Bo Yɛlɛ Ka A Baabole Yelkyaare Zɔɔ-Bɛrɛ Ba Naŋ Maŋ Lɔɔrɔ Bɔmbi-bɛrɛ?

Dabeɛ̃ kpɛ la neɛzaa baŋ teɛrɛ ka zɔɔ-bɛrɛ baŋ maŋ lɔɔrɔ bɔmbi-bɛrɛ na baŋ iriŋ a donɛɛ lombori zaa, bonso a donɛɛ namine maalɛɛ bɔmbi-bɛrɛ yaga baŋ na baŋ de sãã saammo. Noba zoree dabeɛ̃ ka ka a bɔmbi-bɛrɛ ŋaŋ erɛ yaga, lɛ na baŋ vɛŋeŋ ka zɔɔre ba naŋ maŋ lɔɔrɔ bɔmbi-bɛrɛ baŋ iri mɔlɔ lɛ. Noba yaga zoree dabeɛ̃ ka ka ba naŋ lɔɔ bɔmbi-bile bonyeni gba kyɛ ana baŋ vɛŋeŋ ka zɔɔre le ka ba lɔɔrɔ bɔmbi-bɛrɛ naŋ na sãã a donɛɛ zaa. Te be la donɛɛ kaŋaŋ ka “zɔɔ-bɛrɛ ba naŋ maŋ lɔɔrɔ bɔmbi-bɛrɛ na baŋ iri” lɛ ka Bulletin of the Atomic Scientists yeli.

Ka lɛ zɔɔ-bɛrɛ ba naŋ maŋ lɔɔrɔ bɔmbi-bɛrɛ na baŋ iriŋ bee? Ka lɛŋ wa e, a donɛɛ ŋa na sããŋeŋ bee? Boŋ na baŋ soŋ te ka te ta zoro dabeɛ̃ a kyaare zɔɔre ba naŋ maŋ lɔɔrɔ bɔmbi-bɛrɛ na yɛlɛ? Wala ka a Baabole yelkyaare a yɛlɛ ŋa?

A yi a zannoo yɛlɛ ŋa poɔŋ

A Baabole daŋ yelee zɔɔre ba naŋ maŋ lɔɔrɔ bɔmbi-bɛrɛ yɛlɛ bee?

A Baabole ba yeli zɔɔre ba naŋ maŋ lɔɔrɔ bɔmbi-bɛrɛ yɛlɛ. Kyɛ, nensaaleba gyogri aneŋ yɛlɛ na a Baabole naŋ yel biŋ la vɛŋ ka noba zoro dabeɛ̃ ka zɔɔre ba naŋ maŋ lɔɔrɔ bɔmbere na baŋ iriŋ.

De yɛlɛ naŋ erɛ zenɛ ŋa na manne neŋ a Baabole sɛgre ŋa naŋ tutu taa na:

Baabole sɛgre: Yezu potuuribo da soorooŋ ka: “Bo yel la na wuli ka ho leɛ waabo ane a donɛɛ baaroo taɛ la?” Yezu da yelko baŋ ka: “Paaloŋ na maŋ iri zɔɔrɔ neŋ la o tɔ paaloŋ, ka namine meŋ iri zɔɔrɔ neŋ taa.”—Matio 24:3, 7.

Yɛlɛ naŋ erɛ a donɛɛ poɔŋ: Paalonne naŋ na baŋ maale bɔmbi-bɛrɛ maŋ iri zɔɔrɔ neŋ la taa neŋ marefare aneŋ bɔmbi-bilii.

“Zɔɔzɔɔ yɛlɛ nyɛrɛɛ nimitɔɔre gaabo yaga a gaŋ saŋa zaa naŋ pare: yelpeɛre wuleeŋ ka zɔɔzɔɔ yɛlɛ do la saa yaga.”—The Armed Conflict Location & Event Data Project.

Baabole sɛgre: “A baaraa saŋa, a samun-duri sɛŋ naa na ne [a samun-gɔɔ sɛŋ naa] na zɔɔrɔŋ.”—Daaniel 11:40.

Yɛlɛ naŋ erɛ a donɛɛ poɔŋ: Paalonne mine ane noba naŋ are ba puoriŋ na maŋ mɔɔrɔŋ ka ba deɛ a donɛɛ naaŋ diibu kpeɛ̃o aŋa lɛ na a Baabole naŋ yel na. Aneazaa ka paalonne naŋ taa bɔmbi-bɛrɛ ba iri zɔɔrɔ ne taa kyɛ ba maŋ mɔɔrɔŋ ka ba maale bɔmbi-bɛrɛ yaga a poɔ a na na baŋ taa na poɔŋ.

“Yuomo pie naŋ pare, paalonne iri zɔɔrɔ neŋ la taa, ka paalonne naŋ taa naaŋ diibu kpeɛ̃o are ba puoriŋ.”—The Uppsala Conflict Data Program.

Baabole sɛgre: “A bebi-baaree saŋa, zie na maaleŋ eɛ kpeɛŋaa yaga zaa. Nensaaleba na eɛ . . . ho ne ba koŋ baŋ laŋnoɔre, yosaaneba, ba koŋ nyɔgrɔ ba menne, nimikuonii deme.”—2 Timoti 3:1-3.

Yɛlɛ naŋ erɛ a donɛɛ poɔŋ: Zenɛ ŋa lɛ na noba naŋ koŋ baŋ laŋnoɔre na, lɛ la ka a donɛɛ wederebɛ meŋ waa. Aŋ da seŋ ka ba maŋ yi emmaaroŋ poɔŋ a sɛgre nɔkpeɛne na, ba maŋ tu la kpaŋkpaŋkpeɛ̃o soriŋ a kyɛ e lɛ. A yɛlɛ ama na baŋ vɛŋeŋ ka zɔɔre ba naŋ maŋ lɔɔrɔ bɔmbi-bɛrɛ le.

“Ka ba naŋ ba bɔ sori baŋ na baŋ tu ka ba neŋ ba taaba maŋ erɛ yɛlɛ emmaaroŋ poɔŋ, lɛ yɛŋ zɔɔ-bɛrɛ na maŋ bebeŋ wagre zaa.”—S. Saran ane J. Harman, World Economic Forum.

Naaŋmen na terɛɛ sori ka zɔɔre ba naŋ maŋ lɔɔrɔ bɔmbi-bɛrɛ iri bee?

A Baabole ba yel lɛ. O yeleeŋ ka “dabeɛ̃ yɛlɛ,” kyɛbee yelseɛlɛ na erɛŋ a bebi-baaree saŋa. (Luka 21:11) Aŋa mannoo poɔŋ, ba lɔɔ la bɔmbi-bɛrɛ a Donɛɛ Zaa Zɔɔre Ayi Soba naŋ. A Baabole wulee ananso Naaŋmen naŋ tere sori ka zɔɔre bebe. Ka hooŋ boɔrɔ ka ho zanne yelyaga poɔ kaa a vidio ŋa, Bonso Ka Naaŋmen Tere Sori Teŋ Dire Dɔgɛɛ?

Ka lɛ a teŋgane ŋa na sããŋeŋ bee?

Ai. Ka nobaŋ lɔɔrɔ bɔmbi-bɛrɛ gba, kyɛ Naaŋmen daaŋ koŋ tere sori ka nensaaleba sãã a donɛɛ ŋa. A Baabole yeleeŋ ka, a teŋgane ŋa daaŋ koŋ sãã zaa, kyɛ nensaaleba na kpeɛrɛɛ o poɔŋ a gɛrɛ tegitegilɛ.

“A teŋgane na bebeŋ a gɛrɛ wagre naŋ ba taa baaroo.”—Ikilisiasitiz 1:4.

“Naaŋmen, Onaŋ maale teŋgane, . . . ba maaloo kpali, o maalooŋ ka ba kpeɛrɛ o poɔŋ.”—Aizeeya 45:18.

Noba mine maŋ teɛreŋ ka nendaarekaŋa, ba na lɔɔ la bɔmbi-bɛrɛ naŋ na sãã a teŋsare zaa, ka neŋ-fẽẽ mine yoŋ kyɛre ka zemmo meŋ e kpeɛŋaa ko ba. Kyɛ, a Baabole yeleeŋ ka saammo na zaa zɔɔre naŋ de waneŋ a teŋsare zu na, Naaŋmen na leɛ sɛgrɛɛ a zaa.

“A wɛgyɛŋ ane teŋkuoŋaa na nyagnaŋ, ka teŋgane biiree naŋ bebe yaga zaa taa popeɛloŋ a bɔre aŋa dapuuri.”—Aizeeya 35:1.

Noba la laŋ tonɔ toma neŋ popeɛloŋ paradiisi poɔŋ a donɛɛ ŋa zuŋ. — Naaŋmen boɔrɔŋ ka te taa popeɛloŋ a kyɛ kpeɛrɛ a tendaa zu naŋ na veɛlɛ yaga zaa na

Neɛ na naŋ maale te na maalɛɛ a teŋgane ka o maŋ toɔ̃ sɛgre yɛlɛ naŋ sãã na o meŋɛŋ. Te baŋɛɛŋ ka Naaŋmen na de la o kpeɛ̃o na a leɛ sɛgre a teŋgane ka o veɛlɛ yaga zaa; a teŋgane na be la be tegitegilɛ ka nensaaleba kpeɛrɛ beŋ.—Yieme 37:11, 29; Yel-iriwulaa 21:5.

Boŋ na baŋ soŋ bo ka ho ta zoro dabeɛ̃ a kyaare “zɔɔre ba naŋ maŋ lɔɔrɔ bɔmbi-bɛrɛ” na yɛlɛ?

Aminekaŋaŋ noba mine na zoree dabeɛ̃ a kyaare “zɔɔre ba naŋ maŋ lɔɔrɔ bɔmbi-bɛrɛ” na yɛlɛ; lɛ wuleeŋ ka ba maŋ “zoree dabeɛ̃ a kyaare yelfaare naŋ na yi a poɔŋ wa na yɛlɛ.” A Baabole nɔ-ennee aneŋ kawane na baŋ soŋ la noba na a yɛlɛ ŋa naŋ pɔge na ka ba dabeɛ̃ na kyɛlee ŋmaa bare. Sobuoŋ?

A Baabole yeleeŋ ka nendaarekaŋa naŋ soma yaga bebeŋ a ko a teŋgane aneŋ noba naŋ na kpeɛrɛ o poɔŋ na. Ka te naŋ zanne a tamaa ŋa “naŋ nyɔge te nyɔvoɛ taa” na yɛlɛ, a na vɛŋeŋ ka te dabeɛ̃ ŋmaa bare. (Hiburu 6:19) Te dabeɛ̃ na na baŋ ŋmaa bareŋ ka te naŋ ba de te teɛroŋ eŋ yelfaare naŋ erɛ zenɛ ŋa aneŋ yelfaare naŋ na e nendaarekaŋa na yɛlɛ. Aŋa lɛ Yezu naŋ yel na, “bebiri zaa maŋ taaɛ o yelwonii.”—Matio 6:34.

A e la nimizeɛ ka te zaa kaara te menne soŋ, ka lɛ soŋ te ka te maŋ teɛrɛ yɛlɛ soŋ kyɛ e bɔin meŋ. Ka teneeŋ boɔrɔ ka te e lɛ, a ba seŋ ka te maŋ kyɛllɛ bee a kaara duoro naŋ taa ana zɔɔ-bɛrɛ ŋa yɛlɛ, a na baŋ vɛŋeŋ ka dabeɛ̃ kpɛ te. A lɛ ba wuli ka te maŋ erɛ te yɛlɛ aŋa yelzaa naŋ ba erɛ. Kyɛ, te erɛ yɛlɛ naŋ na soŋ te ka te ta kyerɛ te menne yɛlɛ teŋ koŋ baŋ e leɛroo zaa a poɔŋ.

“Karikaruu aŋ be neɛ sukyiriŋ maŋ vɛmeŋ ka o eŋɛ kyoɔre yaga, kyɛ yelbi-sonne maŋ vɛmeŋ oŋ taa popɛle.”—Yeng Yelibie 12:25.

Ta maŋ kaara duore faare kyɛbee a teɛrɛ a yɛlɛ, kyɛ maŋ de ho teɛroŋ eŋ yelsonne naŋ e ho zemmo poɔŋ na yɛlɛ.

“Ka a teɛretɔroo Naaŋmen paale yɛ ne popeɛloŋ ane emmaaroŋ a yɛ yeldeebo poɔ.”—Urom 15:13.

Collage: Dɔɔ kaŋa la de nyaa kaara o nimitɔɔre. 1. Kyɛ ka zɔɔzɔɔ boma, zɔɔzɔɔ plane, bɔmbi-bɛrɛ ane uuruŋ naŋ iri a yi bɔmbere ba naŋ lɔɔ la be o puoriŋ. 2. O nimitɔɔre, teŋgane kaŋa bebe a veɛlɛ ka emmaaroŋ bebe, ka tanne, mɔ-veɛle, koɔ̃nɛɛ naŋ puoro ane nuulee zaa bebe. — A Baabole korɔ teŋ tamaa a kyaare nendaarekaŋa naŋ soma yaga zaa

Ka teneeŋ zanne Naaŋmen nɔɛ na oŋ eŋ a kyaare nendaarekaŋa na yɛlɛ, a na vɛŋeŋ ka te taa tamaa, popeɛloŋ ane emmaaroŋ meŋɛmeŋɛ.

A Baabole daŋyel biŋeeŋ ka Hammagedon zɔɔre na ba na lɔɔ la bɔmbi-bɛrɛ bee?

Noba mine maŋ teɛreŋ ka Hammagedon e la zɔɔre kaŋa baŋ na lɔɔrɔ bɔmbi-bɛrɛ a donɛɛ lombori zaa. Yelfaare na, a na bɔmbi-bɛrɛ ŋa naŋ na baŋ de waneŋ na zuŋ a vɛŋɛɛŋ ka noba yaga zoro dabeɛ̃ yaga zaa.

A Baabole de la a yelbiri “Hammagedon” toŋ neŋ toma a wulo zɔɔre naŋ na iri Naaŋmen ane “a namine naŋ be a tendaa zaa zu ziiri,” kyɛbee O neŋ nensaaleba naalonne kpakyagaŋ.a (Yel-iriwulaa 16:14, 16) Hammagedon zɔɔre na yɛŋ koŋ sãã boma aŋa lɛ na bɔmbi-bɛrɛ ba naŋ maŋ lɔɔ naŋ maŋ sãã boma lɛ na. Kyɛ, a Hammagedon zɔɔre na poɔŋ, Naaŋmen na sãã la neŋfaare yoŋ, ka lɛ vɛŋ ka emmaaroŋ ane gomeŋɛ bebe meŋɛmeŋɛ a teŋɛ zuŋ.—Yieme 37:9, 10; Aizeeya 32:17, 18; Matio 6:10.

Wala ka a Baabole yelkyaare yɛlɛ naŋ na vɛŋ ka zɔɔre baare?

“O na vɛmeŋ ka zɔɔre baare a tendaa lombori zaa. O na kɔɔrɛɛ ba tama ane ba kpama zaa; O na nyege la ba zɔɔre torikori zaa neŋ vũũ.”—Yieme 46:9.

Jehoovab Naaŋmen na wulee o kpeɛ̃o a paalonne zuŋ, a vɛŋ ka ba zɔɔre na baare kyɛ ka o sãã ba zɔɔzɔɔ boma na zaa. O na de la o sazu Naaloŋ na a wa leɛre a donɛɛ gɔmenantere na gbɛbɔgriŋ, a kaara a tendaa zaa zu.—Daaniel 2:44.

Naaŋmen Naaloŋ na na wulee noba lɛ baŋ na laŋ kpeɛrɛ neŋ emmaaroŋ ane noɔreyeni. Paalonne koŋ la taa nɔkpeɛne ba kpakyagaŋ bonso Naaŋmen naaloŋ na yoŋ na wa bebe; neɛzaa daŋ koŋ la zanne zɔɔre meŋ! (Maika 4:1-3) Ka lɛŋ wa e “ba kaŋa zaa na maŋ zeŋ la o waiŋ teɛ ane o kaŋkaŋ teɛ pareŋ, neɛzaa koŋ vɛŋ ka dabeɛ̃ kpɛ ba.”—Maika 4:4.

a Kanne a zannoo yɛlɛ ŋa “What Is the Battle of Armageddon?” (“Boŋ La Hammagedon Zɔɔre Na?”)

b Naaŋmen yuori meŋɛ la Jehoova. (Yieme 83:18) Kanne a zannoo yɛlɛ ŋa “Who Is Jehovah?” (“Aŋ La Jehoova?”)

A Yel-iriwulaa gane na yelee zɔɔre ba naŋ maŋ lɔɔrɔ bɔmbi-bɛrɛ yɛlɛ bee?

Noba mine maŋ teɛreŋ ka, a Yel-iriwulaa gane na yelee saammo na zɔɔre ba naŋ maŋ lɔɔrɔ bɔmbi-bɛrɛ na maŋ de waneŋ na yɛlɛ. (Yel-iriwulaa 6:14; 8:7-12; 16:1-21) Aŋa mannoo poɔŋ, o mannɛɛ lɛ o naŋ “erɛ ka vũũ yire sazu sigre waana a teŋɛzu.” (Yel-iriwulaa 13:11-13) Jehoova Sieree Deme woŋee a yɛlɛ pare ka, a ba are ko zɔɔre ba naŋ lɔɔrɔ bɔmbi-bɛrɛ bɛrɛ, kyɛ a are ko la zɔɔre na baŋ da lɔɔrɔ bɔmbi-bilii a Donɛɛ Zaa Zɔɔre Ayi Soba na poɔŋ.

Aneazaa ka a Yel-iriwulaa gane yelee a zɔɔrɔ yɛlɛ ka a na waŋ, kyɛ o ba wuli lɛ aŋ na waneŋ saammo ane dɔgɛɛ a seŋ. Ka hooŋ wa kanna a Yel-iriwulaa gane na, teɛre a yɛlɛ ŋa:

Kyɛ ba sɛgoo ka noba naŋ kannoo a woŋ a yɛlɛ muni a de tonɔ neŋ toma na taa popeɛloŋ.—Yel-iriwulaa 1:3.

Ka hooŋ boɔrɔ ka ho nyɛ yɛlɛ yaga poɔ, kanne a zannoo yelzu ŋa, “The Book of Revelation—What Does It Mean?” (“A Yel-iriwulaa Gane—Bo Yɛlɛ La Be O Poɔŋ?”)