Mei

Tro së lai a atreine ithanata amenyikenyi koi angeic e hne së hna metrötrë angeic, me nyipi ewekëne la itre mekuna i angeic. Celë hi hna kuca hnei Iesu. Ame lo nyidrëti a öhne la trenge aja ne la ka ala nyimu troa drei nyidrë, tru la madrine i nyidrëti troa ce me angatr me ini angatr. (Mar. 6:​34) Nge ame la kola qaqa nyidrë, tha hnei nyidrëti kö hna të. (1 Pet. 2:​23) Nyipici laka, ame itre xa ijin easa qaja la itre trenge ewekë ka iakötrë pi hë kowe la itre atrene la hnepe lapa së maine itre sinee së pena. Easa ujë tune lai, ke itre atr lai hne së hna atre hnyawa. Ma tro së lai a mekune ka hape, tha nyipi ewekë kö tro sa thupëne la aqane troa ithanata koi angatr. Ngo, ame Iesu, ka menyike pala hi la aqane ithanata i nyidrë kowe la itre sinee i nyidrë. Ame lo angatr a iwesitrë göi troa atre la ka sisitria e angatr, hnei nyidrëti hna haji angatr cememine la menyik. Hnei nyidrëti fe hna wenë la mekuna i angatr jëne la ketre nekönatr. (Mar. 9:​33-​37) Loi e tro la itre qatre thup a nyitipune la tulu i Iesu, ene la troa hajine la itre trejin cememine la menyik.​—Gal. 6:1. w15 15/12 3:​15, 16

Pine nemene matre tro sa catre ihnimi trejin? Ame la kepine ka tru matre nyipi ewekë tro sa ihnimi trejin, tre hnene laka, Iehova la ka upi së troa ujë tune lai. Thatreine kö së troa hnimi Iehova, e tha hnime kö së la itre trejin. (1 Ioane 4:​7, 20, 21) Ame la ketre kepin, tre nyipi ewekë koi së la ixatua ne la itre trejin ngöne la itre ijine jol. Ame la Paulo a cinyianyi kowe la itre keresiano ne Heberu, atre hnyawa hi nyidrë laka, easenyi hë matre tro angatr a nue la itre uma me itre mo i angatr. Ase hë Iesu qaja amë la ijine cili, laka ketre ijine ka troa jole catr. (Mar. 13:​14-​18; Luka 21:​21-​23) Celë hi matre, nyipi ewekë tro la itre keresiano a acatrene la ihnimikeu i angatr qëmekene troa traqa kowe la ijine cili. (Rom. 12:9) Easenyi hë matre traqa pi la ketre akötre laka, tha hane kö traqa tun kowe la fen. (Mar. 13:19; Hna ama. 7:​1-3) Matre, nyipi ewekë tro sa icasikeu lapa. Hnei Paulo hna amexeje kowe la itre keresiano ne Heberu ka hape, tro fe angatr a ihnimikeu me ikucakeune la loi.​—Heb. 10:​24, 25. w16.01 1:​6-8

Ame ngöne lo Penetekos macatre 33, hna traqa la ketre ewekë ka tru kowe lo ala 120 lao itretre drei Iesu. Angatr a catre thith ngöne lo hnahage ka he koho e Ierusalema. (Ite hu. 1:​13-​15) Nge eitre hadredre lao macatre qëmekene lai, hnei Ioela perofeta hna qaja amë hë la ewekë cili. (Ioela 2:​28-​32; Ite hu. 2:​16-​21) Hnei Akötresieti hna nenge kowe la itre keresiano la uati hmitrötre i Nyidrë, ame hna ië angatr e cili. (Ite hu. 1:8) Thupene lai, hna traqa koi angatr la ka ala nyimu, ame hna nyiqaane ithanatane hnene la itretre dreng la nöjei ewekë ka lolo ka traqa koi angatr. Hnei Peteru aposetolo hna qaja la ewekë ka traqa koi angatr memine la enyipiewekëne ej. Matre, öni angeice kowe la ka ala nyimu: “Ietraju, mate isa bapataiso nyipunieti pi asë ngöne la atesiwa i Iesu Keriso ; mate shenge tije pi la nöjei ngazo i nyipunie ; nge tro nyipunie a hetenyi la ahnahna ene la [u]ati [h]mitöt.” Traqa koi 3 000 lao hna bapataisone la drai cili, me kapa fe la uati hmitrötr.​—Ite hu. 2:​37, 38, 41 w16.01 3:​1-3

Kola hapeue la kola hape, kola xeni la areto me iji la waina hnene la ketre atr ngöne la Drai Ne Amekunën, “nge tha ijij” pe? E tha nyipici kö angeic koi Iehova, ame la angeic a xeni areto me iji la waina, angeice hi lai a amamane la pë metrötre i angeic. (Heb. 6:​4-6; 10:​26-​29) Kolo hi lai a amekunëne la itre hna iën ka hape, ‘hete thupene koi angatr elanyi la hna hë angatr kow,’ e tro angatr a mele nyipici. (Fil. 3:​13-​16) Öni Paulo kowe la itre keresiano hna iën: “Kola iele nyipunie troa tro thenge la hna hë nyipunie kow.” Nemene la aqane tro angatr a trongëne lai? Öni ­Paulo: “Memine la hni ka ipië me menyik, memine la xomi hni ahoeany, kola isa xomi hni kö nyipunie ngöne la ihnim ; Kola ­catejë nyipunie troa xölehuje la ce hni qa thene la [u]a ngöne la hna otene la iloi.” (Efe. 4:​1-3) Uati hmitrötre i Iehova la ka xatuane la itre hlue i Nyidrëti troa ipië, ngo tha tro kö a pi mama.​—Kol. 3:​12. w16.01 4:​5, 6

Pane meku Aberahama jë së, 125 lao macatre i nyidrë, nge nyidrëti a nango elëne la wetr. Isaaka nekö i nyidrë a xötrethenge nyidrë, nge 25 lao macatre i angeic. Angeic a thue la uke sinöe, nge Aberahama a xome trongëne la hele me itre xa ewekë ju kö göi troa athi eë. Ketre ijine lai ngöne la mele i Aberahama ka hace catr. Tha hnene kö laka qatre catre hë nyidrë, ke, ka egöcatre pala kö nyidrë, ngo hnene laka hnei Iehova hna upi nyidrë troa huujëne la nekö i nyidrë (Gen. 22:​1-8) Ketre ijine lai ka tupathe la lapaune i Aberahama. Ngo hetre kepine matre kola drengethenge Akötresie hnei Aberahama. Hnei nyidrëti hna idrengethenge hnene laka, hetrenyi nyidrëti la ­nyipi lapaun. Xecie hnyawa koi nyidrë laka, tha tro pi kö Iehova a upi nyidrë troa kuca la ketre ewekë ka troa akötrë nyidrëti palua. Nge xecie hnyawa fe koi nyidrë laka, e tro nyidrëti a idrengethenge, tro Iehova a amanathithi nyidrë me nekö hnimina i nyidrë. Nemene la ka aijijë Aberahama troa hetrenyi la lapaune ka catre celë? Hnene la lue ewekë, ene la atrehmekune memine la hna melën. w16.02 1:​3, 4

Hnëqa i Maria troa upune, me hnahone me hetrune la nekö i Akötresie! Atre hnyawa hi së la manathithi ka ej thei Maria. Ngo hapeue la itre mekun ka ej thei angeic, nge ka nango ajolë angeic? Hnene la angela Gaberiela hna qaja lo ka hape, tro angeic a upune, ngo tha hna ce meköle kö me trahmany. Ketre, tha hnei Gaberiela kö hna thuemacanyine la itre atrene la hnalapa i angeic, me itre ka lapa ezi angeice pena. Nemene jë elanyi la mekuna i angatr? Tro Maria elanyi a qejepengöne tune kaa koi Iosefa ka hape, pëkö hnei angeice hna iatre memin? Nge drei jë kö la etrune la hnëqa i angeic troa hetrune la nekö i Akötresie! Tha nyipi atre asë kö së la itre mekune ka ajolë angeic, ngo atre hnyawa hi së la hnei angeic hna qaja e thupene la hna ithanata koi angeic hnei Gaberiela, kolo trenge ewekë ka nyi tane la topik ne drai celë.​—Luka 1:​26-​37. w16.02 2:​13, 14

Husai la ketre sinee i Davita Joxu ka nyipici. Ame lo kola thele hnene la nöj troa acili joxu Abasaloma, nyipi ewekë tro Husai a catr matre tro pala hi angeic a nyipici koi Davita me Akötresie. Drenge hë angeice laka, traqa ha Abasaloma e Ierusalema, nge kötre hë Davita. (2 Sam. 15:13; 16:15) Matre nemene jë la hnei angeice hna troa kuca? Tro kö angeic a nue Davita me sajuë Abasaloma? Ohea. Ngacama qatre hë Davita, nge ala nyimu la itre ka thele troa humuthi nyidrë, ngo hnei Husai hna nyipici pala hi koi Davita, ke Davita la hnei Iehova hna acile troa joxu. Celë hi matre, angeic a tro jë kowe la wetr Elaio troa itronyi me Davita. (2 Sam. 15:​30) Hnei Davita e cili hna upi Husai troa bëeke Ierusalema eë, matre troa ce xöle me Abasaloma. Ame la aja i Davita, tre tro Abasaloma a drenge la mekuna i Husai, ngo tha tro kö a drenge la mekuna i Ahithofela. Hna catr me nue mele hnei Husai matre troa drengethenge Davita me nyipici koi Iehova. Nge hnei Davita fe hna catre thith matre tro Iehova a xatua Husai; nge celë hi ewekë lai ka traqa, ke hnei Abasaloma hna drei Husai.​—2 Sam. 15:31; 17:14. w16.02 4:​15, 16

Nemene la aqane tro së, itre keresiano, a öhnyi eloine qa ngöne la itre hna amekötine hnei Iehova hna hamëne koi angetre Isaraela? Loi e tro sa pane cile me goeëne la itre trepene meköti ka nyi trepene la Wathebo i Mose. Maine nyipici laka, tha easë hmaca kö a mele fene la Wathebo cili, ngo easë pala hi a mejiune kowe la itre trepene meköti ka mama qa ngön ej, ka köja gojenyi së ngöne la nöjei götrane la mele së, me aqane tro sa hmi koi Iehova. Hnei Nyidrëti hna thele jëne matre tro itre ej a mama e hnine la Tusi Hmitrötr, nge matre tro sa atrepengöne hnyawa itre ej. Ketre, tro la itre trepene meköti ka ej e cili a köja gojenyi së, nge tro fe sa madrine laka, hetre ketre ewekë hna ini së hnei Iesu ka sisitria kö hune la Wathebo. Drenge ju la hnei Iesu hna qaja, kola hape: “Ase hë nyipunieti denge lo hna qaja, ka hape, the tro kö eö a kuci ngazo ; ngo ini pe a qaja koi nyipunie, ame la ate goeëne la fö’ i ket’ ate me meciu nyido, ase hë angeice kuci ngazo me nyido e kuhu hni.” Tha tro hmekuje kö së a kötrene la kuci ngazo, ngo nyipi ewekë fe tro sa thipetrije la itre mekune me aja ka sis.​—Mat. 5:​27, 28. w16.03 4:​6, 8

Akönia upi Samuela jë kö hnei Iehova troa drenge la nöj, ke, tha pi eatrëne kö nyidrë la aja i angatr troa hetre joxu. (1 Sam. 8:​7, 9, 22) Maine nyipici laka, hetrenyi Samuela la itre mekune cili, ngo tha traqa pi kö koi nyidrë la zalu, maine wesitre pena kowe la atr ka troa nyihna i nyidrë troa elemekene la nöj. Ame la Iehova a upi Samuela troa sië Saulo hnei wakac, tha cile hnö kö nyidrë. Ngo hetre hni ne aja i nyidrëti pe troa idrengethenge, pine laka, tru la ihnimi nyidrë koi Iehova, ngo tha hnene kö laka qa i nyidrë troa kuca. Ala nyimu la itre qatre thup enehila ka maca, nge ka nyitipu Samuela, ene la hna inin me hnëkëne la itre trejin trahmany cememine la ihnim. (1 Pet. 5:2) Hetre hni ne ajane la itre qatre thupe celë troa inine la itre trejin, nge tha ka cile hnö kö angatr troa ce thawa la itre hnëqa ngöne la ekalesia me itre xa trejin hna inin. Ame koi angatr, ame la itre trejine hna inine celë, tre, itre sine “ce huliwa” me angatr ka nyipiewekë catr. Nge itre trejine lai ka troa xatua angatr elanyi troa kuca la itre huliwa ne la ekalesia. (Rom. 16:​3; Heb. 13:16) Ketre, tru la madrine ne la itre qatre thupe troa goeëne la itre trejin hnainin la angatr a huliwane la atreine i angatre troa xatuane la itre hlue i Iehova.​—Ite hu. 20:35. w15 15/4 1:16, 17

Hnei Azaria Joxu “hna kuca la meköti xajawa i Iehova,” ngo hnei Iehova pe hna lepi Azaria hnei lepera. (2 Ite jo. 15:​1-5) Pine nemen? Tha hnei Tusi Hmitrötre kö hna qaja la kepin. Matre, nemene la hnei epuni hna mekun göne la aqane ujë i Iehova? Maine atre Iehova hnyawa hi epun, tha tro kö epuni a lueluëne la emekötine la aqane ujë i Nyidrë. Ame Azaria Joxu tre, hna hëne fe ka hape Uzia Joxu. (2 Ite jo. 15:​7, 32) Kola qaja hnene la hna edromën ngöne 2 Aqane lapa ite Joxu 26:​3-5, 16-21 ka hape, hnei nyidrëti hna kuca la meköti xajawa i Iehova, ngo ame hë e thupen, “nyidëti a pi tru mate hnëjinepi.” Hnene la joxu hna thele troa kuca la ketre ewekë hna nue hmekuje hi kowe la itretre huuj. Eitre wane lao itretre huuje ka sewe nyidrëti troa huliwa menu, me ka thele troa ahmacanyi nyidrë. Nemene la aqane ujë i nyidrë? Tru la elëhni nyidrëti koi angatr, ke pi tru catre hë nyidrë! Haawe, kola aijijë së hnene la itre ithuemacanyi celë troa trotrohnine la kepine matre Iehova a lepi Azaria hnei lepera. w15 15/4 3:​8, 9

Hna qeje Satana ka hape, Diabolo, kola hape, “Ka ixöjetrij.” Hnei Satana hna thaipië Akötresie me qeje Nyidrëti ka hape, atre thoi. Nge ame la kola hë Satana ka hape, “une ekö,” tre, kola amekunë së lo aqane iaö Eva hnei angeic jëne la ketre un. Nge ame la hnëewekë hna hape, “drakona atraqat,” tre, ka ihmeku hnyawa hi memine la pengö i angeic. Ka tru trenge elëhnin angeic, nge ka imethinë me catre iaö. Angeic a thele matre tha tro kö a eatre la aja i Akötresie, nge troa lepe apatrene la itre hlue i Nyidrë. Satana hi la ka tupathe la lapaune së. Celë hi matre Tusi Hmitrötr a hmekë së me hape: “Inamacanepi, me hmekënejë ; ke ithupëjia me nyipunie, ene diabolo, a tro agö, kösë liona a ho, kola thele tha i nyën.” (1 Pet. 5:8) Atraqatre pe la madrine i Satana ngöne la kola kuca la itre ngazo ka tru ­hnene la itre hlue i Iehova. Itre ijine Satana hi lai a qaja angazo Iehova.​—Ite edomë 27:11. w15 15/5 1:3, 4, 10

Aja i Iehova fe tro sa hane mele madrin, celë hi kepine matre hnei Nyidrëti hna hnëkëne la ketre göhnë ka mingöming, matre tro Adamu me Eva a mele ngön. (Gen. 2:9) Ngo Satana pala hi a thele troa huli së jëne la “ite iaö ne la tenga mo.” (Mat. 13:22) Ala nyimu la itre atr ka mekun ka hape, jëne madrin me hlemu loi la troa trene mani me trena mo. E troa löthi së hnene la aqane mekune cili, tro hë lai a luzi la ewekë ka tru ne la mele së, ene la imelekeu së me Iehova. Öni Iesu e hmekë së ka hape, “Pëkö ate ateine troa nyi hlue ne la lue joxu ; ke tro angeic’ a xelene la kete, me hanyine la kete ; nge troa fede kowe la kete, me jakalane [maine xelene] la kete. Tha ’teine kö nyipunie troa nyi hlue i Akötesieti me mamona.” (Mat. 6:​24) E tro sa thele hmekuje hi la itre mo, tro hë së lai a nue la huliwa i Akötresie. Nge celë hnyawa hi lai la aja i Satana. The tro pi kö sa nue la aja mani me aja mo, troa ananyi së qaathei Iehova. E aja së troa atreine isi me ngaa Satana, loi e tro sa atreine tuluthe la aqane wai pengöne së la itre mo.​—1 Tim. 6:​6-10. w15 15/5 2:​12

Tha ewekë ka hmaloi kö la troa trotrohnine la akötr ne la ketre atr, e tha hne së kö hna hane melën. Tune la itre trejine me easë, angatr a akötre pine la itre sine meci angatr, maine kolo pena a qanangazo angatr, maine pena, angatr a uti ipië trootro. Ala nyimu fe la itre atr hna akötrëne la hni me mekun, maine itre ka akötre pine la hna angazo angatr. Ame la itre xan, angatr a hiane casine la itre nekö i angatr, maine pena, angatre casi hi la ka nyihlue i Iehova ngöne la hnepe lapa i angatr. Itre atr asë hi a cile kowe la itre jol, nge tha ceitu kö la itre jol. Ngo easa ajane troa amamane la ihnimi së koi angatr, me hane xatua angatre fe. Matre nemene la nyine tro sa kuca? Eje hi lai laka, isapengöne kö la itre hna isa ajane hnene la itre atr. Haawe, maine tro sa drenge hnyawa la ketre atr, me thele troa trotrohnine la aliene hni angeic, tro hë së lai a atre la aqane troa xatua angeice hnyawa. Loi e tro sa amexeje koi angeic ka hape, Iehova fe a hane hnehengazo angeic, nge hetre hnei Nyidrëti kö hna troa kuca thatraqai angeic. Ame hi la easa ujë tune lai, tre easë hi lai a nyitipu Iehova.​—Rom. 12:15; 1 Pet. 3:8. w15 15/5 4:​6, 7

Qaathei Iehova la Mene i Keriso, matre xecie koi së ka hape, Akötresie Kapucatinasë a musi kowe la ecatrene la itre ewekë ka ej ngöne la fen. Qëmekene lo Iwë Atraqatr, öni Iehova: “Luengemene [7] pë hë la o drai, nge tro ni a upe la manie kowe la fene luate [40] la o drai nge luate [40] la o jid.” (Gen. 7:4) Ketre, easa e ngöne Esodo 14:21 ka hape, “Iehova a akacane la hnagejë hnene la huja ka cate.” Nge easa e fe ngöne Iona 1:4 ka hape, “Hnei Iehova hna upe la enyi atraqate kowe la hnagejë, ame hna wene atraqate ngöne la hnagejë, nge maine kaqa ha la he.” Haawe, ixatua ka tru koi së troa atre laka, ame ngöne la fene ka hnyipixe, tro pala hi Iehova elanyi a musi kowe la ecatrene la itre ewekë ka ej ngöne la fen. Tha tro hmaca kö sa xouene la itre hulö, ke, “thei nöjei ate la uma ne heta i Akötesie.” (Hna ama. 21:​3, 4) Tha luelue kö së ka hape, ame ngöne la Musi Iesu Ka Ca Thauzane Lao Macatre, tro Iehova a nue koi nyidrë la mene troa musi kowe la ecatrene la itre ewekë ka ej ngöne la fen. w15 15/6 1:​15, 16

Ame ngöne Ite Edomë mekene 7, easa öhne la pengöne la ketre thöthi ka ngenu me tro ezine la uma ne la ketre föe ne gojeny e jidr. Ame hë e thupen, nyidro ha kuci ngazo. Maine canga mekune ju angeice la itre ethanyine qa ngöne la huliwa i angeic, tro angeice lai a ananyi eahlo! Ite edomë 7:​6-​27 Tune la thöthi cili, tro fe hi së lai a hane xomi mekune menu e tha hne së kö hna pane mekune la itre ethanyine koi së elany. Ka ceitu hi lai memine la itre film e jidri catre hë, tru hi hnei ka amamane la itre ewekë ka sis, matre tro lai a hetre ethanyine koi së e tro sa tro saze chaîne lapa. Tro fe lai a hetre ethanyine e tro sa huje menune la itre liens ngöne ëternet hne së hna thatre, me hane thele itre xa sit ne porotrik me itre atr. Ketre mina, wange kö lo itre sit ka amamane la itre nyine iamadrinë me itre iatr ka sis. Haawe, tro la itre ewekë hne së hna goeën a aciane the së la itre aja ka sis, nge tro fe itre eje lai a huli së, matre tha drei Iehova pi hne së. w15 15/6 3:​8, 9

Öni Iesu: “Epi nue hnei Cilieti la itre gufa hun.” Ame ngöne la ketre ijin, öni nyidrë: “Epi nue hnei Cilieti la itre ngazo hun.” (Mat. 6:​12, MN; Luka 11:​4, MN ) Hna qeje pengöne lo 1951 hnene la Ita Ne Thup ka hape, ame la easa kuca la ngazo, tre, kösë easë hi lai a gufa koi Iehova. Ame la ihnim me idrengethenge, tre, lue nyine tro sa hamëne koi Iehova. Haawe, ame la easa kuca la ngazo xajawa i Akötresie, tha easë kö lai a hamëne la ewekë i Nyidrë. Önine la Ita Ne Thup, maine aja i Nyidrëti ju, ijiji Nyidrëti hi troa nuetriji së. Önine ej hmaca jë: “Ame la ka kuca la ngazo, tre ka pë ihnimi koi Akötresie.” (1 Ioane 5:3) Atraqatre la ole së kowe la thupene mele hna hamëne hnei Iehova, lo mele hna huujëne hnei Iesu göi troa senge la itre ngazo së! Nyipi ewekë koi së tro Iehova a senge la itre ngazo së o drai. Traqa ha koi 2 000 lao macatre enehila thupene la hna meci hnei Iesu thatraqa së, nge easë pala hi a kepe thangan. Loi e tro pala hi sa hetre hni ne ole kowe la ahnahna ka sisitria cili. Pëkö ala casi thene la itre atr, ka atreine troa hamëne la thupene mele ka ijije troa thepe së qa ngöne la ngazo me mec. ​—Sal. 49:​7-9; 1 Pet. 1:​18, 19. w15 15/6 5:​9, 10

Mekune ju fe la aqane huliwane së la itre jia ne huliwa ka hnyipixe matre troa cainöjëne la maca ka loi. Ka tune la site së jw.org ka ketr la itre atr ka ala nyimu matre tro angatr a hane kapa la ixatua ka ijij. Ame ngöne la nöjei hna saze ka hnyipixe cili, kola mama hnyawa la etrune la aqane nyipi ewekëne Iehova la itre atr, me ejuine la ihnimi Nyidrë koi angatr. Easa fe a madrine la itre ewekë hna saze göne la itre icasikeu së matre hetre traeme së troa kuca la hmi hnepe lapa, maine göi troa isa ini Tusi cas. Ketre, hetre madrine së fe qa ngöne la itre hna saze göi itre asabele së. Kösë kolo pala hi a lolo catr e nöjei macatre! Hetre ole së fe kowe la aqane hamë ini hne së hna kapa jëne la itre ini ka nyimutre hna hnëkëne hnene la organizasio. Ame ngöne la nöjei hna saze ka hnyipixe cili, kola mama hnyawa ka hape, Iehova a xomiujine la organizasio i Nyidrë, nge Nyidrëti pala hi a nyidrawane matre lolo la paradraiso ne la u! w15 15/7 1:​16, 17

Maine jole koi së troa tha hane sine la ketre gurup ne la fen, loi e tro së a isa hnying ka hape, ‘Maine Iesu ju fe e celë, nemene jë la hnei nyidrëti hna troa kuca?’ Ame ngöne lo nyidrëti e celë fen, kola icilekeu la itretre Iudra, me angetre Galilaia, me angetre Samaria. Ame angetre Iudra, me angetre Samaria, tre, tha ka ithanata kö. (Ioane 4:9) Ketre, ame itre Faresaio me itre Sadukaio, tre isazikeu la itre mekuna i angatr. (Ite hu. 23:​6-9) Ame angetre Iudra, pine laka ka inine angatre la Wathebo, angatr a mekune ka hape, ka sisitria kö angatr hune la itre xan. (Ioane 7:​49) Ketre, ka methinën angatr la itre telona, me itretre Roma. Ngo tha hane fe kö Iesu lö hnine la itre icilekeu cili. Ngacama hnei nyidrëti pala hi hna catre qaja la nyipici göi Iehova, nge ka mama hnyawa koi nyidrë ka hape, Isaraela hi la sipu nöje i Akötresie, ngo tha hane pi kö nyidrëti inine la itretre drei nyidrë troa amamane ka hape, ka sisitria catre kö angatre hune la itre xan. (Ioane 4:​22) Hnei nyidrëti pe hna ini angatre troa hnime la nöjei atr asë. w15 15/7 3:5

Hnei Iehova hna xupi së cememine la ajane troa hnime la itre atr, nge tro fe a hane hnimi së. Ngo ame itre xa ijin, canga tro hi sa kucakuca e tha drenge hë së ka hape, kola hnimi së. Troa traqa tune lai, ke hna tithi së hnei mec maine hnei itre ejolene göi mani, maine pena hnene laka, pëkö thangane la hne së hna cainöje trootro. Ame e cili tro së lai a mekune ka hape, tha hnimi së hë hnei Iehova. Ngo tha tro kö sa thëthëhmine ka hape, ka tru së koi Nyidrë. Ketre, Nyidrëti hi ezi së a ea la ime maca së, me xatua së. Tha tro pi kö Nyidrëti a thëthëhmi së e tro sa mele nyipici koi Nyidrë. (Is. 41:13; 49:15) Brigitte la ketre föe ka hetrune casine la lue nekö i angeic thupene la hna meci triji angeic hnei trahmany, öni angeic: “Ketre hace ka tru la troa hetrune casine la itre nekönatr ngöne la fene i Satana. Ngo, xecie koi ni la ihnimi Iehova, ke hnei Nyidrëti hna xatua ni hnine la itre akötr, nge tha ase pi kö Nyidrëti nue ni kowe la ketre jole hnenge hna thatreine cile kow.”​—1 Kor. 10:13. w15 15/8 1:​1-3

Hnei Habakuka perofeta hna itreqe hnyawa me catre ithuemacanyine laka, troa lepe apatrene Ierusalema. Hnene la itre xa perofeta ka tro pa hui angeic hna hane cainöjëne la maca cili, nge nyimu macatre ne cainöj angatr. Ngo, öhne hi Habakuka ka hape, kolo pala hi a elë catre la iangazo me thiina ka tha meköti kö. Matre angeic a treije koi Iehova me hape: “Iehova fe, tro ni a xëwe koi enëtilai uti hë eu?” Ngacama tha hnei Iehova kö hna qaja la drai ne troa traqa la pun, ngo hnei Nyidrëti pe hna qaja xeci koi Habakuka ka hape, “Tha tro kö a hmit!” (Hab. 1:​1-4) Maine hnei Habakuka ju hna kucakuca, me sixele ma treqene la pun me qaja ka hape, ‘Nyimu macatre hë enehila hnenge hna lapa treqene la troa lepe apatrene Ierusalema, nge hmitre pala kö. Nyine ue la tro ni a cainöj? Cainöje ju hi itre xan.’ Nemene ju hë la ewekë ka troa traqa e mekune ju angeic tune lai? Tha tro ha kepe angeic hnei Iehova. Ketre, maine tha hmekëne ju angeic la pun, tro fe a luzi la mele i angeic. w15 15/8 2:12, 13

Maine easa ajane tro pala hi a lolo la aqane imelekeu së me Iehova, tha tro kö sa thele troa nyi sinatrongene la itre atr ka kuca la itre ewekë ka ngazo. Kolo fe lo itre atr ka qaja ka hape, angatre a hane nyihlue i Iehova ngo tha drengethenge Nyidrëti pe. Maine hnei angatr hna kuca la ketre ngazo ka tru, ngo tha ietra pe, tha tro hmaca kö sa nyi sinatronge i angatr. (Rom. 16:​17, 18) Ame la hne së hna majemin, tre, ene la tro sa amadrinëne la itre sinee së. Celë hi matre, e tro sa nyi sinatrongene la itre ka tha drengethenge Akötresie, tro fe hë së lai a pi kuca la itre huliwa i angatr. Haawe, e tro sa nyi sinatrongene la itre ka kuca la itre ewekë ka sis, tro fe hë së lai a hane tui angatr. Celë hi ka traqa kowe la itre xa trejin. Nge ame itre ka tha ietra, tre upetröne eë angatr. (1 Kor. 5:​11-​13) E tha ietra kö angatr, ceitu i angatr hi memine la itre atr hna qeje pengöne hnei ­Peteru.​—2 Pet. 2:​20-​22. w15 15/8 4:​4-6

Hnei Iesu hna iëne hnyawane la itre sinee i nyidrë. Nyipi ewekë koi Iesu tro la itre sinee i nyidrë a hane drei nyidrë, me hnime me nyihluei Iehova. Nge tune kaa fe epun, epuni kö a iëne la itre ka hnimi Iehova hnyawa nyine troa nyi sineen? Pine nemene matre ka nyipi ewekë lai? Hnene la keukawa ne la jö matre kola hmedre lolo la itre wene sinöe. Ceitune hi lai memine la keresiano ka thele troa macaj, tro angeice lai a macaj hnene la aqane keukawane la ihnimi ne la itre trejin. Hmunë kö la ketre thöthi ka thele mele ka loi? Maine eje hi, loi e tro hmunë a epe kowe la itre keresiano ka hekö hë nyihluei Iehova, nge ka catre sajuëne la casi ne la ekalesia. Hnei angatr hna elë hune la itre jol, me thele troa mele nyipici pala hi koi Iehova. Celë hi matre, angatre hi la itre ka ijije troa xatua hmunë göi aqane troa mele ka loi. E tro hmunë a nyi sinatronge i angatr, tro hë angatre lai a xatua hmunë troa xomi mekune hnyawa, me hane macaje tui angatr.​—Heb. 5:​14. w15 15/9 1:​14, 15

Jëne la ini hnei Iesu hna hamën, me huliwa i nyidrë, hnei nyidrëti hna xatuane la itretre drei nyidrë troa acatrene la lapaune i angat. (Mar. 11:​20-​24) E tro sa xötrethenge la tulu i Iesu, tro hë së lai a acatrene la lapaune së, ngo memine fe la lapaune i itre xan. (Ite edomë 11:25) Tro sa xatuane tune kaa la itre atr ne la teritoare së? Ame ngöne la easa inine la Tusi Hmitrötr koi ketre atr, loi e tro sa amamane hnyawa ka hape, hetre Akötresie, nge tru la hnei Nyidrëti hna meku së. Nge loi e tro fe sa amamane hnyawa ka hape ame la Tusi Hmitrötr, tre, celë hi Wesi Ula i Akötresie. Tro sa xatuane tune kaa la itre trejine matre tro pala hi a catre la lapaune i angatr? Maine epuni a öhne laka, kola eetr hnei ketre trejin pine la itre ka elemekene la ekalesia, the canga ananyi angeice kö. Xatua angeice jë pe jëne la itre ithanata ka maca troa acatrene hmaca la lapaune i angeic. (Iuda 22, 23) Maine epuni pala kö a ini nge kola ithanatane la évolution hnene la atre hamë ini, catre jë isigöline la lapaune i epun kowe la itre ewekë hna xup. Maine jë tro epuni a sesëkötre la aqane ujë ne la ka hamë ini me itre sine ini epun. Iehova a qaja axeciëne koi së ka hape, tro kö nyidrëti a xatua së matre tro sa isa cile huti ngöne la lapaun. (1 Pet. 5:​9, 10) Maine nyipici laka, nyipi ewekë tro sa catr matre troa acatrene pala hi la lapaune së, ngo eje hi laka, tro kö Iehova a amanathithine la aqane catre së. w15 15/9 3:​20, 21

Öni Davita Joxu ngöne la ketre ijin: “Kola amamane la lolo i Akötresie hnene la hnengödrai ; nge eisaisane ej a amamane la huliwa ne la lue ime i Nyidrë.” (Sal. 19:​1, MN ) Iehova enehila a amamane hnyawa koi së la pengöi Nyidrë, me aja i Nyidrë, me itre ewekë hnei Nyidrëti hna xup, memine fe la aliene la Wesi Ula i Nyidrë. Ame enehila, kola ukune la itre atr hnene la fen tro pala hi a ini, me tro kowe la itre ini ka tru, ngo ini lai ka apatrene la ihnimi angatre koi Akötresie. Ame pena Iehova, Nyidrëti a ajane tro sa kapa la ini matre hetre atrehmekune së, nge ka troa ainamacanë së. Matre, aja i Nyidrëti tro sa huliwane la itre ini hne së hna kapa nyine loi koi së, me kowe la itre xa atr. (Ite edomë 4:​5-7) Ka tune la itre ini hne së hna kapa, ene la nyipici, laka Nyidrëti a ajane tro sa ce thawa me itre atr, matre troa amele angatr. (1 Tim. 2:4) Loi e tro sa inine la pengöne la Baselaia i Akötresie kowe la itre atr ka ala nyim, memine la hnene eje hna troa kuca thatraqane la nöjei atr elany. Aqane tro hi së lai a amamane la ihnimi së koi Iehova me kowe la itre atr.​—Sal. 66:​16, 17. w15 15/9 5:​10, 11

Hanawange la faifi lao ewekë ka traqa, nge wange ju fe hë la aqane amë Elia perofeta la mejiune i angeic koi Iehova. (1) Hnei Elia hna qaja xeciën koi Ahaba Joxu ka hape, tro Iehova a axulune la qaqacil, matre öni angeic: “Loine Iehova Akötesi angete Isaraela, lo hnenge hna pune cile [qëmeken], a troa pë lepanyi me manie ngöne la ite macate.” (1 Ite jo. 17:1) (2) Hetre mejiune i Elia ka hape, tro kö Iehova a hamëne koi angeic me kowe la itre xan la ka nyipi ewekë koi angatr ngöne la ijine qaqacil. (1 Ite jo. 17:​4, 5, 13, 14) (3) Xecie koi Elia ka hape, tro Iehova a amelene hmaca la neköne la sine föe. (1 Ite jo. 17:21) (4) Tha luelue kö angeic laka, tro la eë qaathei Iehova a aene la huuje i angeic hune la wetr e Karemela. (1 Ite jo. 18:​24, 37) (5) Ase hë qaja xeciëne hnei Elia koi Ahaba qëmekene troa xulu la mani ka hape: “Cilejë, xeniju me ij, ke calemi hë la manie atraqat.” (1 Ite jo. 18:41) Haawe, thupene la hne së hna ce wange la itre ewekë celë ka traqa, tro sa isa waipengö së me hape, ‘Ka catre kö la lapauneng tui Elia?’ w15 15/10 2:​4, 5

Qaathei Iehova la ahnahna celë, ene la troa ithanatane la qene hlapa së. (Sal. 139:14; Hna ama. 4:​11) Hetre ketre ahnahna hne së hna kapa qaathei Nyidrë, nge ka aisapengönë së hmaca kö me itre öni. Hna xupe la atr “hnaiji Akötesie.” Hetrenyi the së la atreine troa isa axecië mekun. Matre, atreine fe së troa isa axeciëne troa nyihlue i Iehova, me atrunyi Nyidrë. (Gen. 1:​27) Hne së hna kapa qaathei Iehova la Tusi Hmitrötr, nge jëne ej, Nyidrëti a amamane la aqane tro sa nyihlue i Nyidrë me atrunyi Nyidrë. Hetrenyi la Tusi Hmitrötr hna kuca apexejen maine sinëne hi ngöne la 2 800 lao qene hlapa. E tro sa lapa mekune hnyawa la hna qaja hnene ej, easë hë e cili a nyiqaane waiewekë tui Nyidrë. (Sal. 40:5; 92:5; 139:17) Ketre, kola ainamacanë së hnene la itre mekune i Iehova, me tro xomi së kowe la mele ka tha ase palua kö. (2 Tim. 3:​14-​17) Ame la kola hape, troa lapa mekune hnyawa, tre, kola hape, troa mekune catrëne la ketre ewekë, me mekune hnyawa ngöne ej. (Sal. 77:12; Ite edomë 24:​1, 2) Tru la eloine hne së hna troa kapa e tro sa lapa mekune hnyawa la hne së hna inin göi Iehova me Iesu.​—Ioane 17:3. w15 15/10 4:​2-4

Hnei Iesu hna upe la itretre drei nyidrëti troa ipië me imeku, nge hnei nyidrëti fe hna amamane la tulu koi angatr. (Luka 22:27) Hnene la itre aposetolo hna öhne la aqane catre nyidrëti nyihlue i Iehova me xatua angatr, nge hnei angatre fe hna hane thele troa ujë tune lai. Loi e tro fe epuni a inine la nekö i epun jëne la tulu hnei epuni hna amaman. Hna qaja hnei Debbie, ketre thin ka lue kuku ka hape: “Tha traqa pi kö theng la mekune troa zalu pine la hna nue hnene la föeng ka qatre thup la traeme i nyidrë kowe la itre xa trejin. Ke, atre hnyawa hi ni ka hape, e hetre ewekë nyine troa wangatrune kowe la hnepe lapa i nyiho, tro kö nyidrëti lai nyipi ewekën.” Nemene la thangane la tulu hnei Debbie me Pranas, föi angeic hna amamane kowe la hnepe lapa i nyidro? Öni nyidrë, “tha patre pi kö la lue nekö i nyiho ngöne la kola ixatua ngöne ijine asabele. Nge tru la madrine i nyidro e cili, nge hetrenyi fe hë la itre xa sinee i nyidro, nge aja i nyidroti pala hi troa ce lapa me itre trejin.” Ame hë enehila, kola huliwa i Akötresie o drai hnene la hnepe lapa asë. E ka ipië epun me imeku, epuni hi lai a inine la nekö i epun troa hetre aja troa xatuane la itre atr. w15 15/11 1:9

Nyimu aqane amamane Iehova la ihnimi Nyidrë. Pane mekune jë la etrune me emingömingöne la hnengödrai. Hna eköthe hnyawa la itre miliare lao fini wëtresij hna hëne ka hape, galaxies. Nge ame e hnine la ca galaxie, hetrenyi la itre miliar lao pengöne wëtresij, nge hna hëne la itre xan ka hape, planètes. Ame ngöne la galaxie së, la Voie Lac­tée, ame la wëtresije ka tru, tre, jö. Maine patre ju la jö, pëkö mele ka ijiji e celë fen. Haawe, jëne la itre ewekë hna xup, mama hnyawa pi hi la itre thiina ka lolo i Iehova tune la men, me inamacan, me ihnim. Hnei Iehova hna xupe hnyawa la ihnadro matre ijiji troa mele ngön. Ame asë hi la itre ewekë e celë fen, tre hna xupe nyine loi kowe la mele ne la atr me itre öni. Hnei Akötresieti lo hna hnëkëne hnyawa la ketre götran, hnë tro la atr a mele ngön. Ketre, hnei Nyidrëti hna xupi angatr cememine la ngönetrei me mekune ka pexej, matre atreine angatr troa mel epine palua. (Hna ama. 4:​11) Ketre mina, hnei Iehova hna “thu a ne la nöjei ka mele asëjëihë ; ke epine palua la ihnimi nyidë.”​—Sal. 136:25. w15 15/11 3:​7, 8

Hne së hna kapa qaathene la Joxu së, Iesu, la itre jia ne cainöj matre ahmalane la hni ne la itre atr troa kapa la maca. Ame la itre xa jia ne cainöj, tre ka hetre thangane hi koi caa hnepe ijin, nge ame itre xan, hna huliwane pala hi enehila. Ngo, ame asë hi la itre jia ne cainöj, tre hna xatua së troa maca trootro göi troa tro fë la maca ka loi. Ame lo 1933, hnene la itre trejin hna nyiqaane cainöje jëne lo kart nyine anyipicin. Ame la kart cili, eje a qatrenge la ketre mekune ka co qa hnine la Tusi Hmitrötr. Ame e itre xa ijin, kola saze nge hna amë pena ha la ketre mekune ka hnyipixe. Erlen­meyer la ketre trejine trahmanyi ka hane cainöje ekö jëne lai kart, nge 10 lao macatre i nyidrë lo nyidrëti a hane xötrei huliwan. Öni nyidrë: “Ame la aqane troa nyiqaane ithanata, tre troa qaja ka hape, ‘Pi tro kö epuni a hane e la neköi kart celë?’ Thupene la hna e hnene lai atr, eahuni a hamëne pi la ketre itus, me nue angeice pi.” w15 15/11 5:​3-6

Nyimutre catre la itre xötre ne la Tusi Hmitrötr ka amamane laka, ka nyipi ewekë la ëje i Akötresie, nge loi e troa atrun ej. (Eso. 3:​15; Sal. 83:18; Is. 42:8; 43:10; Ioane 17:​6, 26; Ite hu. 15:14) Ketre, hnei Iehova hna upe la itre ka cinyihane la Tusi Hmitrötr troa amë la ëje i Nyidrë, a itre thauzane lao mama ngöne la itre tusi hnapan. (Ezek. 38:23.) Haawe, ame la kola xometrije la ëje i Akötresie hnene la itre ka ujë qene hlapa, tre, angatre hi lai a amamane laka, pëkö metrötre i angatr koi Iehova. Nyimutre catre enehila la itre ewekë ka anyipicine ka hape, loi e troa amë la ëje i Iehova. Kola mama la ëje i Akötresie, a 7 216 la etrun ngöne la Tusi Hmitrötre së hna ahnyipixen lo 2013 qene Papale. Tru catre kö hune lo lai hnapan, ke a sikisi hmaca lao mama. Ame la faif, tre hna hnyipi öhne ngöne la itre hna cinyihan, lo hna hape, Rouleaux de la mer Morte. Itre eje a mama ngöne 1 Samuela 2:​25; 6:3; 10:26; 23:​14, 16. Ame la hnaasikisin, tre kola mama ngöne Angete Amekötin 19:18; hna nyixan, ke, hna wange hmaca la itre xa tusi hnapan hna huliwan lapan. w15 15/12 2:5, 6

Nyipi ewekë tro sa acatrene la ihnimi trejine së enehila, ke, tro eje lai a xatua së troa cile huti ngöne la nöjei itupathe ka troa traqa koi së elany. Nyimu ijine koi së troa amamane la ihnimi trejine së enehila, qëmekene troa traqa la akötre atraqatr. Nyimu trejin ka akötr hnene la hna traqa koi angatre la itre sa, me itre di, me itre wene, me gejëmadra, me itre xa hulö ju kö. Nge itre xa trejin a qëmeke kowe la iakötrë. (Mat. 24:​6-9) Nge the qaja kö la itre jole göi mani o drai hnene la aqane hu­liwa qene atrekënöne la fene celë. (Hna ama. 6:​5, 6) Ame pena ngöne ketre götran, kolo pala hi a traqa la itre jol kowe la itre trejin, nge itre ijine lai koi së troa amamane pala hi la etrune la ihnimikeu së. Ngacama pëkö ihnimi ne la fene celë, ngo ame së, loi e tro pala hi sa amamane la ihnimi trejine së.​—Mat. 24:12. w16.01 1:​8, 9