November

Hapeu, saze hë la aqane ujë i Satana enehila? Ohea! Ame lo kola helë Satana qa hnengödrai, angeice pala hi a sili trenge ewekën la itre hlue i Akötresie. (Hna ama. 12:10) Satana pala hi enehila a qaja ka hape, itre atr a nyihlue i Akötresie göi thupen. Tru la aja i angeic tro sa thipetrije la musi Akötresie, me hmaca troa nyihlue i Nyidrë. Ame la kola traqa koi së la itupath nge easë a akötr, ke pane mekune ju la ewekë celë ka sihngödr: Ame ngöne la ketre götran, Satana me itre dremoni a cile goeë epuni me hape, tro hë epuni a thixötr. Nge ame ngöne la ketre götran, epuni a öhnyi Iehova me Iesu Keriso Joxu së, me itre hna iën hna amelene hmaca, me itre thauzane lao angela. Angatre fe a goeëne la epuni a cil kowe la itupath, ngo angatre pe a xexe madrin koi epun! Tru la madrine i angatr troa goeëne laka, epuni a cile huti me mele nyipici koi Iehova. Nge ame hë e cili, epuni a drenge la Iehova a qaja koi epuni la xötre ka nyi tane la topik ne la drai celë. w16.04 2:8, 9

E ase hë iloi, “lue tejine hmaca [nyidro].” Ngo e anyimua ithanata së memine la trejin nge tha iloi pala kö, tro hë a ithanatane la jole celë koi itre qatre thup. Eje hi laka, tha nyipi ewekë kö e itre xa ijin troa trongëne asë la köni ewekë hna qaja ngöne Mataio 18:15-17. Pine nemene matre qaja jë së tune lai? Pine laka, hnene la atr ka kuca la “ngazo” hna canga ietra qëmekene troa traqa kowe la hnaakönine ewekë, matre pëkö nyipi kepine troa upetrön eë angeic. Ngo loi e tro fe la trejine hna akötrën a nue la ngazo hna kuca koi angeic. Haawe, mama hnyawa hi ngöne la eamo i Iesu ka hape, tha nyipi ewekë kö troa canga tro koi itre qatre thup. Tro hi sa tro koi itre qatre thup, e hne së hna trongëne lo lai lue nyine troa pane kuca, nge e tro fe a hetre itre ewekë nyine anyipicine ka hape, hetre “ngazo” hna kuca. w16.05 1:15, 16

Easa lapa iananyi la politik matre tro pala hi sa sajuëne la Baselaia i Akötresie. Easë a cainöjëne lai me hape, celë hi ka troa apatrene la nöjei jol ne la atr, matre, wië la mekuthetheu së ke pëkö musi atr hne së hna sajuën. Itre hmi ka thoi a lö hnine la itre politik, nge celë hi lai ka aisane la itre atr. Ngo hnene laka, tha ka sine fe kö së la politik, haawe, ka casi së memine la itre trejin e cailo fen. (1 Pet. 2:17) Ngo eje hi laka, easa easenyi trootro kowe la pune la fene i Satana, nge tro pala fe hi a jole catre koi së troa lapa ananyine la politik. Mama ha enehila la kola pi hune la itre atr me catre që, matre tro hmaca kö lai elanyi a aisa angatre catr. (2 Tim. 3:3, 4) Hna akötrëne hë la itre xa trejin me easë hnene la hna a ca tro saze ju hi la politik ngöne la nöje i angatr. Celë hi kepine matre, loi e tro sa hnëkë së kö, matre tha tro kö së a lö hnine la politik ngöne la ijine jol. w16.04 4:3, 4

Ala nyimu la itre atr enehila ka isa kuci mekun. Ngo ame la aja së, tre ene la troa amadrinë Iehova. Matre, qëmekene tro sa axecië mekun, loi e tro sa pane wai pengöne hnyawa la hna qaja hnei Tusi Hmitrötr, me ujë thenge la hne së hna trotrohnin. Kola tune la hna amekötin göi aqane wai pengöne Iehova la madra me aqane tro sa huliwan ej. Nyipi ewekë tro sa trongëne hnyawa. (Gen. 9:4; Ite hu. 15:28, 29) Ijije fe tro sa sipo ixatua koi Iehova, matre tro la itre mekun hne së hna xom a amadrinë Nyidrë. Ame la itre mekun hne së hna xom, tre troa hetre thangane kowe la mele së. Maine itre mekune ka loi la hne së hna xom, tro ha aeasenyi së catre koi Iehova. Nge e ka ngazo, troa hetre ethanyine kowe la aqane imelekeu së me Nyidrë. Tro fe lai a ajolëne maine athixötrëne la ketre trejin. Nge ketre, tha aja së kö troa aciane la gomegom e hnine la ekalesia. Matre, nyipi ewekë catre tro sa axecië mekune hnyawa.—Rom. 14:19. w16.05 3:4, 5

Eje hi laka, tha ijiji së kö troa inine hnyawane la nöjei itus hne së hna kapa. Ngo ame la ka amadrinë Iehova, tre ene la troa ami ijine troa e me inine la Tusi Hmitrötr me itre xa itusi së. (Efe. 5:15, 16) Ame e cili, nemene la ewekë nyine tro sa hmekëne hnyawa? Maine tha thupëne kö së, tro hë sa mekune laka, ame la itre xa ini qa hnine la Tusi Hmitrötr me ngöne la itre itus së, tre tha thatraqai së kö. Maine jë, ame ngöne la ketre hna melën hne së hna e hnine la Tusi Hmitrötr, tro së a mekune laka, thatraqai itre xan pë hë. Maine hna kuca mekötine la ketre zonal kowe la itre xan e easë, maine jë tha tro kö së lai a e, maine pena tro së lai a e nyimenyimën. E tro së a ujë tune lai, tro hë sa triane la itre xa ini ka nyipi ewekë koi së. The thëthëhmine kö së laka, qaathei Iehova la nöjei ithuemacanyi ka mama ngöne la itre itusi së. w16.05 5:5, 6

Iehova fe a xome ameköti së jëne la ekalesia me itre qatre thup. Maine tro la itre qatre thup a öhne ka hape, hetre itre tria së, tro hë angatre lai a akötrehnine troa hamë ixatua koi së. Nge e cili, tha angatre kö a tro fë la itre sipu mekuna i angatr. Angatre pe a pane thithi göi troa hetre trotrohnine me inamacan. Nge thupene lai, angatr a ithel ngöne la Tusi Hmitrötr me itre xa itusi së, matre atreine angatr hamë ixatua kowe la trejin. Maine ka mama hnyawa hi koi së la hna kuca hnei Iehova göi troa xome amekötine la itre thiina së, tro hë lai a hetre thangane kowe la aqane imelekeu së me itre trejin. Tro lai a sewe së troa mekuhnine la itre atrene la teritoare së, me itre atr hne së hna ini Tusi kow. Ngo eje hi laka, tha Akötresieti kö a musinë la itre atr troa saze. Nyidrëti pe a amamane koi angatr la itre trepene meköt göi troa amekötine la thiina i angatr, ngo isa qanyi angatre pë hë isa axeciën. w16.06 1:13, 14

Hnei Ioane hna hmekëne la itre keresiano ka hnine la itre aja ne fen. Kola qaja “la meciunyi ewekë i ngönetei, memine la meciune ne la lue mek, memine la nyi döne la mele celë.” Öni angeic ka hape, ame la atre thele la itre ewekë cili, tre “pëkö aja koi Tetetro e kuhu hni angeic.” (1 Ioane 2:15, 16) Celë hi matre, nyipi ewekë tro sa isa waipengö së lapa me thele ka hape, ‘Hna hane fe kö löthi ni hnene la itre aja ne fen?’ Maine jë, tro hë sa öhne laka, easa piine la itre nyine iamadrinë, me itre aqane heetre me mel ne la fen. Maine pena, easa thele “la ite ewekë ka tru” ene la troa kuca la itre ini ka tru. Easenyi catre hë la pun, matre nyipi ewekë tro sa trotrohnine lo aliene lo trenge ewekë i Mose ngöne Deuteronomi 6:4! me lapaune laka, ame “Iehova Akötesi shë, te, Iehova ka cas.” Haawe, tro hë së lai a nyihlue i Nyidrëti hmekuj me kuca hnyawa la aja i Nyidrë.—Heb. 12:28, 29. w16.06 3:14

Xalaithe hi la itre ewekë ka nyipi ewekë kowe la atr, tune la xen, me ixetr, me hnalapa. Ngo kola mama laka, tru catre kö kowe la atr la itre xa ewekë hna ajan. Nge ame la itre xa atr, tre, tha nyipi mama kö koi angatr la ka nyipi ewekë kowe la mele i angatr me itre xa aja i angatr. Ame la atr ka mele ngöne la nöje ka puafala tre, tha ceitu kö la hnei angeic hna ajan memine la hna ajan, hnene la ketre atr ka mel ngöne la nöj ka trenamo. Ame ngöne la itre xa nöj, itre atr a thele troa hetre mobilis me moto, maine ketre neköi hnepadro. Ame ngöne la itre xa götran, itre xan a thele la itre iheetr ka tru thupen, me itre iuma ka tru me itre loto ka nyinyape catr. Matre, mele ju hë së ngöne la ketre götrane la fen, nge maine ka trenamo maine ka puafala së, ngo tro fe a cia the së la aja mo.—Heb. 13:5. w16.07 1:1, 2

Ame kowe la ka ala nyimu enehila, tha nyipi ewekë kö troa atre Akötresie. (Mat. 5:3) Matre angatr a nu asë la traeme me trenge catre i angatr troa nyinyape thele la itre mo ka mama ngöne la fen. (1 Ioane 2:16) Ame la aja së, tre tro sa kepe thangane la mene ne la ua ngo tha mene kö la fen. Iehova a xatua së troa trotrohnine la itre ewekë ka troa traqa jëne la uati Nyidrë. (1 Kor. 2:12) Ngo loi e tro sa hmekën, ke tro fe la itre ewekë hne së hna kuca e nöjei drai a ajeanyi së qa ngöne la huliwa i Iehova. (Luka 21:34, 35) Tro la itre atr lai a mekune laka, itre ka hmo së la easa catre fë ka hape, easë a melëne la itre drai tixenuë ne la fene celë. (2 Pet. 3:3-7) Ngo tha tro pi kö sa kucakuca, ke mama hnyawa ha la itre hatren ka hape, calemi hë la pun. Haawe, maine aja së troa kepe thangane la mene ne la ua, nyipi ewekë tro sa sine lapane la itre icasikeu memine la itre trejin. w16.07 2:13, 14

Ala nyimu la itre atr ka thithi göne hi matre troa lolo la hni angatr. Ngo tha angatre kö a mejiune laka, tro Akötresieti a drei angatr. Matre nyipi ewekë tro angatr a atre ka hape, ame Iehova tre “Ate shamatine [maine dreng] la thithi.” Öni Iesu kowe la itretre drei nyidrë: “Maine tro nyipunie a sipone la kete ewekë ngöne ëjeng, tro ni a kuca.” (Ioane 14:14) Kolo lai a hape, loi e tro sa thith thatraqane “la kete ewekë” ka ihmeku memine la aja i Iehova. Öni Ioane: “Dei lola hni ka iahlë [maine ka xeci] hne shë hna hetenyi göi nyidë, laka e tro sha sipone kete ewekë thenge la aja i nyidë, nyidëti a dei shë.” (1 Ioane 5:14) Lolo catre la troa xatuane la itre atr troa trotrohnine ka hape, ame la thith, tre jëne troa easenyi kowe la “therone ne ihnimi gufa” i Iehova! (Heb. 4:16) Ame la easë a ini angatr la aqane troa thith koi Iehova, me itre ewekë nyine thithi fë, easë hi lai a xatua angatr troa nyi sinee i Iehova me öhnyi keukawa ngöne la ijine akötr.—Sal. 4:1; 145:18. w16.07 4:11, 12

Ame kowe la itre hlue i Iehova, aja i angatr asë hi troa hane qeje Nyidrë kowe la itre atr. Ngo eje hi laka, hetre itre xan hna tithi hnei meci maine kola uti ipië trootro, matre tha ijiji angatre hë troa cainöj ngöne la itre hnalapa trootro. Tha tro jë pi kö angatr a thëthëhmine laka, angatr a amadrinë Iehova ngöne la angatr a qeje Nyidrë kowe la itre atr ka lapa ezi angatr, tune la itre infirmier me itre droketre. Nge maine hna akalabusi epuni pi hmi, ijiji epuni pala hi troa qeje Nyidrë koi itre xan, nge celë hi ka amadrinëne la hni Nyidrë. (Ite edomë 27:11) Nyidrëti fe a madrine kowe la itre hlue i Nyidrëti ka lapa casi ngöne la nyipici. (1 Pet. 3:1-4) Haawe, kolo hi lai a hape, melëne ju hë së la nöjei pengöne jol, ngo ijiji së asë hi troa thithi koi Iehova, me easenyi Nyidrë, me acatrene la lapaune së. Tro kö Nyidrëti a amanathithi epun la epuni a ce thawa la nyipici memine la itre atr ka thele mejiun. w16.08 3:19, 20

Tha kolo kö lai a qaja ka hape, sisitria kö la trahmanyi hune la föe. Hnei Iehova hna qaja la hnëqa ka nyipi ewekë ne la föe, me hape: “Tha loi kö e troa lapa casi la at ; tro ni a kuca thatraqai angeice la ixatua ka ijiji angeic.” (Gen. 2:18) Haawe, loi e tro la föe a xatuane la trahmanyi troa ketre “he” ne hnepe lapa ka ihnim. Nge qa ne la trahmanyi troa nyitipune la tulu ne ihnimi Iesu, lo “he ne la ekalesia.” E tro la trahmanyi a ujë tun, tro hë la föe a mejiune kowe la föi angeic, nge tro ha hmaloi koi nyiidro troa metrötrëne me sajuëne la trahmany. Loi e tro la itre keresiano enehila a hane nyitipune la aqane hnime Iesu la itretre drei nyidrë. (Ioane 13:34, 35; 15:12, 13; Efe. 5:25) Loi e tro fe a catre la ihnimi ne la lue trefën, lo ihnim laka, uti hë la tro ketre a meci pi ketre. w16.08 2:3, 4

Ixatua ka tru la itre ithanata së kowe la itre trejin, itre ej a upi angatr troa catre nyihlue i Iehova. Matre, tha tro kö sa wangacone la emenene la itre mekun hne së hna hamën ngöne la itre ijine icasikeu. Jëne la ixatua i Iehova, hnei Nehemia me itre sine huliwa i angeic hna isa acatrene la itre ime i angatr. Hnei angatr hna afenesine la ngönehag ngöne hi la 52 lao drai! (Neh. 2:18; 6:15, 16) Tha hnei Nehemia kö e cili hna nyi ka mus, ngo hnei angeice hna ce iwanakoimëne la huliwa me angatr. (Neh. 5:16) Celë fe hi aqane ujë ne la itre qatre thup enehila, angatr a ixatua xupe me nyidrawan, me nyihnyawane la itre Uma Ne Baselaia. Angatre mina fe a catre hnim me thuecatrene la “angete hni ka kucakuca,” matre kola catre iwai, me ce cainöj me angatr.—Is. 35:3, 4. w16.09 1:15, 16

Itre hlue i Akötresie a catre trongëne la eamo celë: “Humutheju hnei nyipunie la ite hnepe ngönetei nyipunie e celë fen; ene la kuci ngazo, me thina ka sis, me qene tratraij, me aja ka ngazo.” (Kol. 3:2, 5) Hetre itre xan the së ka nue lo aqane mele i angatr ekö, nge angatre pala hi enehila a isi memine la itre aja i angatr ka ngazo. Matre, e tha thupëne kö së la aqane heetre së, jole catre hë koi angatr troa isi memine la itre aja i angatr ka ngazo, me trongëne la itre hna amekötin hnei Tusi Hmitrötr. (1 Kor. 6:9, 10) Matre, tha aja së kö troa thue xa ehnefen la ketre trejin! Ame la easa ce mele memine la itre trejin, tre kolo hi lai a thupë së qa ngöne la itre huliwa ka sis ne la fen. Nge maine nyipici laka, isa qanyi së kö iëne la aqane tro sa heetr, ngo qa së mina fe troa thupëne matre tro la aqane heetre së a xatuane la itre trejin troa lapa pë ethan qëmeke i Iehova ngöne la mekun, me ngöne la aqane ithanata me ngöne la aqane ujë i angatr.—1 Pet. 1:15, 16. w16.09 3:9, 10

Kola qaja hnene la lue keme me thin e Faras ka hape: “Nyiho a lapaune koi Iehova, ngo tha kolo kö lai a hape, tro fe hë lai a lapaune hnene la ha nekö i nyiho. Ke ame la lapaun, tha hna ce hnaho së kö memin. Ketre, tha tro jë kö nyudreni lai a aca tro lapaune koi Iehova.” Kola qaja mina fe hnene la ketre trejin e Australie ka hape: “Huliwa ka tru catre la troa aciane la lapaune thene la nekönatr. Tro epuni lai a thele troa sa hnyawa la hnyinge i nyën, ngo tro pala kö nyëne lai elanyi a amexeje hmaca la hnyinge cili! Matre madrine ju hë nyëne enehila la aqane sa i epun la hnyinge i angeic, ngo ame hë elany, angeic a aja itre xa ithuemacany.” Matre, kola mama kowe la itre keme me thin laka, ame la kola tru trootro hnene la ha nekönatr, nyipi ewekë hë troa hamëne koi angatr la itre xa ithuemacany. Celë hi matre, itre keme me thin pala hi a thele jëne troa inine la itre nekö i angatr matre troa hnimi Iehova. Hna traqa e itre xa ijin koi itre keme me thine la mekune celë, ‘Tro kö nyiho elanyi a atreine hiane la itre nekö i nyiho troa hnimi Iehova me nyihlue i Nyidrë?’ Nyipici laka, thatreine kö tro nyipunie a eatrëne lai hnene la sipu trenge catre i nyipunie. (Iere. 10:23) Celë hi matre, nyipi ewekë koi nyipunie troa thele ixatua thei Iehova. w16.09 5:1, 2

Hnene la itre ka hnyipi traqa hna qëmeke kowe la ejolene troa trotrohnine la qenenöj e cili. Rutha la ketre tulu ka lolo ngöne la götrane cili. Hnei angeic hna sipone troa hleme trongëne la itre qitr, matre angeic hi lai a amamane la metrötre i angeic kowe la itre hna majemine kuca ngöne la nöje hna hnyipi traqa kow. (Rutha 2:7) Tha hnei angeic kö hna mekune ka hape, meköti koi angeic troa kuca lai, nge qane pe la itre atr troa xatuane la itre atr ka tui angeic. Ame la ketre, canga nyimenyime hi angeic qaja la ole i angeic kowe la itre atr pine la loi hna kuca koi angeic. (Rutha 2:13) E hna ujë tune lai hnene la itre ka hnyipi traqa, eje hi lai laka, tro hë la itre trejin me itre atrene la teritoare së a metrötrë angatr. Atraqatr la madrine së laka, hnei Iehova hna amamane la ihnimi gufa i Nyidrë, me aijijëne la nöjei atr troa drenge la maca ka loi. Maine jë, tha ijiji angatre kö troa ini Tusi Hmitrötr me tro koi hna icasikeu. Ngo ame hë enehila, angatre ha icasikeu me easë matre loi e tro sa xatua angatr matre tha tro kö angatr a cile hnö tune la trenyiwa. w16.10 1:17-19

Itre milio lao hlue i Akötresie a xötrethenge la tulu i Iesu. Angatr a mekune catrëne la itre hna thingehnaean hnei Akötresie me mele nyipici koi Nyidrë ngöne la itre itupath. Rudolf Graichen la ketre e angatr; hna hnaho angeic e Alema lo macatre 1925. Ame lo angeic a nekönatr, hnene la keme me thine i angeic hna afedren amamane la itre iatr, nge ka amamane la itre hna melën e hnine la Tusi Hmitrötr. Öni angeic: “Ame la ketre iatr, kola mama la luko (kuli wael ka ihej) memine la neköi mamoe, me nekönatr memine la lepad (kösë ibus ka tru, nge ka ihej), me neköi kau memine la liona—angatr asë hi a mele tingeting, nge nekönatr la ka elemeken la tronge i nyudren.” (Is. 11:6-9) Celë hi ka xatua Rudolf troa mekune catrëne la Paradraiso e celë fen, me acatrene la lapaune i angeic kowe lai. Ame hnei angeic hna mele nyipici koi Iehova, ngacama hna akötrë angeic koi nyimu macatre hnene la itre Nazi, nge thupene lai hnene la itre communiste ne Alema (götrane kohië). Nyimutre la itre itupath hnei Rudolf hna cile kow. Hna tithe la thine i angeic hnene la ketre mec (typhus) ngöne la uma ne iaxösisi uti hë la mec eahlo. Nge ame keme i angeic, hnei nyidrëti hna nyiqaane nanazij trootro, matre xele hë nyidrë ma hane atre Anyipici Iehova. w16.10 3:12-14

Easa wangatrune la Tusi Hmitrötr ke, atre hi së laka, Tus i Akötresieti hi lai. Hetrenyi e hnine ej la itre eamo ka troa ananyi së qa ngöne la itre jol me hane haji së e traqa ju së tria. Matre nemene la aqane tro sa ujë qëmekene la itre eamo ne ej? Pane mekune ju la hna melëne hnene la lue trejin föe hna iën ekö, Euodia me Sunetuke. Kola mekune laka, celë hi ka aciane la gomegom e hnine la ekalesia. Tusi Hmitrötr a qaja ka hape, hnei Paulo hna hajine la lue trejine föe, me xatua nyidro troa iloi. Kola mekune laka, hnei nyidroti hna kapa la ihaji Paulo, me catre nyihlue i Iehova ngöne la madrin. (Fil. 4:2, 3) Ame fe ngöne la itre ekalesia enehila, hetrenyi la itre jol thene la itre trejin. Ngo e hne së hna xötrethenge la itre eamo ne la Tusi Hmitrötr, tro së lai a nyinyine itre ej. Goi tro fe së lai a neëne itre ej. Ketre, ame la easa xötrethenge la hna qaja hnei Tusi Hmitrötr, easë hi lai a amamane ka hape, ka tru koi së la tus i Akötresie.—Sal. 27:11. w16.11 3:1-3

Nyipi ewekë kowe la atr troa ithuecatre koi angeic. Matre loi e tro la kem me thin a thele troa hamë ithuecatre kowe la itre nekö i angatr. Hnei Timothy Evans ketre atr ka hamë ini, hna qeje itre nekönatr ka hape, nyudren a “ajane troa ithuecatr koi nyudren, tune la itre feja ka aja tim.” Öni angeice fe: “Jëne la ithuecatre hna kapa hnene la nekönatr, tro nyëne lai a dreng ka hape, kola nyipi ewekë nyën me hnimi nyën.” Ngo, hnene laka easa melëne la itre drai ne la pun, haawe, ala nyimu la itre atr ka meku angatre kö, nge itre ka “tha hnimi sinen.” (2 Tim. 3:1-5) Atre hnyawa hi Satana ka hape, e kucakuca ha së hnei angeic, tro ha puj la aqane imelekeu së me Iehova. Hnei angeice lo hna thele troa akötrë Iobu matre tro Iobu a kucakuca. Ngo tha ie ju kö la nyinyithiina i Satana, ke hnei Iobu hna mele nyipici koi Iehova. (Iobu 2:3; 22:3; 27:5) Loi e tro fe sa cile catr ngöne la itre nyinyithiina i Satana, me hmekëne wanga ie jë itre ej. Ame la easa thel troa hamë ithuecatre kowe la itre atrene la hnepe lapa së, me kowe la itre trejin ne la ekalesia, easë hi lai a xatua ketre me ketre troa mele madrin, me lapa qale catre koi Iehova. w16.11 1:4, 6

Ame ngöne lo macatre 1500, hnene la itre atre ka tha xou hna nyiqaane ujëne la Wesi Ula i Akötresie ngöne la itre qene hlapa hna ithanatane hnene la itre atr. Nge kola e la Tusi Hmitrötr hnene la itre atr ngöne la sipu qene hlapa i angatr, me isa thel ka hape: ‘Hna cinyihan eka hnine la Tusi Hmitrötr la ini göi Hnë Ifolosa (Purgatoire)? Nge, ekaa hnine la Tusi Hmitrötr la kola hape, tro la atr a nyithupene la peenë matre troa hmi thatraqane la itre ka mec? Ekaa e hnine la Tusi Hmitrötr la kola qeje Pape me Cardinal?’ Matre, tha madrine kö la itre hene ne hmi la kola hnying tune lai koi angatr hnene la itre atr. Hnei angatr hna isin, matre tha tro hmaca kö a e la Tusi Hmitrötr hnene la itre atr, nge tha tro hmaca kö a amexeje la itre hnying ka tune lai. Hetre itre atr, trahmanyi me föe hna humuth ke, hnei angatr hna thipetrij la itre ini cili. Ngo, hetrenyi la itre atr ka ala xalaithe hi ka xele ma hane mel fen la musi Babulona Atraqatr. Öhne hë angatre la nyipici qa hnine la Wesi Ula i Akötresie, ame hnei angatr hna thele troa atre la itre xa ithuemacanyi qa ngön! w16.11 4:13

Atre hi easë lo ka hape, nyipi ewekë tro sa huliwa nyipici matre troa nyihlue i Iehova. (Efe. 4:25) Tha aja së kö troa ujë tui Satana, “keme ne [la thoi].” Mekune pala kö së lo laka, hna meci hnei Anania me föi angeic pine nyidroti thoi. Haawe, the tro pi kö sa thoi. (Ioane 8:44; Ite hu. 5:1-11) Ngo, loi e tro fe sa huliwa nyipici ngöne la itre xa götrane la mele së e hetre hni ne ole së kowe la ihnimi gufa i Akötresie. Hetre itre ijine laka, tha easë kö a nyipici, ngacama tha hne së kö hna thoi. Öni Iehova kowe la angetre Isaraela: “The tro kö nyipunie a ënö, nge the hnihni [maine, iaö] kö, nge the thoi kö hnei kete ate koi kete.” Pine nemene matre nyipi ewekë tro angatr a trongëne lai? Öni Iehova: “Hmitöteju nyipunie ; ke hmitöte ni Iehova Akötesi nyipunie.” (Lev. 19:2, 11) Maine nyipici laka, tha hne së kö hna thoi, ngo ame pe, e tro sa qaja la itre ithanata matre tro pë hë itre xan a mekune menune koilo, tha easë kö lai a nyipici. w16.12 1:17, 18

Easa öhne e hnine la Wesi Ula i Akötresie la aqane ithanata Iesu kowe la itre atr. Pi tro catre angatr a drei nyidrë ke, ka keukawa la aqane ewekë i nyidrë koi angatr, me koi angetre kucakuca mina fe. (Mat. 11:28-30) Hnei Iesu hna wange atrune la aliene hni ne la itre atr. (Mar. 6:30-32) Tune la aqane sisinyi nyidrë troa xatuane la ange aposetolo ka ce tro me nyidrë, tro fe nyidrëti lai a hane xatua së enehila. Maine nyipici laka, tha ce nyidrëti hmaca kö me easë e celë fen, ngo ame pe, joxu hë nyidrëti e hnengödrai matre nyidrëti pala hi a amamane la ihnimi nyidrë koi së. Haawe, e traqa ju koi së la hnehengazo, tha tro kö sa luelu laka, tro kö nyidrëti a xatua së ngöne la nyipi ijin. Iesu a thue mejiune së me thuecatre së, matre tha tro kö sa hnehengazo menu.—Heb. 2:17, 18; 4:16. w16.12 3:4, 6

Hna mel hnei Noa ngöne la ketre hneijine laka, “tiqa ha la fene hnei iangazo,” me kuci ngazo. (Gen. 6:4, 9-12) Noa la ketre atr ka lapaun, nge ka catre cainöjëne la maca i Iehova, ngo thatreine kö angeic musinëne la itre atr troa kapa la maca, me troa ujë qa ngöne la itre thiina i angatr. Nge, thatreine kö angeic troa anyimenyimëne la itre drai matre canga traqa pi la Iwë. Ngo ame pe, ka catre la mejiune i Noa laka, tro kö Iehova a aeatrëne la hnei Nyidrëti hna qaja amë hë göne lai fen ka ngazo. Nge ketre, tha luelue kö angeic laka, tro Akötresieti a aeatrëne lai ngöne la nyipi ijin. (Gen. 6:17) Easë fe enehila a mel ngöne la fen ka ngazo, ngo atre hi së laka, tro kö Iehova a apatrene ej elany. (1 Ioane 2:17) Ngo qëmekene troa traqa la ijine cili, thatreine kö së troa musinëne la itre atr troa kapa la ‘maca ka loi ne la baselaia.’ Nge ketre, thatreine kö së troa anyimenyimëne la itre drai matre, canga traqa pi la “aköte atraqate.” (Mat. 24:14, 21) Tui Noa, nyipi ewekë tro sa catre lapaun koi Akötresie, me mejiune laka, easenyi hë tro Nyidrëti a apatrene la fen celë. (Sal. 37:10, 11) Xecie hnyawa koi së laka, tha tro pi kö Iehova a nue la ca drai kowe la fene celë.—Hab. 2:3. w17.01 1:5-7

Ame enehila, nyimutre la itre atr ka huliwane menune la ahnahna i angatr, ene la troa ië ewekë, me thele troa akötrë itre xan. Tusi Hmitrötr a qaja ka hape, ame ngöne la “ite drai hnapin,” pëkö ‘hni ne ole’ thene la itre atr. (2 Tim. 3:1, 2) Matre, tro sa amamane tune kaa la hni ne ole së kowe la ahnahna ka tru qaathei Iehova? Nge nemene la nyine tro sa kuca matre tha tro kö sa huliwane menune ej? Easë asë hi a iëne la itre enehmu së, me aqane tro sa heetr me isej, memine la itre nyine iamadrinë. Ngo ame pe, ame itre xa ijin, hnene la hna nue gufa së, ene pe mekune jë hi së troa kuca la itre ewekë hna xelen hnei Akötresie, maine pena troa xötrethenge la itre ewekë hna majemine kuca hnene la itre atrene fen. (1 Pet. 2:16, MN) Haawe, loi e tro sa ië ewekë hnyawa matre troa ‘kuca asë la nyine atrunyi Akötesie.’—Gal. 5:13; 1 Kor. 10:31. w17.01 2:12-14

Tui Nehemia, loi e tro fe sa atre la itre ifego së ngöne la easa kapa la ketre hnëqa. Tha tro kö sa mejiune kowe la sipu inamacane së, maine atreine së. Kola mama tune kaa laka, ketre atr a qale kowe la sipu inamacane i angeic? Maine jë tro la ketre qatre thup a kuca la ketre huliwa ne la ekalesia, nge tha hna pane thithi kö. Maine pena tro la ketre trejin a axeciëne la ketre mekun, nge thithi pë hë e thupëne matre tro Iehova a amanathithine la mekun hna axeciën. Ngo, ame la atr ka atre la itre ifego i angeic, ngacama hnei angeice hë hna melëne la ketre ewekë ka traqa koi angeic, ngo tha tro pi kö angeic a qale kowe la sipu inamacane i angeic. Ame koi angeic, sisitria catre kö la inamacane i Iehova hui angeic. (Ite edomë 3:5, 6) Ame ngöne la fen celë, nyimutre la itre atr ka isa meku angatre kö, me thel troa sisitria hui itre xan. Ngo ame easë, itre hlue i Iehova, tha easë kö a ujë tune lai. Ame koi së, tha hnene kö laka, hetre hnëqa së matre ka sisitria kö së hui itre xan ngöne la hnepe lapa, maine ngöne la ekalesia. Tro pe së a lapa mekune laka, hetre nyine tro sa kuca ngöne la itre ewekë hnei Akötresie hna acil, me ce huliwa memine la itre trejin.—1 Tim. 3:15. w17.01 4:7, 8

Aja i Iehova tro la atr a mel epine palua e celë fen. (Gen. 1:28; Sal. 37:29) Ka ham Nyidrë, ame hnei Nyidrëti hna hamëne la nöjei pengöne ahnahna koi Adamu me Eva. (Iako. 1:17) Hnei nyidroti hna kapa qaathei Nyidrëti la atreine troa isa ië ewekë, memine la atreine troa mekun, me ihnim, me imelekeu hnyawa me itre atr. Hnene la Atre Xup hna ithanata meköt koi Adamu, me ini angeic la aqane troa kuca la loi. Ketre, hnei Adamu hna inine troa ketre sipu thupëne la mele i angeic, me thupëne la itre öni, me huliwane hnyawane la ihnadro. (Gen. 2:15-17, 19, 20) Hnei Iehova hna aijijë nyidro troa atreine drem, me ketr, me goeën, me dreng, me punepunëne la itre ewekë ka lolo hnei Nyidrëti hna kuca thatraqai nyidro. Matre, tro nyidroti lai a mele madrin ngöne la göhnë ka lolo i nyidro. Ka lolo catr la huliwa hna athipi koi nyidro. Nge, tro pala hi a hetre hnei nyidroti hna inin, me öhne trongëne uti hë epine palua. Hnei Iehova hna aijijë Adamu me Eva troa hnahone la itre nekönatr ka pexej. Nge, tro angatr a lapane la ihnadro, nge tha tro pi kö ej a patr. w17.02 1:6, 7

Nemene la aqane xötrethenge la Wesi Ula i Akötresie hnene la itre ka elemekene la nöj? Pane mekune ju la tulu i Iosea Joxu. Ame hë la kola öhne la Wathebo i Mose, hnene la seketere i Iosea hna nyiqaane e koi angeic. Wesi Ula i Akötresie a upi Iosea jë troa lepe apatrene la itre idrola asë qa ngöne la nöj, me hnëkëne la ketre Paseka ka tru, nge pëkö ketre ka tun. (2 Ite jo. 22:11; 23:1-23) Hnene laka, hna trongëne la Wesi Ula i Akötresie hnei Iosea me itre mekene la nöj ka nyipici, saqe hi angatr wenë amekötine la aqane troa huliwa hnene la nöje i Akötresie. Hnene la itre hna ahnyipixene cili hna xatuane la nöje i Akötresie troa drengethenge Nyidrë. Ame pe, hetrenyi ekö la itre mekene la nöje i Akötresie ka tha trongëne kö la itre hna amekötin hnei Nyidrë. Nge ame itre xa ijin, hnei Iehova hna haji angatr, maine pena hna nyihna i angatr. (1 Sam. 13:13, 14) Ame hë e thupen, tro hë Nyidrëti lai a acile la ketre atr ka pexej matre troa nyi mekene la nöje i Iehova. w17.02 3:11, 12, 14

Hna xup la itre atr “hnaiji Akötesie.” (Gen. 1:27) Kolo lai a hape, ame la atr, angeic a hane melëne la itre thiina i Akötresie. Kola qaja la ihnim, thiina ka menyik, me utipin. Hna xupe fe la atr cememine la mekuthetheu, ene la troa atreine atrehmekune la loi me ngazo, maine huliwa nyipici me huliwa thoi, maine troa atrehmekune fe la ka ijij me ka tha ijije kö. (Rom. 2:14, 15) Ame la atr, ka ajane angeic la itre ewekë ka lolo, me ka mingöming, me ce mele tingeting me itre xa atr. Tha sesëkötre kö së ke, ame Iehova tre, Akötresie ne tingeting, nge ka pë ethan. Haawe, kola mama laka, hna xupe la itre atr memine la atreine troa nyitipu Nyidrë. Celë hi kepine matre meköt e tro sa atrune la itre atr, me metrötrë angatr. Ngo eje hi laka, hetre itre atr nyine troa atrun, matre jole troa atre la aqane troa atrunyi angatr. w17.03 1:5, 6

Tha ceitu i Iehova kö me itre atr, tha Nyidrëti kö a axecië mekune menu, ngacama ka elëhni ju hë Nyidrë. Ame la Nyidrëti a öhne laka, saze hë la angetre Nineve, nge tha kuca ha angatr la ngazo, Nyidrëti a saze pi lo hnei Nyidrëti hë hna axeciëne koi angatr. Kola mama e cili laka, ka atreine tulu ewekë Nyidrë, me ka hni ka ipië, nge ka utipin. Ketre tune mina fe, hetre itre ijine laka, loi e tro sa saze lo mekune hne së hë hna axeciën, tune lo itre ijine laka, hetre ewekë ka traqa koi së. Ame itre xa ijin, hnei Iehova hna saze la itre mekune hnei Nyidrëti hë hna axeciën. (1 Ite jo. 21:20, 21, 27-29; 2 Ite jo. 20:1-5) Ame la ijine tro fe sa saze hmaca la mekune hne së hë hna axeciën tre, kolo ijine easa kapa la itre ithuemacanyi ka hnyipixe. Pane mekune ju la tulu i Davita Joxu. Hnei nyidrëti hna axecië mekun göi Mefiboseth neköi api Saulo, ngo thenge pe la itre ithuemacanyi ka thoi hnei nyidrëti hna kapa. Ame hë e thupen, hnei Davita hna saze hmaca la hnei nyidrëti hë hna axeciën ke, itre ithuemacanyi ka meköti hë la hnei nyidrëti hna kapa.—2 Sam. 16:3, 4; 19:24-29. w17.03 2:14, 15

E hetre mekune nyine tro sa axeciën, nyipiewekë tro sa pane mekune hnyawa la itre trepene meköt qa hnine la Tusi Hmitrötr, me aqane troa trongëne itre ej. Pane mekune ju la ewekë celë: Ka faipoipo la trejin memine la ketre atr ka tha anyipici Iehova kö. Angeic a mekune troa cainöje trootro ngöne la ketre drai. (Ite hu. 4:20) Ngo, tha ajane kö trahmanyi tro angeic a cainöj ngöne la drai cili. Öni nyidrë, qea ha la tha hnei nyidroti hna xomi ijine troa pane ce lapa me ce tro, matre nyidrëti a ajane troa ce tro me angeic kowe la ketre götran. Matre, hnene la trejin hna waipengöne la itre xötr ne la Tusi Hmitrötr ka troa xatua angeic troa axecië mekune hnyawa. Atre hnyawa hi angeic ka hape, tro angeic a drengethenge Akötresie, nge hnei Iesu lo hna upi së troa cainöje trootro, me inine la itre atr. (Mat. 28:19, 20; Ite hu. 5:29) Ngo, atre fe hi angeic ka hape, tro la föe a drengethenge la trahmanyi angeic, nge troa atreine tulu ewekë hnene la itre hlue i Akötresie. (Efe. 5:22-24) Matre hapeu, kolo kö a thele hnene la trahmanyi troa sewe angeic troa cainöj? Maine pena, nyidrëti hi a ajane troa ce me angeic ngöne la ketre hnepe ijin. Ame easë itre hlue i Iehova, easa ajan matre tha tro kö a sasaithi tulu la aqane axecië mekune së, me amadrinë Iehova. w17.03 4:17