Nabir be Jehova aiga gusmogaled

Jehova abeged be nueggwa e igar durdagged, ¿ibigala? Ar Jehova wisid be e igar durdadele, be wisgunoniggoe edega dule igi daedi, dule igi ibmar imaggedi, ibu ibmar yoogidse dulemarga imagbaloe. Jehova wisid, be we ibmar durdadele, bur bule be e ai nuedga gubi gudagoe. Igi be binsae, ¿ar nabir anmar Jehova aiga gusardibe? (Salmo 25:14 absogo). ¿Ibu be imagger gebsunna nabir be Jehova aiga guega? Bibliagine we ibmargi sunmaglenaid. Soglenabalid, ibigala anmar nue Jehova aiga gued abelege.

1. ¿E ibugala gued Jehova be abege?

Bibliagi soglenaid: “Bab Dummadse be dagmar, Bab Dummad bemarse dagoed” (Santiago 4:8). ¿Ibiga deyob soglenai? Ar Jehova abeged be e aigala gued. Auggi, abar dulemardi binsadaed, be dule dagdisulile, we dule geg be aigala guye. Anmar Bab Dummad dagdisursoggua, aagala, dulemar binsadaed anmar geg Bab Dummad aigala guye. Nabir anmar e aiga guegala, Bab Dummad anmarga e gaya burba ugsad, Biblia, aagine anmarga soglenaid Bab Dummad dule igi daedi. Anmar Bab Dummad dagdisur inigwale, auggi, Biblia absomaidbali nabir anmar e ai nuedgala gusmogaled.

2. ¿Ibigala anmar bur Jehova aiga gued abelege, bamalad aimar nigguedba?

Jehova bur bule dule bamaladba be sabed. Jehova abeged be yeer iddodi gued, abebalid, wis beg neg aggar gualile be ese goled. Bibliagi soglenaid, ‘be wile iddodiile bela Bab Dummadga be sogoye’ ar Bab Dummad wile be dagmaid (1 Pedro 5:7). Jehova guaggwamadaed na e aimar bendaggega. Degsoggu, e aimar ese gollalile, iddomadaed, bendasdabalid (Salmo 94:​18, 19 absogo).

3. ¿Jehova ibu imagged e aimar abege?

Jehova bergwable dulemar sabed, auggi bur bule “dule nuegan ebodi waligga gudi daed” (Proverbios 3:32). Jehova abeged, e aimar bela e sogedba igar imagmalad, ibmar nuegan imagmalad. Jehova abesulid e aimar ibmar isgana imagdi gumalad. Aagala, abar dulemar binsaardaed, Jehova sogedba igar imagged beedseye. Auggi, Jehova wismogad anmarga ibigwensur gusurdae e sogedba igar imaggega, aagala dule e sogedba igar imaggega alamagnai dagsundibe, bendasdamogad (Salmo 147:11; Gusmalad 10:​34, 35).

NUEGGWA WE IBMAR DURDAGMARGOLO

4. Abrahan, Jehova ai nuedinad

Bibliagi soglenaid, Abrahan, Jehova ai nuedinye. Degsoggu, Abrahan ibmar imasadba nabir anmar durdasmogaled, ibu nabir anmar imasmogale Jehova aigala guega. Génesis 12:​1, 4 se absomalo, we ibmargi sunmagmarbalo:

• ¿Igi Jehova Abrahanga sogsa?

• ¿Ibu Abrahanga imaggoye Jehova sogsa?

• Jehova ega igar ugsad sorbali, ¿Abrahan ibu imasa?

5. Jehova ibu imagged e aimar abege

Bela anmar abegedbidaed anmar aimar wis anmarga ibmar imagmogad.

• ¿Ibu be aimar imagged be abedamoga?

1 Juan 5:3 absomalo, we ibmargi sunmagmarbalo:

• ¿Jehova ibu imagged e aimar abemoga?

Jehova sogedba igar imaggegala, sun anmar na anmar daed ogwae dagledagoed. Isaías 48:17, 18 absomalo, we ibmargi sunmagmarbalo:

• ¿Ibigala Jehova abedae, e aimar na e daed ogwaed?

6. Jehova na e aimar bendasdaed

VIDEO: Jehova an bendasad (3:​20)

• ¿Igi Jehova we ome bendasa?

Isaías 41:10, 13 absomalo, we ibmargi sunmagmarbalo:

• ¿Igi Jehova na e aimar bendaggoye sogmai?

• ¿Jehova nabir be ai nuedga gusmogardibe? ¿Ibigala deyob be binsae?

7. Be Jehova aiga gubiele, be ebo sunmagger gebed

Anmar dule wargwenbo gadi sunmaggele, aa dule anmar ai nuedga gudoed. Salmo 86:6, 11 absomalo, we ibmargi sunmagmarbalo:

• ¿Igi nabir anmar Jehovabo sunmasmogarsunna?

• ¿Igi Jehovadi anmarbo sunmasdamosunna?

WE IGARGI SUNMAGLESAD

Jehova be aigala gubied, be bendagbibalid nabir be e ai nuedga gumogaga.

Ibu be durdasa

• ¿Igi Jehova na e aimar bendasdae?

• ¿Ibigala Jehova abedae, e aimar na e daed ogwaed?

• Be nabir Jehova aiga gumogagala, ¿beedsedibe? ¿Ibigala be deyob soge?

NABIR BE WE IBMAR DURDASBALILED

Wegine soglenaid, ibigala nue abelege Bab Dummad aiga gued.

“Jehova aiga gued igar nuedid” (La Atalaya, febrero 15, 2003 gad)

Wegine soglenaid, ibu be nabir imasale Bab Dummad aiga gumogaga.

“¿Igi nabir an Bab Dummad aiga gusale?” (Lo que los jóvenes preguntan. Respuestas prácticas [volumen 2], capítulo 35)

Wegine soglenaid, ibigala ome wargwen sogsa Jehova igar durdasad nue e bendasye.

“¡An burgwebisulinad!” (La Atalaya, num. 1, 2017 gad)

Wegine nusganagan Bab Dummad aiga gued igargi sunmagbuggwad.

Bab Dummad aiga gued, ¿igi anmar bendagge? 1:​46