Ebbenne Ibmar Gusad Anmar Owisoge

Jehová imaggosuli dule isganamala Neg Yeerdagleged oisgued. Neg yeerdagleged gine unnila Jehová aimarbi gudigumaloe. ¿Igi gumarsunnoe dule isganamardina? Be wisgue gala, anmar daggoena Noé iba gine ebbenne ibmar gusad. Noé ebbenne gudigusad. Dule nued gudigusad, Jehová ibmar sogedba nanadigusad. Deginigwale, aunni dule baigandina ibmar isganamarbi imagdii gusmala. Aa gala Jehová, Noéga sogsa, an negodogoye, dii dummad an owioye, bela dulemar isgana obelogegala. Anba Noéga sogsabali, be arca soboye, mer be obelolegegala geb be gwenadgan mer obelolemarmogagala Dii Dummad wialile, negdogdele (Génesis 6:9-18).

Noé geb e gwenadganmala arca sobsamala. Noé dule baigan owisosa, sogsa Jehová Dii Dummad owioye, negdogoye. Auggine dule baigandina wargwensaar iddossurmala. Agga ibmar isgana imagbuggwa gudmala. Noé arca sobed obelosgua, ibmar durgan arca yabali odosa, geb sorbali Noé geb e gwenadganmala dogsamarmoga. Geb degine, Jehová dii dummad owisa burwaba mesa. Muddiggi geb ibgine dii winai gusa iba dulabo. Geb bela negdogde gusa, dii dummad wiedba (Génesis 7:7-12).

Dule isganamala burgwisa, auggine Noé dina bendaglesa geb e gwenadganmar bendaglesmoga. Dii Dummad wisgua geb bela negdogsagua, Jehová Noé bendasa geb e gwenadgan bendagmai gusbali, degine, aa sorbali oanbaggusa Nabbaneg nuedgi (Génesis 7:22, 23). Biblia soge, Jehová dulemar ibmar nuegan imagbisurmalad obeloged iba, gannar senonibaloye. Dule nuegandina obelolegosurmala. We Nabbaneg Neg Yeerdaklegedga gusale aagi sadegua gudigumaloe (2 Pedro 2:5, 6, 9).

Emi ibagi, buggidar dulemala ibmar isgana imagmala. Bela negdirbimaggar nue neggagalesnai. Jehová, na e gine Sunmagmaladi barmimai gannargannar dulemar owisogegala, auggine bur melu dulemala Jehová ibmar soged iddobisurmala. E daed ogwabisurmala. Abesurmarbali Babdummad ega sogedi ibu ibmar nued gue geb biddi ibmar issaggwagwad gue. ¿Igi we dulemala guoe? ¿Ibagwen gine, e daed na ogwamaloe? Buggidara dulemar na bibbisaar e daed ogwaosurmala. Dule isganamar obeloleged iba oarmagdaniggi geb bar gudiguosurmala (Salmo 92:7).

Nabbanega obelolegosuli; neg yeerdagleged gala guoe. Dulemar Babdummad ai gala gusmaladi, Nabbaneg Neg Yeerdaglegedga gusale, aa gine sadegu gudigumaloe (Salmo 37:29).