Gabliɛ -ya nu -wo Madhi -dhɛ

Edhizabɛtö ˗bha ˈkɔdhigümɛn do ˈbha ˗kun ˗dhö ˈwo˗ ˗dhɛ Madhi. ˗Yö ˗kun Nazadhɛtö Galile. ˈÖ kun ˈˈdhʋ̈ kö Zozɛfö ˈö ˗kë ˈˈdhüɲënmɛn ˈka bhë, ꞊yaa˗ za dɔ. ˈDhɛ Edhizabɛtö ˈgwü ˈˈsü ˗yö ˗kë ˈˈsɔɔdo, ˈyö ˗Zlan ˗bha ˈˈkiö Gabliɛ ˗yö ˗dho Madhi ˈˈpiʋ̈, ˈö˗ pö ˗a ˗dhɛ: ‹Madhi ˈbha ꞊bo! Ü ꞊bhlëë ˗yö ꞊va ꞊dedewo, ˈyö Zoova ˗yö ü ˈˈpiʋ̈.› ˈPë Gabliɛ kun ˗a pö ˗ni ˈgü bhë Madhi ˈyaa kun ˗a ˈgüman ˈni ˈgü. ˈYö Gabliɛ ˗ya pö ˈzü: ‹Ü ˗dho ˈgwü ˈsü ˈü ˈnëngɔɔn˗ do kpɔ.› ˈTɔ ˈü ˗dho ˗a ˗ya ˗a ˗bha ˈyö ˗tɔ Yesu. ˗Yö ˗dho kë ˗Gblüdë ˈka ˈö˗ ˗bha ˗Gblüdëdhɛ ˈˈdhiʋ̈todhɛ ˈyii ˗dho kë toŋtoŋdhö.›

Madhi -ya ˗pö: ‹˗Yö ˗dho kë ˈˈdhʋ̈ ˗kɔ ˗kë ꞊dhɛ, ˈˈkɛɛ kö ˈmaan gɔɔn˗ ˗wɔn dɔ?› ˈYö Gabliɛ ˗ya pö: ‹Zoova ˗fëëbhawɔn ˈyaa ˈdhö. ˗Zuu ˈˈslʋ̈ʋ̈slʋ̈ ˗dho nu ü ˗ta ˈö ˈü ˈnëngɔɔn˗ do kpɔ. Edhizabɛtö ˈö ˗kë ü ˗bha mɛn ˈka bhë, yö ˗de ˈpö ˗ya ˈgwü ˈsü.› ˈYö Madhi ˗ya pö ˗a ˗dhɛ: ‹˗Ɛɛ, Zoova ˗bha yökëdhe ˗mü n ˈka! ˈWɔn ˗nu ˗wo kë n ˗dhɛ ꞊dhɛ ˗kɔ ˈü˗ pö ˗a ˈka bhë, ˗a ˈdhö.›

Madhi ˗yö ˗dho ˈpödhɛ ˈbha ˈö ˗tɔn ˈgü Zuda ˗sɛ ˈgü ˗a ˈgü, kö ˈö dho ˗wo Edhizabɛtö ˗dhɛ. ˈDhɛ Madhi ˗yö Edhizabɛtö ꞊tuaa bho, ˈyö ˈnën ˈö kun Edhizabɛtö ˈgwü ˈgü bhë ˈö pa ö ˗de ˈka. ˈDhɛ ˗kë ˈˈdhʋ̈, ˈyö ˗zuu ˈˈslʋ̈ʋ̈slʋ̈ ˗yö nu Edhizabɛtö ˗ta, ˈö˗ pö: ‹Madhi, Zoova ˗ya ˈdhuëë˗ ˈkpɔ ü ˗bha. ˗A kë ˗sü kö n Dëmɛn dhe ˗yö nu ˗wo n ˗dhɛ bhë, ꞊bhlëë ˗wɔn ˈkpii˗ ꞊dede ˗mü n ˗man ˈka.› ˈYö Madhi ˗ya pö: ‹A Zoova ˈtɔ ˗bhɔ n zuʋ̈ˈˈ ꞊gban ˈka.› Madhi ˗yö ˈˈsu ˗yaaga ˗kë Edhizabɛtö ˈˈpiʋ̈ ˈyö ö ꞊yɛɛkë Nazadhɛtö.

ˈDhɛ ˈö Zozɛfö ˗ya man ꞊dhɛ Madhi ˗ya ˈgwü ˈsü, ˗yö ˗kë ˗a ˈˈpiʋ̈ kö ˈwo ˈˈkan. ˈˈKɛɛ ˗Zlan ˗bha ˈˈkiö ˗ya ˗pö ˗a ˗dhɛ: ‹Madhi ˈsü dhe ˈka ˗sü ˈˈsuʋ̈ ˈyaa ˗dho ü kë. ˈYii ˈwɔn yaa ˈbha kë.› ˈDhɛ ˗kë ˈˈdhʋ̈, ˈyö Zozɛfö ˗yö Madhi sü dhe ˈka, ˈö nu ˗a ˈka ö ˗gɔ ˈkɔɔ.