ˈWƆN ˗GƆ 23

Ö ˈgü ˗dɔ ˈˈgbɩɩ˗ ˗sü ˈö ˈwo bɔ ˈˈyi ꞊bhaa, ˗yö zuʋ̈gblüdhi ˗nu mɛn ˗dhɛ!

˗A ˈsëëdhɛ ꞊dede

Yesu ˗ya ˗pö kletiɛn ˗nu dua ˗mü kö ˗wo bɔ ˈˈyi ꞊bhaa. (Matiö 28:19, 20, NTBL ˗wo pö.) ˈˈKɛɛ ˗mën ˈö ˗tɔ ˗bɔyibhaasü? ˗Mën ˈü ˗dho ˗a kë kö ˈü bɔ ˈˈyi ꞊bhaa?

1. ˗Wo mɛn ˗bɔ ˈˈyi ꞊bhaa ˗kɔ ˗kë ꞊dhɛ?

Glɛko ˗wo kpö ˈwo˗ ꞊dhiëëta ˈö ˗kë «˗bɔyibhaasü» ˈka bhë, ˗a ˗gɛn ˈnën ˗tɔ mɛn «˗mën» ˈˈyi ꞊löö ˗sü. Yesu ˗bɔ ˈˈyi ꞊bhaa ˈˈtʋ̈ŋ ˈka ˗wa ˗mën Zuudɛn ga ꞊bhaa, ˈyö ˈwo˗ bho ˈzü ˗a ‹꞊bhaa.› (Makö 1:9, 10) ˗Kɔ do ˈö bhë ˗a ˈka ˈpö, kletiɛn ꞊dede ˗nu ˗bɔ ˈˈyi ꞊bhaa ˈˈtʋ̈ŋ ˈka, ˗wo ˗an ˗dhɛ ꞊gban ˈˈpɛpɛ ˗mën ˈˈyi ꞊bhaa.

2. ˗Mën ˈö ˗bɔyibhaasü ˗ya ˗zɔn?

Mɛn ˈö bɔ ˈˈyi ꞊bhaa kö ˗ya ˗zɔn ꞊dhɛ ˈya ö ˗de nu Zoova ˗dhɛ. ˗Wo wo ˗de ˗nu Zoova ˗dhɛ ˗kɔ ˗kë ꞊dhɛ? Mɛn ˈö˗ ˈˈpiʋ̈ ˈö bɔ ˈˈyi ꞊bhaa, ˗ya ˗pö Zoova ˗dhɛ bhɛɛwo ˈgü ꞊dhɛ ö˗ ˈˈpiʋ̈ ˈö˗ ˗dhɔkë ˗toëpö ˈka. ˗Ya ˗pö Zoova ˗dhɛ ꞊dhɛ yö dosɛnŋ ˈnën ˈö ˗dho ˗a ˗dhɔkë, ˈö˗ dhɔɔbhaawɔn bɔ ˈˈdhiʋ̈ ˈö ˗bha ˗tosɛta ˈgü. ˗A ˗pö ˈˈdhʋ̈ ˗sü ˗ya ˗zɔn ꞊dhɛ ˗ya ö «bo ˗ya ö ˗dɩ ˗wɔn zuën ˗ta ˗sü ˈka» kö ˈö ʒiö Yesu ˗bha ꞊klaŋwo ˗nu waa˗ ˗bha ˈwɔnzuan ˗nu ˈˈpiʋ̈. (Matiö 16:24) Mɛn ˈö ö ˗de nu ˗Zlan ˗dhɛ ˈö bɔ ˈˈyi ꞊bhaa, waa Zoova ˗an ˗bha ˈˈtɔŋdëdhɛ ˗gɛn ˗yö ˗gban, ˈö ˗mlɛɛn ˗yö ˗da waa ˗Zlan ˗dhɔkëmɛn ˈˈwɛɛ ˗nu ˗an ꞊zinŋgü ˈpö.

3. ˗Mën ˈö mɛn ꞊yaa˗ kë ˈö bɔ ˈˈyi ꞊bhaa?

꞊Ya kë ꞊dhɛ ü˗ ˈˈpiʋ̈ ˈü bɔ ˈˈyi ꞊bhaa, ü dua ˗mü kö ˈü Zoova dɔ ˗sü draanˈˈ, kö ˈü ü ˗bha ˗zo ˗yö ˗a ˗dhɛ ˗sü ˗gɛn ˗gban. (Eblö 11:6 ˗wo pö.) Ü ˗bha Zoova dɔ ˗sü waa ü ˗zo ˗yö ˗a ˗dhɛ ˗sü ˗wa ˗dadhiʋ̈, ˗a ˗dhɔ ˈö ü ˈgü ˗yö ˗dho ˗dadhiʋ̈ ꞊dedewo. ꞊Ya kë ˈˈdhʋ̈ ˗zlanwopösü waa˗ ˗bha ˈtɔŋ˗ ˗nu ˗ya ꞊bhlëë ˈgü ˗sü ˗dho kë ü ˗dhɛ ˗së. (2 Timote 4:2; 1 Zan 5:3) Mɛn ˈö ö ˈgü dɔ ˗ni ˈgü ˈˈgbɩɩ˗ kö ö ‹ˈˈta ˗kɔ ˗yö bhɔ Zoova ˗bha mɛ ˗nu ˈˈta ˗kɔ ˗bha, kö ö ˈˈdhia ˗yö ˈmën ˗a ˈgü› bhë, ö ˗de ˗nu Zoova ˗dhɛ ˗sü kö ˈö bɔ ˈˈyi ꞊bhaa ˗yö ˗kë ˗a ˗dhɛ ˗së.—Kodhɔsö 1:9, 10.a

˗KAA ˈˈPIƲ̈ ˈPƆN

ˈPë Yesu ˗bha ˗bɔyibhaasü ˗ya ˗zɔn kwa ˗dhɛ waa pë ˈö ꞊waa˗ kë ˈö ˈwo bɔ ˈˈyi ꞊bhaa, ˗kwaa ˗ga.

4. Yesu ˗bha ˗bɔyibhaasü ˗yö ˗gleŋ ˗da kwa ˗bha.

˗Ka Matiö 3:13˗17 ˗an ˗wo pö kö ˗kɔ ˈö Yesu ˗yö bɔ ˈˈyi ꞊bhaa ˗a ˈka bhë ˈka˗ dɔ. ˈKa ka bo kö dhɛɛˈˈ ˗nu ˈwo ˈˈshia bhë ˈka ˗an ˗yɔ mɛɛnˈˈ:

˗Wo Yesu ˗bɔ ˈˈyi ꞊bhaa kö ˗yö ꞊kun ˈnëën ˈˈpuu ˈka ˗ee?
˗Wa ˗bɔ ˈˈyi ꞊bhaa ˗kɔ ˗kë ꞊dhɛ? ˈˈYi ˈnën ˈwo˗ ˗lo ˗a ꞊troo ˗ee?

ˈDhɛ ˈö Yesu ˗yö bɔ ˈˈyi ꞊bhaa, ˈyö ˈö ˗ya yö ˈö ˗Zlan ˗ya bɔ ˈˈkpɔnŋ ꞊taa ˗a ˗wɔn ˈgü bhë ˗a kë ˗sü ˗bha. ˗Ka Dhukö 3:21˗23 waa Zan 6:38 ˗an ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:

ˈDhɛ ˈö Yesu ˗yö bɔ ˈˈyi ꞊bhaa, yö ˗mɛɛn ˈö˗ bɔ ˈˈdhiʋ̈ ö ˗bha ˗tosɛta ˈgü?

5. Ü ꞊mɔɔn˗ ˗bha ˈü bɔ ˈˈyi ꞊bhaa ˈpö.

Ü ˗de ˗nu ˗Zlan ˗dhɛ ˗sü kö ˈü bɔ ˈˈyi ꞊bhaa bhë, ˗yö ꞊mɔɔn˗ ˗bha ˈö ˗kë ü ˈgü ˈˈgbɩɩ˗. ˈˈKɛɛ ü ˗gɛn ˗dho ˈdho ˈˈdhiʋ̈ ˈdɔɔni ˈdɔɔni, ˈö ˈˈtʋ̈ŋ ˈbhaa ˗ya ˗wo ˈü˗ yö ꞊dhɛ ˈbha ˗mɔn ˗bɔyibhaasü ˗bha. Pë ˈö mɛn ˈbhaa ˗nu ˗wa ˗kë kö ˈwo ˗mɔn ˈwɔn ˗së ˈö bhë ˗a kë ˗sü ˗bha, ˗kaa VIDEO ˗ga.

VIDEO: ˗Wo ˗kë Zoova ˈˈtɔŋdë ˈka ˗kɔ ˗kë ꞊dhɛ? (1:11)

˗Ka Zan 17:3 waa Zakö 1:5 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:

˗Wa ˗kë ꞊dhɛ ˈyö ˈwo ˗mɔn ˗bɔyibhaasü ˗bha?

(1). Dhebɔ do ˗ya yö ö kpɔn ˈgü ö ˗gɔ ˈkɔɔ, ˗yö ö ˗de nu ˗ni ˈgü Zoova ˗dhɛ bhɛɛwo ˈgü.

(2). Dhebɔ ˈö bhë ˗wa bɔ ˗ni ˈgü ˈˈyi ꞊bhaa kö ˗yö kë Zoova ˗bha ꞊Gbɛkiö ˈka. ˗Wa ˗dhü ˗todhʋ̈sü ˗mën ˈˈyi ꞊bhaa.

(1) Ü ˗de ˗nu Zoova ˗dhɛ ˗sü ˈnën ˈö ˗tɔ ˗a ˗pö ˗a ˗dhɛ ˗sü ˈö bhɛɛwo ˈgü ꞊dhɛ ü ˗dho ˗a ˗dhɔkë ˗toëpö ˈka.
(2) ˗Bɔyibhaasü ˗ya ˗zɔn mɛn ꞊gban ˈˈpɛpɛ ˈˈɲaan ˈka ꞊dhɛ ˈkwa kwa ˗de nu Zoova ˗dhɛ.

6. ˈKwa bɔ ˈˈyi ꞊bhaa kö ˈkwa kë Zoova ˗bha ˈkɔdhigümɛn ˈka.

ˈKwa bɔ ˈˈyi ꞊bhaa, kö Zoova ˗bha ˈkɔdhi ˈkpii˗ ˈö ˈˈkpɔnŋtaadhɛ ˗todhʋ̈sü ˈgü, ˈö˗ ˈgümɛn ˗nu ˗kɔ ˈdhö ˈwɔn do ˗bha bhë kö ˈkwa ˗da ˗a ˈgü. ˈKö ˗kë ꞊dhɛ kwa ˈti ˈgo ˈˈsɛ do ˈgü, kwa ˗bha ˗zoyödhe, kwa ˈˈtakɔ ˗nu waa kwa ˗bha ˈtɔŋ˗ ˗nu ˗wo do. ˗Ka Psaume 25:14 waa 1 Piɛdhö 2:17 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:

˗Bɔyibhaasü ˗yö kwaa Zoova waa˗ ˗dhɔkëmɛn ˈˈwɛɛ ˗nu kwa ˗bha ˗mlɛɛn ˗kë ˗kɔ ˗kë ꞊dhɛ?

Pë ˈˈbin ˗nu: Kwa ꞊dhegblüdhe do ˈö ˗ya bɔ ˈˈyi ꞊bhaa ˗yö ö ˗zota ˗ni ˈgü ˗mlɛɛn ˗së ˈö waa ö ꞊dhegblü ˗nu ˗an ꞊zinŋgü ˗a ˈgü, ˈö˗ zuʋ̈ˈˈ ꞊nii ˗ya ˗da. 1. ˗Yö ö zuʋ̈piʋ̈wɔn pö ˗ni ˈgü kwa ꞊dhegblüdhe do ˗dhɛ. 2. ˗Yö kwa ꞊dhegblüdhe zii do ˗takun ˗ni ˈgü kö ˗yö ˈˈta ˈsü. 3. Waa ö ꞊dhegblü ˗nu ˈö ˗an ˗kwɛ ˈyaa˗ do ˗wo pë ˗bhö ˗ni ˈgü wo ˈkwëë˗. 4. Waa kwa ꞊dhegblüdhe do ˗wo ˗zlanwopö ˗ni ˈgü gɔndë do ˗dhɛ. 5. ˗Bhɔkwëë ˈkpii˗ do ˗ta, waa kwa ꞊dhegblü ˗nu ˈwo go ˈˈsɛ ˈˈwɛɛ ˈgü ˗wo wo ˈˈbin ˈsü ˗ni ˈgü pɔtablö ˈka.

MƐN ˈBHAA ˗NU ˗WA ˗PÖ: «N ˈti ˗mɔn ˗bɔyibhaasü ˗bha ꞊köŋ.»

˗Yö ꞊mɔɔn˗ ˗bha ˈö ˗kë ü ˈgü ˈˈdhʋ̈ ˈpö. ˈˈKɛɛ ü ˗bha ˈgü, ü ˗de baaˈˈ ˗sü kö ˈü bɔ ˈˈyi ꞊bhaa bhë, ˈwɔn ˗së ˈyaa ˗mü ˗ee?

˗A ˈDHƐ TO KWA ˈˈƝAAN

Yesu ˗ya ˗pö ꞊dhɛ kletiɛn ˗nu dua ˗mü kö ˗wo bɔ ˈˈyi ꞊bhaa. Mɛn ˈö˗ ˈˈpiʋ̈ ˈö bɔ ˈˈyi ꞊bhaa, ˗a dua ˗mü kö ˗a ˗bha ˗zo ˗yö Zoova ˗dhɛ ˗sü ˗yö kë ˈˈgbɩɩ˗, kö ˗yö ˗a ˗bha ˈtɔŋ˗ ˗nu ˈkun, kö ˗yö ö ˗de nu ˗a ˗dhɛ.

˗Zobuödhe

˗Wo ˗bɔ ˈˈyi ꞊bhaa ˗kɔ ˗kë ꞊dhɛ? ˈMën ˗kë ˈö˗ ˗wɔn ˈdhö ˈˈgbɩɩ˗?
Ö ˗de ˗nu Zoova ˗dhɛ ˗sü waa ˗bɔyibhaasü ˗wo ˗gban wo ˈkwëë˗ ˗kɔ ˗kë ꞊dhɛ?
˗Mën ˗wɔn ˗nu ˈü ˗dho ˗an kë ˗blɛɛsü kö ˈü ꞊kun ü ˗de nu Zoova ˗dhɛ kö ˈü bɔ ˈˈyi ꞊bhaa?

ˈWɔn ˗gɔ ɲën ˗yi:

Pë ˈü ˗dho ˗a kë˗

˗Bhö ˈkɔ ˈnën ˗nu «ˈMan ˗mɔn ˗zlanwopösü ˗bha ˗zlanwokɔdhi ˈgümɛn ˗nu ˈˈpiʋ̈ ˗ee?» waa «ˈMan ˗mɔn ˗bɔyibhaasü ˗bha ˗ee?» ˈö ˈwo ˗kɔ ˈˈpian 4 ˗naan ˈˈdhiʋ̈todhɛ ˈgü bhë ˗an ˗ga, kö ˗kɔ ˈö ü ˗gɛn ˗ya ˈdho ˗a ˈka ˈˈdhiʋ̈ ˈü˗ dɔ.

˗A ˈbhaa:

Your other goal

˗AN ˗GA ˈPÖ

ˈWɔn ˈbhaa ˗nu ˈwo ˗gban ˗bɔyibhaasü ˗bha, ˗an ˗ga.

«ˈMën ˈö ˗tɔ ˗bɔyibhaasü?» (ˈWɔn ˗gɔ ˈö jw.org ˗ta)

˗Dhioo ˗nu ˈwo ˗dho ü ˗takun kö ü ˗gɛn ˗yö ˈdho ˈˈdhiʋ̈ kö ˈü bɔ ˈˈyi ꞊bhaa, ˗an ˗ga.

«Zoova ˗dhɔ ˗yö mɛn ˗blü ˗bɔyibhaasü ˗bha» (˗Kwɛ 2020 Masö ˗bha ˈˈGlaadhiʋ̈ ˗tɔn)

Gɔndë do ˗ya ˗yö ꞊dhɛ ˗bɔyibhaasü ˈö bhë ˈwɔn ˗bhaasü ˈyaa ˗mü. Pë ˈö˗ ˗takun ˗a ˗ga.

«˗Yö ˗kun ˗an ˈˈpiʋ̈ ꞊dhɛ gagade ˈö ˈdhö man ꞊dede ˈa˗ dɔ.» (˗Kwɛ 2013 Fevlie 1 ˗bha ˈˈGlaadhiʋ̈ ˗tɔn)

ˈPë ˗kë ˈö ˗bɔyibhaasü ˈdhö ˗së waa ˗kɔ ˈü ˗dho ü ˗de baaˈˈ ˗a ˈka, ˗a ˗ga.

«N dua ˗mü kö ˈa bɔ ˈˈyi ꞊bhaa ˗ee?» (Dhɛɛˈˈ ˗nu ˈö wlüünën ˗nu ˗wa kpɔ: ˗An ˗yɔ ꞊dede ˗nu, [˗A ˗be 2] ˈwɔn ˗gɔ 37)

a Mɛn ˈö ˗ya bɔ ˈˈyi ꞊bhaa ˗zlanwo ˈˈwɛɛ ˈgü ˈsaadhö, ˗a dua ˗mü ˈzü kö ˗yö bɔ ˈˈyi ꞊bhaa. ˈMën ˗kë? ˗A ˗gɛn ˗mü ꞊dhɛ ˗zlanwo ˈö kun ˗a ˈgü ˗be bhë, ˈwaa gagade ˈö Biblö ˈgü ˗a ˗zɔn mɛn ˗nu ˗dhɛ mü.—Kpɔɔˈˈ Këwɔn ˗nu 19:1˗5 waa ˈwɔn ˗gɔ 13 ˗an ˗bha.