Yɛlɛ Naŋ Na Baŋ Soŋ Bo Ka Ho Ko Ho Taaba Kawaŋ-Soŋ

1. Aŋ mineŋ seŋ ka ba korɔ taa kawane? Wuli a muni.

HO POƆ maŋ pɛleŋ ka ho ko ho taaba kawane bee? A maŋ eɛ mɔlɔ ko noba mine ka ba ko ba taaba kawane, kyɛ noba mine yɛŋ, ba pulaa maŋ teɛrɛŋ ka dabeɛ̃ meŋ kpɛ ba saŋa na baŋ wa korɔ ba taaba kawane na. Wagre mineŋ, a maŋ wa fɛreŋ ka te kaŋa zaa ko te tɔ kaŋa kawane. Yezu meŋɛ da yeleeŋ ka nɔmmo la na vɛŋ ka noba baŋ o yelmeŋɛ potuuribo. (Gyn. 13:35) Sori na kaŋa teŋ na baŋ tu a wuli te yɔɔmine nɔmmo la, teŋ na maŋ ko ba kawane saŋa na aŋ wa fɛre ka te e lɛ. A Baabole yeleeŋ ka: ‘Zɔmeŋɛ naŋ maŋ yi o poɔ zaa a derɛ kawane korɔ o tɔsoba maŋ vɛŋeŋ ka a zɔmennoŋ noma.’—Yeng. 27:9.

2. Bo aŋ seŋ ka a lantaapuoruu nembɛrɛ e, ka ananso la wala? (Kaa a daga, “Kawane Na Baŋ Maŋ Ko Te A Daagbuli Poɔ Lammo Saŋa.”)

² A eɛ nimizeɛ yaga zaa ka a lantaapuoruu nembɛrɛ baŋ sori baŋ na toɔ̃ tu a ko ba taaba kawaŋ-soŋ. Jehoova tu la Yezu eŋɛŋ a kaa iri a dɔba ŋa ka ba kaara a lantaapuoruu noba zu. (1 Pit. 5:​2, 3) Ka ba naŋ wa terɛ yelyaga, ba maŋ toɔ̃ mannɛɛ Baabole poɔ kawane ko a lantaapuoruu noba. Ba maŋ toɔ̃ ko teŋ kawane saŋa na aŋ wa fɛre ka ba e lɛ. Ba maŋ lɛ soŋɛɛ noba naŋ bare Jehoova puoruu baŋ leɛ wa a lantaapuoruu poɔ. Yelmeŋɛ la, a fɛrɛɛŋ ka a lantaapuoruu nembɛrɛ maŋ korɔ te kawaŋ-soŋ. Kyɛ, sobuo ka te zaa na toɔ̃ tu a korɔ te taaba kawaŋ-soŋ?

3. (a) Boŋ na toɔ̃ soŋ te ka te e kawaŋ-terebɛ naŋ soma? (Aizeeya 9:6; kaa a daga, “Tɔglɔ Yezu Saŋa Na Hoŋ Wa Korɔ Noba Kawane.”) (b) Bo yɛlɛ teŋ na zanne a zannoo ŋa poɔŋ?

³ Ka teneeŋ zanne sori na noba mine naŋ da toɔ̃ tere kawaŋ-soŋ baŋ sɛgaa eŋ a Baabole poɔŋ na, a na toɔ̃ soŋ teŋ ka te meŋ maŋ korɔ te taaba kawaŋ-soŋ. Aŋa mannoo poɔŋ, Yezu da maŋ korɛɛ o taaba kawaŋ-soŋ wagre zaa. A Baabole gba boɔlɛɛ Yezu ka “Kawaŋ-terɛ naŋ waa seɛlee yaga.” (Kanne Aizeeya 9:6.) A zannoo ŋa poɔŋ, te na zannɛɛ lɛ na aŋ seŋ ka te e ka neɛ kaŋa wa wa te zie a wa sɔre kawane, ane sori teŋ na baŋ tu a tere kawane naŋ seŋ neŋ haali saŋa na o soba naŋ ba sɔre a kawane. Te na lɛ zanne nyɛɛ bon nanso aŋ e nimizeɛ ka te maŋ tere kawane wagre ane sori naŋ seŋ neŋ poɔŋ.

SAŊA NA NEƐ KAŊA NAŊ WA TE ZIE A WA SƆRƆ KAWANE

4-5. Ka neɛ kaŋaŋ wa sɔre kawane yi te zie, bo yɛlɛ aŋ seŋ ka te de weɛ a soore te menne? De yelmannaa kaŋa wuli a muni.

⁴ Ka neɛ kaŋaŋ wa wa te zie a sɔrɔ kawane, bo yɛlɛ aŋ seŋ ka te de weɛ e? Aminekaŋaŋ, te eŋɛ na nyagraŋ ka te boɔrɔ ka te soŋ o soba. Kyɛ, aseŋ ka te daŋ soore te menne ka, ‘Maaŋ la seŋ neŋ ka N koo a kawane ŋa bee?’ Saŋa kaŋa, yɛlɛ teŋ na baŋ e a de soŋ te zɔmeŋɛ na la teŋ na wuloo neɛ naŋ baŋ o yɛlɛ na velaa zaa zie ka o gaa be a te deɛ a kawane.

⁵ Te de yelmannaa kaŋa wuli a muni. Te de ka ho zɔmeŋɛ naŋ peɛle bo beɛrɛŋ nimizeɛ̃. Beŋ la oŋ yelko bo ka o peɛrɛɛ yɛlɛ gaa tɔɔre a kyaare soe na oŋ na baŋ tu a saŋ o baaloŋ na. Azuŋ, o boɔrɔŋ ka ho meŋ wuli ho teɛroŋ a kyaare sori na hoŋ teɛre ka a somaŋ ka o tu a saŋ o baaloŋ na. Aminekaŋaŋ, ho na boɔrɔŋ ka ho wuli ho teɛroŋ kyaare a yɛlɛ, kyɛ ho ba e dɔkta, azuŋ ho na baŋ wulee ho zɔmeŋɛ na yɛlɛ naŋ na somoo bee? Ho ba nyɛ ka ka hooŋ soŋ ho zɔmeŋɛ na ka o nyɛ dɔkta naŋ baŋ o baaloŋ na yɛlɛ lɛŋ na somoo bee?

6. Bonso aŋ maŋ soma yaga zaa ka te kyɛnle fẽẽ sɛre kyɛ korɔ noba kawane?

⁶ Ka teneeŋ gbaŋ baŋ yɛlɛ na o soba naŋ soorɔ te na, kyɛ a na somaŋ yaga ka te kyɛnle fẽẽ sɛre kyɛ korɔ o soba a kawane. Bonso ka lɛ eebo soma? Yeng Yelibie 15:28 yeleeŋ ka, ‘sontuuro sukyiri maŋ teɛrɛɛ yɛlɛ gaa tɔɔre kyɛ ire yɛlɛ noɔre.’ Te de ka te baŋɛɛ yɛlɛ na oŋ soore te na noɔre iribo, kyɛ wala aŋ seŋ ka te e? Te na baŋ de la wagre fẽẽ a peɛre a yɛlɛ gaa tɔɔre, a puore sɔre, a lɛ teɛre a yɛlɛ meŋ gaa tɔɔre. Ka teneeŋ e lɛ, te na iree a noɔre ko o soba ka a neŋ Jehoova teɛroŋ kyaare taa. Te na baŋ zannɛɛ yɛlɛ yi daŋyele Neetaŋ zieŋ.

7. Bo yɛlɛ teŋ na baŋ zanne yi daŋyele Neetaŋ yɛlɛ ŋa poɔŋ?

⁷ Naa Deevid da yelko la daŋyele Neetaŋ ka o boɔrɔŋ ka o mɛ ŋmenpuoredie ko Jehoova. A tɔntɔbaalɛ ka Neetaŋ yelkoo ka o na toɔ̃ eɛ lɛ. Kyɛ, a da seŋ ka Neetaŋ de weɛ a sɔre sowuli yi Jehoova zie. Bonso teŋ yeli lɛ? Ananso la ka, Jehoova da ba boɔrɔ ka Deevid mɛ a ŋmenpuoredie. (1 Tun. 17:​1-4) Yɛlɛ teŋ na baŋ zanne yi be la ka, ka neɛ kaŋaŋ wa sɔre kawane yi te zie, a na somaŋ ka te teɛre yɛlɛ gaa tɔɔre sɛre kyɛ yele yɛlɛ. Lɛ na wuliŋ ka te eɛ “maaroŋ yɛlɛ yeluu” poɔŋ.—Gyi. 1:19.

8. Bonso aŋ soma yaga zaa ka te maŋ kaara soŋ saŋa na teŋ wa korɔ neɛ kawane?

⁸ Bon nanso aŋ seŋ ka te maŋ kaara soŋ saŋa na teŋ korɔ neɛ kawane la ka, ka teneeŋ lonne wieoŋ a ko o soba a kawane ka lɛ vɛŋ oŋ de gbɛre naŋ de toɔrɔ waneŋ o zuŋ. Te na baŋ yeliŋ ka sori kaŋa poɔŋ te soŋɛɛŋ a vɛŋ ka o soba kpɛ a toɔrɔ poɔ. Azuŋ, aseŋ ka te maŋ teɛre yɛlɛ gaa tɔɔre saŋa na teŋ wa korɔ te taaba kawane.

SORI TEŊ NA BAŊ TU A TERE KAWANE SAŊA NA O SOBA NAŊ BA SƆRE A KAWANE

9. Bo yɛlɛ ka a lantaapuoruu nembɛrɛ seŋ ka ba baŋ peɛlaaŋ sɛre kyɛ korɔ neɛ kaŋa kawane? (Galesiya 6:1)

⁹ Ka te yɔɔ kaŋaŋ wa de gbɛ-faa, a maŋ fɛreŋ ka a lantaapuoruu nembɛrɛ de gbɛre a ko o soba kawane. (Kanne Galesiya 6:1.) Neɛ kaŋa na toɔ̃ piili derɛɛ gbɛ-faare naŋ na toɔ̃ vɛŋ ka o e yelfaa kaŋa naŋ e nimizeɛ. Ka a lantaapuoruu nembɛrɛŋ wa baŋ lɛ, ba na mɔɔŋ a soŋ o soba ka o maale o neŋ Jehoova niiloŋ na, a toɔ̃ nyɛ nyɔvore naŋ ba taa baaraa. (Gyi. 5:​19, 20) A lantaapuoruu nembɛrɛ seŋ ka ba peɛre baŋ peɛlaaŋ ka o soba sereŋ deɛ gbɛ-faa. Lɛ na soŋ baŋ ka ba tere kawane naŋ na soŋ o soba. Jehoova ko la te kaŋa zaa sori ka te maŋ teɛre yɛlɛ gaa tɔɔre sɛre kyɛ derɛ gbɛɛ. (Uro. 14:​1-4) Te de ka te yɔɔ kaŋa sereŋ deɛ gbɛre naŋ na baŋ sãã o neŋ Jehoova niiloŋ na, sobuo ka a lantaapuoruu nembɛrɛ na baŋ tu a koo kawane naŋ na baŋ somoo?

10-12. Ka a lantaapuoruu neŋkpoŋ kaŋa boɔrɔ ka o ko neɛ kaŋa naŋ ba sɔre kawane yi o zie kawane, wala aŋ seŋ ka o e? De yelmannaa wuli a muni. (Kaa a fotori.)

¹⁰ A ba maŋ e mɔlɔ ka a lantaapuoruu nembɛrɛ ko neɛ kaŋa kawane saŋa na o soba naŋ ba sɔre a kawane. Bonso teŋ yeli lɛ? Ananso la ka, bitontona Pɔɔl yeleeŋ ka neɛ na baŋ deɛ gbɛ-faa saŋa na oŋ ba baŋ gba. Sɛre ka a lantaapuoruu nembɛrɛ na baŋ ko o soba kawane na, ba na toɔ̃ eɛ yɛlɛ naŋ na vɛŋ ka a e mɔlɔ koo ka o sagede a kawane.

¹¹ Te na baŋ de la a yɛlɛ ŋa manne neŋ neɛ naŋ boɔrɔ ka o bore bonbie tɛne naŋ ko poɔŋ. A kuoɔraa seŋ ka o kɔ a teŋɛ, a yɔgraa tɛne. O pãã na baŋ de la a bonbiri bore a tɛne poɔŋ. A baaraa zaa, o maŋ mirɛɛ koɔ̃ eŋ a bonbiri. Lɛ na soŋɛɛ a bonbiri ka o buli soŋ. Lɛ neŋ o zu la, sɛre ka a lantaapuoruu neŋkpoŋ kaŋa na ko o yɔɔ kawane na, aseŋ ka o e yɛlɛ naŋ na vɛŋ ka a e mɔlɔ ko o yɔɔ na ka o sagede a kawane. Aŋa mannoo poɔŋ, aseŋ ka o bɔ wagre soŋ ka o neŋ o yɔɔ na di dama. Aseŋ ka o vɛŋ ka o yɔɔ na baŋ ka o boɔrɛɛ o yɛlɛ. A puoriŋ ka o pãã vɛŋ ka o baŋ ka o boɔrɔŋ ka o tage o teɛroŋ eŋ yelkaŋa eŋɛŋ. Ka nobaŋ baŋ ka a kawaŋ-terɛ maŋ wulee nɔmmo neŋ nimimaaroŋ korɔ o taaba, a na maŋ eɛ mɔlɔ ko ba ka ba de o kawane na tonɔ neŋ toma.

¹² A yi a dama diibu poɔŋ, a lantaapuoruu neŋkpoŋ na baŋ vɛŋeŋ ka o yɔɔ na baŋ ka neɛzaa na baŋ ŋmɛɛ gbɛɛ, azuŋ aseŋ ka ba maŋ ko te kawane wagre mine. Lɛ na vɛŋeŋ ka a e mɔlɔ ko o yɔɔ na ka o sagede o kawane na. (Uro. 3:23) A lantaapuoruu neŋkpoŋ seŋ ka o pãã de kɔkɔbaaloŋ, a yi gyeremɛ naŋ e zuluŋ meŋ poɔ a soŋ o yɔɔ na ka o nyɛ ka o sereŋ deɛ gbɛ-faa. Aseŋ ka o de a Baabole poɔ yɛlɛ koo a kawane. Ka o yɔɔ naŋ wa sage ka o ŋmɛɛ gbɛre, a lantaapuoruu neŋkpoŋ na baŋ mannɛɛ yɛlɛ ka a pɛle koo, a lɛ e mɔlɔ ka o woŋ a muni meŋ. Lɛ na soŋɛɛ o yɔɔ na ka o baŋ yɛlɛ naŋ seŋ ka o e a leɛ maale gbɛre na oŋ ŋmɛ na. A baaraa zaa, ka a lantaapuoruu neŋkpoŋ pugi te yɔɔ na, a vɛŋ ka o ne o laŋ puore sɔre Jehoova, a na vɛŋeŋ ka a e mɔlɔ koo ka o sagede a kawane.—Gyi. 5:15.

13. Wala ka a lantaapuoruu nembɛrɛ na toɔ̃ e baŋ ka o soba woŋee a kawane muni soŋ?

¹³ Saŋa kaŋa a soba ba maŋ woŋ yɛlɛ na a kawaŋ-terɛ naŋ yeli na muni soŋ. Wala ka a lantaapuoruu nembɛrɛ na toɔ̃ e a soŋ o soba ka o woŋ a yɛlɛ muni soŋ? Ba na toɔ̃ tu la gyeremɛ soriŋ a de kɔkɔbaaloŋ soore o soba soorebie naŋ na somoo ka o baŋ a yelnimizeere. (Ikil. 12:11) Lɛ na o soba naŋ na iri a soorebie nɔɛ na soŋɛɛ a kawaŋ-terɛ ka o baŋ ka o soba woŋee a muni bee o ba woŋ a muni.

LƐ TEŊ NA TOƆ̃ TERE KAWANE WAGRE ANE SORI NAŊ SEŊ NEŊ POƆŊ

14. Ka te suuriŋ wa iri, aseŋ ka te ko te taaba kawane bee? Wuli a muni.

¹⁴ Te kaŋa zaa ba pɛgeyi, azuŋ te na baŋ eɛ yɛlɛ, kyɛbee a yeli yɛlɛ a dɔŋ noba suuri. (Kol. 3:13) A Baabole vɛŋɛɛŋ teŋ baŋ ka te na baŋ eɛ yɛlɛ naŋ na vɛŋ ka neɛ suuri iri yaga. (Efe. 4:26) Kyɛ, ka te suuriŋ wa iri a ba seŋ ka te ko te taaba kawane. Ananso la ka, ‘nensaalaa suuri iruu ba waana ne Naaŋmen mennoŋ.’ (Gyi. 1:20) Ka teneeŋ de suuri ko neɛ kawane, a na toɔ̃ vɛŋeŋ ka a yɛlɛ maaleŋ sãã yaga zaa. Lɛ ba wuli ka a ba seŋ ka te manne yɛlɛ na o soba naŋ e a dɔŋ te suuri na koo. Kyɛ, ka teneeŋ kyɛnle ka te suuri na mãã, a na toɔ̃ soŋ teŋ ka te neŋ o soba di dama soŋ zaa. Dɔɔ kaŋa baŋ boɔlɔ Elaihu da ko la Gyoob kawane. Te na baŋ zannɛɛ yelsoŋ kaŋa yi o zieŋ.

15. Bo yɛlɛ teŋ na baŋ zanne yi Elaihu yɛlɛ ŋa poɔŋ? (Kaa a foto.)

¹⁵ Bebie awala mine kpakyagaŋ, Gyoob da iree yɛlɛ nɔɛ korɔ o zɔmenneŋ naŋ da ŋmaa yɛlɛ dɔgloo na. Elaihu da mãã la o meŋɛ a kyɛllɛ yɛlɛ na zaa Gyoob naŋ yele na. Elaihu da taaɛ nimibaaloŋ ko Gyoob. Kyɛ, Elaihu suuri da ireeŋ saŋa na Gyoob naŋ yeli yɛlɛ naŋ ba seŋ neŋ a kyaare Jehoova, a lɛ moɔrɔ ka o pɛge o yuori na. Aneazaa, Elaihu da kyɛnlɛɛŋ baŋ wa ko o vuo sɛre oŋ piili yele yɛlɛ. O da deɛ sumaaroŋ ane gyeremɛ naŋ e zuluŋ korɔ Gyoob a kawane. (Joob 32:2; 33:​1-7) Te na baŋ zannɛɛ yelnimizeɛ kaŋa yi Elaihu yɛlɛ ŋa poɔŋ. Ka te suuriŋ wa mãã, a saŋa teŋ na baŋ tere kawane wagre ane sori naŋ seŋ neŋ poɔŋ a yi nɔmmo neŋ gyeremɛ poɔŋ.—Ikil. 3:​1, 7.

MOƆ̃ NIŊE A TERƐ A KYƐ SAGRA KAWANE MEŊ

16. Bo yɛlɛ teŋ na baŋ zanne yi Yieme 32:8?

¹⁶ A Baabole zie na baŋ iri a zannoo ŋa yelzu yi na yeleeŋ ka, ‘Jehoova na ko boŋ kawane a kaara bo neŋ o nimiri.’ (Kanne Yieme 32:8.) Lɛ wuleeŋ ka Jehoova naŋ na gɛrɛɛ nimitɔɔre a sonnɔ te. O maŋ ko teŋ kawane, a soŋ te teŋ de a kawane meŋ tonɔ neŋ toma. O eɛ ewuli soŋ ko te zaa. Ka teneeŋ wa nyɛ apoɔsori ka te ko te taaba kawane, yɛ vɛŋ ka te maŋ tɔglɔ Jehoova a vɛŋ ka te niŋe be ba eŋɛŋ, a soŋ ba ka ba de gbɛɛ naŋ soma.

17. Ka a lantaapuoruu nembɛrɛŋ wa de a Baabole poɔ kawane ko te, a maŋ vɛŋeŋ baŋ waa ŋa bo? Wuli a muni. (Aizeeya 32:​1, 2)

¹⁷ Pampana la aŋ fɛre yaga zaa ka te korɔ noba kawaŋ-soŋ, a lɛ derɛ kawaŋ-soŋ meŋ tonɔ neŋ toma. (2 Tim. 3:1) Lantaapuoruu nembɛrɛ naŋ maŋ de a Baabole poɔ yɛlɛ korɔ noba kawane waa ŋa “kɔnbɔɔre koɔ̃nɛɛ naŋ be zikuoŋaaŋ.” (Kanne Aizeeya 32:​1, 2.) Zɔmenne naŋ maŋ ko te kawane naŋ seŋ neŋ saŋa na baŋ baŋ ka a ba e yɛlɛ teŋ boɔrɔ ka te woŋ korɔ teŋ kyɔɔtaa. Ba kawane na waa ŋa “salema apulihi ba naŋ maale eŋ ware pɛrɛtɛ poɔŋ.” (Yeng. 25:11) Yɛ vɛŋ ka te zaa moɔ̃ niŋe a zanna lɛ teŋ na toɔ̃ e a maŋ korɔ te taaba kawaŋ-soŋ, a maŋ lɛ de kawaŋ-soŋ meŋ tonɔ neŋ toma.