Igi Be Babdummad Siggi Ibmar Durdasale

Jehová siggi be nabir ibmar durdasale be Biblia absodii guele. Babdummad ebbennegi imagsa abar dulemala, Babdummad binsaedi narmaggega. We gardamar narmaglesadi onuggulege, Biblia. Emi iba gine anmar nabir Babdummad siggi ibmar durdagge Biblia absodiile. We garda gine Jehová ibmar sogsad narmaggale, degisoggua nabir soglebali e Gaya Burbaye. Anmar Bibliagi ibmar soglenaid bengued sulid, ar Jehová bibbisaar wissur gaggansaed. “Geg Babdummad gaggansaed” (Hebreos 6:18). Degisoggua, Babdummad Gaya Burba gine ibmar nabbiragwadi narmaggar nai (Juan 17:17).

Babdummad anmar gala ibmar nuegana ugsa, Biblia aa ibmar nued gumoga. Igi dule wargwen na nue e mimmigan sabele, ese garda narmagdae, we garda aa yobi gue. We garda anmar gala sunmagnai yoowedse Babdummad Nabbaneg neg nuedga imaggoed gine, neg yeerdagleged gala guoe, dulemar egi ambagguega. Anmarga soge ebbenne Babdummad ibu imasa, emi iba gine ibu imagmai geb yoowedse ibu imaggoe e mimmigan eba nue nanamaladgala. Biblia anmar bendagbali negbeedsegi gualile nabir abin imaggega geb nabir yeeriddodi gudiguegala (2 Timoteo 3:16, 17).

Jehová gine sunmagmaladi Babdummad e aimala. Wemala be bendagmaloe be magiddo gue gala ibu igargi Biblia dule odurdagge. Aamar gala unnila be soged abelege, Biblia durdagbiye. Be odurdaggegala bibbisaar be gine mani gaosurmala (Mateo 10:8). Anba be nabir nadbalile Cristo sordagan igar iddoged sega. We ibmala durdaglege Babse gorleged neg gine, we negmala onugsalege: Jehová gine sunmagmalad Igar Iddoged Neg. We igar iddogedse be nanasundibe, gwaegwae bur be Babdummad igar durdadoe.

Babdummad siggi be nabir durdagge e ibmar imasad gine be binsaele. Unnila soggwen anmar soge gala, Biblia gine sognai: “Gebe sagla unni Babdummad obinyisa nibneg geb nabbaneg” (Génesis 1:1, NM). Jehová “nibneg” nasisgua, Dad ganaid nasisbali. Degisoggua, ¿ibu ibmar gine wedega Babdummad siggi anmar odurdagsunna? Anmar gala sogsundo Jehová yeer gangued nigye. Unnila Babdummadbii wegiid ibmar nabir imasaled, nibali Dad ganaidi. Anba we ibmala anmarse oyobali Jehová dule nue ibmar wisidye, ibigala ar dule nue ibmar wisi gued abeleged Dad yeer gangu ganaid imaggega, anmarga neguue sanaid geb negmee imagnabalid, geb bibbisaar ginnasurbalid.

Jehová ibmar imasadi, anmarse oyonai Babdummadi anmar sabye. Be binsaena, sabbidurba aggaraggar Nabbaneggi niggad gine. Jehová unnilagwa sabbidurba soggwenna anmarga ugsa wilubbunad o soggwensaar uggosulindibe. Deginigwale anmar gala galagwensuli sabbidurba urbisad, yosgu dagleged, abar dummagana, abar burwigana, abar ossigwa, solesolegwa, yosgua. We anmarse oyoge Jehová nue anmar sabe geb dule nalled sulidi gue, degine, dule gwage nuedi (Salmo 104:24).