N Da Nyɛɛ Gomeŋɛ Bonso N Dɛlɛɛ Jehoova

SORI NA MAŊ TU KYƐ WA BAŊ JEHOOVA A KYƐ DƐLOO MEŊ

Ba dɔge maŋ koraa kaŋa naŋ be Nigeria samun-gɔɔ ane samun-duri kpakyagaŋ yuoni 1948 poɔŋ. Ana yuoni na, N Areba Moustapha, N sãã-bile, ane N beɛre Wahabi da deɛ suobu a wa leɛ Jehoova Sieree Deme. Yuomo awae maŋ di kyɛ ka N ba kpi. N sukyiri zaaŋ da kyɛre. N beɛre Wahabi da yel ko maŋ ka te na baŋ lɛ nyɛɛ te Ba a kũũ leɛ-iruu saŋa. Ana sukyiridii yɛlɛ ŋa da vɛŋɛɛŋ maŋ piili zanna a Baabole. Yuoni 1963 poɔŋ maŋ da de suobu. A puoriŋ, N yɔɔdɔba bata meŋ da deɛ suobu.

N da gaaɛ Lagos N beɛre Wilson zie yuoni 1965. A paaneere naŋ da be a Igbobi Lantaapuoruu poɔŋ na da taa la popeɛloŋ yaga. Ba popeɛloŋ ane ba eŋnyagroŋ na da eŋ maŋ faŋa maŋ meŋ wa leɛ paaneɛ January 1968 poɔŋ.

Te yɔɔdɔɔ Albert Olugbebi naŋ da tonɔ toma Bɛɛtil na da boɔlɛɛ baapaalba lammo kaŋa naŋ e o yoŋ, a yeli ka ba boɔrɛɛ special paaneere Nigeria samun-gɔɔ seŋ. N naŋ teɛrɛɛ te yɔɔdɔɔ Olugbebi eŋnyagroŋ yɛlɛ naŋ eŋnɛ faŋa yaga zaa na: “Yɛ eɛ baapaalba naŋ na baŋ de yɛ faŋa ane yɛ wagre toŋ toma ko Jehoova. Toma yaga bebeŋ aŋ seŋ ka yɛ toŋ!” N da boɔrɔŋ ka N tɔgle a daŋyele Aizeeya meŋɛ deterebo gyogo na, azuŋ N da fiilɛɛ a fɔɔm ka N e special paaneɛ.—Aiz. 6:8.

Yuoni 1968 May poɔŋ, ba da toŋ boɔle maŋ ka N gaa te toŋ special paaneɛ toma Kano teŋkpɛŋ naŋ be Nigeria samun-gɔɔ seŋ na. Ana wagre na, ba da naŋ zɔɔrɛɛ a Biafran Zɔɔre na (1967-1970), a zɔɔzɔɔreba da sãã la a teŋkpɛŋ yaga zaa sɛre kyɛ leɛ gaa Nigeria sapare seŋ meŋ. Te yɔɔdɔɔ kaŋa da yelko maŋ ka N ta wa gɛrɛ, bonso o da ba boɔrɔ ka N te kpi. Kyɛ N da yel kooŋ ka: “Bareka ho naŋ teɛrɛ N yɛlɛ. Ka anaŋ e Jehoova boɔbɔ ka N te toŋ a toma ŋa yɛŋ, bonnoo zaa kyebe ka o na soŋ maŋ.”

N DA DƐLƐƐ JEHOOVA SAŊA NA MAŊ DA BE ZIE NA A ZƆƆRE NAŊ DA BE NA

Lɛ na a zɔɔre naŋ da sãã a Kano teŋkpɛŋ na da eɛ nembao yaga zaa. Wagre mine, te da maŋ nyɛɛ noba ba naŋ ko ko lɔɔ ka teneeŋ wa be a naaŋ moɔloo poɔŋ. Aneazaa ka lantaapuoree yaga da be la Kano poɔŋ, kyɛ te yɔɔmine na yaga zie zaa da zo yi la a teŋɛŋ. Te yɔɔmine naŋ da kyɛre na da ba ta 15, dabeɛ̃ da kpɛ baŋ ka ba enne meŋ zaa da kyoɔre. Kyɛ saŋa na tenee naŋ e special paaneere bayoɔbo naŋ da gaa te ta be na, te yɔɔmine ŋa poore zaaŋ da pɛle. Te da eŋɛɛ a naa moɔleba faŋa yaga zaa. Te da soŋɛɛ te yɔɔmine na baŋ leɛ piili a lammore ane a naaŋ moɔloo toma, a da sɛgre yɛlɛ biŋ baŋ na maŋ toɔ̃ toɔle ba naaŋ moɔloo report ko Bɛɛtil a kyɛ lɛ vɛŋ ka Bɛɛtil meŋ maŋ toɔle te gama na mine ko ba.

Tenee na naŋ da e a special paaneere na da piili zannɛɛ a Hausa kɔkɔre. Teŋ da de ba menne kɔkɔre moɔlɔ a duorisoŋ zuŋ, noba yaga da kyɛllɛŋ. Kyɛ puoruu na naŋ da de yuori Kano poɔŋ puorebiiri da ba nɔŋ ka te moɔlɔ a duorisoŋ fẽẽ zaa, azuŋ a da wa fɛrɛŋ ka te kaara te menne soŋ zaa. Daare kaŋa, dɔɔ kaŋa da dige teŋ ne soɔ. Kyɛ te da zo gaŋooŋ oŋ ba pɔge te! Aneazaa ka te da tuoree yelkpeɛne, kyɛ Jehoova da soŋ teŋ teŋ taa ‘gomeŋɛ,’ ka noba yaga meŋ wa leɛrɛ naaŋ moɔleba. (Yiem. 4:8) Zenɛ ŋa, naaŋ moɔleba naŋ pare 500 la be lantaapuoree 11 Kano teŋkpɛŋ naŋ.

BA DA IRI ZƆƆRƆ NE TEŊ NIGER PAALOŊ

Kyuuri a wala mine puoriŋ, ba da vɛŋɛɛŋ ka N neŋ special paaneere bayi da yi Kano a gaa Niamey Niger teŋkpɛŋ August 1968. Te da wa nyɛɛŋ ka Niger poɔ la Africa Saniŋe paalonne na mine naŋ tuli yaga zaa a donɛɛ zuŋ na. Te da naŋ moɔrɔ neŋ la a tulooŋ, kyɛ aŋ da naŋ fɛre ka te zanne ba kɔkɔre naŋ e French na meŋ. Aneazaa ka a da ba e mɔlɔ ko te fẽẽ zaa, kyɛ te da dɛlɛɛ Jehoova ka te ne te yɔɔ mine fẽẽ naŋ da bebe na piili moɔlɔ a duorisoŋ Niamey poɔŋ. A da ba kɔɔre kyɛ ka noba na zaa naŋ baŋ kannoo a be Niamey na yaga zie zaa da taa te Baabole zannoo gane naŋ la The Truth That Leads to Eternal Life. Noba gba da maŋ wa boɔrɔ teŋ ka te ko ba te gama na mine!

A da ba kɔɔre kyɛ teŋ da wa nyɛ ka, a paaloŋ kaareba da ba nɔŋ Jehoova Sieree Deme yɛlɛ. July 1969 poɔŋ teŋ da e a dɛndɛŋ gbandige lammo a paaloŋ. Noba naŋ da ta ŋa 20 la da wa a lammo. Te yɔɔdɔba bayi la da waana ka ba de suobu. Kyɛ a lammo bebi-dɛndɛŋ soba, polisiri da wa vɛŋɛɛŋ teŋ bare a lammo eebo. Ba da nyɔgɛɛ a special paaneere ane a gbandige zukaara a gaa neŋ police station. Baŋ da soore soore te soorebie baare na, ba da yel ko teŋ ka, ka zieŋ wa nyãã, te leɛ de te menne wa wuli ba. Teŋ da nyɛ ka a paaloŋ kaareba boɔrɔŋ ka ba fɛre te na zuŋ, te neŋ bana naŋ da waana ka ba de suobu na da sɔglɛɛ die kaŋa poɔŋ a tere a suobu yelyaga a kyɛ sɔgle ko ba suobu baa kaŋa poɔŋ.

Daaraa wala mine puoriŋ, a Gɔmenante da digee N neŋ a special paaneere banuu na zaa ka te yi Niger. Ba da ko teŋ aware 48 ka te yi a paaloŋ, kyɛ lɛ zaa teŋ na e kyɛ gaa yɛŋ da ba la e ba yɛlɛ. Te da tu la ba noɔre, azuŋ te da yi la be a gaa Nageria Bɛɛtil, beŋ la baŋ da lɛ te ko te toŋ yobo.

Ba da de maŋ gaa Nigeria koraa kaŋa ba naŋ boɔlɔ Orisunbare, naaŋ moɔleba fẽẽ lɛ la da bebe. N da taa la popeɛloŋ yaga a naaŋ moɔloo poɔŋ. Kyɛ kyuuri ayoɔbo puoriŋ Bɛɛtil da yelka N leɛ gaa Niger paaloŋ. A piilee na, N noɔre da maaŋɛɛŋ kyɛ ka dabeɛ̃ meŋ da kpɛ ma, kyɛ N eŋɛ da nyagraŋ ka N lɛ nyɛ te yɔɔmine naŋ be Niger na!

N da leɛ gaa la Niamey. N naŋ da wa ta ka zie nyaa na, N da pɔge la dɔɔ kaŋa naŋ e dadire a yi Nigeria paaloŋ, o da nyɛɛŋ ka N eɛ Jehoova Sieree Deme kaŋa, azuŋ o da piili soorɔ maŋ yɛlɛ a kyaare a Baabole. N neŋ o da piili zannɛɛ boma, a da ba kɔɔre kyɛ oŋ bare sigaare nyuubu ane dããnyukuoli kyɛ de suobu. N poɔ da pɛlɛɛŋ ka N neŋ a te yɔɔmine na naŋ da be Niger na moɔle a duorisoŋ a Niger paaloŋ poɔŋ, a nyɛ lɛ noba naŋ da piili sagra a yelmeŋɛ fẽẽfẽẽ fẽẽfẽẽ. Saŋa na maŋ da wa ta be na, Jehoova Sieree Deme 31 la da bebe; kyɛ saŋa na maŋ da wa yire be na ba noɔre da ta la 69.

“TE BA BAŊ LƐ A NAAŊ MOƆLOO TOMA YƐLƐ NAŊ WAA GUINEA PAALOŊ”

N da leɛ gaa la Nigeria paaloŋ ka N te deɛ wulibo Bɛɛtil poɔŋ December yuoni 1977 poɔŋ. Ba da de la daaraata ko ma a wulibo. Saŋa na teŋ da wa baare na, a Nigeria Bɛɛtil Zukaareba zukaara Malcolm Vigo da vɛŋɛɛŋ maŋ kanne lɛtɛ kaŋa naŋ da yi Sierra Leone paaloŋ Bɛɛtil. Te yɔɔmine na da boɔrɛɛ te yɔɔdɔɔ laafeeloŋ naŋ paale oŋ ba taa pɔge, kyɛ wono Nansaalee ane French kɔkɔre ka o te e gbandige zukaara. Te Yɔɔdɔɔ Vigo da yelko maŋ ka ba da korɔ maŋ ana wulibo ŋa ka N te toŋ a toma ŋa. O da vɛŋɛɛŋ aŋ pɛle ka a toma ŋa ba gaŋ teŋɛŋ. O da ko maŋ kawane ka N “teɛre a yɛlɛ gaa tɔɔre soŋ sɛre kyɛ de gbɛre.” N da yelkooŋ daadaa lɛ ka, “Jehoova la toŋ ma, azuŋ N na gaaŋ.”

N da kpɛ la plane a gaa Sierra Leone paaloŋ a te pɔge te yɔɔmine naŋ be a Bɛɛtiliŋ na. A Bɛɛtil Zukaara kaŋa da yelko maŋ ka, “te ba baŋ lɛ a naaŋ moɔloo toma yɛlɛ naŋ waa Guinea paaloŋ.” Aneazaa ka a Bɛɛtil naŋ be Sierra Leone paaloŋ na la da kaara Guinea paaloŋ naaŋ moɔloo toma zu, kyɛ a da eɛ kpeɛŋaa ka ba neŋ a naaŋ moɔleba naŋ bebe na di dama, bonso naaŋ di yɛlɛ da vɛŋɛɛŋ ka tage ka N tage be a paaloŋ. Ba da mɔɔyɛŋ gbɛɛ yaga ka ba toŋ te yɔɔmine ka ba gaa te nyɛ lɛ te yɔɔmine naŋ erɛ beŋ, kyɛ ba ba toɔ̃ e lɛ. Azuŋ ba da toŋ maŋ ka N gaa Guinea paaloŋ teŋkpɛŋ Conakry, a mɔɔrɔ ka N nyɛ gama naŋ na ko ma vuo ka N toɔ̃ kpeɛrɛ a paaloŋ.

Saŋa na maŋ da wa ta Conakry, N da gaa la a Nigeria embassy a te pɔge a Nigeria paaloŋ gɔmenante gbɛbogi-ara. N da yelkooŋ ka N boɔrɔŋ ka N tonɔ a naaŋ moɔloo toma Guinea paaloŋ. Kyɛ o da yelko maŋ ka N ta wa zenɛ be, bonso ba na baŋ nyɔge maŋ pɔge bee ka yelfaa kaŋa baŋ pɔge ma. O da yelko maŋ ka, “Leɛ gaa Nigeria a te moɔlɔ a duorisoŋ be,” kyɛ maŋ da yelkoo ka, “N naŋ boɔrɔŋ ka N zeŋ kyɛ.” Azuŋ o da sɛge la lɛtɛ ko Guinea paaloŋ gɔmenante ka ba soŋ ma, ba meŋ sereŋ da soŋ maŋ.

A da ba kɔɔre kyɛ maŋ da leɛ gaa Sierra Leone paaloŋ a te yel gbɛre na a Guinea paaloŋ gɔmenante naŋ de na a ko te yɔɔmine na. Te yɔɔmine na da kyeereŋ neŋ popeɛloŋ yaga zaa bonso Jehoova da soŋɛɛŋ ka a yɛlɛ nyɛ maaloo. A gɔmenante da ko maŋ sori ka N kpeɛrɛ Guinea paaloŋ!

N da toŋ la a gbandige zukaara toma a yi yuoni 1978 a te ta yuoni 1989 Guinea ane Sierra Leone paaloŋ, a da e gbandige zukaara gbɛbogi-ara Liberia paaloŋ meŋ poɔŋ. A piilee saŋa na, N da maŋ beɛrɛŋ buyi buyi. Saŋa kaŋa N da maŋ be la zi-tɔɔre tɔɔre kaŋa kyɛ ka baaloŋ kpɛ ma. Kyɛ te yɔɔmine na da maŋ mɔɔ la ba mɔɔre zaa a de ma gaa neŋ asibiti.

Saŋa kaŋa maaroŋ baaloŋ daaŋ ŋmɛ maŋ yaga zaa kyɛ ka dandulo meŋ da be N poɔŋ. Saŋa na maŋ da wa nyɛ laafeɛ na, N da woŋeeŋ ka a te yɔɔmine na da teɛrɛŋ ka N na kpiŋ azuŋ ba da boɔrɛɛ zie baŋ na ũũ ma! Aneazaa ka N da tuoree a yeltuo ŋa zaa a da naaŋ baŋ kɔŋ N nyɔvore gba, kyɛ a daŋ ba wa N teɛroŋ ka N bare a wagre zaa puoruu toma na maŋ da tonɔ na. N da sagedieŋ ka Naaŋmen yoŋ la na baŋ ko te gomeŋɛ meŋɛ, bonso ka teneeŋ kpi gba kyɛ o na baŋ lɛ seŋ teŋ.

N NEŊ N PƆGE DA DƐLƐƐ JEHOOVA

Yuoni 1988 poɔŋ, N da nyɛ la Dorcas naŋ da e te yɔɔpɔge kaŋa naŋ nɔŋ Jehoova yaga zaa a taa sigrimennoŋ meŋ. Te da kulee taa, oŋ da wa poɔ N eŋɛŋ a gbandige zukaara toma poɔŋ. Dorcas da laŋ ne maŋ a toŋ toŋkpeɛne yaga zaa a toma poɔŋ a da e siri meŋ ka o de bon zaa iri sareka ko Jehoova. Te da maŋ laŋ kyɛŋeŋ ŋa kilometare 25 (maaliri 15) a tuo te baagere a yi lantaapuoruu kaŋa a gaa o tɔ. Kyɛ lantaapuoree na naŋ da e tɔbɔ na yɛŋ, te da maŋ de la sokyeŋ bonzoraa zaa naŋ gɛrɛ be, a soe meŋ da ba soma fẽẽ zaa a da maŋ taa la bogire yaga meŋ.

Dorcas taa la nyaa yaga zaa. Aŋa mannoo poɔŋ, saŋa kaŋa a da maŋ seŋ ka te ŋmaa koɔne naŋ taa ɛgre. Daare kaŋa te da gɛrɛɛ zie kaŋa aŋ da seŋ ka te de beraanuu tu sori sɛre kyɛ ta be, te da wa ta la baa kaŋa aŋ da seŋ ka te de gbori ŋmaa ne a koɔ̃ bonso a daare bridge naŋ da bebe na zaaŋ da kɔɔre. Saŋa na Dorcas naŋ da are a gbori poɔŋ a boɔrɔŋ ka o segi na, o gbɛre da sarɛɛŋ oŋ le a koɔ̃ zizuluŋ poɔŋ. Te kaŋa zaa da ba baŋ koɔ̃ dugibo, kyɛ ɛgre meŋ da be la a koɔ̃ poɔŋ. A noɔ̃ zie la ka, bipɔlɔ mine da are peɛlɛɛ be a da ɛge kpɛ a koɔ̃ poɔ a te somoo oŋ wa yi. A yɛlɛ ŋa da tɔ la dabeɛ̃ eŋ te yaga zaa, kyɛ te da naŋ tɔnnɛɛ a gbandige zukaara toma.

Yuoni 1992 poɔŋ te nɔɛ zaaŋ da mãã saŋa na teŋ da wa nyɛ ka Dorcas taaɛ poɔ na. Azuŋ a da seŋ ka te de gbɛre ka te naŋ na eɛ special paaneere bee ka te na bareŋ. Te da yeleeŋ ka, “Jehoova ko teŋ kyɔɔtaa!” Azuŋ te da ko la a bie yuori ka Jahgift. Yuomo anaare puoriŋ, teŋ lɛ dɔge o yɔɔ Eric meŋ. Te biiri ŋa bayi sereŋ eɛ kyɔɔtaare Jehoova naŋ de ko te. Jahgift da tonɛɛ toma Conakry kɔkɔre leɛroo tomazie naŋ, ka Eric meŋ e a lantaapuoruu nembɛrɛ sonneba na kaŋa.

Aneazaa ka a da seŋ ka Dorcas bare a special paaneɛ toma, kyɛ o da naŋ tonɛɛ a regular paaneɛ toma, a kyɛ da naŋ kaara te biiri na. Kyɛ Jehoova sommoŋ, N da naŋ be la a special paaneɛ toma poɔŋ. Saŋa na te biiri na naŋ wa baa na, Dorcas meŋ da la wa eɛ special paaneɛ. Pampana ŋa te eɛ misinaarehe a be Conakry poɔŋ.

JEHOOVA MAŊ GORO TEŊ

Zie zaa Jehoova naŋ yelka N gaa N maŋ gaaŋ. Gbɛɛ yaga N neŋ N pɔge nyɛɛŋ ka Jehoova maŋ goro teŋ a kyɛ korɔ te maaloo. Te naŋ de te meŋɛ zaa dɛle Jehoova a kyɛ ba dɛle bondaaŋ boma na zuŋ, a soŋ teŋ yaga zaa teŋ ba kpɛ yeltuo zaa poɔ. N neŋ Dorcas zemmo yɛlɛ soŋ teŋ teŋ nyɛ ka Jehoova la “te [faabo] Naaŋmen.” (1 Tun. 16:35) N taa la sagediibu ka bana na zaa naŋ dɛloo na, o na de la ba nyɔvoɛ “sɔgle o nyɔvore wuoɔ na poɔŋ.”—1 Saa. 25:29.