Yɛlɛ Na Hoŋ Zanne Yi A Baabole Poɔŋ A Piilee Saŋa Na Na Baŋ Soŋ Boŋ Zenɛ Bee?

1. Saŋa na hoŋ wa piili zanna a Baabole yɛlɛ na, sobuo aŋ toɔ̃ soŋ bo?

YƐLƐ na teŋ zanne saŋa na teŋ wa piili a Baabole zannoo leɛrɛɛ te zemmo. Aŋa mannoo poɔŋ, te wa zannɛɛŋ ka Naaŋmen yuori la Jehoova. Lɛ soŋ teŋ teŋ boɔrɔ ka te e o zɔmeŋɛ. (Aiz. 42:8) Te wa zannɛɛ yɛlɛ naŋ maŋ pɔge neɛ saŋa na oŋ wa kpi, azuŋ te ba lɛ zoro noba naŋ kpi dabeɛ̃. (Ikil. 9:10) Saŋa na teŋ wa zanne noɔre na Naaŋmen naŋ eŋ ka o na maalɛɛ a teŋgane ka o leɛ Paradiisi na, a vɛŋɛɛŋ teŋ ba lɛ zoro nendaare kaŋa dabeɛ̃. Te wa baŋɛɛŋ ka yuomo 70 kyɛbee 80 yoŋ naane teŋ na zeŋ a teŋɛzuŋ, kyɛ te na bebeŋ tegitegilɛ.​—Yiem. 37:29; 90:10.

2. Aŋa lɛ na 2 Piita 1:12, 13 naŋ wuli na, bonso teŋ na baŋ yelka yɛlɛ na Kristabiiri naŋ kyile naŋ zanne a piilee saŋa na na baŋ soŋ baŋ?

² Aseŋ ka te naŋ kyɛnɛ de a Baabole poɔ wuluu ŋa tegroŋ yaga zaa. Bitontona Piita da sɛgɛɛ o yiiloŋ lɛta a te ko Kristabiiri naŋ “are a yelmeŋɛ ba naŋ yeli ko [ba] poɔ kpeɛŋaa.” (Kanne 2 Piita 1:​12, 13.) Kyɛ, neŋfaare ane zirii wulwulbo mine da be la a lantaapuoruu poɔŋ, a moɔrɔ ka ba tage ba yɔɔmine na yi a yelmeŋɛ poɔŋ. (2 Pit. 2:1-3) Piita da boɔrɔŋ ka o soŋ o yɔɔmine na ka ba zagre a noba ŋa yɛlɛ na bare. Azuŋ, o da leɛteɛre baŋ yɛlɛ na mine ba naŋ zanne na. Yɛlɛ na baŋ zanne na na soŋ baŋ ka ba nyɔge ba sagediibu kpeɛŋaa te ta a baaraa.

3. Bonso aŋ soma ka Kristabiiri zaa maŋ teɛrɛ Baabole poɔ yɛlɛ na baŋ zanne a piilee saŋa na? De yelmannaa kaŋa wuli a muni.

³ Ka teneeŋ e Kristabiiri naŋ kyile gba, kyɛ te na baŋ zannɛɛ yelnimizeere a yi yɛlɛ na teŋ zanne yi a Baabole poɔŋ a piilee saŋa na. Te de yelmannaa wuli a muni. Te de ka bi-ma neŋ o pɔgeyaa naŋ zanna zɛ-vaare zeɛre dɔgebo kaŋa zaa boɔrɔŋ ka o doge zɛ-vaare zeɛre. A bi-ma naŋ de yuomo yaga a doge a zeɛre zuŋ na, o na toɔ̃ tuɛ soe yaga a doge a zeɛre ka a noma yaga a gaŋ o pɔgeyaa naŋ piili zanna a zeɛre dogebo na. Lɛ neŋ o zu la, noba naŋ de yuomo yaga puore neŋ Jehoova maŋ toɔ̃ woŋee a Baabole poɔ yɛlɛ muni gaa tɔɔre a gaŋ noba naŋ piili zanna a Baabole. Aminekaŋaŋ, te zemmo yɛlɛ ane apoɔsoe na teŋ taa Jehoova puoruu poɔŋ na leɛrɛɛŋ te suobu deebo puoriŋ. Kyɛ, ka teneeŋ teɛre Baabole poɔ yɛlɛ na teŋ zanne a piilee saŋa na yɛlɛ gaa tɔɔre, te na nyɛɛ yɛlɛ teŋ na baŋ de toŋ neŋ toma. Te waanaŋ ka te manne yɛlɛ ata mine teŋ zanne saŋa na teŋ wa piili zanna a Baabole. Te na nyɛɛ yɛlɛ Kristabiiri naŋ kyile naŋ na baŋ zanne yi be.

JEHOOVA LA IRI BOMA ZAA

4. Saŋa na teŋ wa zanne baŋ ka Jehoova la iri boma zaa na, sobuo aŋ toɔ̃ soŋ te?

⁴ Hiburu 3:4 yeleeŋ ka: “Boma zaa meɛrɛ la Naaŋmen.” A Baabole sɛgre ŋa vɛŋɛɛŋ teŋ baŋ ka Naaŋmen naŋ waa yɛŋ zaa soba, a lɛ e kpeɛ̃o zaa daana la maale a teŋgane neŋ bonvobɔ zaa naŋ be o zuŋ. Naaŋmen naŋ maale te na zuŋ, o baŋ teŋ velaa zaa. O nɔŋɛɛ te yɛlɛ meŋ soŋ. O baŋɛɛ yɛlɛ naŋ soma ko te meŋ. Te naŋ baŋ ka Jehoova la iri boma zaa na zuŋ, a vɛŋɛɛŋ teŋ taa zeŋ laafeɛ, ane nendaare kaŋa teɛretɔ.

5. Bo yɛlɛŋ na baŋ soŋ te ka te taa sigrimennoŋ gyogo? (Aizeeya 45:9-12)

⁵ Yɛlɛ na teŋ zanne ka Jehoova la iri boma zaa na na baŋ soŋ teŋ ka te sigri te menne. Aŋa mannoo poɔŋ, Gyoob da de la o teɛroŋ eŋ o meŋɛ eŋɛŋ te gaali, azuŋ o da yelee yɛlɛ naŋ ba seŋ neŋ kyaara Jehoova. Lɛ da vɛŋɛɛŋ ka Jehoova leɛteɛre Gyoob ka Ona la a kpeɛ̃o zaa daana naŋ iri boma zaa. (Joob 38:1-4) A yɛlɛ ŋa da soŋɛɛ Gyoob oŋ baŋ ka Jehoova yel-eree zaa maŋ toreŋ. Daŋyele Aizeeya da sɛgɛɛŋ kyaare a yɛlɛ ŋa ka: “Yage seŋ ka o yelko Mɛmeɛrɛ ka: ‘Boŋ ka ho maala?’”—Kanne Aizeeya 45:​9-12.

6. Bo saŋa aŋ maŋ e nimizeɛ yaga zaa ka te maŋ teɛre lɛ na Jehoova naŋ taa kpeɛ̃o neŋ yɛŋ naŋ ba baara na yɛlɛ? (Kaa a fotori.)

⁶ Ka Kristabie kaŋaŋ wa de yuomo yaga a puore Jehoova, ka o naŋ ba kaa soŋ o na baŋ piili dɛlɛɛ o meŋɛ teɛroŋ. O koŋ maŋ lɛ derɛ Jehoova sowuli naŋ be a Baabole poɔŋ na tonɔ neŋ toma. (Joob 37:23, 24) Kyɛ, ka o sobaŋ teɛre lɛ na Naaŋmen naŋ taa yɛŋ ane kpeɛ̃o naŋ ba taa baara na yɛlɛ, sobuo aŋ na toɔ̃ somoo? (Aiz. 40:22; 55:8, 9) Lɛ eebo na somooŋ ka o leɛre o teɛroŋ faa na oŋ taa na, a lɛ sigri o meŋɛ meŋ.

7. Wala ka Rahela e aŋ toɔ̃ somoo oŋ de sowuli paalaa kaŋa tonɔ neŋ toma?

⁷ Slovenia paaloŋ ka Rahela be. O yeleeŋ ka saŋa na zaa oŋ maŋ wa teɛre ka Jehoova la iri boma zaa na, a maŋ somooŋ oŋ de leɛroo na Jehoova lantaapuoruu naŋ maŋ de waneŋ na tonɔ neŋ toma. O yeleeŋ ka: “Saŋa kaŋa, a ba maŋ e mɔlɔ ka N de sowuli na noba naŋ derɛ te weɛ naŋ maŋ de waneŋ na tonɔ neŋ toma. Aŋa mannoo poɔŋ, haali saŋa na maŋ wa kaa 2023 Lantaa Zukaareba Duoro 8 Soba baare na, kyɛ, N noɔre zaaŋ da mãã saŋa na maŋ nyɛ te yɔɔdɔɔ kaŋa naŋ bare o teɛ̃ kɔɔloŋ naŋ terɛ yelyaga. Azuŋ, N da puore sɔrɛɛ Jehoova ka o soŋ ma ka N de a leɛroo ŋa toŋ neŋ toma.” Rahela wa nyɛɛŋ ka Jehoova naŋ iri sazu neŋ teŋgane, taaɛ a kpeɛ̃o ka o wulo o lantaapuoruu na sori. Ka teneeŋ wa leɛre yɛlɛ mine te naŋ sagedi, kyɛbee ka ba naŋ wa de sowuli paalba mine waneŋ ka a e kpeɛŋaa ko te ka te de a tonɔ neŋ toma, aseŋ ka te yi sigrimennoŋ poɔŋ a teɛre Jehoova kpeɛ̃o neŋ yɛŋ naŋ ba taa baaroo na yɛlɛ gaa tɔɔre. Lɛ na soŋ teŋ ka te de a sowuli neŋ a leɛroo toŋ neŋ toma.—Uro. 11:33-36.

BON NANSO KA NAAŊMEN TERE SORI TEŊ DIRE DƆGƐƐ

8. Saŋa na hoŋ wa zanne baŋ bon nanso Naaŋmen naŋ tere sori teŋ dire dɔgɛɛ na, sobuo aŋ toɔ̃ soŋ bo?

⁸ Bonso ka Naaŋmen tere sori teŋ dire dɔgɛɛ? Noba mine suuri iri neŋ la Naaŋmen, ka mine meŋ maŋ yelka Naaŋmen kyebe, bonso ba ba baŋ a soorebiri ŋa noɔre iribo. (Yeng. 19:3) Tenee yɛŋ baŋɛɛŋ ka faaloŋ na teŋ nyɛ yi Adama zieŋ, ane teŋ ba pɛgeyi na zuŋ teŋ dire dɔgɛɛ. Kyɛ, Jehoova naane vɛŋ teŋ dire dɔgɛɛ. Te lɛ zannɛɛŋ meŋ a wa nyɛ ka Jehoova kannyiri diibu na yuo la sori ko noba turituri baŋ wa bamoo. A lɛ vɛŋɛɛŋ baŋ baŋ ka Jehoova na iree dɔgɛɛ zaa bare kpɛlɛŋkpɛlɛŋ. (2 Pit. 3:9, 15) A yelmenne ŋa dii la te sukyie, a lɛ vɛŋ teŋ tage peɛle Jehoova meŋ.

9. Bo yɛlɛ mine poɔ la aŋ maŋ soma ka te leɛteɛre bon nanso Jehoova naŋ tere sori teŋ dire dɔgɛɛ?

⁹ Te baŋɛɛŋ ka a fɛrɛɛŋ ka te dire kannyiri saŋa na teŋ kyɛnlɛ ka Jehoova wa iri dɔgɛɛ zaa bare na. Kyɛ, ka teneeŋ wa tuoro yelkpeɛne, daŋkyagre, kyɛbee ka te nɔŋna kaŋaŋ wa kpi, te na baŋ piili teɛrɛŋ ka Jehoova naaraŋ ka o iri dɔgɛɛ bare. (Hab. 1:2, 3) Wagre mine, a na somaŋ ka te maŋ teɛre bon nanso Jehoova naŋ tere sori ka sontuuribo dire dɔgɛɛ.a (Yiem. 34:19) Te na baŋ lɛ teɛrɛɛ noɔre na Naaŋmen naŋ eŋ ka o na iree dɔgɛɛ bare kpɛlɛŋkpɛlɛŋ na meŋ yɛlɛ.

10. Boŋ toɔ̃ dii Anne sukyiri saŋa na o ma naŋ kpi na?

¹⁰ Te naŋ baŋ bon nanso ka Naaŋmen tere sori teŋ dire dɔgɛɛ na zuŋ, a maŋ vɛŋeŋ teŋ nyɔgrɔ te menne. Teŋɛ na koɔ̃ naŋ ŋmaa gyeere naŋ be a Indian Ocean baŋ boɔlɔ Mayotte ka Anne be. O yeleeŋ ka: “Yuomo awala mine naŋ pare, N ma da kpieŋ. A yɛlɛ ŋa da vɛŋɛɛŋ ka N poɔ sãã yaga zaa. Wagre zaa, N maŋ teɛrɛɛ N meŋɛ ka Jehoova naaneŋ vɛŋ teŋ dire dɔgɛɛ. Jehoova eŋɛ nyagraŋ ka o iri dɔgɛɛ zaa bare, a lɛ seŋ te nɔŋneba na zaa naŋ kpikpi na. Ka maaŋ wa teɛre a yɛlɛ ama gaa tɔɔre, N maŋ taaɛ teɛroŋ yeni aneazaa ka N ma kũũ na vɛŋɛɛŋ ka N poɔ sãã.”

11. Te naŋ baŋ bon nanso Jehoova naŋ tere sori teŋ dire dɔgɛɛ na zuŋ, sobuo aŋ na baŋ eŋ te faŋa ka te moɔ̃ niŋe moɔlɔ a duorisoŋ?

¹¹ Te naŋ baŋ bon nanso ka Naaŋmen tere sori teŋ dire dɔgɛɛ na zuŋ, a maŋ eŋ teŋ faŋa teŋ moɔ̃ niŋe moɔlɔ a duorisoŋ. Piita da vɛŋɛɛŋ aŋ pɛle ka Naaŋmen kannyiri diibu na yuo la sori ko noba ka ba leɛre ba eebo a toɔ̃ nyɛ faabo. O da lɛ yeleeŋ ka: “Nemboŋ boorɔ la ka a seŋ ka yɛ waa a yɛ sonnoŋ ane mennoŋ nyɔvore taabo poɔ.” (2 Pit. 3:11) Yel na kaŋa teŋ na baŋ e a de wuli ka te be la a “mennoŋ nyɔvore taabo poɔ” la teŋ na tonɔ a naaŋ moɔloo toma. Te nɔŋɛɛ noba aŋa lɛ na Jehoova naŋ nɔŋ ba na. Te boɔrɔŋ ka ba nyɛ apoɔsori a zeŋ a donpaalaa poɔŋ. Jehoova kannyiri diibu na yuo la sori ko noba naŋ be ho gbandige na poɔŋ ka ba de gbɛre a wa puoruu. Te taaɛ apoɔsori ka te neŋ Jehoova laŋ toŋ toma, a soŋ noba yaga ka ba wa bamoo sɛre ka a donɛɛ baaroo ta.—1 Kor. 3:9.

TE BE LA ‘A BEBI-BAAREE SAŊA’

12. Saŋa na teŋ wa zanne baŋ ka te be la ‘a bebi-baaree saŋa’ na, sobuo aŋ toɔ̃ soŋ te?

¹² A Baabole wulee lɛ na noba naŋ na erɛ ba yɛlɛ ‘a bebi-baaree saŋa’ aŋ pɛle soŋ zaa. (2 Tim. 3:1-5) Ka teneeŋ wa nyɛ lɛ na noba naŋ ŋmaa gyeere te naŋ erɛ ba yɛlɛ na, te na nyɛŋ ka a daŋyelbo ŋa nyɛrɛɛ eebo. Saŋa na teŋ nyɛrɛ lɛ na noba gyogri naŋ maaleŋ sããna na, a maŋ vɛŋeŋ teŋ maaleŋ taa sagediibu naŋ e kpeɛŋaa Naaŋmen Yelbiri na eŋɛŋ.​—2 Tim. 3:13-15.

13. Aŋa lɛ na Yezu naŋ yeli aŋ be Luka 12:15-21 na, bo soorebie aŋ seŋ ka te soore te menne?

¹³ Te naŋ baŋ ka te be la a donɛɛ bebi-baaree poɔŋ na zuŋ, aseŋ ka a eŋ te faŋa ka te de te teɛroŋ eŋ yɛlɛ naŋ sereŋ e nimizeɛ yaga zaa eŋɛŋ. Yezu da terɛɛ yelmannaa kaŋa naŋ wulo lɛ na aŋ e nimizeɛ ka te de yɛlɛ naŋ e nimizeɛ de weɛ te zemmo poɔŋ. (Kanne Luka 12:15-21.) Bonso ka a Baabole yelka a dɔɔ eɛ “damboli”? A ba e ka oŋ da e bondaana zuŋ la, kyɛ a dɔɔ da de la boma naŋ ba seŋ neŋ de weɛ o zemmo poɔŋ. A dɔɔ da boɔrɛɛ a ‘teŋɛzu naboma korɔ o meŋɛ, kyɛ ka a bontaree ba kyaare ne Naaŋmen.’ Bonso ka a yɛlɛ ŋa da e nimizeɛ yaga zaa? Naaŋmen da yelko la a dɔɔ ka: ‘A tensogɔ ŋa zaa ka N na de ho nyɔvore.’ Te naŋ baŋ ka a donɛɛ baaroo tagra taraŋ wieoŋwieoŋ na, aseŋ ka te meŋ soore te menne ka: ‘Yɛlɛ na maŋ de biŋ N nimitɔɔreŋ na wuleeŋ ka N deɛ N teɛroŋ eŋ yɛlɛ naŋ sereŋ e nimizeɛ eŋɛŋ bee? Bo yɛlɛ maŋ wuli N biiri ka ba de biŋ ba nimitɔɔreŋ? N maŋ de la N wagre, N faŋa, ane libie a boɔrɔ N meŋɛ yoŋ tɛgɛ boma, kyɛbee N de aŋ erɛ yɛlɛ naŋ na vɛŋ ka N neŋ Jehoova niiloŋ e kpeɛŋaa?’

14. Aŋa lɛ na Miki zemmo yɛlɛ naŋ wuli na, bonso aŋ soma yaga zaa ka te teɛre sieree naŋ wulo ka te be la a bebi-baaree poɔŋ na yɛlɛ gaa tɔɔre?

¹⁴ Ka teneeŋ teɛre yɛlɛ gaa tɔɔre a wa sagedi ka te sereŋ be la a bebi-baaree saŋa, a na soŋ teŋ ka te baŋ gbɛɛ na aŋ seŋ ka te derɛ te zemmo poɔŋ. A yɛlɛ ŋa da soŋɛɛ te yɔɔpɔge Miki. O yeleeŋ ka: “Saŋa na maŋ wa baare sakuu na, N da boɔrɔŋ ka N gaa sakuu gaa nimitɔɔre a te zanne dunni yɛlɛ. Kyɛ, N da lɛ de biŋee N nimitɔɔreŋ ka N na toŋɛɛ a regular paaneɛ toma, a lɛ gaa zie ba naŋ boɔrɔ naaŋ moɔleba a te soŋ a toma. N zɔmenne mine naŋ kyile da yelko maŋ ka N teɛre yɛlɛ gaa tɔɔre a nyɛ ka N na toɔ̃ gaaɛ a sakuu, a kyɛ lɛ ta yɛlɛ na maŋ de biŋ N nimitɔɔre na bee. Ba da leɛteɛre maŋ ka a donɛɛ baaroo peɛlɛɛŋ. Ba da lɛ yelko maŋ ka a donpaalaa poɔŋ, N na taaɛ wagre ka N zanne dunni yɛlɛ lɛ zaa maŋ boɔrɔ. Azuŋ, N da zannɛɛ toma mine naŋ ba derɛ N wagre yaga. Lɛ da vɛŋɛɛŋ maŋ nyɛ toma naŋ sonnɔ ma maŋ tonɔ a regular paaneɛ toma. A puoriŋ, N da gaaɛ Ecuador paaloŋ a te sonnɔ a naaŋ moɔloo toma.” Pampana ŋa, Miki sonnɛɛ o serɛ oŋ tonɔ a gbandige zukaara toma Ecuador paaloŋ.

15. Sobuo ka Gyimisi yɛlɛ ŋa vɛŋ teŋ baŋ ka aseŋ ka te naŋ moɔ̃ niŋe moɔlɔ a duorisoŋ korɔ noba naŋ ba kyɛllɛ? (Kaa a fotori.)

¹⁵ Ka nobaŋ wa zagre ka ba kyɛlle te duorisoŋ na teŋ moɔlɔ na, a ba seŋ ka te enne kyoɔre. Bonso, noba na baŋ leɛreŋ. Te de Yezu yɔɔ Gyimisi yɛlɛ na wuli neŋ a yɛlɛ ŋa muni. O neŋ Yezu la da laŋ baa. A puoriŋ, Yezu da de la suobu a leɛ a Mɛzaaya. Yezu da eɛ wulwulo naŋ kyile a gaŋ wulwulo zaa naŋ daaŋ bebe. Kyɛ, ana yuomo na zaa poɔŋ, Gyimisi da ba e Yezu potuuro. Saŋa na Yezu naŋ wa kpi, ka Jehoova seŋoo na puoriŋ ka Gyimisi wa leɛ Yezu potuuro. O da wa leɛ la Yezu potuuro na kaŋa naŋ taa eŋnyagroŋ yaga zaa.b (Gyn. 7:5; Gal. 2:9) Ho dɔgreba mine bebeŋ a erɛ yɛlɛ naŋ wuli ka ba ba boɔrɔ a duorisoŋ bee? Kyɛbee ho moɔlɛɛ a duorisoŋ ko noba mine baŋ zagre ka ba woŋ? A eɛ nimizeɛ ka te naŋ moɔ̃ niŋe a moɔlɔ a duorisoŋ korɔ a noba bama. Leɛteɛre ka te be la a bebi-baaree saŋa. Azuŋ, pampana ka a duorisoŋ moɔloo toma e nimizeɛ yaga zaa. Ba na toɔ̃ teɛrɛɛ yɛlɛ na hoŋ manne ko ba pampana na a leɛre ba eebo nendaare kaŋa. Aminekaŋaŋ, a dɔgroŋ kpoŋ saŋa baŋ na teɛre a yɛlɛ a leɛre ba eebo.c

NAŊ KYƐNƐ DE YƐLƐ NA JEHOOVA NAŊ MAŊ LEƐTEƐRE TE NA TEGROŊ

16. Bo yɛlɛ teŋ na baŋ zanne yi yɛlɛ na baŋ maŋ leɛteɛre te na poɔŋ? (Kaa a daga, “De A Sonnɔ Neŋ Ho Taaba.”)

¹⁶ Baabole poɔ yɛlɛ na mine Jehoova lantaapuoruu naŋ maŋ wulo te na eɛ yɛlɛ naŋ na baŋ soŋ noba naŋ ba baŋ a Baabole poɔ yɛlɛ yaga. Aŋa mannoo poɔŋ, a gyamaa poɔ yelyaga, yelzuri neŋ vidiori mine naŋ be jw.org, ane gama mine eɛ boma ba naŋ sɛge ko noba naŋ ba puoro Jehoova. Kyɛ te meŋ na baŋ zannɛɛ yelnimizeere yi a poɔŋ. A na baŋ soŋ teŋ ka te taa nɔmmo naŋ e zuluŋ ko Jehoova, a taa sagediibu naŋ e kpeɛŋaa a Baabole eŋɛŋ, a lɛ vɛŋ ka te e a Baabole wulwulbo naŋ kyile.—Yiem. 19:7.

17. Bo yɛlɛ mine poɔŋ la aŋ na soma ka te maŋ leɛteɛre yɛlɛ na teŋ zanne yi a Baabole poɔŋ a piilee saŋa na?

¹⁷ Ka ba naŋ wa leɛre a Baabole poɔ yɛlɛ mine te naŋ sagedi, te poore zaaŋ maŋ pɛle. Kyɛ, te naŋ maŋ de la a Baabole poɔ yɛlɛ na teŋ zanne a piilee saŋa na tegroŋ yaga zaa, bonso anaŋ soŋ te teŋ wa baŋ a yelmeŋɛ. Ka anaŋ wa wa te teɛroŋ poɔŋ ka te de yɛlɛ naŋ be te teɛroŋ poɔŋ a tonɔ neŋ toma a gaŋ teŋ na de sowuli Jehoova lantaapuoruu naŋ ko te tonɔ neŋ toma, yɛ vɛŋ ka te yi sigrimennoŋ poɔŋ a teɛre ka Jehoova la wulo o lantaapuoruu na sori. Jehoova la yɛŋ ane kpeɛ̃o zaa daana naŋ iri boma zaa. Ka tenee bee te nɔŋna kaŋaŋ wa tuoro yelkpeɛŋaa kaŋa, aseŋ ka te di kannyiri a teɛre bon nanso ka Jehoova tere sori teŋ dire dɔgɛɛ. Ka teneeŋ wa boɔrɔ ka te baŋ yɛlɛ aŋ seŋ ka te de te wagre ane te bontaree erɛ neŋ, yɛ vɛŋ ka te maŋ leɛteɛre ka te be la a bebi-baaree saŋa. Yɛ vɛŋ ka yɛlɛ na Jehoova naŋ maŋ leɛteɛre te na eŋ te faŋa ka te are kpeɛŋaa a erɛ yɛlɛ aŋa yɛmbaŋneba.