Noba Yaga Naŋ Be A Donɛɛ Lombori Zaa Teɛrɛɛŋ Ka Ba Eɛ Ba Yoŋ​—⁠Bo Yɛlɛŋ Na Baŋ Soŋ Ba?

• “Ka hooŋ po baapaalba naŋ be United States paaloŋ ziiri ayi, ba poɔ ziyeni yeleeŋ ka ba maŋ teɛreŋ ka ba eɛ ba yoŋ. Baapaalba naŋ be yuomo 18 neŋ 25 kpakyagaŋ la maŋ taa ana teɛroŋ na yaga zaa.”​—Our Epidemic of Loneliness and Isolation: The U.S. Surgeon General’s Advisory on the Healing Effects of Social Connection and Community, 2023.

• “A World Health Organization tomazie na noba yeleeŋ ka, ba kaa iree noba mine a ko ba toma ka ba peɛre yɛlɛ a nyɛ lɛ baapaalba naŋ teɛre ka ba eɛ ba yoŋ laafeeloŋ yɛlɛ naŋ waa. Ba lɛ ko la a noba ŋa meŋ toma ka ba eŋ noba naŋ teɛre ka ba eɛ ba yoŋ faŋa ka ba moɔ a vɛŋ ka niiloŋ naŋ be ba neŋ ba taaba kpakyagaŋ na e kpeɛŋaa. Toŋ nimizeɛ na kaŋa baŋ lɛ de eŋ ba nuuriŋ la ka ba bɔ soe na baŋ na toɔ̃ soŋ noba naŋ teɛre ka ba eɛ ba yoŋ a be paalonne zaa poɔŋ, haali ka a paaloŋ ba taa libie yaga.”​—World Health Organization, November 15, 2023.

A Baabole taaɛ kawaŋ-sonne naŋ na baŋ soŋ te ka te neŋ te taaba taa niiloŋ naŋ e kpeɛŋaa, ka lɛ vɛŋ ka te ta teɛre ka te eɛ te yoŋ.

Baabole sowuli naŋ na baŋ soŋ bo

Ŋmaa yɛlɛ na mine ho yoŋ naŋ maŋ erɛ na bare. A yɛlɛ ŋa mine na baŋ eɛ lɛ na hoŋ maŋ de intanɛt dama diibu ziiri tonɔ neŋ toma na. Kyɛ, maŋ boɔrɔ soe hoŋ na baŋ tu ka ho neŋ noba dire dama, lɛ eebo na baŋ soŋ boŋ ka ho nyɛ zɔmeŋ sonne.

• Baabole kawane: “Zɔmeŋ soŋ maŋ wulee nɔmmo wagre zaa O maŋ eɛ yɔɔ ba naŋ dɔge dɔgɛɛ daare zuŋ.”​—Yeng Yelibie 17:17.

Maŋ boɔrɔ soe hoŋ na baŋ tu a sonnɔ ho taaba. Ka teneeŋ wa erɛ yelsonne a sonnɔ te taaba, a maŋ vɛŋeŋ ka te ne ba niiloŋ na e kpeɛŋaa, a lɛ vɛŋ teŋ taa popeɛloŋ meŋ.

• Baabole kawane: “Neɛ naŋ terɛ taaɛ popeɛloŋ yaga a gaŋ neɛ naŋ derɛ.”​—Toma 20:35.

Gaa te intanɛt tomazie na a te nyɛ yɛlɛ yaga naŋ na baŋ soŋ bo ka ho neŋ ho taaba nyɔge zɔmennoŋ naŋ e kpeɛŋaa.