Wo ˈti yö wo kpɔn ˈgü

ˈDhɛ ˈˈtʋ̈ŋ ˈnënbha ˗yö ˗ʒiö kö Nabukodonozɔ ˗ya ö ˗bha ˈˈɲɛɛn ˈö ˗gban pë ˈˈbin ˗bha bhë ˗a ˗bho, ˗yö pë ˈˈbin ˈkpii˗ do pëkë ˈˈsënŋ ˈka. ˗Ya ˗dɔ dudha ˗sɛ ˈgü ˈö mɛn ꞊bhlëësü ˈˈpɛpɛ ˈwo kun ˈˈsɛ bhë˗ ˈgü ˗an ˗dhɛ kö ˗wo nu dɔ ˗a wëëdhö. ˗Yö Shadrakö, Meshakö waa Abɛdönego ˗an ˗dhɛ ˈpö. ˗Gblüdë ˗ya ˗pö ˗an ˗dhɛ: ‹ˈKa ˈˈtruu, kɔŋ waa ˈˈtruunën ˗an ˗wo man, ˗ka yö ka kpɔn ˈgü kö ˈka pë ˈˈbin bhë ˗a ˗dhɔkë. Mɛn ˈˈʋʋ ˗mɛn ˈö ˈyii ˈdho yö ö kpɔn ˈgü, ˗wo ˗dho ˗a ˗mɛn ˗zuö ˈfuu˗ ˈö ˈˈshiʋ̈ ˗gɔɔn ˈdhö mü bhë, ˗a ˈgü.› Eblö ˈnën ˗nu ˗yaaga bhë, ˗wo ˗dho yö wo kpɔn ˈgü ˈö ˈwo pë ˈˈbin bhë ˗a ˗dhɔkë, ɛɛnˈˈ ˗wo ˗dho ˗klu Zoova dosɛnŋ ˗bha ˗ee?

ˈDhɛ ˗kë ˈˈdhʋ̈ ˈyö ˗gblüdë ˗ya pö ˈˈtanwɩmɛn ˗nu ˗dhɛ ˗wo ˈˈtan ˈˈwɩ. ˈYö mɛn ꞊gban ˗wo yö wo kpɔn ˈgü. Shadrakö, Meshakö waa Abɛdönego woo dosɛnŋ ꞊nën ˈwii yö wo kpɔn ˈgü. Mɛn ˈbha ˗nu ˗wo ˗kpan ˗an ˗bha ˈö ˈwo˗ pö ˗gblüdë ˗dhɛ: ‹Eblö ˈnën ˗nu bhë ˈwaa ˈˈwɩ˗ ˗bha kö ˗wo ü ˈˈbin ˗dhɔkë.› Nabukodonozɔ ˗yö ˗an ˗dhɛ ˈö˗ pö ˗an ˗dhɛ: ‹A ˗dho ˈˈtʋ̈ŋ ˈto ka ˗gɔ kö ˈka n ˈˈbin ˈö bhë ˗a ˗dhɔkë. Ka ˈti ˈˈwɩ˗ ˗bha, a ˗dho ka ˗zuö ˈfuu˗ ˈö ˈˈshiʋ̈ ˗gɔɔn ˈdhö mü bhë, ˗a ˈgü. ˗Zlan ˈbha ˈyii ˈdho ꞊mɔɔn˗ ˗bha kö ˗yö ka dha.› ˈYö ˈwo˗ pö: ‹Yi ˗bhawɔn ˈyaa ˈˈtʋ̈ŋ ˗bha. Yi ˗bha ˗Zlan ꞊mɔɔn˗ ˗bha ˈö yi dha. ˈKö ˗kë ˗ʒiaanwo ꞊dhɛ yö ˈti yi dha, yi ˈti ˗dho ü ˈˈbin ˈö bhë, ˗a ˗dhɔkë.›

ˈWɔn ˗yö ˗shiö ꞊dedewo Nabukodonozɔ ˗dhɛ, ˈö˗ pö ˗a ˗bha mɛn ˗nu ˗dhɛ: ‹˗Kaa kë kö ˈfuu˗ ˈö bhë ˗yö kë ˈˈwowosü ꞊dedewo ˗yö ʒiö˗ ˈka ˗a ˗naan ˗blɛɛsü bhë ˗a ˗ta ˗gɛnɲan ˈka ˈˈsɔɔplɛ.› ˈYö˗ ˗pö ö ˗bha ˈˈsɔdha ˗nu ˗dhɛ: ‹˗Kaa ˗an ˗klu ˈka ˗an ˗zuö ˗a ˈgü.› Kë ˈö˗ wo ꞊dhɛ ˗a ˗dhɛ ˗kun ˈˈwowosü ꞊dedewo bhë, ˗dhɛ ˈö ˈˈsɔdha ˗nu ˗wo yö ˗a ˈka ꞊klöö˗, ˗wo ˗to mü ˈwo ga. ˈYö Eblö ˈnën ˗nu ˗yaaga ˗wo ˗pö ˈˈshiʋ̈ bhë˗ ˈgü. Nabukodonozɔ ˗yö ˗dho ˈö ˗dhɛga ˗a ˈgü, ˈö ˗kpan mɛn ˗yiishiö ˗bha kö ˗wo ˈˈta ˈsü ˗ni ˈgü ˈfuu˗ bhë ˗a ˈgü, ˈˈkɛɛ ˈsa kö mɛn ˗yaaga ˈnën ˈwo ˗an ˗zuö mü. ˈYö ˈˈsuʋ̈ ˗yö ˗da ˗a ˈgü ˈö˗ pö ö ˗bha ˈˈsɔdha ˗nu ˗dhɛ: ‹Mɛn ˗nu ˈyi ˗an ˗zuö ˈˈshiʋ̈ ˈgü bhë ˈwaa kun ˗yaaga ˗ee? ˈˈKɛɛ a ˗kpan mɛn ˗yiishiö ˗bha, ˈyö˗ mɛn do ˗yö bhɔ ˗Zlan ˗bha ˈˈkiö ˗bha!›

Nabukodonozɔ ˗yö ˗ɲɔɔn ˈfuu˗ ˈö bhë ˗a ˈˈsɔɔ ˈö ˗gbla ˈö˗ pö: ‹˗Zlan ˈö pë ꞊gban ˈˈpɛpɛ ˗gɔ ˗ta, ˗a ˗dhɔkëmɛn ˗nu ˈka bhë, ˗ka yö ˈˈkpɛnŋ!› ˗Dhɛ ˈö Shadrakö, Meshakö waa Abɛdönego ˗wo go ˈˈshiʋ̈ ˈö bhë ˗a ˈgü, ˗a ˈwɔn ˗yö mɛn ꞊gban ˗kun. ˈˈShiʋ̈ ˈyii ˗an kwibhadhɛ, ˗an wundhɛ waa ˗an ˗bha sɔ ˗nu ˗bhö, ˈgo mü ˈzü ˈˈwo ˈˈtëë ꞊fii ˈyaa kun ˗an ˗bha.

ˈYö Nabukodonozɔ ˗ya ˗pö: ‹Shadrakö, Meshakö waa Abɛdönego ˗nu ˗bha ˗Zlan ˗yö ˈˈgbɩɩ˗. ˗Yö ö ˗bha ˈˈkiö ˗bɔ ˈö ˗an dha. ˗Zlan ˈˈwɛɛ ˈbha ˈyaa ˗dhɛ ˗an ˗bha ˗Zlan ˈdhö.›

˗Yö ü ˈˈpiʋ̈ kö ˈü to ˗klu ˗sü ˈka Zoova ˗bha ˈwɔn suu ˈˈʋʋ ˗su ˈgü ꞊dhɛ Eblö ˈnën ˗nu ˗yaaga bhë, ˗an ˈdhö ˗ee?