aagarbi anmar arbaed abeleged (Apocalipsis 4:11). Degsoggu, anmar unnila Jehovabi sabgued abeleged. Jehovabi unnila anmar Bab Dummadga anmar imagged abelebalid, nussugimalad anmar Bab Dummadyobi anmar dagged abelesulid (Isaías 42:8 absogo).
¿Igi anmar Jehovaga arbaed abelesunna? ‘Swilidiggidgi, Bab Dummad yeer anmar daggega’ (Romanos 12:1). Degsoggu, Jehova igarmar mamaidba anmar ibmar imagger gebed. Abirgin nigmaladi, Jehova abirgin nigmaladga igarmar mesisadba igar imagmarmogar gebed. Mer anmar sigali mummud ebuger gebed, mer anmar sigali ubalir gebed, mer anmar bibagimalad ubalir gebed, mer anmar mungubalir gebed.a
3. ¿Ibigala anmar igar iddoged negse nanaed abelege?
Igar iddoged neggi anmar sordagan abargi anmar “Jehova nug odummoged” (Salmo 111:1, 2). Igar iddogedgi namaglealile Jehova nug odummolesdaed (Salmo 104:33 absogo). Jehova wile anmar daggedba anmarga sogmaid, igar iddoged negse nanamaloye, ar edi wisid anmar igar iddoged negse nanaele, nabir anmar yoogidse sadegu yeer iddodi guoe. Igar iddoged neggi anmar na mussub mussub ogannobugbalid.
NUEGGWA WE IBMAR DURDAGMARGOLO
Wegine be durdaggoed, ibigala Jehova abesuli anmar nussugimalad ebuged. Be durdagbaloed, igi nabir be Jehova nug odummosmogale.
4. Jehova abesulid anmar nussugimalad ebuged
¿Igi anmar wisi Jehova we ibmar abesuli? VIDEO dagmalo, we ibmargi sunmagmarbalo:
Ebbenne israelitamar Babse golega ibmar sobsamargua, ¿igi gusmala?
Abar dulemar ibmar nussugimalad ebudamalad Babse golega, abar nussusega gordamarbalid e bendaggega. Deyob anmar ibmar imaggele, agga anmar Jehovadi obannailed. Éxodo 20:4, 6 se geb Salmo 106:35, 36 absomalo, we ibmargi sunmagmarbalo:
¿Dulemar ibu ibmarmar ebudamarmoga e bendaggega?
¿Igi Jehova we ibmarmar dagmodibe?
¿Igi bedi we ibmarmar dagmoga?
5. Jehova sogedba anmar ibmar imagdaele, ibigwensur anmar emarse yardaglegosulid
Wegine anmar durdaggoed, Jehova sogedba anmar ibmar imagdaele, ibu ibmarmarse anmar ibigwensur yardaglegosuli. VIDEO dagmalo.
Salmo 91:14 absomalo, we ibmargi sunmagmarbalo:
Jehova sogedba anmar ibmar imagdaele, ¿igi Jehova anmar bendagmogoe?
6. Igar iddoged neggi anmar Jehova nug odummosdaed
Igar iddoged neggi namaglealir anmar namagdamogale, geb ibmar egislealir anmar abin sogdabalile, anmar Jehova nug odummogoed, geb anmar gwenagan ogannobaloed. Salmo 22:22 absomalo, we ibmargi sunmagmarbalo:
Igar iddogedgi dulemar ibmar soggalile, ¿be yeer iddodamoga?
¿Igar iddogedgi be wis ibmar soggwen sogbimoga?
7. Jehova abeged be ibmar durdagnaid emarga sogmogad
Bia be gudisundibe nabir be dulemarga Bab igargi sunmasmogaled. Salmo 9:1 geb 34:1 absomalo, we ibmargi sunmagmarbalo:
¿Ibu ibmar Bibliagi be durdasad bur be emarga sogbimoga?
ABAR SOGDAMALAD: “Bab Dummad sogedba igar imagged ibigwensursulid”.
¿Igi bedi sogmoga?
WE IGARGI SUNMAGLESAD
Unnila anmar egarbi arbaed Jehova abeged. Abebalid, anmar igar iddoged neggi e nug odummoged, geb anmar emarga e igargi sunmagbalid.
Ibu be durdasa
¿Bia soglenai igi anmar ega arbaed Jehova abege?
¿Ibigala unnila anmar Jehovagarbi arbaed abelege?
¿Ibigala anmar igar iddoged negse nanaed abelege?
NABIR BE WE IBMAR DURDASBALILED
Wegine soglenaid, ome wargwen igi nabir nussugimalad ebuged indasa, “Bar an nussugimaladga ibmar imagdisulid”.
“Biblia dulemar daed ogwamaid” (La Atalaya, julio 1, 2011 gad)
Wegine soglenaid, ibu be nabir imasale igar iddogedgi ibmar sogmogaga.
“Igar iddoged neggi Jehova nug odummodao” (La Atalaya, enero 2019 gad)
Wegine soglenaid, dule wargwenga ibigwensur gussur inigwale igar iddogedse nanaega, ibu imasa nabir naega.
Abar dulemar gadi cruz binardamalad, ¿nuedirdibe anmar cruz niggumogar?
“¿Ibigala Jehova sordagandi wissur cruz ebumala?” (We garda jw.org gi nosad)
a Bamalad leccionmargi bur nueggwa we ibmargi sunmaglegoed.