September

Ame la Tusi Hmitrötr a qeje xomihni, tre tha kolo hmekuje kö a hape, troa kapa la ketre jol ka traqa koi së. Kolo fe a qaja la aqane mekune së me aliene hni së qëmekene la itupath. Tro la xomihni a xatua së troa catr me mele nyipici me xomihni ahoean. Hna qaja hnene la ketre itus ka hape, ame la xomihni tre, ketre thiina ka lolo ka acatrene catrëne la mejiune së, me sewe së troa thixötr ngöne la kola traqa la itupath. Tro fe eje lai a xatua së troa cile catr ngacama tru catre ju hë la itre akötr. Ketre, ej a aijiji së troa traqa kowe la pune la itre itupathi cili, me goeëne catrëne la thupen hune la akötr. Ihnimi la ka upi së troa xomihni. (1 Kor. 13:4, 7) Ngöne nemene götran ne la mele së? Ihnimi së koi Iehova la ka upi së troa xomihnine la nöjei ewekë asë ka traqa koi së, nge hnei Nyidrëti hna nu. (Mat. 26:39) Ihnimi së fe kowe la itre trejin la ka upi së troa xomihnine la itre ngazo i angatr. (1 Pet. 4:8) Nge ihnimi së kowe la föe së la ka upi së troa xomihnine la “aköte,” ka eje fe thene la itre trefën ka mele madrin. Nge kolo fe a acatrene catrëne la mele ne trefën.—1 Kor. 7:28. w16.04 2:3, 4

Ngacama hna akötrë la itre keresiano hnene la musi Roma me itre tane i angetre Iudra, ngo tha hmaca pi kö angatre icasikeu. Nyipici laka, tha ka hmaloi kö, ngo hnei angatre pala hi hna isine troa traqa kowe la hna icasikeu. Enehila fe, tru la madrine ne la itre hlue i Iehova troa sine la itre icasikeu. Öni George Gangas, ketre atrene la Lapa Ne Xomi Meköt koi 22 lao macatre, ka hape: “Ame koi ni, ame la troa ce me itre trejin ngöne la hna icasikeu, tre, ketre madrine ka tru, pëkö madrine ka ceitu memin, nge ka aegöcatrenyi ni. Öni angeice hmaca jë: “Kola lapane la mekunang me hning la troa sine pala hi la itre icasikeu.” Hapeu epuni fe kö a hane mekune tui George? Maine eje hi, isine jë troa sine pala hi la itre icasikeu matre ce memine la itre trejin, ngacama tha ka hmaloi kö. Amamane jë koi Iehova ka hape, casi hi la mekuna i epuni me Davita Joxu, lo kola hape: “Iehova fe, hnenge hna ajane la hne ne la ēnē i cilie.”—Sal. 26:8. w16.04 3:16-18

Pane mekune jë: easë a atre laka, hne së hna akötrëne la ketre trejin hnene la aqane ithanata së maine aqane ujë së. Nemene la nyine tro sa kuca? Loi e tro sa tro meköt kowe lai trejin, me tro atre ka hape, iloi la hne së hna troa thel. Loi e tro sa qaja amamane la itre tria së ngo tha tro kö sa thele troa nyi zö angeic. Ame la ka sisitria koi së tre, ene la troa iloi memine la itre trejin. Hanawange la ewekë ka traqa koi Aberahama me Lota. Isa hetre iume öni nyidro matre, hnene la itretre thupë öni nyidro hna nyiqaane ihmönyinyi pi götran. Pine laka Aberahama a thele troa iloi, ame hnei angeic hna nue Lota troa iëne la götrane nöj ka lolo. (Gen. 13:1, 2, 5-9) Drei la ketre tulu ka lolo koi së! Hnei Aberahama kö hna hace fë lai? Pëkö! Thupene ju hi lai, hnei Iehova hna thingehnaeane koi angeic ka hape, tro hmaca kö Nyidrëti a hamën atrune koi angeic elany. (Gen. 13:14-17) Nemene la ini koi së? E troa luzi la itre ewekë së, tro kö Iehova a amanathithi së e tro sa thele troa sei jol cememine la ihnim. w16.05 1:11, 12

Ame e hnine la Tusi Hmitrötr, hetre itre hna amekötin hnei Iehova hna hamëne koi së. Hnei Nyidrë hna wathebo së troa thili kowe la itre idrola, me atrekënö, me iji menu la ka haitr, me kuci ngazo. (1 Kor. 6:9, 10) Ketre, hnei Iesu, nekö i Akötresie, hna ahnithe la ketre huliwa kowe la itretre drei nyidrë. Öni nyidrë: “Trojë nyipunie a inine la nöjei nöj’ asëjëihë, me bapataiso angate kowe la atresiwa i Tetetro, me Hupuna, me [u]ati [h]mitöt; ini angate jë troa trongëne la nöjei ewekë asëjëihë lo hnenge hna ahnithe koi nyipunie ; nge hana wang ini a ce me nyipunie ngöne la nöjei drai asëjëihë uti hë la pune la fene hnengödrai.” (Mat. 28:19, 20) Ame asë hi la itre ewekë hnei Iehova me Iesu hna amekötine koi së, tre, nyine loi koi së. Itre hna amekötine lai ka xatua së troa thupëne la mele së, memine la mele ne la hnepe lapa së. Kolo fe a xatua së troa lolo la ngönetrei së me mele madrin. Nge ame la ka tru koi së, tre ene la troa amadrinë Iehova, nge ketre Nyidrëti fe a amanathithi së. w16.05 3:1

Aqane tro hi së lai a atre la hna ajane hnei Nyidrë, me aqane waiewekë i Nyidrë. Tro hë së lai a amadrinë Nyidrë jëne la itre mekuna së, me itre ithanata së, me itre thiina së. (Luka 11:13; Gal. 5:22, 23) Ngo eje hi laka, tro pala kö së lai a isine troa lepe trije la itre aja së ka ngazo. (Ite edomë 4:23) Nyipici laka, tro lai a qea la ijine matre saze pi së. Nge maine öhne hi së laka, hetre itre xa ewekë pala kö nyine troa saze, the kucakuca pi kö së! Catre pi pe së trongëne hnyawa la hna qaja hnei Tusi Hmitrötr. Tro hë së e cili a trotrohnine la aqane waiewekë i Iehova, me kuca hnyawa la aja i Nyidrë.—Sal. 37:31; Ite edomë 23:12; Gal. 5:16, 17. w16.05 4:14, 16

Ame enehila, Iehova a xome ameköti së jëne la Tusi Hmitrötr, me uati hmitrötr me ekalesia. Ngo nemene la aqane tro sa nue la Tusi Hmitrötr troa xome ameköti së? Loi e tro sa e, me lapa mekun ej, me sipo ixatua koi Iehova matre troa trongëne la itre hne së hna e. Öni Davita joxu: “E meku cilieti ni hune la göhneng, tro ni a hni cilie ngöne la ite ijine troa hmek.” (Sal. 63:6) Öni Davita hmaca jë: “Tro ni a atrunyi Iehova la ate eamo ni; nge hna haji ni hnene la hning’ e ite jid.” (Sal. 16:7) Hnei Davita hna lapa mekune la itre ihaji Iehova, ketre, hnei angeice hna nue itre ej troa xome amekötine la itre mekuna ne la hni angeic, ngacama hace pi hë koi angeic. (2 Sam. 12:1-13) Ketre tulu ne ipië me idrengethenge la hnei Davita hna amamane koi së. Matre, loi e tro sa isa wai pengö së me hape: ‘Ame la eni a e Tusi Hmitrötr, eni kö a lapa mekune ej me nue la itre ini cili troa xome amekötine la itre mekuna ne la hning? Nge nemene fe la itre xa ewekë nyine tro ni a kuca?’—Sal. 1:3. w16.06 1:11

Itre atr ka tha pexeje kö së nge itre ka tria. Matre tha tro pi kö sa mekune ka hape, tro pala hi a lolo la itre ithanata me aqane ujë ne la itre trejine koi së. Ketre, tha nyine loi kö koi së troa lapa mekune la itre tria i angatr. E hne së hna ujë tune lai, tro ha patre the së la madrin ngöne la easë a nyihlue i Iehova. Goi tro fe a nanazije la lapaune së, nge tro fe hë së a trotrije la organizasio i Iehova. Ame hë la pune lai, tha itre hlue i Iehova hmaca kö së nge tha ijiji së hë elanyi troa hane mele ngöne la fene ka hnyipixe. Nemene la ka troa xatua së troa hetrenyi pala hi la madrine troa nyihlue i Iehova, ngacama kola nango ajolë së hnene la hna kuca hnei itre xan? Loi e tro pala hi sa lapa mekune la hna thingehnaeane celë, kola hape: “Hana wang, ini a xupe la hnengödrai ka hnyipixe me fene hnengödrai ka hnyipixe ; nge tha tro hmaca kö a mekune la hnapan, me xulu e kuhu hni at.” (Is. 65:17; 2 Pet. 3:13) Tro kö Iehova a amanathithi së tune lai, e hne së hna mele nyipici koi Nyidrë. w16.06 4:13, 14

Ame la hna ithanata “ka cas” ngöne la hnaewekë “Iehova ka cas,” tre kola hape, tha tro pi kö a saze la aja i Nyidrë, nge tro kö Nyidrëti lai a aeatrën. Nge ame Iehova, tha ka saze mekune kö! Ka nyipici Nyidrë, nge tha saze kö la aja i Nyidrë. Ame ekö, hnei Iehova hna thingehnaeane koi Aberahama ka hape, tro la itre matra i angeic a mel ngöne la ketre nöj ka mingöming. Matre, hnei Nyidrëti pë hë hna kuca la itre iamamanyikeu ka tru göi troa eatrëne lo hnei Nyidrëti hna thingehnaean. Thupene la 430 lao macatre, tha saze pi kö lo aja i Nyidrë troa lö sai angetre Isaraela kowe la Nöje Hna Thingehnaean. (Gen. 12:1, 2, 7; Eso. 12:40, 41) Itre hadredre lao macatre thupen, hnei Iehova hna hëne la itre hlue i Nyidrë ka hape, itretre anyipicin. Nge öni Nyidrëti koi angatr: “Ini hi; pëkö haze hnapane nge pinge pe, nge kete pëkö e thupeng.” Iehova hi lai a qaja axeciëne koi angatr ka hape, tha saze kö la aja i Nyidrë. Ame hnei Nyidrëti hna anyipicine me hape: “Eje hi ini hi.” (Is. 43:10, 13; 44:6; 48:12) Drei la ketre manathithi ka tru kowe la angetre Isaraela ekö me koi së mina fe, troa nyihluene la Akötresie ka nyipici, nge ka ca mekun!—Mal. 3:6; Iako. 1:17. w16.06 3:6, 7

Nyimutre la itre musi enehila ka acile la itre ka thup, me itre jia ne thup ka hnyipixe ngöne la itre ifego ne la nöje i angatr. Qa ne la itre musi troa hmekëne la nöjei atr me ewekë ka troa hetre ethanyine kowe la nöj. Ngo thatre kö angatr ka hape, hetre ketre musi ka catre kö, e koho hnengödrai nge hna cilëne hnei Iesu Keriso. Easenyi catre hë matre, lepe apatrene asë jë la nöjei musi e cailo fen hnene la musi nyidrë. (Is. 9:6, 7; 56:10; Dan. 2:44) Easa trengeneune la ijine cili, me thele troa hnëkë së kö thatraqane lai. Celë hi matre, loi e tro sa nyipiewekëne la itre hna perofetan hnei Tusi Hmitrötr, me catre nyihlue nyipici koi Iehova. (Sal. 130:6) Easë a melëne la itre drai ne la pun. Easë pala hi a easenyi trootro kowe la pun, nge kolo pala hi a jole catre koi së troa lapa hmek. Tha fene hleuhleu kö koi së elanyi e tha hmeke hë së! w16.07 2:2, 9, 10

Paulo ekö la ketre atr ka axösisine la itre keresiano, matre ame koi angeic, tha ijije kö troa hane kepe angeic hnei Akötresie. Ame ngöne la pune la mele i Paulo, öni angeic koi Timoteo: “Ini a ole koi Keriso Iesu Joxu shë, ate amenë ni, ke hnei nyidëti hna mekune laka ka nyipici ni mate hamë ni la huliwa.” (1 Tim. 1:12-14) Nemene la huliwa hna qaja e celë? Öni Paulo kowe la itre qatre thup ne la ekalesia ne Efeso ka hape: “Tha ini kö a nyipi ewekëne la melenge mate nyipi koi ni, mate tro ni a umuthe la hna isasaqeng memine la qânge hnenge hna kapa qa thei Joxu Iesu, troa anyipicine la maca ka loi ne la ihnimi gufa i Akötesie.” (Ite hu. 20:24) Hnei Paulo hna catre cainöj me hamë tulu kowe la itre keresiano enehila. Matre hnei angeic hna amamane ka hape, “tha gufa kö” la ihnimi gufa i Akötresie koi angeic. w16.07 4:1-3

Maine jë, ekö hë epuni treqene matre hamë huliwa i epuni jë ngöne la ekalesia, maine pena tha ijiji epuni kö ke, hetre ewekë ka xome acone la mele i epun. Ngacama Iehova pala kö a nue lai, ngo tro kö Nyidrëti a xatua epuni troa xomihnin. Hetre ini hna hamë së hnei Aberahama. Hnei Iehova hna thingehnaeane koi angeic ka hape, tro angeic a hetre nekönatr trahmany. Ngo eje hi laka, hnei angeic hna pane itreqe koi nyimu macatre qëmekene troa hnaho Isaaka. Ame ngöne la itre macatre cili, hnei Aberahama hna itreqe hnyawa, me catre lapaune koi Iehova. (Gen. 15:3, 4; 21:5; Heb. 6:12-15) Nyipici laka, tha ka hmaloi kö troa itreqe. (Ite edomë 13:12) Nge maine tro pala hi sa lapa mekune la itre jole së me wangatrune catrëne la itre aliene hni së, tro hë së lai a kucakuca. Loi e tro pe sa xome la ijine cili, matre troa melëne la itre thiina i Akötresie, ke itre thiina lai ka nyipi ewekë göi troa thupëne la ekalesia. Tro sa atreine traqa kow, e hne së hna e la Tusi Hmitrötr o drai me lapa mekun ej. Loi e tro fe sa thele troa inamacan, me pane mekune hnyawa qëmekene troa axecië mekun. Nge tro lai a xatua së troa axecië mekune hnyawa göi troa amadrinë Nyidrë. Tro hë sa atre la aqane troa ujë koi ketre, memine la aqane tro sa huliwane la mani, me aqane troa iëne la itre nyine iamadrinë me nyine heetrën. w16.08 3:9-11

Hnei Iehova ekö hna xatuane la nöje i Nyidrë troa ngaane la angetre Amaleka me angetre Aithiope. Ketre, hnei Nyidrëti hna xatua Nehemia me itre sine huliwa i angeic troa acile hmaca la ngönehag ne Ierusalema. Nge, tro pala kö Iehova a acatrene la itre ime së matre tro sa eatrëne la huliwa ne cainöj, ngacama traqa ju hë koi së la xou, maine icilekeu pena, maine kola methinë së. (1 Pet. 5:10) Eje hi laka, tha tro jë pi kö Nyidrëti a aca tro apatrene la itre jole së. Ngo hetre ewekë nyine tro pe sa kuca! Loi e tro sa e la Tusi Hmitrötr o drai, me hnëkëne me sine la nöjei icasikeu, me catre ini Tusi cas me kuca la hmi hnepe lapa, me catre thith. Catre jë së kötren la itre ewekë ka troa sewe së troa eatrëne la itre huliwa celë. Maine epuni a öhne laka, hetre itre hnepe götrane nyine tro pala kö epuni a huliwan, canga sipo ixatua jë thei Iehova. Nge e cili, tro Nyidrëti a hamëne koi epuni la uati hmitrötre i Nyidrë nge tro ej a “huliwane la ite hni nyipunie mate ajane me kuca la aja i nyidëti.” w16.09 1:12

Nyipici laka, hnei Paulo hna qaja la eloine la troa lapa cas, ngo öni angeice fe: “Loi la ite trahmanyi troa isa ca fö’ i angat, nge kete loi la ite föe isa ca fö’ i angat, wanga kuci ngazo.” Nge öni angeice hmaca jë: “E tha ’teine kö angate xomi hni, ange faipoipojë ; loi e troa faipoipo hune la hededei.” Eje hi laka, e traqa jë angeice faipoipo, tro lai a xatua angeic matre tha tro kö angeic a kei kowe la itre huliwa ka sis, tune la troa elone la götrane ga hmitrötr i angeic maine kuci ngazo pena. Ngo loi e tro la itre nekö trahmanyi me jajinyi ka pi faipoipo a pane treqene matre ijiji angatre jë. Öni Paulo: “Maine hace koi angeic troa lapa fë aqeane la nyipi jajinyi angeic, nge ase hë angeice shashaithe la ijine eng, nge ijije troa faipoipo, loi e tro angeic a kuca la aja i angeice kö ; tha ngazo kö angeic ; loi e troa faipoipo.” (1 Kor. 7:9, 36, MN; 1 Tim. 4:1-3) Haawe, tha loi kö tro la ketre trejin a faipoipo ke angeic a traqa kowe la ijine “eng,” kola qaja la ijine kola thithë la itre aja ne la ngönetrei. Ame ngöne la ijine cili, tha ijiji angeice pala kö troa xome la itre hnëqa ne faipoipo. w16.08 1:17

Ame la aqane heetre së, tre kolo hi lai a qejeqeje së, matre canga tro hi a mama kowe la itre atr la pengö së. (1 Sam. 16:7) Haawe, pine laka Itretre Anyipici Iehova së, tha tro pi kö sa iëne hi la itre iheetr hne së hna ajan. Easë pe a trongëne la itre trepene meköt ka troa xatua së troa neëne la itre iheetr ka fedr koi ngönetrei, me ka lailai. Kolo hi lai a hape, loi e tro sa thipetrije la itre iheetr ka amamai ngönetrei. Tha loi kö e tro sa athixötrëne la ketre atr, maine upi angeic pena troa thele hna goe pine la aqane heetre së. E tro sa heetrëne la itre iheetr ka porop, nge ka amamane la thiina ka ipië, tro hë la itre atr lai a metrötrë së, me hane pi atre la Akötresie hne së hna nyihluen, me organizasio i Nyidrë, memine la maca ne iamele hne së hna tro fë. w16.09 3:5, 6

Pane thele jë troa atre la hna mejiune kow hnene la atr. The thëthëhmine kö laka, ame la itre xa ka mejiune kowe la évolution, tre angatre fe a mejiune laka, hetre Akötresie. Angatr a mekune laka, hnei Akötresie hna xupe la nöjei pengöne öni, me atr, me feja jëne la évolution. Nge itre xane pena a mejiune kowe la ini cili, ke hna inin ngöne la uma ne ini. Nge ame itre xan, tha mejiune hë angatr koi Akötresie, ke xele hë angatr ma wange la itre hmi. Celë hi matre, loi e tro eö a pane hnyingëne kowe lai atr la itre hnei angeic hna mejiune kow, memine la kepin matre mekune jë angeice tune lai. Thupene lai, drei angeice hnyawa jë. Maine tro eö a ujë tune lai, tro hë angeice lai a hmala troa drei eö. Maine tro la ketre atr a jele hmo eö pine eö mejiune laka, hetre atre xup, tre, tro eö a sa tune kaa? Qaja jë ka hape: “Maine troa cile hut la pane ewekë ka mele ekö, nga loi e tro ej a ketre sipu kuca la ka tui angeice kö.” Nge önine la ketre porofesör ne chimie ka hape: “Easë a haine la aqane kucane la itre ewekë ka mel asë, nge uti fe hë la neköi ka coco catr.” w16.09 4:12, 13

Thatreine kö së qaja ka hape, Paulo a meku Nabotha me Zakaria, hna tran ameci nyidro pine nyidroti nyipici pala hi koi Akötresie. (1 Ite jo. 21:3, 15; 2 A. l. ite jo. 24:20, 21) Ame Daniela, hna kuië angeic nyipine la itre liona ka mecijin, nge hna kuiëne la itre sinee i angeic ngöne la hna dreufao hna acatrehnine catrën. Ame koi angatr, ketre ka loi kö la tro angatr a mec hune la troa nuetriji Iehova. Tha luelue kö angatr laka, tro kö Iehova a nue koi angatr la uati hmitrötre i Nyidrë matre tro angatr a cile hut ngöne la itre iakötrë celë (Dan. 3:16-18, 20, 28; 6:13, 16, 21-23; Heb. 11:33, 34) Ala nyimu la itre perofeta ekö tui Mika me Ieremia hna hnyima fë maine hna akalabusin. Ame itre xan, tui Elia, hnei angatre hna trongëne “la ite hnapapa, me ite wet, me ite ngönemeny, me ite hnauji ne la fene hnengödrai.” Hnei angatr asë hi hna cile catr ngöne la itre itupath me mele nyipici koi Iehova ke, angatr a “lapa qale kowe la nöjei ewekë hna mejiune kow.”—Heb. 11:1, 36-38; 1 Ite jo. 18:13; 22:24-27; Iere. 20:1, 2; 28:10, 11; 32:2. w16.10 3:10, 11

Easë a thiina ka loi kowe la itre trenyiwa ngöne la easa kepe angatre hnyawa ngöne la Uma ne Baselaia. Ame itre xa ijin, pëkö mejene la itre ka nyipi traqa ngöne la nöj, nge angatre kö a ketre lapa cas. Hnene laka, hetre ketre qene nöje i angatr kö me aqane mele i angatr, tro angatr lai a mekune ka hape, ka sisitria kö la itre atr ne la nöj hui angatr. Matre nyipi ewekë tro sa pane kepe angatr hnyawa, me thiina ka loi koi angatr, me wange atrunyi angatr. Maine hetrenyi la JW Language app ngöne la qene lapa i epun, thele jë la aqane troa ibozu ngöne la qene lapa i angatr. (Fil. 2:4) Eje hi laka, tha ka hmaloi kö troa ithanata kowe la atr ne la ketre nöj. Ngo, loi e tro epuni a pane qejepengöi epuni kö koi angeic. Tro hë epuni lai a öhne laka, nyimu ewekë ka mama thei epuni nge ka eje fe thei angeic. The thëthëhmine kö laka, isa hetrenyi asë hi ngöne la itre nöj la itre götrane ka loi me ka ngazo. w16.10 1:13, 14

Tusi Hmitrötr a amamane koi së la nyine tro sa isa kuca matre tha tro kö a hetre iangazo ngöne la ekalesia. Hanawang la ewekë ka traqa e Korinito. Hnime catre Paulo la itre trejin e cili ke, ala nyimu thei angatr la itre hnei angeic hna xatuane troa atre Iehova. (1 Kor. 1:1, 2) Matre pane mekune ju la aqane ujë i angeic la kola atre ka hape, hetre ketre e angatr ka kuci ngazo, nge hna nue angeic hnene la itre trejin troa lapa catr ngöne la ekalesia! Öni Paulo kowe la itre qatre thup: “Nue angeice pi hnei nyipunie koi Satana.” Haawe, nyipi ewekë tro angatr a xome triji la atre cili qa hnine la ekalesia, ene la troa upe trön eë angeic. (1 Kor. 5:5-7, 12) Ame enehila, itre qatre thup fe a upe trön eë la atr ka kuca la ngazo, nge tha ka ietra kö. Ame e cili, easë kö a ujë kowe la atr tune la aqane amekötine koi së hnei Tusi Hmitrötr? Maine eje hi, easë hi lai a thele matre tro pala hi a pë ethan la ekalesia. Ketre, easë fe lai a xatua angeic troa trotrohnine ka hape, nyipi ewekë tro angeic a ietra, me sipo Iehova troa nue la ngazo i angeic. w16.11 2:14

Pane mekune ju la ixatua ka tru hne së hna troa hamëne e hne së hna hamë ithuecatr. Öni Ruben: “Nyimutre la itre macatre hnenge hna isi memine la itre mekun ka iajolë, ke, ame koi ni, pëkö ca eloing. Ngo ame la ketre ijin, hnenge hna ce cainöje memine la ketre qatr thup, nge nyidrëti a öhne laka, tha loi kö ni la drai cili. Hnei nyidrëti hna drei ni hnyawa la eni a fe amamane la aliene hning. Nyidrëti a amexeje jë koi ni la itre loi hnenge hna kuca. Hnei nyidrëti fe hna amexeje koi ni la itre ithanata i Iesu, lo kola hape, ka sisitria catre kö së isa ala cas, hune la itre neköi waco ka coco catr. Eni pala hi a mekune la xötre cili ke, ka ketr pala hi la hning. Eje hi laka, hetre thangane ka loi hne së hna kapa ngöne la mele së qa ngöne la itre hna qaja hnene la itre qatre thup.” (Mat. 10:31) Öni Tusi Hmitrötr, loi e tro pala hi sa ithuecatrekeu. Öni Paulo kowe la itre trejin ne Heberu: “ [Ithuecatrekeu ju] nyipunie o drai.” Paulo a qaja la kepine lai, me hape: “Wanga axetin’ ite xan’ e nyipunie hnene la tenge iaö ne la ngazo.” (Heb. 3:13) Pane mekune ju la madrine i epun la kola kapa la ketre ithuecatre qaathei ketre! w16.11 1:2, 3

Ame lo macatre 313 thupei Keriso, hnei Constantin joxu i angetre Roma hna kapa la “hmi keresiano” matre ketre hmi ne la nöj. Kola mama lai ngöne la ketre icasikeu ka tru hna kuca hnei Constantin memine la itre hene ne hmi (Concile de Nicée). Thupene la icasikeu cili, hnei Constantin hna helë Arius, ketre atre huuj qa ngöne la nöje ke, xele kö angeic ma kapa la mekune ka hape, Iesu hi la Akötresie. Ame hë e thupen, joxu pena pi hi Théodose, nge ame e cili, hmi katolik la hmi hna kapa hnei angetre Roma. Önine la itre historiens, ame lo angetre ethen, ene la angetre Roma tre, itre “Keresiano” pena ha angatr ngöne la ijine Théodose joxu. Ngo, ame ngöne la ijine cili, hnene la itre keresiano ka thoi hna kapa la itre ini i angetre ethen, matre itre ka sine hë angatr la Babulona Atraqatr. Ngo ame pe, hetrenyi pala hi la itre keresiano hna iën. Hnei Iesu hna aceitunë angatr me qitr. Angatr a isin troa kuca la huliwa i Akötresie.—Mat. 13:24, 25, 37-39. w16.11 4:8, 9

Satana enehila “a tro agö, kösë liona a ho, kola thele tha i nyën.” (1 Pet. 5:8; Hna ama. 12:17) Matre hleuhleue catre la mel, nge hna traqa fe hi lai kowe la itre hlue i Iehova. Hna hane traqa la itre ijine cili kowe la itre hlue i Nyidrë ekö. Öni Tusi Hmitrötr, tha lapa hnyawa kö la hni Davita Joxu. (Sal. 13:2) Ketre, hnei Paulo hna “polepolëne [maine, hnehengazone] göi ite ekalesia asë.” (2 Kor. 11:28) Ngo, nemene la nyine tro sa kuca e traqa ju së hnehengazo? Hnei Iehova ekö hna axapone la hni ne la itre hlue i Nyidrë, nge aja i Nyidrëti fe troa ujë tune koi së enehila. Matre loi e troa thith, e me mekune ajuine la Wesi Ula i Akötresie, me nue la uati hmitrötre i Iehova troa xatua së, me ce ithanatane la aliene la hni së memine la ketre atr hne së hna mejiune kow. w16.12 3:1, 2

Ame ngöne lo hneijine la itre pane keresiano, hetrenyi ekö e Korinito la itre ka atrekënö, me itre ka qene sodroma (trahmanyi ka ce meköl me trahmanyi, maine föe ka ce meköl me föe), me itre ka nyi xetë, me itre ka thili koi idrola, me itre ka hmo hnei ka haitr. Ngo, ame hë la angatre a atre Iehova, me hnimi Nyidrë, ujë pi hi angatr. Hmahma ha angatr pine la hnei angatr hna majemine kuca ekö. (Rom. 6:21; 1 Kor. 6:9-11) Nyipi ewekë fe tro la itre keresiano ne Roma a amekötine la mele i angatr. Öni Paulo koi angatr: “The nuejë kö la ite hnepe ngönetei nyipunie kowe la ngazo nyine ite jia ne la thina ka tha meköti kö ; ngo nue nyipunieti pi koi Akötesie, tui ange ka mele hmaca qa hna mec, nge ite hnepe ngönetei nyipunie nyine ite jia ne la thina ka meköti koi Akötesie.” (Rom. 6:13) Ame koi Paulo, ijiji angeic troa kuca la meköt, me kepe thangane pala hi la ihnimi gufa i Akötresie. w16.12 1:13

Hnei Iehova hna xup la atr memine la itre hna atreine kuca. Hnei Nyidrëti hna aijijë së troa hetre wangatrehmekun, thiina lai ka troa xatua së troa nyinyin la itre jol, nge ka hnëkë së kowe la itre drai elany. (Ite edomë 2:11) Hne së hna kapa qaathei Nyidrë la trenge catr, matre tro sa eatrën la itre hne së hna mekun. (Fil. 2:13) Ketre, hnei Nyidrëti hna hamë së la mekuthetheu, ene la atreine ka eje the së troa atrehmekun la loi me ngazo. Mekuthetheue së la ka sewe së troa kuca la ngazo, me ameköti së qa ngöne la itre tria së. (Rom. 2:15) Ame ngöne la itre hna cinyihane qene Heberu kola hape: “Ame la ite mekune ne la ate cate huliwa, te, kola atena mon ; nge ite mekune ne la ate sasaqe kola apë ewekën,” nge “ame la hna öhne hnei lue iwanakoime i ’ö troa kuca, te, kucajë eö hnene la egöcate i ’ö.” (Ite edomë 21:5; Ate cai. 9:10) Nge, ame ngöne la itre hna cinyihane qene Heleni kola hape: “Tro sha kuca la loi kowe la nöjei ate asëjëihë e hete ijine shë,” nge “loi e tro nöjei ate a inyihluekeu thenge la hna kapa la ahnahna hnei angeic.” (Gal. 6:10; 1 Pet. 4:10) Eje hi laka, aja i Iehova tro sa catre huliwa matre tro kö sa isa kepe thangane la hne së hna huliwane hnyawane la itre ahnahna cili, ngo troa kepe thangane fe hnene la itre xa atr. w17.01 1:1, 2

Ngazo me mec la edrö së asë qaathei Adamu me Eva. Ngo, hna aijijë së pala hi troa huliwane la ahnahna, ene la troa isa ië ewekë. Kola mama lai jëne la aqane ujë i Akötresie kowe la nöje i Isaraela. Hnei Iehova hna aijijë angatr troa iën, ene la troa nöje ‘atu ka co’ i Nyidrë. (Eso. 19:3-6) Matre hnene la angetre Isaraela hna iëne troa nöje i Akötresie, me kapa la itre ifego hna amë hnei Nyidrë. Öni angatr: “Tro nyihunie a kuca la nöjei ewekë asë hnei Iehova hna ulatin.” (Eso. 19:8) Ngazo pe, hnei angatr hna thë la isisinyikeu i angatr me Iehova. Haawe, ketre ini lai nyine tro sa xom qa ngön. Loi e tro pala hi sa nyipiewekëne la ahnahna, ene la troa isa ië ewekë, me qale catre pala hi koi Iehova, me trongëne la itre wathebo Nyidrë. w17.01 2:9

Hnei Ieroboama joxu ne Isaraela hna trai ita ne huj e Bethela nyine hmi wanaithihlë. Iehova a upe jë la ketre perofeta i Nyidrë ne Iudra troa tro fë la ketre maca nyine ameköti Ieroboama. Ame hnene la perofeta hna drengethenge Iehova me tro fë lai maca. Elë catre jë hi la hni ne la joxu la kola dreng lai maca, ngo hnei Iehova hna thupëne la mele ne la perofeta i Nyidrë. (1 Ite jo. 13:1-10) Hnei Iehova hna wathebone kowe la perofeta troa xen me ij e Isaraela, nge troa bëeke hmaca thenge lo gojenyi hnei angeic hna xom. Ngo hnei angeic hna öhne la ketre perofeta, ka qatre hë, nge hnene la qatre hna thoi koi angeic ka hape, hnei Iehova hna ahnith la ketre maca koi nyidrëti fe. Ame hnene la perofeta hna xötrethenge la qatr, me ce xen me ce ij thei nyidrë. Hnei angeic e cili hna ena la wathebo i Iehova, matre tha madrine kö Nyidrë. Ame lo kola bëeke hmaca hnene la perofeta, fetra pi hi la ketre liona me humuthi angeic. (1 Ite jo. 13:11-24) Tha hna qaja kö la kepine matre xötrethengene jë la qatr hnene la perofeta i Iehova. Ngo eje hi laka, tha hnei angeice kö hna “ce tro me Akötresie cememine la thiina ne la atr ka atre la itre ifego i angeic.” w17.01 4:1-3

Ka tru aliene catr la itre pane hnaewekë ne la Tusi Hmitrötr, nge tha ka jole kö troa trotrohnin, kola hape: “Hnei Akötesieti hna xupe la hnengödrai memine la fene hnengödrai ngöne la qan.” (Gen. 1:1) Neköi wamine ka co hi la hne së hna öhne qa ngöne la nöjei ewekë hna xup hnei Akötresie. Nge, hnepe ka co hi la hne së hna trotrohnine göne la hnengödrai, memine la lai, memine lo hna hape, gravité. (Ate cai. 3:11) Ngo, hnei Iehova hna qaja amamane koi së la aja i Nyidrë kowe la ihnadro, memine fe la atr. Hnei Nyidrëti hna xup la atr hnaiji Nyidrë, nge aja i Nyidrë tro angeic a mele madrin e celë fen. (Gen. 1:26) Nge, tro sa nyi nekö i Nyidrë, nge tro Nyidrëti a nyi Keme së. Easa öhne ngöne la hnaakönine mekene ne la tusi Genese laka, hna ajolëne la aja i Akötresie kowe la fen. (Gen. 3:1-7) Ngo ame pe, pëkö ca jol hnei Iehova hna thatreine nyinyin. Nge, pëkö ka atreine troa sewe Nyidrëti troa eatrëne la mekuna i Nyidrë. (Is. 46:10; 55:11) Tha luelue kö së laka, tro kö la aja i Iehova a eatr ngöne la nyipi ijin! w17.02 1:1, 2

Mama kö kowe la itre atr ka hape, thei Mose la uati hmitrötre i Akötresie? Eje hi. Hnene la uati hmitrötre i Iehova hna aijijë Mose troa kuca la itre iamamanyikeu, me mama fë la ëje i Akötresie koi Farao, joxu ka catre i angetre Aigupito. (Eso. 7:1-3) Hnene fe la uati hmitrötr hna aijijë Mose troa ketre mekene nöj ka ihnim me ka xomihni. Mama hnyawa hi laka, Iehova la ka ië Mose troa elemekene la nöje i Nyidrë. Drei la itre xa atr hnei Iehova hna nue kow la uati Nyidrëti matre troa elemekene la nöje i Nyidrë? Öni Tusi Hmitrötr: “Tiqa ha Iosua nekö i Nuna hnene la u ka inamacan.” (Deu. 34:9) “Hna hetë Gideona hnene la [u]ati Iehova.” (A. ame. 6:34) Nge, “hna traqa hui Davita la [u]ati Iehova.” (1 Sam. 16:13) Ame asë hi la itre atr celë, hnei angatr hna qale catre kowe la uati Akötresie matre tro angatr a atreine kuca la itre ewekë hna thatreine kuca hnene la sipu trenge catre i angatr.—Ios. 11:16, 17; A. ame. 7:7, 22; 1 Sam. 17:37, 50. w17.02 3:3-5

Hetre ini nyine tro së asë hi a xom qa ngöne la tulu i Paulo. Atre hnyawa hi angeic ka hape, meköt e tro la itre trejin a isa axecië mekun, nge angeic a nyipiewekëne la götrane cili. Ame enehila, itre qatre thup a xötrethenge la tulu i Paulo la angatr a hamë eamo göne la ketre jol hna cile kow hnene la trejin, ngo qanyi angeice kö ketre axecië mekun. Hetre madrine i angatr troa ce thawa la itre ithuemacanyi qa hnine la Wesi Ula i Akötresie memine la itre trejin. Ngo ame pe, angatr a thupëne ke, loi e tro la itre trejin a isa sipu axecië mekun. Ketre, tro pë hë la itre trejine cili a mele fë la itre thangane lai. Hanawang la ketre ini ka nyipiewekë catr: Tro së lai a xatuane la itre trejin troa trotrohnine la eamo ne la Tusi Hmitrötr ka ihmeku memine la jol ka traqa koi angatr. Ngo, qa ne kö la itre trejin troa isa axecië mekun, nge meköti lai koi angatr. E ka loi la itre mekune hnei angatr hna sipu axeciëne thatraqai angatre kö, tro lai a hetre eloine koi angatr. Haawe, tha tro pi kö sa mekun ka hape, qanyi së troa amekötine la nyine tro la itre trejin a kuca. w17.03 2:11

Kola mama la etrune la lapaune ne la itre atrene la Lapa Ne Xomi Meköt ngöne la angatr a catre cainöj, me thel matre troa haöthe la fen hnene la maca ka loi. Easë kö a sajuë angatr ngöne la huliwa ka tru cili? Maine celë hi lai hne së hna kuca, tro së elanyi lai a madrin la easa drei Iesu e qaja koi së ka hape: “Ame hi lo kuca hnei nyipunie kowe la kete e angate la ka co cate ka lue tejine me ini, te, nyipunieti hi a kuca koi ni.” (Mat. 25:34-40) Ame la Iesu a bëeke hmaca hnengödrai eë, hnei nyidëti hna nue pe la itretre drei nyidrë. (Mat. 28:20) Xecie hnyawa koi nyidrë ka hape, hnene la uati hmitrötr, me itre angela, memine la Wesi Ula i Akötresie hna xatua nyidrë troa elemekene la huliwa i Akötresie ngöne lo nyidrë e celë fen. Nyidrëti mina fe a hamëne la itre ixatua celë enehila kowe la hlue ka nyipici. Lapa Ne Xomi Meköt pala hi a “xöte thenge la Arenio,” ene Iesu, ‘kowe la hnei nyidrëti hna tro kow.’ (Hna ama. 14:4) Matre, e tro sa xötrethenge la itre hna amekötine hnene la lapa ne xomi meköt, easë hi lai a xötrethenge Iesu, mekene së. Easenyi hë matre tro xomi së jë hnei nyidrë kowe la mele ka tha ase palua kö. (Hna ama. 7:14-17) Nge, pëkö ketre atr ka musi ka atreine troa axeciëne lai koi së! w17.02 4:17-19

Ame ngöne la nöjei ewekë ka traqa koi së, tha tro kö së a qale kowe la sipu mekuna së, ngo koi Iehova pe. Loi e tro sa sipo ixatua koi Nyidrë ngöne la itre jol hne së hna cile kow, ka tru ju hë maine ka co. Pane mekune ju: Hne së kö, e itre xa ijin, hna qale kowe la sipu inamacane së, ngöne la easa thel troa nyinyine la ketre jol ka traqa koi së? Maine pena, hne së hna majemine pane wang la hna qaja hnei Tusi Hmitrötr, nge thupene lai, easa xome la itre thuemacane cili troa nyinyine lai jol. Hanawange la ketre ceitun: Jole pi hë kowe la hnepe lapa i epun troa sine la ketre icasikeu, maine ketre asabele. Tro kö epun e cili a sipo Iehova matre tro epuni a atre la nyine troa kuca ngöne lai jole cili? Ame la ketre, qea ha la hnei epuni hna pë huliwa, nge öhne ju hi epuni la ketre atr ka ajane troa huliwa i angeic. Tro kö epun e cili a qaja koi angeic ka hape, hetre icasikeu e nöjei wiik nyine tro epuni a sin, ngacama tro lai a luz la huliwa? Ngacama traqa ju hë koi së la itre jol ka tune lai, ngo loi e tro sa lapa mekun la eamo ne la atre cinyihane la Salamo ka mama ngöne la topik ne la drai celë. w17.03 4:6