Juun

Ame itre xa ijin, troa qaja koi së la itre ithanata ka troa akötrë së. Ngo e cili fe, troa tru la loi hne së hna kuca kowe lai atr e hne së hna ithanata amenyikeny. (Ite edomë 15:1) Ame ngöne la ketre ekalesia, ngazo catre la aqane ujë ne la neköne la ketre trejine föe ka pë föen. Ame hna traqa pi la ketre trejine föe kowe la thin me hape: “Ekölöini pe, maine ini nyëne hnyawa ju pe hnei nyipo!” Pane cile ju hi la thin me mekun, nge sa jë pë hë ka hape: “Nyipici nyipo, tha loi kö la aqane ujë i nyën enehila, ngo ame la ini hnei nyën hna kapa, ke tha ka tro kö a hmaca enehila. Ce ithanatane jë nyiso e thupene e Amagedo, tro pë hë lai a mama hnyawa koi nyiso e cili.” Qa ngöne laka hna ujë cememine la menyik hnene la thin, ame hna lolo pala hi la aqane ce mele nyidro. Ketre, drenge hi la kuku la hna qaja hnei thin, matre mama pi hi koi angeic ka hape, hetre mejiune i eahlo pala hi laka, tro angeic a saze. Celë hi matre hmaca ju hi angeic ce tro memine la itre sinatronge i angeic ka ngazo. Ame hë e thupen, angeic a xomi bapataiso, me huliwa ngöne la Bethela. Maine eje hi laka tro sa ithanata kowe la itre trejine me easë maine itre atrene la hnepe lapa së, maine kowe la itre atr hne së hna thatre, “loi e ewekë pala hi [së] memine la ihnim, hna aloine hnei [sootr].”​—Kol. 4:6. w15 15/12 3:​15, 17

Maine epuni la ketre ne lo ala 120 lao itretre dreng, tha tro pi kö epuni a thëthëhmine la drai cili. Hna isa të hui angatr la ketre ewekë ceitu me ketre ukahlokin eë. Nge hnei Iehova hna aijijë angatr troa ithanatane la itre xa qene hlapa kö. Mama hnyawa pi hi ka hape, hna ië angatre hnei uati hmitrötr. (Ite hu. 2:​6-​12) Ngo tha celë kö lai ka traqa kowe la nöjei keresiano la kola ië angatr. Tha hnei Tusi Hmitrötre kö hna qaja ka hape, hetre ewekë ka ceitu me ukahlokin eë ka mama hune la he ne lo ala thauzane e Ierusalema, itretre hna iën e thupen ngöne la drai cili. Hna ië angatr ngöne lo ijine kola bapataiso angatr. (Ite hu. 2:​38) Ketre, tha hna iën asë kö la itre keresiano la kola bapataiso angatr. Ame la angetre Samaria, tre hna ië angatr thupene hë la hna bapataiso angatr. (Ite hu. 8:​14-​17) Ame pena Konelio me itre atrene la hnalapa i angeic, tre hna ië angatr qëmekene troa bapataiso angatr.​—Ite hu. 10:​44-​48. w16.01 3:​3, 5

Ame la itre hna iën, tha angatre kö a mekune ka hape, ka sisitria angatr hui itre xan. Nge tha Ie­hova kö a hamën atrune pe kö la uati hmitrötr koi angatr, nge co pë hë koi itre xa hlue i Nyidrë; maine pena sisitria kö la aqane trotrohnine angatr la itre ini ka jui ne la Tusi Hmitrötr hui itre xan. Ketre, tha tro pi kö angatr a upe la ketre atr troa hane xeni areto ngöne la Drai Ne Amekunën, me mekune ka hape, ijiji angeice fe. Ame la itre hna iën, tre itre ka ipië angatr, nge atre hnyawa hi angatr ka hape, Iehova hmekuje hi la ka hëne la itre atr troa elë hnengödrai eë. Tha tro kö la itre hna iëne a mekune ka hape, hetre aqane tro kö a ujë koi angatr. (Efe. 1:​18, 19; Fil. 2:​2, 3) Ketre, trotrohnine hnyawa hi la trejin hna iëne laka, ame la kola hë angeic hnei Iehova, pëkö ketre atr ka atre. Celë hi matre, tha canga kapa kö itre xan la kola ië angeic, ke öni Tusi Hmitrötr, tha tro kö ketre a nyimenyime jelenyipicine la kola qaja hnei ketre ka hape, hetre hnëqa ka tru hnei angeice hna kapa qaathei Akötresie.​—Hna ama. 2:2. w16.01 4:​6, 7

Anyimua ujë tune lai hnei Iehova koi nyidro. (Gen. 12:​10-​20; 20:​2-7, 10-​12, 17, 18) Hnene la itre hna melëne cili hna acatrene catrëne la lapaune i Aberahama. Ijije kö tro sa nyi sinee me Iehova? Eje hi! Tui Aberahama, nyipi ewekë tro sa pane atrepengöi Iehova. Easë fe, nyipi ewekë tro sa atrepengöi Iehova hnyawa me hetre itre hne së hna melën. Eje hi laka, tru catre hmaca kö la hne së hna atre göi Iehova hui Aberahama ekö. (Dan. 12:4) Nyimutre la itre ini e hnine la Tusi Hmitrötr ka qejepengöi Iehova, “ate kë zine la hnengödrai memine la fen.” Itre ini hi lai ka akökötrene la ihnimi së me metrötre së koi Nyidrë. (Gen. 14:22) Ame la easa drengethenge Akötresie, easë fe hë lai a öhne la aqane thupë së, me amanathithi së hnei Nyidrë ngöne la mele së nge kolo fe a acatrene la lapaune së. Kola mama e cili koi së laka, ka xulu la madrin me tingetinge qa ngöne la hna nyihlue Iehova hnyawa. (Sal. 34:8; Ite edomë 10:22) E tro sa thele troa ­atrepengöi Iehova hnyawa, me melëne me kapa la itre manathith qa ngön, tro fe lai a acatrene catrëne la aqane imelekeu së me Nyidrë. w16.02 1:​7, 8

Easa öhne e cili laka, atrepengöne hnyawa hi angeic la Itre Hna Cinyihan Qene Heberu. Kola mama laka, ceitune hi la itre trenge ewekë i angeic memine la itre hna qaja hnei Hana, thine i Samuela, lo kola thith. (1 Sam. 2:​1-​10) Truedre lao xötr ne Tusi Hmitrötr hna amexeje hnei Maria ngöne la angeic a ithanata. Mama hnyawa pi hi e cili laka, ka tru koi angeice troa ithanatane la itre ini hnei angeice hna kapa qaathei Iehova Akötresie, enehmu i angeic. Ame itre xa ijin, easa kapa la itre hnëqa qaathei Iehova, nge kösë nango jole pi hë koi së troa eatrën. Tro sa nyitipu Maria, hnei angeic hna kapa la hnëqa i angeic cememine la ipië, me mejiune laka, tro kö Iehova a xatua angeic. Tro fe sa lapaune tui Maria, ene la troa drenge hnyawane la itre ithuemacanyi qaathei Iehova me sine thele itre ej. Tro hë së a hetre madrine e cili troa ce thawa itre eje me itre atr.​—Sal. 77:​11, 12; Luka 8:​18; Rom. 10:15. w16.02 2:​17, 18

Ame e nöjei macatre, easa madrine la kola xomi bapataiso hnene la itre thöth ka ala thauzan. (Ate cai. 12:1) Ngo itre keme me thin, me itre qatre thup a thupëne matre, qëmekene tro la thöth a xomi bapataiso tre, xecie koi angatr laka, qa ngöne kö la sipu mekuna i angeic, nge trotrohnine fe angeic la aliene lai. Ame la atre sa xepu koi Iehova me xomi bapataiso, tre angeice hi lai a nyiqaane la ketre mel ka hnyipixe. Eje hi laka, tro angeice lai a kapa la itre manathithi ka nyimutre qaathei Iehova, ngo tro fe a traqa koi angeic la itre icilekeu qaathei Satana. (Ite edomë 10:22; 1 Pet. 5:8) Celë hi kepin matre, itre keme me thin a hane xomi ijine troa inine la itre nekö i angatr, me qeje pengöne la aliene la troa xötrethenge Keriso. Ame lo itre thöth ka hmi cas, tre, qa ne la itre qatre thup troa xatua nyudren troa trotrohnine la aliene la troa sa xepu koi Iehova me xomi bapataiso. (Luka 14:​27-​30) Tune la troa hnëkë matre troa xupe la ketre uma me afenesin ej, haawe nyipi ewekë fe troa hnëkë hnyawa hnene la thöth qëmekene tro angeic a bapataiso, matre ijiji angeic troa mele nyipici koi Iehova “uti hë la pun.”​—Mat. 24:13. w16.03 1:​1, 2

Hna hamëne la Wathebo i Mose koi casi la nöj, ene la angetre Isaraela. Ngo ame la Isaraela i Akötresie tre, angatre a traqa qa ngöne la itre nöje ka nyimutre, nge isa pengöne kö la aqane mele i angatr. Hnene la Wathebo i Mose hna amamane kowe la angetre Isaraela la aqane troa mel ngöne la Nöje Hna Thingehnaean, nge hna cinyihan itre ej hun la itre ietë. Ngo ame “la wathebo i Keriso” laka, tha ceitune kö memine la Wathebo i Mose, ke ame la itre trepene meköti ne la wathebo i Keriso tre, hna cinyihane ngöne la itre hni angatr. Nge tro la wathebo celë a köja gojenyine la itre keresiano, matre tro angatre fe a öhnyi loi ngöne la nöjei götrane hnei angatre hna mele ngön. (Gal. 6:2) Hetre itre hna amekötin hna hamëne hnei Iehova jëne Iesu kowe la Isaraela i Akötresie. Lue ewekë ka tru hnei Iesu hna ahnithe kowe la itretre dreng, ame la ketre, ene la troa cainöje trootro. Nge ame la ketre, kola amamane hnyawane la aqane tro la itre keresiano a ujë, memine fe la aqane troa ce mel. Thatraqan asë hi la itre keresiano la lue hna amekötine celë, matre thatraqai së fe enehila ngacama isa mejiune së kö, ene la troa mele palua e koho hnengödrai maine e celë fen. w16.03 4:​10, 11

Qëmekene troa inin me hnëkëne la trejine trahmany, tro la qatre thup a pane thele troa nyi sineene la hnainin. Ame göi aqane troa nyi sineene la hnainin, tre tha ka ceitun asë kö ngöne la itre nöj. Ketre, isapengöne kö la itre qenenöj. Ngo, isa mele ju hë epun ngöne itre nöje ka isapengön, ngo e tro epuni a xomi ijine ngöne la porogarame i epun thatraqane la hnainin, tro hë angeice lai a atrehmekune ka hape, ka nyipiewekë catre angeic koi epun. Eje hi laka, tro ha tru la hni ne ole ne la itre trejin hnainin kowe la traeme me ihnim hnei epuni hna amamane koi angatr. Nyipici laka, ame la qatre thup ka maca, tre ka hetre ajane troa inin me hnëkëne la trejin. Ngo nyipiewekë tro fe angeic a hnime la atr hnei angeic hna inin. (Wange ju fe la Ioane 5:​20.) Pine nemene matre ka nyipiewekë catre lai? Pine laka, e tro la hnainin a mekune ka hape, epuni a wangatrunyi angeic, tro hë angeice lai a hmala troa kapa la ini qaathei epun. Haawe, itre qatre thupe fe, catre jë troa hamë ini, ngo nyipiewekë catre fe troa nyi sineene la hnainin.​—Ite edomë 17:17; Ioane 15:15. w15 15/4 1:​19, 20

E tha mama asë kö la itre ithuemacanyi e hnine la Tusi Hmitrötr göi Azaria Joxu (Uzia Joxu), nemene hë la aqane tro epuni a ujë? (2 Ite jo. 15:​7, 32; 2 A. l. ite jo. 26:​3-5, 16-​21) Tro kö epuni a qeje gelene la aqane ujë i Iehova ka hape, ka meköti kö la hnei Nyidrëti hna kuca? Maine pena, jëne la itre ithuemacanyi hna hamëne hë hnei Tusi Hmitrötr, xecie hnyawa ha koi epun laka, ka kuca pala hi Akötresie la meköt. (Deu. 32:4) Maine tro sa thele troa atre Iehova hnyawa, tro ha kökötre la ihnimi së koi Nyidrë, nge tro fe sa catre mejiune koi Nyidrë. Nge ame hë e cili, tha nyipi ewekë kö troa atre la itre kepine la aqane ujë i Nyidrëti ngöne la nöjei ewekë ka traqa. Ame la easa inine la Tusi Hmitrötr, Iehova fe a ketre nyipi sinee së, nge tro fe hë së lai a easenyi ­catre koi Nyidrë.​—Sal. 77:​12, 13. w15 15/4 3:8, 10

Ame la itre angela, tre, “ite ka mene ngöne la cat.” Tru catre kö la inamacane me mene i angatr hune la itre atr. Eje hi laka, ame la itre angela ka mele nyipici, tre, angatr a huliwane hnyawane la mene i angatr. Ka tune lo kola humuthe la ala 185 000 lao sooce i angetre Asuria hnene la ca angela i Iehova. Ewekë lai hna thatreine kuca hnene la ca atr, maine ketre trongene isi pena. (2 Ite jo. 19:35) Ame ngöne la ketre ijin, hnene la ketre angela hna huliwane la atreine me mene i angeic, matre troa nuamacane la itre aposetolo qa hnine la kalabus. Kola hmulizië la itretre thup, matre tha drenge ju kö angatr la angela a fe lai qëhnelö, me alöne trön eë la itre aposetolo, me thinge la qëhnelö. (Ite hu. 5:​18-​23) Itre angela ka mele nyipici a huliwane la mene i angatr matre troa kuca la loi, ngo ame Satana, hnei angeice hna huliwane menune la mene i angeic. Nge eje hi laka, tru catre kö la mene i Satana nge catrehnine la aqane nyinyithiina i angeic. Celë hi matre Tusi Hmitrötr a qeje angeice ka hape, “tane celë fen” maine “haze ne la fen.”​— Ioane 12:31. w15 15/5 1:​5, 6

Itre ka faipoipo ju hë së maine ka lapa casi pena, ngo nyipi ewekë pe tro sa catre thipëne la nöjei pengöne aqane kuci ngazo. Ewekë ka hmaloi kö lai? Ohea, ka jole pi hë! Maine epuni la ketre thöth, ma hnei epuni fe hë hna hane drenge la itre sine ini epuni a selëne ka hape, pëkö ka sewe angatr troa ce meköle memine la ketre hnei angatre hna ajan. Maine pena, angatr a hane qaja lapane la itre video ka amamai angatr a kuca la itre ewekë ka sis, me iupifëkeune la itre maca, me itre iatr, me itre video ka sis. Ame ngöne la itre xa nöj, hna wathebone la aqane ujë cili, tune la aqane wathebone troa iupifëkeune la itre iatr ne la itre nekönatr hna qanangazon, ene lo hna hape, pédophilie. Öni Tusi Hmitrötr: “Ame la ate kuci ngazo, te, kola nyipi angazone la ngönetei angeic.” (1 Kor. 6:​18) Ketre aqane ujë lai ka akötrëne catrëne la mele ne la atr, ke kolo pena a tithi angatr hnene la itre mec ka pë nyin. Ala nyimu catre la itre thöthi ka ce meköle hë ngo tha ka faipoipo petre kö. Angatr a qaja ka hape, ka loi ju kö ekö tro angatr a pane itreqe. Aja i fene tro sa mekune ka hape, ka pëkö ethanyine la troa ena la itre wathebo i Akötresie. E traqa ju löthi së hnene la aqane mekune cili, eje hi lai laka, tro ha amenu së hnene “la tenge iaö ne la ngazo.” w15 15/5 2:​14

Ceitui Iesu hi me Tretretro i nyidrë. Nemene la ka xatua Iesu troa thiina ka menyik kowe la itre atr ngöne lo nyidrëti ekö e celë fen? Hnei nyidrëti hna pane mekune la nyine tro nyidrëti a qaja me kuca. Hna tro koi nyidrë hnene la ketre föe ka kuca la nöjei pengöne ngazo. Matre eahlo a treije latresi fene la lue ca i Iesu. Öhne hnyawa hi Iesu la hace me hleuhleu ka eje thei eahlo. Eahlo a ietrane la itre ngazo hnei eahlo hna kuca. Atre hnyawa hi Iesu laka, e tha menyike kö nyidrë koi eahlo, tro ha elitrauje la hleuhleu thei eahlo. Celë hi matre, nyidrëti a qaja aloine la aqane ujë i eahlo me nue la ngazo i eahlo. Hnei Iesu fe hna ithanata amenyikenyi kowe la Faresaio ka goeëne angazone la hna kuca hnei nyidrë. (Luka 7:​36-​48) Nemene la aqane tro sa thiina ka menyik tui Iehova? Nyipi ewekë tro sa mekune la nyine tro sa qaja me kuca matre tro sa thiina ka menyik kowe la itre xan, nge tha tro kö sa akötrë angatr. Hnei Paulo hna cinyianyi kowe la ketre Keresiano ka hape: “Tha ijije kö la hlue ne la Joxu troa iwatratra ; ngo loi e menyike la thina kowe la nöjei ate asëjëihë.” (2 Tim. 2:​24) Nyipi ewekë tro sa pane mekune la thangane la itre trenge ithanata së, thene la itre atr hne së hna ithanata kow. Nge eje hi lai laka, tro hë sa atre la nyine tro sa qaja me kuca, matre tro sa hane thiina ka menyik tui Iehova.​—Ite edomë 15:28. w15 15/5 4:​8, 9

Ame la kola lepe la itre trejin hnene la ketre hulö, loi e tro sa hamëne la ka nyipi ewekë koi angatr, me amamane la ihnimi së koi angatr, nge tro fe sa akeukawanyi angatr. (Ite edomë 17:17) Thupene la ketre wene ka catr, hna angazone la uma ne la ketre sine föe. Öni eahlo: “Tru la madrineng troa hane sine la organizasio i Iehova, tha qa ngöne hmekuje kö la hna ithue ewekëng, ngo hnene fe la ixatua hnenge hna kapa ngöne la götrane u.” Ame la ketre trejine föe ka pë föen, tre, kösë pëhë aliene la mele i angeic lo kola thë la uma i angeic hnene la ketre wene. Thupene la hna nyihnyawane hmaca la uma i angeic hnene la itre trejin, öni angeic: “Thatreine kö ni qeje pengöne la etrune la madrineng! Casi hi, eni a olene koi Iehova!” Tru la madrine së laka, itre trejin, trahmanyi me föe, a hnime me meku itre xan. Tru catre hmaca kö la madrine së koi Iehova me Iesu Keriso, lue ka hnimi së me meku së. w15 15/6 1:​17

Tusi Hmitrötre a qaja la aqane tro la trahmanyi a ujë kowe la föe, me föe koi trahmany matre tha tro kö a ahlëne la itre aja ka ngazo. Tro la Keresiano a amamane la thiina ne ka iaja kowe hmekuje hi la föi angeic, maine kowe la jajinyi hna ajane troa faipoipo memin. Tha tro kö angeic a thele troa wesiwesi koi ketre. Itre xan a mekune ka hape, nemene la engazone e troa amamane la thiina ne ka iaja kowe la ketre atr, jëne la aqane enije wesiwes, me aqane ujë, me aqane goe. Kola mekune ka hape, itre ewekë lai ka pëkö engazon, ke tha kolo pena kö lai a iketr memin. Ngo, ame la kola nyiqaane iwesiwesikeu hnene la lue atr, cia ha thei nyidroti la itre mekune ka sis, nge tro lai a huli nyidro kowe la kuci ngazo. Hna traqa tune hë lai ekö, nge ijije fe hi lai troa traqa tun enehila. Iosefa la ketre tulu ka lolo koi së. Hnene lo föi Potifara hna thele troa iaö Iosefa matre troa ce meköle me eahlo. Hnei angeice hna xel, ngo tha mano kö eahlo iaö angeic. Eahlo a sipo Iosefa o drai “troa ce meköle me [eahlo].” (Gen. 39:​7, 8, 10) Ngo eje hi laka, ame koi Iosefa, tha tro jë kö a ie lai aqane ujë wesiwesine lai föe, matre tha hane fe kö angeice nyipi ewekëne la itre nyinyithiina i eahlo. Haawe, tha hnei angeice kö hna nue troa kökötre e kuhu hni angeice la itre aja ka ngazo. w15 15/6 3:​10, 11

Aja i Iehova fe tro sa meku angatr, me aqane imelekeu i anga­tre me Nyidrë. Kolo fe a qaja ka hape, e ngazo jë angatre koi së, tro sa canga nue la ngazo i angatr. E tro sa goeëne la itre ngazo hna kuca koi së, tre, ceitu me ka pëkö pengön. Haawe, e tro sa nue itre ej, easë hi lai a amamane ka hape, easa hnimi angatr. Easë fe a amamane ka hape, atraqatre la ole së koi Iehova, Atre senge trije la itre ngazo së. (Kol. 3:​13) Pine laka itre atr ka tha pexeje së, nango jole e itre xa ijine troa nue la ngazo hna kuca koi së. (Lev. 19:18) E tro sa nyiqaane ithanatane la hna kuca koi së hnine la ekalesia, tro hë itre xane lai a nyixölë së, nge tro lai a angazone la casi ne la ekalesia. Maine tro pala hi së lai a ipico eë, easë hi lai a amamane ka hape, easa wangesixane la thupene mel. Nge gufa ha koi së la itre manathithi qa ngön ej. (Mat. 18:35) E tha nue kö së la ngazo hna kuca koi së, ketre tha tro hë Iehova lai a senge la itre ngazo së. (Mat. 6:​14, 15) Ketre, e aja së tro Iehova a senge la itre ngazo së, the kuca kö la ketre ewekë hnei Nyidrëti hna sisin.​—1 Ioane 3:​4, 6. w15 15/6 5:​9-​11

Iehova la Atre hamë së la hnëqa ne ixatua matre lolo la paradraiso ne la u. Ngo, nemene la aqane tro së lai a ixatua? Ene la troa cainöjëne la maca ka loi ne la Baselaia, me inine la itre atr matre tro angatr a nyihlue i Iehova. Ame la easa xatuane la ketre atr troa nyihlue i Iehova, easë hi lai a ixatua göi troa kökötre la paradraiso ne la u. (Is. 26:15; 54:2) Ketre, ame la easa catre huliwa troa alolone la itre thiina së, ketre ixatua së hi lai matre troa alolone la paradraiso ne la u. Aqane tro hi së lai a ea la itre atr kowe la paradraiso ne la u. Eje hi laka, tha hnene kö la etrune la aqane atre së la Tusi Hmitrötr la ka troa ea la itre atr kowe la organizasio, me koi Iehova, me Iesu, ngo hnene la thiina së ka wië. Eje hi laka, tru la madrine i Iehova me Iesu la nyidroti a goeëne la elolone la paradraiso ne la u enehila. Ame la madrine hne së hna melëne enehila qa ngöne la hne së hna ixatua alolone ej, tre, ka co catre hi lai hune la madrine nyine tro sa kapa elany e nyidrawane jë së la ihnadro matre paradraiso asë pi. w15  15/7 1:18-​20

Ame ngöne la hneijine enehila Satana a ajane tro la itre atr a mekune ka hape, sisitria kö angeice hui Akötresie. Iehova a nue së tro sa isa iëne la hne së hna troa nyixölen. Ngo tune kaa fe epun? Epuni a hane drenge thenge Iehova, ke epuni a mekune ka hape, sisitria kö la musi Nyidrë hune la itre sipu mekuna i epun? Xecie kö koi epuni laka, Baselaia i Nyidrëti hmekuje hi la ka troa nyinyine la itre jol? Nge tune kaa, atreine kö la atr troa ketre sipu mus? Maine tro la ketre atr a hnyingë epuni la hnei epuni hna mekune göne la ketre parti politik, maine ketre gurup, maine ketre organizasio, nemene la nyine tro epuni a sa? Ame la itre xa gurupe cili, tre, maine jë tha ka ngazo kö, nge angatre jë a ajane troa xatuane la itre atr. Ngo, canga mama hi koi së laka, Baselaia i Akötresieti hmekuje hi la ka troa nyinyine la itre jol, me apatrene la nöjei thiina ka tha meköti kö. Ketre, loi e tro sa xötrethenge la itre hna amekötine hnei Iehova e hnine la ekalesia, ngo tha tro kö sa isa kuci mekun. Celë hi lai ka acatrene la cas e hnine la ekalesia. w15 15/7 3:​7, 8

E tro sa goeëne la itre hna xupe hnei Iehova, easë fe a atrehmekune la etrune la ihnimi Nyidrëti koi së. (Rom. 1:​20) Tha hnei Iehova kö hna xupe la ihnadro göi tro hi sa mele ngön. Ngo hnei Nyidrëti hna hamëne la nöjei ewekë nyine troa amadrinë së mina fe. Ka tune la easa xen, laka tha göi tro hi sa mel, ngo hnei Iehova hna hamëne la nöjei pengöne xen matre hetre madrine së qa ngön! (Ate cai. 9:7) Hnei Iehova hna xupi së cememine la atreine troa kuca la ketre huliwa ka loi, nge troa öhnyi madrine qa ngön. (Ate cai. 8:15) Hnei Nyidrëti hna amekötine kowe la itre atr troa nyialiene la ihnadro, me eën, me thupëne la itre ie, me itre waco, me itre xa ewekë ju kö ka mele hune ej. (Gen. 1:​26-​28) Hnei Nyidrëti fe hna xupi së cememine la itre thiina ka lolo matre tro sa nyitipu Nyidrë!​—Efe. 5:1. w15 15/8 1:​4, 5

Mama hnyawa ha koi së ka hape, eatre hë la itre hna perofetane hnei Tusi Hmitrötr, nge easenyi catre hë matre traqa pi la pune la fene celë. Easa treqene troa ujë hnene la “ite jone ka luepi [maine treen]” me “öni ka sheshe” kowe la hmi ka thoi, ene Babulona Atraqatr. (Hna ama. 17:16) Atre hnyawa hi së, laka, tro Akötresieti a “amë e kuhu ite hni angate” la mekune troa lepe la hmi ka thoi, nge tro lai a canga traqa nge, thatre kö së la ijin! (Hna ama. 17:17) Tha tro pi kö sa mekune ka hape, hmitre pala kö matre traqa pi la ijine cili. Easenyi catre hë matre traqa pi la pune la fene i Satana tune la hna qaja ngöne la topik së ngöne la drai enehila. (Hna ama. 16:15) Epi tro sa lapa hmek, me catre huliwa i Iehova, me mejiune ka hape, Nyidrëti la “ate huliwa i angat’ angete teqe [N]yidë.”​—Is. 64:4. w15 15/8 2:​17

Maine nyipici laka, aja së troa loi koi nöjei atr, ngo ame pe tha tro kö sa nyi sinee ne la itre atr ka tha drengethenge Akötresie. Tha loi kö e troa iatre memine la atr ka tha bapataiso petre kö laka, tha atre Anyipici Iehova petre kö. Ka sisitria catre kö la troa kepe së hnei Akötresie hune la troa kepe së hnene la itre atr, ka tha hni kö koi Nyidrë. Loi e tro sa nyi sineen hmekuje hi la itre atr ka kuca la aja i Akötresie. Ka hetre ethanyine la tro sa nyi sinatrongene la itre atr ka xele ma drei Iehova. Tro sa ce wange la ka traqa kowe la angetre Isaraela ekö. (Eso. 23:​24, 25; Sal. 106:​35-​39) Ame hë la pun, hnei Iehova hna nuetrije la nöje Isaraela, me iën pena la ekalesia i Keresiano nyine nöje i Nyidrë.​—Mat. 23:38; Ite hu. 2:​1-4. w15 15/8 4:​7, 8

Hnei Iehova hna xupe la atr me aijijë angeic troa atreine ië mekun. Celë hi matre hnei Nyidrëti hna xatua së me amekötine la itre jë së. Hnei Nyidrëti hna xupi së cememine la mekuthetheu matre tro sa atreine atrehmekune la loi me ngazo. E tro sa inine hnyawane la mekuthetheu së, tro lai aijijë së troa kuca la loi me sewe së troa kuca la ngazo. Haawe, hane hi lai aqane hnimi së hnei Iehova, nge aja i Nyidrë tro sa mele madrin. Hetrenyi enehila la itre atr ka kuca la loi, nge ka sisine la ngazo ngacama thatre kö angatre la aliene la Tusi Hmitrötr. (Rom. 2:​14, 15) Angatr a ujë tune lai, ke, hetrenyi angatre la mekuthetheu. Celë hi ka sawa la itre xan troa kuca la itre ewekë ka ngazo catr. Pane mekune jë së: Maine pë ju mekuthetheu ne la atr, tro lai a tru catre ­hmaca kö hnei ewekë ka ngazo hna troa kuca. Easë pe a olene koi Iehova, ke hnei Nyidrëti hna xupe la atr cememine la mekuthetheu! w15 15/9 2:​1, 2

Kola upi së hnei Ioane aposetolo troa mekune hnyawa la ihnimi ka tru i Iehova koi së. Öni angeic: “Hana wange la etrune la ihnimi lo hnei Tetetroti hna hamë shë.” Ame la easa lapa mekune hnyawa la etrune la ihnimi Iehova koi së, memine la aqane hnimi së hnei Nyidrë, easë hi lai a easenyi catre koi Nyidrë, nge kola kökötre catre fe la ihnimi së koi Nyidrë. Ngazo pe, thatreine kö la itre atr mekun ka hape, Akötresie a hnimi angatr. Öni angatr, tha hane kö Nyidrëti hnehengazone la itre atr. Maine jë angatr a mekune ka hape, Akötresieti hmekuje hi a kuca la itre wathebo göi troa trane la itre ka ena itre ej. Ketre, hnene la itre ini ka thoi, matre kola mekune hnei angatr ka hape, ka iakötrë lae Akötresie, matre thatreine kö tro angatr a hane hnimi Nyidrë. Itre xan a mekune ka hape, ka hnime asë hi Akötresieti la itre atr ngacama kuca ju hë angatr la ngazo. Ngo, qa ngöne la hnei epuni hna inine la Tusi Hmitrötr, atrepengöi Iehova ha epun. Atre hnyawa hi epuni laka, ihnim la thiina ka sisitria i Nyidrë, nge hnei Nyidrëti hna upe la nekö i Nyidrë troa mec thatraqai së.​—Ioane 3:​16; 1 Ioane 4:8. w15 15/9 4:​1, 2

Ame la easa kapa la ihaji qaathei Iehova, me nue Nyidrëti troa ini së, tre, easë hi lai a thele troa kuca la meköt, ene pe hetrenyi jë hi the së la tingeting. Eje hi laka, “ame la nöjei hna hajine asë, te, tha mekune kö laka nyine amadin, ngo nyine ahleuhleune pe.” Ame e cili, nemene la aqane tro sa ujë? Tha tro pi kö sa wangesixane la ihaji qaathei Iehova, maine lapa fë wesitre pena. Pine laka tru la ihnimi së koi Iehova, loi e tro pala hi sa drengethenge la itre ihaji qaathei Nyidrë, me kuca la ka ijij matre troa saze. Kola ukune la itre atr hnene la fene i Satana troa pi draië, me tha imeku. Nyimutre la itre atr ka xele matre troa ameköti angatr. Ame itre xan, kola kapa la itre ihaji, ke, angatr a xouene la pune koi angatr. Tha tro pi kö sa ujë tune lai. Öni Tusi Hmitrötr, “The ce thina kö nyipunie memine la fene hnengödrai.” Loi e tro pe sa atre hnyawa la hnei Iehova hna ajane tro sa kuca, matre troa amadrinë Nyidrë. (Rom. 12:2) ­Nyidrëti a hamë së la itre eamo ngöne la nyipi ijin jëne la organizasio. Kola amekunë së la aqane tro sa ujë kowe la trahmany maine föe, me aqane troa iëne la itre sinatronge së, me aqane troa iëne la itre nyine iamadrinë. Ame la easa drengethenge hnyawa la itre eamo qaathei Iehova, me kuca la ka ijij matre amadrinë Nyidrë, easë hi lai a amamane la hni ne ole së kowe la itre ixatua qaathei Nyidrë, me etrune la ihnimi së koi Nyidrë.​—Ioane 14:31; Rom. 6:​17. w15 15/9 5:13, 15

Qa ngöne laka thatreine kö tro sa ketre sipu acatrene la lapaune së, haawe, nyipi ewekë tro sa sipone la uati hmitrötr koi Akötresie. Pine nemen? Pine laka, ame la lapaun tre ketre igötranene la wene ne la uati hmitrötr. (Gal. 5:​22) Aqane ujë ka inamacane la tro sa xötrethenge hnyawa la eamo i Iesu, me sipo Iehova matre tro pala hi sa hetrenyi la uati hmitrötr. Öni Iesu e qaja amë hë ka hape, tro Iehova a “hamëne la [u]ati [h]mitöte koi angete sipo anganyidë.” (Luka 11:13) Eje hi laka, e hetrenyi hë së la lapaune koi Akötresie, loi e tro sa acatrene ej pala hi. Kola aceitunëne la lapaun me eë. Ame la easa athi eë, kola mele catre la itre ukahlokin. Ngo, e tha nyi eene kö, tro hë lai a trotro lapa, uti hë la pi. Ngo, maine tro pala hi sa nyi eene la eë, eje hi laka, tro pala hi eje lai a mel. Ceitune hi lai memine la lapaun. Maine tro sa catre e Tusi Hmitrötr o drai me lapa mekune hnyawa ej, tro la aja së kowe la Tusi Hmitrötr me koi Iehova a kökötre catr. Tro hë së e cili a acatrene me akökötrene pala hi la lapaune së. w15 15/10 2:​6, 7

Hnene la itre ka inamacan hna öhne laka, tha jole kö troa mekune hmaca la ketre ewekë hne së hna e catrën. Atre hnyawa hi lai hnene la Atre xupi së, celë hi matre upi Iosua jë hnei Nyidrë troa e la tusi ne la Wathebo me “mekune ngöne ej,” kösë angeic a e koi angeic kö. (Ios. 1:8.) Maine tro sa e catrëne la Tusi Hmitrötr, tro fe lai a xatua së troa mekune catrën la hne së hna e, nge tha tro kö së lai a thëthëhmin. Nyipici laka, hetre nyine tro sa kuca matre troa lapa mekune hnyawa, me mekune catrëne la hne së hna inin. Celë hi matre, ame la ijine troa lapa mekune hnyawa, tre tha loi kö troa amë ej ngöne lo ijine epuni a kucakuca. Ketre, loi e troa hnen ngöne la ketre götrane gaa pë mejen, nge pëkö ewekë ka troa ajolëne la mekuna i epun. Ame la ketre ijin ne lapa mekune hnyawa hnei Davita, tre kolo ijine tha meköle kö nyidrëti e jidr. (Sal. 63:6) Hnei Iesu fe, atr ka pexej, hna iëne la itre götrane gaa pë mejen göi troa lapa mekune hnyawa me thith.​—Luka 6:​12. w15 15/10 4:​4, 6, 7

Ame la ketre ijin, hnene la itre atr qaa Galilaia hna traqa troa wai nyidrë. (Ioane 6:​22-​24) Atre hnyawa hi nyidrë la sipu kepine ne la traqa i angatr, tha hnene kö la­ka angatr a pi dreng la ini qaathei nyidrë, ngo angatr a aja xen. Haawe, hnei nyidrëti hna wenë ameköti angatr, me qaja hnyawane koi angatr la itre nyine troa kuca matre troa ujë. (Ioane 6:​25-​27) Maine nyipici laka, thatre kö së la ka eje e kuhu hni ne la atr, ngo ame pe, ijiji së hi troa macamek. Ijiji epuni hi troa atrehmekune la aqane goeëne la nekö i epun la huliwa ne cainöj. Isa sipu thele jë me hape, ‘Nyëne kö a ajane troa cainöj trootro maine nyëne hi a tro göi kemej, me nyine ij?’ Maine öhne hi ka hape, tha nyipi ajane kö angeic troa cainöje trootro, haawe, thele jëne jë matre troa hetre aja kow. Eköth amë jë la itre mekune nyine tro la nekönatr a eatrën ngöne la hna cainöj. Nge ame la epuni a ce cainöje me ketre trejin, tre, hamë huliwa i nyëne pi matre atreine nyën troa eatrën lo hna eköthe amë koi nyën. w15 15/11 1:​10, 11

Ame la Akötresi së ka ihnim, tre ka hamëne pala hi Nyidrëti la ka sisitria kowe la itre hlue i Nyidrë. Hanawange la ketre ewekë hna hnëkëne koi së, önine la Tusi Hmitrötr: “Tro nyidëti [Iehova] a köle tije la nöjei tenge timida asëjëihë qa ngöne la ite lue meke i angat ; nge pa hmaca kö mec ; me hace hni me teij, me aköt ; ke patë hë la ite ewekë hnapan.” (Hna ama. 21:4) Hane hi la mele ka lolo hnei Iehova hna hnëkën thatraqane la itre ka wangatrune la ihnimi Nyidrë! Tusi Hmitrötr a thuemacanyi së ka hape: ‘Ati hatene ju la atre hni nyipici, nge hanawange la atr ka meköt ; ke hetre pune ka loi kowe la atr ka tingeting. Ngo tro ha cengöne apatrene la angetre sasaith ; ame la pune la itre ka ngazo, tre, troa thupa trij.’ (Sal. 37:​37, 38) Drei la “atre hni nyipici”? Kolo atr ka thele troa atre pengöi Iehova hnyawa me Iesu, me ka isine troa kuca la aja i Nyidrë. (Ioane 17:3) Ka xecie koi angeic ka hape, “kola pate la fene hnengödrai, memine la hna aja kow ; ngo troa cile huti epine palua la ate kuca la aja i Akötesie.” (1 Ioane 2:​17) Pine laka calemi catre hë la pun, haawe, nyipi ewekë catre tro sa ‘mejiune koi Iehova me trongëne la jë i Nyidrë.’​—Sal. 37:34. w15 15/11 3:​11, 12

Eje hi laka, hnene la ixatua ne la Joxu së, matre hna aijijë së pala hi troa ketr la hni ne la itre xa atr ka nyimutre, hnene la itre aqane huliwa ka hnyipixe. Tha nyine wangacone kö la itre aqane huliwa cili, ke jëne itre ej, ala nyimu pi hë la itre ka drenge la maca ka loi, ngacama xalaithe hi la itre ka cainöje trootro. (Mat. 9:​37) Hna huliwan ekö la itre zonal ne fen maine nuvel, göi troa qaja la maca ka loi. E nöjei wiik hnei C. Russell hna hnëkëne la ketre cainöj, me iupi fë kowe la ketre hnë feja zonale ka hnyipixe. Ame hë e thupen, kolo ha fejane la itre cainöje i nyidrë e Canada, me Europe, me Etazini. Haawe, ame hë ngöne lo macatre 1913, hna fejane la itre cainöj cili ngöne la 2 000 lao zonal, nge hna e hnene la ala 15 milio lao atr! Iradio mina fe la ketre jëne cainöje së. Ame lo 16 Eiperem 1922, hnei J. Rutherford hna cile fë la pane cainöje i nyidrë hna amë ngöne iradio, nge hna drenge hnene la ala 50 000 lao atr. Tha qea ju kö e thupen, nge hetre sipu iradio së hë, hna hëne ka hape, WBBR. Hna nyiqaane drenge la iradio cili lo 24 Febuare 1924. w15 15/11 5:​10, 11

Iehova fe a jëne la itre hnei Nyidrëti hna xup matre eatrëne la aja i Nyidrë. Hnei Akötresieti lo hna thele jëne matre tro Noa a cane la aka, nge tro fe Bezaleli a ketre atr ka atreine huliwa. Hnei Iehova fe hna kuca matre tro Gideona a ketre atre isi ka tru, nge Paulo la ketre mesinare. Ka tru aliene la ëje i Akötresie kowe la nöje i Nyidrë, celë hi kepine matre amë jë la ëje i Nyidrë hnene la komite ne la Traduction du monde nouveau hnine la Tusi Hmitrötre celë. Kolo pala hi a elë trootro la etrune la itre Tusi Hmitrötr hna ujëne ngöne la nyimu qene hlapa, nge hna apatrene pë hë la ëje i Akötresie. Hna nyihnane pena ha hnei “Joxu,” maine ëjene la ketre haze ne la nöje cili. Celë hi kepine matre mekune jë hi la Lapa Ne Xomi Meköt la enyipiewekëne troa hetrenyi la Tusi Hmitrötr ka atrune la ëje i Akötresie, ngöne la nöjei qene hlapa. (Mal.3:​16) Ame enehila, kola mama me nyipiewekëne la ëje i Iehova ngöne la itre Tra­duction du monde ­nouveau ngöne la 130 nge hetre munën lao qene hlapa. w15 15/12 2:​7-9

Hetre mene i Iehova troa ati mec kowe la itre atr. Hnei nyidrëti hë hna ati mec kowe la itre xa atr nyine nyithupene koi angatr, tui Farao ngöne la hneijine i Aberahama, me koi Miriama fe, xa i Mose. (Gen. 12:17; Num. 12:​9, 10; 2 Sam. 24:15) Ketre, hnei Nyidrëti hna lepe la nöje Isaraela hnene la “ite meci asë me ite ngazo asë” lo angatr a tha idrei. (Deu. 28:​58-​61) Ame itre xa ijin, hnei Nyidrëti hna thupën matre tha tro kö a tithi angatr hnei mec. (Eso. 23:25; Deu. 7:​15) Hnei Nyidrëti fe hna aloine la itre meci ne la itre xan e angatr, tui Iobu lo angeic a akötre catr me pi mec. (Iobu 2:7; 3:​11-​13; 42:​10, 16) Ka xecie hnyawa koi së laka, tru la mene i Iehova matre atreine hi Nyidrë aloine la itre sine mec. Hnei Iesu fe lo hna aloine la itre ka wezipo. Ame lo nyidrëti e celë fen, hnei nyidrëti hna aloine la itre lepera me itre ka meci ön. Hnei nyidrëti fe hna fe la lue mekene la itre ka timek, me acilëne la itre ka genyi ca. (Mat. 4:​23, 24; Ioane 9:​1-7) Jëne la itre iamamanyikeu ka tune la, easa trengeneune la itre ewekë ka lolo hna troa kuca elanyi hnei Iesu ngöne la fene ka hnyipixe. w15 15/12 4:​3, 4