Ka Teneeŋ Zoro Naaŋmen, Bo Maaloo Teŋ Na Nyɛ?

1-2. Aŋa Lɔt, bo yelkpeɛne ka Kristabiiri meŋ tuoro zenɛ ŋa?

ZENƐ ŋa, ka teneeŋ wa nyɛ lɛ na noba naŋ taa gyog-sããnee a donɛɛ poɔŋ na, a maŋ vɛmeŋ teŋ taa teɛroŋ na Lɔt naŋ da taa na. Lɔt poɔ “da sãã ne [la] a tookoŋwoŋyɛlɛ deme nemboŋyɛlɛ” na. Lɔt da baŋɛɛŋ ka te sazu Saa na kyiiree a gyog-faare ŋa. (2 Pit. 2:7, 8) Lɔt naŋ da nɔŋ Naaŋmen a kyɛ zoruu zuŋ na, o da ba erɛ o yɛlɛ aŋa noba na naŋ da ŋmaa gyeeroo na. Noba naŋ ba taa gyeremɛ ko bege na Jehoova naŋ biŋ na ŋmaa gyeerɛɛ te meŋ. Kyɛ, ka teneeŋ vɛŋ ka nɔmmo na te naŋ taa ko Jehoova naŋ e kpeɛŋaa, a kyɛ zoroo meŋ, te na baŋ eɛ forifori.​—Yeng. 14:2.

² Jehoova boɔrɔŋ ka te e forifori, azuŋ oŋ vɛŋ baŋ sɛge kawaŋ-sonne naŋ na toɔ̃ soŋ te ka te e forifori eŋ a Yeng Yelibie gane poɔŋ. Kristabiiri zaa, dɔbɔ, pɔgeba, baapaalba ane neŋnyaane na toɔ̃ nyɛɛ tɔnɔ yi a kawane ŋa poɔŋ.

NAAŊMEN ZOOBU MAŊ GO TEŊ

3. Aŋa lɛ na Yeng Yelibie 17:3 naŋ wuli na, bonso aŋ e nimizeɛ ka te go te sukyie? (Kaa a foto meŋ.)

³ Yelnimizeɛ na kaŋa zuŋ aŋ seŋ ka te go te sukyie la ka, Jehoova baŋɛɛ yelzaa naŋ be te sukyieŋ. Lɛ wuleeŋ ka Jehoova baŋ teŋ meŋɛmeŋɛ. (Kanne Yeng Yelibie 17:3.) O kawane na na toɔ̃ soŋ teŋ ka te nyɛ nyɔvore naŋ ba taa baaraa. Ka teneeŋ maŋ teɛrɛ o kawane na yɛlɛ wagre zaa, o na nɔŋ teŋ yaga. (Gyn. 4:14) Ka teneeŋ de o kawane na tonɔ neŋ toma, te na tagɛɛ te menne yi a donɛɛ yeldɛgɛ poɔŋ, Setaana neŋ a donɛɛ noba meŋ koŋ baŋ bɛnle te. (1 Gyn. 5:18, 19) Ka teneeŋ moɔ̃ niŋe a tagra peɛlɛ Jehoova, gyeremɛ ane nɔmmo na teŋ taa koo na na maaleŋ eɛ zuluŋ. Te na maŋ mɔɔŋ kyɛ iri teɛroŋ faa zaa naŋ na toɔ̃ vɛŋ ka te e yelfaa yi te teɛroŋ poɔŋ, bonso te ba boɔrɔ ka te e yelzaa naŋ na sãã te Saa na poɔ. Ka teneeŋ wa tuore pigrinyɛ ka te e yelfaa kaŋa, te na soorɛɛ te menne ka, ‘Jehoova wuli maŋ nɔmmo yaga zaa, azuŋ, bonso aŋ seŋ ka N baŋ perɛ kyɛ e yɛlɛ naŋ na sãã O poɔ?’​—1 Gyn. 4:9, 10.

4. Sobuo ka Jehoova zoobu da soŋ te yɔɔpɔge kaŋa oŋ tage o meŋɛ yi peɛ̃mo toma poɔŋ?

⁴ Te yɔɔpɔge Marta naŋ be Croatia paaloŋ tuoree pigrinyɛ ka o de o meŋɛ eŋ peɛ̃mo toma poɔŋ. O sɛgɛɛŋ ka: “A maŋ eɛ kpeɛŋaa ko ma ka N teɛre yɛlɛ velaa, a kyɛ lɛ nyɔgrɔ N meŋɛ meŋ, ka lɛ vɛŋ ka N ta toŋ peɛ̃mo toma a woŋ noɔ̃ wagre fẽẽ poɔŋ. Kyɛ, Jehoova zoobu soŋ maŋ yaga.”b Sobuo ka Naaŋmen zoobu da toɔ̃ somoo? Marta yeleeŋ ka o da teɛrɛɛ yɛlɛ aŋ na yi a poɔŋ wa pɔgoo, ka o naŋ de o meŋɛ eŋ a peɛ̃mo toma poɔŋ. Lɛ aŋ seŋ ka te meŋ erɛ. A yɛlɛ faa zie meŋɛ la ka, ka teneeŋ de gbɛ-faa kaŋa, Jehoova poɔ na saaŋ yaga, kyɛ ka te lɛ kɔŋ apoɔsori ka te bebe tegitegilɛ a puoroo.​—Mun. 6:5, 6.

5. Bo yɛlɛ teŋ na baŋ zanne yi Leo yɛlɛ na poɔŋ?

⁵ Ka teneeŋ zoro Jehoova, te koŋ sage kaa iri neŋfaare ka ba e te zɔmenne. Te yɔɔ Leo naŋ be Congo paaloŋ wa zannɛɛ a yelnimizeɛ ŋa. Saŋa na oŋ wa de suobu na, yuomo anaare puoreŋ, o da nyɔgɛɛ noba naŋ erɛ yelfaare zɔmennoŋ. O da teɛrɛɛŋ ka, o ba erɛ Jehoova yelfaa zaa, bonso o da ba de o meŋɛ eŋnɛ o zɔmeŋ-faare na yelfaare poɔŋ. A ba kɔɔre kyɛ ka o zɔmeŋ-faare na bɛnloo oŋ de o meŋɛ eŋ dããnyukuoli ane peɛ̃mo toma poɔŋ. Beŋ la oŋ da leɛteɛre yɛlɛ na o dɔgreba naŋ e Kristabiiri naŋ da wuloo na, ane lɛ na oŋ da taa popeɛloŋ saŋa na oŋ da puoro Jehoova na. Boŋ da yi a poɔŋ wa? O da leɛ piili erɛɛ yɛlɛ naŋ soma. A lantaapuoruu nembɛrɛ da somooŋ oŋ leɛ wa Jehoova zie. Zenɛ ŋa, o de la popeɛloŋ a tonɔ toma aŋa a lantaapuoruu neŋkpoŋ kaŋa ane special paaneɛ.

6. Aŋ mine la a pɔgeba bayi na teŋ waana ka te zanne ba yɛlɛ na?

⁶ Yɛ vɛŋ ka te zanne yɛlɛ naŋ be Yeng Yelibie zuri 9 na yɛlɛ gaa tɔɔre. A Baabole yelee pɔgeba bayi mine yɛlɛ beŋ; a pɔge kaŋa are ko la yɛŋ, ka kaŋa meŋ are ko damboloŋ. (De manne neŋ Urom 5:14; Galesiya 4:24.) Saŋa na teŋ zanna a yɛlɛ ŋa na, baŋ ka Setaana donɛɛ ŋa poɔŋ, noba de la ba menne eŋ peɛ̃mo toma poɔŋ yaga, a kyɛ lɛ moɔ̃ niŋe kaara sɛŋsɛŋ fotori neŋ vidiori meŋ. (Efe. 4:19) Azuŋ, a eɛ nimizeɛ ka te zoro Naaŋmen a kyɛ tage te menne yi faaloŋ eŋɛŋ. (Yeng. 16:6) Ka te eɛ dɔɔ bee pɔge, kyɛ te na baŋ zannɛɛ yelkaŋa yi be. A pɔgeba ŋa bayi kaŋa zaa lɔɔ la nu a tonɔ boɔlɔ noba naŋ ba baŋ yɛlɛ nimiri yaga ka ba wa ba zie. A waa ŋa ba naŋ yele korɔ ‘noba naŋ ba baŋ yɛlɛ nimiri yaga te baare’ na ka, ‘Yɛ wa kpɛ N die ka te di bondirii.’ (Yeng. 9:1, 5, 6, 13, 16, 17) Kyɛ yɛlɛ naŋ na pɔge noba naŋ sage ba kaŋa zaa toŋboɔle na ba yitaa.

ZAGRE A PƆGE DAMBOLI TOŊBOƆLE NA

7. Aŋa lɛ na Yeng Yelibie 9:13-18 naŋ wuli na, boŋ na pɔge noba na naŋ sage a pɔge damboli toŋboɔle na? (Kaa a foto meŋ.)

⁷ Te kanne yɛlɛ na a ‘pɔge damboli’ naŋ taa ka o yeli. (Kanne Yeng Yelibie 9:13-18.) O maŋ de la nyaa a tonɔ boɔlo noba naŋ ba baŋ yɛlɛ yaga nimiri na, a yele korɔ ba ka, yɛ “leɛ beɛ kpɛ kyɛ” a di bondinoɔ̃ne. Bo yɛlɛŋ maŋ pɔge noba naŋ sage o toŋboɔle na? Kũũ. Bonso, ‘kũũniŋ be’ o die naŋ. Ka hooŋ kaa a Yeng Yelibie gane poɔŋ, ho na nyɛɛ a yelmannee ŋa taa beŋ. A Yeng Yelibie gane kpãã teŋ a kyaare “gyɛnterɛ” ane “pɔge sɛŋsɛnɛ” kaŋa yɛlɛ. A kyɛ lɛ yelka: “O die sigre gɛrɛɛ kũũ poɔŋ.” (Yeng. 2:11-19) Yeng Yelibie 5:3-10 meŋ kpãã teŋ a kyaare “pɔg-gyɛnterɛ” kaŋa yɛlɛ, a pɔg-gyɛnterɛ ŋa ‘gbɛɛ maŋ sigre gɛrɛɛ kũũ poɔŋ.’

8. Bo gbɛre aŋ seŋ ka te de?

⁸ Noba na a “pɔge damboli” naŋ tonɔ boɔlɔ na seŋ ka ba de gbɛre: Ba na sagɛɛ o toŋboɔle na bee ba koŋ sage? Saŋa kaŋa, a na wa fɛreŋ ka te meŋ de a gbɛre ŋa. Ka neɛ kaŋaŋ bɛnlɛ te ka te toŋ peɛ̃mo toma, kyɛbee ka teneeŋ wa nyɛ sɛŋsɛŋ fotori ane vidiori TV zuŋ kyɛbee intanɛt zuŋ, wala aŋ seŋ ka te e?

9-10. Bonso aŋ e nimizeɛ ka te tage te menne yi peɛ̃mo toma poɔŋ?

⁹ Bonso aŋ e nimizeɛ ka te tage te menne yi peɛ̃mo toma poɔŋ? A “pɔge damboli” na yeleeŋ ka: ‘Koɔ̃ baŋ zu maŋ nomaŋ.’ Boŋ la a ‘koɔ̃ baŋ zu na’? A Baabole maŋ de la kultaa deme gaŋneŋ taa manne neŋ koɔ̃ naŋ korɔ ba pɛnnoo. (Yeng. 5:15-18) Ka dɔɔ neŋ pɔgeŋ tu sori naŋ seŋ neŋ poɔŋ kyɛ kultaa, ba na toɔ̃ gaŋnɛɛ taa. Kyɛ, a ‘koɔ̃ baŋ zu na’ yɛŋ ba waa lɛ. A ‘koɔ̃ baŋ zu na’ na baŋ are ko la peɛ̃mo toma naŋ ba seŋ neŋ. Aŋa lɛ na nannyige naŋ maŋ sɔgle a wa zu boma na, noba naŋ tonɔ peɛ̃mo toma maŋ sɔglɔ erɛɛ lɛ. Ka neɛzaaŋ ba nyɔge ba, ba maŋ teɛreŋ ka a ‘koɔ̃ baŋ zu na’ nomaŋ yaga. Kyɛ ba menne baŋ bɛnlɛ! Bonso Jehoova nyɛrɛɛ yelzaa. Ka teneeŋ kɔŋ Jehoova maaloo, te na kpɛɛ tuo yaga poɔŋ. Azuŋ, a koɔ̃ ŋa ba ‘noma’ fẽẽ zaa. (1 Kor. 6:9, 10) Kyɛ, a zaa naane lɛ.

¹⁰ Ka hooŋ de ho meŋɛ eŋ peɛ̃mo toma poɔŋ, a na toɔ̃ eŋ boŋ vi, ho na baŋ taaɛ poɔ saŋa ho naŋ ba boɔrɔ, ana baŋ sããŋɛɛ noɔreyeni naŋ be ho booree poɔŋ meŋ. Peɛ̃mo toma na toɔ̃ vɛmeŋ ka neɛ teɛre ka o ba taa tɔnɔ zaa. Azuŋ, a na somaŋ yaga ka te zagre a pɔge damboli na toŋboɔle. A ba seŋ ka te gaa o “die” na a te di bondirii. Ka teneeŋ e lɛ te neŋ Jehoova niiloŋ na e kpeɛŋaa. Noba yaga naŋ de ba menne eŋ peɛ̃mo toma poɔŋ maŋ toɔ̃ nyɛɛ baaloŋ naŋ na baŋ iri ba nyɔvore. (Yeng. 7:23, 26) Yeng Yelibie zuri 9 o wɛlbo 18 baaraa zie na yeleeŋ ka: ‘O die saamma be la yaa bɔgi-zuluŋ poɔŋ.’ Kyɛ, bonso ka noba yaga maŋ sage a pɔge damboli ŋa toŋboɔle na a te kpɛ a toɔrɔ ŋa poɔ?​—Yeng. 9:13-18.

11. Bonso ka sɛŋsɛŋ fotori neŋ vidiori kaabo e yɛlɛ naŋ na baŋ pere te?

¹¹ Kyɛbaa na kaŋa naŋ nyɔgrɔ noba yaga la sɛŋsɛŋ fotori neŋ vidiori kaabo. Noba mine maŋ teɛre ka sɛŋsɛŋ fotori neŋ vidiori kaabo ba e yelfaa zaa. Kyɛ, sɛŋsɛŋ fotori neŋ vidiori kaabo na baŋ sããŋɛɛ noba teɛroŋ, noba naŋ kaaraa ba maŋ taa gyeremɛ ko ba menne ane ba taaba. A yɛlɛ ŋa na baŋ nyɔgɛɛ neɛ ka o bara faana. A sɛŋsɛŋ fotori ŋa na baŋ be la neɛ teɛroŋ poɔŋ a kɔɔre; a maŋ eɛ kpeɛŋaa ka ba iri a yɛlɛ yi ba teɛroŋ poɔŋ. Ka neɛŋ kaara sɛŋsɛŋ fotori neŋ vidiori, o koŋ baŋ tage o meŋɛ yi vɔlfaare eŋɛŋ, kyɛ a kaabo maŋ guolee a vɔlfaare. (Kol. 3:5; Gyi. 1:14, 15) A baaraa zaa, noba yaga naŋ kaara sɛŋsɛŋ fotori neŋ vidiori maŋ de la ba menne eŋ peɛ̃mo toma poɔŋ.

12. Wala teŋ na baŋ e a go te menne yi fotori naŋ na toɔ̃ vɛŋ ka te taa peɛ̃mo toma vɔlaa?

¹² Ka teneeŋ ba kaara soriŋ kyɛ ka sɛŋsɛŋ fotori wa yi te fone bee komputa zuŋ, wala aŋ seŋ ka te e? Aseŋ ka te iri te nimie yi o eŋɛŋ wieoŋ lɛ. Ka teneeŋ de te neŋ Jehoova niiloŋ na tegroŋ yaga zaa, a na eɛ mɔlɔ ka te e lɛ. Haali fotori mine naŋ ba e sɛŋsɛŋ fotori te baare na baŋ vɛmeŋ ka te taa vɔlfaare. Bonso aŋ seŋ ka te tage te menne yi a eŋɛŋ? Ananso la ka, te ba boɔrɔ ka te e yelfẽẽ zaa naŋ na vɛŋ ka te toŋ peɛ̃mo toma. (Mat. 5:28, 29) Lantaapuoruu neŋkpoŋ kaŋa naŋ be Thailand paaloŋ baŋ boɔlɔ David yeleeŋ ka: “N maŋ soorɛɛ N meŋɛ ka: ‘Haali ka a fotoriŋ ba e sɛŋsɛŋ fotori te baare, kyɛ ka maaŋ kaaraa, Jehoova poɔ na pɛleŋ bee?’ Ka teneeŋ maŋ teɛrɛ yɛlɛ lɛ, a na soŋ teŋ ka te derɛ gbɛ-sonne.”

13. Boŋ na baŋ soŋ te ka te derɛ gbɛ-sonne?

¹³ Ka teneeŋ zoro Jehoova, te koŋ sage e yɛlɛ naŋ na sãã o poɔ. A yɛlɛ ŋa na toɔ̃ soŋ teŋ ka te derɛ gbɛ-sonne. A Baabole yeleeŋ ka, “Jehoova zoobu la yɛŋ munpiilee.” (Yeng. 9:10) Ka hooŋ kaa Yeng Yelibie zuri 9, ho na nyɛɛ a yelsonne ŋa beŋ. Ka hooŋ kaa a piilee zie na, a Baabole de la pɔge kaŋa manne neŋ “yɛŋ” naŋ e meŋɛ.

SAGE A PƆGE NAŊ ARE KO “YƐŊ” MEŊƐ TOŊBOƆLE NA

14. Bo toŋboɔle yuo la be Yeng Yelibie 9:1-6?

¹⁴ Kanne Yeng Yelibie 9:1-6. A yi a zie ŋaŋ, Neɛ na zie yɛŋ meŋɛ naŋ yi la lɔɔ nu a tonɔ boɔlɔ te. A soba ŋa la Jehoova, Onaŋ maale te na. (Yeng. 2:6; Uro. 16:27) A Baabole de la die kaŋa naŋ taa pilare ayɔpoi manne neŋ a yɛlɛ ŋa. A yelmannaa ŋa wuleeŋ ka, Jehoova eɛ neɛ naŋ maŋ yuoro o nu a terɛ boma. O maŋ yuo la sori ko neɛzaa ka ba wa o zie a wa nyɛ yɛŋ a de tonɔ neŋ toma ba zemmo poɔŋ.

15. Bo ka Naaŋmen tonɔ boɔlɔ te ka te wa e?

¹⁵ Jehoova eɛ Neɛ naŋ maŋ yuoro o nu a terɛ boma. A yi a pɔge naŋ are ko “yɛŋ” meŋɛ ewuli soŋ naŋ be Yeng Yelibie o zuri 9 poɔŋ na, te wa zannɛɛŋ ka Jehoova taaɛ a gyogri ŋa. A Baabole yeleeŋ ka, a pɔge ŋa maŋ toŋboɔlɛɛ noba baŋ wa o die a wa ɔɔ nɛne, a kyɛ nyu waiŋ. (Yeng. 9:2) O wɛlbo 4 neŋ 5 na yeleeŋ ka: “Neɛ meŋ naŋ ba baŋ yɛlɛ nimiri yaga, o yeli kooŋ: ‘Wa di siimaa.’” Bonso aŋ seŋ ka te sage a pɔge ŋa toŋboɔle na? Ananso la ka, Jehoova boɔrɔŋ ka o biiri zaa e yɛmbaŋneba a kyɛ taa gomeŋɛ meŋ. Jehoova ba boɔrɔ ka te de gbɛ-faare a pãã di dɔgɛɛ yaga kyɛ zanne yɛŋ. O ba boɔrɔ ka te daaŋ e kaŋdabaŋkalɛ zaa. A lɛ zuŋ oŋ maŋ ‘de yɛŋ naŋ e soŋ a biŋ ko sontuuribo.’ (Yeng. 2:7) Ka teneeŋ zoro Jehoova sori naŋ seŋ neŋ poɔŋ, te na erɛɛ yɛlɛ naŋ pɛlɛ o poɔ. O maŋ yi la yɛŋ poɔŋ a korɔ te kawane, ka teneeŋ de a kawane tonɔ neŋ toma, te na taaɛ popeɛloŋ yaga.​—Gyi. 1:25.

16. Sobuo ka Jehoova zoobu da soŋ Alain oŋ toɔ̃ de gbɛre naŋ soma? Ka bo maalooŋ da yi a poɔŋ wa?

¹⁶ Alain naŋ da zoro Naaŋmen na zuŋ, o da toɔ̃ de la gbɛre naŋ soma. Alain eɛ a lantaapuoruu neŋkpoŋ kaŋa, a kyɛ lɛ e wulwulo sakuu kaŋaŋ. Ŋaa oŋ yeli, “N wulwultaaba na da nyɛɛ sɛŋsɛŋ vidiori ka a eɛ sori kaŋa baŋ na baŋ tu kyɛ wuli noba gaŋneŋ taa yɛlɛ.” Kyɛ, Alain da baŋɛɛŋ ka zirii la. O lɛ yeleeŋ ka: “Maŋ zoro Jehoova na zuŋ, N da zagrɛɛŋ ka N kaa a vidiori ŋa. N da mannɛɛ bon naŋso maŋ de a gbɛre ŋa ko N taaba na.” Alain de la “yɛŋ” meŋɛ tonɔ neŋ toma, a toɔ̃ “kyɛnɛ nimiyuo soriŋ.” (Yeng. 9:6) A gbɛre na Alain naŋ da de na da soŋɛɛ o wulwultaaba na, ka ba mine piili zanna a Baabole, a kyɛ gɛrɛ te Kristabiiri lammore na meŋ.

17-18. Bo maaloo ka noba naŋ sage a pɔge na naŋ are ko “yɛŋ” meŋɛ toŋboɔle na nyɛrɛ pampana? Ka bo maaloo baŋ na lɛ nyɛ nendaare kaŋa? (Kaa a foto meŋ.)

¹⁷ Jehoova de la a pɔgeba bayi yelmannaa ŋa wuli te lɛ teŋ na toɔ̃ e a nyɛ popeɛloŋ meŋɛmeŋɛ nendaare kaŋa. Noba naŋ sage a ‘pɔge damboli’ naŋ gɔnɔ na maŋ de la ba teɛroŋ zaa eŋ “noɔ̃” baŋ na woŋ pampana ŋa na eŋɛŋ. Yelmeŋɛ la, ba wonee noɔ̃ pampana, kyɛ ba ba baŋ yɛlɛ naŋ na pɔge ba nendaare kaŋa. Ba yel-eree na na de baŋ gaaneŋ ‘kũũ bɔgi zi-zuluŋ na poɔŋ.’​—Yeng. 9:13, 17, 18.

¹⁸ Kyɛ bo maaloo ka noba naŋ sage a pɔge na naŋ are ko “yɛŋ” meŋɛ na na nyɛ? Pampana ŋa, noba naŋ sage a toŋboɔle ŋa diree bondinoɔ̃ne naŋ eŋnɛ faŋa yaga. Ba taaɛ popeɛloŋ meŋ, bonso ba taaɛ boma zaa naŋ na toɔ̃ soŋ ba ka ba tage peɛle Jehoova. (Aiz. 65:13) Jehoova tu la daŋyele Aizeeya zieŋ kyɛ yelko te ka: ‘Yɛ kyɛllɛ N yelyaga soŋ a di bon naŋ soma, a vɛŋ ka yɛ enne mãã bon gyamaa eŋɛŋ.’ (Aiz. 55:1, 2) Te zannaŋ ka te nɔnɔ bon Jehoova naŋ nɔnɔ, a kyɛ kyiire bon na Jehoova naŋ kyiiri. (Yiem. 97:10) Te maŋ de la popeɛloŋ tonɔ boɔlɔ noba ka ba wa nyɛ “yɛŋ” meŋɛ. Te waa ŋa tontonneba naŋ “moɔlɔ a yi-kpoŋ ziduoruu sazuŋ: ‘Neɛ zaa naŋ ba baŋ yɛlɛ nimiri yaga, o soba leɛ wa kyɛ.’” Noba naŋ sage a toŋboɔle ŋa na nyɛɛ maaloo yaga pampana ane nendaare kaŋa. A yɛlɛ ŋa na baŋ soŋ teŋ ka te “tare nyɔvore” naŋ ba taa baaraa, a kyɛ “kyɛnɛ nimiyuo soriŋ.”​—Yeng. 9:3, 4, 6.

19. Aŋa lɛ na Ikilisiasitiz 12:13, 14 naŋ yel na, bo yɛlɛ aŋ seŋ ka te moɔ̃ niŋe erɛ? (Kaa a daga ŋa, “Tɔnɔ Teŋ Na Baŋ Nyɛ Yi Naaŋmen Zoobu Eŋɛŋ.”)

¹⁹ Kanne Ikilisiasitiz 12:13, 14. Ka teneeŋ zoro Jehoova, te na taa la gomeŋɛ, a e forifori, a kyɛ tage peɛle Jehoova meŋ a bebi-baaree ŋa poɔŋ. A Naaŋmen zoobu ŋa na lɛ eŋ teŋ faŋa ka te moɔ̃ niŋe tonɔ boɔlɔ noba yaga ka ba wa bɔ “yɛŋ” meŋɛ, a toɔ̃ nyɛ tɔnɔ yi o poɔŋ.