Itre Edromë
17 Ka loi ju kö la sine falawa ka qaqacil ngöne la gaa tingeting*
Hune la uma hna lapaa ce xen,* ngo gaa hetre iwesitrë.
2 Tro la hlu ka thelewekë a musinën la nekön ka kuca la nyine hmahman;
Tro fe hë angeic a kepe edrö, tune la itre nekö ne la maseta.
3 Troa ahmune la sileva me gool ngöne la eë, matre huletrij la itre engazon,
Ngo Iehova la ka waipengön la itre aliene hni.
4 Ame la atr ka ngazo, angeic a drenge hnyawane la itre trengewekë ka akötr,
Nge ame la atr ka huliwa juetrë, angeic a drenge la thinem ka iakötrë.
5 Ame la atr ka hnyima fë la ka pë ewekë, ke kola qaqane la Atre xupi nyën,
Nge ame la atr ka madrine fë la akötre ne la itre xan, ke tro ha nyithupene koi angeic.
6 Korona ne la itre qatr la itre api i angatr,
Nge ame la elolone la itre nekönatr trahmany, ke itre keme* i angatr.
7 Tha ka loi kö kowe la atre hmo la itre trengewekë ka meköt.*
The qaja pala ha la itre trengewekë ka thoi kowe la atre mus!*
8 Ceitune la ahnahna, memine la etë ka tru thupen* kowe la atrekë ewekën;
Kuca ju hë angeic la ketre ewekë, ngo angeice pala hi a kepe thangan ka loi.
9 Ame la atre nue la ngazo,* ke ka thele la ihnim,
Ngo ame la atre qaja lapaane la ketre jol, ke ka aisane la itre treme sineen.
10 Ka hetre thangane catre kö la troa hajine la atr ka inamacan
Hune la troa a 100 lao hna jia kowe la hmo.
11 Ame la atr ka ngazo, ke angeice pala hi a thel troa icilekeu,
Ngo troa upe la atre iaxösisi matre ameköti angeic.
12 Ka loi ju kö troa ixelë memine la ithinene bea hna thapa la itre nekön
Hune la troa ixelë memine la hmo ka huliwa menu.
13 Maine tro la ketre atr a të la loi hnei ngazo,
Tha tro kö a patre la ngazo qa ngöne la hnalapa i angeic.
14 Ame la kola nyiqaane iwesitrë, ke ceitune hi memine la kola fe akacan la tim;*
Qëmekene troa iwesitrë, tro metrötre pi.
15 Ame la ka jelemekötine la atr ka ngazo, me ka jelengazone la atr ka meköt
Ke Iehova a methinë nyidroti asë.
16 Nyine u e tro la hmo a atreine kapa la inamacan
Nge tha aja i angeice pe?*
17 Ame la nyipi sinee, angeic a amamane la ihnim i angeic e nöjei ijin
Nge trejin angeic kowe la ijine akötr.
18 Ame la atr ka pë atrehmekun,* angeic a kapa
Me sisiny troa të la gufa i ketre qëmekene la atre lapa easenyi angeic.
19 Ame la atre ka pi iwesitrë, ke ka pi eni wathebo.
Ame la atre adraiëne la qëhnelö i angeic, ke tro hë angeic a jol.
20 Ame la atr ka hetre hni ka thoi, tha tro kö angeic a öhne la loi,
Nge ame la atre qaja la itre trenge iaö, ke tro hë angeic a luz.
21 Ame la atre hamë mel kowe la nekönatr ka hmo, ke tro angeic a melëne la akötr;
Nge pëkö madrin kowe la keme ne la nekönatr ka menu.
23 Tro la atr ka ngazo a kapa la mani hna hamën juetrën*
Göi troa qaja la itre hna amekötin ka tha meköti kö.
24 Ame la atr ka atreine waiewekë, ke mama cile pala hi koi angeic la inamacan,
Ngo kola nyinyapëne la fen hnene la luemeke ne la atr ka hmo.
25 Ame la nekön ka hmo, angeic a ahleuhleun la keme i angeic
Me akötrëne* la ka hnaho angeic.
26 Tha ka loi kö troa tran* la atr ka meköt,
Nge tha ka meköti kö troa lep la itre atr hna metrötrën.
27 Ame la atr ka hetre atrehmekun, ke ka xomehnöth la itre trengewekë i angeic,
Nge ame la atr ka atreine waiewekë, ke ka lapa hnyawa.
28 Ijije hi troa jele inamacanëne la hmo, e tro angeic a lapa thaup,
Nge tro ha jele ka lai he la atre thinge la që i angeic.