Eiperem

Qa së troa qaja kowe la itre atr ka hape, ijiji angatr troa hane nyi sinee i Iehova. Öni Ioane aposetolo: “Hetenyi hë la mele ka tha ase palua kö hnene la ate lapaune kowe la Hupuna ; ngo tha tro kö a öhne la mele hnene la ate tha lapaune kö kowe la Hupuna ; ngo tro pala kö a të hui angeice la elëhni Akötesie.” (Ioane 3:36) Tru la madrine së laka, hnene la mele hna huujëne hnei Keriso hna aijiji së troa hane ce sinee me Akötresie. (2 Kor. 5:18-20) Easa inine la itre atr la nyipici me xatua angatr troa imelekeu hnyawa me Iehova. Celë hi igötranene ka tru ne la huliwa ne cainöje së. w16.07 4:8-10

Hnei Iesu hna pane thithi thatraqane la ëje i Iehova, matre tro ej a hmitrötr. Kola amamane la pengöi Iehova hnene la ëje i Nyidrë. Pine laka ka hmitrötr Iehova, haawe, ame asë hi la itre hnei Nyidrëti hna kuca, me itre wathebo hnei Nyidrëti hna acil, ka hmitrötr asë hi. Ngo ame e Edena, hnei Satana, atre iaö, hna amejëne la luelu göne la emeköti Akötresie troa acili wathebo kowe la itre atr. Hnei angeic hna sili trenga thoi Iehova, me jele ngazone la ëje i Nyidrë. (Gen. 3:1-5) Ketre, hnei Iesu hna hnine la ëje i Iehova, me isine troa ahmitrötrëne ej. (Ioane 17:25, 26) Jëne la aqane ujë i nyidrë, me itre ini hnei nyidrëti hna hamën, hnei nyidrëti hna xatuane la itre atr troa trotrohnine laka, ka meköt la itre wathebo i Iehova, nge ame asë hi la itre hnei Nyidrëti hna amekötine koi së tre, nyine loi koi së. (Sal. 40:8-10) Ame la Iesu a mele nyipici uti hë la mec, nyidrëti hi lai a amamane e cili ka hape, ijije hi tro la atr ka pexej a drengethenge Iehova. w17.02 2:2-4

Ame “la Arenio” hna qaja ngöne Hna Amamane 5:13 tre, Iesu Keriso. Pine nemene matre qaja jë së tune lai? Ame lo Iesu e celë fen, hna qeje nyidrë ka hape, “Arenio i Akötesie, la ate [köletrij] la ngazo ne la fene hnengödrai.” (Ioane 1:29) Drei fe la ketre joxu ka hane mec matre itöne la mele ne la itre jini nyidrë? Eje hi laka, ketre kepine lai ka ijij matre troa atrunyi nyidrë. Meköt e troa atrunyi Iesu ke, nyidrëti la “Joxu ne la nöjei joxu, me Tane la nöjei tan.” (1 Tim. 6:14-16) Ma casi jë hi la mekuna i epun memine la itre angela, la angatr a nyima, me hape: “Ijije la Arenio lo hna humuthe troa kapa la men, me trenga mo, me inamacan, me cat, me atrun, me lolo, me ole.” (Hna ama. 5:12) Kola qaja ngöne Ioane 5:22, 23 ka hape, hnei Iehova hna acili Keriso matre troa amekötine la nöjei atr. Celë hi sipu kepine lai matre loi e tro sa atrunyi Iesu. Ketre, e tro sa ujë tune lai, easë fe hi lai a atrunyi Iehova. E axeciëne hë së troa atrunyi Iesu me Keme i nyidrë, tro hë së lai a hane hetrenyi la mel ka tha ase palua kö.—Sal. 2:11, 12; Ioane 5:23. w17.03 1:3, 4

Iefetha la ketre atre isi ka catr, nge atre hnyawa hi angeic la aqane trongene la nöje i Isaraela memine fe la Wathebo i Mose. Matre, mama hnyawa hi koi angeic la aqane ujë i Iehova kowe la nöje i Nyidrë. Celë hi ka aijijë angeic troa atrehmekune la loi me ngazo xajawa i Akötresie. (A. ame. 11:12-27) Haawe, hnene la itre ithuemacanyi hnei angeic hna kapa hna xatua angeic ngöne la itre ijine angeic a axecië mekun. Mama cile hnyawa koi angeic la mekuna i Iehova göi elëhni me göi itëkeun, me göne fe lo aja i Iehova, ene la tro la itre hlue i Nyidrë a ihnimekeu. Ketre, Wathebo i Mose fe a amamane koi angeic la aqane troa ce mel memine la itre trejin me angeic, ngo memine fe la itre ka methinë angeic. (Eso. 23:5; Lev. 19:17, 18) Hnene fe la tulu i Iosefa hna xatua Iefetha. Hnei Iosefa lo hna hnim me utipine la itre trejin me angeic, ngacama hna methinë angeic. (Gen. 37:4; 45:4, 5) Kola mekune laka, hnei Iefetha hna mekune hmaca lo hna melëne hnei Iosefa, matre celë hi lai ka xatua Iefetha troa ujë thenge la aja i Iehova. Ngacama akötre catre koi Iefetha la hna kuca koi angeic hnene la itre trejin me angeic, ngo ame la ka tru koi angeic, tre, ene la troa isigöline la ëje i Iehova me nöje i Nyidrë.—A. ame. 11:1-3. w16.04 1:8, 9

Tru la aja ne la itre hlue i Iehova troa itronyi me cas. Ame ekö, lo hneijine ne la itre pane keresiano, hnei angatre fe hna itronyi lapa göi troa atrunyi Iehova, me thele troa atrepengöi Nyidrë. Ketre tune mina fe, tru la aja së troa tro kowe la hna icasikeu, ngo eje hi laka, tha ka hmaloi kö troa tro lapa. Maine jë, easa huliwa la drai ka pexej, nge nyimu jole së matre easë a kucakuca. E tro sa nyipiewekëne la itre icasikeu së, tro lai a xatua së troa isin pala hi troa sine itre ej. Ngo eje hi laka, hetre itre xa trejin ka tha sine lapane kö la itre icasikeu, ke hna tithi angatr hnei mec, maine hnene la itre xa ewekë ka traqa koi angatr. Matre, loi e tro la itre qatre thup a thele jëne matre tro angatr a hane drenge la itre hna ithanatane ngöne la itre icasikeu, jëne telefon, maine jëne ikaho pena. w16.04 3:3

Ame la easa mekune la itre hna melëne hnene la itre hlue i Iehova tre, celë hi ka xatua së troa hetrenyi la catr, me atreine troa lapa ananyine la politik. Pane meku Saderaka ju, me Mesaka, me Abedenego, tha hnei angatr kö hna thili kowe la hna saatr ka nyi hatrene la musi Babulona. (Dan. 3:16-18) Jëne la hna melëne celë, kola thuecatrene la itre trejin ka ala nyimu enehila, matre tha tro kö angatr a hane sali koi darapo. Ketre, tha hnei Iesu fe kö hna hane lö hnine la politik, memine la itre gurup ka thele nyin la itre jole ekö. Atre hnyawa hi nyidrë ka hape, tro la tulu i nyidrë a xatuane la itretre drei nyidrë. Matre öni nyidrë koi angatr: “Catejë nyipunie.” Tro fe la itre trejin a hane xatua së troa cile catr ngöne la itupath. Ketre, tro fe la itre xa trejin ka atre la pengö i epuni a hane akeukawanyi epun. Sipo angatre jë troa thithi sai epun. Ngo loi mina fe tro sa xatuane la itre trejin, me thithi sai angatr.—Mat. 7:12. w16.04 4:16, 18

Itretre Anyipici Iehova kö a tro fë itrapetr ngöne la itre uma ne Baselaia me ngöne la itre ijine asabele i angatr? Ohea! Ame la itre huliwa i angatr tre, hna sajuën hnene la itre ahnahna. (2 Kor. 9:7) Ame lo 2015, traqa koi 2 milio lao hawa ne cainöjëne angatr la maca ka loi, me kuca la 9 milio lao ini tusi e nöjei treu. Pëkö thupei angatr, ngo angatre pe a madrine troa nue la manie i angatr thatraqane la huliwa ne cainöj. Önine fe la ketre ka inamacan: “Ame la huliwa ka tru i angatr, tre ene la troa cainöje trootro me ini Tusi Hmitrötr kowe la itre atr.” Öni angeice mina fe, ka mel la itre manie i angatr ke pëkö keme ne hmi. Ngo hapeu, maine tha easë kö a cainöj göi thupen, nemene jë kö la ka upi së troa cainöj? Easë a catre cainöj, ke tru catre la ihnimi së koi Iehova me koi itre atr. Nge celë hi ka aeatrëne la hna qaja amë hë ngöne la tane la topik ne la drai celë. w16.05 2:9

Tusi Hmitrötr a amamane ka hape, loi e tro sa thipetrije la itre nyine iamadrinë ka troa acian e kuhu hni së la itre aja ka ngazo. Matre, e mama hnyawa ha koi së la aja i Iehova me itre hnei Nyidrëti hna methinën, tha tro pi kö së lai a hnyingë ketre me ketre la itre itus nyine troa e, me film nyine troa goeën, me elo nyine troa elon. Ame la easë a troa axecië mekun, loi e tro sa pane atre laka, tha ca mekune hi la ka troa amadrinë Iehova. Nge, maine hetre ketre mekune ka tru nyine tro sa axeciën, loi e tro sa pane sipo ixatua thene la itre qatre thup, me itre trejin trahmanyi me föe ka macaj. (Tito 2:3-5; Iako. 5:13-15) Ngo eje hi laka, isa qanyi së kö axecië mekun. Celë hi matre, loi e tro sa pane atreine huliwane la mekun me hni së, thenge la hne së hna inine qa hnine la Tusi Hmitrötr. (Heb. 5:14) Öni Paulo: “Tro nöjei ate asë a isa thue ehnefen.”—Gal. 6:5. w16.05 3:15, 16

Tha ceitune kö la aqane goeëne së la itre atr me Iehova. Nyidrëti a goeëne la ka eje e kuhu hni ne la atr, memine la nyipi pengöi angeic. (1 Sam. 16:7b) Kola mama lai, ngöne lo Nyidrëti a acile la pane ekalesia. Hnei Nyidrëti hna ea koi Nyidrë, me koi nekö i Nyidrë la itre atr hna wang angazon. (Ioane 6:44) Saulo la ketre atr hna ea, ketre faresaio ekö. Tha hnei Iehova kö hna goeë Saulo ceitu me dro ka qaqacil. (Ite edomë 17:3) Ame koi Iehova, ijije troa xome ameköti Saulo matre tro angeic a ‘nyi inege i Nyidrë,’ ene la troa cainöj “kowe la nöjei ethen, me nöjei joxu, me ite nekö i Isaraela.” (Ite hu. 9:15) Hetre itre xane mina fe hna iëne hnei Iehova nyine ‘nyi inege i Nyidrë,’ kola qaja lo itre ka iji menu la ka haitr, me ka kuci ngazo, me ka atrekënö. (Rom. 9:21; 1 Kor. 6:9-11) Ame ju hi la angatr a ini Tusi Hmitrötr, angatre fe hi lai a lapaune koi Iehova me nue Nyidrë troa xome amekötine la itre thiina i angatr. w16.06 1:4

Hnei Iehova hna xatua së jëne la Wesi Ula i Nyidrë, me jëne la ekalesia, me jëne la huliwa ne cainöj matre tro pala hi sa ceitu me dro ka fedr. Matre, ame la easë a e la Tusi Hmitrötr o drai me lapa mekun ej, easë hi lai a nue Iehova troa xome ameköti së. Hnei Nyidrëti ekö hna amekötine kowe la itre Joxu ne Isaraela troa e o drai la Trenge Wathebo i Nyidrë. (Deu. 17:18, 19) Ketre, hnene la itre aposetolo hna catre e la Itre Hna Cinyihan me lapa mekune itre ej, ke atre hi angatr laka, ixatua ka tru lai kowe la huliwa ne cainöj. Traqa jë kö koi 320 lao hna cinyihane qene heberu hnei angatre hna xome troa amë hnine la itre tusi angatr. Nge ame la angatr a cainöje trootro, angatre fe a xatuane la itre atr troa hane huliwane la itre hna Cinyihan. (Ite hu. 17:11) Haawe, easë fe a atrehmekune enehila la enyipiewekëne troa e la Tusi Hmitrötr o drai me lapa mekune ej. (1 Tim. 4:15) Tro lai a xatua së troa ipië, me aijijë Iehova troa xome amekötine la itre thiina së. w16.06 2:10

Ame ngöne la itre macatre ka ase hë, hnene la itre hlue i Iehova hna amamane la ihnimi cili, ngacama kola upe la itre atrene la nöje troa isi. Ame ngöne lo hnaaluene isi ka tru, traqa koi 55 milio lao atr hna humuth, ngo pëkö ca hna humuth hnene la itre hlue i Iehova. (Mika 4:1, 3) Celë hi ka aijijë angatr troa hane qaja tui Paulo ka hape: “Gufa kö ni ene la madra ne la nöjei ate asë.” (Ite hu. 20:26) Kola kökötre pala hi la etrune la itre hlue i Iehova, ngacama ka catre la ithupëjia me angatr, ene Satana. Angeice hi la “haze ne la fen.” (2 Kor. 4:4) Angeic la tane la itre organizasio ka kuci politik, memine fe la itre jëne ithuemacany, tune la itre nuvel. Matre angeic a thele troa apëne la huliwa ne cainöj jëne la itre ewekë cili. Ngacama gufa kö la huliwa i angeic, ngo angeice pala hi a thele troa sewe së troa nyihlue i Iehova, ke atre hnyawa hi angeic laka, xoxopatre pe hi la ijine i angeic.—Hna ama. 12:12. w16.06 4:3, 4

Iesu hmaca enehila a amexeje kowe la itretre drei nyidrë la aqane thupëne Iehova la itre xupuana i Nyidrë. Hnei Iesu hna xome “la hnite” nyine hamë ceitun. Ame la “hnite” e celë, tre kola qaja la itre iegen tune la latana, me engene potr, me iengene weg, me a i fenifen. Tha itre ka cai mano kö itre ej, ngo mingöminge catre itre ej, matre öni Iesu, “Ame Solomona ngöne la nöjei lolo i nyidë, te, tha hna xete kö tune lai”! Iesu a qaja jë ka hape: ‘Maine Akötresieti a xetrëne la hnitr tune lai . . . hape u, tha tro kö Nyidrëti lai a xetrë nyipunie, itretre lapaune acon ?’ (Mat. 6:29, 30) Eje hi laka, tro Iehova lai a ujë tune lai, ngo nyipi ewekë tro la itretre drei Iesu a lapaune atruny. (Mat. 8:26; 14:31; 16:8; 17:20) Loi e xecie hnyawa koi angatre laka, aja i Iehova troa thupëne la mele i angatr, nge tro pala kö Nyidrëti a eatrëne lai. Hapeue fe së? Lapaune kö së laka, tro Iehova a thupëne la mele së? w16.07 1:15, 16

Nyimu pengöne ju hë la itre jole ka traqa koi së, ngo tro kö Iehova a hamëne la ka ijije koi së matre tro sa cile hut. (1 Pet. 1:6) Tro pala hi Nyidrëti a hamë së la hne së hna ajan, matre aijiji së troa elë hune la nöjei itupath. Qa ngöne laka, nyimu pengöne aqane amamane Iehova la ihnimi gufa i Nyidrë, haawe, nyimu manathithi hne së hna kapa. Iehova a nue la itre ngazo së. Hnene la ihnimi gufa i Iehova koi së matre Nyidëti a nue la itre ngazo së. Ngo Nyidrëti hi a ujë tune lai, e hne së hna ietra me thele pala hi troa lepe trije la itre aja së ka ngazo. (1 Ioane 1:8, 9) Hnei Paulo hna qaja la aqane nue Iehova la itre ngazo ne la atr. Öni angeic: “[Akötresie] lo ate thepe shë qa ngöne la mene ne la jid, me ujë shë kowe la baselaia ne la Hupuna i anganyidëti hnimina ; [jëne] nyidëti hne shë hna hetenyi la hna itö mel, ene la troa nue tije la nöjei ngazo.” (Kol. 1:13, 14) Tru la ole së kowe la utipine i Iehova matre aja së troa atrunyi Nyidrë. Ketre, hetre itre xa manathithi hne së hna kapa qa ngöne la hnei Iehova hna nue la itre ngazo së. w16.07 3:7-9

Ngacama hna ie la iaö i Satana, ngo hnei Iehova kö hna thupëne matre tha tro kö a paatre la mejiun ne la itre atr. Hna qaja la mejiune cili ngöne la pane hna perofetane caha. Hnei Nyidrëti hna upe la ketre angela troa “athe” la he i Diabolo. Nge tro la matrane cili a aijijëne la itre atr ka idrengethenge troa hetrenyi hmaca lo mel hna aluzine hnene lo lue pane atr. Haawe, tro ha eatre lo aja i Iehova ngöne la qaane laka, tro la itre atr a mel epine palua hune la ihnadro. (Ioane 3:16) Pine laka hnei Adamu me Eva hna icilekeu, ene pe jole pi hi la faipoipo i nyidro, memine la itre xa faipoipo thupe i nyidro. Qaane ju hi lai, akötre jë hi la nöjei föe asë ngöne la angatr a hnaho. Ketre, atraqatre ju hi la aja ne la föe kowe la trahmany, ngo kolo pe a musinë nyiidro. Nge hetre itre xa föe fe hna qanangazon. (Gen. 3:16) Ame pe, aja i Iehova tro la itre trahmanyi a musinëne la hnepe lapa i angatr cememine la ihnim, nge aja i Nyidrëti fe tro la itre föe a metrötrëne la itre föi angatr. (Efe. 5:33) Matre, ame la kola ce huliwa hnene la lue trefën, ketre patre pi hi la itre xa jol. w16.08 1:6, 7

Tusi Hmitrötr mina fe a amamane la itre xa kepin matre, loi e tro la lue trefën a ce mel me cas, ngacama tha nyidroti kö a ce nyihlue i Iehova. (1 Kor. 7:12-14) Ame la atr ka tha lapaun tre, hna “ahmitötëne” hnene la föi angeic ka nyihlue i Iehova. Ketre tune mina fe kowe la itre nekö i nyidro ka co. Ka “hmitöte” nyudren, matre Iehova a ketre thupë nyudren. Nyimutre catre hë la itre keresiano ka hane xatuane la itre föi angatr troa nyihlue i Iehova. Hnei Peteru mina fe hna upe la itre föe troa metrötrëne la itre föi angatr. Öni angeic: “E hetete tha denge thenge la wesi ula, mate ahmalanyi angate hnene la thina ne la ite ifënekö i angat, ngo tha hnei wesi ula ; e goeëne hnei angate la thina i nyipunie a pë ethan, nge kola qou [maine metrötr].”—1 Pet. 3:1-4. w16.08 2:14, 15

Aja i Iehova tro la itre hlue i Nyidrëti a ihnimikeu me ce huliwa, tune la itre atrene la ketre lapa ka cas. (Luka 22:24-27) Tusi Hmitrötr a amamane ka hape, ase së hë Iesu nue asë matre troa xatuane la itre atr, nge goi nue fe nyidrë la mele i nyidrë. (Mat. 20:28) Kolo fe a qaja göi Doreka ka hape, “tiqa ha la föe celë hnene la nöjei huliwa ka loi me ihnimi hnei nyidoti hna kuca.” (Ite hu. 9:36, 39) Nge ame pena Maria, tre, ka “huliwa atrune” angeic kowe la itre trejin e hnine la ekalesia ne Roma. (Rom. 16:6) Ngo hapeue së, tro sa xatuane tune kaa la itre ka xötrei bapataiso troa kuca la loi kowe la itre atrene la ekalesia? Loi e tro sa ce tro me angatr troa wange la itre trejin ka qatre hë, me itre ka wezipo. Nge e ijij, loi e tro mina fe la itre keme me thiin a ce tro memine la itre nekö i angatr troa wange la itre trejine cili. Nge ame itre qatre thup, loi e tro fe angatr a ce tro memine la itre nekönatr, me itre ka xötrei xomi bapataiso göi troa komisio, maine troa nyihnyawane la itre uma ne la itre qatr me qatre föe. Matre, ame hë la angatr a öhne la aqane nyipiewekëne së la itre trejin, ketre angatre fe hi lai a xomi tulu qaathe së, me atrehmekune la aqane troa xatuane la itre trejin.—Rom. 12:10. w16.08 4:13, 14

Önine la ketre trejin föe e Faras: “Kola sesëkötr la itre porofesöreng laka, hetre atr pala kö ka mejiune kowe la Tusi Hmitrötr.” Ala nyimu la itre atr enehila ka tha kapa kö laka, hetre Akötresie ka Xupi së. Nge maine eö la ketre thöth ka nyihlue i Iehova maine ka ini Tus, tro ha traqa la ijine tro eö a thele la aqane troa cilëgöli Iehova, Atre Xupi së. Tusi Hmitrötr a hmekë së qa ngöne la itre ewekë hne së hna drenge me e, ngo eje fe a upi së troa huliwane la inamacane së. Kola qaja hnene la Wesi Ula i Akötresie ka hape: “Troa thupë eö hnene la mekun [maine aqane huliwane eö la inamacan].” Tro lai a xatua eö troa thipetrije la itre ini ka thoi me acatrene la lapaune i eö koi Iehova. (Ite edomë 2:10-12) Maine eö a ajane troa catrecatre la lapaune i eö koi Iehova, nyipi ewekë tro eö a atrepengöi Nyidrëti hnyawa. (1 Tim. 2:4) Matre, ame la eö a e la Tusi Hmitrötr me itre itusi së, nyipi ewekë tro eö a pane xomi ijine troa mekune hnyawa la hnei eö hna e. Thele jë fe troa trotrohnine la itre ini cili. w16.09 4:1-3

Easë fe enehila a hane qëmeke kowe la itre jole ka tru. Hnene laka, tha loi kö la aqane ujë i ketre koi së, maine hna meku hni së, maine hna thaipië së, maine zalu pena koi së, haawe, kola akötrëne la hni së. Ngo the kucakuca pi kö, mekune jë pe la itre ewekë ka xatua Iakobo, me Rakela, me Iosefa troa catre nyihlue i Iehova. Hnei Iehova hna acatrene la ime i angatr, me amanathithi angatr pine la aqane hnimi Nyidrë hnei angatr. Ketre, hnei angatr pala hi hna catr, me ujë thenge la itre thithi angatr. Nge ame fe së enehila, itre ka melëne la hneijine la pun, nyipi ewekë tro sa acatrene la mejiune së göi elany. Ngo hapeu, epuni fe kö a thel troa amadrinë Iehova? w16.09 2:8, 9

E tro la nekö i nyipunie a öhne la ecatrene la lapaune i nyipunie, tro lai a hetre thangane catre koi nyën. Nyën a goeëne la aqane ujë i nyipunie. Matre, catre jë acatrene la lapaune i nyipunie. Loi e tro nyën a öhne laka, ka tru Akötresieti koi nyipunie. Hnene la lue trefën qa Bermudes hna majemine ce thithi memine la itre nekö i nyidro jajiny. Angatr a ce sipone koi Iehova la ixatua ngöne la kola traqa la jole koi angatr. Ketre, hnei nyidroti fe hna majemine upe la itre nekö i nyidro troa hane thithi cas. Öni nyidro: “Hnei nyiho mina fe hna qaja lapane kowe la nekö i nyiho ka tru ka hape, ‘Mejiune jë koi Iehova, catre jë huliwa koi Nyidrë, nge the hnehengazo menu kö.’ Matre ame hë la nyën a öhne la aqane thepe hun qa ngöne la jol, mama hnyawa hi koi nyëne laka, Iehova la ka xatua hun. Celë hi lai ka acatrene la lapaune i nyën koi Akötresie me kowe la Tusi Hmitrötr.” Keme me thine fe, the thëthëhmine kö laka, tha tro kö nyipunieti lai a musinëne la itre nekö i nyipunie matre tro nyudren a lapaune koi Iehova. Nyipunieti hi a trane me fi, ngo Iehova kö la ka acian. (1 Kor. 3:6) Loi e tro pe nyipunie a catre qeje Iehova koi nyudren, me catre sipone la uati hmitrötre i Nyidrë, matre troa akökötrene la lapaune i nyudren. Haawe, loi e troa xecie koi nyipunie laka, tro kö Iehova a amanathithine la trenge catre hnei nyipunie hna kuca.—Efe. 6:4. w16.09 5:16-18

Hanawange la pengöi Serge me Muriel, föi angeic: Traqa koi köni macatre nge sin ne nyidroti a ixatua ngöne la ekalesia ka qaja la ketre qene hlapa. Hetre nekö i nyidro ka 17 lao macatre, nge mama ju hi koi nyidro laka, pëhë madrine i nyën troa cainöje trootro me tro koi hna icasikeu. Öni Serge: “Ame la nyiho a öhne lai ewekë ka ajolë nyën troa kökötre ngöne la nyipici, nyiho a mekune jë troa bëeke kowe la ekalesia hun hnapan.” Nemene la itre ewekë ka troa upe la keme me thin troa fek kowe la ketre ekalesia? Ame la pane ewekë, pëkö ijine me trenge catre i nyidroti troa ce xome la lue ewekë celë, ene la troa inine la nekö i nyidro troa hnimi Iehova me ini nyën la qene hlapa ka hnyipixe. Ame la hnaaluen, mama hnyawa hi koi nyidro ka hape, pëkö madrine i nekönatr troa cainöje trootro, me tro koi hna icasikeu, me ixatua ngöne la götrane ka ithanatane la ketre qene hlapa kö. Haawe, itre ewekë lai ka upe la kem me thin troa bëeke kowe la ekalesia ka ithanatane la qene hlapa ne la nekönatr. E catre hë elanyi la imelekeu ne la nekönatr me Iehova, ijije koi keme me thin troa bëeke hmaca kowe la ekalesia ka qaja la ketre qene hlapa kö.—Deu. 6:5-7. w16.10 2:14, 15

Eje hi laka, hnene la itre atr ka lapa easenyi Noa hna hnyingë angeic la kepine matre angeic a cane la Aka. Ngo atre hi së laka, tha hnei Noa kö hna lapa thaup ke, öni Tusi Hmitrötr göi angeic ka hape, “ate cainöjëne la thina ka meköt.” (2 Pet. 2:5) Angeic a ithuemacanyine la itre atr ka hape, tro Akötresie a axulune la Iwë Atraqatr matre troa apatrene la itre atr ka ngazo. Angeic a qaja hnyawane koi angatr la itre ithanata i Iehova lo hna qaja koi angeic, kola hape: “Xulu hë koi ni la pune la nöjei ate asëjëihë ; ke tiqa ha la fene hnei iangazo i angat, . . . Nge hana wang, tro ni a akaca trane la fene hnengödrai hnei iwë, mate troa humuthe la ite ka mele a mano asë e celë fen ; nge tro ha meci la nöjei ewekë asëjëihë e celë fen.” Hnei Noa fe hna qaja amamane kowe la itre atr la nyine tro angatr a kuca matre tro pe kö angatr a mel, ke ase hë Iehova ahnith koi angeic ka hape: “Tro eö a lö hnine la aka.”—Gen. 6:13, 17, 18. w16.10 4:7

Hetrenyi e hnine la Tusi Hmitrötr la itre ithuemacanyi thatraqane la keme me thin göi aqane troa hiane la itre nekö i nyidro. Loi e tro la itre keresiano a thupën matre tha tro kö a ajojezi nyidro hnene la aqane waiewekëne la fene celë. (Efe. 2:2) Ame ngöne la itre xa hnalapa, tro la kem a mekune ka hape, ‘Hane la föeng matre troa inine la itre nekönatr.’ Ngo Tusi Hmitrötr a amekötin hnyawane kowe la kem troa qeje Iehova kowe la itre nekö i angeic. (Efe. 6:4) Ame la ajane la kem me thin, tre tro la itre nekö i nyidro a imelekeu hnyawa me Iehova, tui Samuela lo angeic a nekönatr. (1 Sam. 3:19) Loi e troa pane wange la hna qaja hnei Tusi Hmitrötr qëmekene troa axeciëne la itre mekune ka tru göne la hnepe lapa me huliwa së. Ame e cili, ka nyipi ewekë catre la ixatua i Iehova, ke, thatreine kö së troa sipu amekötine la itre jë së. w16.11 3:14, 15

Ame la easa goeëne la itre ewekë hnei Iehova hna xup, kola mama hnyawa laka, Nyidrëti la Akötresie ka kuca amekötine la itre huliwa. Hnei Nyidrëti “hna ami tepene la fene ngöne la inamacan, me acatene la hnengödrai ngöne la ate hmekun.” (Ite edomë 3:19) Tru catre la itre ewekë hne së hna thatre ngöne la itre ewekë hna xupe hnei Iehova. “Hnepe ka co hi lo hnei shë hna ate göi nyidë.” (Iobu 26:14) Ngo kola mama hnyawa qa ngöne la hnepe hne së hna atre laka, hna kuca amekötine me kuca alolone la itre ewekë e koho hnengödrai me e celë fen. Itre milio lao wëtresij a nyinyape thenge la aqane amekötin itre ej. Nge pane mekune jë la aqane nyinyape kanothe la jö hnene la itre planètes. Easa haine la elolone la aqane trongene itre ej. Kola tro tune lai, ke Iehova la ka amë la itre planètes me itre wëtresij ngöne la itre göhne i angatr. Ame la easa mekune la aqane “xupe [Nyidrë] la hnengödrai ngöne la inamacan” memine fe la ihnadro, easa pi atrunyi Nyidrë me nyihlue i Nyidrë, me huliwa nyipici koi Nyidrë.—Sal. 136:1, 5-9. w16.11 2:3

Malaki 3:1-3 a qejepengöne la ewekë ka traqa kowe la Itretre Ini Tusi Hmitrötr lo macatre 1914 uti hë lo itre pane treu ne la macatre 1919. Hnei Iehova Akötresie, “lo Joxu,” me Iesu Keriso, “la maca ne la isisinyikeu,” hna traqa troa waipengöne la “ite nekö i Levi,” ene lo itre keresiano hna iën. Thupene la hnei Iehova hna wenë ameköti angatr, me nyihnyawa angatr, ijiji angatre hë troa kapa la ketre hnëqa ka hnyipixe. Ame lo 1919, hnei Iesu hna acile la “hlue ka nyipici me ka inamacan,” lo ka troa amekötin me inine la itre hlue i Akötresieti asë. (Mat. 24:45) Haawe, lö hë la itre hlue i Akötresie qaa Babulona Atraqatr. Qaane ju hi lai, angatr pala hi a trotrohnine trongëne la aja i Akötresie, nge kolo pala hi a kökötre la ihnimi angatr koi Nyidrë. Tru la ole i angatr kowe la aqane amanathithi angatr hnei Nyidrë. w16.11 5:14

Hnei Iehova, Keme së, hna axeciëne troa amanathithine la itre hlue i Nyidrë. Ketre aqane amamane Nyidrëti la ihnimi Nyidrë koi së. Ketre, easa hnimi Nyidrë “ke pa i nyidëti hnimi shë.” (1 Ioane 4:19) Kolo pala hi a kökötre la ihnimi së koi Iehova, nge ketre kolo fe a catre la lapaune së koi Nyidrë. Nge tro fe lai a acatrene catrëne la mejiune së ka hape, tro Iehova a amanathithine la itre ka hnimi Nyidrë. (Heb. 11:6) Iehova la atre nyijun maine amanathithin! Ketre götrane gaa tru ne la pengöi Nyidrëti lai, memine la itre huliwa i Nyidrë. Matre, tha ka gufa kö la lapaune së koi Nyidrë. Tha luelue kö së ka hape, tro kö Nyidrëti a amanathithine la itre ka thele catrë Nyidrë. Easa mekune tune lai, ke, “ame la lapaun, te, kola lapa qale kowe la nöjei ewekë hna mejiune kow.” (Heb. 11:1) Ame la aliene la lapaun, tre ene la troa xecie e kuhu hni së ka hape, tro Akötresieti a amanathithine la itre hlue i Nyidrë. Kola amamane hnene la tane la topik ne la drai celë ka hape, aja i Iehova tro sa kapa la itre manathith cili. Ame la easa trongëne la hna qaja hnei Nyidrë e celë, ene la troa tupathi Nyidrë, easë hi lai a amamane la hni ne ole së kowe la itre manathith ka treqe së. w16.12 4:1-3

Tro fe lai a hane traqa kowe la atr ka nyihlue i Iehova koi nyimu macatre hë. Matre tune kaa, Paulo kö a qaja ka hape, tha tro pi kö sa mekune göi xen, maine huliwa i maseta, maine nyine iamadrinë, maine pi iatre me ketre? Ohea. Itre ewekë lai hne së hna melën. Ketre, hetre madrine Iesu fe troa hane xen, me thue a i itre xan. Ketre, öhne fe hi nyidrëti laka, nyipi ewekë fe tro nyidrëti a mano. Nge öni Paulo, ka nyipi ewekë catr la troa ce meköle trefën e hnine la faipoipo. Ame la qene Heleni ne la hnaewekë “hnine,” tre kola hape, kola xome asë la mekuna së hnene la ketre ewekë hne së hna ajan troa eatrën. Hnene la ketre atr ka inamacan hna qaja göne lai atr ka hape, “ka tru koi angeic [la ewekë cili], nge kolo pala hi a ithanatane lapan.” Ketre, angeic a wange atrune la itre sipu aja i angeice kö. Itre aja cili la ka amekötine la mele i angeic. w16.12 2:5, 9, 10

Nge e tha xomehnöthe kö së la itre aja së ka ngazo, easa ujë qene pi tru. Nyimutre la itre atr ka ujë tune lai ke, angatr a pi mama, maine angatr a zalu koi itre xan, maine thatreine kö angatr xomehnöth la elëhni angatr. Hna hane traqa tun kowe la itre xa atr hna qaja hnei Tusi Hmitrötr, tui Abasaloma, Uzia, me Nebukaneza. Hnei Iehova hna amamane hnyawa koi angatr la enyipiewekëne troa hni ka ipië. (2 Sam. 15:1-6; 18:9-17; 2 A. l. ite jo. 26:16-21; Dan. 5:18-21) Hetre itre xa aqane ujë hna mekune ka hape, kola qene pi tru. Pane mekune jë la hna melën hnei Abimeleke me Peteru. (Gen. 20:2-7; Mat. 26:31-35). Hapeu, tro kö sa qaja ka hape, itre ka qene pi tru angatr? Maine pena hnei angatre kö hna kuca thatre? Haawe, thatre kö së la ka ej e kuhu hni angatr, matre tha loi kö tro sa mekuhni angatr. w17.01 3:9, 10

Tune la sine föe ka pë ewekë, nyimutre la itre trejine enehila ka catre mejiune koi Iehova laka, e tro angatr a amë panëne la Baselaia i Nyidrë ngöne la mele i angatr, tro Nyidrëti a thupë angatr. (Mat. 6:33) Malcolm la ketre e angatr. Hetre itre ijine madrine me itre ijine akötr, ngöne la itre macatre ne nyihlue i Iehova hnei angeic me föi angeic. Öni angeic: “Tru la itre ewekë ka traqa ngöne la mel, nge ka asesëkötrë së, nge jole pi hë troa cile kow. Ngo Iehova a amanathithin la itre ka qale catr koi Nyidrë.” Nemene la eamo i Malcolm? “Thithi jë matre tro pala hi a hetre thangane la hna catre huliwa i Iehova. Nge, thele jë troa eatrëne la hnei epuni hna atreine kuca, ngo tha itre ewekë kö hna thatreine kuca.” Tro la fene celë a ngazo catr, nge ame la itre atr, “tro pala kö angat’ a ngazo,” matre ame koi së, tro pala kö a jole catr elany. (2 Tim. 3:1, 13) Haawe, loi e tro sa thupëne hnyawa matre tha tro kö a ahacenyi së hnene la itre jol ka traqa koi së. Nyipi ewekë tro sa catr mejiune koi Iehova, me thele troa eatrëne la hne së hna atreine kuca. w17.01 1:17-19

Atraqatr la aja i Davita troa xup la ēnē i Iehova ka mingöming. Ngo, kola mama ngöne la tane la topik ne la drai celë laka, tha celë kö la aja i Iehova. Atre hë Davita ka hape, tro pë hë la ketre nekö i angeic a xup la ēnē. Hnei Iehova hna sisiny koi Davita ka hape, tro pala hi Nyidrë a ceme angeic. Nemen la aqane ujë i Davita? (1 A. l. ite jo. 17:1-4, 8, 11, 12; 29:1) Pi tro pala ha Davita a xup la ēnē thatraqai Iehova matre hace catr koi angeic. Ngo ame pe, hnei angeic pala hi hna sajuën la huliwa hna athip koi Solomona nekö i angeic. Hnei Davita hna hnëkën la itre ka huliwa memine la itre jian, ene la fao, me kopa, me sileva, me gool, me sinöe. Tha hnei angeice kö hna thele troa atre la atr ka troa xup elanyi la ēnē, kola qaja la ēnē i Solomona. Hnei angeice pe hna thuecatre koi Solomona me hape: “Enehila, neköng, tro Iehova a ce me hmunë ; nge manathithi hë hmunë, nge xupejë la ēnē i Iehova.”—1 A. l. ite jo. 22:11, 14-16. w17.01 5:6, 7

E akötrë së jë, easa isine troa mel thenge la itre ini hne së hna kapa qaathei Iehova. Matre, celë hi aqane tro së lai a atrune la ëje i Iehova. (Mat. 5:14-16) Easë hi lai a amamane ka hape, ka lolo la itre wathebo i Iehova, nge ka thoi lae Satana. Itre atr ka tha pexeje kö së, matre tro së lai a tria. Ngo, e traqa ju së tria, loi e tro sa ietra, me isine matre tha tro hmaca kö sa kuca la itre ewekë ka adrone la ëje i Iehova. Maine ka lapaune së kowe la thupene mel, tro Iehova a nue la itre ngazo së, itre hna iëne ju hë së maine itre “xa mamoe” pena. Nyidrëti a kapa lo itre ka nue la mele i angatr koi Nyidrë. Nyidrëti a jele mekötin la itre keresiano hna iën ceitu me itre nekö i Nyidrë, nge ka meköti fe koi Nyidrë la “ite xa mamoe” ceitu me itre sinee i Nyidrë. (Ioane 10:16; Rom. 5:1, 2; Iako. 2:21-25) Celë hi matre, thupene mele hë enehila a aijijë së troa imelekeu hnyawa me Akötresie, me ahmitrötrëne la ëje i Nyidrë. w17.02 2:5, 6