Zɔɔre Na Lɛ Kpɛɛ A Donɛɛ Deme Zaa Ka Ba Zɔɔ Bee?—Wala Ka A Baabole Yeli Kyaare A Yɛlɛ Ŋa?

Yuomo 30 mine naŋ pare, noba yaga teɛrɛɛŋ ka niiloŋ naŋ be paalonne kpakyagaŋ na eɛ kpeɛŋaa a maaleŋ somaŋ yaga zaa meŋ. Kyɛ, yɛlɛ naŋ e beraayi ŋa kpakyagaŋ wuleeŋ ka a yɛlɛ ŋa ba e yelmeŋɛ.

• “Noba mine zoree dabeɛ̃ ka zɔɔre naŋ be Gaza paaloŋ na na taɛ paalonne naŋ peɛle Izerayɛl na, bonso Izerayɛl noba neŋ Hezbollah noba meŋ piili zɔɔrɔŋ Lebanon paaloŋ tɛribogu naŋ.”—Reuters, January 6, 2024.

• “Noba mine Iran paaloŋ noba naŋ taa kpeɛ̃o ba zuŋ meŋ te zɔɔrɔ neŋ la teŋyobo mine noba, a ba kɔɔre ka Iran paaloŋ lɛ piili maala nuclear zɔɔzɔɔ boma. Ane meŋ, pampana ŋa Iran paaloŋ neŋ Russia paaloŋ neŋ China paaloŋ nyɔgɛɛ niiloŋ naŋ e kpeɛŋaa. A yɛlɛ ama zaa vɛŋɛɛŋ ka dabeɛ̃ kpeɛrɛ noba naŋ be a donɛɛ ŋmentonkpeɛraa sɛŋ na.”—The New York Times, January 7, 2024.

• “Russia paaloŋ naŋ moɔ̃ la niŋe a sããna saammo yaga zaa Ukraine paaloŋ ziiri mineŋ.”—UN News, January 11, 2024.

• “China paaloŋ libi-yɛlɛ nyɛrɛɛ nimitɔɔre gaabo, a lɛ taa zɔɔzɔɔ boma meŋ yaga zaa. Taiwan paaloŋ noba meŋ de la ba paaloŋ na yɛlɛ a de zɛgrɛ neŋ ba menne. Lɛ na yɛlɛ naŋ kyɛnɛ China paaloŋ neŋ U.S. paaloŋ kpakyagaŋ na ba soma, ka ba naŋ ba kaa soŋ zɔɔre na baŋ iree ba kpakyagaŋ.”—The Japan Times, January 9, 2024.

A Baabole yelee yelkaŋa kyaare a yɛlɛ ŋa zaa te naŋ nyɛrɛ aŋ erɛ a donɛɛ poɔŋ na bee? Yɛlɛ na naŋ erɛ na na toɔ̃ vɛŋeŋ ka zɔɔre iri a donɛɛ lombori zaa?

A Baabole daŋyelee yɛlɛ na naŋ erɛ pampana na

A Baabole ba boɔle paalonne mine yoe a yelka ba na zɔɔrɔŋ te saŋa ŋaŋ. Kyɛ a Baabole vɛŋɛɛŋ teŋ baŋ ka zɔɔre na poreŋ yaga zaa te saŋa ŋaŋ. A Baabole gba gaaɛ nimitɔɔre a yelka, ba na ‘iree emmaaroŋ yi a tendaa zuŋ.’—Yel-iriwulaa 6:4.

A Daaniel gane na yeleeŋ ka “a baaraa saŋa,” paalonne naŋ taa kpeɛ̃o a donɛɛŋ na “zɔɔrɔŋ” ka ba so kpeɛ̃o ba taaba zuŋ. A yi a zɔɔre na baŋ zɔɔrɔ na poɔŋ, ba na maŋ de la zɔɔzɔɔ boma ba naŋ taa a de fuuro neŋ taa, a lɛ de ba “bonnanɛɛ” kyɛbee libie tonɔ neŋ toma soe yaga poɔŋ.—Daaniel 11:40, 42, 43.

Zɔɔre kaŋa meŋ waanaŋ

A Baabole vɛŋɛɛŋ teŋ baŋ ka yeltaree naŋ erɛ a donɛɛ poɔŋ na maaleŋ sããŋeŋ yaga zaa. Kyɛ lɛ eebo puoriŋ, yɛlɛ na leɛ somaŋ. Yezu da yeleeŋ ka “dɔgroŋ kpoŋ kaŋa na waŋ, o tɔ daaŋ ba wa a yi a donɛɛ piiluu saŋa a wa ta ŋaaŋ.” (Matio 24:21) A “dɔgroŋ kpoŋ” ŋa na te baarɛɛ Hammagedon zɔɔre na poɔŋ. A Baabole yeleeŋ a kyaare Hammagedon zɔɔre na ka o eɛ “Naaŋmen a Kpeɛ̃o Zaa Daana zɔɔre bebi-kpoŋ na.”—Yel-iriwulaa 16:14, 16.

Kyɛ, Hammagedon zɔɔre na eɛ zɔɔre naŋ na faa nensaaleba, o ba e zɔɔre naŋ na sãã nensaaleba zaa. Naaŋmen na tu la Hammagedon zɔɔre na eŋɛŋ a iri nensaaleba namine zaa bare. Nensaaleba namine la vɛŋ ka zɔɔre be a tendaa zuŋ lɛ. Ka hooŋ boɔrɔ ka ho nyɛ sori na Hammagedon zɔɔre na naŋ na waneŋ emmaaroŋ naŋ na bebe tegitegilɛ, kanne a yelzuri ŋa:

• “What Is the Battle of Armageddon?” (Boŋ La Hammagedon Zɔɔre Na?)

• “Armageddon Is Good News!” (Hammagedon Zɔɔre Na Eɛ Duorisoŋ!)