October

Iehova la “Akötesie, ine la xomi hni me ate akeukawan.” (Rom. 15:5) Nyidrëti hmekuje hi la ka atreine trotrohnine hnyawa la jole ka traqa koi së, me aliene la hni së, memine la sipu pengö së. Matre atre hnyawa hi Nyidrë la hne së hna ajan matre tro sa cile hut. Ngo tro Akötresieti a sa tune kaa la sipo së troa xomihni? E tro sa sipo Iehova troa xatua së troa xomihni, tro kö Nyidrëti a “nyi jëne köte e kola tupath [i së].” (1 Kor. 10:13) Nemene la hnei Nyidrëti hna kuca? Ame itre xa ijin, tre, patre pi hi la itupath. Ngo nyimu ijin laka, Nyidrëti a hamëne koi së la trenge catr matre atreine së “xomi hni me xomi hni ahoeanyi memine la madin.” (Kol. 1:11) Ketre, hnene laka atrepengö së hnyawa hi hnei Nyidrë, ene lo itre aliene hni së, me mekuna së, me ngönetrei së, haawe, tha tro pi kö Iehova a nue la ketre jole uti hë la thatreine së xomihnin. w16.04 2:5, 6

Önine la Wesi Ula i Akötresie tro sa drengethenge la itre mus, ngo eje fe a qaja ka hape, sisitria kö la tro sa drei Akötresie hune la atr. (Ite hu. 5:29; Tito 3:1) Hapeu, ka isazikeu kö la lue mekune celë? Hnei Iesu hna amamane hnyawa koi së la ketre trepene meköti ka xatua së troa atrehmekune la atr nyine tro së a drengethenge. Nge ej a mama ngöne la topik ne la drai celë. Easë a “hamëne koi Kaisara la ite ewekë i Kaisara” ngöne la easë a drengethenge la itre wathebo i mus, me metrötrëne la itre ka cilën ej, me hotr. (Rom. 13:7) Ngo e upi së jë hnei mus troa kuca la ketre ewekë hna wathebon hnei Akötresie, tha tro hë së e cili a dreng, ngo tro pala hi së a hetrenyi la metrötr. Nge ketre, tha easa kö a lö hnine la itre mekune ka isazikeu ne la itre parti politik ne la fen. (Is. 2:4) Pine laka, hnei Iehova hna nue troa cile la itre mus, haawe, tha tro pi kö së a icilekeu me angatr. Ketre, tha tro pi kö sa lö hnine la itre huliwa ne atrunyi nöj. (Rom. 13:1, 2) Tha tro pi kö së a thele troa ujë hnan la musi ka cile maine tro pena a iaöne la itre ka cilë politik. Ketre, tha tro pi kö së a hane vot maine thele troa hetre göhnë pena ngöne la politik. w16.04 4:1, 2

Nyimutre la itre jol thene la itre keresiano nyine tro angatr a isa sipu seng. Ngo hetre ijine laka, hetre itre ewekë nyine troa kuca hnene la ekalesia. (Mat. 18:15-17) Ame la “ngazo” hnei Iesu hna qaja e celë, tre tha kolo kö lo neköi iwesitrë ka co. Iesu a qaja ka hape, maine tha ietra kö la atr, nge ase hë ithanata me angeic hnene la trejin, me lue xan, me itre qatre thup, tro pë hë a xome ‘ceitu i angeic me atr ethen me telona.’ Ame enehila easa qaja ka hape, hna upi angeic trön eë. Ame la “ngazo,” tre kola qaja la kola huliwa qene atrekënö, me sili trengathoi ketre. Tro sa trongëne tune kaa la eamo cili? (1) Tro sa pane tro cas troa iloi memine lai trejin. Maine jë tro së lai a anyimua ithanata me angeic. Ngo tune kaa ju hë e tha iloi pala kö? (2) Tro hë së lai a hëne la ketre trejin ka atrepengöne hnyawa lai jol, me anyipicine ka hape, hetre ngazo hna kuca. Tro sa trongëne la eamo i Iesu ngöne Mataio 18:15-17 göne hi la “ngazo” cili. w16.05 1:14

Tha hna qaja asë kö la itre nyine tro sa kuca e hnine la Tusi Hmitrötr, tune la aqane tro sa heetr. Ngacama isa hetre aqane heetre ne la itre atr thenge la itre nöj, nge kola saze trootro la aqane heetr thenge la hneijin, ngo ame la hnei Tusi Hmitrötr hna qaja ha ekö, tre tha saze kö. Kolo hi lai a amamane la inamacane ka eje thei Iehova. Ketre, tha Tusi Hmitrötre kö a amekötine la pengöne huliwa nyine tro sa xom, maine itre nyine iamadrinë, maine itre ewekë nyine tro sa kuca matre troa lolo la ngönetrei së. Nemene la aqane tro sa axecië mekune hnyawa e pëkö hna amekötine hnei Tusi Hmitrötr göne la jole ka traqa koi së? Tha loi kö e tro hi sa kuca la sipu aja së, ngo loi e tro sa pane mekune hnyawa lai jol me itre xa ewekë ju kö, me thele la aqane tro sa amadrinë Iehova.—Sal. 37:5. w16.05 3:2, 6

Nyipici laka, hetre götrane tus hne së hna isa pi e hnine la Tusi Hmitrötr. Matre, hetre itre trejin ka pi e la itre evangelia, ke kola qejepengöne hnyawa la mele i Iesu. (Ioane 14:9) Itre xan a ajane la itre hna perofetan, tune la tusi Hna Amamane, ke kola amamane la ‘nöjei ewekë ka troa canga traqa.’ (Hna ama. 1:1) Nge ame itre xan, kola akeukawanyi angatr hnene la tusi Salamo, nge itre xane pena a kepe ixatua qa ngöne la tusi Ite Edomë. Kolo hi lai a amamane hnyawa laka, thatraqane la nöjei atr asë la Tusi Hmitrötr. Easë fe a nyipiewekëne la itre itusi së, ke hna nyi trepene itre ej hnene la Tusi Hmitrötr. Nge ame asë hi la itre itus, me itre boroshür, me itre zonal, me itre xa itusi së tre, itre ahnahna lai qaathei Iehova. Nge itre ej a a xatua së troa lapa qale catre koi Iehova, me acatrene catrëne la aqane imelekeu së me Nyidrë.—Tito 2:2. w16.05 5:1-3

Kolo fe a hane xome ameköti së hnene la uati hmitrötr. Ame la ketre aqan, tre, ej a xatua së troa nyitipu Iesu, me melëne la wene ne la ua. Ame la ketre igötranene la wene ne la ua tre, ihnim. Hetre ihnimi së koi Akötresie, matre easë a thele troa kuca la aja i Nyidrë. Nge easë a nue Nyidrë troa xome ameköti së ke atre hi së laka, nyine loi koi së la itre ihaji Nyidrë. Ketre uati hmitrötr aegöcatrenyi së matre tro pala hi sa lapa ananyine la fene celë. (Efe. 2:2) Ame lo Paulo a thöth, hna löthi angeic hnene la aqane mekuna ne la itre hene ne hmi ka pi tru. Ngo hnei uati hmitrötr hna aijijë angeice troa saze. Öni angeice pë hë ka hape: “Ateine ni troa kuca la nöjei ewekë asëjëihë hnei nyidëti ate aegöcatenyi ni.” (Fil. 4:13) Loi e tro fe sa sipo Iehova la uati hmitrötr i Nyidrë, ke tro kö Nyidrëti lai a qatixenyëne la itre thithi së.—Sal. 10:17. w16.06 1:12

Iehova hi la Akötresi së, nge easë a amamane la ihnimi së koi Nyidrë ngöne la easa nyihlue i Nyidrë. Tha tro kö së a nyihluene la ketre haze, maine nyiköne la hmi Iehova hnene la itre ini thoi. Nyipici laka, easë a nyihlue Iehova ke ka draië catre kö Nyidrë hune la itre xa haze, ngo hnene fe laka, Nyidrëti hi la Akötresie ka cas! Enehila mina fe, loi e tro Iehova a hane tro pa ngöne la mele së. Maine aja së troa nyihlue i Iehova hmekuj, loi e tro sa thupëne matre, pëkö ketre ewekë ka troa xome la göhne i Iehova ngöne la mele së. Nemene la nyine tro sa thupën? Ame ngöne lo Trene lao Wathebo, hnei Iehova hna wathebone kowe la nöj troa thili kowe la itre xa haze. Tha tro pi kö angatr a nyihluene la ketre haze. (Deu. 5:6-10) Nyimutre pi hë enehila la itre xa aqane troa thili kowe la itre idrola, nge ame la itre xan tre tha canga mama kö. Ngo tha saze kö la itre wathebo i Iehova, ke Nyidrëti pala hi la “Iehova ka cas.”—Mar. 12:29. w16.06 3:10, 12

Ame lo Peteru a hnyingë Iesu ka hape: ‘Tro kö ni a asevene lao nue la ngazo i ketre?’ Öni Iesu e sa ka hape: “Tha öninge kö koi ’ö troa uti ngöne la [seven] ; ngo loi pe troa uti kowe la [semitre seven].” Iesu a amamane koi së e celë la enyipiewekëne troa nue la ngazo ne la itre trejin. (Mat. 6:15; 18:21, 22) The thëthëhmine kö laka, itre atr ka tria asë hi së, matre tro fe së lai a hane akötrë itre xan. Haawe, maine atre hë epuni laka, hnei epuni hna akötrë ketre, xötrethenge jë la eamo ne la Tusi Hmitrötr, ene la troa thele troa iloi. (Mat. 5:23, 24) Madrine hi së la kola nue la tria së hnei ketre, haawe, loi e tro fe sa ujë tun koi itre xan. (1 Kor. 13:5; Kol. 3:13, MN) Maine hne së fe hna nue la ngazo i ketre, ketre tro fe Iehova lai a nue la ngazo së. Haawe, e traqa ju tria hnei ketre, loi e tro sa hetre utipin tune la aqane utipi së hnei Iehova Keme së.—Sal. 103:12-14. w16.06 4:15, 17

Ame enehila ngöne la hneijine la pun, qa ne la itre hlue i Iehova troa “cainöjëne la maca ka loi [ . . . ] ne la baselaia e cailo fene nyine anyipicine kowe la nöjei nöj.” (Mat. 24:14) Ame la maca ka loi ne la Baselaia tre, celë fe hi “maca ka loi ne la ihnimi gufa i Akötesie.” Easë a qaja tune lai ke, ame asë hi la itre manathithi hne së hna kapa qa ngöne la Baselaia i Akötresie, tre itre thangane hi lai la ihnimi Iehova. (Ite hu. 20:24; Efe. 1:3) Hnei Paulo hna amamane la ole i angeic kowe la ihnimi gufa i Iehova hnene la hna catre cainöj. Hapeu, epuni fe kö a hane xötrethenge la tulu i Paulo? (Rom. 1:14, 15) Itre atr ka ngazo së, matre easa kepe thangane la ihnimi gufa i Iehova. Tru la itre manathithi hne së hna kapa qa ngön, matre qa së troa qaja kowe la itre atr la aqane ihnimi Nyidrë, me aqane tro angatr a kepe thangane qa ngön. w16.07 4:4, 5

Qëmekene tro Iesu a mec, akönia amexeje nyidrëti lai kowe la itretre drei nyidrë (Ioane 12:31; 14:30; 16:11) Satana a amenune la itre atr jëne la hmi ka thoi. Celë hi matre, ala nyimu enehila la itre atr ka thatre la itre hna perofetan hnei Tusi Hmitrötr, itre ka amamane hnyawa ka hape, calemi hë la pune la fen. (Zef. 1:14) Kola mama laka, Satana a “atimekëne la ite hni angete tha lapaune kö.” (2 Kor. 4:3-6) Matre, ame hë la easa thele troa qaja kowe la itre atr ka hape, calemi hë la pune la fen nge joxu hë Iesu enehila, tre ala nyimu la ka xele ma dreng. Ngacama tha ajane kö la itre atr troa atre la itre hna perofetan hnei Tusi Hmitrötr, ngo tha tro pi kö së a kucakuca hnene lai. Atre hnyawa hi së la kepin matre nyipi ewekë tro sa lapa hmek. w16.07 2:11, 12

Ame la trahmanyi a öhne la jajinyi hnei angeic hna troa faipoipo memin, ngöne la iheetre ne faipoipo, tre kola elitrauje la madrine i angeic. Aja i Iehova, Atre acile la faipoipo, tro la itre trefën a mele madrin ngöne la faipoipo. Celë hi matre, Nyidrëti a hamë eamo jë koi angatr e hnine la Wesi Ula i Nyidrë. (Ite edomë 18:22) Ame la ketre ewekë hna qaja hnei Tusi Hmitrötr, tre, pine laka lue atre ka tha pexeje kö la lue trefën, tro hë nyidroti lai a “aköte i ngönetei,” kola hape, troa hetre jol ka troa traqa koi nyidro. (1 Kor. 7:28) Nemene la nyine troa kuca hnene la lue trefën matre tha tro kö a wang acone la itre jole cili? Tro la itre keresiano a madrine tune kaa ngöne la faipoipo? Tusi Hmitrötr a amamane ka hape, ka nyipi ewekë catre la ihnim. Ngo nyimu pengöne ihnim ka nyipi ewekë kowe la lue trefën. Ame la ketre ihnim, tre, ene la tro nyidroti a isa iamamanekeune la etrune la ihnimi nyidro, me akökötrene la aja i ketre koi ketre. Nge maine hetre nekö i nyidro, tro ha catre kö la ihnim hna hamëne ngöne la hnepe lapa. Ame la itre ihnimi cili, tre itre hna nyi trepen hnene la itre trepene meköti Iehova, nge celë hi ka aijijëne la lue trefën troa mele madrin. w16.08 2:1, 2

Ekö hë Timoteo cainöj, nga pine nemene kö matre Paulo a hmekë angeice göne lai? Atre hi Timoteo laka, kola saze la mele ne la atr, me itre thiina i angatr. Nge aja i angeic tro pala hi la itre atr a drei angeic, celë hi kepin matre, hnei angeic hna xome amacan, maine saze la aqane cainöje i angeic. Enehila mina fe, nyipi ewekë tro sa hane nyitipu Timoteo. Ame ngöne la itre xa götran, xalaithe hi la itre atr hna öhne la kola cainöj ngöne la itre hnalapa trootro. Nge ame pena ngöne la itre xa götran, ala nyimu la itre atr ka lapa hnalapa. Ngazo pe, tha ijiji së kö troa fenafena la qëhnelö i angatr, ke thatreine kö së lö hnine la batima. Maine celë hi lai ka traqa koi epun, hapeu, ijiji epuni kö troa tupathe la ketre aqane cainöj pena? Ala nyimu la itre trejine ka madrine troa cainöje ngöne la gaa tru atr. Angatr a cainöj ngöne la hnë treqe train me kar, me ngöne la hna maketr, me ngöne la itre park. w16.08 3:14-16

Iehova a hamëne koi së la itre trejin e cailo fen, itre ka tru ihnimin nge ka ithuecatrekeu. (Heb. 12:12, 13) Hnene la itre nyipi keresiano ekö hna hane melëne la aqane ihnimi cili, nge eje pala hi enehila. Matre nemene la nyine tro sa kuca? Pane mekune jë la aqane sajuëne la lue ime i Mose hnei Arona me Huro ngöne lo kola isi hnei angetre Isaraela me angetre Amaleka. (Eso. 17:8-13) Loi e tro fe së enehila a thupë ijine troa xatuane la itre trejin. Nyimutre la itre trejine ka akötr ke, kola uti ipië trootro, maine hnene la hna tithi angatr hnei mec, maine hnene la hna icilekeu hnene la itre atrene la hnepe lapa i angatr, maine hnene la hna lapa cas, maine hnene la hna meci triji angatre pena. Loi e tro fe sa hane xatuane la itre thöth, ke hna uku angatr pala hi hnene la fen troa xomi mekune ka ngazo, maine troa hlemu pena. (1 Thes. 3:1-3; 5:11, 14) Haawe, the mano kö së thupë ijine troa thuecatrene la itre trejine e hnine la ekalesia, me ngöne la hna cainöj, me ngöne la easë a ce xeni me angatr, maine jëne telefone pena. w16.09 1:13, 14

Qa së lai qëmeke i Akötresie, me qëmekene la itre trejin, me qëmekene la itre atrene la teritoare së, troa heetre thenge la aja i Akötresie, me thenge la maca hne së hna tro fë. (Rom. 13:8-10) Matre nyipi ewekë catre tro sa thupëne la aqane heetre së ngöne la easë a icasikeu me cainöje trootro. Loi e troa mama the së laka, itre hlue i Akötresieti së. (1 Tim. 2:10) Nge maine nyipici laka, isa aqane heetre së kö ngöne la ketre götran, maine ketre nöj, ngo pine laka Itretre Anyipici Iehova së, tha tro pi kö a athixötrëne la ketre atr hnene la aqane heetre së. Ame fe la easë a tro kowe la itre asabele së, loi e lolo la aqane heetre së, nge troa mama la thiina ka ipië. Tha tro pi kö sa nyitipune la aqane heetre ne la fen. Tro hë së lai a madrine troa qeje së ka hape, Itretre Anyipici Iehova së, nge tha jole kö koi së troa qaja la maca ka loi o ijin. w16.09 3:7, 8

Loi e tro eö a xome la ceitun hnei Paulo hna hamën ngöne la eö a ithanatane la itre ewekë hna xup. Ame asë hi la itre uma, itre ej a cil, ke, hna pane mekun me xup hnene la ketre atr. Matre, the qaja pala ha la itre ewekë ka mel laka, itre ewekë ka tru catre hmaca kö hune la uma. Ngo nemene ju hë e tha mejiune kö la ketre atr kowe la Tusi Hmitrötr? Tune lo hna qaja e caha, pane thele jë troa atre la hnei angeice hna mejiune kow. Thupene lai, thele jë la ewekë hnei angeic hna ajan. (Ite edomë 18:13) Maine ka pi atre angeice la itre ini ne la sias, amamane jë koi angeice laka, ame asë hi la hnei Tusi Hmitrötr hna qaja, tre hna jele nyipicine pë hë hnei sias. Nge maine ka pi atre angeice la aqane trongene la mele ne la atr, amamai angeice jë la ketre ewekë hna qaja hnene la itre historiens, nge hna perofetane hë ekö hnei Tusi Hmitrötr. Nge ame pena la itre xa atr, angatr a pi hetrenyi la mele ka loi, loi e troa amamai angatr la itre ixatua qa hnine la Tusi Hmitrötr, tune la hna qaja ngöne la Cainöje Hune La Wetr. The thëthëhmine kö laka, tha easë kö a thele troa isi ithanata memine la itre atr. Loi e tro sa metrötrë angatr me hnying, nge ase jë hi, tro sa drei angatre hnyawa, matre troa hetre aja i angatr troa porotrike me easë, me troa atrepengöne la Tusi Hmitrötr. Nge e ithanata ha eö me ketre atr ka tru kö hui eö, metrötrë angeice ju. Maine aqane ujë i eö hi lai, tro la itre atr a metrötrë eö, me haine laka, ngacama thöthi petre kö eö, ngo tha eö kö a mejiune menu. w16.09 4:14-16

Maine aja së troa hetre madrinene la itre trenyiwa e hnine la ekalesia, loi e tro sa isa wai pengö së, me hape, ‘Maine eni ju ngöne la ketre nöje trenyiwa, nemene la hnenge hna ajan, göne la aqane tro la itre xan a kepe ni?’ (Mat. 7:12) Loi e tro sa atreine xomi hni, me ce mele memine la itre ka xötrei traqa ngöne la nöj. Eje hi laka, tha nyipi trotrohnine kö së la aqane waiewekë i angatr, me aqane ujë i angatr, ngo loi e tro sa kapa la pengöi angatr. Tha tro pi kö sa thele matre tro angatr a mekune me ujë tune la itre atr ne la nöje së. Maine hne së hna xomi ijine troa atrepengöne la nöje me qenenöje i angatr, tha tro kö lai a jole koi së troa easenyi koi angatr. Ame ngöne la ijin ne hmi hnepe lapa, loi e tro sa ithel göi qenenöje ne la itre ka xötrei traqa ngöne la ekalesia së maine ngöne la teritoare së. Ame la ketre aqane tro sa easenyi koi angatr tre, ene la troa könë angatr troa ce xen me easë. Hnei Iehova ‘hna thawa la qëhnelö ne la lapaune koi angetre ethen,’ matre loi e tro sa nyitipu Nyidrë me fe la hnalapa së kowe la itre trenyiwa, ene la itre “ate ne la lapa i angete lapaun.”—Ite hu. 14:27; Gal. 6:10; Iobu 31:32. w16.10 1:15, 16

Iesu Keriso la ka cile catr ngöne la ketre itupathi ka tru catre hmaca kö, nge ka mele nyipici koi Iehova. Nemene la ka xatua nyidrë troa cile hut? Öni Paulo göi Iesu: “Hnene la madrine hna amë qëmeke i nyidrë, ame hnei nyidrëti hna xomihnine la sinöe ne iaxösisi, me methinëne la hmahma. Matre, hnei nyidrëti hna lapa ngöne la götrane maca ne la therone i Akötesie.” (Heb. 12:2, MN) Paulo a xatuane jë la itre keresiano troa ‘mekune’ catrëne la tulu i Iesu. Tui Iesu, ala nyimu la itre pane keresiano ekö ka mec pine angatr nyipici koi Iehova, Anetipa la ketre. (Hna ama. 2:13) Hetrenyi hë la itre keresiano cili, itre hna iën, la edrö i angatr. Thupene hë la hna acili joxu Iesu lo 1914, hna amele angatr hmaca kowe la mel e hnengödrai, matre troa ce musi me nyidrë kowe la fen, nge tha tro hmaca kö angatr a mec. (Hna ama. 20:4) Ngo ame lo itre hlue i Akötresie ka mel qëmekene la hneijine i angatr tre, itre ka mejiune angatr troa mel e celë fen.—Heb. 11:35. w16.10 3:12

Ame itre xa keme me thin, tha hamë ithuecatre kö angatr kowe la itre nekö i angatr pine laka, tha hane fe kö hamë ithuecatre koi angatr ekö hnene la kem me thine i angatr. Ketre mina fe, hetre ajane la itre ka tru troa hane ithuecatre koi angatr, ngo tha hna ujë tune kö lai koi angatr. Ala nyimu ngöne la hna huliwa la itre ka eetr ka hape, pë fe kö ka hane qaja aloine la huliwa i angatr. Qaja jë la madrine i epun koi ketre göne la huliwa hna kuca hnei angeic. Qaja amamane jë koi ketre la itre thiina ka loi ka ej thei angeic. Nge xatuane jë la ketre ngöne la angeic a kucakuca me hacehni. Aqane tro hi së lai a hamë ithuecatre kowe la itre atr. (1 Thes. 5:14) Qa ngöne laka, easë a ce mel memine la itre trejin, haawe, nyimu ijine koi së troa qaja la itre ithanata ka ixatua. (Ate cai. 4:9, 10) Matre isa waipengöi epuni jë, me hape: ‘Eni kö a qaja koi ketre la kepine matre ka tru angeic koi eni? Eni kö a thel la nöjei ijine tro ni a ujë tune lai?’ Mekune ju la hna qaja hnei Tusi Hmitrötr, kola hape: “Ame la tenge ewekë ngöne la ijin’ eje, te, nyipi loi.”—Ite edomë 15:23. w16.11 1:3-5

Hnei Iehova hë hna qaja amë göne la nöje i Nyidrë ka hape: “Tro ni a cengöne ami angate tune la ite mamoe e Bozera.” (Mika 2:12) Hnei Nyidrëti fe hna perofetan ka hape, tro la itre hlue i Nyidrë a atre la nyipici qa hnine la Tusi Hmitrötr, me ce nyihlue i Nyidrë. Öni Nyidrë: “Ame hnenge pena hna troa ujëne kowe la nöje la aqane ewekë ka wië, mate tro angat’ asë a hëne la atesiwai Iehova, me nyi hlue i nyidë hnene la hni ka cas.” (Zef. 3:9) Tru la ole së troa nyihlue i Iehova ngöne la cas! E hna xötrethenge hnyawa la itre hna amekötin hnine la Tus i Akötresie hnene la itre pane keresiano ekö, haawe, kola mama hnyawa laka, hetrenyi la tingeting, me cas, nge pë ethan la ekalesia. (1 Kor. 1:10; Efe. 4:11-13; 1 Pet. 3:8) Ketre tune mina fe enehila, lolo hnyawa la aqane trongene la itre hlue i Iehova, nge ka casi angatr. Ketre, angatr a cainöjëne la maca ka loi e cailo fen. w16.11 2:16, 18

Pine laka, ala nyimu pala kö la ka atreine e Tusi Hmitrötr ngöne la qene Heleni me qene Latin, haawe, ijije hi tro angatr a ce wang la itre ini hna hamën hnei Tusi Hmitrötr memine la itre hna hamën hnene la hmi. Matre, ame hë la itre atr a öhne laka, ka thoi la itre ini hna hamën hnei hmi, angatr pë hë a thipetrije pi. Ngo, ka hetre ethanyin e troa ce thawa lai memine la itre xa atr ke, tro lai humuthi angatr pine lai. Kola tro la itre macatre, nge xalaithe hë la itre ka qene Heleni maine qene Latin. Nge, hnene la itre hene ne hmi hna wathebone troa ujëne la Wesi Ula i Akötresie ngöne la qene hlapa hna ithanatane hnene la itre atr. Ketre, ame la atr ka tha kapa kö la hna inin hnene la hmi tre, hna tranyi angeic. Ame göi itre nyipi keresiano, angatre hë a isa icasikeu ngöne la itre neköi gurup ka co, nge ame itre xan tha ijije kö troa hane sin. Thatreine hë la itre keresiano hna iën, lo “xötete huje joxu” troa kuca ha la itre huliwa i Akötresie thenge la aqane amekötine i Nyidrë. Kola mama e cili laka, Babulona Atraqatr la ka musi hune la itre atr! w16.11 4:8, 10, 11

Eje hi laka, tha tro kö sa kuca la itre ngazo hna kuca hnene la itretre Korinito. Thatreine kö tro sa ujë tune lai me mekune ka hape, tro sa kapa la ihnimi gufa i Akötresie, nge tro fe Nyidrëti a nue la ngazo së. Ngo tune kaa la itre ngazo hna mekune laka, itre ngazo ka co? Eje kö e kuhu hni së troa drengethenge Iehova ngöne la nöjei götrane la mele së? (Rom. 6:14, 17) Pane mekune ju la pengöi Paulo aposetolo. Öni angeic: “Ate ne ngönetei kö ni, hna itöne kowe la ngazo. Ke ame la hnenge hna kuca, te, tha ’te kö ni ; ke tha kuca kö ni la hneng hna ajan ; loi pe la hnenge hna methinën, celë hi hnenge hna kuca.” (Rom. 7:14, 15) Maine nyipici laka, tha angeice kö a kuca la itre ewekë ka mama ngöne 1 Korinito 6:9-11, ngo atrehmekune pala hi angeic ka hape, atre ka tria angeic. Tru la aja i angeic troa amadrinë Iehova, ame hnei angeic hna isine matre tha tro kö angeic a kuca la ngazo. (Rom. 7:21-23) Catre jë së nyitipune la tulu i angeic, me isine troa drengethenge Iehova. w16.12 1:15, 16

Ame la ketre aqane tro sa nue koi Iehova la itre hace së tre, ene la troa thith. Aja i Iehova, Keme së la tro sa hane fe la hni së koi Nyidrë ngöne la ijine easa hnehengazo. E hne së hë hna kuca asë la hne së hna atreine troa nyinyine la jol, tro pë hë la thithi a xatua së matre tha tro kö së a hnehengazo menu. (Sal. 94:18, 19) Tune la aqane mama ngöne la Filipi 4:6, 7. Nemene la aqane sa Iehova la itre thithi hne së hna qaja lapan? Kola atingetingëne la hni së, matre tha tro kö a traqa koi së la itre mekune ka iajolë. Iehova a xatua së matre troa tingetinge la hni së, nge matre tha tro kö sa hnehengazo menu me xou. Ala nyimu catre la itre trejin ka melëne la tingetinge celë; matre ijiji së fe troa hane melën. Tro “la tingetinge ka sisitia qa thei Akötesie” a xatua së troa cile kowe la nöjei pengöne jol! Loi e tro fe sa mejiune hnyawa kowe la hna sisinyi hnei Iehova. Öni Nyidrë: “The hlohlo [maine, the hnehengazo] kö, ke ini la Akötesi ’ö ; tro ni a aegöcatenyi ’ö ; he, tro ni a xatua eö.”—Is. 41:10. w16.12 3:3, 4

Mose fe la ketre atre lapaun, nge ka thipetrij la itre mo ne Aigupito, me “ajane troa ce xome la ngazo memine la nöje i Akötesie, hune la troa madine fë la ngazo ka canga pat.” (Heb. 11:25, 26) Loi e tro pala hi së a nyitipune la itre hlue i Akötresie ka catre nyipici koi Nyidrë, tui Mose, me huliwane hnyawane la ahnahna, ene la troa ië ewekë hnyawa, matre kuca pala hi la aja i Akötresie. Itre xan a mekune ka hape, loi e tro ketre atr a axecië mekune koi angatr, ngo e tro angatr a ujë tune lai, tro ha trianyi angatr hnene la itre manathithi ka tru qa ngöne la atreine i angatr troa ië ewekë. Tusi Hmitrötr a qejepengöne lai ngöne Deuteronomi 30:19, 20. Ame ngöne la xötr 19, Iehova a nue la angetre Isaraela troa ketre axecië ewekë. Nge ame ngöne la xötr 20, Iehova a aijijë angatr troa amamane la ejuine la ihnimi angatr koi Nyidrë. Loi e tro fe sa axeciëne troa nyihlue i Iehova. Celë hi lai aqane ië ewekë hnyawa matre troa atrunyi Iehova. Nge ketre, aqane tro fe hi së lai a amamane la ejuine la ihnimi së koi Nyidrë! w17.01 2:10, 11

Aja i Iehova tro sa huliwane hnyawane la itre hna atreine cili. Pine nemen? Pine laka, tru la ihnimi Nyidrë koi së, nge atre hi Nyidrë laka, e huliwane hnyawane hë së la itre ahnahna cili, tro së lai a madrin. Ngo atre fe hi Nyidrë laka, hetre ifego së. Thatreine kö së troa apatrene la ngazo me mec. (1 Ite jo. 8:46) Ketre, thatreine kö së troa musinëne la atr ke, isa qanyi së kö axecië mekun. Nge tru ju hë la itre ithuemacanyi hne së hna atre, me hne së hna atreine kuca, ngo thatreine kö së troa weje la inamacan, me hna atreine kuca hnei Iehova. (Is. 55:9) Loi e tro sa nue Iehova troa köja gojenyi së, me mejiune laka, tro kö Nyidrëti a sajuë së me aijijë së troa kuca la hne së hna thatrein. Ngo, aja i Iehova fe tro sa thele la aqane tro sa isa nyinyine la itre jol ka ej the së me aqane tro sa xatuane la itre atr. Nyipi ewekë tro sa “mejiune koi Iehova, nge kuca la loi.” w17.01 1:2-4

Ngacama ketre hnëqa lai ka tru, ngo hnei Bazilai hna thipën, me sipone troa nue la hnëqa kowe la ketre thupëtresij, Kimeama la ëjen, nge kola mekune ka hape, nekö i nyidrë. (2 Sam. 19:31-37) Pine nemene matre tha kapa kö Bazilai la hnëqa cili? Nyidrëti kö a thel troa kötrene la itre hnëqa, matre troa hmaloi la mele i nyidrë? Ohea, hnei nyidrëti hna ujë tune lai ke, atre hi nyidrëti la itre ifego i nyidrë. Hnene laka, saze hë la pengöne la mele i nyidrë, haawe, patre hë la trenge catre i nyidrë tune ekö. (Gal. 6:4, 5) Tui Bazilai, nyipi ewekë tro sa atre la itre ifego së. Tha tro kö sa wange atrun la itre sipu aja së, maine aceitunë së me itre xan, ngo loi e tro pe sa kuca asë la hne së hna atrein matre troa atrunyi Iehova. Celë hi ka nyipi ewekë hune la troa cilëne la ketre hnëqa ka tru, maine hlemu loi pena. (Gal. 5:26) E atre hnyawa hi së la itre ifego së, tro hë së lai a ce huliwa memine la itre trejin matre troa atrunyi Iehova me xatuane la itre atr.—1 Kor. 10:31. w17.01 4:5, 6

Iehova la Atre Xup ka sisitria. Nyipi loi la nöjei ewekë hnei Nyidrëti hna xup. (Iere. 10:12) Hnei Nyidrëti hna ami ifegon la itre ewekë hnei Nyidrëti hna xup. Hetre itre wathebo hnei Nyidrëti hna acil göi aqane tro la itre atr a mel, memine fe la itre xa ewekë hna xup, matre tro pala hi itre ej a tro loi. (Sal. 19:7-9) Hetre isa göhnë me hnëqane la nöjei ewekë asë. Ame lo hna hape, loi de la gravitation tre, celë hi ka thupëne la fen, me musinëne la itre hnagejë, matre hetre iwë me hmej. Maine patre ju lo hna hape, gravité ke, pëkö mel ka ijij e celë fen. Kola tro loi la nöjei ewekë asë ke, hnei Iehova hna ami ifegon la itre ewekë hnei Nyidrëti hna xup. Kolo hi lai a amamane ka hape, hetre aja i Akötresie kowe la ihnadro, me kowe la itre atr. Ame la easa cainöje trootro, easë hi lai a xatuane la itre atr troa atrepengöne hnyawa la Atre Xup la nöjei ewekë ka lolo asë.—Hna ama. 4:11. w17.02 1:4, 5

Drei la itre xa hna xatuane hnene la itre angela? Öni Tusi Hmitrötr, hnene la ketre angela, “tane ishi Iehova,” hna xatua Iosua ngöne la kola isi me angetre Kanana. (Ios. 5:13-15; 6:2, 21) Ame hë e thupen, lo ijine Hezekia Joxu a nyi mekene la nöje i Iehova, hnene la angetre Asuria hna mekune troa lep apatrenyi Ierusalema. Ame ngöne hi la ca jidr, “hna tropi la angela i Iehova me lepe ngöne la lapa i angete Asuria [la ala 185 000].” (2 Ite jo. 19:35) Maine nyipici laka, ka pexeje la itre angela, ngo ame la itre atr hnei angatre hna xatuan, tre itre ka tha pexeje kö angatr. Ame la ketre ijin, tha hnei Mose kö hna atrunyi Iehova. (Num. 20:12) Ame pena Iosua, tha hnei angeice kö hna hnyingë Iehova la nyine troa kuca, ngöne lo kola traqa troa isisinyikeu me angeic hnei angetre Gibeona. (Ios. 9:14, 15) Nge ame Hezekia, hna traqa la pi tru koi angeic. (2 A. l. ite jo. 32:25, 26) Ngacama itre atr ka tha pexeje kö angatr, ngo qa ne la angetre Isaraela troa drengethenge la mekene i angatr. Ketre, mama hi koi angetre Isaraela ka hape, Iehova a xatuane la itre atr cili jëne la itre angela. Matre, Iehova hi la ka elemekene la nöje i Nyidrë. w17.02 3:7-9

Nemene la aqane tro sa atrune la itre atr? Tro së lai a wangatrunyi angatr, me metrötrë angatr. Eje hi laka, hne së hna majemine atrune la itre atr ka kuca la ketre ewekë ka tru, maine itre ka cilëne la itre göhnë ka tru. Ame ngöne la tane mekune celë, tro sa ce wange la itre atr nyine tro sa atrun, nge pine nemen. Kola qaja ngöne Hna Amamane 5:13 la ‘atre të hune la theron,’ nge meköt e troa atrune “la Arenio.” Ame la ‘atre të hune la theron’ tre, kola qeje Iehova. Ame ngöne la Hna Amamane mekene 4, hetrenyi la ketre kepine hna qaja hnene la itre angela matre meköt e troa atrunyi Iehova, “lo ka [mel] epin’ epine palua.” Öni angatr: “Ijiji enëtilai Joxu Akötesi hun, troa kapa la nyine atrun, me nyine Adraiën, me men ; ke hnei enëtilai hna xupe la nöjei ewekë asëjëihë, nge thatraqane la aja i enëtilai it’ ej, nge hna xupe fe.”—Hna ama. 4:9-11. w17.03 1:1, 2

Ame enehila, ala nyimu la itre atr ka xötrethenge la mekuna ne la hni angatr la angatr a axecië mekun. Ngo, ewekë lai ka hetre ethan. Tusi Hmitrötr a hmekë së ka hape, tha tro kö sa axecië mekun thenge la itre mekuna ne la hni së ke, ame la hni ne la atr tre, ka tha pexeje kö. Tha tro kö sa mejiune kowe la hni së ke, “ate nyipi iaö la hni hune la nöjei ewekë asëjëihë, nge nyipi ngazo ej.” (Iere. 17:9) Nyimutre la itre tulu e hnine la Tusi Hmitrötr ka amamane la itre ethanyine e troa mejiune kowe la hni së. (1 Ite jo. 11:9; Iere. 3:17; 13:10) Nemene la ewekë ka troa traqa, e xötrethenge jë së la itre mekuna ne la hni së la easa axecië mekun, me nue la hni së troa musinëne la mekuna së me aqane ujë së? Kola tune la atr ka elëhni, tro lai a jol koi angeic troa axecië mekune hnyawa. (Ite edomë 14:17; 29:22) Ketre, tro fe a jol kowe la atr ka kucakuca troa axecië mekune hnyawa. (Num. 32:6-12; Ite edomë 24:10) E tro sa axeciëne la itre mekune ka tru, tha tro pi kö sa nue la itre mekuna ne la hni së troa musinëne la itre huliwa së. w17.03 2:12, 13

Itre atr asë hi së ka tha pexeje kö, nge ka tria. Eloine pe, hnei Iehova hna hamëne la thupene mel nge, hetre aja i Nyidrë troa nue la itre ngazo së. Haawe, e hetre hni ne ipië the së, me ietra, tro së lai a sipo Nyidrë troa senge la itre ngazo së. Ketre, tha luelue kö së laka, tha Iehova kö a “kuca koi shë cei tune memine la ite ngazo shë.” (Sal. 103:10) Ngo, nyipiewekë tro sa “nyi hlue i nyidë hnene la hni ka pexeje.” (1 A. l. ite jo. 28:9) Ame la atr ka nyihlue i Iehova memine la “hni ka pexej” tre, ka tru la ihnimi angeic koi Iehova, nge aja i angeic troa nyihlue i Nyidrë epine palua. Ame la hnëewekë hna hape, “hni” e hnine la Tusi Hmitrötr tre, kola qaja la atr ka ej e kuhu hni së. Kola qaja la aqane mekune së, la hne së hna hniin, memine la hne së hna ajane troa kuca ngöne la mele së, memine la kepine la aqane ujë së. Ngacama itre atr ka tha pexeje kö së, ngo ijiji së hi troa nyihlue i Iehova memine la hni së ka pexej. Easa nyihlue i Nyidrë ke, aja së qa kuhu hni së, ngo tha hnene kö laka, hna majemine kuca, maine qa së troa kuca.—2 A. l. ite jo. 19:9. w17.03 3:1, 3

E hetre ewekë ka loi hne së hna kuca, nge kola qaja aloinyi së, nemene la aqane tro sa ujë? Tro la aqane ujë së e cili a qajaqaja la ewekë ka ej e kuhu hni së. Maine tro la ketre trejin a isine troa hnëkën, me cile fë la ketre cainöj kowe la ka ala nyim, tro la itre trejine lai a qaja la madrine i angatr koi angeic. Nemene la aqane tro angeic a ujë e cili? Loi e tro pala hi së a lapa mekune lo hna qaja hnei Iesu, kola hape: “E asesë hë kuca la ite hna ahnithe koi nyipunie, öni nyipunie, ka hape, Eëhuni la ite hlue ka pë [pengön], ase hë huni kuca la qâ huni troa kuca.” (Luka 17:10) Tha mama kö koi Hezekia lo aqane xatua nyidrë hnei Iehova. Haawe, e qaja aloinyi së jë hnei itre xan ke, lolo la aqane cile fë cainöje së, nemene la ka troa xatua së tro pala hi së a ipië? (2 A. l. ite jo. 32:24-27, 31) Loi e tro sa mekune ajuine la hna kuca koi së hnei Iehova. Loi e tro fe sa qeje Nyidrë koi itre atr, memine la aqane xatua së hnei Nyidrë. w17.03 4:12-14