ZEMMO YƐLƐ
‘Jehoova La So A Zɔɔre’
JANUARY 28, 2010, N da be la France paaloŋ teŋkpɛŋ kaŋa naŋ veɛlɛ yaga zaa baŋ boɔlɔ Strasbourg. Kyɛ, N da ba wa ka N kaa lɛ a zie naŋ veɛlɛ. Jehoova Sieree Deme naŋ be France paaloŋ da tuoree yɛlɛ naŋ ba seŋ neŋ, azuŋ maaŋ neŋ N taaba mine meŋ naŋ e lɔɔyare da gaaɛ a European Court of Human Rights (ECHR) ka te gaa te yel yɛlɛ a deɛ te yɔɔmine na. A France paaloŋ gɔmenante da yeleeŋ ka Jehoova Sieree Deme di la zuyɔɔ sane naŋ ta Yurohi turituri lezaata neŋ anaare, kyɛbee Amɛrika dɔɔlare turituri lezaanaare neŋ awae. Kyɛ a yɛlɛ yelnimizeɛ meŋɛ la ka, ka teneeŋ vɛŋ ka a pɛle ka Jehoova puorebiiri ba e yelfaa zaa, a na vɛŋeŋ ka Jehoova yuori na pɛgeyi, ka o puorebiiri na taa yosoŋ, a lɛ ko ba apoɔsori ka ba puoro Jehoova emmaaroŋ poɔŋ. Yɛlɛ naŋ da e a sɛrɛɛ diibu zie na vɛŋɛɛŋ aŋ pɛle ka, ‘Jehoova la so a zɔɔre.’ (1 Saa. 17:47) Vɛŋ ka N wuli a muni.
Yuoni 1999 poɔŋ, a France gɔmenante da yeleeŋ ka, ka te yɔɔmine nuŋ wa kpɛ libie na noba naŋ maŋ iri tere ka ba de sonnɔ te puoruu toma na, ba ba maŋ de a mine yɔɔ ba zuyɔɔ. Ba da yeleeŋ ka te ba yɔɔ te zuyɔɔ a yi yuoni 1993 a te ta 1996 kpakyagaŋ. Te da de la a yɛlɛ gaaneŋ sɛrɛɛ diibu ziiri naŋ be a France paaloŋ, kyɛ a yɛlɛ da ba taa nimiri. Te da lɛ de la a yɛlɛ gaaneŋ sɛrɛɛ diibu zie kaŋa naŋ be a France paaloŋ, kyɛ ba meŋ da yeleeŋ ka te deme kyebe. Lɛ puoriŋ, a France gɔmenante da te iree libie naŋ pare yurohi turituri anaare neŋ kyɛlee, kyɛbee Amɛrika dɔɔlare turituri ayoɔbi neŋ turaata naŋ be a France bɛɛtil tomazie bank account poɔŋ. Pampana ŋa yɛŋ, a Yurope Sɛrɛɛ Diibu Zikpoŋ na yoŋ na baŋ soŋ te ka te leɛ nyɛ a libie ŋa. Kyɛ, sɛre ka a Sɛrɛɛ Diibu Zikpoŋ na di a yɛlɛ sɛrɛɛ na, ba da yeleeŋ ka te neŋ a France gɔmenante lɔɔyare, ane a Sɛrɛɛ Diibu Zikpoŋ gbɛbɔg-ara laŋ zeŋ a di dama a nyɛ ka yelwoŋtaa na baŋ waŋ bee.
Lɛ na yɛlɛ naŋ da gɛrɛ na zuŋ, te da nyɛɛŋ ka a Sɛrɛɛ Diibu Zikpoŋ gbɛbɔg-ara na yeliŋ ka, ka teneeŋ koŋ baŋ yɔɔ libie na zaa a France gɔmenante naŋ yelka te yɔɔ na, kyɛ te yɔɔ a libie fẽe ko ba. Kyɛ, te da baŋɛɛŋ ka ka teneeŋ yɔɔ ponpie gba ko a gɔmenante, Jehoova poɔ koŋ pɛle. Te yɔɔmine na iree a libie ka ba de sonnɔ Jehoova puoruu toma, azuŋ a ba seŋ ka te de a ko a gɔmenante ka ba di. (Mat. 22:21) Kyɛ, te naŋ taa gyeremɛ ko a Sɛrɛɛ Diibu Zikpoŋ sowuli na zuŋ, te da sagɛɛŋ a gaa a lammo ŋa.
Te lɔɔyare na la are a Yurope Sɛrɛɛ Diibu Zikpoŋ na, yuoni 2010
Te da eɛ a lammo a Sɛrɛɛ Diibu Zikpoŋ de-veɛlaa kaŋa poɔŋ. A lammo da ba piili soŋ. Saŋa na a Sɛrɛɛ Diibu Zikpoŋ gbɛbɔg-ara naŋ wa piili o yelyaga na, o da yeleeŋ ka ba kaarɛɛ soriŋ ka Jehoova Sieree Deme na yɔɔ la zuyɔɔ na a France gɔmenante naŋ ŋmaa dɔgle ba na fẽẽ. Beŋ la teŋ deɛ sooroo ka, “Ho baŋɛɛŋ ka pampana ŋa te ne bo naŋ yele yɛlɛ ŋa, a gɔmenante iree libie naŋ pare yurohi turituri anaare neŋ kyɛlee yi te bank account poɔŋ?”
O noɔre zaaŋ da mãã saŋa na teŋ wa yeli lɛ na. Saŋa na a France gɔmenante nembɛrɛ naŋ wa sage ka ba eɛ lɛ na, o da leɛrɛɛ teɛroŋ na oŋ da taa kyaare a sɛrɛɛ diibu yɛlɛ ŋa. O da nyarɛɛ a gɔmenante nembɛrɛ zuŋ, a yelka a lammo baarɛɛŋ lɛ. Te da nyɛɛŋ ka Jehoova tu la sori kaŋa te naŋ ba kaara soriŋ poɔŋ a leɛre a sɛrɛɛ diibu yɛlɛ ŋa, ka lɛ na vɛŋ ka te zɔɔtoɔ̃. Te nɔɛ zaaŋ da mãã, teŋ yi a lammozieŋ neŋ popeɛloŋ.
June 30, 2011, a Yurope Sɛrɛɛ Diibu Zikpoŋ na sɛreŋmaareba zaa da de la noɔreyeni a yelka yɛlɛ na a France gɔmenante naŋ e na ba tu sori. Ba da yeleeŋ ka a gɔmenante ba seŋ ka o deɛ ana zuyɔɔ na taa yire te zieŋ. A lɛ yelka ba leɛ yɔɔ libie na zaa baŋ iri yi te bank accounts poɔŋ na a dɔgle koɔ̃ ko te. A sɛrɛɛ diibu yɛlɛ ŋa vɛŋɛɛŋ ka Jehoova puorebiiri so ba menne a puoro Jehoova France paaloŋ. A soorebiri na teŋ soore na la da yuo a sori. Te da ba nare te menne ka te na soorɛɛ ana soorebiri na. Kyɛ, a soorebiri da waa ŋa kuurii na Deevid naŋ de ko Golaiyat na. Bonso teŋ zɔɔtoɔ̃? Jehoova sommo zuŋ la. Deevid da yelko la Golaiyat ka, ‘Jehoova la so a zɔɔre.’—1 Saa. 17:45-47.
A yɛlɛ ŋa yoŋ poɔŋ naane teŋ zɔɔtoɔ̃. Aneazaa ka gɔmenante nembɛrɛ ane puoruu wedeɛreba naŋ taa kpeɛ̃o maŋ iri zɔɔrɔ ne teŋ, kyɛ te toɔ̃ zɔɔtoɔ̃ la sɛrɛɛ diibu yɛlɛ naŋ ta 1,225 a yi paalonne naŋ ta 70 sɛrɛɛ diibu zi-bɛrɛŋ. A sɛrɛɛ diibu yɛlɛ ŋa teŋ zɔɔtoɔ̃ a poɔŋ na soŋɛɛŋ teŋ taa apoɔsori a puoro Jehoova, a tonɔ a naaŋ moɔloo toma, a ba derɛ te menne eŋnɛ paalonne tige yɛlɛ poɔŋ, a maŋ lɛ de bege na Jehoova naŋ biŋ a kyaare zĩĩ na tonɔ neŋ toma meŋ.
N da tonɛɛ toma Jehoova Sieree Deme Tomazikpɛŋ naŋ da be New York U.S.A. paaloŋ poɔŋ na, kyɛ boŋ da vɛŋ maŋ de N nu poɔ a sɛrɛɛ diibu yɛlɛ naŋ da be Yurope teŋɛ poɔŋ na?
N DƆGREBA NAŊ DA E MISINAAREHE LA DA GUOLI MA
N dɔgreba yoe da la George neŋ Lucille. Ba da baarɛɛ a Giiliyad sakuu naŋ tɔre 12 na. Ba da de baŋ gaaneŋ Ethiopia baŋ te tonɔ a naaŋ moɔloo toma. Beŋ baŋ da dɔge ma yuoni 1956. Ba da de la Filipi a dɛndɛŋ yuoŋ kɔɔ duori-ennɛ yuori na ko ma. (Tom. 21:8) Yuoni gbuli puoriŋ, a gɔmenante da de la o nu dɔgle te puoruu toma na zuŋ. Ana saŋa na N da naŋ vuuroŋ, kyɛ N teɛrɛɛ lɛ na N dɔgreba naŋ da maŋ sɔglɔ a puoro Jehoova. Maŋ da e bibile na zuŋ, lɛ eebo da noma korɔ maŋ. A yɛlɛ nembao zie la ka, a gɔmenante nembɛrɛ da kare teŋ teŋ yi a paaloŋ yuoni 1960.
Nathan H. Knorr (gɔɔ sɛŋ) la wa puore N booree deme saŋa na teŋ be Addis Ababa, Ethiopia paaloŋ, yuoni 1959
Te zaa da gaaɛ Wikyita, Kansas naŋ be U.S.A. paaloŋ. Kyɛ, N dɔgreba da naŋ taaɛ eŋnyagroŋ na baŋ da taa saŋa na baŋ da e misinaarehe na. Ba da de la a Baabole poɔ yɛlɛ tonɔ neŋ toma, a da soŋ maaŋ, N kpeɛma Judy, ane N yɔɔlee Leslie ka te neŋ Jehoova niiloŋ e kpeɛŋaa. Ethiopia baŋ dɔge te zaa. Saŋa na maŋ wa nyɛ yuomo 13 na maŋ de suobu. Yuomo ata mine puoriŋ, N neŋ N booree deme da gaaɛ Arekuupa teŋkpɛŋ naŋ be Peru paaloŋ ka te gaa te soŋ a naaŋ moɔloo toma.
Yuoni 1974, a Peru bɛɛtil tomazie da kaa iri maŋ neŋ te yɔɔdɔba banaare mine ka te e special paaneere. A saŋa N da nyɛɛ yuomo 18. Te da gaaɛ ziiri baŋ daaŋ ba moɔle a duorisoŋ zaa a te moɔle a duoro. Te da maŋ do la a Central Andes Tanne na. Te da maŋ moɔlɛɛ a duorisoŋ ko noba naŋ yele Kɛkyuwa neŋ Aymara kɔkɔɛ. Te da maŋ kpɛɛ lɔɔre kaŋa naŋ waa ŋa daga a gaa a ziiri ŋa. Azuŋ, noba da boɔlɛɛ a lɔɔre ŋa ka A Daga. N maŋ nɔŋeŋ ka N leɛteɛre lɛ na maŋ de a Baabole a soŋ a noba ŋa baŋ wa nyɛ ka Jehoova na iree naŋ, baaloŋ, ane kũũ a bare. (Yel. 21:3, 4) Noba yaga da sagede la a Naaloŋ duoro.
“A Daga,” yuoni 1974
BA DA DE MAŊ GAANEŊ TE TOMAZIKPƐŊ NA MAŊ TE TONƆ TOMA BEŊ
Yuoni 1977 poɔŋ, te yɔɔdɔɔ Albert Schroeder da waɛ Peru paaloŋ. O da eɛ a Lantaa Zukaareba kaŋa. O da eŋ maŋ faŋa ka N fiili Bɛɛtil fɔɔm a wa tonɔ toma te donɛɛ zaa tomazikpɛŋ naŋ. N da fiilɛɛ a fɔɔm. A da ba kɔɔre, June 17, 1977, ba da toŋboɔle maŋ ka N wa tonɔ toma Bɛɛtil naŋ be Brooklyn na. N deɛ yuomo anaare toŋ a Zie Meeloo toma, ane a Boma Maaloo tomazie.
Te kultaa bebiri, yuoni 1979
June 1978 poɔŋ, N da pɔgɛɛ Elizabeth Avallone a paalonne lammokpɛŋ na baŋ da e New Orleans naŋ be Louisiana teŋkpɛŋ na. O meŋ dɔgreba da nɔŋɛɛ a yelmeŋɛ. Elizabeth da de la yuomo anaare toŋ a regular paaneɛ toma. O da boɔrɔŋ ka o de o nyɔvore zemmo zaa tonɔ a wagre zaa naaŋ moɔloo toma. N ne o da maŋ diree dama wagre zaa, azuŋ a da ba kɔɔre kyɛ teŋ piili boɔrɔ taa. October 20, 1979 teŋ kultaa oŋ wa poɔ N eŋɛŋ teŋ tonɔ a Bɛɛtil toma.
Te yɔɔmine naŋ da be te dɛndɛŋ lantaapuoruu na baŋ boɔlɔ Brooklyn Spanish da wulo teŋ nɔmmo yaga. A yuomo ŋa zaa poɔŋ, te yɔɔmine naŋ be lantaapuoree naŋ ta ata meŋ da deɛ teŋ neŋ saannoŋ, a lɛ sonnɔ te teŋ tonɔ te Bɛɛtil toma na velaa. Te niŋe paalɛɛ lɛ na baŋ soŋ te na, ane lɛ na te zɔmenne ane te booree deme naŋ soŋ te teŋ kaa te dɔgreba zu saŋa na baŋ wa leɛ neŋnyaane na.
Bɛɛtil tontonneba naŋ da be a Brooklyn Spanish Lantaapuoruu na, yuoni 1986
N DA PIILI TONƐƐ A LEGAL TOMAZIE NA
N noɔre zaaŋ da mãã saŋa na baŋ da kaa iri ma January 1982 ka N tonɔ a Legal Tomazie naŋ be Bɛɛtiliŋ na. Yuomo ata mine puoriŋ ba da yeleeŋ ka N gaa lɔɔ sakuu a wa leɛ lɔɔya naŋ taa gama. N gama zannoo na da soŋ maŋ maŋ wa nyɛ ka bege na mine a United States paaloŋ ane paalonne mine naŋ taa na eɛ yɛlɛ Jehoova Sieree Deme naŋ soŋ a vɛŋ baŋ biŋ ana bege na. Lɛ vɛŋɛɛŋ ka noba naŋ be a paalonne ŋa so ba menne. Te da zannɛɛ a yɛlɛ ŋa gaa tɔɔre sakuu poɔŋ.
Yuoni 1986, N da nyɛɛ yuomo 30. A saŋa baŋ da iri ma ka N e a Legal Tomazie zukaara. N eŋɛ zaaŋ da mãã a Bɛɛtil zukaareba naŋ sage ma di seŋ lɛ. Kyɛ, dabeɛ̃ da lɛ kpɛ maŋ yaga bonso N da ba baŋ yɛlɛ yaga nimiri. N da baŋɛɛŋ ka a toma meŋ koŋ e mɔlɔ fẽẽ zaa.
Yuoni 1988 N da baarɛɛ a sakuu a leɛ lɔɔya. Kyɛ, N da ba baŋ lɛ na a sakuu naŋ nyɛ kpeɛ̃o N neŋ Jehoova niiloŋ na eŋɛŋ aseŋ. Ka neɛŋ gaa sakuu gaa nimitɔɔre, a na baŋ vɛŋeŋ ka o soba piili zɛgrɛ o meŋɛ, kyɛbee ka o soba piili teɛrɛ ka bammo na oŋ taa na vɛŋɛɛŋ oŋ e neŋtegroŋ gaŋ o taaba. N pɔge Elizabeth da soŋ maŋ yaga. O da soŋ maŋ maŋ leɛ erɛ yɛlɛ na maŋ da erɛ ka N neŋ Jehoova niiloŋ e kpeɛŋaa sɛre kyɛ maŋ gaa a sakuu na. A da de la wagre, kyɛ fẽẽfẽẽ fẽẽfẽẽ N neŋ Jehoova niiloŋ na wa leɛ eɛ kpeɛŋaa. N na baŋ di la sieree ka, ka neɛŋ taa bammo a pa zu, kyɛ a ba e yɛlɛ naŋ e tegroŋ yaga o soba zemmo poɔŋ. Kyɛ, neɛ naŋ taa nɔmmo naŋ e zuluŋ ko Jehoova, a lɛ taa nɔmmo ko o yɔɔmine meŋ la na taa zeŋ laafeɛ.
TE DA MOƆRƆŊ KA TE TU BEGE SORI A NYƐ APOƆSORI TONƆ A DUORISOŊ MOƆLOO TOMA
Saŋa na maŋ wa baare a sakuu na, N da leɛ moɔrɛɛ N moɔbo zaa ka N nare a legal tomazie yeltaree velaa zaa Bɛɛtiliŋ, a lɛ soŋ ka Jehoova Sieree Deme toɔ̃ tonɔ ba puoruu toma na. A toma da noma korɔ maŋ a lɛ e kpeɛŋaa meŋ, bonso yɛlɛ yaga da leɛrɛŋ Jehoova lantaapuoruu na poɔŋ. Aŋa mannoo poɔŋ, saŋa kaŋa naŋ pare ka teneeŋ wa de gane ko neɛ kaŋa, te da maŋ yeliŋ ka o soba yɔɔ bonkaŋa fẽẽ. Kyɛ a piili yuoni 1990, ba da ko la a Legal Tomazie sowuli ka ba nare yɛlɛ a kyaare lɛ na teŋ na toɔ̃ e a bare lɛ eebo. Azuŋ, Jehoova Sieree Deme maŋ derɛɛ ba gama korɔ noba zaala zaala. A leɛroo ŋa da ŋmaaɛ toma naŋ be Bɛɛtiliŋ na bare, ka a naaŋ moɔloo toma meŋ nyɛrɛ nimitɔɔre gaabo. A naŋ wa ta zenɛ ŋa, a sowuli ŋa zuŋ, neɛzaa koŋ baŋ yelka te yɔɔ zuyɔɔ te naŋ de gama tɔrɔ korɔ noba zuŋ. Noba mine da teɛrɛɛŋ ka a leɛroo ŋa na vɛŋeŋ ka te koŋ lɛ nyɛrɛ libie yaga, azuŋ te koŋ lɛ printerɛ gama a de wulo noba Jehoova yɛlɛ. Kyɛ, lɛ naaneŋ da e. A yi yuoni 1990 a wa ta zenɛ ŋa, noba yaga wa leɛ la Jehoova puorebiiri. Te naŋ derɛɛ te gama meŋ tɔrɔ korɔ noba zaala baŋ de zanna Jehoova yɛlɛ. Maaŋ meŋɛ nyɛɛŋ ka Jehoova la maŋ ko a gbaŋgba bi-velaa sowuli, a lɛ eŋ ba faŋa baŋ de a sowuli tonɔ neŋ toma. Jehoova sommo la vɛŋ ka leɛroo zaa baŋ maŋ waneŋ Jehoova lantaapuoruu poɔŋ maŋ toɔ̃ kyɛŋ te baare soŋ zaa.—Yiib. 15:2; Mat. 24:45.
Te naŋ taa lɔɔyare naŋ kyille zuŋ naane teŋ maŋ zɔɔtoɔ̃ a sɛrɛɛ diibu zieŋ. Gbɛɛ yaga, gyog-sonne na Jehoova puorebiiri naŋ taa na la maŋ tɔ a sɛreŋmaareba neŋ a gɔmenante nembɛrɛ sukyie. A yɛlɛ ŋa taa da eɛŋ yuoni 1998. A Lantaa Zukaareba bata neŋ ba pɔgeba da gaaɛ lammobɛrɛ mine naŋ e a yoŋ Cuba paaloŋ. Lɛ na baŋ da e bɔin a wulo noba gyeremɛ na da vɛŋɛɛŋ ka a paaloŋ gɔmenante nembɛrɛ nyɛ ka ba ba derɛ ba menne eŋnɛ politics yɛlɛ poɔŋ. A sieree ŋa da eɛ tegroŋ gaŋ yelzaa te naŋ yelko ba te ne ba lammore zaa poɔŋ.
Kyɛ, ka teneeŋ koŋ baŋ tu yelwoŋtaa eŋɛŋ a sɛgre daŋkyagre yɛŋ, te maŋ gaaɛ sɛrɛɛ diibu zie, a te moɔrɔ ka te tu bege soriŋ a nyɛ apoɔsori a tonɔ te puoruu toma na. (Fil. 1:7) Aŋa mannoo poɔŋ, Yurope tenne mine poɔŋ ane South Korea paaloŋ, ba biŋee bege ka ka neɛŋ wa ta yuomo mine aseŋ ka o toŋ sogya toma ko a paaloŋ. Kyɛ, te yɔɔmine maŋ zagreŋ ka ba toŋ a sogya toma ŋa. Azuŋ ba maŋ yeliŋ ka ba ko ba toŋyuo ka ba toŋ. Kyɛ, a paalonne ŋa nembɛrɛ da ba sagra. Azuŋ, ba nyɔgɛɛ te yɔɔmine naŋ ta ŋa 18,000 naŋ be Yurope ane te yɔɔmine naŋ pare 19,000 a be South Korea paaloŋ te eŋ nempɔgedieŋ a yɛlɛ ŋa zuŋ.
A baaraa zaa, July 7, 2011, a Yurope Sɛrɛɛ Diibu Zikpoŋ na da ŋmaaɛ sɛrɛɛ a kyaare a yɛlɛ ŋa. A yɛlɛ da kyaarɛɛ Bayatyan Neŋ Armenia paaloŋ gɔmenante. A sɛrɛɛ diibu zie da yeleeŋ ka, paalonne naŋ be Yurope na baŋ de la toŋyuo ko noba zoma naŋ dɔɔnɔ ba ka ba toŋ sogya toma ko ba paaloŋ. A sɛrɛɛ ŋa neŋ o zu ka a South Korea paaloŋ Constitutional Court da di June 28, 2018. Ka te yɔɔmine naŋ e baapaalba na fẽẽ lɛ da de ba menne eŋ politics yɛlɛ poɔŋ, a da naŋ eɛ kpeɛŋaa ka te zɔɔtoɔ̃ a yɛlɛ ŋa poɔŋ.
A legal tomazie naŋ be te donɛɛ zaa tomazikpɛŋ ane a legal tomaziiri naŋ be a donɛɛ lombori zaa tonɛɛ tonkpeɛne ka ba soŋ ka te taa apoɔsori a puoro Jehoova, a kyɛ lɛ moɔlɔ a duorisoŋ meŋ. Ka gɔmenante kaŋaŋ wa iri zɔɔrɔ neŋ te yɔɔmine, te maŋ nyɛŋ ka a eɛ apoɔsori ko te ka te are ba gbɛbɔgriŋ a yeli deɛ ba. Ka teneeŋ wa zɔɔtoɔ̃ a sɛrɛɛ diibu zie, kyɛbee ka teneeŋ ba wa zɔɔtoɔ̃, kyɛ a sɛrɛɛ diibu yɛlɛ maŋ yuo la sori ko te teŋ manne Jehoova yɛlɛ ko paaloŋ kaareba, namine ane a paalonne noba. (Mat. 10:18) Sɛreŋmaareba, gɔmenante gbɛbɔg-areba, ane duori-enneba maŋ kannɛɛ Baabole sɛgre na teŋ maŋ de poɔ yɛlɛ na teŋ maŋ sɛge ko a sɛrɛɛ diibu zie na, a kyɛ lɛ manne a yɛlɛ baŋ woŋ na. Sukyiri sonne deme maŋ wa baŋɛɛ noba na Jehoova Sieree Deme naŋ sereŋ waa, ane zie na baŋ maŋ iri ba sagediibu yɛlɛ a yi. Ba mine wa leɛ la Jehoova Sieree Deme.
N PUOREE JEHOOVA BAREKA!
A yuomo 40 ŋa zaa naŋ wa pare na poɔŋ, N nyɛɛ apoɔsori ka N neŋ te Bɛɛtil tomaziiri naŋ be a donɛɛ lombori zaa laŋ toŋ sɛrɛɛ diibu toma. N nyɛɛ apoɔsori a gaa sɛrɛɛ diibu zi-bɛrɛ, a lɛ are neŋtegrɛ yaga nimitɔɔreŋ a manne yɛlɛ ko ba. N nɔŋɛɛ N yɔɔmine naŋ tonɔ a Legal Tomazie naŋ be te donɛɛ zaa toma zikpɛŋ na, ane bana na zaa naŋ tonɔ a legal tomaziiri naŋ be a donɛɛ lombori zaa na. N nyɛɛ maaloo neŋ popeɛloŋ yaga zaa N zemmo poɔŋ.
A yi a yuomo 45 ŋa zaa naŋ pare na poɔŋ, N pɔge Elizabeth yi la nɔmmo neŋ yelmennoŋ poɔŋ a sonnɔ ma yelsonne neŋ yelkpeɛne poɔŋ. N nɔmooŋ yaga zaa o naŋ sonnɔ ma lɛ bonso, o taaɛ baaloŋ kaŋa naŋ maŋ vɛŋ oŋ bale wieoŋ.
Maaŋ neŋ N pɔge wa nyɛɛŋ ka, te menne yelbaŋ naaneŋ maŋ vɛŋ teŋ taa faŋa, kyɛbee a zɔɔtoɔ̃. Yɛlɛ na Deevid naŋ yeli na eɛ yelmeŋɛ, ‘Jehoova la o noba faŋa.’ (Yiem. 28:8) Ɛɛ, ‘Jehoova la so a zɔɔre.’