Maŋ Puoro Korɔ Ho Taaba

1. Wala teŋ e baŋ ka Jehoova de la te puore sɔroo tegroŋ yaga zaa?

PUORO eɛ kyɔɔtaa naŋ e o yoŋ. Teɛre a yɛlɛ ŋa soŋ. Jehoova de la toma yaga ko a malekere ka ba tonɔ. (Yiem. 91:11) O deɛ toŋ tegrɛ meŋ eŋ o Bidɔɔ Yezu nuuriŋ. (Mat. 28:18) Kyɛ, nembuo ka Jehoova kaa iri ka o maŋ kyɛllɛ te puore sɔroo? Jehoova ba de ana toma na ko neɛzaa. A Baabole yeleeŋ ka Jehoova la “Soba na naŋ kyɛllɛ wono puoro.” Lɛ wuleeŋ ka Jehoova meŋɛ la maŋ kyɛllɛ wono te puore sɔroo.—Yiem. 65:2.

2. Bo ewuli soŋ ka bitontona Pɔɔl e wuli te a kyaare teŋ na maŋ puoro korɔ te taaba?

² Te na baŋ yelee te yelfɛree zaa ko Jehoova puore sɔroo poɔŋ. Kyɛ, a na somaŋ yaga ka te puoro korɔ te taaba meŋ. Lɛ ka bitontona Pɔɔl da maŋ e. Aŋa mannoo poɔŋ, o da sɛge te ko la a Efesu lantaapuoruu na a yelka: “N ba nagra ka N puori Naaŋmen bareka a yɛ zuŋ, N naŋ maŋ wa teɛre yɛ yɛlɛ N puoruu poɔ.” (Efe. 1:16) Pɔɔl da maŋ boɔlɛɛ noba mine oŋ da maŋ teɛre ba yɛlɛ o puore sɔroo poɔŋ na yoe. Aŋa mannoo poɔŋ, o da yelko la Timoti ka: “N puoro la Naaŋmen bareka yaga zaa, . . . ka maa wa leɛ-teɛre ho yɛlɛ tegitegilɛ a N puoruu poɔ ŋmenaa ane tensogɔ.” (2 Tim. 1:3) Pɔɔl da taaɛ yelwonii oŋ na baŋ puore sɔre Jehoova kyaare a yɛlɛ. (2 Kor. 11:23; 12:​7, 8) Kyɛ, o da naŋ maŋ puoro korɛɛ o taaba.

3. Bonso teŋ maŋ inni ka te puoro korɔ te taaba?

³ Saŋa kaŋa, te na baŋ inniŋ ka te puore ko te taaba. Te yɔɔpɔge kaŋa yuori naŋ di Sabrinaa yeleeŋ ka: “Te maŋ taaɛ yɛlɛ yaga ka te e bebiri zaa. Ka teneeŋ ba kaa soŋ te teɛroŋ na baŋ be la te menne yelwonii yoŋ eŋɛŋ.” A yɛlɛ ŋa taa daaŋ pɔge boŋ bee? Ka hooŋ iri a noɔre ka ɛɛ, a zannoo ŋa na baŋ soŋ boŋ. Te na nyɛɛ soorebie ayi mine nɔɛ iribo. Bonso aŋ e nimizeɛ ka te maŋ puoro korɔ te taaba? Sobuo teŋ na baŋ tu a e lɛ?

BONSO AŊ SEŊ KA TE MAŊ PUORO KORƆ TE TAABA?

4-5. Ka teneeŋ puoro korɔ te taaba, sobuo aŋ na baŋ soŋ ba? (Gyimisi 5:16)

⁴ Ka teneeŋ puoro korɔ te taaba, a na baŋ soŋ baŋ yaga. (Kanne Gyimisi 5:16.) Ka teneeŋ puoro korɔ te taaba, a na toɔ̃ soŋ baŋ ba zemmo poɔŋ bee? Ɛɛ. Yezu da baŋɛɛŋ ka bitontona Piita na zagrooŋ bare, kyɛ o da yeleeŋ ka: “N puori ko bo la, ka ka ho meŋɛ yeldeebo na e kpeɛŋaa.” (Luk. 22:32) Pɔɔl meŋ da baŋɛɛŋ ka, ka onaŋ puoro korɔ o taaba, a na toɔ̃ soŋ baŋ saŋa na baŋ wa tuoro yelkpeɛne. Pɔɔl da ba e yalfaa zaa kyɛ baŋ nyɔgoo eŋ nempɔgedieŋ Urom paaloŋ. Ana saŋa oŋ da sɛge lɛta ko Filimɔn a yelka: “N taa la teɛretɔroo ka a ho puoruu na nyɛ la eebo, ka N leɛ wa a ho zie.” (Flm. 22) A da ba kɔɔre kyɛ baŋ iri Pɔɔl yi neŋ a nempɔgedieŋ, oŋ lɛ tɔnne o naaŋ moɔloo toma na.

⁵ Lɛ ba wuli ka a eɛ ferebo ka Jehoova maŋ iri puoro na teŋ maŋ puoro korɔ te taaba na nɔɛ. O maŋ kyɛllɛɛ o puorebiiri puore sɔroo, azuŋ saŋa kaŋa o maŋ deɛ gbɛre a e yelkaŋa ka a neŋ o boɔboŋ wa kyaare taa. Ka teneeŋ sage a yɛlɛ ŋa di, te na maŋ puore sɔrɛɛ Jehoova nimizeɛ̃ saŋa na teŋ wa taa yelwonaa kaŋa, kyɛ te na maŋ barɛɛ a yɛlɛ eŋ Jehoova nuuriŋ, a kaara lɛ oŋ na e o yɛlɛ.—Yiem. 37:5; 2 Kor. 1:11.

6. Ka teneeŋ puoro korɔ te taaba, sobuo aŋ na baŋ soŋ te ka te taa nimibaaloŋ ko ba? (1 Piita 3:8)

⁶ Ka teneeŋ maŋ puoro korɔ taa, a na soŋ teŋ ka te taa “nimibaaloŋ.” (Kanne 1 Piita 3:8.) Ka neɛŋ wa taa nimibaaloŋ, o maŋ boɔrɔŋ ka o soŋ noba naŋ be awonaa poɔŋ. (Mak. 1:​40, 41) A lantaapuoruu neŋkpoŋ kaŋa baŋ boɔlɔ Michael yeleeŋ ka: “Ka maaŋ wa puore ko N taaba naŋ taa yelwonii, a maŋ soŋ maŋ maŋ de N meŋɛ eŋ ba gbɛbɔgriŋ a baŋ lɛ na yɛlɛ naŋ fɛrɛ ba aseŋ. A maŋ vɛŋeŋ maŋ maaleŋ nɔŋ ba yaga. A maŋ vɛŋeŋ maŋ tage peɛle ba, aneazaa ka bana yɛŋ ba maŋ baŋ.” A neŋkpoŋ kaŋa baŋ boɔlɔ Richard meŋ yeleeŋ ka: “Ka teneeŋ puore ko neɛ kaŋa, a maŋ eɛ mɔlɔ ka te e yelkaŋa a soŋ o soba. Ka teneeŋ wa de sommo ko neɛ kaŋa te naŋ puoro korɔ, a maŋ waa ŋa Jehoova naŋ tu te zie a ire te puore sɔroo na noɔre korɔ o soba.”

7. Ka teneeŋ maŋ puoro korɔ te taaba, sobuo aŋ na baŋ soŋ te ka te taa teɛroŋ naŋ soma a kyaare te yelwonii? (Filipae 2:​3, 4) (Kaa a fotori.)

⁷ Ka teneeŋ maŋ puoro korɔ te taaba, a maŋ soŋ teŋ teŋ taa teɛroŋ soŋ a kyaare te yelwonii. (Kanne Filipae 2:​3, 4.) Te kaŋa zaa taaɛ yelkpeɛne te naŋ tuoro Setaana donɛɛ ŋa poɔŋ. (1 Gyn. 5:19; Yel. 12:12) Ka teneeŋ maŋ puoro korɔ te taaba, a na maŋ leɛteɛre teŋ ka ‘te yɔɔmine naŋ be a tendaa lamboe zaa meŋ wono la a tuo ŋa tɔ.’ (1 Pit. 5:9) Paaneɛ kaŋa baŋ boɔlɔ Katherine yeleeŋ ka: “Ka maaŋ wa puoro korɔ N taaba, a maŋ leɛteɛre maŋ ka N yɔɔmine meŋ tuoree yelkpeɛne. N ba maŋ de N teɛroŋ eŋ N yelwonii eŋɛŋ te gaali.”

TE PUORE SƆROO NA BAŊ SOŊ BAŊ

8. Nembobo teŋ na baŋ puore ko?

⁸ Nembobo teŋ na baŋ puore ko? Te yɔɔmine bebeŋ ka ba laafeeloŋ ba paale, baapaalba meŋ taaba naŋ be sakuuŋ maŋ erɛ baŋ seɛ, a maŋ lɛ ferɛ ba ka ba de ba menne eŋ yɛlɛ naŋ ba soma poɔŋ. Te yɔɔmine meŋ yuomo gaaɛ nimitɔɔre. Ba mine meŋ booree deme ane a gɔmenante dɔgrɔ baŋ. (Mat. 10:​18, 36; Tom. 12:5) Nadi zɔɔre zuŋ, a maŋ fɛreŋ ka te yɔɔmine zo kyɛ bare ba yie. Saammo bɛrɛ maŋ toɔ̃ sãã la te yɔɔmine ziiri. Aminekaŋaŋ, te baŋɛɛ te yɔɔmine ŋa naŋ tuore a yɛlɛ ama taa. Azuŋ, te na baŋ puore ko baŋ. Ka teneeŋ e lɛ, te de la noɔre na Yezu naŋ ko te ka te “nɔnɔ taa” na tonɔ neŋ toma.—Gyn. 13:34.

9. Bonso aŋ seŋ ka te puoro korɔ noba naŋ derɛ weɛ Jehoova lantaapuoruu na poɔŋ ane ba pɔgeba?

⁹ Te na baŋ puore ko la noba naŋ derɛ weɛ Jehoova lantaapuoruu poɔŋ na. Aŋa a Lantaa Zukaareba neŋ ba sonneba, Bɛɛtil Zukaareba, a lantaapuoruu nembɛrɛ ane ba sonneba. Te yɔɔmine ŋa taaɛ yelwonii, kyɛ ba maŋ de la ba menne tere a tonɔ Jehoova toma. (2 Kor. 12:15) Aŋa mannoo poɔŋ, gbandige zukaara kaŋa baŋ boɔlɔ Mark yeleeŋ ka: “Zie na maŋ be na neŋ zie na N dɔgreba naŋ be na eɛ tɔɔre yaga. A yɛlɛ ŋa eɛ kpeɛŋaa ko ma yaga zaa, bonso ba yuomo gaaɛ nimitɔɔre, ka ba laafeeloŋ meŋ ba paale. Aneazaa ka N yɔɔpɔge neŋ o serɛ la kaara ba, kyɛ a beɛrɛ maŋ maaŋ meŋɛ naŋ koŋ baŋ be ba zieŋ a kaara ba.” Ka teneeŋ baŋ yelkpeɛne te yɔɔmine ŋa naŋ tonɔ tonkpeɛne ŋa naŋ tuoro, kyɛbee ka teneeŋ ba baŋ, kyɛ a na somaŋ ka te maŋ puore ko ba. (1 Tɛs. 5:​12, 13) Te na baŋ puore ko la te yɔɔmine ŋa pɔgeba meŋ, bonso ba naŋ sonnɔ ba sereba baŋ toɔ̃ tonɔ a toma ŋa zaa.

10-11. Ka teneeŋ maŋ puore sɔre Jehoova ka o soŋ te yɔɔmine zaa, Jehoova poɔ maŋ pɛleŋ bee? Wuli a muni.

¹⁰ Aŋa lɛ te naŋ nyɛ na, te na baŋ puore ko la te yɔɔmine yaga. Te na baŋ puore sɔrɛɛ Jehoova ka o soŋ te yɔɔmine naŋ be nempɔgedieŋ, a lɛ dii te yɔɔmine naŋ kɔŋ ba nɔŋneba kũũ poɔŋ sukyie. A neŋkpoŋ kaŋa baŋ boɔlɔ Donald yeleeŋ ka, “Te yɔɔmine yaga tuoree yelkpeɛne yaga, azuŋ te na baŋ puore sɔrɛɛ Jehoova ka o soŋ te yɔɔmine zaa, ane bana na naŋ dire dɔgɛɛ.”

¹¹ A puoro ŋa taa maŋ pɛlɛɛ Jehoova poɔ bee? Ɛɛ! Te koŋ baŋ baŋ te yɔɔmine yelwonii zaa te baare. Azuŋ, te maŋ puore sɔrɛɛ Jehoova a yelka o soŋ te yɔɔmine zaa. (Gyn. 17:20; Efe. 6:18) A puoro ŋa taa maŋ wuliŋ ka te taaɛ “nɔmmo ko te yɔɔmine naŋ be a tendaa lombori zaa.”—1 Pit. 2:17.

SAŊA NA HOŊ MAŊ WA BOƆLE NOBA MINE YOE A PUORO KORƆ BA

12. Ka teneeŋ vɛŋ ka te nimiri gaŋ ka te kaara velaa, sobuo aŋ na baŋ soŋ te ka te puoro korɔ te yɔɔmine?

¹² Vɛŋ ka ho nimiri gaŋ ka ho kaara velaa. Yelmeŋɛ la, a somaŋ ka te maŋ puoro korɔ te yɔɔmine zaa, kyɛ te na baŋ lɛ boɔlɛɛ ba mine yoe te puore sɔroo poɔŋ, a puore ko ba. Neɛ kaŋa be la ho lantaapuoruu na poɔŋ a taa baaloŋ faa kaŋa naŋ ba gɛrɛ bee? Baapaalaa kaŋa tuoree yelkpeɛne sakuu poɔŋ, ka lɛ vɛŋ ka o eŋɛ kyoɔre bee? Bi-ma kaŋa kyɛbee bi-saa kaŋa yoŋ la guolo o bie “Jehoova dɛnnoo ane o kawane poɔŋ” bee? (Efe. 6:4) Ka hooŋ vɛŋ ka ho nimiri gaŋ ka ho kaara velaa, a na soŋ boŋ ka ho de ho meŋɛ eŋ ho yɔɔ na gbɛbɔgriŋ. Lɛ na vɛŋeŋ ka ho yi ho poɔ zaa a puore koo.b—Uro. 12:15.

13. Sobuo teŋ na baŋ tu a puore ko noba teŋ daaŋ ba nyɛ neŋ te nimiri zaa?

¹³ Maŋ boɔle noba mine yoe ho puore sɔroo poɔŋ, a puore ko ba. Ka teneeŋ gbaŋ daaŋ ba nyɛ ana noba na neŋ te nimiri, kyɛ te na baŋ puore ko baŋ. Aŋa mannoo poɔŋ, ba nyɔgɛɛ te yɔɔmine te eŋ nempɔgedieŋ Crimea, Eritrea, Russia, ane Singapore paaloŋ. Ka hooŋ kaa jw.org zuŋ, ho na baŋ nyɛɛ ba yoe.c Gbandige zukaara kaŋa baŋ boɔlɔ Brian yeleeŋ ka: “Ka maaŋ wa sɛge te yɔɔ kaŋa naŋ be nempɔgedieŋ yuori eŋ gane poɔŋ, a boɔle a yuori ka a yi, a maŋ eɛ mɔlɔ ko ma ka N teɛre a yuori, a boɔle a yuori N puore sɔroo poɔŋ.”

14-15. Boŋ na baŋ soŋ te ka te baŋ yɛlɛ na meŋ teŋ na baŋ yeli te puore sɔroo poɔŋ?

¹⁴ Maŋ yeli yɛlɛ na meŋɛ hoŋ boɔrɔ ka Jehoova e ko o soba ho puore sɔroo na poɔŋ. Te yɔɔdɔɔ Michael te naŋ yeli o yɛlɛ na yeleeŋ ka: “Ka maaŋ wa kanne te yɔɔmine ba naŋ nyɔge te eŋ nempɔgedieŋ na yɛlɛ jw.org zuŋ, N maŋ soorɛɛ N meŋɛ ka, ‘Ka maaŋ da la, bo yɛlɛŋ da na dɔɔnɔ ma?’ N baŋɛɛŋ ka N na teɛrɛɛ N pɔge yɛlɛ, ane lɛ maŋ na baŋ kaara o zu velaa. Azuŋ, ka maaŋ wa puoro korɔ te yɔɔmine naŋ e kultaa deme a be nempɔgedieŋ, N maŋ baŋɛɛ yɛlɛ na meŋɛ maŋ na baŋ yeli N puore sɔroo na poɔŋ a kyaare ba.”—Hib. 13:3.

¹⁵ Ka teneeŋ maŋ ŋmaa foto te teɛroŋ poɔŋ a nyɛ lɛ na zemmo naŋ na e kpeɛŋaa ko te yɔɔmine naŋ be nempɔgedieŋ na yɛlɛ, a na soŋ teŋ ka te baŋ yɛlɛ na meŋɛ teŋ na baŋ yeli te puore sɔroo poɔŋ a kyaare ba. Aŋa mannoo poɔŋ, te na baŋ puore sɔrɛɛ Jehoova ka o tɔ a nempɔgedie kaakaareba sukyie ka ba wulo te yɔɔmine na nimimaaroŋ. Te na baŋ lɛ puoreŋ ka Jehoova soŋ ka a gɔmenantere ko te yɔɔmine sori ka ba puoruu. (1 Tim. 2:​1, 2) Te na baŋ puore sɔreŋ ka Jehoova soŋ ka te yɔɔmine na baŋ nyɔge te eŋ nempɔgedie na ewuli soŋ tɔ a lantaapuoruu noba sukyie ka ba are kpeɛŋaa a yelmeŋɛ poɔŋ. Kyɛbee ka te puore sɔre ka ka noba naŋ ba puoro Jehoova wa nyɛ te yɔɔmine naŋ be nempɔgedieŋ ewuli soŋ, a na tɔɛ ba sukyie ka ba kyɛllɛ a duorisoŋ. (1 Pit. 2:12) Te na baŋ de la a sowuli ama meŋ toŋ neŋ toma saŋa na teŋ wa puoro korɔ te yɔɔmine naŋ tuoro pigrinyɛ na. Ka teneeŋ maŋ vɛŋ ka te nimiri gaŋ ka te kaara yɛlɛ velaa, a boɔle te yɔɔmine na teŋ boɔrɔ ka te puore ko na yoe te puore sɔroo poɔŋ, a na wuliŋ ka nɔmmo te naŋ taa ko taa maaleŋ duoree saa.—1 Tɛs. 3:12.

ASEŊ KA TE TAA TEƐROŊ SOŊ A KYAARE TE PUORE SƆROO

16. Boŋ na baŋ soŋ te ka te taa teɛroŋ naŋ soma a kyaare te puore sɔroo? (Matio 6:8)

¹⁶ Aŋa lɛ na teŋ nyɛ a zannoo ŋa poɔŋ na, ka teneeŋ puoro korɔ te yɔɔmine, a na baŋ soŋ baŋ ba zemmo poɔŋ. Kyɛ, a eɛ nimizeɛ ka te taa teɛroŋ naŋ soma a kyaare te puore sɔroo. Aseŋ ka te baŋ ka Jehoova baŋɛɛ yɛlɛ na zaa teŋ maŋ yelkoo puoro poɔŋ na sɛre kyɛ teŋ wa yelaa koroo. A ba seŋ ka te wulo Jehoova sori na aŋ seŋ ka o tu a e yɛlɛ mine, ka lɛ vɛŋ ka a yɛlɛ te baare soŋ. Jehoova maŋ daŋ baŋɛɛ yɛlɛ naŋ na baŋ soŋ o puorebiiri sɛre kyɛ baŋ wa puoro sɔroo, kyɛbee sɛre teŋ na baŋ a yɛlɛ gba. (Kanne Matio 6:8.) Tɔɔ, bonso aŋ seŋ ka te pãã puoro korɔ te taaba? Te zannɛɛ yɛlɛ yaga a zannoo ŋa poɔŋ, kyɛ yelkaŋa naŋ lɛ bebe la ka, a maŋ wuliŋ ka te teɛrɛɛ te yɔɔmine yɛlɛ. Nɔmmo la maŋ vɛŋ teŋ puoro korɔ te yɔɔmine. Jehoova poɔ zaaŋ maŋ pɛle saŋa na oŋ wa nyɛ o puorebiiri naŋ tɔglɔ o nɔmmo gyogo na.

17-18. De yelmannaa kaŋa wuli bon nanso ka Jehoova maŋ boɔrɔ ka te puoro korɔ taa?

¹⁷ Haali ka yɛlɛ na teŋ puoro sɔrɔ naŋ ba nyɛ eebo, kyɛ puoro na teŋ puore ko te yɔɔmine na wuleeŋ ka te nɔnɔ baŋ. Jehoova maŋ kyɛllɛɛ a yɛlɛ ama taa zieŋ soŋ. Te de yelmannaa kaŋa wuli a muni: Te de ka dɔɔ kaŋa bebeŋ a taa biiri bayi, bidɔɔ ane bipɔge. Beŋ la ka bebiri kaŋa ka a bidɔɔ beɛrɛ a gaŋ gado zuŋ a koŋ baŋ iri. Beŋ la ka a dɔɔ bipɔge na sɔrɔ o saa a yele ka: “Sɔrebo la e yelkaŋa a soŋ N yɔɔdɔɔ na, o beɛrɛŋ nimizeɛ̃!” Ba saa na erɛɛ yelkaŋa a sonnɔ o bidɔɔ na, bonso o nɔŋɛɛ o yɛlɛ yaga. Kyɛ, saŋa na a saa naŋ wa woŋ lɛ na o pɔgeyaa naŋ sɔroo ka o soŋ o yɔɔdɔɔ na, a tɔɛ o sukyiri yaga, bonso a saa wa nyɛɛŋ ka o pɔgeyaa na nɔŋɛɛ o yɔɔdɔɔ na yɛlɛ yaga zaa.

¹⁸ Lɛ ka Jehoova boɔrɔ ka te meŋ erɛ. O boɔrɔŋ ka te kaara taa zu velaa, a puoro korɔ taa meŋ. Ka teneeŋ wa puoro korɔ taa, a maŋ wulee lɛ na teŋ taa nɔmmo naŋ e zuluŋ ko taa aseŋ. Jehoova meŋ maŋ baŋeŋ. (2 Tɛs. 1:3; Hib. 6:10) Aŋa lɛ na teŋ nyɛ a zannoo ŋa poɔŋ na, te puore sɔroo na na baŋ vɛŋeŋ ka yɛlɛ mine leɛre te yɔɔmine zemmo poɔŋ. Azuŋ te yɔɔmine, yɛ vɛŋ ka te naŋ moɔ̃ niŋe a puoro korɔ taa.