Ogas

Qa ngöne laka, ka drengethenge Iehova pala hi Aberahama, ene mina fe ngöne la itre götrane ka co, ene pe ka catre pala hi la aqane imelekeu i nyidro. Tha jole kö koi Aberahama troa ithanatane me Iehova la nöjei pengöne ewekë ka ajolë nyidrë, me hane sipo ixatua fe koi Iehova. Ka tune lo angeic a hnehengazo göi Sodoma me Gomora. Kola hnehengazone hnei Aberahama la mele ne la itre atr ka meköt e cili, tui Lota me hnepe lapa i angeic. Nge ka mejiune hnyawa Aberahama koi Iehova, “ate amekötine la fene hnengödrai asë,” matre hnei nyidrëti hna fe koi Iehova la hni nyidrë. Hnei Iehova hna xomihni ahoeany, me amamane koi Aberahama la utipine i Nyidrë kowe la itre atr. Hnei Nyidrëti hna qaja ka hape, e iameköti hë Nyidrë, tro pala kö Nyidrëti a pane thele la itre atr ka meköt me amele angatr. (Gen. 18:​22-​33) Eje hi laka, hnene la atrehmekune me itre ewekë hnei Aberahama hna melën hna acatrene catrëne la aqane imelekeu i nyidrëti me Iehova. w16.02 1:​11, 12

Maine eje hi laka, hnei Ionathana hna nyipici koi Davita, ngo ame la ka sisitria koi angeic, tre ene la troa nyipici koi Iehova. Hnene hi lai matre angeic a nyipici koi Davita. Davita ju hë la ka troa joxu, ngo tha thele pi kö angeic troa thapa la hnëqa cili qaathei Davita. Hnei angeice pe hna xatua Davita troa qale catre koi Iehova. Lue ka mele nyipici asë hi nyidroti koi Iehova, me lue ka inyipicikeu fe. Hnei nyidroti fe hna thele troa eatrëne pala hi lo hnei nyidroti hna isisinyikeu. Nyipi ewekë tro fe sa nyipici kowe la itre atrene la hnepe lapa së, me itre sinee së, me itre trejin, trahmanyi me föe e hnine la ekalesia. (1 Thes. 2:​10,11) Ngo ame la ka sisitria, tre ene la tro sa nyipici koi Iehova, Atre hamë së la mel. (Hna ama. 4:11) Maine nyipici laka, hetre madrine së qa ngöne la hne së hna nyipici koi Nyidrë, ngo nyipi ewekë catre kö la tro sa nyipici koi Nyidrë ngöne la itre ijine jol. w16.02 3:​3, 4

Tro la thöth ka macaj a catre fë la itre ini hnei angeic hna lapaune kow. Tha angeice kö a ujë tune la ketre atr ka ce sinee me Akötresie e hnine la Uma Ne Baselaia, ngo ame hë ngöne la hna ini, saze hë la thiina, sinee ne la fene pena ha. Tro pe angeice lai a mele nyipici koi Iehova ngacama traqa ju hë la itre itupath. (Efe. 4:​14, 15) Nyipici laka, tha ka pexeje kö së. Ame itre xa ijin, kola tria hnene la itre thöth, ngo memine fe la itre ka tru. (Ate cai. 7:​20) Ngo e aja i eö troa xomi bapataiso, tro eö a pane atre laka, loi e tro eö a catre fë e kuhu hni eö la troa drengethenge Iehova. Ketre sipu waipengö i eö jë me hape: ‘Hapeu, qea ha la hnenge hna amamane ka hape ka tru Iehova koi ni?’ Pane mekune ju la aqane cile huti eö ngöne la ketre itupath ka tha hekö catre kö. Hnei eö kö e cili hna atreine atrehmekune la loi? Hapeu, hna uku eö fe, tui Daniela, troa hane huliwane la hnei eö hna atreine kuca ngöne la fene i Satana? E traqa ju tupathi eö tune lai, atreine kö eö e cili atrehmekune la aja i Iehova?​—Efe. 5:​17. w16.03 1:​7-9

Easë a melëne la “ite drai hnapin,” ene la itre drai tixenuë, matre easenyi catre hë tro sa qëmeke kowe la akötre atraqatre laka, pëkö hna tun ekö. (2 Tim. 3:1) Nge, hna helëne triji Satana me itre dremoni angeic kowe la fen matre atraqatr la akötr thene la itre atr. (Hna ama. 12:​9, 12) Ketre, easë fe a trongëne la hna ahnithe hnei Iesu, ene la troa cainöjëne la maca ka loi e cailo fen, kowe la itre atr me itre qene hlapa ka nyimutre catre hmaca kö! Maine easa ajane troa kapa la itre manathithi qaathei Iehova, tro sa pane cil, me goeën, me drenge hnyawa la itre hna amekötine hna hamëne hnene la ekalesia. E tro sa drengethenge enehila, tha tro kö a jole koi së elanyi troa trongëne la itre hna amekötine ngöne la ijine “aköte atraqate,” ijine troa lepe apatrene asë la fene i Satana. (Mat. 24:21) Nge ame hë elanyi ngöne la fene ka hnyipixe, tro hmaca së e cili a kapa la itre xa hna amekötin ka hnyipixe. w16.03 4:​16, 18

Hnei Ioane aposetolo ekö hna meköle goeëne la 7 lao angela, angatr a ufi trutru. Ame la ko­la ufi trutru hnene la hnaafaifine angela, Ioane a öhne e cili la “kete wëtesiji [a] mala qa hnengödrai kowe la fen.” Hnene lai wëtresij hna xome la ca kii matre troa fe la hnaope ka thatrehmekun, nge gaa melöhlem. Hna pane lö pi la haje ka tru qa hnine la hnaop, ame hna xulu pi la nöjei sipa qa ngöne la haj. Tha hnene kö la itre sipa hna angazone la itre sinöe me feja, ngo hnei angatre pe hna lepe la itre ka “tha hetenyi kö la hnapelehatene i Akötesie hune la nöjei göpadi angat.” (Hna ama. 9:​1-4) Tha sihngödri kö koi Ioane la etrune la ngazo hna atreine kuca hnene la iume sipa, tune lo ewekë ka traqa e Aigupito lo hneijine i Mose (Eso. 10:​12-​15) Ame la itre sipa hna goeëne hnei Ioane, tre, kola qajaqaja la itre keresiano hna iën, itre ka cainöjëne la maca ne hnëjin göi hmi ka thoi. Nge itre milio la itre xa keresiano, itre ka mejiune troa mel e celë fen a ce huliwa me angatr. Hnene la huliwa cili hna aijijëne la ka ala nyimu troa trotrije la hmi ka thoi, me thepe angatr qa ngöne la musi Satana. w16.03 3:​3

Qëmekene tro la ketre qatre thup a inine la ketre trejin, nyipi ewekë tro nyidrë a pane atre la thangane la nyipici kowe la mekune me hni ne lai trejin hna inin. Haawe, loi e tro la qatre thup a hnyingë angeice la aqane saze la mele i angeic, qaane lo angeic a nue la mele i angeic koi Iehova. Tro hë lai a fe ithanata göi aqane troa nyihlue i Iehova cememine la hni ka pexej. (Mar. 12:​29, 30) Ijije fe tro la qatre thup a hane thithi memine lai trejin, me sipo Iehova la uati hmitrötr i Nyidrë, matre xatuane lai trejin ngöne la ini hnei angeic hna kapa. Ame ju hi la kola drenge la thithi hnene lai trejin, tro hë lai a thuecatre i angeic troa huliwa atrun! Ame ngöne la kola xötrei inine lai trejin hnene la qatre thup, loi e tro angeic a ce ithanatane la itre edromë ne la Tusi Hmitrötr. Tro lai a xatua angeice troa atrehmekune la enyipiewekëne la troa ixatua, me troa ketre trejin nyine mejiune kow, me troa ipië. (1 Ite jo. 19:​19-​21; Neh. 7:2; 13:13; Ite hu. 18:​24-​26) Ka nyipi ewekë catre la itre thiina cili kowe la hna inin, ceitune hi lai memine la itre wanane sinöe hna nyi nyiköne la dro. Tro itre eje lai a xatuane la hna inin troa nyimenyime kökötre lolo, me ‘ahlëne la lue meke’ i angeic, nge tro angeic a öhne la ‘itre nyine haine’ e hnine la Wesi Ula i Akötresie. w15 15/4 2:​3, 4

Maine easa ajane troa easenyi catre koi Iehova, nyipi ewekë tro sa catre ithanata pala hi koi Nyidrë. Ngo tro sa ithanata tune kaa koi Nyidrë? Pane mekune ju së la aqane tro sa ithanata memine la ketre sinee së ka lapa ananyi së. Ijije hi tro sa icinyianyikeu ma itelefonekeu? Ketre tune mina fe, easë ithanata koi Iehova ngöne la easë a thithi lapa. (Sal. 142:2) Ngo, nemene la aqane tro sa nue Iehova troa ithanata me easë? Tro sa e lapane la Wesi Ula i Nyidrë, ene la Tusi Hmitrötr, me thele ewekë ngön. (Is. 30:​20, 21) Maine jë, tha mama hnyawa kö koi së la aqane sa Iehova la itre thithi së. Ngo, e hetre ketre ewekë hne së hna sipone mekötine koi Nyidrë, tro hi a mama hnyawa koi së la aqane sa Iehova. Maine tro sa fe amamane koi Iehova la nöjei ewekë ka ajolë së, tro hë Nyidrëti a easenyi catre koi së. Loi e tro sa catre easenyi pala hi koi Iehova nge uti hë epine palua. Celë hi matre, loi e tro sa drei Nyidrë hnene la hna inine lapane la Tusi Hmitrötr, me ithanata koi Nyidrë ngöne la thith. E tro sa ujë tune lai, tro ha acatrene catrëne la aqane imelekeu së me Iehova, nge tro hë së lai a atreine cile huti kowe la itre itupathe jëne la ixatua i Nyidrë. w15 15/4 3:​3, 14, 16

Xötre lai ka amamane hnyawa la pengö i Satana, laka, ka imethinë me iakötrë! Atraqatre la aja i Satana troa lepe apatrene la itre hlue i Akötresieti asë. Nge celë hi ka mama ngöne la aqane axösisine la itre hlue i Iehova, qaane ekö ngöne lo hneijinene la itre pane keresiano uti hë enehila. Tha ka utipine fe kö la liona la ej a lepe la tha ne ej. Pëkö ihnimi ne la liona qëmekene tro ej a öni la tha ne ej, nge e ase hë öni, ketre tha kolo hmaca fe kö a mekune lo lai tha. Ceitune hnyawa hi lai me Satana. Tha angeice fe kö a hnime la atr hnei angeice hna lep. Pane mekune jë la madrine i Satana lo angetre Isaraela ekö a kei kowe la kuci ngazo me meciun! Drei jë la etrune la madrine i Satana lo Zimeri a xeni pune la hnei angeice hna kuci ngazo! Nge drei jë fe la madrine i angeic ngöne lo Gehazi a xeni pune la hna meciu ewekë!​—Num. 25:​6-8, 14, 15; 2 Ite jo. 5:​20-​27. w15 15/5 1:​8, 9

Nemene la nyine tro sa kuca matre tro sa ngaa Satana? Öni Iesu: “Tro nyipunie a hete mele e xomi hnine hnei nyipunie.” (Luka 21:19) Pë fe kö ca iakötrë hna kuca hnei atr ka troa cile hut. Nge ketre, pëkö atr atreine troa thë la imelekeu së me Iehova, ngo easë kö. (Rom. 8:​38, 39) Maine nyipici laka, hna meci la itre xa hlue i Iehova, ngo tha kolo kö lai a hape, hune hë Satana. Tro kö Iehova elanyi a amele angatr hmaca. (Ioane 5:​28, 29) Ngo ame pë hë Satana, pëkö mele ka ijije koi angeic! Thupene la kola lepe apatrene la fene ka ngazo celë, tro ha kuië angeic hnine la hnaope ka thatrehmekun koi 1 000 lao macatre. (Hna ama. 20:​1-3) Thupene la musi Iesu ka caa thauzane lao macatre, tro ha “shei Satana hmaca pi qa hna kalabusin” matre tro angeic a itupathi tixenuë, me amenune la itre atr ka pexej. Thupene lai, tro ha apatrene triji Satana. (Hna ama. 20:​7-​10) Koi epuni pë hë, ngo ame Satana, ka tro angeic a patr! Haawe, isa catre pi, nge acatrene catrëne jë la lapaune i epun. (1 Pet. 5:9) Ijiji epuni hi troa ngaa Satana! w15 15/5 2:​1, 18

Ame la atr ka inamacan, tre, angeic a thupëne hnyawa la itre mekuna i angeic. Ijije tro itre ej a hetre eloine maine hetre ethanyine koi së, tune la eë. Ame la ketre aqane huliwane hnyawane la eë, tre, ene la troa kuci xen. Ngo e tha hmekëne kö së, canga tro hi a manithe la uma së me apatrenyi së. Ceitune hi lai memine la itre mekuna së. E tro sa mekune la itre ini qaathei Iehova, tro hë së lai a kepe eloine qa ngön. Ngo e tro pena sa mekune lapane la itre ewekë ka sis, me piine la aqane ujë cili, eje hi laka, tro ha kökötre catr e kuhu hni së la aja cili, nge tro hë së lai a kei kowe la ngazo. Celë hi aqane ujë lai ka troa thë la aqane imelekeu së me Iehova. (Iako. 1:​14, 15) Hnei Iesu fe hna hmekë së, me hape: “Ame la ate goeëne la fö’ i ket’ ate me meciu nyido, ase hë angeice kuci ngazo me nyido e kuhu hni.”​—Mat. 5:28. w15 15/5 4:​11, 12, 14

Ame ngöne lo Iesu a cainöj, nyidrëti fe a kuca la itre iamamanyikeu ka nyimutre. Kola mama jëne la itre iamamanyikeu cili ka hape, tru la hnei nyidrëti hna mekune la itre atr. Ame ngöne la ketre traon, öhne ju hi nyidrë la ketre atre lepera. (Mar. 1:​39, 40) Tru catre la aqane tithe la atr hnene la mec, matre öni Luka jë hi ka droketre, ka hape, “sihngödipi hë hnei lepera.” (Luka 5:​12, MN ) Öni Tusi Hmitrötr, ame la kola öhnyi Iesu hnene lai atr, angeic a “kei qeipië, me sipon, ka hape, Joxue, maine aja i enëtilai, atreine hi enëtilai troa aloinyi ni.” Atre hnyawa hi lai atr ka hape, eje thei Iesu la mene troa aloine la meci angeic, ngo nyipi ewekë tro angeic a atre ka hape, aja i Iesu hi troa aloinyi angeic. Ngo nemene la mekuna i Iesu? Tro jë nyidrëti a ujë tune kaa kowe lai atr hna ane la ngönetrei hnei mec? Tru la utipine i Iesu, matre ka xecie qa kuhu hni nyidrëti troa qaja ka hape: “lni a ajan, loi hë eö. Ame hna canga patepi la lepera thei nyën.” (Luka 5:​13) Mama hnyawa pi hi la etrune la ihnimi Iesu kowe la itre atr.​—Luka 5:​17. w15 15/6 2:​3-5

Eje hi laka, tha ka hmaloi kö troa ithanatane me ketre atr la itre jole ka eje thei epun, ngo ka nyipi ewekë catre troa thele ixatua. (Heb. 3:​12, 13) Tro la itre Keresiano ka macaj a xatua epuni troa trotrohnine la itre ewekë nyine tro epuni a sazen. Haawe, kuca jë la nyine kuca matre tro pala hi Iehova a nyi sinee i epun. Itre thup e hnine la ekalesia la ka ijije troa xatua së. (Iako. 5:​13-15) Maine ka majemine epuni goeëne la itre iatr ka sis, canga thele ixatua jë. E tro pala hi epuni a treqen, tro hë lai a tru hnei ijine troa tupathi epun, nge tro hë epuni lai a kei kowe la kuci ngazo. Ame hë e cili, tro lai a tru hnei atr hnei epuni hna akötrën, nge tro itre xa atr lai a qaja angazo Iehova. Ala nyimu la itre ka thele ixatua thene la itre qatre thup, nge hnei angatre hna kapa la itre eamo, ke, aja i angatre troa amadrinë Iehova, me lapa hnine la ekalesia.​—Sal. 141:5; Heb. 12:​5, 6; Iako. 1:​15. w15 15/6 3:15-17

Hapeu, tro asë hi la itre atrene la hmi ka thoi a mec la kola lepe ­apatrenyi Babulona atraqatr elany? Ohea. Tro fe lo itre hene ne hmi a kelikelëne ka hape, tha itre ka hmi kö angatr, nge tha ka hane fe kö angatr sine la itre hmi cili. (Zaka. 13:​5, 6) Nemene la ewekë ka troa traqa kowe la nöje i Akötresie ngöne la ijine cili? Öni Iesu: “Maine tha axalaithene kö la nöjei drai cili, te, pëkö ate troa mel ; ngo tro ha axalaithene la nöjei drai cili göi ange hna iën.” (Mat. 24:22) Ame ngöne lo hneijine lo itre pane Keresiano, hna “axalaithene” la ijin akötre e Ierusalema. Celë hi ka aijijëne la “ange hna iën” ene la itre Keresiano hna iën, troa kötr. Ketre tune mina fe, tro ha “axalaithene” la pane igötranen la akötre atraqatr pi “ange hna iën.” Tha tro kö Iehova a nue la politik, ene la “ite jone ka luepi” troa lepe apatrene la nöje i Nyidrë. (Hna ama. 17:16) Ngo, troa pane hetre hnepe ijine tingeting ka xoxopatre catre hi. w15 15/7 2:​5, 6

Ngacama nyimu aqane tupathi së hnei angeic; ngo, qanyi së pë hë isa wai melen. Isa qanyi së, isa ala cas troa iën: Troa cile maine troa kei kowe la itupath. (Mat. 6:13; Iako. 1:​13-​15.) Ame la kola tupathi Iesu hnei Satana, canga thipetrije hi nyidrë jëne la Wesi Ula i Akötresie; ame hnei nyidrëti pala hi hna cile catr. Ngo, tha hnei Satana kö hna nue Iesu, angeice pe a treqene “uti hë e kete ijin” göi tro hmaca a tupathi nyidrë. (Luka 4:​13) Ngacama kuca ju hë Satana la nöjei ewekë, ngo hnei Iesu pala hi hna drengethenge la Akötresie. Nge ketre Satana fe a hane tupathe la itretre drei Iesu matre tha tro kö a drei Iehova, tui epuni fe. Tro pala kö a pane treqene matre sa jë lo itre hnyinge hna amejëne göi musi cile i Iehova. Ngo ame pala kö enehila, Iehova a nue Satana troa tupathi së, tha Iehova kö a ‘tro sai së kowe la itupath.’ Hetre mejiune i Nyidrëti laka tro sa mele nyipici koi Nyidrë, nge aja i Nyidrëti troa xatua së. Ngo tha Nyidrëti kö a musinë së troa kuca la meköt. Nyidrëti pe a nue së kowe la isa hne së hna ajan. Celë hi matre Nyidrëti a nue së troa isa sipu iën, troa mele nyipici koi Nyidrë, maine tha tro pena kö a mele nyipici. Matre lue ewekë nyine tro sa kuca e aja së troa ananyine la itupath, ene la tro sa lapa qale koi Iehova, me catre thithi troa sipo ixatua. w15 15/6 5:13, 14

xLoi e tro pe sa saze la aqane tro sa mekun, nge nyipi ewekë fe tro sa inine hnyawa la mekuthetheu së matre tha tro kö sa ië hna hnim e traqa ju la itre jol. (Rom. 14:19) Drei la ketre ceitun: Hna hnaho Mirjeta e Yougoslavie. Ame ngöne la götran hnei eahlo hna mele ngön, tre, hna methinëne la angetre Serbie. Ame hë la eahlo a atre Iehova, eahlo ha trotrohnine laka, tha ka ië hna hnime kö Nyidrë, nge, ame Satana, aja i angeic, tro la itre atr a ixele ma iwai. Haawe, eahlo a thele jë troa saze la aqane mekune i eahlo, ngo ame ju hi la kola nyiqaane isi la itre lapa ngöne la götrane hnei eahlo hna mele ngön, eahlo hmaca hi a goeëne angazone ju la angetre Serbie. Xele eahlo ma hane cainöje koi angatr. Atre hnyawa hi eahlo ka hape, ka ngazo, ene pe eahlo a thithi jë koi Iehova matre tha tro kö eahlo a ujë tune lai. Eahlo fe a sipo Nyidrë troa xatua eahlo troa nyiqaane xome la huliwa ne pionie. Öni eahlo ka hape: “Mama hnyawa ha koi ni laka, ketre ixatua ka sisitria la troa catre cainöj. Ame ngöne la eni a cainöje trootro, eni a thele troa ihnim tui Iehova, ene pe kolo ha patre trootro lo itre aliene hning ka ngazo.” w15 15/7 3:​11-​13

Tha ka loi kö la mekune hna axeciëne hnei Iehosafata, ene la troa ce xöle me Ahaba Joxu ne Isaraela. Ngacama hna qaja hnene la 400 lao perofeta thoi koi Ahaba ka hape, tro nyidrëti a hun ngöne la isi, ngo hnei Mika perofeta i Iehova hna thuemacane la lue joxu ka hape, e tro hë nyidro kowe la hna isi, tro ha ngaa nyidro. Nge celë hi ewekë ka traqa. Meci pi Ahaba ngöne la hna isi, nge ame Iehosafata, tre, maine ju tro angeic a mec. Thupene la hna isi, hnei Iehova hna haji Iehosafata pine la tria i angeic jëne Iehu. Ame pe, öni Iehu koi angeic: “Loi pe ke hete loi hna öhne thei nyipë.” (2 A. l. ite jo. 18:​4, 5, 18-​22, 33, 34; 19:​1-3) Haawe, ame hë e thupen, hnei Iehosafata hna tria ngöne la aqane xomi mekun, ngo tha thëthëhmine kö Iehova la itre ewekë ka loi hnei angeice hna kuca ekö ngöne la mele i angeic. (2 A. l. ite jo. 17:​3-​10) Keukawa ju hi la hni së hnene la tulu celë, ke, ame itre xa ijin, easa tria. Ngo, e tro sa catre nyihlue i Iehova, tro kö Iehova a hnimi së, nge tha tro pi kö Nyidrëti a thëthëhmine la itre ewekë ka loi hne së hna kuca. w15 15/8 1:​8, 9

Nemene la aqane tro sa hnëkë enehila thatraqane la mele ngöne la fene ka hnyipixe? Maine tro sa hnëkëne la mele së ngöne la ketre nöj, tro së lai a pane kuca la itre xa ewekë nyine troa hnëkë së troa mele e cili. Tro së lai a nyiqaane inine la qene hlapa me qenenöje ne la itre atr e cili. Tro fe sa tupathe la itre xen hna kuca hnei angatr e cili. Ketre tune mina fe, loi e tro sa hnëkë enehila thatraqane la mele ngöne la fene ka hnyipixe. Loi e tro sa thele troa mele kösë easë hë a melëne la mel e cili. Ame ngöne la fene celë, hnei Satana hna aciane thene la itre atr la aja troa isa kuci mekunan. Xele angatr e troa hetre ka musinë angatr. Ketre, tha pi tro kö angatr a drei Akötresie. Nemene hë la thangane lai? Tru la akötr, me hleuhleu. (Iere. 10:23) Ngo Iehova la Atre Mus ka ihnim. Matre tro hë lai a mingöminge la mele elanyi ngöne la fene ka hnyipixe, e tro la nöjei atr a drengethenge Nyidrë. w15 15/8 3:​4, 5

Nyipi ewekë kowe la Keresiano ka pi faipoipo troa iëne hnyawa la atr hnei angeic hna ajane troa föen. Tusi Hmitrötr a upe la itre hlue i Iehova troa faipoipo “göi Joxu hmekuje hi,” kola hape, troa faipoipo hmekuje hi memine la atre nue hë la mele koi Iehova, me xomi bapataiso, nge ka mele thenge la itre trepene meköti Nyidrë. (1 Kor. 7:​39) E aqane ujë i epuni hi lai, tro lai a xatua epuni troa mele nyipici koi Akötresie. Atre hnyawa hi Iehova la ewekë ka sisitria koi së, nge tha ka hnyipixe kö koi së la wathebo i Nyidrë, ene la troa faipoipo “göi Joxu hmekuje hi.” Pane mekune jë la hnei Iehova hna amekötine kowe la angetre Isaraela göne la itre atr ka tha nyihlue i Nyidrë. Öni Nyidrë jëne Mose: “The tro kö eö a ihamë föeë me angat, the tro kö eö a hamëne la nekö i ’ö jajinyi kowe la nekö i angeice trahmany. Ke tro angat’ a aukene la nekö i ’ö qa theng, mate nyi hluene la ite haze.”​—Deu. 7:​3, 4. w15 15/8 4:​12, 13

Tro sa inine tune kaa la mekuthetheu së? Nyipi ewekë tro sa inine lapane la Tusi Hmitrötr, me lapa mekune hnyawa la hne së hna e, me sipo Iehova troa xatua së troa trongëne la hne së hna inin. Tha kolo kö lai a hape, tro hi a atre la itre ithuemacanyi me itre hna amekötin. Loi e tro fe sa thele troa atrepengöi Iehova hnyawa. Tro hë easë e cili a atre la pengöi Nyidrë, memine la itre hnei Nyidrëti hna hnin me xelen. Ame hë la easa atre Iehova hnyawa, canga drenge hi la mekuthetheu së la itre hnei Nyidrëti hna kapa me sisin. E tro sa inine hnyawa la mekuthetheu së, tro hë së lai a waipengöne la itre ewekë tune la aqane goeëne itre ej hnei Iehova. Ame itre xa ijin, tha nyipi trotrohnine kö së la aqane xomi mekune ne la ketre trejin. Ngo tha loi pe tro sa qeje engazon, maine tro pena upi angeic troa saze mekun. Maine jë ame la mekuthetheu i angeic ka “kucakuca”, tre tha hna inine hnyawane kö, maine ka canga huliwa pena.​—1 Kor. 8:​11, 12. w15 15/9 2:​4, 8, 10

Pëkö ketre planète ka tune la ihnadro. Celë hi hna öhn hnene la itre ka wange trongëne la itre planètes. Haawe, tha hnei Iehova hmekuje kö hna hamëne la ka nyipi ewekë matre tro sa mel, ngo hnei Nyidrëti mina fe hna kuca la ihnadro matre mingöming, me lolo e troa mele ngön. (Is. 45:18) E tro sa mekune la hnalapa hnei Iehova keme së hna hamë së, mama hnyawa pi hi la etrune la ihnimi Nyidrëti koi së. (Iobu 38:​4, 7; Sal. 8:​3-5) Ame la ketre aqane amamane Iehova la ihnimi Nyidrëti koi së, tre, ene la aqane xupi së hnei Nyidrë, ke hna xupi së hnaiji Nyidrë. (Gen. 1:​27) Kolo lai a hape, canga tro hi sa drenge la ihnimi Nyidrë koi së, nge canga tro fe hi sa hane hnimi Nyidrë. Atre hnyawa hi Nyidrëti laka, ewekë lai ka troa amadrinë së. Tune hi lo itre nekönatr, laka, lolo me madrine la mele i nyudren, e hna hnimi nyudren hnei keme me thin. Mekune kö së lo aqane ini së hnei Iesu laka, troa atraqatre la madrine së e hne së hna easenyi catre koi Iehova, Keme së. (Mat. 5:3) Nyidrëti la “ate ihaban [maine hamën] asë koi shë la nöjei ewekë nyine amadin.” Tha sihngödri kö koi së laka, ka hame catre Iehova, nge atraqatre la ihnimi Nyidrëti koi së.​—1 Tim. 6:​17; Sal. 145:16 w15 15/9 4:​6, 7

Atraqatre la mejiune me ihnimine la atre cinyihane la Salamo koi Iehova, matre öni angeice jë: “Teqe Akötesieti ju eö, ke tro ni a ole nyidë la mele ne la xajawa i nyidë. Akötesingöti fe, iëzi hë [maine hace hë] la ung’ e kuhu hning. Qa ngöne lai tro ni a meku cilie.” (Sal. 42:​5, 6) Hapeu, celë fe hi la mekuna i epun? Epuni fe kö a hane mejiune me qale catre koi Iehova? Loi e tro epuni a thele troa acatrene catrëne la mejiune i epuni koi Nyidrë. Öni Tusi Hmitrötr koi së: “Lapauneju koi Iehova hnene la hni ’ö ka pexej, ngo the lapa qale kowe la hnei ’ö hna trotrohnin. Mekuneju koi nyidë ngöne la nöjei goje i ’ö asë, nge tro pena nyidëti a amekötine la ite jë i ö.”(Ite edomë 3:​5, 6) Hnene la hnei Iehova hna pane hnimi së, matre Nyidrëti hi lai a amamane la aqane tro sa hnimi Nyidrë. (1 Ioane 4:19) Loi e tro pala hi sa mekune la itre ewekë hnei Nyidrëti hna kuca thatraqai së, me etrune la ihnimi Nyidrëti koi së. Epi tro fe sa amamane koi Iehova laka, easa hnimi Nyidrë hnene la hni së, me u së, me mekune së, me trenge catre së ka pexej.​—Mar. 12:30. w15 15/9 5:​17-​19

Easë a acatrene la lapaune së ngöne la easa cainöje trootro me hamë ini kowe la itre atr. Loi e tro sa nyitipune lo itre pane keresiano, ene la troa catre mejiune koi Iehova me catre cainöj ngöne la nöjei ijine ka ijij. (Ite hu. 4:​17-​20; 13:46) E tro sa goeëne la aqane xatua së hnei Iehova me aqane sa i Nyidrë la itre thithi së, kolo fe lai a acatrene la lapaune së koi Nyidrë. Celë hi ka traqa koi Kaleba me Iosua. Hnei nyidroti hna amamane la lapaune i nyidro lo kola upi nyidro troa alamekëne la Nöje Hna Thingehnaean. Kolo pala hi a tro la itre macatre, nge kolo pala hi a kökötre trootro la lapaune i nyidro, ke nyidroti pala hi a öhne la aqane xatua nyidro hnei Iehova. Matre öni Iosua e qaja xeciëne kowe la angetre Isaraela ka hape: “Tha tia kö la kete ewekë ne la nöjei ewekë ka loi asë hnei Iehova Akötesi nyipunie hna ulatine koi nyipunie.” Ame hë e thupen, öni angeic: “Enehila qouju koi Iehova, me nyi hlue i nyidë hnene la hni memine fe la nyipici.” (Ios. 23:14; 24:​14) Maine tro fe sa mejiune koi Iehova me goeëne la isa aqane xatua së hnei Nyidrë, tro ha kökötre catre la lapaune së.​—Sal. 34:8. w15 15/10 2:​10, 11

Maine epuni a fejane la itre ithuemacany hna hamën ngöne la ketre cainöj hna cile fë ngöne la ketre icasikeu, maine asabele ­pena, xomi ijine ju troa wange itre eje hmaca. Nge ame e cili, isa hnyingëne thele jë me hape, ‘Nemene la hnenge hna inin qa hnine la Wesi Ula i Akötresie, me qaathene la organizasio i Nyidrë?’ Loi e tro fe epuni a lapa mekune hnyawa la itre ithuemacanyi ka mama ngöne la nöjei zonal, Ita Ne Thup me Réveillez-vous !, memine fe lo itre itus ka hnyipi mama ngöne la asabele ka ase hë. Ame la epuni a e la Annuaire, pane cile ju thupene la hna e la ketre hna melën, nge pane mekune hnyawa ju matre troa ketr la hni epun. Ame la epuni a e la itre itusi së, sija ju la itre mekune ka tru maine fejane ju la itre xa ithuemacanyi ezin. Tro lai a xatua epuni ngöne la epuni a hnëkëne la ketre iwaihmaca. Maine ketre qatre thup epun, tro lai a xatua epun troa hnëkëne la huliwa i epuni troa iwai, maine hnëkëne pena la ketre cainöj. Nge e hune asë lai, e tro epuni a pane cil me lapa mekune hnyawa la hnei epuni hna e, epuni hi lai a nue la itre ithuemacanyi cili troa ketr la hni epun, me upi epuni troa hane olene koi Iehova göne la itre ini ka lolo hnei epuni hna kapa. w15 15/10 4:​9, 10

Ame la ketre ijine ka sisitria catre kowe la keme me thin Keresiano, tre ene la kola xomi bapataiso hnene la nekö i nyidro. Hna bapataison asë hi la foa lao nekö i Berenice, nge tha 14 lao macatre i nyudren pala kö. Öni angeic: “Ketre ewekë ka tru lai ngöne la meleng. Tru la ole i nyiho koi Iehova hnene laka, hetre aja ne la itre nekö i nyiho troa nyihlue i Iehova. Ngo atre hnyawa fe hi nyiho laka, troa traqa la itre itupathe ka nyimutre kowe la itre nekö i nyiho.” Tro fe epuni a hane hnehengazo tune lai, e ka thöth la nekö i epun maine ka troa traqa kow. Hnene la ketre atr ka inamacan hna qaja ka hape, ketre ijine lai ka jole catre la itre macatre ne thöth kowe la keme me thin, me nekönatre fe. Ngo tha tro kö la keme me thin a mekune ka hape, ka qene nekönatre la nekö i nyidro thöth. Öni nyidrëti pe, ketre ijine lai kola maca trootro la nekönatr, nge kola kökötre fe la atreine mekun, nge kola ajane troa hetre sinee. Haawe, ame la nyën a thöth, atreine fe hi nyën troa akökötrene la aqane imelekeu i nyën me Iehova, tune lo hna kuca hnei Iesu ekö lo nyidrëti a thöth. w15 15/11 2:​1, 2

Baselaia i Akötresie la ketre hatrene la ihnimi Iehova. Nemene la aliene lai? Kola hape, hnei Iehova hna acile la ketre Joxu ka hnime catrëne la itre atr, ene Iesu. (Ite edomë 8:​31) Ketre, ame la itre hnei Iehova hna iëne troa ce musi me Keriso tre, atreine hi angatr trotrohnine la itre atr ke hna xomi angatr qa la fen. Ala 144 000 angatr itre ka troa elë hnengödrai eë. (Hna ama. 14:1) Ame lo Iesu petre kö e celë fen, tha mano kö nyidrëti qaja la Baselaia i Akötresie. Tha aqane lolo kö la iakeukawanyi cili! Tusi Hmitrötr a amamane hnyawa ka hape, qaane lo 1914 musi hë la Baselaia i Akötresie e koho hnengödrai. Qa ngone la ijine cili, kola acasine la thelene la itre hna iën e celë fen, memine la “ka ala nyimu atraqat,” ene lo itre ka troa mele pe qa ngöne la fene celë, me lö kowe la fene ka hnyipixe.​—Hna ama. 7:​9, 13, 14. w15 15/11 3:​16, 18

Hnei Iehova hna pane xupe la “Logo,” ene la Trenge Ewekë. (Ioane 1:1; Hna ama. 3:​14) Hnei Nyidrëti hna ithanata memine la Logo, ene Iesu, me qaja la itre mekune i Nyidrë me itre aliene hni Nyidrë koi Iesu. (Ioane 1:​14, 17; Kol. 1:​15) Paulo aposetolo a qaja ka hape, hetre aqane ewekë fe ne la itre angela, matre angatr a hane ithawakeune la itre mekune i angatr. Ketre aqane ewekë lai ka isapengöne memine la aqane ewekë ne la itre atr. (1 Kor. 13:1) Atre hnyawa hi Iehova la pengöne la itre miliare lao angela me itre atr hnei Nyidrëti hna xup. Tha jole kö koi Nyidrëti troa drenge la itre milio lao thith ne la itre atr ngöne la ijine ka cas, nge ketre tha jole kö koi Nyidrëti troa trotrohnine la isa qene hlapa i angatr. Ketre, Iehova fe a ithanata kowe la itre angela me athipi hnëqa koi angatr. Haawe, trotrohnine hi së laka, ka draië catre kö la aqane ewekë, me mekuna i Iehova hune la aqane ewekë ne la itre atr me itre mekuna i angatr. (Is. 55:​8, 9) Celë hi matre, e tro Nyidrëti a ithanata kowe la itre atr, Nyidrëti a ahmaloeëne la maca i Nyidrë matre tro angatr a trotrohnin. w15 15/12 1:​1, 2

Ame ngöne la itre nöje ka nyimutre, ka tru thupene catr la Tusi Hmitrötr, nge jole fe e troa hetreny. Ketre manathithi lai e troa hetre Tusi Hmitrötr! Hetre tus hna kapa qaa Rwanda, kola qaja ka hape: “Ekö hë itre trejin inine la Tusi Hmitrötr memine la itre atr ka ala nyim, ngo tha kökötre pi kö angatr, ke, hnene laka pëkö Tusi Hmitrötre i angatr. Tha ijiji angatre kö troa itöne la Tusi Hmitrötr ne la hmi angatr. Ketre, ame pena itre xa xötr ne la Tusi Hmitrötr, tre, tha nyipi trotrohnine kö angatr. Celë hi ka ajolë angatr troa kökötr.” Ame hë la kola kapa la Traduction du monde nouveau ngöne la qene hlapai angatr, hnene la ketre hnepe lapa ne Rwanda ka foa lao kuku thöth hna qaja ka hape: “Tru la ole huni koi Iehova me kowe la hlue ka nyipici me ka inamacan pine la hna hamëne koi huni la Tusi Hmitrötre celë. Ka puafala catre hun, matre pëkö manie hun troa itö Tusi Hmitrötr koi hun isa ala cas. Ngo ame hë enehila, isa hetrenyi hë hun la Tusi Hmitrötr. Eahuni a amamane la ole hun koi Iehova hnene la hna ce e la Tusi Hmitrötr ngöne la nöjei drai.” w15 15/12 2:​15, 16

Hnei Davita hna qejepengöne la ijine nyidrëti a kucakuca me seseu. Kola mekune laka kolo ijine Abasaloma, nekö i nyidrëti trahmany, a thele troa thapa la therone i nyidrë. Tru catre la meci Davita, matre pëkö ewekë hnei nyidrëti hna atreine troa kuca. Atre hnyawa hi nyidrë ka hape, ame la itre jole ka traqa kowe la hnepe lapa i nyidrë, tre, thangane hi la ngazo hnei nyidrëti hna kuca me Batheseba. (2 Sam. 12:​7-​14) Tha luelue kö Davita laka, tro Iehova a nue la ngazo i nyidrë, nge mejiune nyidrë laka, tro Iehova a xatua nyidrë ngöne la ijine kucakuca nyidrë. Nyipici laka, ame itre xa ijin, hnei Akötresie hna aloine la meci ne la itre atr. Ame lo kola kucakuca catre hnei Hezekia Joxu, tre, hna aloine la meci nyidrë hnei Iehova. Ame hnei nyidrëti hna mele koi 15 hmaca kö lao macatre. (2 Ite jo. 20:​1-6) Ngo, ame Davita, tha hnei nyidrëti kö hna treqene la ketre iamamanyikeu. Hnei nyidrëti pe hna ajane tro Akötresie a xatua nyidrë tune lo aqane xatuane Iehova la “ate mekune kowe la ate pë ewekë.” Catrecatre la aqane imelekeu Davita me Iehova matre nyidrëti a sipo Iehova jë troa akeukawane la hni nyidrë, me thupë nyidrë ngöne la ijine kucakuca nyidrë. Hnei nyidrëti fe hna sipon matre troa meu la ngönetrei i nyidrë matre egöcatre hmaca jë nyidrë. Haawe, loi e tro fe sa sipo Iehova troa xatua së tune lai.​—Sal. 103:3. w15 15/12 4:​8, 9

Iehova la ka sipu anyipicine kowe la trejin ka hape, hna ië angeic. Ngo, tha atr kö la ka troa qajaqaja koi angeic. Öni Ioane aposetolo kowe la itre keresiano hna iën ka hape: “Hetenyi nyipunie la hna siëne qa thene la Kahmitöt, nge ate hë nyipunie la nöjei ewekë asëjëihë.” Öni angeice fe: “Kola cile huti thei nyipunie la hna siëne hnei nyipunie hna kapa qa thei nyidë, nge tha nyipi koi nyipunie tro kete ate a ini nyipunie ; ngo ame la hna siëne hnei nyidë kola ini nyipunie ngöne la nöjei ewekë asë, nge nyipici ej, nge tha thoi kö, nge tune lai hnen’ eje hna ini nyipunie, nyipunie a cile huti ngön.” (1 Ioane 2:​20, 27) Nyipi ewekë tro la keresiano hna iën a kapa la ini qaathei Iehova tune la nöjei keresiano. Ngo, tha ketre atr kö la ka troa anyipicine ka hape, hna ië angeic. Hnei Iehova hna amamane hnyawa lai koi angeice jëne la uati hmitrötre i Nyidrë, lo mene ka pë san! w16.01 3:​9, 10

Maine tro sa mejiune koi Iehova, tro hë sa atreine mejihnin la itre ewekë, kola hape, tro hi sa kapa madrine la itre hne së hna hetreny. Tro lai a aijijë së tune kaa troa ihnimi trejin? Maine tro sa mejihnin la itre ewekë hne së hna hetreny. (1 Tim. 6:​6-8) Tro së lai a lapa mekune ka hape, ka nyipi ewekë catre kö la itre trejine hune la mani maine itre mo. Tha tro kö së lai a mekuhnine la itre trejin me qeje engazone la aqane mele i angatr. Nge tha tro fe kö sa piine la itre ewekë i angatr, me pi hetreny. Ngo, e tro sa mejihnine la itre ewekë hne së hna hetreny, tro së lai a ham. (1 Tim. 6:​17-​19) Tro la mejiune së koi Iehova a hamë së la catre matre tro sa cile hut ngöne la itre itupath ka tru. (Heb. 13:6) Nge e tro sa catr, tro pala hi së lai a goeëne aloine la mele së ngacama traqa ju hë la itre jole ka tune lai. Nge e loi la aqane goeëne së la itre ewekë, tro së lai a atreine xatuane me akeukawane la itre trejin, ketre jëne tro fe hi së lai a ihnimi trejin. (1 Thes. 5:​14, 15) Ame mina fe elanyi ngöne lo ijine akötre atraqatr, tro fe së lai a catr e cili, ke atre hnyawa hi së ka hape, easenyi hë la iamele.​—Luka 21:​25-​28. w16.01 1:16, 17

Kola mama ngöne la itre macatre ka nyimutre laka, kola uti trootro la etrune la itre ka xeni areto ngöne la Drai Ne Amekunën. Ngo ame hë lo itre macatre ka ase hë, kola öhne laka, kolo pala hi a elë trootro la etrune la itre ka xen. Tro kö së lai a hnehengazon? Ohea. Pine nemen? Pine laka, ame la itre trejine ka e la etrune la itre ka xeni areto ngöne la Drai Ne Amekunën, tre, tha ceitui angatre kö me Iehova. Angatre a ce e lo itre hna iën me itre ka xome menune la areto; kola qaja lo itre ka majemine xome ekö la areto, nge hmaca ju hi, nge ame itre xan, itre ka nango wezipo. Matre, mama hnyawa pi hi laka, thatre kö së la nyipi etrune la itre hna iën ka lapa pe e celë fen. Nge, Tusi Hmitrötre fe a qaja ka hape, ame ngöne la itre drai ne la pun, tro pe hi a ala xalaithe la itre hna iëne ka lapa pe. w16.01 4:​12-​14