Bonso Aŋ Soma Ka Te Boɔrɔ Kawane?

1. Boŋ na toɔ̃ soŋ te ka te de gbɛ-sonne, ka lɛ vɛŋ ka yɛlɛ na teŋ nare biŋ meŋ baare soŋ? (Yeng Yelibie 13:10; 15:22)

TE ZAA boɔrɔŋ ka te derɛ gbɛ-sonne, ka lɛ vɛŋ ka yɛlɛ na teŋ nare biŋ meŋ baare soŋ. Naaŋmen Yelbiri na toɔ̃ soŋ teŋ ka te e a yɛlɛ ama zaa.—Kanne Yeng Yelibie 13:10; 15:22.

2. Boŋ ka Jehoova eŋ noɔre ka o na e ko teŋ?

² Jehoova zie la teŋ na baŋ nyɛ kawane naŋ soma a gaŋ kawane zaa. Azuŋ, aseŋ ka te maŋ puore sɔroo ka o ko te yɛŋ naŋ e zuluŋ. Jehoova eŋɛɛ noɔre ka o na soŋ teŋ. O yeleeŋ ka: ‘N na ko boŋ kawane a kaara bo neŋ N nimiri.’ (Yiem. 32:8) A Baabole sɛgre ŋa vɛŋɛɛŋ teŋ baŋ ka Jehoova na ko teŋ kawane, a lɛ soŋ te ka te de a kawane tonɔ neŋ toma meŋ.

3. Bo yɛlɛ teŋ na zanne a zannoo ŋa poɔŋ?

³ A zannoo ŋa poɔŋ, te na nyɛɛ soorebie anaare mine nɔɛ iribo yi a Baabole poɔŋ. A dɛndɛŋ soba, bo gyogri la na baŋ soŋ ma ka N de kawaŋ-soŋ toŋ neŋ toma? Ayi soba, nembuoŋ na toɔ̃ ko ma kawaŋ-soŋ? Ata soba, wala maŋ na toɔ̃ e a de wuli ka N sereŋ boɔrɛɛ kawane? Anaare soba, bonso aŋ ba seŋ ka N sɔre noba mine ka ba de gbɛɛ ko ma?

BO GYOGRI LA AŊ SEŊ KA N TAA?

4. Bo gyogriŋ na toɔ̃ soŋ te ka te de kawaŋ-soŋ tonɔ neŋ toma?

⁴ Ka teneeŋ boɔrɔ ka te de kawaŋ-soŋ toŋ neŋ toma, aseŋ ka te sigri te menne, a lɛ baŋ te e ta zie meŋ. Ka teneeŋ wa tuore yɛlɛ mine teŋ daaŋ ba tuore zaa, aseŋ ka te sage sommo yi te taaba zieŋ, ka lɛ vɛŋ ka te de gbɛ-soŋ. Aseŋ ka te sage meŋ ka, yelzaa naane teŋ baŋ. Ka teneeŋ taa a gyogri ŋa, Jehoova na soŋ teŋ. Ka teneeŋ kanne a Baabole a nyɛ kawaŋ-sonne a yi be, a na eɛ mɔlɔ ka te de a tonɔ neŋ toma. (Maik. 6:8; 1 Pit. 5:5) Ka teneeŋ sigri te menne a baŋ te e ta zie, ka nobaŋ wa korɔ te kawane yire a Baabole poɔŋ, te na maŋ kyɛllaaŋ, a de a tonɔ neŋ toma meŋ.

5. Bo yɛlɛ mine la da na toɔ̃ vɛŋ ka Naa Deevid zɛgrɛ o meŋɛ?

⁵ Te na baŋ zannɛɛ yelnimizeɛ kaŋa yi Naa Deevid ewuli soŋ na poɔŋ. Aneazaa ka o da toɔ̃ eɛ yeltegrɛ yaga, kyɛ o da ba zɛgrɛ o meŋɛ. Sɛre oŋ na piili o naaŋ diibu na, o da eɛ yieloŋ yiele naŋ kyile, ka o yuori meŋ do. Ba gba da kaa iruuŋ ka o kyeɛrɛ yiele korɔ Naa Sɔɔl. (1 Saa. 16:​18, 19) Jehoova da kaa iree Deevid ka o wa leɛre Sɔɔl gbɛbɔgriŋ a e naa. Jehoova da de la o vooroŋ soŋ na sonnɔ Deevid. (1 Saa. 16:​11-13) Deevid da ko la a Filiisitiya gandaa na baŋ boɔlɔ Golaiyat na. Lɛ da vɛŋɛɛŋ ka a Izerayɛl biiri pugiruu neŋ lɛ na oŋ maŋ zɔɔtoɔ̃ ba dɔndɔnne na. (1 Saa. 17:​37, 50; 18:7) Ka Deevideŋ da zɛgrɛ o meŋɛ, o da naŋ teɛreŋ ka a yɛlɛ ama zaa oŋ toɔ̃ e na zuŋ, a ba seŋ ka o kyɛlle woŋ neɛzaa kawane. Kyɛ, o da ba e lɛ.

6. Wala teŋ e baŋ ka Deevid da maŋ eɛ siri ka o kyɛlle woŋ kawaŋ-sonne yi o taaba zieŋ? (Kaa a foto.)

⁶ Saŋa na Deevid naŋ wa piili o naaŋ diibu na, o da kaa iree dɔba naŋ na toɔ̃ koo kawaŋ-sonne. (1 Tun. 27:​32-34) A yɛlɛ ŋa ba e te seɛlee, bonso, sɛre oŋ na piili o naaŋ diibu na, o yel-eree da wuleeŋ ka o maŋ eɛ siri ka o kyɛlle woŋ o taaba kawaŋ-sonne. Dɔba yoŋ kawane naane oŋ da maŋ kyɛllɛ, kyɛ o da kyɛllɛɛ pɔge na baŋ boɔlɔ Aabigel kawane. Neebal pɔge da la Aabigel. Neebal da zɛgrɛɛ o meŋɛ, a ba taa bareka puoruu gyogo, ane gyeremɛ meŋ ko o taaba. Deevid da de la Aabigel kawaŋ-soŋ na toŋ neŋ toma. Azuŋ, o da ba e yɛlɛ naŋ ba seŋ neŋ.—1 Saa. 25:​2, 3, 21-25, 32-34.

7. Bo teŋ na baŋ zanne yi Deevid yɛlɛ na poɔŋ? (Ikilisiasitiz 4:13) (Kaa a fotori.)

⁷ Te na baŋ zannɛɛ yelnimizeere mine yi Deevid yɛlɛ ŋa poɔŋ. Aŋa mannoo poɔŋ, te meŋ na toɔ̃ kyilleŋ yɛlɛ mine eeboŋ, kyɛbee ka te e neŋkpoŋ noba mine zuŋ. Kyɛ, a ba seŋ ka te teɛre ka te baŋɛɛ yelzaa, azuŋ a ba seŋ ka neɛzaa ko te kawane. Aseŋ ka te tɔglɔ Deevid a maŋ kyɛllɛ kawane yire dɔba neŋ pɔgeba zieŋ. (Kanne Ikilisiasitiz 4:13.) Ka teneeŋ e lɛ, te koŋ de gbɛɛ naŋ na de toɔrɔ waneŋ te neŋ te taaba zuŋ.

NEMBUOŊ NA TOƆ̃ KO MA KAWAŊ-SOŊ?

8. Bonso ka Gyoonataŋ da toɔ̃ ko Deevid kawaŋ-soŋ?

⁸ Te na baŋ lɛ zannɛɛ yelkaŋa yi Deevid ewuli soŋ na poɔŋ. O da kyɛllɛɛ noba na neŋ Jehoova niiloŋ naŋ e kpeɛŋaa kawane. Kyɛ lɛ yoŋ naane, o da kyɛllɛɛ noba naŋ da baŋ yelkpeɛŋaa na oŋ da tuoro na kawane. Aŋa mannoo poɔŋ, Deevid da boɔrɔŋ ka o baŋ ka Naa Sɔɔl na boɔrɔŋ ka o ne o maale taa emmaaroŋ poɔŋ bee. Naa Sɔɔl bidɔɔ Gyoonataŋ da ko la Deevid kawane kyaare a yɛlɛ ŋa. Deevid da sagɛɛ Gyoonataŋ kawane na. Bonso ka Gyoonataŋ da toɔ̃ ko Deevid kawaŋ-soŋ? Ananso la ka, Gyoonataŋ neŋ Jehoova niiloŋ da eɛ kpeɛŋaa. O da baŋɛɛ Sɔɔl meŋ velaa. (1 Saa. 20:​9-13) Sobuo teŋ na baŋ de a yɛlɛ ŋa toŋ neŋ toma?

9. Ka teneeŋ wa boɔrɔ kawane, nembuo zie aŋ seŋ ka te gaa? Wuli a muni. (Yeng Yelibie 13:20)

⁹ Ka teneeŋ boɔrɔ kawane, a na somaŋ ka te gaa neɛ neŋ Jehoova niiloŋ naŋ e kpeɛŋaa zie, a te bɔ a kawane. Aseŋ ka te lɛ gaa neɛ naŋ baŋ yelkpeɛŋaa na teŋ tuoro na zie a te bɔ sommo.a (Kanne Yeng Yelibie 13:20.) Te de ka te yɔɔdɔɔ kaŋa naŋ e baapaalaa boɔrɔŋ ka o de pɔge. Nembuoŋ na toɔ̃ koo kawaŋ-soŋ? Ka o naŋ soore o zɔmeŋɛ kaŋa naŋ ba de pɔge, o na baŋ ko oŋ kawaŋ-soŋ bee? Tɔɔ, ka a zɔmeŋɛŋ de a Baabole poɔ yɛlɛ koo a kawane, a na eɛ kawaŋ-soŋ. Ka te yɔɔdɔɔ naŋ gaa kultaa deme naŋ bamoo velaa, a lɛ laŋ puore Jehoova yuomo yaga zie, ba na toɔ̃ ko oŋ kawaŋ-soŋ. A kultaa deme na baŋ wulooŋ lɛ oŋ na baŋ de a Baabole sowuli toŋ neŋ toma, ane yelnimizeere na baŋ zanne yi ba kultaa na poɔŋ.

10. Bo soorebie nɔɛ iribo teŋ waana ka te bɔ?

¹⁰ Te nyɛɛ gyogri ayi naŋ na baŋ soŋ te ka te de kawaŋ-soŋ a toŋ neŋ toma, ane neɛ naŋ na baŋ ko te kawaŋ-soŋ. Yɛ vɛŋ ka te bɔ a soorebie ama meŋ nɔɛ iribo. A dɛndɛŋ soba, wala teŋ na toɔ̃ e a de wuli ka te sereŋ boɔrɛɛ kawane? Ayi soba, bonso aŋ ba seŋ ka te sɔre noba mine ka ba de gbɛɛ ko te?

WALA MAŊ NA TOƆ̃ E A DE WULI KA N SEREŊ BOƆRƐƐ KAWANE?

11-12. (a) Saŋa kaŋa bo yɛlɛ teŋ na baŋ e? (b) Saŋa na aŋ da wa fɛre ka Naa Rihobooam de gbɛre kaŋa naŋ e nimizeɛ na, wala oŋ da e o yɛlɛ?

¹¹ Saŋa kaŋa, neɛ kaŋa na toɔ̃ boɔrɛɛ kawane, kyɛ ka o sobaŋ maale o teɛroŋ a kyaare yɛlɛ na oŋ boɔrɔ ka o e, lɛ yɛŋ te na baŋ yeliŋ ka kawane naane ka o soba boɔrɔ. O soba soorɛɛ noba a boɔrɔ ka o nyɛ ka o ne ba teɛroŋ kyaarɛɛ taa bee. O soba na baŋ zannɛɛ yelnimizeɛ kaŋa yi Naa Rihobooam zieŋ.

¹² Rihobooam da wa leɛ la a Izerayɛl paaloŋ naa saŋa na o saa Soolomoŋ naŋ wa kpi na. Bondaaŋ boma neŋ bonsonne da be la a Izerayɛl paaloŋ. Kyɛ, a noba da yeleeŋ ka Soolomoŋ da vɛŋɛɛŋ baŋ tonɔ tonkpeɛne naŋ gaŋ ba faŋa. Ba da waɛ Rihobooam zie a wa sɔroo ka o ŋmaa ba toma na mine bare. Rihobooam da yeleeŋ ka ba koo wagre ka o teɛre a yɛlɛ gaa tɔɔre, ka lɛ vɛŋ ka o de gbɛ-soŋ. O da mɔɔ yɛŋ a gaa a paaloŋ nembɛrɛ naŋ da sonnɔ Soolomoŋ zie a te bɔ kawane. (1 Nam. 12:​2-7) Kyɛ, o da ba de a nembɛrɛ kawane na toŋ neŋ toma. Bonso oŋ da e lɛ? Aminekaŋaŋ, o da maalɛɛ o teɛroŋ a kyaare yɛlɛ na oŋ boɔrɔ ka o e. Azuŋ, o da boɔrɔŋ ka o nyɛ ka ana teɛroŋ na neŋ o zu ka a nembɛrɛ da taa bee. Saŋa na oŋ da gaa o baapaal-taaba naŋ e o zɔmenne zie na, o da nyɛɛŋ ka ba kawane na neŋ yɛlɛ naŋ be o teɛroŋ poɔŋ na kyaarɛɛ taa. (1 Nam. 12:​8-14) Rihobooam da mannɛɛ yɛlɛ na o zɔmenne naŋ yelkoo na ko a paaloŋ noba. Lɛ da vɛŋɛɛŋ ka a noba wɛle ba menne yi o naaloŋ na poɔŋ. A piili ana saŋa na, Rihobooam da tuoree yelkpeɛne yaga.—1 Nam. 12:​16-19.

13. Wala teŋ na toɔ̃ e baŋ ka te sereŋ boɔrɛɛ kawane?

¹³ Bo yɛlɛ teŋ na baŋ zanne yi Rihobooam yɛlɛ ŋa poɔŋ? Te na baŋ sɔrɛɛ noba ka ba ko te kawane, kyɛ a ba seŋ ka te daŋ maale te teɛroŋ a kyaare yɛlɛ na teŋ boɔrɔ ka te e, sɛre kyɛ sɔrɔ a kawane. Boŋ na baŋ soŋ te? Soore ho meŋɛ ka, ‘N maŋ sɔrɛɛ kawane a kyɛ zagre ka N de a kawane toŋ neŋ toma, bonso kawane na o soba naŋ ko ma na neŋ yɛlɛ naŋ be N teɛroŋ poɔŋ ba kyaare taa bee?’

14. Ka ba naŋ wa ko te kawane, bo yɛlɛ aŋ seŋ ka te maŋ leɛteɛre? De yelmannaa wuli a muni. (Kaa a foto.)

¹⁴ Te de yelmannaa kaŋa wuli a muni. Te de ka te yɔɔdɔɔ kaŋa nyɛɛ toma naŋ na vɛŋ ka o nyɛrɛ libie yaga. Sɛre oŋ na sagede a toma na, o gaaɛ a lantaapuoruu neŋkpoŋ kaŋa zie a te sɔre kawane. Te yɔɔdɔɔ na yelko la a lantaapuoruu neŋkpoŋ ka, gbɛɛ yaga a toma na vɛŋeŋ ka o maŋ bare o booree deme kyɛ gaa ziyuo kaŋa a te bebe daaraawala mine kyɛ leɛ wa. Beŋ la ka a lantaapuoruu neŋkpoŋ leɛteɛroo ka a Baabole wuleeŋ ka a eɛ o ferebo toma ka o sonnɔ o booree deme ka ba neŋ Jehoova niiloŋ e kpeɛŋaa. (Efe. 6:4; 1 Tim. 5:8) Te de ka te yɔɔdɔɔ na ba de a lantaapuoruu neŋkpoŋ kawane na toŋ neŋ toma, a kyɛ lɛ yɔ sɔrɔ o yɔɔmine meŋ ka ba koo kawane. Beŋ la ka te yɔɔ na kaŋa yelkoo ka o na baŋ tonɛɛ a toma. Teɛre a yɛlɛ ŋa nyɛ. Te yɔɔ na sereŋ boɔrɛɛ kawane bee? Kyɛbee o maalɛɛ o teɛroŋ a kyaare yɛlɛ na oŋ boɔrɔ ka o e a pãã boɔrɔ neɛ ne o teɛroŋ naŋ kyaare taa ka o koo kawane? Aseŋ ka te maŋ teɛre ka te sukyiri na baŋ bɛnle teŋ. (Jer. 17:9) Saŋa kaŋa, ba na toɔ̃ ko teŋ kawane te naŋ ba boɔrɔ, kyɛ ana kawane la na baŋ soŋ te yaga zaa.

BONSO AŊ BA SEŊ KA N SƆRE NOBA MINE KA BA DE GBƐƐ KO MA?

15. Bo yɛlɛ aŋ ba seŋ ka te e, ka ananso la wala?

¹⁵ A be la te kaŋa zaa zieŋ ka te derɛ gbɛɛ korɔ te menne. (Gal. 6:​4, 5) Aŋa lɛ na teŋ zanne na, yɛmbaŋna maŋ bɔ la kawane yi a Baabole poɔŋ, ane o Kristabitaaba naŋ kyile zieŋ, a kyɛ derɛ gbɛre. Kyɛ, aseŋ ka te kaara soŋ a ta wa sɔrɔ te taaba ka ba de gbɛɛ ko te. Noba mine na toɔ̃ gaaɛ neɛ kaŋa ba naŋ taa gyeremɛ naŋ e zuluŋ ko zie a te sooroo ka, “Ka hooŋ da la, wala hoŋ da naŋ e a yɛlɛ ŋa poɔŋ?” Noba mine meŋ ba maŋ teɛre yɛlɛ gaa tɔɔre a kyɛ tɔglɔ gbɛɛ na o tɔsoba naŋ de.

16. Bo yɛlɛ la da e a Korinti lantaapuoruu na poɔŋ a kyaare dunni na baŋ maŋ de iri neŋ sareka ko baga nɛne ɔɔbo yɛlɛ? Bo gbɛre aŋ da seŋ ka a Korinti lantaapuoruu noba de kyaare a yɛlɛ ŋa? (1 Korinti 8:7; 10:​25, 26)

¹⁶ Kristabiiri naŋ da bebe a dɛndɛŋ yuoŋ kɔɔ na saŋa da seŋ ka ba de gbɛre a kyaare dunni ba naŋ de iri neŋ sareka ko baga nɛne ɔɔbo yɛlɛ. Pɔɔl da sɛgɛɛ lɛta ko ba a yelka: ‘Te baŋ ka, bagre zaa ba kyebe, ka ŋmen meŋ zaa ba kyebe a teŋɛzu ka a Naaŋmen yeni na yoŋ naane.’ (1 Kor. 8:4) Yɛlɛ na Pɔɔl naŋ yeli na zuŋ, noba mine da deɛ gbɛre ka ba na toɔ̃ da la dunni na baŋ de iri neŋ sareka ko baga, a maŋ de a nɛne wa koɔrɔ daaŋ na ɔɔ. Ba mine meŋ da nyɛɛŋ ka, ka ba Kristabitaabaŋ nyɛ ba baŋ da a nɛne ŋa a ɔɔrɔ, a na vɛŋeŋ ka ba zoma dɔɔnɔ ba. (Kanne 1 Korinti 8:7; 10:​25, 26.) A da be la Kristabie zaa zie ka o de gbɛre ko o meŋɛ. Pɔɔl da ba yelko a Korinti lantaapuoruu noba ka ba derɛ gbɛɛ korɔ ba taaba, kyɛbee a tɔglɔ gbɛɛ na ba taaba naŋ de na. Bonso te kaŋa zaa na “manne la o meŋɛ yɛlɛ ko Naaŋmen.”—Uro. 14:​10-12.

17. Ka teneeŋ maŋ tɔglɔ gbɛɛ te taaba naŋ de, boŋ na baŋ pɔge te? Tere yelmannaa kaŋa. (Kaa a fotori.)

¹⁷ A yɛlɛ ama taa na baŋ pɔge teŋ bee? Te de gbɛre naŋ seŋ ka te de kyaare zĩĩ poɔ bon-bilii (kyɛbee blood fractions) na manne neŋ a yɛlɛ ŋa. A be la Kristabie zaa zie ka o de gbɛre ka o na de la a zĩĩ poɔ bon-bilii (kyɛbee blood fractions) ŋa, kyɛbee ka o koŋ de a.b A na baŋ eɛ kpeɛŋaa ko te ka te baŋ a yɛlɛ ŋa muni velaa. Kyɛ, a eɛ nimizeɛ ka te kaŋa zaa de gbɛre kyaare a yɛlɛ ŋa. (Uro. 14:4) Ka teneeŋ tɔglɔ gbɛre na te tɔsoba naŋ de, ana toɔ̃ vɛŋeŋ ka te e yɛlɛ naŋ na vɛŋ ka te zoma dɔɔnɔ te. Kyɛ, ka teneeŋ maŋ teɛre Baabole poɔ yɛlɛ gaa tɔɔre a kyɛ derɛ gbɛre, a na vɛŋeŋ ka te e Kristabiiri naŋ kyile. (Hib. 5:14) Tɔɔ, bo saŋa aŋ seŋ ka te sɔre te Kristabitɔ kaŋa naŋ kyile ka o ko te kawane? Ka teneeŋ wa peɛre gbɛre na teŋ boɔrɔ ka te de na yɛlɛ gaa tɔɔre, a kyɛ boɔrɔ sommo a kyaare lɛ teŋ na toɔ̃ de a Baabole sowuli toŋ neŋ toma te gbɛ-de na poɔŋ, lɛ yɛŋ te na baŋ sɔrɛɛ kawane.

NAŊ MOƆ̃ NIŊE A BOƆRƆ KAWANE

18. Bo ka Jehoova e ko te?

¹⁸ Jehoova ko teŋ sori ka te derɛ gbɛɛ korɔ te menne, lɛ wuleeŋ ka o sage teŋ di. Azuŋ oŋ de o Yelbiri a Baabole ko te. O lɛ ko teŋ zɔmenne naŋ na toɔ̃ soŋ te ka te maŋ teɛre Baabole sowuli yɛlɛ gaa tɔɔre sɛre kyɛ derɛ gbɛre. A yɛlɛ ama zaa wuleeŋ ka Jehoova eɛ te Saa naŋ kaara te zu velaa. (Yeng. 3:​21-23) Wala teŋ na toɔ̃ e a de wuli te nimipa?

19. Wala teŋ na toɔ̃ e a vɛŋ ka Jehoova poɔ maŋ pɛlɛ wagre zaa?

¹⁹ A maŋ eɛ bidɔgreba zaa boɔbo ka ba biiri baa a wa leɛ noba naŋ kyile, a e yɛmbaŋneba naŋ de popeɛloŋ puoro Jehoova, a kyɛ lɛ sonnɔ ba taaba meŋ. Lɛ neŋ o zu la, Jehoova poɔ zaaŋ maŋ pɛle saŋa na oŋ wa nyɛ ka te eɛ noba naŋ kyile a Kristaaloŋ poɔŋ, a maŋ boɔrɔ kawane, a lɛ derɛ gbɛɛ meŋ naŋ wuli ka te nɔmooŋ.