Juun

Hnene laka, pëkö xa nekö i Iefetha, troa pë matra i angeic, nge pë pë hë ka troa xome pe la itre zi angeic. (A. ame. 11:34) Ngo ame fe e cili, kola mama la aqane nyipici Iefetha ngöne Angete Amekötin 11:35, öni angeic: “Hnenge hna ewekë koi Iehova, nge tha ’teine kö troa hmaca.” Hnei Iehova hna kapa madrine la aqane nue apexejene Iefetha la nekö i angeic, ame hnei Nyidrëti hna amanathithi angeic. Hapeu, tro kö epuni a hane nyipici tui Iefetha? Ame la easa nue la mele së koi Iehova, easë hi lai a sisinyi koi Nyidrëti ka hape, easë hë a kuca la aja i Nyidrë, ngacama traqa ju hë la itre jol. Tha sihngödri kö koi së laka, tro ha nango jol e itre xa ijine troa eatrëne la hne së hna sisiny. Ngo hapeu e upi së jë troa kuca la ketre ewekë ngo tha aja së pe? E tro sa elë hune la xou nge hetre aja së troa drengethenge Akötresie, easë hi lai a amamane laka, ka nyipici së kowe la hne së hna sisiny. Eje hi laka tha ka hmaloi kö, ngo atraqatre catre kö la itre manathithi hne së hna troa kapa qaathei Iehova.—Mal. 3:10. w16.04 1:11, 14, 15

Iesu a xomiujine la itre ekalesia jëne la uati hmitrötre. Uati hmitrötr la ka xatua së troa cile catr ngöne la itupathi me catre cainöj. Kolo fe a xatua së troa atreine axecië mekun. Celë hi kepine matre, tro asë hi së a isine troa sine la itre icasikeu, matre troa kepe thangane la mene ne la uati hmitrötr. Ame ngöne la itre icasikeu, easë a ce ithanatane la itre hna perofetan hnei Tusi Hmitrötr. Kolo fe hi lai a acatrene catrëne la mejiune së laka, tro pala kö a eatr elanyi la itre hna thingehnaean hnei Iehova. Kolo fe a thuecatre së hnene la itre trejin ngöne la angatr a cile fë cainöj me qeje mekun, me hane nyima catr troa atrunyi Iehova. (1 Kor. 14:26) Ketre, kola akeukawane la hni së la easa ce ithanata me angatr qëmekene me thupene la icasikeu. Easë hi lai a öhn e cili laka, nyimutre la itre sinee së ka hane meku së.—1 Kor. 16:17, 18. w16.04 3:6, 7

Hnei Iesu hna upe la itretre drei nyidrë troa cainöjëne la maca ka loi e “cailo fene,” me upi angatr troa inine la itre atr ne “la nöjei nöj.” (Mat. 24:14) Haawe, mama hnyawa hi ka hape, loi e troa cainöjëne la maca ka loi e cailo fen asë. Itretre Anyipici Iehova hmekuje hi la ka eatrëne hnyawa lo hnei Iesu hna perofetane laka, tro ha cainöjëne la maca ka loi e cailo fen asë. Nemene la ka anyipicine lai? Ame hi e Etazini, kola e la 600 000 lao hene ne hmi, nge ase hë sasaithe la ala 1 200 000 lao Itretre Anyipici Iehova ka catre cainöjëne la maca ka loi. Nge ame pena e cailo fen, kola e la 400 000 lao peen, nge ase hë sasaithe la 8 milio lao Itretre Anyipici Iehova ka cainöje ngöne la ala 240 lao nöj. Haawe, Itretre Anyipici Iehova hnyawa hi la itre ka cainöjëne la maca ka loi e cailo fen, nge eje hi laka, kola atrunyi Iehova hnene la huliwa i angatr!—Sal. 34:1; 51:15. w16.05 2:13, 14

Ala nyimu pala hi la itre atr ka mekune ka hape, meköti e tro angatr a isa amekötine la loi me ngazo koi angatre kö. Itre ka pi tru angatr, nge ka tha imeku, nge ka pi hun matre kola akötrë itre xan. (Gen. 3:1-5) Itre jëne iwesitrë hi lai. Ngo, ame lo Iesu a hamëne la cainöj hune la wetr, hnei nyidrëti hna inine la itretre dreng troa thele tingeting, me canga iloi e traqa jë iwesitrë, ngacama tha ka hmaloi kö. Hnei Iesu hna ini angatr troa thiina ka menyik, me mele tingetinge me itre atr, me canga lepe trije la itre thiina ka ngazo tune la elëhni, me canga iloi me itre ka akötrë angatr, me hnime la itre ithupëjia me angatr.—Mat. 5:5, 9, 22, 25, 44. w16.05 1:4, 5

Hne së fe hna nuetrije la itre xa huliwa hne së hna majemine kuca ekö qëmekene troa xomi bapataiso, matre troa mele thenge la hna qaja hnei Tusi Hmitrötr. Ngo nyipici laka, hetrenyi pala kö la itre hnepe ewekë nyine troa saze the së göi troa nyitipu Akötresie me Iesu hnyawa. (Efe. 5:1, 2; 1 Pet. 2:21) Maine jë, öhne hi epuni laka, epuni la ketre atr ka eetre lapa, maine ka iqej, maine ka xoue atr, nge epuni pala hi a thele troa saze, ngo jole pi hë. itre atr ka ngazo pala hi së. (Kol. 3:9, 10) Ngacama ekö hë së xomi bapataiso, ngo tro pala kö së lai a isi memine la itre aja së ka ngazo, maine thele pena troa saze la ketre thiina së.—Iako. 3:2. w16.05 4:3-5

Hetre itre atr ka hane qaja ka hape: ‘Tha hnenge fe kö hna hane mekune ka hape, ka nyipi ewekë hi la ihaji i kaka me nenë, ngo eni hë a öhn ke hetre nekö i eni fe hë.’ Öhne hë angatr enehila laka, ketre hatrene ihnimi hi la ihaji. (Heb. 12:5, 11) Iehova a hnimi së ceitu me itre nekö i Nyidrë, celë hi matre Nyidrëti pala hi a xome ameköti së. Aja i Nyidrë tro sa hane inamacan me mele madrin. (Ite edomë 23:15) Ngo tha aja i Nyidrëti kö tro sa akötr, maine mec nge tha pane ietra kö. (Efe. 2:2, 3) Nyipici laka, ngazo catr ekö la thiina së qëmekene troa atre Iehova. Ngo hnei Iehova hna xome ameköti së, matre saze hë së enehila.—Is. 11:6-8; Kol. 3:9, 10. w16.06 1:7, 8

Ame la easë a goeëne la itre nekönatr, canga mama hi thei nyudreni la ipië, nge aja i nyudreni troa kapa la ini. (Mat. 18:1-3) Matre, loi e tro la itre keme me thin a canga inine la nekö i nyidro e nekönatre petre kö. (2 Tim. 3:14, 15) Ngo loi e tro nyidroti a pane isa hnine la nyipici me melëne la itre trepene meköti ne la Tusi Hmitrötr. Haawe, e hnei nyidroti hna ujë tune lai, tro ha hmaloi kowe la nekö i nyidro troa hnine la nyipici. Ketre, tro hë nyudreni a trotrohnine laka, ame la kola ameköti nyudren hnei keme me thin tre, hatrene ihnim i nyidroti lai me Iehova. E ka ipië së me ka catre drengethenge Iehova, easë fe hi lai la ketre atr hna hnime catrën hnei Iehova tui Daniela. (Dan. 10:11, 19) Ngo eje hi laka, tro pala kö Iehova a xome ameköti së jëne la Tusi Hmitrötr, me jëne la uati hmitrötr, me jëne la organizasio i Nyidrë. w16.06 2:14, 17

Lolo catre la thiina i Davita, celë hi kepine matre, tru la hnei Iehova hna hnimi angeic, ngacama hetre ngazo ka tru hna kuca hnei angeic (1 Sam. 13:13, 14) Hnei angeic hna ce meköl me Batheseba, föi Uria, nge ijine Uria pena ngöne la hna isi, ame hna upune pi la föe. Tha ajane kö Davita matre troa atre, haawe, angeic a upi Uria jë kowe la hnalapa i angeic troa wai Batheseba. Aja i Davita tro Uria a ce meköl me Batheseba matre tro pë hë la itre atr a mekune ka hape, Uria la keme ne la nekönatr. Ngo ame pe, tha weje ju kö Uria la hnalapa i angeic. Haawe, Davita a thele jëne jë matre troa humuthi Uria ngöne la hna isi. Hnene la hna kuca la ngazo ka tru celë hnei Davita, ene pe, atraqatre la akötr hna melëne hnei angeic me hnepe lapa i angeic e thupen. (2 Sam. 12:9-12) Ngo ame pe tru la utipine i Iehova, ame hnei Nyidrëti hna nue la ngazo i angeic. Atre hnyawa hi Nyidrëti laka, Davita la atre ka ajane la meköt (1 Ite jo. 9:4) Maine ka mele ju fe epuni ngöne la ijine cili, tune kaa la aqane tro epuni a ujë, tro kö epuni a hmaca hna nyihlue i Iehova pine la ngazo i Davita? w16.06 4:7

Hnene la Itretre Anyipici Iehova hna nyipiewekëne la ithuemacanyi celë hna hamëne hnei Iesu. Tha sihngödri kö koi së laka, easa melëne “la ijine la pun,” nge easenyi catre hë matre nyiqaane jë la “aköte atraqate”! (Dan. 12:4; Mat. 24:21) Tune la hna qaja amë hë hnei Iesu, kola cainöjëne la maca ne la Baselaia e cailo fen hnene la itre hlue i Iehova. Nge kolo mina fe a traqa la itre isi, me mec, me sa, me jiinë xen, ngöne la itre nöje ka nyimutre. Ketre, kola mana la hmi, me isi, me ihumuth, nge tha hna tune fe kö ekö. (Mat. 24:7, 11, 12, 14; Luka 21:11) Easë enehila a lapa treqene la ijine tro Iesu a traqa me eatrëne la aja ne la Keme i nyidrë. (Mar. 13:26, 27) Ngo ame göi troa nyiqaane la akötre atraqatre elanyi tre, tha ijiji së kö troa atre la hawa. w16.07 2:2-4

Ijiji së hë troa hane thithi koi Iehova hnene la ihnimi gufa i Nyidrë. Loi e tro sa catr thithi lapa koi Iehova jëne Iesu. Ketre manathithi lai ka tru! Öni Paulo: “Tha hnö hë së troa ewekë, me easenyi koi Iehova hnene la lapaune së koi Iesu.” (Efe. 3:12, MN) Ame ngöne la nöjei ijine easa aja ixatua, Paulo a upi së troa thithi koi Iehova, “mate troa hnimi shë, nge troa öhne la ihnimi gufa nyine ixatua ngöne la [nyipi] ijine.” (Heb. 4:16b) E traqa ju la ketre itupathi koi së, loi e tro sa sipone catrëne la ixatua i Iehova. Ngacama itre atr ka ngazo së, ngo Nyidrëti a sa la itre sipo së. Ame itre xa ijin, Nyidrëti a xatua së jëne la itre trejin, matre “ateine shë troa qaja catën, ka hape, ‘Joxu la ate xatua ni, tha tro kö ni a qou ; nemene la hna troa kuca koi ni hnei ate ?’ ”—Heb. 13:6. w16.07 3:12, 13

Hnei Noa me köni nekö i angeic trahmanyi hna xome la isa ca föe. Ngo thupene la Iwë, ala nyimu catre hë la itre trahmanyi ka nyimu föe. Nge ame fe thene la itre xa qenenöj tre, ka pë pengöne hi la troa ce meköl hnene la lue atr ka tha faipoipo kö. Nge ketre aqane hmi i angatre hi lai. Matre ame la Aberahama me Sara a fek a tro Kanana, kola lapa xötreithi nyidro hnene la itre atr ka tha metrötrëne kö la faipoipo. Hnei Iehova e cili hna lepe apatrene la lue traon, ene Sodoma me Gomora ke sisi catre pala ha la thiina ne la itre atrene la lue traone cili. Eloine pe, isa pengöne catre la aqane ujë i Aberahama me angatr. Ketre he ne hnepe lapa ka ihnim catr angeic, nge ame Sara, tre ketre tulu ka lolo göi aqane troa metrötrëne la fö hmunë. (1 Pet. 3:3-5) Hnei Aberahama mina fe hna thupën matre tro kö la nekö i angeic, Isaaka, a xomi föe thene la itre hlue i Iehova. Nge hnei Isaaka mina fe hna hane kuca tun koi Iakobo, matre, itre matra i angeice pë hë la 12 lao tribu i angetre Isaraela. w16.08 1:10

Kola eatre hnyawa la itre hna perofetane celë ngöne la hneijine la pun. Matre ame lo macatre 2015, ala 8 220 105 lao hlue i Iehova ka cainöjëne la maca ka loi ne la Baselaia e cailo fen! Hnei Iehova hna qaja göne la aqane kökötre la nöje i Nyidrë ka hape: “Tro ni Iehova a asaqen’ eje ngöne la ijin’ ej.” Celë hi matre, kola kökötre fe la etrune la huliwa së isa ala cas. Ngo hapeu, easë kö a kuca asë la hne së hna atreine matre troa sine la huliwa ne cainöj? Ala nyimu la itre trejin ka xome la huliwa ne pionie ka ixatua me pionie lapa. Nge itre xane pena a feke kowe la itre xa nöj gaa aja ixatua, nge itre xane fe a catre huliwa matre troa xupe la itre Uma Ne Baselaia. Haawe, kola mama hnyawa laka, tru catre la ‘huliwa së thei Joxu,’ ngo tha göi itre trahmanyi hmekuje kö, ngo itre föe mina fe—1 Kor. 15:58. w16.08 3:1, 2

Thupene la hna thepe angetre Isaraela qaa Aigupito, hna isi me angatr hnene la angetre Amaleka. Hnei Mose e cili hna upi Iosua, ketre trahmanyi ka catr, troa weje mekene la angetre Isaraela kowe la isi. Nge Mose pë hë a ce tro me Arona me Huro kowe la ketre sasala ka tha nanyi kö. Nge qa ngöne la götrane cili, angatr a cile goeëne la isi. Hnei Mose hna xötrethenge hnyawa la itre hna amekötin, matre tro la angetre Isaraela a hun ngöne la isi. Hnei nyidrë hna xejë draië la sine tö i Akötresie, nge ame e cili, kola catre hnei angetre Isaraela hui angetre Amaleka. Ngo e genyi hë la lue ime i Mose me thip, kolo pena ha catr hnei angetre Amaleka, nge Arona me Huro e cili a canga xatua Mose. “Nyidoti a xome la etë me nyi ta i nyidë, ame hnei nyidëti hna tith ; nge Arona me Huro a sajuëne la lue ime i nyidë, hnei kete ngöne la kete götran, nge kete ngöne la kete götran ; ame hna cate asë la lue ime i nyidë uti hë lö hë la jö.” Matre mama hnyawa hi laka, kola hun hnei angetre Isaraela hnene hmekuje hi la ime ka catre i Iehova.—Eso. 17:8-13. w16.09 1:5-7

Ka xeci hnyawa koi Paulo laka, e tro angeic a thith, me mejiune koi Iehova, me lapaune kowe la mele hna huujën hnei Iesu, tro pala kö angeic a hun. Ngo tune kaa fe së? Ijiji së kö troa hun kowe la itre aja së ka ngazo? Eje hi. Tro së lai a hun, e hne së hna nyitipu Paulo me catre mejiune koi Iehova, ngo tha kowe kö la sipu trenge catre së. Loi e tro mina fe sa lapaune kowe la thupene mel. Ame itre xa ijin, Iehova a aijiji së troa amamane la aqane goeëne së la jole ka traqa koi së. E tithi së jë hnene la ketre mec ka tru, maine ketre sinee së pena la hna tith, maine hna kuca pena koi së la ketre ewekë ka tha meköti kö, nemene la aqane tro së e cili a ujë? E ka mejiune hnyawa së koi Iehova, tro së lai a sipo Nyidrëti la trenge catre ka ijij, matre atreine së troa cile hut, me madrin, me imelekeu hnyawa pala hi me Nyidrë. (Fil. 4:13) Kola mama ngöne la hna melëne hnene la itre hlue i Iehova ekö me enehila laka, ka hetre menene la thith. Celë hi lai ka troa aegöcatrenyi së, me xatua së troa cile catr ngöne la itupath. w16.09 2:14, 15

Ame ngöne la ijine la itre pane keresiano, hetre ewekë ka traqa. Hnene la itre trejin ne Iudra ka qene Heleni hna eetr ke, hna wange acone la itre sine föe thei angatr. Hnene la itre aposetolo hna iëne la 7 lao trejin trahmanyi matre tro angatr a nyinyine lai jol, me thupëne hnyawa matre pëkö sine föe hna wange acon. Hnene la itre aposetolo hna iëne la itre trejin ka trene ej qene Heleni. Kola mekune laka, hnei angatr hna axeciëne tune lai matre tha tro kö a xou hnene la itre sine föe. (Ite hu. 6:2-6) Ka hetre thangane catre koi së asë la qenenöj. (Rom. 12:2) Ketre, easa drenge la itre ka lapa easenyi së memine la itre sine huliwa së, me itre sine ini së a qaja la itre ithanata ka ngazo göi itre atr ne la ketre tribu, maine ka ketre hane ngönetrei kö, maine ka ketre aqane mele kö. Hapeu, easë kö a drenge akötrën la itre mekune cili ka iangazo? Nge tune kaa la aqane ujë së e hnyima fë jë la nöje së, maine qenenöje së? w16.10 1:7, 8

Maine tro sa goeëne la itre ewekë hna xup me pane mekun, tro hë së lai a atrehmekune laka, hna xupe inamacanëne la nöjei ewekë asë. Nge, ngacama tha öhnyi Akötresieti kö hne së, ngo “eësha trotrohnine hnene la lapaun” laka, hetre Atre Xup. Nge mama cile fe koi së la etrune la inamacane i Nyidrë, memine la elolone la thiina i Nyidrë. (Heb. 11:3, 27) Nge ijije fe tro sa atrepengöne hnyawa la itre hnei Iehova hna xup jëne la hna öhne hnene la itre ka kuci sias. Matre, hna xawane la itre xa hna qaja hnene la itre atre cili ngöne la video hna hape, Les merveilles de la création révèlent la gloire de Dieu, memine la lue boroshür, La vie a-t-elle été créée ? me Cinq questions à se poser sur l’origine de la vie, memine la itus, Y a-t-il un Créateur qui se soucie de vous ? Hetrenyi fe e hnine la Réveillez-vous ! la itre mekun ka upe la itre xa ka kuci sias troa mejiune laka, hetre Akötresie. Hna kuca fe la tane mekune hna hape, “Hasard ou conception ?” nyine qejepengöne la aqane ujë ne la itre öni me itre xa hna xup, me aqane thele la itre ka inamacan troa nyitipun itre ej. w16.09 4:4, 5

Hnene la itre hlue i Iehova ka mama ngöne Heberu mekene 11 hna mec qëmekene troa traqa hnene la ‘matran,’ ene Iesu, lo ka troa fe gojenyine la mel e hnengödrai. (Gal. 3:16) Matre angatre a mejiune troa mele palua e celë fen, ngöne la paradraiso ka mingöming. (Sal. 37:11; Is. 26:19; Hos. 13:14) Öni Heberu 11:13 göne la itre hlue i Iehova cili: “Meci asë hë angate lai ngöne la lapaun, nge tha hetenyi kö la ite hna thinge hnaean, ngo angat’ a goeën’ it’ eje nge nanyi pete kö, me kapa madin.” Angatr ekö a trengeneune la fene ka hnyipixe, me mekune la mele i angatr e cili. Aberahama la ketre e angatr. Öni Iesu, “aciacinë hë [maine, madrine atraqatr] Aberahama . . . troa goeëne” la ijine cili. (Ioane 8:56) Hnei Sara fe, me Isaaka, me Iakobo, me itre xane ju kö hna trengeneune la ijin tro la Baselaia a mus hune la fen asë. Nge “ame la ate acile [la Baselaia] me huliwan, te, Akötesie.”—Heb. 11:8-11. w16.10 3:4, 5

Iehova a aijiji së troa atrepengöi Nyidrë me Hupuna i Nyidrë jëne la uati hmitrötr. Nyidrëti fe a aijiji së troa lapaune koi nyidro. (Luka 10:21) Tro sa amamane tune kaa la hni ne ole së koi Iehova pine la nöjei ewekë asë hnei Nyidrë hna kuca? Tha tro pi kö sa hmaca troa ole koi Nyidrë hnene la hna aijiji së troa imelekeu hnyawa me Nyidrë jëne Iesu “ate nyi qane me apexejene la lapaun.” (Heb. 12:2) Ketre, loi e tro pala hi sa thithi koi Iehova me inine la Wesi Ula i Nyidrë matre tro pala hi a catr la lapaune së. (1 Pet. 2:2) Maine ka catre la lapaune së kowe la itre hna thingehnaean hnei Iehova, tro lai a mama jëne la itre huliwa së. Tro pala hi së lai a cainöjëne la Baselaia i Akötresie kowe la itre atr, me xatua angatr troa nyihlue i Iehova. Ketre, tro pala hi së lai a kuca “la loi kowe la nöjei ate asëjëihë . . . ngo sisitia [kö] kowe la nöjei ate ne la lapa i angete lapaun.” (Gal. 6:10) Nge tro fe sa isine troa “una tije la ate ka hekö memine la ite thina i nyën.”—Kol. 3:5, 8-10. w16.10 4:11, 12

Lolo catr la aqane ameköti ewekë Iehova e koho hnengödrai me e celë fen. Haawe, aja i Nyidrëti fe tro la itre hlue i Nyidrë a ce huliwa me Nyidrë thenge la aqane ameköti huliwa i Nyidrë. Hnei Nyidrëti hna hamë së la Tusi Hmitrötr matre troa amamane koi së la aqane troa nyihlue i Nyidrë. Tro hmekuje hi së lai a hetrenyi la mel ka loi me madrin, e hne së hna xötrethenge la itre hna amekötin hnei Nyidrë jëne la Tusi Hmitrötr me jëne la organizasio i Nyidrë. Hnene la angetre Isaraela hna xötrethenge la wathebo qaathei Akötresie, matre lolo catr la aqane tronge i angatr. Hetre itre föe hna hnëkëne thatraqane la huliwa “ngöne la qëhnelö ne la uma ne heta ne icasikeu.” (Eso. 38:8) Ame hë e thupen, hnei Davita joxu hna hnëkëne la itretre huuj me itretre Levi göi troa kuca la isa hnëqa i angatr ngöne la ēnē. (1 A. l. ite jo. 23:1-6; 24:1-3) Hna eköthe hnyawa mina fe la itre ekalesia ngöne la hneijine la itre pane keresiano. Hetrenyi ekö la lapa ne xomi meköt, ene la neköi lapa ne la itre trejin trahmanyi ka elemeken la itre ekalesia. (Ite hu. 6:1-6) Jëne la uati hmitrötr, hna cinyianyine la itre tusi ka qatreng la itre eamo me itre hna amekötine thatraqane la itre ekalesia.—1 Tim. 3:1-13; Tito 1:5-9. w16.11 2:3, 6, 8, 9

Ame lo macatre 607 qëmeke i Keriso, hnei Nebukaneza joxu II me trongene isi angeic hna lepe la traone Ierusalema. Öni Tusi Hmitrötr, hnene la joxu hna humuth la itre thupëtresij hnei taua. “Tha hnime kö la thupëtesiji me jajiny, me qat, me ka qia.” Ame hë e thupen, “hnei angate hna deuthe tije la ēnē i Akötesie, me thë tije la hag’ e Ierusalema, me deuthe tije la nöjei uma i joxu hnei eë, me angazone asë la ite inege hna ajan.” (2 A. l. ite jo. 36:17, 19) Tha sesëkötre kö angetre Iudra la kola lepi Ierusalema. Nyimutre hë la itre macatre ne upe Iehova la itre perofeta i Nyidrë troa thuemacane la itre atr ka hape, e tro pala hi angatre a tha idrei, tro ha traqa koi angatr hnei angetre Babulona troa lepe apatrenyi angatr. Tro ha humuth la angetre Iudra ka ala nyimu hnei taua, nge ame göi itre ka mele pe, troa xomi angatr troa po e Babulona. w16.11 4:1, 2

Hnene laka hna eni Wathebo hnei Adamu, ame hna löthe la nöjei atr hnene la ngazo me mec. Matre, öni Tusi Hmitrötr, “joxu la meci hnene la ca menu ne la ka ala cas.” Ngo, hnene la ihnimi gufa i Iehova, matre hetre jëne mele jë kowe la nöjei atr, ene “la ate ka ala cas, . . . Iesu Keriso.” (Rom. 5:12, 15, 17) “Troa jele mekötine la ka ala nyimu hnene la idei ne la ka ala cas.” Matre, ijiji angatre hë troa mejiune kowe “la mele ka tha ase palua kö, jëne Iesu Keriso.” (Rom. 5:19, 21) Pane mekune ju: Tha qanyi Nyidrëti kö ekö troa hamëne la nekö i Nyidrë nyine thupene mele ne la itre atr. Matre, hatrene la ihnimi ka tru i Nyidrë la Nyidrëti a thele jëne troa amele së qa ngöne la ngazo me mec. Ketre ahnahna ka tru la hnei Iehova me Iesu hna kuca gufan koi së matre tha ijiji së kö troa kapa. Celë hi matre, ketre manathithi ka tru koi së laka, ijije hë troa seng la itre ngazo së, me aijijë së troa mel epine palua! Amamane jë la hni ne ole së koi Akötresie jëne la aqane mele së. w16.12 1:1, 6, 7

Öni Paulo e hmekë së ka hape: “E hnine la ngönetei, meci hë.” (Rom. 8:6) Nemene la aliene la ithanata i angeic? Maine hne së hna “xöte thenge la ngönetei,” tro së lai a thë la aqane imelekeu së me Iehova enehila, nge tha tro hë së lai a hetrenyi la mel ka tha ase palua kö elany. Ngo tha ewekë kö lai hne së hna ajane troa traqa kow. Ijije hi tro la atr a ujë. Mekune hi epuni lo huliwa ka sis hna kuca hnene lo ketre keresiano e Korinito laka, nyine troa upe trön eë la itre ka ujë tune lai? Thupene la hna haji angeic, ujë pi hi angeic. Tha xötrethenge hë angeic la itre aja i angeic ka sis, matre angeic a nyihlue i Iehova hmaca jë ngöne la thiina ka meköt. (2 Kor. 2:6-8) Ame la atr cili, tre ketre tulu ka ngazo catr ne la atr ka “hnine la ngönetrei,” ngo hnei angeic hna ujë. Haawe, maine hetre trejin enehila ka xötrethenge la itre aja i angeic ka ngazo, nge tha trongëne hë la itre trepene meköti Iehova, ijiji angeice fe troa ujë. E hne së hna lapa mekune lo ithuemacanyi qaathei Paulo, tro lai a upi së troa wenë amekötine la mele së. w16.12 2:5, 12, 13

Tro la mejiune ka eje the së a xatua së matre tha tro kö së a hnehengazo menu. Tune la wakacu a axapone la eatre së, tro fe la itre hnei Akötresie hna thingehnaean a axapone la itre hni së ka hace. Matre keukawa la hni së la troa atre ka hape, tro kö Iehova a nyipi ewekë së ngöne la ijine easa nue koi Nyidrë la ehnefe së. Loi e xecie hnyawa koi së ka hape, “ateine [hi Akötresie] kuca la nöjei ewekë asë ka sisitia hune la hne shë hna sipone me mekune kow.” (Efe. 3:20) Tro Iehova lai a kuca la nöjei ewekë asë matre troa xatua së, ngo tro pala kö a “sisitia” la ixatua i Nyidrë. Maine aja së troa kapa la edrö së elany, nyipi ewekë tro sa catre lapaune koi Iehova, me drengethenge la itre hnei Nyidrëti hna amekötin. Öni Mose lo kowe la nöje Isaraela ka hape: “Tro Iehova a nyipi amanathithinyi ’ö ngöne la nöje hnei Iehova Akötesi ’ö hna hamëne koi ’ö nyine zi ’ö mate hetenyi ej ; loi pe maine denge hnyawa eö la aqane ula i Iehova Akötesi ’ö, troa thupëne me kuca la nöjei wathebo celë la ini a ahnithe koi ’ö ngöne la drai celë. Ke Iehova Akötesi ’ö a amanathithinyi ’ö, thenge la hnei nyidëti hna ulatine koi ’ö.” (Deu. 15:4-6) Hapeu, xecie kö koi eö ka hape, tro Iehova a amanathithi eö, e tro pala hi eö a nyihlue nyipici koi Nyidrë? Nyipi ewekë tro sa lapaune tune lai. w16.12 4:8, 9

Hetre kepine matre ië angatre jë hnei Iehova. Aja i Nyidrë troa eatrëne la hnei Nyidrëti hna isisinyikeu me Aberahama, enehmu i Nyidrë. (Gen. 22:15-18) Ketre, ka ihnimi Iehova, nge ka meköti pala hi la aqane ië ewekë i Nyidrë. Kola mama lai ngöne la Nyidrëti a amekötine la angetre Isaraela la angatr a tha idrei. Ngo ame la angatr a ujë qa ngöne la ngazo i angatr, Nyidrëti a amamane la ihnimi Nyidrë, me kepe angatr hmaca. Öni Nyidrë: “Tro ni a aloine la hna hmaca tiji ni hnei angat ; tro ni a hnime gufa angat.” (Hos. 14:4) Iehova la tulu ka lolo koi së göi troa tuluth la aqane tro sa ië ewekë matre xatuane la itre atr! Hnei Iehova hna iëne troa xup la itre angela, me itre atr cememine la atreine troa isa ië ewekë. Iesu la hna pane xup. Nge hna xupi nyidrë hnaiji Akötresie memine la atreine troa ië ewekë. (Kol. 1:15) Ame lo ijine Iesu a mel ekö e koho hnengödrai, hnei nyidrë hna iëne troa mele nyipici koi Iehova, nge tha hna xötrethenge Satana kö me itre sinexöle i angeic. w17.01 2:3, 4

Ame itre xa ijin, hnene laka, saze hë la pengöne la mele së, haawe, easa amekötine hmaca la aqane tro sa huliwa i Akötresie. Easë hë e cili a hane huliwa catre hmaca kö koi Iehova, maine pena, thatreine hë së huliwa i Nyidrë tun ekö. Matre, thöthi ju hë së, maine qatr, maine ka egöcatr, maine ka wezipo së pena, ngo eje hi laka, isa atre së hnyawa kö hnei Iehova, ene la hne së hna atreine kuca troa nyihlue i Nyidrë. Tha aja i Nyidrëti kö tro sa kuca la itre huliwa, nge tha ijiji së hë. Ngo, atraqatre pe la madrine i Nyidrë la easa kuca thenge la hne së hna atrein. Hnei Iesu hna kapa madrine la hnëqa i nyidrë qaathei Iehova, nge loi e tro fe së a hane nyitipu nyidrë. (Ite edomë 8:30, 31) Ame la atr ka atre la itre ifego i angeic, angeic a eatrëne hnyawa la itre hnëqa i angeic ngöne la ekalesia. Tha angeice kö a thele troa thapa la hnëqa ne la ketre trejin. Angeice pe a kapa hnyawa la itre hnëqa i angeic ngöne la organizasio i Iehova, ceitu me ketre hnëqa qaathei Nyidrë. Ketre, angeic a metrötrëne la itre trejin, me thel troa xatua angatr. Nge trotrohnine hi angeic laka, hetre hnëqa i angatre fe qaathei Iehova.—Rom. 12:10. w17.01 3:13, 14

Ame itre xa ijin, kola nue la hnëqa hna cilëne hnene la itre qatr ka maca ngöne la huliwa kowe la itre thupëtresij. Haawe, loi e tro la itre thupëtresij a xomi ini qaathene la itre qatr. Timoteo la ketre thupëtresij ka co catre kö hui Paulo aposetolo, ngo hnei nyidroti hna ce huliwa koi nyimu macatre. Öni Paulo koi angetre Korinito: “Hnenge hna upi Timoteo koi nyipunie, lo nekönge hniminang, nge ate nyipici koi Joxu, lo ate tro ha amexeje koi nyipunie la ite thinange ngöne la huliwa i Keriso.” (1 Kor. 4:17) Kola mama hnyawa e celë laka, hnei Paulo me Timoteo hna ce huliwa hnyawa, me ce ithawakeune la huliwa. Hnei Paulo hna xomi ijin troa ini Timoteo la “ite thina [i nyidrë],” ene la itre aqane huliwa i nyidrë, nge hna kapa hnyawa hnei Timoteo. Tru la hnei Paulo hna hnimi Timoteo, nge xecie hnyawa koi nyidrë laka, tro angeic a thupëne hnyawane la itre trejin ne Korinito. Loi e tro la itre qatre thup a nyitipu Paulo aposetolo la kola inin me hnëkëne la itre xa trejin troa elemeken la ekalesia. w17.01 5:13, 14

Ame la aja i Iehova, tro la itre atr a mel. Iehova la qeqene mel. Matre, e hamëne hmaca jë nyidrëti la mel, Keme i angatre hë Nyidrë. (Sal. 36:9) Ame ngöne lo tulu ne thithi Iesu, öni nyidrë, Iehova la “Tretretro huni e koho hnengödrai.” (Mat. 6:9) Hnei Iehova hna nue koi Iesu la ketre hnëqa ka tru, ene la troa amelene hmaca la itre ka mec. Öni Iesu: “Ini hi la mele hmaca, memine fe la mel.” (Ioane 6:40, 44; 11:25) Öni Iesu fe: “Ame la ate kuca la aja i Akötesie, celë hi tejine me ini, me xang, me thineng.” (Mar. 3:35) Aja i Iehova tro la itre atr ka nyimutre qa ngöne la nöjei nöj me tribu me qene hlapa a hane nyihlue i Nyidrë. Hna qeje angatre ka hape, “ka ala nyimu atraqat, lo ka tha ’teine kö kete ate e.” Angatr a lapaune kowe la thupene mel, nge hetre aja i angatr troa drengethenge Akötresie. Angatr a atrunyi Nyidrë me hape: “Ame la mele, te, qa thei Akötesi shë, ate [të hune] la theron, me qa thei Arenio.”—Hna ama. 7:9, 10. w17.02 2:10, 11

Matre troa atre la itre nyipici ne la Tusi Hmitrötr hnene la itre atr ka qaja la itre xa qene hlapa, hna acile la société (Zion’s Watch Tower Tract Society) qëmekei musi lo 1884, nge Charles Taze Russell la perezida. Hnei angeic hna thel troa atrepengöne hnyawa la Tusi Hmitrötr, nge tha xou i angeice kö troa qaja kowe la itre atr ka hape, patre kö e hnine la Tusi Hmitrötr la itre ini tune la A.I.U memine la u ka mele pe kö thupene la hna mec. Atre hë angeic laka, tha tro kö a mama hnei Iesu la kola bëeke hmaca hnei nyidrë, nge tro ha nyipun e 1914 “la ite ijine i angete ethen.” (Luka 21:24) Hnei Russell hna xome la traem, me trenge catr, me manie i angeic matre troa amamane la itre nyipici celë kowe la itre xa atr. Eje hi laka, Russell hi la atr hnei Iehova me Iesu hna iën, matre troa elemekene la huliwa ngöne la ijine ka tru cili. Tha hnei Russell kö hna thel troa wangatrunyi angeic hnei atr. Ame lo 1896, hnei angeic hna cinyihane ka hape, tha ajane kö angeic me itre ka ce huliwa me angeic troa atrunyi angatr. Tha ajane kö angatr troa hë angatr hnene la itre xa pengöne ej ka tru. Ketre, tha ajane kö angatr troa ati ëjene la gurupe i angatr hnene la ëjene la ketre e angatr. Öni angeice pë hë e thupene ka hape: “Tha huliwa i atre kö la.” w17.02 4:8, 9

Hetre itre mekune nyine tro së asë hi a axeciën ngöne la mele së. Hetre itre xa mekune ka tru, nge ame itre xan, tha ka nyipiewekë kö. Ngo ame pe, nyimutre la itre mekun nyine tro sa xom ka troa hetre thangane kowe la mele së. E tro sa xomi mekune ka loi, nyimutre catr la itre jol hne së hna troa neën, nge tro lai a tingetinge la mele së. Ngo, e tro sa xomi mekun menu, nyimutre la itre jol me akötr hne së hna troa cile kow. Nemene la ka troa xatua së troa axecië mekune hnyawa? Loi e tro sa lapaune koi Akötresie, nge tro fe a xecie koi së laka, hetre aja i Nyidrë troa xatua së. Nge tro kö Nyidrëti a hamën la inamacan koi së matre troa sa axecië mekune hnyawa. Loi e tro fe sa mejiune kowe la Wesi Ula i Nyidrë, memine la itre eamo i Nyidrë. (Iako. 1:5-8) E tro sa easenyi koi Iehova, me hnine catrëne la Wesi Ula i Nyidrë, tro ha xecie hnyawa koi së ka hape, atre kö Nyidrëti la ka loi koi së. Ame hë e cili, tro së lai a pane ithel e hnine la Wesi Ula i Nyidrë qëmekene tro sa axecië mekun. w17.03 2:2, 3

Tui Asa, hnei Iehosafata hna qale catr koi Iehova la kola traqa la trongene isi ka tru koi angatr. (2 A. l. ite jo. 20:2-4) Hna traqa koi nyidrë la xou, matre hnei nyidrëti hna thele ixatua thei Iehova. Öni nyidrë ngöne la thith: “Pëkö mene the huni troa cile kowe la ka ala nyimu cate celë ka xulu koi hun ; nge tha ’te kö huni la hna troa kuca.” Tha luelue kö Iehosafata laka, tro pala kö Iehova a xatua angatr. Celë hi ka mama ngöne la tane la topik ne la drai celë. Tui Iehosafata, ame itre xa ijin, thatre kö së la nyine tro sa kuca qëmekene la ketre jol ka traqa, nge tro lai a traqa la xou koi së. (2 Kor. 4:8, 9) Ngo, pane mekune ju la hna kuca hnei Iehosafata. Hnei nyidrëti hna thithi qëmekene la nöj asë, me qaja amamane koi Iehova ka hape, itre atr ka pë trengecatrene angatr. (2 A. l. ite jo. 20:5) Loi e tro la itre hene hnepe lapa a xötrethenge la tulu i Iehosafata. Sipo Iehova jë troa xatua eö, me hnepe lapa i eö troa cile kowe la jol ka traqa koi epun, me atre la nyine troa kuca. The hmahmane kö e troa drenge la itre thithi ka tune lai hnene la hnepe lapa i eö. Tro ha mama koi angatr e cili la ecatrene la mejiune i eö koi Iehova. Hnei Nyidrëti hna xatua Iehosafata, ketre tro fe Nyidrëti lai a xatua eö. w17.03 3:12, 13