Хӗрача каллех чӗрӗ!

Иаир юн кайнипе асапланакан хӗрарӑма Иисус сыватнине курать. Апла пулсан, Иисус унӑн хӗрне те, вӑл халӗ «вилсе кайрӗ» пулсан та, пулӑшма пултарать (Матфей 9:18). Шанчӑк чӑнах та пур-ши?

Иисус хӑй сыватнӑ хӗрарӑмпа калаҫнӑ чухне Иаир килӗнчен ҫынсем килеҫҫӗ те ӑна калаҫҫӗ: «Хӗрӳ вилчӗ; Вӗрентекене мӗншӗн чӑрмантаратӑн тата?» (Марк 5:35.)

Мӗн тери хӑрушӑ хыпар! Иаир, хисеплӗ те пысӑк вырӑн йышӑнакан ҫын, халӗ ним тума пӗлмесӗр ҫухалса каять. Унӑн пӗртен-пӗр хӗрӗ вилсе кайнӑ. Анчах Иисус, ҫак сӑмахсене илтсен, Иаира ҫапла шантарать: «Ан хӑра, ӗнен ҫеҫ» (Марк 5:36).

Иисус Иаирпа пӗрле ун патне килне каять. Унта ҫитсен вӗсем ҫынсем пӑлханнине кураҫҫӗ. Пурте макӑраҫҫӗ, уласа йӗреҫҫӗ тата хӑйсене кӑкӑртан ҫапаҫҫӗ. Пӳрте кӗрсен Иисус ыттисемшӗн тӗлӗнмелле пек туйӑнакан сӑмахсем калать: «Мӗншӗн кулянатӑр, мӗншӗн йӗретӗр? хӗрача вилмен, ҫывӑрать» (Марк 5:39). Ҫакна илтсен ҫынсем унран кулма пуҫлаҫҫӗ. Вӗсем хӗрача вилнине пӗлеҫҫӗ. Ҫакна пӑхмасӑрах, Иисус хӑйне Турӑ панӑ вӑйпа усӑ курса ҫынсене, тарӑн ыйхӑран вӑратнӑ пекех, вилӗмрен чӗртсе тӑратма ҫӑмӑл пулнине кӑтартасшӑн.

Иисус пилӗк ҫынсӑр пуҫне: Петрсӑр, Иаковсӑр, Иоансӑр тата вилнӗ хӗрачан ашшӗпе амӑшӗсӗр пуҫне — пурне те тухса кайма ыйтать. Иисус вӗсемпе пӗрле хӗрача выртакан ҫӗре кӗрет. Вӑл хӗрачана аллинчен тытать те калать: «Талифа́ куми́!.. Куҫарсассӑн ку: „хӗрӗм, сана калатӑп, тӑр“ тени пулать» (Марк 5:41). Хӗрача тӳрех тӑрать те утма пуҫлать. Ҫакӑ Иаирпа унӑн арӑмне мӗн тери савӑнтарса яма пултарни ҫинчен шухӑшласа пӑхӑр-ха! Иисус ӑна апат ҫитерме хушать, ҫакӑ та хӗрача чӗрӗ пулнине ҫирӗплетсе парать.

Унччен Иисус хӑй сыватнӑ ҫынсене хӑй вӗсемшӗн мӗн туни ҫинчен никама та каласа ан парӑр тенӗ. Хӗрӗн ашшӗпе амӑшне те вӑл ҫавнах тума хушать. Анчах та ҫакӑн ҫинчен «ҫав таврара пур ҫӗре те хыпар» сарӑлать (Матфей 9:26). Сирӗн ҫывӑх ҫынсенчен пӗрне те пулин вилӗмрен чӗртсе тӑратрӗҫ пулсан, эсир ҫавӑн ҫинчен пур ҫӗрте те, пурне те каласа паман пулӑттӑрччӗ-ши? Ҫакӑ Библире Иисус вилӗмрен чӗртсе тӑратни ҫинчен каласа панисенчен иккӗмӗшӗ.