Ho Vɛŋɛɛŋ Ka Boma Na Hoŋ Taa Na Paale Ho Niŋe Bee?

1. Ka neɛ niŋeŋ wa paale neŋ boma na oŋ taa na, wala oŋ maŋ erɛ o yɛlɛ?

HO NIŊE paalɛɛ boma na hoŋ taa na bee? Neɛ niŋe naŋ paale neŋ boma na oŋ taa na maŋ de la o teɛroŋ eŋ boma na oŋ taa na eŋɛŋ, azuŋ o maŋ taaɛ popeɛloŋ ane emmaaroŋ. Ka o sobaŋ ba taa boma mine o naŋ boɔrɔ, kyɛ o suuri ba maŋ iri. Neɛ naŋ vɛŋ ka o niŋe paale neŋ boma oŋ taa naŋ maŋ moɔrɛɛ o moɔbo zaa o zemmo poɔŋ. Aŋa mannoo poɔŋ, o soba maŋ moɔrɔŋ ka o tonɔ toma yaga Jehoova puoruu poɔŋ. (Uro. 12:1; 1 Tim. 3:1) O soba naŋ maŋ taaɛ popeɛloŋ haali saŋa na o nu naŋ ba kpɛ apoɔsori kaŋa o naŋ kaara soriŋ.

2. Ka teneeŋ ba taa nimipa, bo yɛlɛŋ na baŋ pɔge te?

² Ka teneeŋ ba taa nimipa, te na baŋ deɛ gbɛ-faare. Noba naŋ ba taa nimipa maŋ de la ba wagre kpoŋ zie zaa a tonɔ toma ka lɛ na vɛŋ ka ba toɔ̃ da boma yɛlɛ naŋ ba fɛrɛ ba. A yɛlɛ faa zie la ka, Kristabiiri mine gba maŋ zu la libie ane boma mine ba naŋ boɔrɔ. Aminekaŋaŋ, ba maŋ teɛreŋ ka, ‘N boɔrɛɛ a bon ŋa nimizeɛ̃,’ ‘Ka maaŋ ba de a bon ŋa N daŋ koŋ lɛ nyɛ o zaa,’ ‘Oo N na baŋ de la a libie a kyɛ leɛ yɔɔ a puoriŋ.’ Kyɛ, teɛroŋ zaa teŋ de zu neŋ boma ba soma Jehoova nimitɔɔreŋ. (Yeng. 30:9) Noba mine meŋ barɛɛ Jehoova puoruu bonso, ba nu ba kpɛ apoɔsori kaŋa ba naŋ boɔrɔ. (Gal. 6:9) Bo yɛlɛŋ na toɔ̃ vɛŋ ka Jehoova puorebie naŋ de o meŋɛ koo e a yɛlɛ ama taa? Tɔɔ, aminekaŋaŋ fẽẽfẽẽ fẽẽfẽẽ o soba ba lɛ taa nimipa gyogo.

3. Bo yelnimizeere teŋ na baŋ zanne yi Filipae 4:11, 12?

³ Te kaŋa zaa na baŋ taaɛ nimipa gyogo. Bitontona Pɔɔl da sɛgɛɛŋ a kyaare o meŋɛ ka: “N maale la N teɛroŋ ka N nimiri maŋ paale ne bonna zaa N naŋ taa.” (Kanne Filipae 4:​11, 12.) O da be la nempɔgedie kyɛ sɛge a yɛlɛ ŋa. Aneazaa, o da naŋ taaɛ popeɛloŋ. O da maalɛɛ o teɛroŋ ka o na maŋ vɛŋeŋ ka o niŋe paale neŋ boma na oŋ taa na. Ka a naŋ wa e kpeɛŋaa ko te ka te taa nimipa gyogo, Pɔɔl yɛlɛ ŋa wulo teŋ ka te meŋ na baŋ taaɛ a gyogo ŋa. A ba seŋ ka te teɛre ka te zemmo yɛlɛ na toɔ̃ vɛŋeŋ ka te taa nimipa gyogo. Kyɛ, ka teneeŋ boɔrɔ ka te taa a gyogo ŋa, aseŋ ka te maale te teɛroŋ. Sobuo teŋ na baŋ tu a e lɛ? Yɛ vɛŋ ka te di dama kyaare gyogri mine naŋ na baŋ soŋ te ka te maŋ vɛŋ ka boma na teŋ taa na seŋ te.

TAA BAREKA PUORUU GYOGO

4. Ka teneeŋ taa bareka puoruu gyogo, sobuo aŋ na baŋ soŋ te ka te taa nimipa? (1 Tɛsalonika 5:18)

⁴ Ka neɛŋ taa bareka puoruu gyogo, a maŋ eɛ mɔlɔ ka o niŋe paale neŋ boma na oŋ taa na. (Kanne 1 Tɛsalonika 5:18.) Aŋa mannoo poɔŋ, ka teneeŋ taa boma yɛlɛ naŋ fɛrɛ te ka te niŋe paale ne a, te koŋ vɛŋ ka boma te naŋ boɔrɔ a kyɛ ba taa yɛlɛ fɛrɛ te te gaali. Ka te niŋe paale neŋ apoɔsoe na teŋ taa pampana ŋa, a na soŋ teŋ yaga. Lɛ na vɛŋeŋ ka te de te sukyie zaa tonɔ toma na baŋ de eŋ te nuuriŋ na. Ka teneeŋ erɛ lɛ, te koŋ de te teɛroŋ zaa eŋ apoɔsoe na teŋ ba taa na eŋɛŋ. A Baabole eŋ teŋ faŋa ka te maŋ puore Jehoova bareka te puore sɔroo poɔŋ. Ka teneeŋ taa bareka puoruu gyogo, ana soŋ teŋ ka te taa “a Naaŋmen maaroŋ naŋ zuo bammo zaa” na.—Fil. 4:6, 7.

5. Bo yɛlɛ aŋ seŋ ka a Izerayɛl biiri da leɛteɛre, ka lɛ vɛŋ ka ba taa bareka puoruu gyogo? (Kaa a foto.)

⁵ Te de a Izerayɛl biiri yɛlɛ manne neŋ a yɛlɛ ŋa. Gbɛɛ yaga, ba da maŋ ŋmoonɔ eŋnɛɛ Jehoova ka ba ba lɛ nyɛrɛ bondirii na baŋ da maŋ dire wono noɔ̃ Igyipiti paaloŋ na. (Sor. 11:4-6) Yelmeŋɛ la, zemmo da ba e mɔlɔ a wɛgyɛŋ poɔŋ. Kyɛ, boŋ da na toɔ̃ soŋ ba ka ba niŋe paale neŋ boma na baŋ taa na? Ka ba naŋ da taa bareka puoruu gyogo, a da naŋ soŋ baŋ ka ba leɛteɛre yelsonne na zaa Jehoova naŋ e ko ba na. A da seŋ ka ba leɛteɛre lɛ na baŋ da e gbaŋgbaare Igyipitiŋ baŋ dɔgrɔ ba, kyɛ ka Jehoova de toɔrɔ pie waneŋ a Igyipiti noba zuŋ na yɛlɛ. Saŋa na a Izerayɛl biiri naŋ da yire a paaloŋ na, ba da ‘fa yɛ a Igyipiti noba boma gyamaa.’ A boma mine da eɛ ware, salema, ane bonsuurii. (Yiib. 12:35, 36) Saŋa na a Igyipiti noba naŋ da kare te pɔge a Izerayɛl biiri a Maŋzeɛ noɔreŋ na, Jehoova da eɛ yelseɛlee kaŋa a vɛŋ ka a mane po ziiraayi. Saŋa na baŋ da kyɛnɛ a wɛgyɛŋ poɔŋ na, o da korɔ baŋ maana bebiri zaa baŋ dire. Kyɛ, bonso ka a Izerayɛl biiri da ŋmoonɔ bondirii yɛlɛ? Nyɛ, a da ba e ka bondirii la baŋ da ba taa na di, kyɛ ba niŋe da ba paale neŋ boma na baŋ taa na. Azuŋ, ba da ba taa bareka puoruu gyogo meŋ.

6. Bo yɛlɛ mine la na baŋ soŋ te ka te taa bareka puoruu gyogo?

⁶ Boŋ na baŋ soŋ bo ka ho taa bareka puoruu gyogo? A dɛndɛŋ soba, bebiri zaa maŋ teɛrɛ bonsonne na zaa hoŋ taa na yɛlɛ. Ho na baŋ sɛgɛɛ yɛlɛ ayi bee ata mine naŋ e, hoŋ boɔrɔ ka ho puore Jehoova bareka. (Laad. 3:22, 23) Ayi soba, maŋ yelka bareka. Ka noba mineŋ wa e yɛlɛ mine ko bo, maŋ yelko ba ka bareka. Agaŋaazaa, maŋ puore Jehoova bareka bebiri zaa. (Yiem. 75:1) Ata soba, kaa iri noba naŋ taa bareka puoruu gyogo, ka ba e ho zɔmenne naŋ peɛle bo. Ka te zɔmenneŋ taa bareka puoruu gyogo, ba na soŋ teŋ ka te meŋ taa ana gyogo na. Kyɛ, ka banaŋ e noba naŋ ba taa nimipa, lɛ teŋ meŋ na waa. (Dut. 1:26-28; 2 Tim. 3:1, 2, 5) Ka teneeŋ maŋ boɔrɔ soe teŋ na baŋ tu a puore te taaba bareka, te koŋ lɛ teɛrɛ boma na teŋ ba taa na yɛlɛ te gaali.

7. Wala ka Asi e ka lɛ vɛŋ oŋ taa bareka puoruu gyogo? Bo maalooŋ da yi a poɔŋ wa?

⁷ Indonesia paaloŋ ka Asi be. O yeleeŋ ka: “A COVID-19 baaloŋ faa na saŋa, N da de la N zemmo yɛlɛ manna neŋ N taaba. Lɛ da vɛŋɛɛŋ N da ba taa nimipa.” (Gal. 6:4) Boŋ da somoo oŋ leɛre o teɛroŋ? Asi yeleeŋ ka: “N da maŋ teɛrɛɛ yelsonne na zaa Jehoova naŋ erɛ korɔ ma bebiri zaa na yɛlɛ, ane maaloo na maŋ nyɛrɛ yire Jehoova lantaapuoruu na poɔŋ. N da maŋ puore sɔrɛɛ Jehoova a puoruu bareka. Lɛ da soŋ maŋ ka boma na maŋ taa na paale N niŋe.” Ka teɛroŋ faare mineŋ dɔɔnɔ bo, ho na baŋ tɔglɛɛ te yɔɔpɔge ŋa. Lɛ na soŋ boŋ ka ho meŋ taa bareka puoruu gyogo.

VƐŊ KA HO TEƐROŊ GAŊ KA HO NAŊ KYƐNƐ SIGRI HO MEŊƐ MEŊ

8. Bo yɛlɛŋ da pɔge Baaruk?

⁸ Daŋyele Gyeremaiya gaŋsɛgrɛ Baaruk da ba lɛ taa nimipa neŋ boma na oŋ da taa na. Toma na Baaruk naŋ da tonɔ na da eɛ kpeɛŋaa. O da sonnɛɛ Gyeremaiya baŋ moɔlɔ sɛrɛɛ diibu duoro korɔ a Izerayɛl biiri naŋ zagre Jehoova noɔre na. Kyɛ, a wa ta la saŋa kaŋa ka Baaruk teɛroŋ da ba lɛ be o toma na poɔŋ. O da ba lɛ de o teɛroŋ eŋ toma na Jehoova naŋ boɔrɔ ka o tonɔ na, kyɛ o da leɛ piili teɛrɛɛ o meŋɛ yoŋ yɛlɛ ane yɛlɛ oŋ na baŋ e. Jehoova da tu la Gyeremaiya zie a yelko Baaruk ka: ‘Ho boɔrɛɛ bonnanɛɛ korɔ ho meŋɛ bee? Ta boɔraa.’ (Jer. 45:3-5) Yɛlɛ Jehoova naŋ da yele korɔ Baaruk la ka: “Vɛŋ ka ho niŋe paale neŋ boma na hoŋ taa pampana na.” Baaruk da de la Jehoova kawane na toŋ neŋ toma, ka lɛ vɛŋ ka o ne o niiloŋ na naŋ kyɛnɛ e kpeɛŋaa.

9. Sobuo ka yɛlɛ naŋ be 1 Korinti 4:6, 7 na baŋ soŋ te ka te taa teɛroŋ naŋ soma a kyaare apoɔsoe te naŋ taa? (Kaa a fotori.)

⁹ Saŋa kaŋa, Kristabie kaŋa na baŋ teɛreŋ ka onaŋ seŋ ka ba de apoɔsori kaŋa ko. Aminekaŋaŋ, o eɛ neɛ naŋ kyile, a tonɔ tonkpeɛne, a lɛ de yuomo yaga meŋ puore neŋ Jehoova, azuŋ oŋ taa ana teɛroŋ na. Kyɛ, o soba maŋ wa baŋna ka ba de la ana apoɔsori na ko neŋyuo kaŋa. Boŋ na baŋ somoo ka o suuri ta iri? Yɛlɛ bitontona Pɔɔl naŋ sɛge te ko a Korinti lantaapuoruu na na baŋ somooŋ. (Kanne 1 Korinti 4:​6, 7.) Apoɔsori neŋ kyɔɔtaa zaa te naŋ taa yi la Jehoova zie. Te naŋ e neŋtegrɛ gaŋ te taaba zuŋ naane ka Jehoova maŋ ko te a kyɔɔtaare ŋa. Kyɛ, Jehoova nimimaaroŋ zuŋ teŋ taa boma na teŋ taa na.—Uro. 12:3, 6; Efe. 2:8, 9. 

10. Boŋ na baŋ soŋ te ka te taa sigrimennoŋ gyogo?

¹⁰ Yezu eɛ ewuli soŋ yaga zaa a kyaare sigrimennoŋ ko te. Ka teneeŋ teɛre o ewuli soŋ na yɛlɛ gaa tɔɔre, ana soŋ teŋ ka te meŋ sigri te menne. Zisoɔree kaŋa, aneazaa ka Yezu da baŋɛɛŋ ka o eɛ Naaŋmen Bidɔɔ, ka Naaŋmen lɛ de kpeɛ̃o meŋ koo, kyɛ o da pɛgɛɛ o bitontonee na gbɛɛ. Bitontona Gyɔɔn sɛgɛɛŋ ka: “Yezu naŋ da baŋ ka a Saa de la yelzaa eŋ O nuuriŋ, kyɛ la baŋ ka O yi la Naaŋmen zie wa kyɛ leɛ gɛrɛ Naaŋmen zie, . . . O pãã da kyiri la koɔ̃ eŋ laa poɔ a piili pɛgrɛ a O potuuribo gbɛɛ.” (Gyn. 13:3-5) Yezu da na baŋ teɛreŋ ka o bitontonee na la seŋ ka ba pɛge o gbɛɛ. Kyɛ, saŋa na Yezu naŋ da be a teŋɛzuŋ na, o da ba teɛre ka oŋ e Naaŋmen Bidɔɔ na zuŋ, aseŋ ka o taa de-kpoŋ, libie yaga, ane zemmo naŋ soma yaga. (Luk. 9:58) Yezu da sigree o meŋɛ. O niŋe da paalɛɛ boma na oŋ taa na. O eɛ ewuli soŋ ko te zaa.—Gyn. 13:15.

11. Sobuo ka sigrimennoŋ gyogo soŋ Dennis?

¹¹ Netherlands paaloŋ ka Dennis be. Aneazaa ka a ba e mɔlɔ koo, kyɛ o moɔrɛɛ o moɔbo zaa a tɔglɔ Yezu sigrimennoŋ gyogo na. O yeleeŋ ka: “Ka N tɔsobaŋ wa nyɛ apoɔsori kaŋa, N suuri maŋ iriŋ bonso N maŋ teɛreŋ ka maaŋ la seŋ ka ba de apoɔsori ko. Ka maaŋ wa piili teɛrɛ lɛ, N maŋ zannɛɛ sigrimennoŋ yɛlɛ. N deɛ Baabole sɛgre mine naŋ kyaare sigrimennoŋ eŋ JW Library^® zie kaŋa naŋ maŋ vɛŋ aŋ e mɔlɔ ka N nyɛ a. N maŋ kannaaŋ gbɛɛ yaga. N tagɛɛ vidiori mine naŋ manna sigrimennoŋ yɛlɛ eŋ N fone zuŋ. N maŋ kyɛllɛɛ a meŋ gbɛɛ yaga.a N wa nyɛɛŋ ka toma na zaa maŋ tonɔ na, N tonaaŋ ka N de pugibu ko Jehoova, kyɛ N ba tonaaŋ ka N tage noba teɛroŋ wa N eŋɛŋ. Jehoova la vɛŋ ka a toma nyɛrɛ nimitɔɔre gaabo, kyɛ o maŋ ko teŋ sori teŋ e yelkaŋa fẽẽ lɛ a sonnɔ a toma.” Ka hooŋ wa nyɛ ka ho niŋe ba lɛ paale neŋ apoɔsoe na hoŋ taa na, moɔrɔ ka ho eŋ ho sigrimennoŋ na faŋa. Lɛ na vɛŋeŋ ka ho neŋ Jehoova niiloŋ na maaleŋ e kpeɛŋaa, ka ho lɛ taa nimipa meŋ.—Gyi. 4:6, 8.

MAŊ TEƐRƐ HO TEƐRETƆ NA YƐLƐ

12. Bo nendaare kaŋa teɛretɔ la na baŋ soŋ te ka te taa nimipa? (Aizeeya 65:21-25)

¹² Ka teneeŋ maŋ teɛrɛ te teɛretɔ na yɛlɛ, a na vɛŋeŋ ka te taa nimipa. Daŋyele Aizeeya da sɛgɛɛ yɛlɛ Jehoova naŋ yeli a kyaare lɛ na zemmo naŋ na e kpeɛŋaa zenɛ ŋa. Kyɛ, o da lɛ wulee sori na Jehoova naŋ na tu a iri te yelwonii zaa bare. (Kanne Aizeeya 65:​21-25.) Te na kpeɛrɛɛ de-veɛle naŋ soma yaga zaa poɔŋ. Te na wonee te nuuri toma noɔ̃, a maŋ lɛ dire bondirii naŋ eŋnɛ faŋa, a lɛ noma meŋ soŋ. Te daaŋ koŋ lɛ zoro dabeɛ̃ ka yelfaa kaŋa na pɔge teŋ bee te biiri. (Aiz. 32:17, 18; Izik. 34:25) Te na baŋ taaɛ sagediibu ka a yɛlɛ ama zaa na nyɛɛ eebo nendaare kaŋa.

13. Bo yɛlɛ mine poɔŋ la aŋ seŋ ka te maŋ de te teɛroŋ eŋ te teɛretɔ na eŋɛŋ?

¹³ Pampana ŋa la wagre aŋ seŋ ka te de te teɛroŋ zaa eŋ te teɛretɔ na eŋɛŋ. Bonso teŋ yeli lɛ? Ananso la ka, te be la ‘a bebi-baaree’ saŋa. Te zaa taaɛ yelwonii naŋ e ‘kpeɛne yaga’ ko te. (2 Tim. 3:1) Bebiri zaa, Jehoova maŋ korɔ teŋ sowuli, a eŋnɛ te faŋa, a lɛ sonnɔ te meŋ. A yɛlɛ ama zaa maŋ vɛŋeŋ teŋ toɔ̃ dire kannyiri. (Yiem. 145:14) Ka teneeŋ wa tuoro yelkpeɛne, te teɛretɔ na na baŋ soŋ teŋ. Aminekaŋaŋ, ho maŋ toŋɛɛ tonkpeɛne yaga a toɔ̃ nyɛ ho booree deme boma yɛlɛ naŋ fɛrɛ ba ko ba. Lɛ wuleeŋ ka ho na eɛ nandaana tegitegilɛ bee? Ai. Jehoova eŋɛɛ noɔre ka o na ko boŋ boma yaga yaga Paradiisi poɔŋ. (Yiem. 9:18; 72:12-14) Aminekaŋaŋ, ho eŋɛ maŋ beɛrɛ boŋ, kyɛbee ka ho teɛroŋ gyɛre, kyɛbee baaloŋ faa kaŋa la dɔɔnɔ bo. Lɛ wuleeŋ ka teɛretɔ zaa kyebe ka ho daŋ koŋ lɛ nyɛ laafeɛ bee? Ai. Baaloŋ neŋ kũũ na bɔreŋ Naaŋmen donpaalaa na poɔŋ. (Yel. 21:3, 4) A teɛretɔ ŋa maŋ vɛŋeŋ teŋ taa nimipa pampana ŋa. Azuŋ, te suuri ba iri te naŋ tuoro yelkpeɛne zuŋ. Ka teneeŋ wa tuoro daŋkyagre, kyɛbee ka te nɔŋna kaŋaŋ wa kpi, ka baaloŋ faa kaŋaŋ wa kpɛ te, kyɛbee yelkpeɛŋaa zaa teŋ tuoro, kyɛ te teɛretɔ na maŋ soŋ teŋ teŋ dire kannyiri. Ananso la wala? Ananso la ka, lɛ zaa zemmo naŋ e kpeɛŋaa pampana, kyɛ te baŋɛɛŋ ka a na bebeŋ “belaa” lɛ. A donpaalaa poɔŋ, a yelkpeɛne neŋ a yeltuo ŋa zaa koŋ lɛ bebe.—2 Kor. 4:17, 18.

14. Boŋ na baŋ soŋ te ka te taa sagediibu naŋ e kpeɛŋaa te teɛretɔ na eŋɛŋ?

¹⁴ Te teɛretɔ na na toɔ̃ soŋ teŋ ka te taa nimipa. Boŋ na baŋ soŋ te ka te maŋ teɛrɛ te teɛretɔ na yɛlɛ wagre zaa? Noba mine bebeŋ ba ba maŋ nyɛrɛ boma naŋ be tɔɔreŋ velaa. Azuŋ, ba maŋ eŋɛɛ nimi-kyaanaa a toɔ̃ nyɛraa velaa. Lɛ neŋ o zu la, aseŋ ka te maŋ ŋmaa foto a nyɛrɛ te menne Paradiisi poɔŋ. Ka te libi-yɛlɛŋ ba wa taa nimiri, te na baŋ ŋmaaɛ foto te teɛroŋ poɔŋ a nyɛ te menne a donpaalaa poɔŋ, a saŋa libie koŋ lɛ bebe, neɛzaa meŋ koŋ lɛ e nandaana. Ka te nuŋ ba wa kpɛ apoɔsoe mine te naŋ boɔrɔ, te na baŋ ŋmaaɛ foto te teɛroŋ poɔŋ, a nyɛ te naŋ pɛgeyi a de yuomo turi yaga a puore neŋ Jehoova. Ana saŋa na, apoɔsoe te naŋ taa zenɛ yɛlɛ koŋ lɛ fɛre. (1 Tim. 6:19) Te naŋ taa yelwonii yaga zuŋ, a na baŋ eɛ kpeɛŋaa ko te ka te maŋ teɛrɛ maaloo na teŋ na nyɛ nendaare kaŋa na yɛlɛ. Kyɛ, ka teneeŋ maŋ moɔrɔ a teɛrɛ maaloo na teŋ na nyɛ nendaare kaŋa na yɛlɛ gɛrɛ tɔɔre, a na wa minli teŋ, ka te maŋ teɛrɛ a yoŋ yɛlɛ.

15. Bo yɛlɛ hoŋ zanne yi yɛlɛ na Krista naŋ yeli na poɔŋ?

¹⁵ Te nyɛ lɛ na teɛretɔ naŋ soŋ te yɔɔpɔge Krista. Dennis te naŋ manne o yɛlɛ a zannoo ŋa poɔŋ na pɔge la Krista. Krista yeleeŋ ka: “N taaɛ baaloŋ kaŋa naŋ maŋ vɛŋ ka N eŋɛ zaa beɛrɛ, azuŋ, N koŋ baŋ kyɛŋ. Wagre zaa, N maŋ zeŋ la N gado bee N gbɛree kogo zuŋ. Bebiri zaa N eŋɛ maŋ ɔɔrɔ maŋ. N dɔkta yelko maŋ ka o ba teɛre ka N na nyɛɛ laafeɛ. Kyɛ maaŋ yɛŋ da teɛrɛɛŋ ka, ‘Teɛroŋ na maŋ taa kyaare nendaare kaŋa na naane oŋ taa.’ N de la N teɛroŋ eŋ N teɛretɔ na eŋɛŋ, azuŋ N maŋ taaɛ teɛroŋ yeni. Yelmeŋɛ la, N tuoree yelkpeɛne yaga a donɛɛ ŋa poɔŋ, kyɛ a donpaalaa poɔŋ N na taaɛ zeŋ laafeɛ meŋɛmeŋɛ!”

‘NOBA NAŊ ZOROO KOŊ KƆŊ BONZAA’

16. Bonso ka Naa Deevid da sɛge ka noba naŋ zoro Jehoova ‘koŋ kɔŋ bonzaa’?

¹⁶ Kristabie niŋe naŋ paale neŋ boma na oŋ taa naŋ na baŋ tuoree yelkpeɛne. Te na baŋ yeliŋ ka Naa Deevid biiri bata mine da kpieŋ. Noba da ŋmaaɛ yɛlɛ dɔgloo, a iruu tere, a lɛ karoo oŋ zo kpɛ moɔ. Saŋa na oŋ da tuoro a yelkpeɛne ŋa zaa na, o da yeleeŋ a kyaare Jehoova ka: ‘Noba naŋ zoroo koŋ kɔŋ bonzaa.’ (Yiem. 34:9, 10) Bonso oŋ yeli lɛ? Te naŋ e Jehoova puorebiiri zuŋ, a ba seŋ ka te teɛre ka te koŋ tuore yelkpeɛne zaa te zemmo poɔŋ, kyɛ te na baŋ taaɛ sagediibu ka te koŋ kɔŋ boma yɛlɛ naŋ fɛrɛ te. (Yiem. 145:16) Aŋa Deevid, te meŋ na baŋ taaɛ sagediibu ka Jehoova na soŋ teŋ ka te are te yelkpeɛne zaa noɔreŋ. Ɛɛ, lɛ zaa te zemmo naŋ waa, kyɛ te na baŋ taaɛ popeɛloŋ ane emmaaroŋ.

17. Bonso aŋ seŋ ka ho moɔ a taa nimipa gyogo?

¹⁷ Jehoova boɔrɔŋ ka ho vɛŋ ka boma na hoŋ taa na paale ho niŋe. (Yiem. 131:1, 2) Azuŋ, moɔrɔ ho moɔbo zaa ka ho taa a gyogo ŋa. Ka hooŋ taa bareka puoruu gyogo, a vɛŋ ka ho teɛroŋ gaŋ, ka ho naŋ kyɛnɛ sigri ho meŋɛ, a taa sagediibu naŋ e kpeɛŋaa ho teɛretɔ na eŋɛŋ, lɛ yɛŋ ho meŋ na baŋ de la nyaa a yelka: ‘Ɛɛ, N niŋe paalɛɛŋ.’—Yiem. 16:5, 6.