Yesu ˗bha ˈˈdhɛɛtadhiaŋ ˈö˗ zë ˗tɔn ˗ta

ˈDhɛ Yesu ˗yö ö ˗kɔ ˗yɛ ö ˗bha bɔmɛn ˗nu 12 ˗bha, ˗yö ˗yɔɔ ˈö dho ˗dhɛ ˈö mɛn kpö ˈkpii ꞊dede ˈdhö kun ˗a ˗bha, ˗a ˈgü. ˗A mɛn ˗nu ˈwo ˈˈdhʋ̈ ˗wo ˗go Galile ˗sɛ, Zude ˗sɛ, ˈTii˗, Sidɔn, Sidhi waa ˈˈsɛ ˗nu ˈwo Zuudɛn ga ꞊taabha, ˗an ˈgü. ˗Wo ˗nu mɛn ˗nu ˈö ˈwaa kun wo ˈflëë˗ ˈgü waa mɛn ˗nu ˈö ˗zuu yaa ˗yö kun ˗an sëëbho ˗ni ˈgü, ˗an ˈka. Yesu ˗yö ˗an ꞊gban ˗kë ˈˈklʋ̈ʋ̈klʋ̈. ˈDhɛ ˈö ö bo, ˈö dho ˗tɔn ˗ta ˈö ˈɲaannu, ˈö ˗ya mɛn ˗nu ꞊klaŋkë ˗sü ˗bha. ˗Yö ˈpë ˈkwa ˗dho ˗a kë kö ˈkwa kë ˗Zlan ˈˈtɔŋdë ˗nu ˈka, ˗a ˗blɛɛ. Kwa dua ˗mü kö ˈkwa˗ ˈwɔn dɔ ꞊dhɛ kwa ˗bhawɔn ˗yö Zoova ˗bha, ˈgo mü ˈzü ˗a ˗dhɔ dua ˗mü kö ˗yö kwa kë. ˈYö ˈkwaa ꞊mɔɔn˗ ˗bha kö ˈkwa˗ pö ꞊dhɛ ˗Zlan ˗dhɔ ˗yö kwa ˗kë, ꞊ya kë ꞊dhɛ mɛn ˈˈwɛɛ ˗nu ˗dhɔ ˈyaa kwa kë. Kwa ˈˈgblü dua ˗mü kö ˗yö kë ˗së mɛn ꞊gban ˈˈpiʋ̈, ˗a ˗de ˗ʒian kwa ˈyɔɔ˗ ˗nu ˈˈpiʋ̈.

Yesu ˗ya ˗pö: ‹Mɛn ˗nu ˈö ˈka ˗dhɔkë ˗an ˈka, ˈwaa ˈdho kë dosɛnŋ ka ˈˈtɔŋdë ˗nu ˈka. ˗Ka ˗dhɔkë ˈpö ka ˈyɔɔ˗ ˗nu ˈka. ˈGo mü, ˗ka mɛn ˗nu ˗bhawɔn ˈto ka zuʋ̈ˈˈ ꞊gban ˈka. ˈWɔn ˗ya ꞊shiö mɛn ˈbha ˗dhɛ ka ˗bha, ˗ka ˈdho˗ ꞊kee˗ ˈˈvaandhö kö ˈka ˈˈgën nu ˗a ˗dhɛ. ˗Ka mɛn ˈˈwɛɛ ˗nu ˈkun ꞊dhɛ ˗kɔ ˈö ˈka˗ ˈˈpiʋ̈ ˗wo ka ˈkun˗ ˈka, ˗a ˈdhö.›

Yesu ˗yö ˗dhioo ˗së ˈö ˗gban ꞊nɔɔn ꞊kwɛɛ˗ ˗nu ˗bha, ˗a ˗dɔ ˈpö. ˗Ya ˗pö: ‹˗Kë Zoova ˈˈtɔŋdë ˈka ˗sü ˗yö ˗së ˈö ˗ʒiö ˗a ˈka ˈwëëga ꞊va ˗bha ˗kë ka ˗gɔ ˗sü ˗ta. ˗Wo ꞊mɔɔn˗ ˗bha ˈwo ka ˗bha ˈwëëga ꞊kwaan, ˈˈkɛɛ mɛn ˈbha ˈyaa ꞊mɔɔn˗ ˗bha kö ˗yö ˈˈtɔŋdëdhɛ ˈö kaa Zoova ka ꞊zinŋgü, ˗a ꞊kwaan. ˈKaa ˈdho ˗ya pë ˈö ˈka ˗dho ˗a ˗bhö, pë ˈö ˈka ˗dho ˗a mü waa sɔ ˈö ˈka ˗dho ˗a ˗da ka ˗bha, ˗a ˗zotadhe ˗ta. ˗Ka ˗mannën ˗nu ˗ga. ˗Zlan ˗yö ˗an ˗gba ˗bhöpë ˈka yi ˈsaadhö ˈka. ˗Ya pë ˗nu ˈwo bhë ˗a ˗zotadhe ˗ta ˗sü ˈyaa ꞊mɔɔn˗ ˗bha kö ˗yö ka ˗bha ˗tosɛta ˗dhɛkpaɔyi ˈbha ˗da ˗a ˗ta. Pë ˈˈpɛpɛ ˈö ka ˗bhawɔn ˈdhö ˗a ˗bha, Zoova ˗ya ˗dɔ.›

Mɛn ˈbha ˈö ˗dho ˈwɔn blɛɛˈˈ ꞊dhɛ ˗kɔ ˈö Yesu ˗ya ꞊blɛɛ ˗a ˈka ˗a ˈdhö, mɛn ˗nu ˈwo bhë, ˈwii˗ yö do. ˗An ˗bha ˈtɔŋ˗ ˗gɔmɛn ˗nu ˈwii pë ˗nu ˈwo bhë ˗an ˗zɔn ˗an ˗dhɛ do. ˈMën ˗kë ˈö Yesu ˗yö kun mɛn ꞊klaŋkëmɛn ˗së ꞊dede ˈka? ˗Yö ˈˈdhʋ̈ ˈyö ˗tɔ ꞊dhɛ pë ˈˈpɛpɛ ˈö mɛn ˗nu ꞊klaŋ ˗kë ˗a ˈka bhë, ˗yö ˗go Zoova ˈˈpiʋ̈.