Noé arca sobsa

NOÉ, ome niggana geb masmala warbaa nigbalina. E masmaladi nugmalana Sem, Cam, geb Jafet. We masmala na warwargwen ome niggusmarmoga. Degsoggu, bela Noé negyagi ebaabagmala.

Emisgindi Babdummad imasa Noé ibmar aggar sagla imaggedi. Arca soboye ega sogsa. We arca bibbisuli, ur dummadyob, ar ulugwa dummadyob daglege, mullusuli. Babdummad ega sogsa: ‘Agla darbaa imaggo, cuartomar imagbalo’. Cuartomar imaglesa Noé gala, geb e gwenadganga, ibmar durganga geb bela mas gullemalad urbega.

Babdummad, Noéga sogsa arca geg egi dii doge imaggoye. Babdummad sogsa: ‘An dii dummad owioe, bela negdirbimaggar ibmar buggwad oberguedga. Ibmar arca yaba dogsulile, burgoe’.

Noé e masmalabo, Jehová sogedba ibmar imasmala geb arca sobdemala. Ar bamaladdi unnila ega allismala. Ibmar isgana indassurmala. Noé emarga sogsagua Babdummad ibu ibmar imaggoe, dule wargwensaar iddossuli.

Arca bibbisur soggua, sobega beedse galesa. Birgamar nadabbidgi, ogunoniggi. Jehová, Noéga sogdebali ibmar durgan arca yaba odogoye. Abar warwarbo odogoye, omebo omeboye. Auggi, baigan ibmar durgandi, Jehová ega sogsa gugle mergu odogoye. Anba Noéga, Bab sogsabali siggwimar aggaraggar odobaloye. Noé, Bab sogsad balilla imasa.

Sorbali, Noé, e gwenadganmala arca yaba dogsamarmoga. Degiidgi, Bab arca wagag edusa. We yaba Noé, e gwenadganmala edarbebuggusmala. Be binsaena, be yaba abiddosiid. ¿Bab sogsad yobi dii dummad wiodibe?