Diseba

Ame e hnine la Tusi Hmitrötr, akönia amamane Iehova ka hape, Aberahama la enehmu i Nyidrë. (2 A. l. Ite jo. 20:7; Is. 41:8; Iako. 2:​23) Nyidrëti hmekuje hi la atr hna hën e hnine la Tusi Hmitrötr, ka hape, enehmu i Akötresie. Hapeu, kolo kö lai a hape, Aberahama hmekuje hi la atr ka nyi enehmu i Iehova? Ohea. Tusi Hmitrötr a amamane ka hape, ijiji së asë hi troa nyi enehmu i Iehova. Ala nyimu la itre hlue i Akötresie hna qaja e hnine la Tusi Hmitrötr, itre trahmanyi me föe ka xoue Iehova, nge ka mejiune koi Nyidrë, nge itre enehmu i Nyidrë. Angatre fe lo itre ka sine “la itete anyipicine ka ala nyimu” hna qaja hnei Paulo, itre enehmu i Akötresieti asë hi angatr. (Heb. 12:1) Ka isapengöne kö angatr. Ame pe, atraqatr la madrine i angatre troa kapa la ahnahna ka sisitria, ene la troa nyi enehmu i Nyidrë. Catre pi së lapaune tui angatr. (Heb. 6:​11, 12) Nge tro fe hë së lai a hane nyi enehmu i Iehova epine palua! w16.02 2:​1, 2, 19

Pane mekune jë laka, ketre sinee i eö a hamë eö la ketre loto nyine ahnahna. Angeic a hamë eö la itre pepa ne la loto me hape, “Loto i eö hë la.” Ngo öni angeice fe ka hape, “Loto hi, ngo ame la kii, tro kö ni a lapa fë, nge eni la ka troa xome la loto, ngo tha eö kö.” Tune kaa la eö a mekune la ahnahna cili? Nemene la aqane goeëne eö la sinee i eö cili? Ame la ketre atr a sa xepu koi Iehova, angeic a qaja koi Nyidrë ka hape: “Eni a nue la meleng koi Nyipë, matre ewekë i Nyipëti hë ni.” Ngo pane mekune jë: Tune kaa ju hë e traqa ju angeic nyiqaane iatre me ketre atr ka tha nyihlue i Iehova kö? Nge tune kaa ju hë e traqa ju angeice xome la ketre huliwa ka troa ajolë angeic troa sine la huliwa ne cainöj, maine sine la itre icasikeu pena? Ame hë e cili, tha angeice hmaca kö a metrötrëne lo hnei angeic hna sisinyi koi Iehova. Kösë angeice lai a cipane lo kii ne loto. The thëthëhmine kö laka, ame la easë a sa xepu koi Iehova, tre, ­ewekë i Nyidrëti hë së. Haawe, kolo hi lai a hape, tro pala hi sa thele troa kuca la aja i Iehova, ngacama jole pi hë e itre xa ijin. Aqane tro hi së lai a trongëne la hna qaja hnei Iesu ka mama ngöne la xötr ka nyi tane la topik ne la drai celë. w16.03 1:​16, 17

Traqa koi 3 000 lao macatre enehila, hnei Elia hna könë Elisaia nge thöthi petre kö angeic, matre troa hane xatua nyidrë. Ame hna canga kapa hnei Elisaia, me kuca la huliwa hna athipe koi angeic, ngacama ketre huliwa hna wangacon. (2 Ite jo. 3:​11) Hnei Elia hna inin me hnëkë Elisaia koi sikisi lao macatre. Ame hë la kola nyipune la huliwa i Elia perofeta e Isaraela, nyidrëti hi lai a qaja koi Elisaia ka hape, tha tro hmaca kö angeic a ce huliwa me nyidrë. Ngo, ka xeci e kuhu hni angeic troa ce lapa aqeanyi memine la atre hamë ini koi angeic. Maine epuni la ketre trejine trahmany, tro epuni a nyitipu Elisaia tune kaa? Canga nyimenyime jë xome la itre hnëqa, ngacama itre huliwa hna wangacon. The thëthëhmine kö laka, ame la atre hamë ini koi epun, tre, sinee i epuni hi lai. Qaja jë koi nyidrë ka hape, epuni a madrine la hnei nyidrëti hna kuca koi epun, nge amamane jë ka hape, aja i epuni pala hi troa kapa la ini qaathei nyidrë. Ame la ka sisitria, tre, xome hnyawa jë la hnëqa i epun. Pine nemen? Ame la epuni a amamane ka hape, ka huliwa nyipici epun, nge ijije hi troa mejiune koi epun, kolo lai a mama hnyawa kowe la itre qatre thup ka hape, aja i Iehova tro epuni a hetre itre xa hnëqa hmaca kö e hnine la ekalesia.​—Sal. 101:6; 2 Tim. 2:2. w15 15/4 2:​13, 14

Aja i Saulo tro Ionathana a joxu, ngo tha Davita kö. (1 Sam. 20:31) Ngo ame Ionathana, Iehova la hnei angeic hna hnim me nyipici kow. Celë hi matre, tha hnei angeice kö hna sipu meku angeice kö. Ngo, hnei angeice pe hna thele troa ce sinee me Davita, me catre nyipici kowe la hnei nyidroti hna isisinyikeu. Haawe, qa ngöne laka hne së hna nyipici koi Akötresie, tro së lai a eatrëne la hne së hna sisiny. Ame ngöne la ketre con­trat ne huliwa, tro së lai a eatrëne la hne së hna ce axeciëne troa kuca, ngacama jole ju hë koi së. Ketre, e hetre jol ka traqa koi së e hnine la ­faipoipo, tro lai a mama la ihnimi së koi Iehova e hne së hna catre nyipici kowe la trahmanyi së maine föe së. (Mal. 2:​13-​16) Loi e tro fe sa nyipici koi Akötresie, me meku itre xan. Catre pi së nyipici kowe la itre trejin, trahmanyi me föe, ngacama tha meköti kö la aqane ujë i angatr koi së. Tro fe sa nyipici pala hi koi Iehova, ngacama jole ju hë koi së. Tro hë së e cili a amadrinëne la hni Iehova, nge tro fe së lai a madrin. (Ite edomë 27:11) Tha luelue kö së laka, ame la hnei Iehova hna kuca, tre nyine loi pala hi koi së, nge Atre hnimi së. w16.02 3:​16, 17

Atre hnyawa hi Iehova la hna atreine kuca hne së isa ala cas, me itre hne së hna thatreine xomihnin. (Sal. 103:14) Celë hi matre Nyidrëti a hamë së la trenge catre hne së hna ajan. Nyipici laka, ame itre xa ijin, kösë thatreine kö së troa xomihnin. Ngo Iehova a thingehnaeane koi së ka hape, e catrehnine catre hë la itupath, tro Nyidrëti “a nyi jëne köte” së. (1 Kor. 10:13) Kola akeukawane la hni së e troa atre ka hape, ijiji së pala hi troa mejiune koi Iehova, ke atre hnyawa kö Nyidrëti la itupath hne së hna atreine xomihnin. Maine easa sipo ixatua thei Iehova, ngo tha canga sa kö Nyidrë, loi e tro sa treqen, me xomihni ahoeany. The thëthëhmine kö laka, tru catre la aja i Iehova troa xatua së, ngo Nyidrëti a treqene hnyawane la ijine ka ijiji troa hamë së la hne së hna ajan. Öni Tusi Hmitrötre koi së: “Tro Iehova a teqene mate hnimi nyipunie; nge qa ngöne lai tro nyidëti a mejë mate utipi nyipunie; ke Akötesie ka meköti Iehova.” w15 15/4 4:​8, 9

Ame la kola kuca la hmi hnepe lapa e nöjei wiik hnene la itre atren asë la hnepe lapa, tre kola a aijijë angatr troa atrepengö i Iehova hnyawa, me acatrene la ihnimikeu i angatr. Ame ngöne la ijine cili, angatre a amacane la nyine troa qaja ngöne la hna cainöje trootro, matre tha tro kö a jole koi angatr troa ithanata. Ketre, ame la angatre a drenge la aqane trotrohnine la nyipici hnei ketre, me goeëne la aqane isa hnimi Iehova me pi amadrinë Nyidrë, kolo hi lai a acatrene la aqane imelekeu i angatr. Nemene la aqane tro la lue trefën a ce huliwa me Iehova? E hna hnimi Iehova me ce nyihlue i Nyidrë, tro ha mele madrine me casi hnei nyidro hnine la faipoipo. Loi e tro fe nyidroti a isa amamane la ihnimi ketre koi ketre, tune lo hna kuca hnei Aberahama me Sara, Isaaka me Rebeka, Elekana me Hana. (Gen. 26:8; 1 Sam. 1:​5, 8) E tro la trahmanyi me föe a ujë tune lai, tro nyidroti lai a cas, nge tro fe lai a aeasenyi nyidroti catre koi Iehova.​—Ate cai. 4:​12. w16.03 3:​12, 13

Satana a catre isi memine la itre hna iën e celë fen, me icilekeu memine “la ite xa mamoe.” (Ioane 10:16) Angeic a catre huliwane la hnepe ijine i angeic, matre troa ajojezine la lapaune ne la Itretre Anyipici Iehova. (Hna ama. 12:​9, 12.) Ngo ijije hi tro sa cile catre me ngaa Satana. Öni Tusi Hmitrötr: “Thipe tiji diabolo pi, nge tro nyën’ a köte qa thei nyipunie.” (Iako. 4:7) Ala nyimu la itre atr ka mekune laka, pëkö Satana. Ame koi angatr, kolo hi a qeje Satana me itre dremoni ngöne la itre itus, maine itre film nyine iaxoueny, maine ngöne itre elo pena. Angatre fe a mekune laka, ka hmo la itre atr ka mejiune ka hape, hetre itre u ka ngazo. Hna ajolë Satana kö la kola mekune hnene la itre atr ka hape, tha ka mele kö angeic me itre dremoni? Ohea! Atreine hi Satana atimekëne la itre atr cili. (2 Kor. 4:4) Satana a kuca matre troa haöthe la fen hnene la itre mekune ka tune lai, matre amenune la itre atr. w15 15/5 2:​1, 2

Hna ahnith amë hë koi Mose hnei keme me thine i angeic lo hna thingehnaean hnei Iehova laka troa thapa la angetre Heberu qa ngöne ithahluë, me hamë angatre la Nöje Hna Thingehnaean. (Gen. 13:​14, 15; Eso. 2:​5-​10) Hnei Mose hna lapa mekune la ijine tro Iehova a thepe angetre Heberu qa ngöne la ithahluë. Tune la itre xa hlue i Iehova ekö, atre hnyawa hi Mose ka hape, tro kö Iehova elanyi a thapa la itre atr qa ngöne la mec. (Iobu 14:​14, 15; Heb. 11:​17-​19) Matre mama hnyawa pi koi angeic la etrune la ihnimi Iehova kowe la itre hlue i Nyidrë. Nge kolo fe a akökötrene me acatrene la ihnimi me lapaune i angeic koi Iehova. Lue ewekë hi lai ka aijijë Mose troa nyihlue i Iehova uti hë mec. (Deu. 6:​4, 5) Ngacama hnei Farao hna thele troa humuthi angeic, ngo tha hnei Mose kö hna xou. Ka xecie hnyawa pe koi angeic ka hape, tro kö Iehova elanyi a hamëne la nyipi thupene koi angeic.​—Eso. 10:​28, 29. w15 15/5 3:​11-​13

Hnei Iesu hna kuca la pane iamamanyikeu i nyidrë ngöne lo faipoipo e Kana. Thatre kö së la kepine matre tha ijije kö la waina kowe la nöjei ka traqa. Nyine hmahmane lai kowe la lue trefën, ke qa i nyidro troa hnëkëne la ka ijije kowe la itre hna hën. Maria, thine i Iesu la ketre e angatr. Eahlo a sipo ixatua ju koi Iesu, ke eahlo jë a mekune ka hape, ijiji Iesu hi troa kuca la ka ijij. Eje hi laka, hnei Maria hna mekune hnyawa lo aqane qeje Iesu hnene la itre hna perofetan, nge atre hnyawa hi eahlo ka hape, tro lo a hë nyidrë, ‘Hupuna Ne La Ka Sisitria.’ (Luka 1:​30-​32; 2:​52) Ame la ka mama hnyawa, tre, ene la aja i Maria me Iesu troa xatuane la lue trefën. Celë hi matre, ujëne jë Iesu la 380 lao litë tim koi “waina ka loi.” (Ioane 2:​6-​11) Tha jole i Iesu kö lai troa kuca la iamamanyikeu cili. Ngo ame laka kuca jë nyidrë, tre hnene la etrune la ihnimi nyidrëti kowe la itre atr. Ketre, nyidrëti a nyitipune la aqane ham ne la Tretretro i nyidrë. w15 15/6 1:3

Qëmekene tro Iesu a elë hnengödrai eë, hnene la itretre drei nyidrë hna hnyinge ka hape: “Joxu fe, hape u, ijinë hë la tro cilieti a ajoxunyi angete Isaraela hmaca ?” Sa jë hi Iesu ka hape, tha ijine petre kö koi angatre troa atre la ijine troa mus hnene la Baselaia i Akötresie. Nyidrëti pe a upi angatre troa akötrehnine la huliwa ne cainöj, huliwa ka nyipi ewekë catr. (Ite hu. 1:​7, 8) Ketre, nyidrëti a ini angatre troa thithi fë la Baselaia i Akötresie matre traqa pi, nge matre tro pala hi angatr a trengeneune la ijine cili. Celë hi matre, easë pala hi enehila a thithi fë matre traqa pi la Baselaia. Ame lo kola easenyi la ijine troa acili Joxu Iesu e hnengödrai, hnei Iehova hna xatuane la itre hlue i Nyidrë troa atrehmekune la macatre ne tro lai a traqa. Ame lo 1876, hnei Charles Russell hna cinyihane la tane mekune hna hape, “Hneijine i Ange Ethen: Eu La Kola Nyipun?” Öni nyidrë, ame lo “macate . . . ka luengemen [“sevene lao ijin,” MN ]” lo hna perofetane hnei Daniela, tre casi hi memine la “ijine i angete ethen” lo hna perofetane hnei Iesu. Kolo fe a qaja hnene lai tane mekune ka hape, hna nyipune la ijine cili lo 1914.​—Dan. 4:​16; Luka 21:24. w15 15/6 4:​11, 12

Hna ketri Iesu hnene la akötre ne la itre atr. Ame ngöne la kola meci hnei Lazaro, sinee i nyidrë, öhne ju hi nyidrëti la akötre ne la lapa i Lazaro me itre sinee i angeic, ame “hnei nyidëti hna simano e kuhu hnin, me manomano cat.” (Ioane 11:​33-​36.) Ngacama atre hi nyidrë ka hape, tro hma­ca kö lai a amele Lazaro, ngo hnei nyidrëti hna treij. Tha hmahma kö nyidrë tro la itre atr a goeë nyidrë e treij. Tru catre la ihnimi nyidrëti koi Lazaro, me lapa i angeic, ame hnei nyidrëti hna huliwane la mene qaathei Akötresie matre troa amele Lazaro hmaca! (Ioane 11:​43, 44) Tusi Hmitrötr a qeje Iesu ka hape, nyidrëti la hnaiji ne la Tretretro i nyidrë, Iehova. (Heb. 1:3) Matre, kola anyipicine hnene la itre iamamanyikeu ka hape, aja i Iehova fe troa apatrene la itre sine mec, me akötr, me mec. Easenyi hë matre tro Iehova me Iesu a amelene hmaca la itre atr ka ala nyimu catre hmaca kö. Öni Iesu, “Calemi hë la ijine tro la nöjei ate ngöne la ite hua [“nyine amekunën,” MN ] a mele hmaca.”​—Ioane 5:​28, 29. w15 15/6 2:​13, 14

Maine nyipici laka, itre atr a mekune ka hape, atrunyi Iehova jë kö angatre elanyi e elë jë angatre hnengödrai eë thupene la hna mec, ngo ame la itre hlue i Iehova, atre hnyawa hi angatr ka hape, enehila hi la ijine troa atrunyi Iehova e celë fen, tha elanyi kö. Ame la easa atrunyi Iehova, easë hi lai a nyitipune la itre hlue i Nyidrëti ekö hna qaja ngöne Salamo 99:​1-3, 5. Hnene la itre hlue i Akötresieti ekö, tui Mose, me Arona, me Samuela hna sajuëne la ewekë hna acile hnei Akötresie thatraqane la hmi ka wië ekö. (Sal. 99:​6, 7) Ame enehila, qëmekene tro la itre hna iën a ce huliwa me Iesu e hnengödrai ceitu me itretre huuj, angatr a pane nyihlue i Iehova e celë fen, ketre igötranen ne la ēnē ne la u. Kola xatua angatre hnene la itre xa hlue i Iehova, ene la “ite xa mamoe,” laka itre milio la etrun. (Ioane 10:16) Kola ce atrunyi Iehova hnene la lue lapa cili. Ngo loi e tro sa isa waipengö së me hape, ‘Hnenge kö hna hane catre sajuëne asë la itre hna amekötine hnei Iehova thatraqane la hmi?’ w15 15/7 1:​4, 5

Qaane ekö catr, hnene la itre hlue i Iehova hna treqene matre eatre pi la itre hna perofetan. Isaia fe la ketre atr ka treqene hnyawa, ke, hnei angeic hna perofetane ka hape, tro Iehova a abëekëne Iudra eë lo angetre Iudra ka qa hna po. Öni angeic: “Manathithi angate asëjëihë angete teqe anganyidë.” (Is. 30:18) Hnei Mika fe hna treqene hnyawane la troa eatre la itre hna thingehnaeane hnei Iehova, öni angeic: “Ame ni, tro ni a teqe Iehova.” (Mika 7:7) Nge ngöne la itre hadredre lao macatre, ka xecie hnyawa kowe la itre hlue i Akötresie ka hape, troa traqa la Mesia hna thingehnaean, ene Keriso. (Luka 3:​15; 1 Pet. 1:​10-​12) Ame enehila, easë fe a treqene troa eatre la itre hna perofetane göne la Baselaia i Iehova. Easenyi catre hë matre amelene jë la itre hlue i Akötresie qa ngöne la fene ka ngazo celë hnei Iesu, Joxu ne la Baselaia. Tro nyidrëti a apatrene la itre atr ka ngazo, me nöjei akötr. (1 Ioane 5:​19) Celë hi matre nyipi ewekë tro sa treqene hnyawane la drai Iehova, me kuca asë la hne së hna atreine matre tro sa lapa hmek. w15 15/8 2:​1, 2

Thenge la hna amekötine hnei Iehova, hnene la itretre Isaraela hna cane la ketre uma mano. (Eso. 25:8) Ame hë e thupen, hnei Nyidrëti hna upi angatre troa xupe la ēnē. (1 Ite jo. 8:​27, 29) Ame hë la kola bëeke hnene la nöje i Akötresie qaa Babulona, hnei angatre hna pune icasikeu ngöne la itre sunago. (Mar. 6:2; Ioane 18:20; Ite hu. 15:21) Nge ame la itre pane Keresiano, tre angatre a icasikeu ngöne la itre hnalapa. (Ite hu. 12:12; 1 Kor. 16:19) Ame enehila, itre hlue i Iehova e cailo fen a icasikeu ngöne la itre thauzane lao Uma Ne Baselaia, nge e cili angatr a thele troa atrepengöi Iehova hnyawa me atrunyi Nyidrë. Atraqatre la metrötre i Iesu kowe la ēnē i Ie­hova e Ierusalema. Matre hnene la trenge aja i Iesu kowe la ēnē hna amekunëne la itretre dreng la itre trenge ewekë i nyidrë ka mama ngöne la topik ne la drai celë. (Sal. 69:9) Ame la Uma Ne Baselaia, tre tha “ēnē i Iehova” kö lai tune lo ēnē ekö e Ierusalema. (2 A. l. ite jo. 5:​13; 33:4) Ngo, loi e tro sa metrötrëne catrëne la itre hnë hmi së. Ame ngöne la tane mekune celë, tro sa ce ithanatane la itre trepene meköti ne la Tusi Hmitrötr ka amamane koi së la aqane tro sa ujë ngöne la Uma Ne Baselaia. w15 15/7 4:​1, 2

Loi e hetrenyi the së elany ngöne la itre macatre Ka Ca Thauzane Ne Musi Keriso la ihnim, me atreine nue la ngazo i ketre me ketre. Maine tro sa inine troa nue la ngazo i ketre, me imelekeu hnyawa me itre atr enehila, tha tro kö a jole elanyi koi së troa ujë tune lai ngöne la fene ka hnyipixe. (Efeso 4:​2, 32) Ame ngöne la fene ka hnyipixe elany, tha tro kö së lai a kapa la nöjei ewekë hne së hna ajan, nge tro së lai a pane itreqe matre hetrenyi jë. Matre nyipi ewekë elanyi tro sa hetre hni ne ole, me kapa madrine la hne së hna hetreny. Nyipi ewekë koi së elanyi la itre thiina hnei Iehova hna ini së enehila troa melën. Haawe, e tro sa inine troa melëne itre ej enehila, easë hi lai a amamane ka hape, ame la fene ka hnyipixe, tre ka mel e kuhu hni së, nge ka hnëkë fe së kowe la mele ka tha ase palua kö. (Heb. 2:5; 11:1) Ketre, aqane tro fe hi së lai a amamane la aja së troa mele ngöne la fene laka, nöjei atr asë a ­drengethenge Iehova. w15 15/8 3:11, 12

Ame la epuni a goeëne la itre wene sinöe ka hmedr ngöne la hna maketr, tre, ngacama tha ka ceitu kö itre ej, ngo hetre itre ewekë ka isa amamane ka hape, hmedr hë itre ej. Ceitune hi lai memine la itre keresiano ka macaj. Tha ceitu i angatre asë kö. Angatr a isa traqa qa ngöne la nöjei nöj, nge isa aqane mele i angatre kö. Isa macatre i angatr, nge tha ceitune kö la itre aja i angatr me hnei angatr hna xelen. Ngo, hetre itre thiina ka lolo, nge ka mama thene asë hi la nöjei keresiano ka macaj. Nemene la itre thiina cili? Ame la keresiano ka macaj, tre angeic a nyitipu Iesu me xötrethenge “la ite thupa ca i nyidë.” (1 Pet. 2:​21) Öni Iesu, ka nyipi ewekë catr tro la atr a hnimi Iehova qa kuhu hni angeic, me u i angeic, me mekune i angeic, me hnime la atr ka lapa easenyi angeice tui angeice hi. (Mat. 22:​37-​39) Angeic a thele troa trongëne hnyawa la hna amekötine celë. Nge troa mama qa ngöne la aqane mele i angeic ka hape, ka tru koi angeic la aqane imelekeu i angeic me Iehova, nge atraqatre fe la ihnimi angeic kowe la itre atr. w15 15/9 1:​3-5

Mekuthetheu hna inine hnyawa la ka sewe së troa kuca la ngazo. Nge eje fe a upi së troa kuca la loi, tune la troa cainöje ngöne la itre hnalapa trootro, me cainöje e nöjei ijin. Celë hi hna kuca hnei Paulo, öni angeic: “Hna musinë ni ; ngo ekölö hi ni, e tha cainöjëne kö ni la maca ka loi.” (1 Kor. 9:​16) E tro sa nyitipu Paulo, tro hë sa hetre mekuthetheu ka wië, nge ka eje e kuhu hni së laka, easa kuca la loi. Ketre, ame la easa cainöjëne la maca ka loi koi itre atr, easë hi lai a ahlëne la mekuthetheu i angatr. Nge mekuthetheu së la ka aijijë së troa eatrëne lai. E tro sa inine lapane la Tusi Hmitrötr me lapa mekune hnyawa la hna qaja hnene ej, me trongëne la hne së hna inin, tro hë sa hetrenyi la mekuthetheu hna inine hnyawa. Nge ixatua hi lai kowe la itre jë së, itre keresiano! w15 15/9 2:16, 18

Ka tui Iosefa, me Mose, me Davita, itre ka melëne la itre itupath ka tru. Nge hnei Iehova hna xatua angatre ngöne la itre ijine cili. Ketre, ame la itre ewekë hnei angatre hna inin ngöne la ijine cili, tre hna xatua angatre troa xome la itre hnëqa ka tru qaathei Iehova. Matre ame hi la Iehova a xatuane me inin la itre hlue i Nyidrë, kolo hi lai a axeciëne koi së laka, Iehova a hnimi së hnyawa. Ngacama hne së hna kuca la ngazo, ngo Iehova pala hi a amamane la ihnimi Nyidrëti koi së. Maine tro sa kapa la ihaji qaathei Nyidrë me ietra, tro hë Nyidrëti “a nyipi köle tij’ asë” la itre ngazo së. (Is. 55:7) Kola hapeue lai? Kola mama qa ngöne la itre trenge ewekë i Davita la pengöi Iehova, Keme së. Öni Davita e qeje Iehova ka hape, ‘atre nue trije la itre ngazo së asë,’ nge ‘ate amele eö qa ngöne la hua? me korona eö la ihnimi me tenge ka menyik.’ (Sal. 103:​3, 4) Ngo nyimu aqane haji së hnei Iehova me xatua së. Hapeu, canga trongëne kö epun? Mekune hnyawa kö së laka, Iehova a haji së, ke, tru la ihnimi Nyidrëti koi së.​—Sal. 30:5. w15 15/9 4:​13, 14

Tru kö la itre xa jole i Maretha. Kola hnëkëne la xene ka tru koi Iesu, me kuca la itre xa ewekë ju kö matre troa tro loi la ijine cili. Ame la angeic a öhne laka, tha xatua angeice kö hnei Maria, angeic a wesitr me eetr koi Iesu. Atre hnyawa hi nyidrë ka hape, Maretha a thele troa kuca atrune pala ha, matre nyidrëti a qaja menyikën ka hape: “Maretha, Maretha, nyipoti a kuke hnine me hace hnine la nöjei ewekë ka kösau.” Ame koi nyidrë, tre tro hi a kuca la ka ijij göi xen. Thupene lai, nyidrëti a qaja atrunyi Maria, ke hnei angeice hna drei nyidrëti hnyawa. Öni nyidrë: “Ase hë Maria iëne la götrane ka loi lo ka tha tro hmaca kö a xome qa thei angeic.” (Luka 10:​38-​42) Eje hi laka, tro Maria elanyi lai a thëthëhmine la hnei angatr hna xen, ngo tha tro pi kö angeice lai a thëthëhmine la itre ini hnei angeic hna kapa qaathei Iesu, celë hi matre, hnei Iesu hna qaja aloinyi angeic. Traqa koi 60 lao macatre thupene lai, öni Ioane aposetolo: “Iesu a hnimi Maretha, me tejine me nyido.” (Ioane 11:5) Haawe, kola mama hnene la itre trenge ewekë celë laka, hnei Maretha hna kapa hnyawa la aqane ameköti angeic hnei Iesu, celë hi ka upi angeic troa huliwa catre pala hi koi Iehova ngöne la mele i angeic. w15 15/10 3:​3, 4

Nyimu hatrene la aqane xatuane Iehova la itre atr enehila. Hne së hna majemine drenge la itre hna melëne hnene la itre atr ka thele ixatua thei Akötresie jëne la thith, ame hna kapa hnei Iehova. (Sal. 53:2) Ame ngöne la ketre neköi hnapet e Philippines, hnei Allan hna öhne la ketre föe, nge treije jë hi eahlo. Öni Allan: “Ame lai hmakanyi cili, hnei eahlo hna thithi koi Iehova me sipo Nyidrëti matre troa öhnyi eahlo hnene la Itretre Anyipici Nyidrë.” Tha ca macatre ju kö, nge hnei eahlo hna nue la mele i eahlo koi Iehova. Nyimutre la itre hlue i Iehova ka öhne la aqane xatua angatre hnei Nyidrë. Kola mama lai ngöne la angatre a nuetrije la itre hnei angatre hna majemine kuca ekö, tune la ufi sixa, maine kuci dorog, maine goeë iatr ka sis. Öni itre xan, hnei angatre hna thele troa ketre sipu nue, ngo thatreine kö angatr. Ngo ame la angatr sipo Iehova la ixatua i Nyidrë, hnei Nyidrëti hna nue koi angatr “la etrune la men,” matre ijiji angatre pi troa nuetrije la itre huliwa i angatr ka ngazo.​—Sal. 37:​23, 24. w15 15/10 1:​10, 11

Itre xan a canga ihlë e hmakany matre troa e la Wesi Ula i Iehova me mekune ngön, me thith. Itre xan a kuca lai lo ijine xeni hnaipajö. Maine jë, ame la ijine ka loi koi epun troa e Tusi Hmitrötr, tre e hej qëmekene troa meköl. Nge itre xan a e, e hmakany ngo e heji fe qëmekene troa meköl. (Ios. 1:8) Eje hi laka, ame la ka nyipi ewekë catr, tre ene la troa “anyipi ewekëne la nöjei ijin,” ene la troa xomi ijine qa ngöne la itre ewekë ka pë alien matre troa e la Tusi Hmitrötr o drai me mekune ngön ej. Tusi Hmitrötr a thingehnaeane ka hape, tro Iehova a amanathithine la nöjei ka e la Wesi Ula i Nyidrë me mekune ngön, nge ka catre trongëne la hnei angatre hna inin. (Sal. 1:​1-3.) Öni Iesu: “Sisitia pe la manathithi ne la angete denge la wesi ula i Akötesie, me trongën’ ej.” (Luka 11:28) Ngo ame la ka sisitria catr, tre e tro sa e la Wesi Ula i Iehova o drai me mekune ngön ej, tro lai a xatua së troa ujë thenge la aja i Nyidrë me atrunyi Nyidrë. Maine tro sa ujë tune lai, tro hë Iehova a nyijune koi së, ene la troa kapa la itre manathith enehila, memine la mele ka tha ase palua kö elany ngöne la fene ka hnyipixe.​—Iako. 1:​25; Hna ama. 1:3. w15 15/10 4:​17, 18

Ame lo Iesu a qaja kowe la itretre drei nyidrë ka hape, troa humuthi nyidrë, hnei Peteru hna qaja koi Iesu ka hape, tha tro kö a traqa tun koi nyidrë. Atre hnyawa hi Iesu laka, hnimi nyidrëti catr hnei Peteru, ngo atre fe hi nyidrë ka hape, ka tria la aqane mekune i Peteru. Hnei Iesu hna xatua angeice tune kaa me itre xa aposetolo? Ame la hnapan, hnei nyidrëti hna wenë ameköti Peteru. Thupene lai, hnei nyidrë hna qaja la ewekë ka troa traqa kowe la itre ka xele ma ku­ca la aja i Iehova, ke kola traqa la itupath koi angatr. Öni Iesu fe, tro Iehova a nyijune kowe la atr ka tha thele loi me meku angeice hi. (Mat. 16:​21-​27) Hetre ini hnei Peteru hna kapa qa ngön. (1 Pet. 2:​20, 21) Sipo Iehova jë matre tro fe epuni a hane macamek me atrehmekune la ka troa xatuane la nekö i epun. (Sal. 32:8) Maine jë, tro epuni a dreng ngöne la aqane ithanata i nyëne ka hape, tha madrine kö nyëne kowe la itre xa trejin. Maine pena, drenge hi epuni laka, nyëne a juetrëne la ketre ewekë koi epun. The canga mekuhni nyëne kö. Ngo, the wange sixane kö la ka traqa koi nyën maine mekune pena ka hape, ka tro lai a patr. Ma nyipi ewekë e cili tro epuni a acatrene la lapaune i nyën. w15 15/11 2:​12, 13

Kola anyipicine hnene la ihnimi me casi ka eje thene la itre hlue i Iehova laka, thei angatre la nyipi hmi. Öni Iesu: “Tro nöjei ate asëjëihë a wangate hmekune laka itete dei ni nyipunie, e tro nyipunie a ihnimikeu.” (Ioane 13:​34, 35) Nge hnei Ioane Aposetolo mina fe hna cinyihane ka hape: “Mamapi la ite nekö i Akötesie, me ite nekö i diabolo ngöne laka tha qa thei Akötesieti kö la ate tha kuca kö la thina ka meköt, memine la ate tha hnime kö la tejine me angeic. Ke dei lola wesi ula hnei nyipunie hna denge qa ngöne la qane laka qa shë troa ihnimikeu.” (1 Ioane 3:​10, 11) Haawe, mama hnyawa pi hi ka hape, Itretre Anyipici Iehova hi la itre nyipi keresiano, nge angatre hi la itre hna upe hnei Akötresie troa cainöjëne la Baselaia i Nyidrë e cailo fen.​—Mat. 24:14. w15 15/11 4:​10, 11

Loi e tro sa a hane mekune la qene nöje me itre ini hna mejiune kow hnene la itre atrene la teritoare së, matre tro sa atrehme­kune la ijine troa ithanata koi angatr. Eue la itre ijine koi së tro sa treqene troa ithanata? Maine jë troa qaja hnene la ketre atr la ketre ewekë ka troa akötrë së. Tha tro pi kö sa canga sa maine sa angazone pena, ngo loi e tro pe sa pane cil me mekune ka hape: ‘Ma angeic a ihnyima? Tro kö ni a sa koi angeic?’ Ame la ka loi koi së, tre ene la troa lapa thaup. Ngo, maine hetre mekune ka nyipi ewekë nyine tro sa qaja koi angeic, tre, loi e troa treqene matre pane lapa kötre pi la trenge hni së. (Ite edomë 15:28) Maine hetre aja së pena troa xatuane la itre atrene la hnepe lapa së troa atre Iehova, loi e tro sa atreine itreqe. Ketre, loi e tro mina fe sa mekune hnyawa la hne së hna troa qaja, me thele la ijine ka ijij matre tro angatr a hane pi drei së. w15 15/12 3:​6, 8, 9

Nyipi ewekë tro sa hetrenyi la “wangate hmekun,” maine inamacan, qëmekene tro sa iëne la ketre aqane nyinyine la meci së. Ka nyipi ewekë catre hmaca kö e tha ka hlemu kö lai drösinöe. Hapeue lai atr hne së hna wang, atre hnyawa hi angeic qejepengöne lai drösinöe? Ka lualai kö la aqane qejepengön? Hapeu, casi hi la mekuna ne la itre droketre, laka hna hane aloine hë la itre atr hnene ej? (Ite edomë 22:29) Maine jë tro la ketre atr a qaja ka hape, hetrenyi hë la nyin ne la ketre mec ngöne la ketre nöj, nge thatre pala kö hnei itre droketre. Ngo hapeu, hetrenyi kö la itre ewekë ka anyipicine lai? Nge ame pena itre xa atr, hetrenyi angatr la itre drösinöe, ngo thatre pe së la itre nyikön, me qaane la mene ne itre ej. Ka hetre ethanyine catre la itre drösinöe cili. The thëthëhmine kö laka, hnei Akötresieti hna hmekë së qa ngöne la itre mene ne la itre drösinöe ka tune lai.​—Deu. 18:​10-​12; Is. 1:​13. w15 15/12 4:​16

Hetrenyi e hnine la Tusi Hmitrötr la itre hlue i Iehova ka kapa la uati hmitrötre i Nyidrë, ngo itre ka tha tro kö a mel e hnengödrai. Ioane Bapataiso la ketre e angatr. Öni Iesu göi Ioane, pëkö atr qëmeke i angeic ka sisitria hui angeic, ngo tha tro kö angeic a hane musi e koho hnengödrai. Davita fe la ketre hna ea hnene la uati hmitrötr. (1 Sam. 16:13) Jëne la uati hmitrötr, hetre itre ewekë ka jui göi Iehova hnei angeic hna trotrohnin, nge celë fe ka upi angeic troa cinyihane la itre xa götrane ne la Tusi Hmitrötr. (Mar. 12:36) Ngo öni Peteru, “tha elë kö Davita kowe la hnengödrai.” (Ite hu. 2:​34) Hnei Iehova hna hamëne la uati hmitrötr koi angatr matre aijijë angatre troa kuca la itre ewekë nyine hain. Ngo, tha hnei Nyidrëti kö hna nue la uati hmitrötr koi angatr göi troa hë angatr kowe la mel e hnengödrai. Tha kolo kö lai a hape, tha ijiji angatre kö troa musi e hnengödrai. Ngo, hetre edrö i angatre kö hnei Iehova hna hnëkën, ene la troa amele angatre hmaca ngöne la Paradraiso e celë fen.​—Ioane 5:​28, 29; Ite hu. 24:15. w16.01 3:​16

Ame la easa ce huliwa memine la itre hne së hna hnim, kola acatrene la aqane imelekeu së me angatr. Easë fe hë a atrepengöi angatr hnyawa me itre thiina i angatr. Atre fe hë së la itre aja i angatr, me aqane thele angatre troa eatrën itre ej. Hnei Ie­su hna ce huliwa me Iehova, traqa jë koi itre miliare lao macatre. Catrecatre la ihnimi ketre koi ketre, matre pëkö ketre ewekë ka atreine troa thë la aqane imelekeu i nyidro. Hnei Iesu hna sipo Iehova troa thupëne la itretre drei nyidrë. Pine nemen? Öni nyidrëti e thith: “Mate casi angat, tui nyisho.” (Ioane 17:11) Ame la easa mele thenge la itre trepene meköti Akötresie me cainöje trootro, ketre easë fe lai a atrepengöne hnyawa la itre thiina i Nyidrë. Nge trotrohnine hnyawa fe hë së la kepine matre nyipi ewekë tro sa mejiune koi Nyidrë, me trongëne la hnei Nyidrëti hna amekötin. E tro sa easenyi koi Akötresie, ketre tro fe Nyidrëti lai a easenyi koi së. (Iako. 4:8) Ketre, hnene laka casi hi la itre aja së memine la itre trejin, ene pe casi hi la itre jole me madrine ka eje the së. w16.01 5:9, 10

Naomi a pi canga lö kowe la nöje i eahlo, ene Isaraela. Rutha a ce tro me eahlo, nge tha ka hmaloi kö koi angeic troa axecië mekun. Tro kö angeic a bëeke a tro Moaba, nöje i angeic, troa ce mele memine la itre sine la madra i angeic? Maine pena, tro kö angeic a ce tro me Naomi, tretre i angeic, a tro Betheleema? (Rutha 1:​1-8, 14) Ka mele la itre sine la madra i angeic e Moaba. Matre hmaloi hi koi angeic troa bëeke koi angatr, matre troa thupë angeic. Atre hnyawa hi angeic la nöje cili, me qene lapa, me qenenöje i angatr. Ame pena Naomi, thatreine kö eahlo troa hamëne la itre ewekë celë elany koi Rutha e Betheleema. Ketre, eahlo a seseu göi Rutha, pine laka, jole koi angeic elanyi troa hetre trahmany me hetre hnalapa. Matre hnei Naomi hna upi angeic troa bëeke a tro Moaba. Öni eahlo, “hmaca ha [Orepa] la föe ce lapa me eö kowe la nöjei sine i angeice memine la ite haze i angeic.” (Rutha 1:​9-​15) Ngo, tha hna ujë tune kö lai hnei Rutha, ene la troa bëeke kowe la nöje me itre haze ne cili. w16.02 2:​4, 5

Ame ngöne la ketre jidr, hnei Davita me Abisai hna tro metrötr ezi Saulo me itre sooce i nyidrë, nge angatr a imeköleny. Matre, Abisai a uliline jë koi Davita me hape: “Nue ni pi matre tro ni a aca tro xale angeic e cahu hnadro, nge tha tro ju kö a alu.” Ngo öni Davita koi Abisai: “The humuthi nyidrëti kö, ke drei la atre troa li ime kowe la siana i Iehova a troa pë hulö ?” Öni Davita hmaca jë: “Iehova a sewe ni matre tha tro kö ni a li ime kowe la siana i Iehova!” (1 Sam. 26:​8-​12, MN ) Atre hnyawa hi Davita la nyine tro angeic a kuca matre troa nyipici koi Iehova. Hnei angeice hna metrötrë Saulo, nge goi tha traqa fe koi angeic la mekun troa akötrë nyidrë. Pine nemen? Pine laka hnei Akötresieti hna acili Saulo troa joxu i angetre Isaraela. Aja i Ie­hova enehila tro së itre hlue i Nyidrë asë, a nyipici koi Nyidrë, me metrötrëne la itre hnei Nyidrëti hna aijijën troa mus. w16.02 4:​1, 2

Maine eö hi la ketre thöth ka ajane troa xomi bapataiso, celë hi ketre manathithi ka tru catre lai koi eö. Ame la troa xomi bapataiso, tre, tha ewekë nyine tro kö a wangacon. Celë hi ka amamane kowe la nöjei atr ka hape, ase hë eö sa xepu koi Iehova me sisinyi troa mele nyipici koi Nyidrë epine palua. Loi e xecie e kuhu hni eö laka, macaje hë eö, nge sipu aja i eö kö, nge ketre loi e tro eö a trotrohnine hnyawa la aliene la kola sa xepu koi Iehova. Ngo ame koi eö, tha ijiji eö pala kö troa xomi bapataiso. Maine pena eö hë a mekun troa xomi bapataiso, ngo ame koi kaka me nenë, loi e pane tru jë eö nge hetre hnei eö hna melën. Nemene jë la nyine tro eö a kuca? The cile kö! Catre pi pe eö xome la ijine cili me huliwa catr matre ijiji eö jë troa xomi bapataiso. w16.03 2:​1, 2

Hetre itre trejin hna atre la nyipici nge faipoipo hë angatr, matre tha hane fe kö ce hmi me angatre hnene la föi angatr. Matre hnene la itre keresiano hna isine troa acatrene pala hi la faipoipo i angatr, jëne la hna trongëne la itre eamo qa hnine la Tusi Hmitrötr. Eje hi laka, tha ka hmaloi kö, ngo ame pe, pane mekune jë la itre manathith hnei epuni hna troa kapa elany. Tru la hnei Satana hna akötrëne la itre hnepe lapa enehila. Celë hi matre, nyipi ewekë tro la lue trefën ka nyihlue i Iehova a ce huliwa. Ngacama ka hekö hë epon faipoipo, ngo pane mekune ju la nyine tro epon a qaja me kuca göi troa acatrene la faipoipo i epon. Maine lue trefën epon ka qatre hë, tro epon lai a amamai tulu ka loi kowe la itre xötre ka co. Maine jë, tro epon a könëne la lue trefën ka co troa hane sine la hmi hnepe lapa i epon. Tro nyidroti lai a öhne laka, ngacama ka hekö hë faipoipo la lue trefën, ngo nyipi ewekë pala hi troa isa amamane la ihnimi ketre koi ketre me troa cas.​—Tito 2:​3-7. w16.03 3:14, 15