Ogas

Pane mekune jë së lo ketre isi ka tru nge ka qea catr. Kolo isi angetre Isaraela hna elemekene hnei Gideona memine lo angetre Midiana. Hnei angatr hna weje huzune la angetre Midiana ngöne la jidre ka pexej, traqa koi 32 lao kilomet. Nge, thatreine kö tro angatr a hmaca e celë. Haawe, tha mano kö Gideona me itre atre i angeic iwej uti hë la hun angatr! (A. ame. 7:22; 8:4, 10, 28) Hetre isi ka tru fe hne së hna cile kow, nge ka qea pi hë. Ame la itre ithupëjia me easë tre, Satana me fene i angeic, me itre aja së ka ngazo. Nyimu macatre hë enehila ne cile catre së ngöne la isi cili. Nyimu isi hne së hë hna hun jëne la ixatua i Iehova, ngo tha traqa pala kö së kowe la pune la isi. Ame itre xa ijin, tre kola traqa koi së la kucakuca, maine pena hmanono hë së hna treqene la pune la fene celë. Ase hë Iesu thuemacanyi së laka, tro ha traqa koi së la itre itupathi ka tru me itre iakötrë ngöne la itre drai ne la pun. Ngo öni nyidrëti mina fe, e tro së a xomihni uti hë la pun, tro hë së lai a hun.—Luka 21:19. w16.04 2:1, 2

Ame ngöne la itre icasikeu, Iehova la ka ini së jëne la Wesi Ula i Nyidrë, ene la Tusi Hmitrötr. (Is. 30:20, 21) Ame mina fe la itre ka xötrei traqa, mama hnyawa hi koi angatr laka, ‘the së la Akötresie.’ (1 Kor. 14:23-25) Iehova la ka xomiujine la itre icasikeu jëne la uati hmitrötre i Nyidrë, nge qaathei Nyidrëti la itre ini hne së hna kapa e cili. Celë hi matre, easa drenge hnyawa la itre hna qaja hnei Iehova ngöne la itre icasikeu. Ketre, kola mama koi së e cili la etrune la ihnimi Nyidrëti koi së, nge kolo fe a aeasenyi së catre koi Nyidrë. Öni Iesu, tane la ekalesia, ka hape: “Ame la hnei ala lue maine ala köni hna icasikeu ene ngöne la ëjenge, te, ini hi lai e nyipi angat.” (Mat. 18:20) Öni Tusi Hmitrötre fe, Iesu a “tro nyipine” la itre ekalesia. (Hna ama. 1:20–2:1) Haawe, mama hnyawa hi laka, Iehova me Iesu a ce me easë, me akeukawanyi së ngöne la itre icasikeu. Pane mekune jë la pengöi Iehova la Nyidrëti a goeëne la hne së asë hna isa kuca matre troa qale catre koi Nyidrë me nekö i Nyidrë. w16.04 3:13, 14

Kola ibozu hnene la ketre trejine föe memine la lue trejine trahmany. Ngo ame la kola tro hnene lai trejin föe, kola ha nyiqaane eetr hnei ketre pine la aqane ithanata i eahlo. Eloine pe, hnene lo lai ketre trejin hna amekunë angeic ka hape, ka hekö hë eahlo nyihlue i Iehova, a traqa koi 40 lao macatre, nge nyimutre la itre jol hnei eahlo hna qëmeke kow. Nge tha mekuna i eahlo kö troa akötrë angeic. Matre, tune kaa ha lo trejin ka eetr? Öni angeic, “Nyipici eö!” Angeice pë hë a nue pi la ngazo hna kuca koi angeic. Nemene la ini hne së hna xome qa ngön? Ame la kola akötrë së hnei ketre, isa qanyi së hi lai isa mekun la aqane tro sa ujë. Ngo ame la atre ka ihnim, tre ketre atr ka inualoinekeun. (Ite edomë 10:12; 1 Pet. 4:8) Ame la easa elë hune la ngazo i ketre, tre ewekë lai ka amadrinë Iehova catr. (Ite edomë 19:11) Haawe, e traqa ju akötrë epun hnei ketre, isa hnyinge jë me hape: ‘Ijije kö tro ni a nue la ngazo hna kuca koi ni? Tro kö ni a lapa fë wesitr?’ w16.05 1:8, 9

Drei la itre ka cainöjëne enehila la maca ka loi ne la Baselaia? Itretre Anyipici Iehova! Easë hi la itre ka cainöjëne lo maca hna tro fë hnei Iesu, ene la maca ka loi ne la Baselaia. Ketre, hnene laka easa thele la itre atr, ene pe, hetre aqane cainöje së kö, tune la hna kuca ha hnei Iesu. Nge ame la kepin matre easë a cainöj, tre ene la ihnimi së koi Iehova me kowe la itre atr. Nge ame la huliwa ne cainöje së, tre kola ketr la ka ala nyim, ke easë a cainöj kowe la nöjei atr ne la nöjei nöj, me nöjei qene hlapa asë. Nge ketre, easë pala hi a catre cainöj uti hë la pune la fene celë! Nyine haine la easë a goeëne la huliwa hna kuca hnene la itre hlue i Iehova troa cainöjëne la maca ka loi ngöne la hneijine ne la pun. Ngo hapeu, hne së hna eatrëne tune kaa la huliwa cili? Kola sa la hnying celë hnei Paulo aposetolo ngöne la tane la topik ne la drai celë. Epi tro pala hi Iehova a hamëne koi së la trenge catre ka ijij, matre tro sa eatrëne hnyawa la huliwa ne cainöj!—2 Tim. 4:5. w16.05 2:17, 18

Ame la easë a iëne troa drei Nyidrë me catre kuca la aja i Nyidrë, easë hi lai a amamane la etrune la ihnimi së koi Nyidrë, me aja së troa amadrinë Nyidrë. Ketre, easë fe hi lai a sajuëne la musi Nyidrë. Atre hi së lo laka, hnei Satana hna jele ngazone la musi Iehova. Matre, ame la nöjei hnepe ewekë hne së hna kuca göi troa sajuëne la musi Nyidrë, tre ka tru lai koi Nyidrë. (Iobu 2:3-5; Ite edomë 27:11) Haawe, maine tro sa isine troa lepe trije la itre aja së ka ngazo, easë hi lai a nyipici koi Nyidrë me sajuëne la musi Nyidrë. Ketre, Iehova a ajane tro sa kuca asë la hne së hna atreine göi troa nyitipune la itre thiina Nyidrë. (2 Pet. 1:5-7; Kol. 3:12) Nyidrëti fe a ajane tro sa isa catre lepe trije la itre mekun me itre aja së ka ngazo. (Rom. 8:5) Maine nyipici laka, tha ka hmaloi kö, ngo tru la madrine së laka, hetre thangane pi hë la hne së hna catr. w16.05 4:12, 13

Atre hnyawa hi Iehova la itre tria së, me itre ifego së, me itre ewekë nyine tro pala kö sa huliwan. Matre, ame la Nyidrëti a xome ameköti së, tre, Nyidrëti pala hi lai a kuca thenge kö la isa pengö së. (Sal. 103:10-14) Nge maine aja së troa atre la aqane waipengö së hnei Iehova, loi e tro sa goeëne la aqane ujë i Iesu ngöne la kola tria la itretre drei nyidrë. Ame la ketre drai, hnei angatr hna isi pi göhnë, ke kola pi atre la ka tru e angatr. Maine epuni ju a hane sine la iwesitrë i angatr, tro epuni a goeë angatre tune kaa? Maine jë, tro epuni a mekune ka hape, ceitu i angatr me dro ka qaqacil. Ngo atre hi Iesu laka, tro angatre lai a ujë e hnei angatre hna drenge la itre eamo i nyidrë me nyitipu nyidrëti hnyawa. (Mar. 9:33-37; 10:37, 41-45; Luka 22:24-27) Thupene la hna amele Iesu hmaca, hnene la ange aposetolo hna kapa la uati hmitrötr matre tha hnei angatre hmaca kö hna thele la ka tru e angatr. Ngo hnei angatre pe hna wangatrune catrëne la huliwa hnei Iesu hna athipe koi angatr.—Ite hu. 5:42. w16.06 1:10

Iehova hi la nyipi Akötresie, nge pëkö ka ceitu me Nyidrë. (2 Sam. 7:22) Matre, ame la aliene la trenge ithanata i Mose, tre nyine amekunëne la angetre Isaraela ka hape, Iehova hi la nyine tro angatr a thili kow. Tro angatr a thupëne matre tha tro kö a xome la thiina ne la itre ka mele xötreithi angatr, itre ka thili kowe la itre haze thoi. Ke ame kowe la itre nöje cili, itre haze i angatr la ka musi kowe la itre ewekë ka ej e celë fen, tune la itre feja me eny, me itre xa ewekë ju kö. Nyimutre catre la itre haze hna thili kow hnene la angetre Aigupito. Kola qaja la itre öni tui Ra haze ne jö, me Nut haze ne hnengödrai, me Geb haze ne ihnadro, me Hapi haze ne la hneopegejë Nil. Ngo draië catre kö Iehova! Hnei Nyidrëti lo hna amamane la etrune la mene i Nyidrë ngöne lo kola lepi Aigupito hnene la treene lao akötr. Nge ame pena la angetre Kanana, tre angatr a nyihluene la haze i angatr, Baala. Ame koi angatr, Baala la atre xupe la nöjei ewekë e celë fen, memine la hnengödrai, me mani, me wene. Matre angatr a thithi me sipo angeic troa thupë angatr. (Num. 25:3) Celë hi matre, nyipi ewekë kowe la angetre Isaraela troa lapa mekune laka, Iehova hi la nyipi Akötresie, “Iehova ka cas.”—Deu. 4:35, 39. w16.06 3:4, 5

Kola ini së hnene la tulu i Iesu troa mele nyipici koi Iehova, me kowe la itre hlue i Nyidrë. Nyimu kepin matre nyipi ewekë tro sa ujë tune lai. Iehova enehila a eatrongëne la itre hlue i Nyidrë. Nyidrëti a xatua angatr troa cainöjëne la nyipici e cailo fen, nge pëkö xa hmi ka hane kuca tun. Ketre, ka casi me madrine la itre hlue i Iehova ke, Iehova la ka ini angatr. Isaia 65:14 a perofetane lai ka hape: “Tro la ite hlueng’ a hë draië kola aciaci [maine madrin] la hni.” Tru la madrine së ke Iehova la ka eatrongë së me xatua së ngöne la nöjei ewekë ka loi hne së hna kuca. Nge ame pena la itre atr ka mele ngöne la fene i Satana, tre pëkö madrine i angatr nge pëkö mejiune i angatr! Haawe, nyipi ewekë tro sa mele nyipici koi Iehova me drengethenge la itre hnei Nyidrëti hna amekötin. w16.06 4:10-12

Hetre ini hne së hna xome qa ngöne la atre ka thupe ekö ngöne la itre traon. Nyimutre la itre traon ekö, tun e Ierusalema, itre hna eköhagen hnene la itra etë, matre tha tro kö a lö hnin hnene la itre ithupëjia. Tro la ka thup a cil hune la itra etë nge qa cili, öhne asë hi angeic la nöjei ewekë e tröne la traon. Ame la itre xa ka thup, angatr a cil ngöne la qanahage ne la traon. Matre, nyipi ewekë tro la ka thup a hmek e lai me jidr, nge e öhne hë angeic la ithupëjia e traqa, tro angeic a canga thuemacanyine la itre atrene la traon. (Is. 62:6) Atre catre angeice la enyipiewekëne la troa lapa hmek, me atreine goeëne la itre ewekë ka troa traqa. E tha eatrëne hnyawa kö angeic la hnëqa i angeic, ala nyimu la itre atr ka troa mec. (Ezek. 33:6) Hna qejepengöne hnene la ketre atr ka inamacan göi itretre Iudra ekö, la aqane lö hnine Ierusalema hnene la angetre Roma lo macatre 70 thupe i Keriso. Hnene la itre ka thup hna meköl, ame hna lö hnin hnene la itre soce i Roma, me lö hnine la ēnē me manith ej, me lepe apatren asë la traon. Celë hi götrane tixenuë ne la akötr atraqatre i angetre Iudra ekö. w16.07 2:2, 7, 8

Nyimutre la itre manathithi hne së hna kapa qa ngöne la ihnimi gufa i Iehova. Ngo tha tro pi kö sa elone la ihnimi gufa i Nyidrë me mekune ka hape tro Nyidrëti lai a kapa la itre ngazo hne së hna kuca. Hetrenyi ekö thene la itre pane keresiano la itre ka thele troa “ujëne la ihnimi gufa i Akötesie kowe la qene tratraij.” (Iuda 4) Ame koi angatr, kuca ju hë angatre la ngazo, ngo tro kö Iehova a nue la ngazo i angatr. Hnei angatr mina fe hna iaöne la itre trejine troa xötrethenge angatre ngöne la itre huliwa i angatr. Ketre tune enehila, ame la atr ka ujë tune lai tre angeic a ‘thaipiëne la ua, qeqe ne la ihnimi gufa.’ (Heb. 10:29) Satana fe enehila a amenune la itre keresiano matre tro angatr a mekune ka hape, kuca ju hë angatr la ngazo, ngo tro pala hi Iehova a nue la ngazo i angatr. Nyipici laka, hetre aja i Iehova troa nue la ngazo ne la ka ietra, ngo aja i Nyidrëti fe tro sa catr lepe trije la itre aja së ka ngazo. w16.07 3:16, 17

E traqa jë nyidro sei hna cil, nge tha hna nyixetë kö, tha meköti kö tro nyidro a faipoipo hmaca me ketre. Ngo ame pe, ijije fe hi tro la atre hna nyixetë trij a nue la ngazo ne la föi angeic, nge celë hi lai hna kuca hnei Hosea. Ngacama hnei Gomera, föi angeic hna nyixetë, ngo hnei angeic hna nue la ngazo i nyiidro. Ketre, hnei Iehova mina fe hna ujë tun kowe la nöje Isaraela. (Hos. 3:1-5) Nge maine tro la atr hna nyixetë trij a ce meköle hmaca memine la föi angeic, kolo hi lai a amamane ka hape, iloi hmaca ha nyidro. E cili, pë hë kepine ka aijijëne la lue trefëne troa sei hna cil. Thupene la hnei Iesu hna qaja la trenge ewekë ka mama ngöne la tane la topik ne la drai celë, hnei nyidrëti hna ithanatane la itre atr ka atreine troa lapa cas. Öni nyidrë: “Ame la [ka] ateine troa kapa lai, kapaju.” (Mat. 19:10-12) Itre xan a mekune troa tha hane faipoipo matre hmaloi koi angatr troa nyihlue i Iehova. Haawe, loi e tro sa qaja aloinyi angatr pine lai! w16.08 1:15, 16

Nyimutre catre la itre huliwa i Iehova ka ijiji kowe la itre thöth troa kuca, ke itre ka egöcatr. (Ite edomë 20:29) Ala nyimu la itre thöthi ka huliwa ngöne la Bethela, angatr a feja itus me cane la itre itusi me Tusi Hmitrötr. Nge itre xane mina fe a huliwa ngöne la hnë xup me nyidrawane la itre Uma Ne Baselaia. Hetre itre xane ka ixatua thupene la itre hulö. Nge itre xa thöth ka pionie a inine la itre xa qene lapa, matre troa fek kowe la itre nöje gaa aja ixatua. Önine la atre cinyihane la Salamo ka hape: “Demeju, nge atejë laka ate ihnimi Iehova.” Öni angeic hmaca jë: “Tha tro kö a pate la kete loi thei angete thele Iehova.” (Sal. 34:10) Eje hi laka, ame la easa hamëne koi Iehova la ka sisitria, atraqatre la madrine së qa ngöne la hna amadrinë Nyidrë. Nge tro Nyidrë a metrötrëne lo hnei Nyidrëti hna qaja ka hape, tro kö Nyidrëti a thupë së. w16.08 3:5, 8

Atreine hi Iehova xatua së, nge hetre aja i Nyidrëti fe troa acatrene la itre ime së, jëne la uati hmitrötr i Nyidrë. (1 A. l. ite jo. 29:12) Haawe, nyipi ewekë tro sa sipone lai koi Nyidrë, matre hetre trenge catre së jë troa cile catre koi Satana me fene ka ngazo i angeic. (Sal. 18:39; 1 Kor. 10:13) Ketre, atraqatre fe la ole së kowe la Wesi Ula i Nyidrë, ke celë hi ketre ixatua ka tru lai. Nge easë fe a kapa e nöjei treu la itre itusi së, itre itusi lai ka qatrenge la itre ini ka tru. Nge, hetre ithuecatre fe hne së hna kapa qa ngöne la hna qaja ngöne Zakaria 8:9, 13, itre trenge ewekë lai hna qaja ngöne lo kola acile hmaca lo ēnē e Ierusalema. Iehova mina fe a aegöcatrenyi së me ini së, jëne la itre icasikeu, me itre asabele, me itre ini hna kuca hnei organizasio. Itre ini lai ka xatua së troa nyihlue i Nyidrë memine la hni së ka pexej, me upi së troa huliwa atrun koi Nyidrë, me eatrëne hnyawa la itre huliwa së. (Sal. 119:32) Ngo hapeu, epuni kö a hane kapa madrine la itre ini cili qaathei Nyidrë? w16.09 1:10, 11

Kola mama ngöne la Trenge Wathebo hna hamëne koi angetre Isaraela laka, methi Iehova la aqane heetre i angatr, ke, kola imenune la trahmanyi me föe. Hetre aqane heetre enehila laka, ca pengöne hë la aqane heetre i trahmanyi me föe. (Deu. 22:5) Haawe, kola ini së hnene la wathebo celë laka, xele catre Iehova ma wange la itre trahmanyi ka heetr tui föe, me itre föe ka heetre tui trahmany, laka thatreine hë së wangatrehmekune la trahmanyi me föe. Tro la itre trepene meköti ne la Tusi Hmitrötr a xatua së troa iëne hnyawa la itre iheetre së. Matre, mele ju hë së ngöne la ketre nöj nge hetre ketre qenenöje kö, gaa hedredrei maine gaa hnötr, ngo tha saze kö la itre trepene meköti cili. Tha tro kö së lai a e wengëne la itre iheetr ka loi maine ka ngazo pena. Ngo, loi e tro sa isa iëne hnyawa la itre heetre hne së hna ajan, ngo thenge pala hi la itre trepene meköti cili. w16.09 3:3, 4

Pane mekune jë la aqane nyipici hnene la itretre cinyihane la Tusi Hmitrötr. Hnei angatre pala hi hna qaja amamane la nyipici, nge tha hnei angatre pi kö hna juetrën. Ame la itre atrene fen ka cinyianyi tusi ekö, tre, hnei angatre hna majemine qaja atrune la ewekë ka loi hna kuca hnene la nöje i angatr, me itre ka musi hui angatr. Ngo ame pena la itre perofeta i Iehova, tre hnei angatre pala hi hna qaja amamane la itre ewekë ka loi me ka ngazo hna kuca hnene la nöj, me hnene fe la itre joxu ne Isaraela. (2 A. l. ite jo. 16:9, 10; 24:18-22) Nge, hnei angatre mina fe hna hane qaja la itre sipu ngazo i angatre kö, me itre tria ne la itre xa hlue i Iehova ekö. (2 Sam. 12:1-14) Kola mama laka, ame ngöne la kola nyiqaane trongëne la itre trepene meköti qa hnine la Tusi Hmitrötr hnene la itre atr, angatr fe hi lai a kepe eloine qa ngön. Xecie hnyawa ha koi angatr e cili laka, ahnahna i Akötresie lai. (Sal. 19:7-11) Ketre, hnene la Tusi Hmitrötr hna xatuane la itre atr troa atrehmekune laka, ka tria lo itre ini hnei angatre hna mejiune kow. (Sal. 115:3-8) Tusi Hmitrötr fe a xatua angatr troa mejiune koi Iehova, Akötresie ka tru menen, me kowe la itre hnei Nyidrëti hna thingehnaean göi elany. Nge ame pena la itre atr ka catre fë ka hape, pëkö Akötresie, angatr hmaca pena ha a nyi Akötresi angatr lo itre hna xup. Nge ame itre xan, kola mekune laka, tro kö la atr a apatrene la nöjei akötr qa la fen. Ngo kola mama laka, ekö hë angatr thele nyin la itre jol, ngo eje pala hi la itre akötr enehila.—Sal. 146:3, 4. w16.09 4:10, 11

Kola mama hnyawa laka, tru la hnei Boaza hna meku Rutha ke, trenyiwa angeic matre tha ka hmaloi kö la mele i angeic. Ame hnei Boaza hna upi angeic troa lapa nyipine la itre jajinyi ka huliwa i nyidrë, matre tha tro kö a qenahmo angeic hnene la itre trahmanyi ka huliwa ngöne la hlapa. Hnei nyidrëti fe hna thupëne matre tro pala hi a hetre a i angeic me nyine iji angeic, tune la ketre ka huliwa i nyidrë. Hnei Boaza hna wange atrune la föe trenyiwa celë, ka pë ewekë me xatua angeic. (Rutha 2:8-10, 13, 14) Hnei Boaza hna thiina ka loi koi Rutha ke, hnei angeic hna hnim me nyipici koi Naomi, treetre i angeic. Ngo, Boaza fe a ujë tune lai koi angeic ke, hnei angeic hna thele troa nyihlue i Iehova, me thele ixatua thei Nyidrë. Matre, Boaza a xötrethenge la ihnimi nyipici i Iehova la nyidrëti a thiina ka loi koi Rutha. (Rutha 2:12, 20; Ite edomë 19:17) Ketre tune mina fe, e hne së hna thiina ka loi enehila, easë hi lai a xatuane “la nöjei ate asëjëihë” troa atre la nyipici me öhne laka, atraqatr la ihnimi Iehova koi angatr.—1 Tim. 2:3, 4. w16.10 1:10-12

Ketre tune mina fe, ame la easa öhne laka, Iehova a drenge la itre thithi së, me hamë së la hne së hna ajan ngöne la nyipi ijin, kola acatrene catrëne la lapaune së koi Nyidrë. (1 Ioane 5:14, 15) Ketre, nyipi ewekë tro sa catre “sipone” koi Iehova la uati hmitrötre i Nyidrë matre troa akökötrene the së la lapaun. (Luka 11:9, 13) Ame ngöne la easa thith, tha loi kö e troa sipo Nyidrëti hmekuje hi la ewekë hne së hna ajan. Ngo, loi e tro fe sa ole koi Nyidrë, me atrunyi Nyidrë o drai, ke qaathei Nyidrëti la nöjei ewekë ka lolo! (Sal. 40:5) Easë fe a thithi sane la itre trejine me easë e cailo fen, ene “la ite hna oth,” kola qaja la itre hna akalabusin. Nge easë fe a thithi sane la itre ka elemeken la huliwa. Ame la easa öhne la aqane sa Iehova la itre thithi së, kola acatrene catrëne la lapaune së, nge easa easenyi catre koi Nyidrë.—Heb. 13:3, 7. w16.10 3:8, 9

Ame ngöne la hneijine së, itre hlue i Iehova a lapaune kowe la Baselaia i Akötresie me sajuëne ej. Angatre fe a ihnimikeu. Angatr a atreine troa ujë tune lai ke, hnei angatre hna thele jëne matre tro la uati hmitrötr a eatrongë angatre ngöne la mele i angatr. (Gal. 5:22, 23) Nemene la thangane lai? Ase hë sasaith la 8 milio lao trejin e cailo fen ka mele tingeting, nge ka cas ngöne la itre ekalesia i angatr. Mama hnyawa hi laka, ka hetre menene catre la lue thiina celë, ene la lapaun me ihnim. Hnene hmekuje hi la ixatua i Akötresie matre hetrenyi jë la casi thene la itre trejin. Haawe, Nyidrëti la nyine tro sa atrune pine lai. (Is. 55:13) Nge tro pala kö Nyidrëti a xatuane la itre ka ala nyimu troa lapaune koi Nyidrë. Nge ame hë elany, tro ha tiqa la ihnadro hnene la itre atr ka pexej me ka meköt, me ka madrin. Nge tro angatr e cili a atrunyi Iehova epine palua! w16.10 4:18, 19

Itre qatre thup a hamëne koi së la itre ithuemacanyi qa hnine la Tusi Hmitrötr ke, ame la aja i angatr tre, troa thupëne la ekalesia. Loi e tro sa drei angatr. Ame thene la itre pane keresiano ekö, hetrenyi la itre trejin ka ‘qali thiina.’ Pëkö huliwa i angatr, ngo angatr pe hi e cahu a lö hnine menune la itre ifekë huliwan. Hnene la itre qatre thup e cahu hna thele troa haji angatr, ngo tha ujë kö angatr. Hnei Paulo hna qaja amamane kowe la ekalesia la aqane tro angatr a ujë kowe la atr ka tune lai. Öni angeic: “Ati hatene ju la ate cili, the ce me angeice kö.” Matre nyipi ewekë tha tro hmaca kö a ce mel memine la atre cili, ngo tha tro pe a ujë koi angeic ceitu me ketre ithupëjia. (2 Thes. 3:11-15) Ketre itre qatre thup enehila a thel troa xatuane la atr ka wange sixane la itre trepene meköti Akötresie, ka tune la trejin ka iatre memine la ketre atr ka tha hmi kö me easë. (1 Kor. 7:39) Nemene la mekuna i epuni göne la itre eamo hna hamën hnei angatr? E cile fë jë la itre qatre thup la ketre cainöj ka tune lai ngöne la ekalesia i epun, nemene la aqane tro epuni a ujë? E atre hi epuni lai trejin cili, eje hi laka, tha tro hmaca kö epuni a ce mel me angeic. Tro hë angeic e cili a trotrohnine ka hape, ka hetre ethane kö koi angeice la aqane ujë i angeic, nge ka akötrë Iehova, nge loi e tro angeic a ujë. w16.11 2:13

Ame lo Penetekos macatre 33, hetrenyi la itre thauzan lao keresiano hna iën hnei uati hmitrötr ngöne la ijine cili. Angatr la “xöte hna iëne . . . me xötete huje joxu, me nöje ka hmitöt, me xöte hna itön.” (1 Pet. 2:9, 10) Ame lo ijine ange aposetolo a mel, angatr la ka thupëne hnyawa la itre ekalesia. Ngo, ame hë la angatr a mec, nyiqaane mama pi hi e hnine la ekalesia la itre atr ka hamë ini ka thoi. Nge, kola thele troa ananyine la itre keresiano qa ngöne la nyipici. Ka tru kowe la itre atr cili la hna inin hnei Aristote me Platon, matre kola qaja trongëne la itre mekuna i nyidro, nge wangacone pë hë la itre nyipici qa hnine la Wesi Ula i Akötresie. (2 Thes. 2:6-8) Ame thei angatr, hetrenyi la itre hna metrötrën, me itre qatre thup. Matre mama pi hi e cili la ketre lapa kö ka mus, ngo hnei Iesu pe lo hna qaja kowe la itretre drei nyidrë ka hape, “Ite tejine asë nyipunie.”—Mat. 23:8. w16.11 4:8

Ame ekö, hetre itre ewekë ka ngazo hne së hna kuca, nge thatre kö së la aqane goeëne Iehova la itre huliwa së. Ceitu i easë me itre atr ka “nyi hlue ne la thina ka sisi memine la tha idei,” kola qaja la troa “nyi hlue ne la ngazo.” (Rom. 6:19, 20) Ngo, ame la easa atre qa hnine la Tusi Hmitrötr la aja i Iehova tro sa mel, easë e cili a saze amekötine la mele së, me sa xepu koi Nyidrë, me xomi bapataiso. Matre ‘mele hë së qa ngöne la ngazo,’ nge “ite hluenë hë la thina ka meköt.” (Rom. 6:17, 18) Matre, hetre nyine tro sa kuca, ene la troa kei thenge la itre mekune me aja së ka ngazo, maine pena tro sa isa xomehnöth itre ej. Isa waipengöi epuni jë me hape: ‘Eni kö a nue la itre ajang ka ngazo troa kökötr e kuhu hning uti hë la eni a kuca itre ej? Maine pena, eni kö a canga lepe trije itre ej?’ Maine atraqatr la hni ne ole së kowe la ihnimi gufa i Akötresie, tro së lai a isine troa amadrinë Nyidrë. w16.12 1:11, 12

Hetrenyi the së la tingeting hnine la hnepe lapa së, me e hnine fe la ekalesia. Pine laka itre atr ka tha pexeje kö së, hetre itre jol ka traqa koi së memine la itre trejin. E traqa ju la ewekë cili, xötrethenge jë la eamo i Iesu, kola hape: “Trojë eö a pane iloi me tejine me eö.” (Mat. 5:24) The thëthëhmine kö laka, ame la itre trejin, itre ka nyihlue i Iehova angatr, ene “la Akötesieti tene tingeting.” (Rom. 15:33; 16:20) E hne së hna ‘hnine la ua,’ tro fe së lai a tingetinge me Akötresie. Öni Isaia perofeta: “Tro enëtilai [Iehova] a thupëne ngöne la nyipi tingetinge la ate ka cile huti la hni ; ke angeic’ a lapaune koi enëtilai.”—Is. 26:3; Rom. 5:1. w16.12 2:5, 18, 19

Iehova mina fe a amanathithine la itre hlue i Nyidrë ngöne la itre drai ne la pune la fene celë. Nyidrëti a thele jëne matre tro sa kapa la itre ithuemacanyi ka mana, me mele tingeting e hnine la lapa ne la itre trejin e cailo fen. (Is. 54:13) Eje hi laka, Iehova ha amanathithi së enehila jëne la lapa ne la itre trejin e cailo fen, tune lo aqane ahnithe hë hnei Iesu. (Mar. 10:29, 30) Ketre, hna amanathithine la itre ka thele catrë Akötresie jëne la tingeting qaathei Nyidrë me madrin. (Fil. 4:5-7) Xecie hnyawa koi së ka hape, ‘thupene hë la hne së hna kuca la aja i Akötesie, tro hë së a hetrenyi la hna thingehnaean.’ (Heb. 10:35, 36) Haawe, thele jë së troa acatrene la lapaune së, me isine troa kuca la huliwa i Iehova. Easa mejiune laka, tro kö Iehova a amanathithi së!—Kol. 3:23, 24. w16.12 4:17, 20

Hapeu, maine hetre ifego së, tro kö sa qaja ka hape, itre atr së hna nue gufan? Eje hi! Pine nemen? Pine laka, kola hmekë së hnene la itre ifego cili. Pane mekune jë laka, epuni a xomi loto uti hë la traqa epuni ngöne la ketre nöj ga nany. Nge ame e cili, pëkö wathebo hna acile göi aqane troa nyinyapëne la gojeny, matre kola isa nyinyape catr la itre atr, me isa xomi gojenyi menu. Tro kö epuni lai a nyinyapëne lai gojeny? Ohea. Haawe, nyipi ewekë la itre ifego hna amë göne matre tro la nöjei atr a isa kepe eloin la hna nue gufa angatr. Tro la aqane ujë i Adamu a amamane koi së la itre eloine hne së hna kapa qa ngöne la itre ifego hna amë hnei Iehova. Hnei Adamu hna xen la wene sinöe hna wathebon, matre mama pi hi ka hape, tha metrötrëne kö angeic la itre ifego hna amë hnei Iehova. Pine laka, tha hnei Adamu kö hna nyipiewekëne la ahnahna, ene la troa ië ewekë hnyawa, haawe, itre thauzane lao macatre ne akötr la mele ne la atr. (Rom. 5:12) Kola mama koi së la itre ethane kowe la mele së hnene la aqane ië ewekë i Adamu. Celë hi ka xatua së troa ië ewekë hnyawa, me metrötrëne la itre ifego së. w17.01 2:6, 8

Qëmekene troa kapa la ketre hnëqa, loi e tro sa thith thatraqane lai, me waipengö së kö. Thupene lai, tro hë la atr ka atre la itre ifego i angeic axeciën ka hape, thatreine kö angeic troa eatrëne hnyawa la hnëqa ka hnyipixe celë. E ka atre së la itre ifego së, tro së lai a thipëne la hnëqa. Iehova a ajane tro sa “ce tro me Nyidrë cememine la thiina ne la atr ka atre la itre ifego i angeic.” (Mika 6:8) Matre, ame la easa kapa la ketre hnëqa, loi e tro sa mekune hnyawa la hnëqa cili, me sipo Iehova la ixatua ka ijij, tune la aqane kuca i Gideona. Loi e tro sa mekune ajuine la hnei Nyidrëti hna qaja koi së jëne la Tusi Hmitrötr, me organizasio i Nyidrë. Ketre, ka thiina ka menyik Iehova, nge aja i Nyidrë troa xatua së matre atreine së troa kuca la itre huliwa i Nyidrë, ngo tha hnene kö laka, qa ngöne la itre hne së hna sipu atrein. (Sal. 18:35) Ame la atr ka atre la itre ifego i angeic, tha angeice kö “a mekune atrunyi angeice kö hune la ka ijij troa mekun”. w17.01 3:17, 18

Atre hi Iesu ka hape, tro pë hë itre xan elanyi a sisedrëne la huliwa i nyidrë. Atre hi nyidrë ka hape, itre ka tha pexeje kö la itretre drei nyidrë. Ngo, hetre mejiune i nyidrë laka, tro angatr elanyi a akökötrene catrëne hmaca kö la huliwa ne cainöj hune la aqane kuca i nyidrë. (Ioane 14:12) Matre hnei nyidrëti hna inine me hnëkë angatre hnyawa, nge maca hnyawa ha angatr troa cainöj ngöne la nöjei götrane hnei angatr hna troa tro kow. (Kol. 1:23) Thupene hë la kola meci me amele Iesu hmaca, hnei Iehova hna hamë Iesu la itre xa huliwa hmaca kö nyine troa kuca, memine fe la mus “e koho palua hune la nöjei Joxu, me mus, me men, me ite tan.” (Efe. 1:19-21) Nge e meci pi së, nge ka nyipici së koi Iehova qëmekene tro Amagedo a traqa, tro hmaca kö së lai a mel elany, nge nyimutre la itre huliwa ka lolo hne së hna troa kuca ngöne la fen ka hnyipixe. Ngo ame enehila, hetrenyi së la ketre huliwa ka tru nyine tro sa kuca, ene la troa cainöjëne la maca ka loi me inine la itre atr matre tro angatr a hane nyihlue i Iehova. Haawe, thupëtresij ju hë së maine qatr, “catejë troa huliwa i Joxu pala hi.” w17.01 5:17, 18

Hnei Iesu hna “a ca” meci pi thatraqai së. Matre hna itö mele së hnei Iesu, nge celë hi thupene mel ka eje hë. (Heb. 9:24-26) Hnei Adamu hna xulu fë la mec, ngo tro la huuje i Iesu a xulu fë elanyi la mel ka tha ase palua kö. Thupene mel la ka ijij troa thepe së qa ngöne la fene i Satana, memine la xoue mec. (Heb. 2:14, 15) Eje hi laka, tro pala kö a eatr elanyi la itre hna thingehnaean hnei Akötresie. Tha ka saze kö la itre wathebo hna acil hnei Iehova ngöne la itre ewekë hnei Nyidrëti hna xup. Ketre tune mina fe, tha tro pi kö Iehova a saze. Tha tro pi kö Nyidrëti a ahleuhleunyi së. Tha mel hmekuje kö la hnei Iehova hna hamë së. Easë fe a kapa la ihnimi Nyidrë. “Hne shë hna ate me lapaune la ihnimi Akötesie koi shë. Akötesieti la ihnim.” (1 Ioane 4:16) Ka eatre pala hi la itre hnei Nyidrëti hna thingehnaean. Haawe, easenyi hë matre paradraiso pi la ihnadro. Tro ha nyitipu Iehova me ihnimikeu la nöjei xupuana i Nyidrë. Ame hë e cili, troa qaja hnene la itre hlue i Nyidrë asë, e hnengödrai me e celë fen ka hape: “Thatraqai Akötesi shë la qaja aloin, me lolo, me inamacan, me ole, me atrun, me men, me cat, epin’ epine palua. Amen.”—Hna ama. 7:12. w17.02 2:16, 17

Hnene la Ita Ne Thup ne 1 Semitrepa 1973 qene Wiwi hna amexeje la ketre mekune ka hape, “Ame la atr ka tha nue kö la sixa, ijiji angeice kö troa bapataiso?” Ame la mekune ka sa la hnyinge celë tre, hna nyi trepene hnene la itre trepene meköt, nge kola hape, ohea! Nyimutre la itre xötr hna amamane hnene la Ita Ne Thup, nge kola qaja la kepine matre, loi e troa upe trön eë la atr ka tha nue kö la sixa. (1 Kor. 5:7) Ej a qaja ka hape, ame la hna amekötine celë, tha qaathei atre kö, ngo “qaathei Akötresie ka qaja mekötine lai hnine la Wesi Ula i Nyidrë.” Önine la ketre itus ka hnyipixe, nge ka qeje hmi e Etazini ka hape: “Hnene la itre hene ne hmi hna majemine sazen ahnyipixen la aqane troa trotrohnine la itre ini hnei angatr hna hamën matre troa ihmeku memine la itre mekun, me hna lapaune kow hnene la itre atrene la hmi angatr, me itre atr asë. Angatr a ujë tune lai matre troa lapa catr la itre atr hnine la hmi.” Itretre Anyipici Iehova pe hi la hmi lai ka mejiune hnyawa kowe la Wesi Ula i Akötresie, ngacama jole ju hë kowe la itre atrene troa xötrethenge. w17.02 4:15

Tha ajane kö la itre qatre thup troa xome ceitu angatr me itre atr ka hlemu. Matre, isa pengöi angatre catr memine la itre hene ne hmi ka ala nyimu enehila, memine fe lo itre hene ne hmi ngöne lo ijine i Iesu. Öni nyidrë e qeje angatr ka hape: “Angatʼ a ajane la ite maca ne lapa ngöne la nöjei pui ne xen, me ite nyipi ita ne lapa hnine la nöjei sunago, me troa ihehe ngöne la nöjei hnaitö.” (Mat. 23:6, 7) Itre qatre thup a xötrethenge la hna qaja hnei Iesu, kola hape: “The tro kö a hë nyipunie, Rabi, ke casi hi la ate ini nyipunie, ene Keriso ; nge ite tejine asë nyipunie. Nge the tro kö a hëne la kete ate e celë fen, kaka ; ke casi hi la Tetetro i nyipunie e hnengödrai. Nge kete the tro kö a hë nyipunie, ite meken ; ke casi hi la mekene i nyipunie, ene Keriso. Ngo ame la ka tru e nyipunie, te, tro ha hlue i nyipunie.” (Mat. 23:8-11) E ka hni ka ipië la itre qatre thup ne la itre ekalesia ne la fen asë, nge itre ka xötrethenge fe la itre hna qaja hnei Iesu, eje hi lai laka, tro la itre trejin a hnimi angatr, me metrötrë angatr, me atrunyi angatr. w17.03 1:14, 15

Kola mama jëne la hna melëne hnene la angetre Isaraela ka hape, loi e tro sa huliwane la Wesi Ula i Akötresie matre troa axecië mekune hnyawa. Haawe, tha tro kö sa nue la ketre atr troa axecië mekun thatraqai së. Loi e tro pe sa isa thel troa atre la ka loi xajawa i Akötresie, me eatrëne lai. Nemene la aqane tro la itre atr a axecië mekune thatraqai së? Ame la ketre aqane tre, ene la troa huli së hnei angatr troa axecië mekune menu. (Ite edomë 1:10, 15) Ka hetre ethanyine lai koi së. Hnëqa së troa xötrethenge la mekuna ne la mekuthetheu së hna inin hnei Tusi Hmitrötr. E nue jë së la itre atr troa axecië mekun thatraqai së, easë hë e cili a xötrethenge angatr. Nge, eje hi laka, tro lai a tro xomi së kowe la akötr. Hnei Paulo ekö hna hmekëne la angetre Galatia, matre tha tro kö angatr a nue la itre xan troa axecië mekun thatraqai angatr. (Gal. 4:17) Hnene la itre xa trejin e cili hna thel troa axecië mekun thatraqai itre xan e hnine la ekalesia ke, aja i angatr troa xötrethenge angatr hnene la itre trejin, ngo tha itre aposetolo kö. w17.03 2:8-10

Hnei Iosea hna isine troa amadrinë Iehova. Maine ketre nekönatr eö, xötrethenge jë la tulu i Iosea, nge thele jë troa atre Iehova hnyawa. Kola mekune laka, jëne Manase joxu, qaaqaa i nyidrë ka ietra, nyidrëti a atre ka hape, hetre aja i Iehova troa senge la ngazo ne la atr. Tro fe eö lai a hane kapa la itre ithuemacanyi ka tune lai qaathene la itre trejin qatr e hnine la hnepe lapa i eö, me e hnine la ekalesia. Tro angatre lai a ce thawa me eö la itre ewekë ka lolo hnei Iehova hna kuca koi angatr. Ketre, pane mekune ju lo aqane ujë i Iosea la nyidrëti a atre la hna qaja hnene la Wesi Ula i Akötresie. Hetre aja i nyidrë troa amadrinë Iehova, nge canga saqe hi nyidrë amekötine la itre ewekë ngöne la nöj. Haawe, tro fe eö lai a hetre aja ka catr troa drengethenge Iehova e hnei eö hna e la Tusi Hmitrötr. E cili, tro hë a catrecatre la aqane imelekeu i eö me Iehova, nge tro fe hë a kökötr la madrine i eö. Nge, tro fe a hetre aja i eö troa qeje Iehova kowe la itre atr. (2 A. l. ite jo. 34:18, 19) Ame la eö a ini Tusi Hmitrötr, tro fe eö lai a öhne ka hape, hetre itre xa götrane ne la huliwa i Akötresie nyine tro eö a amacan. Maine eje hi, isine jë troa eatrëne lai, tune la hna kuca hnei Iosea. w17.03 3:18, 19