Mei

Tha sihngödri kö koi Iefetha laka, nyipi ewekë koi angeic la ixatua qaathei Iehova göi troa thapa la nöje i Isaraela qaathene la angetre Amona. Öni angeic e sisinyi koi Iehova ka hape: “Maine tro cilieti a nue la ite nekö i Amona kowe la imeng, nge e traqa hmaca ha ni memine la tingetinge qa thei ite nekö i Amona, ame la ka tro ha löpi qa ngöne la qëhnelö ne la umange troa ixelë me ini, celë hi thatraqai Iehova, nge tro ni a hujën’ eje nyine huje ne deuth.” (A. ame. 11:30, 31) Nemene la aliene la “huje ne deuth”? Methi Iehova troa dreuthe la itre neköne la itre atr göi troa huuje koi Nyidrë, matre trotrohnine hi së laka, tha Iefetha kö e celë a mekune la aqane huuje cili. (Deu. 18:9, 10) Ame la “huje ne deuth” ngöne la Wathebo i Mose, tre, ketre ahnahna lai hna nue apexejene koi Iehova. Haawe, ame koi Iefetha, tro lai atr a huliwa i Iehova ngöne la uma ne heta ngöne la mele i angeic ka pexej. Ame hnei Iehova hna drei Iefetha me xatua angeic troa hun ngöne la hna isi. (A. ame. 11:32) Ame la kola bëeke hnei Iefetha qa hna isi, nekö i angeic jajinyi ka ala cas nge hna nekö hnimën, lo pane atr ka traqa troa kepe angeic. Hapeu, tro jë kö Iefetha a nyipici kowe la hnei angeice hna sisiny? w16.04 1:11-13

Tha ekö catre kö lo kola inine la itus, Approchez-vous de Jéhovah hnene la itre xa ekalesia ngöne la ijine Ini Tusi Hmitrötr Ne La Ekalesia. Nemene la ka cia e kuhu hni epuni ngöne lo easë a ce ithanatane la itre thiina ka lolo i Iehova, me aqane ketre fe la hni ne la itre xa trejin? Eje hi laka, kola kökötre e kuhu hni epuni la ihnimi koi Iehova. Easë fe a hane kapa la itre xa ithuemacanyi qa hnine la Tusi Hmitrötr, ke hne së hna drenge hnyawa la itre cainöj hna cile fë, me itre iamacany, memine fe la kola e la Tusi Hmitrötr. Kola ini së ngöne la itre icasikeu la aqane troa trongëne hnyawa la itre trepene meköti ngöne la mele së. (1 Thes. 4:9, 10) Hapeu la epuni a sine la icasikeu Ini Ita Ne Thup, hna hane ketri epuni fe kö e cili, me upi epuni troa huliwa catr hmaca kö koi Iehova, me amacane la itre thithi epun, me nue pena la ngazo i ketre? Ame pena la icasikeu ne la wiik tre, kola ini së la aqane tro sa cainöjëne la maca ka loi. Kolo fe a ini së la aqane troa xatuane la itre atr troa trotrohnine la nyipici qa hnine la Tusi Hmitrötr.—Mat. 28:19, 20. w16.04 3:4, 5

Atre fe hi epun la itre iwesitrë hna qaja e hnine la Tusi Hmitrötr? Ngöne hi la itre pane mekene la Tusi Genese, kola qaja la kola humuthi Abela hnei Kaina (Gen. 4:3-8); memine lo Lameka a humuthe la ketre thöth pine angazo nyidrë (Gen. 4:23); memine fe lo kola ihmönyinyi la itre ka thupë mamoe i Aberahama me Lota (Gen. 13:5-7); memine lo kola pi tru koi Sara hnei Hagara, memine lo Sara a wesitre koi Aberahama (Gen. 16:3-6); nge kolo fe a qaja ka hape, tro Isamaela a icatrë me nöjei atr, nge tro angatr asë a methinë angeic. (Gen. 16:12) Pine nemene matre amë jë la itre iwesitrë cili e hnine la Tusi Hmitrötr? Pine laka itre ej a ini së, ke itre hna melëne lai hnene la itre atr ka tha pexeje kö, nge ka hane qëmeke kowe la itre jol. Ketre tu së mina fe, itre atr ka tha pexeje kö së nge easë fe a qëmeke kowe la itre jol. Tro la itre tulu ka loi e hnine la Tusi Hmitrötr a xatua së, nge tro fe la itre tulu ka ngazo a hmekë së. Haawe, tro itre eje lai a xatua së matre tro pala hi së a mele tingeting me itre xan. w16.05 1:1, 2

Nemene lo aqane cainöje i Iesu me itretre drei nyidrëti ekö? Angatr a tro kowe la itre götrane gaa tru atr, tun e cahu hna tro, me ngöne la itre hna maketr. Angatre fe a cainöj ngöne la itre hnalapa trootro. (Mat. 10:11; Luka 8:1; Ite hu. 5:42; 20:20) Nge aqane cainöje lai hna amekötine göi troa ketr la nöjei atr asë. Ngo tune kaa fe la Itretre Anyipici Iehova? Angatre hmekuje hi la itre ka cainöjëne ka hape, musi hë Iesu qaane lo 1914. Angatr a drengethenge Iesu me amë panëne la huliwa ne cainöj ngöne la mele i angatr. Kolo fe a qaja la Itretre Anyipici Iehova hnene la ketre itus me hape: “Tha thëthëhmine kö angatr la tronge i angatr, ene la troa thuemacanyine la pune la fene celë kowe la itre atr, me ini angatr matre mele pi angatr. Itretre Anyipici Iehova a catre cainöjëne la maca cili, me xötrethenge hnyawa lo aqane cainöje i Iesu me itretre drei nyidrëti ekö.” (Pillars of Faith—American Congregations and Their Partners). w16.05 2:10, 12

Ame la easë a axecië mekun hnyawa, ketre easë fe hi lai a easenyi catr koi Iehova, nge Nyidrëti a kepe së me amanathithi së. (Iako. 4:8) Ame hë e cili, tro ha catrecatre la lapaune së. Haawe, the mano kö së e, me lapa mekune la hne së hna e hnine la Tusi Hmitrötr. Celë hi ka troa aijijë së troa atre la aqane waiewekë i Iehova. Ngo eje hi laka, hetre itre xa ini pala kö hne së hna troa atre göi Nyidrë. (Iobu 26:14) Matre, e hne së pala hi hna thele troa atre la aqane waiewekë i Iehova, tro hë sa inamacane me atreine axecië mekun. (Ite edomë 2:1-5) Maine nyipici laka, ka saze pala hi la itre mekun me aja ne la itre atr, ngo tha ka saze kö Iehova. Önine la ketre atre cinyihane la Salamo ka hape: “Troa cile huti epine palua la aja i Iehova, ite mekuna ne la hni nyidë kowe la nöjei xöt.” (Sal. 33:11) Kolo hi lai a amamane laka, e ka ihmeku la itre mekun me itre huliwa së memine la aqane waiewekë i Iehova, tro pala hi lai a lolo la itre mekun hne së hna axeciën. w16.05 3:17

Ka xecie hnyawa koi së laka, Iehova la ka ea koi Nyidrë la itre atr ka meköt. Haawe, tha tro pi kö sa mekuhnine la itre atr ne la teritoare së, me itre atrene la ekalesia. (Ioane 6:44) Maine tro sa atrehmekune laka, Iehova la Atre Xupi Inege, Atre xome ameköti së, tro hë së a goeëne la itre trejin tune la aqane goeë angatr hnei Iehova. (Is. 64:8) Nyidrëti a xome amekötine trongëne la atr, nge Nyidrëti a goeëne la ka eje e kuhu hni angeic me mejiune laka, tro kö la atre cili a saze. (Sal. 130:3) Loi e tro fe sa hane nyitipu Iehova me goeëne la itre trejin tui Nyidrë. Ketre, loi e tro sa ce huliwa memine la Atre xome ameköti së matre xatuane la itre trejin troa hane macaje trootro. (1 Thes. 5:14, 15) Itre qatre thup a amamai tulu ngöne la götrane cili.—Efe. 4:8, 11-13. w16.06 1:4-6

Ame ngöne la easë a cainöjëne la maca ka loi, nyipi ewekë tro sa amamane la thiina ka ipië memine la itre xa thiina i Akötresie. (Gal. 5:22, 23) Ame la easë a nyitipune la itre thiina i Iesu, itre atr a pi drenge la maca hne së hna tro fë, ene pe, saze jë fe hi la itre thiina i angatr. Celë hi hna melën hnene la lue trejin e Australie. Hnei nyidroti hna cainöje kowe la ketre föe, ngo tha kapa kö eahlo, goi ithanata akökötrenyi fe eahlo koi nyidro. Ngo tha hnei nyidroti kö hna wesitr, hnei nyidroti pe hna drei eahlo hnyawa. Ame hna hmahma lai föe pine la aqane ujë i eahlo. Eahlo pë hë a cinyianyi jë kowe la filial göi troa qeje menu. Öni eahlo, “Hmo catre ni troa icilekeu memine la lue atre tro fë la Wesi Ula i Akötresie, me upi nyidro qa la.” Kolo hi lai a amamane koi së la enyipiewekëne troa loi thiina ngöne la easë a cainöje trootro. Eje hi laka, ketre ewekë ka loi kowe la itre atr la huliwa ne cainöj, ngo eje fe a xatua së troa xome amekötine la itre thiina së. w16.06 2:12, 13

Hna hnaho së memine la ngazo. (Rom. 5:12, 19) Matre ame itre xa ijin, itre trejin a qaja maine kuca la ketre ewekë ka akötrë së. Tune kaa la aqane tro sa ujë e cili? Tro pala kö a catre la ihnimi së koi Iehova? Tro kö së a catre mele nyipici koi Nyidrë me kowe la itre hlue i Nyidrë? Eli la atre huuje ka sisitria e Isaraela ekö, ngo lue ka tha idrei la lue nekö i angeice trahmany, kola ena la itre wathebo i Iehova. Öni Tusi Hmitrötr: “Lue nekö i Belial la lue nekö i Eli ; nge pëkö ca metrötre i nyidro koi Iehova.” (1 Sam. 2:12, MN) Atre hnyawa hi Eli la itre ngazo hna kuca hnene la lue nekö i angeic, ngo tha hnei angeice pi kö hna haji nyidro. Ame hë e thupen, hnei Iehova hna ce nyithupene koi Eli me lue nekö i angeic. Matre pë hë matra i Eli göi troa sisedrëne la huliwa i angeic, ene la troa atre huuje ka sisitria. (1 Sam. 3:10-14) Maine mele ju fe epuni ngöne la ijine i Eli me öhne laka, angeic a nue la lue nekö i angeic troa kuca la ngazo, hapeu, tro kö epuni lai a thixötr? Tro kö la ewekë cili a ananazijëne la lapaune i epuni koi Iehova, me sewe epuni troa kuca la itre huliwa i Nyidrë? w16.06 4:5, 6

E hne së hna amë panëne la Baselaia ngöne la mele së, tro hë së a kapa qaathei Iehova la itre hne së hna ajan. Öni Iesu: ‘Ate kö la Tetetro i nyipunie e koho hnengödrai laka, ka nyipi ewekë koi nyipunie la nöjei ewekë cili.’ Matre atre hnyawa kö Nyidrëti la itre aja së. (Fil. 4:19) Atre fe hë Nyidrë la iheetr hne së hna troa heetrën elany, memine fe la xen. Ketre, atre fe hi Nyidrë laka, nyipi ewekë koi së me hnepe lapa së troa hetre uma. Tro Nyidrëti lai a thupën matre tro pala hi së a kapa la ka ijij. Xecie hnyawa koi së laka, e tro sa kuca la aja i Nyidrë me amë panëne la Baselaia ngöne la mele së, tro kö Nyidrëti lai a hamëne la ka nyipi ewekë kowe la mele së, me nyixane fe. Ketre, atre hnyawa hi së laka, ame la ka troa hamë madrine koi së tre, ene la troa imelekeu hnyawa me Iehova. Celë hi lai ka troa xatua së troa mejihnine la hne së hna hetreny göi “xeni me ixete.”—1 Tim. 6:6-8. w16.07 1:17, 18

Ijije tro sa iloi me Akötresie jëne la thupene mel, kolo lai a hape, ijije hë tro sa imelekeu hnyawa me Nyidrë me ce sinee me Nyidrë. Celë hi mekune lai hna qaja hnei Paulo ngöne lo angeic a qeje pengöne la ihnimi gufa i Iehova. Öni angeic kowe la itre trejine me angeic hna iëne ka hape: “Tingetingë hë së me Akötresie jëne la joxu së, Iesu Keriso, hna jele meköti së hnene la lapaun ; jëne nyidrëti easë a kepe thangane la ihnimi gufa hnene la hna lapaun.” (Rom. 5:1, 2, MN) Drei la ole së ka tru troa hane imelekeu hnyawa me Iehova! Öni Daniela perofeta, ame ngöne la hneijine la pun, “tro la ite ka inamacan,” ene la itre hna iëne “a [tro fë] la ka ala nyimu kowe la thina ka meköt.” (Dan. 12:3) Nemene la aqane eatrëne angatre lai? Angatr a cainöjëne la maca ka loi, me inine la “ite xa mamoe” la itre hna amekötine hnei Iehova. (Ioane 10:16) Angatr a xatua nyudren, matre troa hane jele meköti nyudreni hnei Akötresie. Troa traqa kow, jëne hmekuje hi la ihnimi gufa i Iehova.—Rom. 3:23, 24, MN. w16.07 3:10, 11

Tha meköti kö la aqane ujë cili, matre hnei angatre pë hë hna hnahone la itre nekönatr ka qea hmae, nge ka tru trenge catr. Matre, ame ngöne lo ijine cili, “atraqate la ngazo i ate e celë fen.” (Gen. 6:1-5) Hnei Iehova ekö hna canga thuemacanyi Noa ka hape, tro Nyidrëti a lepe la fen hnene la ketre Iwë Atraqatr. Celë hi matre hnei Noa “ate cainöjëne la thina ka meköt,” hna thuemacane fe la itre atr. (2 Pet. 2:5) Ngazo pe, tha hnei angatre kö hna semesine Noa, ke tru catre pala ha la itre huliwa i angatr, tune la troa faipoipo. Hnei Iesu pë hë e thupen hna aceitunëne la hneijine i Noa memine la hnedrai së. (Mat. 24:37-39) Enehila mina fe, xele kö la itre atr ma drei së ngöne la easë a tro fë la maca ka loi ne la Baselaia. Ketre, easë a isine troa cainöj trootro, qëmekene troa lepe apatrene la fene ka ngazo celë. Matre, nemene la ini nyine tro sa xome qa ngöne la aqane mel ngöne la hneijine i Noa? Tha tro pi kö sa nue la itre ewekë, tune la faipoipo me troa hetre nekönatr troa lapane la hni së, wanga hajihaji pi la drai Iehova la ka calemi hë. w16.08 1:8, 9

Easë enehila a melëne la “ite drai hnapin,” matre kola traqa la “nöjei ijine ka aköte.” (2 Tim. 3:1-5) Celë hi matre, nyipi ewekë catre troa acatrene la aqane imelekeu së me Iehova. Ame ngöne la tane la topik celë, tha Paulo kö a upe la itre trefën troa isa kuci melen, me tha nyipi ewekë ketre. Ngo pine laka easë a melëne la itre drai ne la pun, haawe, Iehova hi la nyine tro sa amë panëne ngöne la mele së. (Mat. 6:33) Nyipici laka, nyimutre la itre faipoipo hna thë, ngo hapeu, ijiji pala kö troa hetre madrine ngöne la faipoipo? Eje hi, e hne së hna qale catre koi Iehova me itre hlue i Nyidrë, me trongëne la hna qaja hnei Tusi Hmitrötr, me kapa la ixatua i Iehova jëne la uati hmitrötr. Haawe, maine aqane ujë së hi lai, tro hë sa metrötrëne “la hnei Akötesie hna isilekeun.”—Mar. 10:9. w16.08 2:17, 18

Kola mama enehila laka, nyipi ewekë troa inine me hnëkëne la itre trejine trahmanyi göi troa thupëne la itre ekalesia. Nge celë hi hna kuca hnei Paulo koi Timoteo. Matre hnei angeic pë hë hna upi Timoteo troa hane kuca tun koi itre xan. Öni Paulo koi Timoteo: “Ame la nöjei ewekë hnei ’ö hna denge qathenge hnene la angete anyipicine ka ala nyimu, hamënepi pena lai kowe la nöjei ate ka nyipici, angete ateine troa ini ite xane fe.” (2 Tim. 2:1, 2) Tru catre la itre ini hnei Timoteo hna kapa qaathei Paulo, ketre qatre thup me aposetolo. Hnei Timoteo hna inine la aqane troa maca ngöne la hna cainöj, me aqane tro angeic a xatuane la ekalesia. (2 Tim. 3:10-12) Nyimutre catre la itre hawa hnei Paulo hna ini Timoteo, ke aja i angeic tro Timoteo a maca hnyawa. (Ite hu. 16:1-5) Ketre tune mina fe, loi e tro la itre qatre thup a nyitipu Paulo me ce tro me itre drikona ngöne la angatr a wange trongëne la itre trejin. Tro hë la itre drikona a atrehmekune la aqane troa inine la itre xan, me aqane troa ihnim me xomihni, me aqane troa mejiune koi Iehova göi troa thupëne la “ite mamoe.” w16.08 4:16, 17

Ame itre xa ijin, Tusi Hmitrötr a qaja ka hape, kola thipi la ime ne la itre atr. Kolo lai a qaja la itre atr ka kucakuca nge ka pë mejiune göi elany. (2 A. l. ite jo. 15:7; Heb. 12:12) Nge eje hi lai laka, e hnehengazo menu hë së me kucakuca, nge puje hë la aqane imelekeu së me Iehova, haawe, tro hë së lai a xele ma cile catr. Easë a mel ngöne la fene i Satana matre, easë asë hi a melëne la itre ewekë cili. Nge, tune la ketre iuhni ka xome cilëne la he, tro fe la itre hne së hna seseun a ahacenyi së me akucakucanyi së. (Ite edomë 12:25) Ngo hnei nemene matre fetra jë la itre mekune cili? Hnene laka hna meci triji së hnene la ketre atr hne së hna hnim, maine hna tithi së hnene la ketre meci ka tru, maine hna axösisi së pena. Ketre, easë fe a cile kowe la itre jole göi mani matre jole hë troa thupëne la hnepe lapa së. Nge ketre, e traqa qea la ijine jol, tro ha patre trootro la trenge catre së memine la madrine së. Ngo loi e xecie e kuhu hni së ka hape, tro kö Akötresieti lai a xome xatua së.—Is. 41:10, 13. w16.09 1:2, 4

Hetrenyi the së la itre aja ka ngazo. Matre ame itre xa ijin, easa isi memine la itre mekune ka ajolë së troa cainöj, nge itre xan a isi memine la itre sine meci angatr. Nge itre xane pena a isi memine la ejolene troa lapa cas. Nge hetrenyi fe la itre xan ka cile kowe la itre xa thiina, tune la lapa fë trenge hni. Matre, ekö ju hë së nyihlue i Iehova, ngo tro pala hi së lai a isi memine la itre ewekë ka ajolë së troa nyihlue i Nyidrë, Atre amanathithin. Nge maine easa isi memine la itre aja së ka ngazo, canga sipone jë la uati hmitrötre i Iehova. Tro la thithi memine la uati hmitrötr a xatua së troa kuca la loi, nge tro hë lai a kepe së hnei Akötresie. Haawe, loi e tro sa ujë thenge la itre thithi së, me e Tusi Hmitrötr o drai, me ami ijine troa ini Tusi cas, me kuca la hmi hnepe lapa.—Sal. 119:32. w16.09 2:10, 11

Maine jë tro la ketre atr a qaja koi eö ka hape, “Eni a mejiune kowe la évolution, ke itre ka inamacan a qaja tun. Ngo hnauëne la eö a mejiune koi Akötresie, nge pë pe atr ka öhnyi Nyidrë?” Ala nyimu la itre atr ka hane qaja tun. Nge nyipici laka, pëkö atr ka hane öhnyi Akötresie, me öhne la Nyidrëti a xupe la nöjei ewekë. (Ioane 1:18) Ngo tune kaa jë kowe la itre ka mejiune kowe la évolution? Ketre, angatre fe hi a mejiune kowe la ketre ewekë hnei angatr hna tha öhn. Tha hane fe kö öhne hnene la ketre atr maine ketre ka inamacane pena, la kola saze la ketre ewekë ka mel koi ketre. Tune la thu a kola saze trootro uti hë la troa nyi liona. (Iobu 38:1, 4) Haawe, tha tro pi kö sa mejiune menu, ngo loi e tro asë hi së a waipengöne hnyawa la itre ewekë ka mama, me isa iëne la hne së hna troa mejiune kow. Ala nyimu la itre atr ka waipengöne hnyawa la itre hna xup matre, ‘mama pi hi’ koi angatr ka hape, hetre Akötresie. Ketre, “mama cile” fe hë koi angatr laka, Nyidrë la Atre Xup la nöjei ewekë asë, nge ka trene mene Nyidrë, nge ka lolo la itre thiina i Nyidrë.—Rom. 1:20. w16.09 4:4

Hnei Iehova hna hnimi la itre trenyiwa, me thue a i angatr. Hnei Nyidrëti hna aijijë angatr troa hleme la munëne la hna menu. (Lev. 19:9, 10) Hnei Iehova hna amekötine koi angetre Isaraela troa wange atrune la itre trenyiwa. Nge hnei Nyidrëti fe hna amekunë angatr laka, hnei angatr hna hane trenyiwa ekö. (Eso. 23:9) Nanyi petre kö matre thahluëne jë la angetre Isaraela e Aigupito, nge hna wange angazonyi angatre hë e cili ke, itre trenyiwa angatr. (Gen. 43:32; 46:34; Eso. 1:11-14) Tha ka hmaloi kö la mel ne la angetre Isaraela e cili. Matre, ame la aja i Iehova tre, tha tro kö angatr a thëthëhmine lai, nge tro angatr a thiina ka loi kowe la itre ka mele trenyiwa thei angatr. (Lev. 19:33, 34) Tha saze kö Iehova, matre e hetre trenyiwa ka traqa ngöne la ekalesia së, tha tro kö sa thëthëhmine laka, hnei Iehova pala hi hna thiina ka loi kowe la itre atr cili. (Deu. 10:17-19; Mal. 3:5, 6) Pane mekune ju la itre jole hna cile kow hnene la itre trenyiwa. Thatre kö angatr la qene lapa së, nge tha hna wange aloinyi angatr kö. Haawe, catre pi së xatua angatre me thiina ka loi koi angatr.—1 Pet. 3:8. w16.10 1:3-5

Hnene la tusi Iakobo hna qejepengöne la lapaun. Kola hape: “Amamanejë koi ni la lapaune i ’ö ka pë huliwa ngön, nge tro ni a amamai ’ö la lapaunenge hnene la ite huliwang.” (Iako. 2:18) Ame koi Iakobo, e ajane së troa hetrenyi la lapaun, tha tro hmekuje kö së a jele nyipicine la ketre ewekë. Ame itre dremoni, tre angatr fe a jele nyipicine ka hape, ka mel Akötresie, ngo tha lapaune kö angatr koi Nyidrë. Angatr pe a icilekeu catr me Nyidrë. (Iako. 2:19, 20) Ame pena ha la atr ka lapaun, hna kepe angeic hnei Iehova, ke hna kuca la itre huliwa ka loi. Celë hi hna kuca hnei Aberahama. Öni Iakobo: “Hape, u, tha hna jele meköti Aberahama keme shë hnene la ite huliwa, ngöne la hnei nyidëti hna hujë Isaaka nekö i nyidëti hune la ita ? Ate hë eö laka hna ce huliwa la lapaune memine la ite huliwa i angeic, nge hna apexejene la lapaune hnene la ite huliwa.” (Iako. 2:21-23) Matre Iakobo a amamane hnyawa jë ka hape, ka gufa la lapaune e pëkö huliwa. Celë hi ka mama ngöne la tane la topik ne la drai celë. w16.10 4:8

Nyimu ewekë hna kuca hnene la itre ka kuci sias matre troa ahmaloeëne la mele ne la atr. Hnei angatre hna xomi ini qa ngöne la itre ewekë hna goeëne e hnengödrai me e celë fen. Ngo thatreine kö angatre troa sa la itre hnyinge ka tru. Thatreine kö la astronaute troa qejepengöne la qaane la hnengödrai me fen, me kepine matre mele jë e celë fen la atr me öni, me itre feja. Ketre, thatre kö la atr la kepine matre hetrenyi thei angeic la aja ka catre troa mele epine palua. Ame la ketre kepine matre thatreine kö la atr sa la itre hnyinge celë, ke, önine la itre ka kuci sias me itre xa ka inamacan ka hape, pëkö Akötresie. Ketre, angatr a sajuëne la ini, lo hna hape, ka xulu xan la mel (évolution). Ngo Iehova a sa la itre hnyinge celë e hnine la Wesi Ula i Nyidrë, ene la Tusi Hmitrötr. Nyimutre la itre hna amekötine hnei Iehova hna acil e koho hnengödrai me e celë fen. Tha ka saze kö itre ej. Kola xötrethenge la itre hna amekötine cili hnene la itre ka kuci tirisite, me itre ka kuci tim, me itre ka xupi pont, me itre ka xomi avio me he, me itre droketre ka ixöj. w16.11 2:4, 5

Nyimu kepine matre loi e tro sa ole koi Iehova! Ame la hnapan, “ka mele kö shë, me enij, me eje kö [jëne] nyidë.” Hne së fe hna kapa qaathei Nyidrë la ketre Tus, ene la Tusi Hmitrötr. Matre tune la itre keresiano ne Thesalonika, easa wange atrune la ahnahna cili ke, maca lai qaathei Nyidrë. (1 Thes. 2:13) Hnene la Tusi Hmitrötr hna xatua së troa easenyi koi Iehova, matre Nyidrëti fe a easenyi koi së. (Iako. 4:8) Tru la ole së koi Iehova ke, hnei Nyidrëti hna könë së matre troa hane nyi atrene la organizasio i Nyidrë. Casi hi la mekuna së memine la atre cinyihane la Salamo kola hape: “Ole Iehova jë, ke [ka lolo] anganyidë ; ke epine palua la ihnimi nyidë.” (Sal. 136:1) Ame ngöne la nöjei xötr ne la Salamo celë, anyimua mama la hnëewekë hna hape “epine palua la ihnimi nyidë.” Haawe, e hne së hna nyipici koi Iehova me xötrethenge la itre hna amekötine qaathene la organizasio i Nyidrë, tro hë sa kapa qaathei Nyidrë la mele ka tha ase palua kö, nge tro Nyidrëti a nyipici koi së uti hë epine palua. w16.11 3:18, 19

Anyimua mama la xötre celë ngöne la itus hna hape, Nemene La Nyipi Ini Hna Hamën Hnei Tusi Hmitrötr? Ame la easa traqa kowe la mekene 3,  5, me 6 la easa ini Tusi memine la itre nekö së me itre xan ju kö, easë fe a e la Roma 5:12. Easë fe a xome la xötre cili ngöne la easa xatua angatr troa trotrohnine la kepine matre tha paradraiso kö la ihnadro, memine la kepine matre ka nyipi ewekë koi së la thupene mel, me kepine fe matre easë mec. Ngo, eje fe a xatua së asë troa akökötrene la hni ne ole së ke, lolo la aqane imelekeu së me Iehova. Kolo fe a aijijë së troa catre amadrinë Nyidrë, me trengeneune pala hi la itre ewekë hnei Nyidrëti hna thingehnaeane koi së. Ngazo pe, itre atr ka ngazo asë hi së. Easa tria e nöjei drai, ngo ka ihnimi Iehova, nge ka utipin. Atre hnyawa hi Nyidrë ka hape, atr ka tha pexeje kö së, matre hetre aja i Nyidrë troa nue la ngazo së. (Sal. 103:13, 14) Öni Iesu, nyipi ewekë tro sa sipo Akötresie matre troa nue la itre ngazo së. (Luka 11:2-4) E ase hë Iehova nue la ngazo hne së hna kuca ekö, tha tro hmaca kö sa lapa mekun itre ej. w16.12 1:1-3

Nyipi ewekë tro la itre keresiano ne Roma a sipu waipengöi angatre kö, me thele la itre ewekë hnei angatre hna hnin catrën. Hapeu, “ite ewekë [kö] ne la ngönetei”? Loi e tro fe së enehila a mekune la ewekë ka tru koi së. Nemene la hne së hna pi ithanatane lapan? Nemene la hne së hna kuca lapan? Itre xan a öhne ka hape, angatre pala hi a mekune troa tupath la itre pengöne waina, me amingömingöi uma, me itö iheetr ka hnyipixe, me huliwane la mani, me hnëkëne la itre ijine mano. Tha itre ewekë kö lai ka ngazo. Itre ewekë hi lai hne së hna melën. Hnei Iesu lo hna kuca matre hetre waina jë ngöne la ijine faipoipo. Nge hnei Paulo fe hna upi Timoteo troa nango iji waina thatraqane la meci angeic (1 Tim. 5:23; Ioane 2:3-11) Ngo, tha waina kö la götrane gaa tru ne la mele i nyidro. Nge, tune kaa fe së? Nemene la ewekë ka tru ngöne la mele së? w16.12 2:5, 10, 11

Celë hi hnaewekë lai ka acatren la mejiune së kowe la trenge ewekë i Iesu ka mama ngöne Mataio 6:33. Ame la ketre ijin, hnei Peteru aposetolo hna hnying koi Iesu me hape: “Ase hë huni nue tije la nöjei ewekë asë, mate xöte thenge enëtilai ; nge tro huni a hete nemen ?” (Mat. 19:27) Tha hnei Iesu kö hna ameköti Peteru pine hnying tune lai. Hnei nyidrëti fe hna qaja kowe la itretre drei nyidrë ka hape, tro ha traqa koi angatr la itre manathith, ke hnei angatr hna huujëne la mele i angatr koi Iehova. Tro la itre aposetolo me itre trejin hna iën ka mel nyipici a ce mus elany me Iesu e hnengödrai. Ngo, öni Iesu fe, hetrenyi hë angatr enehila la itre manathith, kola hape: “Ame la ate nue pe la uma, me tejin, me xa, me kem, me thin, me ifëkuku, me kuku, me ite hlapa, pine la ëjeng, te, tro ha a ca hadede la o kapa hnei angeic, me hetenyi fe la mele ka tha ase palua kö.” (Mat. 19:29) Hetrenyi asë hi la itretre drei Iesu enehila la itre kem, me thin, me itre trejin trahmany, me föe, me itre kuku e hnine la ekalesia. Matre, e hetre ewekë hne së hna nue pine la Baselaia i Akötresie, ngo ame pe, sisitria catre kö la itre manathith hne së hna troa kapa. w16.12 4:4, 5

Nyimutre la itre manathith hnei Iehova hna hnëkëne thatraqai së, nge nyine tro sa mejiune kow. Hnei Nyidrëti hna axeciëne troa ahmitrötrëne la ëje i Nyidrë, me aejëne la aja i Nyidrë e koho hnengödrai me e celë fen. (Mat. 6:9, 10) Itre ewekë lai ka sisitria nyine tro sa ajane catrën. Hnei Iehova fe hna axeciëne troa amanathithi së jëne la mel ka tha ase palua kö, e hnengödrai maine e celë fen. Ketre manathithi lai ka tru koi së elany! (Ioane 10:16; 2 Pet. 3:13) Matre, tha luelue kö së laka tro Iehova a eatrongëne pala hi me xatuane la nöje i Nyidrë ngöne la itre drai tixenuë celë. Öni Tusi Hmitrötr, ame la lapaun, tre, “kola lapa qale” kowe la hne së hna mejiune kow. Kolo lai a hape, ka xecie hnyawa kowe la itre ka lapaun ka hape, troa eatre la nöjei ewekë hnei Iehova hna thingehnaean. Ame pena ha la itre ewekë hna mejiune kow hnene la itre atr enehila, tre, tha nyipi mama kö koi angatr ka hape, tro itre eje lai a eatr. Kola tune la atr ka mejiune troa kapa la mani hna elo loteri, ngo tha nyipi mama kö koi angeic troa uthe la nyipi numero. w16.10 3:1, 2

Hetre itre ahnahna hne së hna isa kapa qaathei Iehova, me itre hne së hna atreine kuca. Nge, Nyidrëti a nue së troa isa huliwane itre ej. Matre, e atre hi së la itre ifego së, tro hë së lai a huliwane la itre ahnahna cili thenge la aja i Iehova. (Rom. 12:4-8) Aja i Nyidrë tro sa huliwane itre ej nyine atrunyi Nyidrë, me xatuane la itre atr. Ame itre xa ijin, troa saze la aqane huliwa së koi Akötresie ngöne la mele së. Pane mekune jë la hna melën hnei Iesu. Hnei nyidrë hna pane ce mele cas me Iehova ekö. (Ite edomë 8:22) Thupene lai, hnei nyidrë hna xatuane la Keme i nyidrë troa xup la itre angela, memine la hnengödrai me fen, memine la atr. (Kol. 1:16) Nge hnei Iesu fe hna traqa kowe la fen. Hna hnaho nyidrë, me hia nyidrë uti hë la kola tru. (Fil. 2:7) Nge ame lo kola meci hnei Iesu, hnei nyidrëti hna bëeke hmaca hnengödrai eë, nge hna acili joxu nyidrë ngöne la Baselaia i Akötresie lo 1914. (Heb. 2:9) Nge, thupene la ca thauzan ne musi nyidrë elany, tro nyidrëti a nue hmaca la Baselaia koi Iehova, “ate aipiëne la nöjei ewekë asëjëihë fe i nyidë.”—1 Kor. 15:28. w17.01 3:11, 12

Ame la kola axecië mekun, önine jë hi la ketre föe kowe la sinee i angeic: “The upi ni kö troa ketre sipu mekun, qaja jë pe koi ni la nyine tro ni a kuca. Ka hmaloi kö lai koi ni.” Tha ajane kö angeic troa huliwane la ahnahna ka ej thei angeic, ahnahna qaathei Iehova, ene la atreine troa ië ewekë. Nge tune kaa fe epun? Aja i epuni kö troa ketre axecië mekun, maine pena tro ketre a axecië mekun koi epun? Nemene la mekuna i epuni göne la atreine troa ië ewekë? Isapengöne kö la aqane mekune ne la itre atr göi troa isa ië ewekë. Itre xan a mekune ka hape, thatreine kö së isa ië ewekë ke, ase hë Akötresie amekötine la aqane tro sa mel. Nge ame koi itre xan, patre kö the së la atreine troa isa ië ewekë ke, ka hetre ifegone hi la atr hna nue gufan. Ngo ame pe, Tusi Hmitrötr a qaja ka hape, hna xupi së memine la atreine tro sa isa ië ewekë hnyawa. w17.01 2:1, 2

Maine jë ame koi Davita, tha ijiji Solomona kö troa iujin la huliwa ka tru celë, ene la troa xup la ēnē i Akötresie. Troa “sisitia cat” la ēnē, nge ame Solomona tre, “nekönate ka pujepuje.” Ngo tha luelue kö Davita laka, tro Iehova a xatua Solomona troa eatrën la huliwa ka tru cili. Matre hnei Davita hna kuca asë la hnei angeic hna atrein matre troa hnëkën la huliwa cili. Ketre tune mina fe enehila, tha tro kö la itre trejin qatr a hace fë la kola nue la itre hnëqa kowe la itre thupëtresij. Atre asë hi së lo ka hape, ame la huliwa ka sisitria enehila tre, ene la huliwa i Iehova. Matre ixatua ka tru elanyi ngöne la huliwa cili, e troa inine la itre thupëtresij troa xome la itre hnëqa. w17.01 5:8, 9

Hnene laka, Iesu la ka cilëne la Baselaia i Akötresie, nyidrëti la ka troa apatrenyi Satana, me apatrene trij la nöjei jol ka traqa hnei angeic. Hnei Iesu hna xatuane la itretre drei nyidrë troa trotrohnine la enyipiewekëne la Baselaia i Akötresie. Thupene ju hi la hna bapataiso nyidrë, hnei nyidrëti hna cainöjëne “la maca ka loi ne la baselaia i Akötesie” ngöne la nöjei götran hnei nyidrëti hna tro ngön. (Luka 4:43) Hnei nyidrëti fe hna upe la itretre drei nyidrë troa qeje nyidrë “uti hë la cane la fene hnengödrai.” (Ite hu. 1:6-8) Enehila mina fe, jëne la huliwa ne cainöj, itre atr a atre la pengöne la thupene mel, me hane nyi jinine la Baselaia i Akötresie. Haawe, easa amamane ka hape, easë la itre jinine la Baselaia ka nyipici e hne së hna xatuane la itre keresiano hna iën troa cainöjëne la maca ka loi e cailo fen.—Mat. 24:14; 25:40. w17.02 2:7, 8

Maine nyipici laka, lapa ne xomi meköt la ka musi kowe la ekalesia, ngo atre hnyawa hi la itre atrene ka hape, Iesu Keriso la mekene i angatr. Öni Paulo aposetolo, Keriso la “hen,” maine mekene la ekalesia. (Efe. 4:15) Matre, tha hnei angatre kö hna ati ëjene la hmi angatr hnene la ketre ëjene aposetolo. Ngo, hna ati ëjene pe la “angete deng, ka hape, Ite Kerisiano.” (Ite hu. 11:26) Atre hnyawa hi Paulo ka hape, ka nyipiewekë catr troa trongëne la itre ini qa hnine la Tusi Hmitrötr hna hamën hnei ange aposetolo, me itre trejin ka elemekene la huliwa. Ngo, öni Paulo fe: “Ajange tro nyipunie a ate laka, Keriso la he ne la nöjei trahmany.” Kolo hi lai a qaja fe la itre atrene asë ne la lapa ne xomi meköt. Öni angeice hmaca jë: “Akötesieti la he i Keriso.” (1 Kor. 11:2, 3) Haawe, Iehova la ka acili Iesu Keriso nekö i Nyidrë, troa elemekene la ekalesia. w17.02 4:7

E tro sa atrune la itre xa atr, tha tro kö së lai a sipu meku së kö. Nge ketre, tro lai a aijiji së troa ipië, e traqa ju atrunyi së menu pala ha. Nge, tha tro kö së lai a thixötr, e traqa ju akötrë së hnene la ketre atr hne së hna metrötrën. Ame la ketre eloine lai, kola acasi së hnine la organizasio i Iehova. Tha organizasio kö a atrune menune pala ha la ketre atr, ka hmi ju hë maine ka tha hmi kö. Ame la manathithi ka tru hne së kapa qa ngön la hne së hna atrune la itre atr tre, ene laka, easa amadrinë Akötresie. Tro hë së lai a kuca asë la hnei Nyidrëti hna amekötine koi së, nge tro fe hë së lai a mele nyipici koi Nyidrë. Ijiji Iehova ha e cili troa sa koi Satana, atre sil ka hape, pëkö ketre ka atreine troa mele nyipici koi Akötresie. (Ite edomë 27:11) Tha mama hnyawa kö kowe la itre atr ne la fen la aqane iatrunyi ka loi. Matre, tru la madrine së laka, atre hnyawa hi së la aqane troa atrune la itre atr thenge la aja i Iehova! w17.03 1:13, 20, 21

Tui Asa, keme i nyidrë, hnei Iehosafata hna thuecatrene la nöj troa nyihlue i Iehova. Hnei nyidrë hna upe la itre trahmanyi kowe la itre hlapa ne Iudra matre troa inine “la tusi wathebo i Iehova” kowe la nöj. (2 A. l. ite jo. 17:7-10) Hnei nyidrëti mina fe hna tro kowe la itre hlapa ne la baselaia ne Isaraela, me kowe la itre atr ne la wetre Eferaima matre troa “ahmacanyi angate koi Iehova.” (2 A. l. ite jo. 19:4) Ame enehila, aja i Iehova fe troa inine la itre atr e cailo fen, nge loi e tro asë hi së a eatrëne la huliwa cili. Hapeu, epuni kö a thel troa eatrëne lai e nöjei treu? Aja i epuni kö troa inine la Tusi Hmitrötr kowe la itre atr matre tro fe angatr a hane nyihlue i Iehova? Celë fe kö la aliene la itre thithi epun? Maine tro epuni a huliwa catr thatraqane lai, tro Iehova lai a xatua epun troa nyiqaane ini Tusi memine la ketre atr. Tro kö epuni a nue la itre ijine mano i epun matre troa ini Tusi me ketre atr? Hnei Iehosafata hna xatuane la itre atr troa nyihlue i Iehova hmaca. Ketre mina fe, loi e tro sa thel troa xatuane la itre trejin ka nanazij. w17.03 3:10, 11