Ho Zɔmenne Na Baŋ Soŋ Boŋ Ka Ho Iri Yɛlɛ Zaa Naŋ Vɛŋ Hoŋ Teɛrɛ Ka Ho Eɛ Ho Yoŋ Bare​—⁠Sori A Baabole Naŋ Na Baŋ Soŋ Bo

Yuoni 2023 poɔŋ, laafeeloŋ tontonneba wa nyɛɛŋ ka noba naŋ maŋ e ba yoŋ eɛ yelnimizeɛ kaŋa naŋ na baŋ vɛŋ ka baaloŋ kpɛ ba. Azuŋ, ba wa nyɛɛŋ ka aseŋ ka ba e yelkaŋa a kyaare a yɛlɛ ŋa. Yelkaŋa bebeŋ a na baŋ soŋ noba naŋ e ba yoŋ bee?

• Dɔkta Vivek Murthy naŋ e U.S. surgeon general yeleeŋ ka: “Ka teneeŋ wa teɛre ka te eɛ te yoŋ ka noba meŋ ba peɛlɛ te, a eɛ yelnimizeɛ naŋ na baŋ vɛŋ ka baaloŋ kpɛ te, a na baŋ vɛŋeŋ ka te koŋ lɛ taa popeɛloŋ meŋ.” O lɛ yeleeŋ ka: “Kyɛ te na baŋ eɛ yelkaŋa kyaare a yɛlɛ ŋa.” Bo yɛlɛ teŋ na baŋ e? “Ka teneeŋ maŋ erɛ yelbilii bilii naŋ na vɛŋ ka te neŋ te taaba niiloŋ e kpeɛŋaa, a eɛ yɛlɛ naŋ na baŋ soŋ te.”a

Noba mine na baŋ be la nembeɛoŋ poɔŋ a kyɛ naŋ teɛre ka ba eɛ ba yoŋ. Azuŋ, ka nobaŋ wa ŋmaa gyeere te, lɛ ba wuli ka te koŋ lɛ teɛre ka te eɛ te yoŋ. Kyɛ yelzaa naŋ la a vɛŋ teŋ teɛrɛ ka te eɛ te yoŋ, a Baabole na toɔ̃ soŋ teŋ. A Baabole taaɛ kawaŋ sonne naŋ na toɔ̃ vɛŋ ka te neŋ te taaba nyɔge zɔmennoŋ naŋ e kpeɛŋaa yaga, lɛ na soŋ teŋ ka te iri yɛlɛ zaa naŋ vɛŋ teŋ teɛrɛ ka te eɛ te yoŋ bare.

Baabole kawane naŋ na baŋ soŋ te

Maŋ moɔrɔ ka ho neŋ ho taaba dire dama soŋ zaa. Lɛ wuleeŋ ka, a ba seŋ ka ho maŋ wulo ho taaba yɛlɛ naŋ seŋ ka ba e, kyɛbee teɛroŋ na aŋ seŋ ka ba taa. Kyɛ, aseŋ ka ho maŋ mãã ho meŋɛ a kyɛllɛ wono o soba yɛlɛ na soŋ zaa. Ka hooŋ maŋ wulo ka ho sereŋ boɔrɛɛ noba yɛlɛ, a na vɛŋeŋ ka ho ne ba niiloŋ na maaleŋ e kpeɛŋaa.

• Baabole kawane: “Yɛ ta maŋ vɛŋ ka yɛ kaŋa zaa kaara o meŋɛ yoŋ yɛlɛ zie, kyɛ yɛ maŋ kaara yɛ taaba meŋ yɛlɛ zie.”​—Filipae 2:4.

Kaa iri nemboore yobo ka ba e ho zɔmenne. Ho na baŋ kaa iree noba naŋ kore bo ane noba hoŋ kore ka ba e ho zɔmenne. Ho na baŋ lɛ kaa iree noba ne bo sããkommyɛlɛ naŋ ba yitaa, ane noba naŋ yi paaloŋ yobo ka ba e ho zɔmenne.

• Baabole kawane: ‘Lori ho poɔ.’​—2 Korinti 6:13.

Ka hooŋ boɔrɔ ka ho zanne yɛlɛ yaga a kyaare lɛ hoŋ na toɔ̃ e ka ho neŋ ho taaba nyɔge zɔmennoŋ naŋ e kpeɛŋaa, kanne a yelzu ŋa,“Satisfying Our Hunger for Friendship.” (Lɛ Hoŋ Na Toɔ̃ E A Nyɔge Zɔmenne.)