December

Peteru aposetolo a ithuecatre kowe la itre keresiano troa cile kowe la itre itupath. Kola amamane jëne la hna melën hnene la “angete xomi hni” hë, la aqane tro sa nyipici koi Iehova. Ketre, kola amekunë së laka tro kö a amanathithine la hne së hna nyipici koi Iehova. (Iako. 5:11) Hapeu epuni kö a akötre hnene laka, kola icilekeu me epun? Epuni kö la ketre qatre thup, maine ketre atre thupëne la sirkoskripsio nge tru la itre huliwa i epun? Maine eje hi, tro la tulu i Paulo a xatua epun. Hnei Paulo hna cile kowe la iakötrë, nge ketre tru la hnei angeice hna seseune la itre trejin. (2 Kor. 11:23-29) Ngo tha hmaca pi kö angeic ngöne la huliwa i Iehova, matre celë hi ka ithue trenge catrene la itre trejin. (2 Kor. 1:6) Tro fe la aqane xomihnin epuni la itre itupathi a xatuane la itre trejin troa hane cile hut. w16.04 2:11, 14

Hnei Iesu hë hna qaja amë ka hape, ame ngöne la hneijine ne la pun, troa cainöjëne la maca ka loi ne la Baselaia kowe la nöjei atr e cailo fen. (Mat. 24:14) Kola mama la huliwa cili the së, Itretre Anyipici Iehova. Hetre itre atr ka kepe së nge hetre itre xan ka xel. Nge ame thene la itre ka xel, hetre itre ka metrötrë së pine la huliwa hne së hna kuca. Ngo eje hi laka, huliwa lai hna perofetane hë ekö nge hne së hna eatrëne enehila. Ala nyimu la itre hmi ka selëne ka hape, angatr a kuca la huliwa hna ahnithe hnei Iesu. Ngo angatre hi a cainöj ngöne la itre uma hmitrötr, maine ngöne televisio, maine jëne ëternet, maine pena, angatre a qaja la aqane saze la mele i angatr hnei Iesu. Nge itre xan a mekune ka hape, e tro angatr a nue la mele i angatr thatraqane la itre ka puafala, ene la troa nyi droketre i angatr, me nyi infirmier me monitör tre, aqane cainöje i angatre hi lai. Ngo hapeu, eje kö lai la huliwa ne cainöj hnei Iesu hna ahnith? w16.05 2:1, 2

Ka icilekeu hë la itre musi memine la Baselaia i Akötresie, Baselaia hna acile lo 1914. Easenyi catre hë matre, tro la Baselaia a apatrene asë itre ej. (Sal. 2:2, MN, 7-9) Akötresie a nue troa cile la itre mus, ke aja i Nyidrë troa tro loi la fen. Celë hi ka aijijë së troa cainöjëne la maca ka loi ne la Baselaia i Akötresie. (Rom. 13:3, 4) Goi upi së fe hnei Akötresie troa thith thatraqane la itre ka cilëne la mus, matre tha tro kö a ajolë së troa nyihlue i Nyidrë. (1 Tim. 2:1, 2) Maine hetre ketre ewekë ka tha meköti kö hna kuca koi së, loi e tro sa thele ixatua thene la itre ka cilë mus. Celë hi hna kuca hnei Paulo Maine nyipici laka, Tusi Hmitrötr a qaja ka hape, Satana la tane la itre mus, ngo tha hna qaja kö ka hape, angeic a musinëne la nöjei ka cilëne itre ej. (Luka 4:5, 6) Matre, tha tro pi kö a mama ngöne la easë a ithanata ka hape, Satana la ka musinëne la itre ka cilëne la mus. Öni Tusi Hmitrötr: “The qaja angazone kö kete ate.”—Tito 3:1, 2. w16.04 4:5, 6

Nemene la nyine tro sa kuca matre troa amadrinë Iehova? Maine pëkö hna amekötine hnei Tusi Hmitrötr göne la jole hne së hna qëmeke kow, nyipi ewekë tro sa trotrohnine maine atrehmekun la aja i Iehova. Matre nemene la nyine tro sa kuca? Nyipi ewekë tro sa thithi koi Nyidrë me thele troa kepe thangane la emenen ej ngöne la mele së. Hnei Iesu hna amamane laka, atrehmekune pala hi nyidrë la aja i Iehova. Kola mama lai ngöne lo nyidrëti a thithi me kuca la ketre iamamanyikeu göi troa ithue ane la ka ala nyim. (Mat. 14:17-20; 15:34-37) Ketre, ame lo Satana a tupathi Iesu me upi nyidrë troa ujëne la etë koi falawa, tha kuca kö Iesu, ngacama ka mecijine nyidrë. (Mat. 4:2-4) Atre hnyawa hi Iesu la pengöne la Keme i nyidrë, matre atre hi nyidrë ka hape, tha aja i Iehova kö tro nyidrëti a huliwane la uati hmitrötr thatraqane la itre sipu aja i nyidrë. Ketre, xecie hnyawa koi Iesu ka hape, tro kö Iehova a xatua nyidrë me thue a i nyidrë. w16.05 3:7, 8

Maine nyipici laka, hetre itre götrane la Tusi Hmitrötr hna cinyihane thatraqane la itre xan e hnine la ekalesia. Haawe, qëmekene tro sa e la Tusi Hmitrötr, loi e tro sa pane sipone koi Iehova troa atrepengöne hnyawa la hne së hna e, me hetrenyi la inamacan matre tro sa öhne me trotrohnine la itre ini qaathei Nyidrë. (Ezera 7:10; Iako. 1:5) Ame la easa e Tusi Hmitrötr, loi e tro sa pane cil me isa thele ka hape: ‘Nemene la hnenge hna inine göi Iehova? Tro ni a trongëne tune kaa la ini cili? Nemene la aqane tro lai a xatuane la itre atr?’ E hne së hna majemine kuca lai, tro hë a hetre thangane la hne së hna e. Pane mekune jë: Hetrenyi e hnine la Tusi Hmitrötr la itre hna amekötine thatraqane la itre qatre thup. (1 Tim. 3:2-7) Qa ngöne laka, ala xalaithe hi la itre qatre thup e hnine la ekalesia, tro së lai a mekune ka hape, tha koi së fe kö la itre hna amekötine cili. Ngo, tro hë sa öhne la itre ini koi së. w16.05 5:7, 8

Ame la kola xomi angetre Iudra troa po e Babulona, traqa ha angatr a öhne la traon ka nyimu idrola, nge itre atr a thil kowe la itre haze ka calogitr. Ngo hnene la itretre Iudra ka mele nyipici, tui Daniela me köni sinee i angeic hna xele ma mele thenge la aqane mele ne la angetre Babulona. (Dan. 1:6, 8, 12; 3:16-18) Hnei angatr hna nue Iehova lo Atre Xupi Inege Ka Tru, troa xome ameköti angatr, matre tha cile kö angatre troa nyihlue i Nyidrëti. Ngacama hna mele hnei Daniela e nyipine la itre ewekë ka ngazo, ngo önine la angela i Akötresie, angeic la “ate hna hanyin.” (Dan. 10:11, 19) Ame ngöne la itre drai hnapan, hnene la atre xupi inege hna majemine xupexupe hnyawane la dro ka fedr thenge la aja angeic. Itre hlue i Iehova enehila a atrehmekune laka, Iehova hmekuje hi la Atr Musi Cile, nge meköti koi Nyidrë troa xome amekötine la itre nöj. (Iere. 18:6) Meköti fe koi Nyidrë troa xome ameköti së, easë isa ala cas. Ngacama tha Nyidrëti kö a musinë së troa ujë, ngo ame pe, aja i Nyidrë tro sa nue Nyidrë troa xome ameköti së. w16.06 2:1, 2

Aja i Satana tro sa mekune ka hape, tro hi sa mele madrin e hne së hna hetre mo. Matre angeic a iaö së troa aja mo jëne la fene i angeic, me jëne “la meciune ne la lue mek.” (1 Ioane 2:15-17; Gen. 3:6; Ite edomë 27:20) Easë pala hi a goeëne me drenge la itre publicité ka upi së troa itöne la itre mo ka hnyipixe. Hapeu, hnei epuni hë hna itöne la ketre ewekë ke hna goeëne la ketre publicité, maine hna öhne ngöne magazë? Maine jë, hna traqa tune lai koi epun, ngo e thupene hë epuni a öhne laka, tha ka nyipi ewekë kö koi epun. Maine hne së hna itöne pala hi la itre mo ka tha nyipi ewekë pe, tro lai a sewe së troa nyihlue i Iehova hnyawa. Maine jë troa pë traeme së troa ini Tusi Hmitrötr, me hnëkëne la itre icasikeu, me cainöje trootro. The thëthëhmine kö la ithuemacanyi nyine hmekë së hna hamën hnei Ioane aposetolo. Öni angeic: “Kola pate la fene hnengödrai, memine la hna aja kow.” w16.07 1:3, 4

Ame lo kola xötrei eköthe la pane ekalesia, hetrenyi la itretre Iudra, me itretre heleni, me itretre Roma, me itre trejin ka xulu qa ngöne la itre xa nöje ju kö. Isa hetre aqane mele i angatr, me qenenöj, me aja i angatr. Matre kola nango ajolë angatr troa nue la itre ewekë hnei angatr hna majemin ekö, me nyihlue i Iehova thenge la aja i Nyidrë. Ame hnei Paulo hna amexeje koi angatr ka hape, casi hi la Akötresie së, ene Iehova. Nge tune kaa la itre keresiano enehila? Hnei Isaia hna perofetane ka hape, ame “ngöne la ite drai hnapine,” tro la nöjei atr ka xulu qa ngöne la nöjei nöj a nyihlue i Iehova. Tro angatr a qaja ka hape: “Tro nyidëti a ini shë la ite jë i nyidë, nge tro sha trongëne la ite gojenyi qa thei nyidë.” (Is. 2:2, 3) Drei la madrine së enehila troa öhne la aqane eatre la hna perofetane celë! Ka xulu la itre keresiano qa ngöne la itre nöje ka nyimutre, me itre qene hlapa ka nyimutre, me itre qenenöje ka nyimutre. Ngo ame pe, ka casi së ngöne la easë a nyihlue i Iehova. w16.06 3:15, 16

Nyipici laka, nango jole pi hë koi së troa mekune la itre manathithi ka tru hnei Iehova hna hnëkëne thatraqane la itre hna iën, itre ka troa ce musi me Keriso e hnengödrai. (Luka 22:28-30; Fil. 3:20, 21; 1 Ioane 3:2) Angatre hi elanyi la “Ierusalema ka hnyipixe,” ene la föi Keriso. (Hna ama. 3:12; 17:14; 21:2, 9, 10) Tro angatr a ce huliwa me Iesu göi troa “amelene la nöjei nöj,” ene la troa thepe angatr qa ngöne la ngazo me mec, matre pexeje pi angatr. (Hna ama. 22:1, 2, 17) Ame la ketre jëne ka sisitria ne la ihnimi gufa i Nyidrë elany, tre ene la troa amejëne la itre atr qa ngöne “la hua.” (Ioane 5:28, 29) Hetrenyi thene la itre ka mec la itre hlue i Iehova ka mele nyipici ekö qëmeke i Keriso, memine la itre trejin ka sine la “ite xa mamoe,” nge ka mele nyipici uti hë la mec ngöne la itre drai ne la pun. Tro hmaca a amele angatr elany, matre tro pala kö angatr a nyihlue i Iehova.—Ioane 10:16. w16.07 4:13-15

Nemene la ka troa xatua së troa ‘hmek’ me isa hnëkë së kö kowe la drai Iehova? Nyipi ewekë troa hetrenyi the së la aja ka catre troa kuca la loi. Ngo hetre ketre ewekë mina fe nyine tro sa kuca. Köni drai qëmekene tro Iesu a mec, hnei nyidrëti hna ahnithe kowe la itretre drei nyidrë ka hape, loi e tro angatr a catre thith me sipo ixatua koi Iehova. (Luka 21:36) Ketre tune mina fe, nyipi ewekë tro sa thithi lapa koi Iehova matre tro sa lapa hmek enehila ngöne la itre drai tixenuë. (1 Pet. 4:7) Öni Iesu, tro la pun a traqa “ngöne la ijine hnei nyipunieti hna tha mekune kö.” (Mat. 24:44) Haawe, nyipi ewekë tro sa lapa hmek. Tha ijine tro kö sa nyape thele la aqane mele ne la fen, lo hna hape, ka hamë madrin, ke pu ne jidri lai. Loi e tro pe sa drengethenge la hna qaja hnei Tusi Hmitrötr, ke Iehova me Iesu e cili a amamane koi së la aqane tro sa lapa hmek. Matre, nyipiewekëne jë së la itre hna perofetan hnei Tusi Hmitrötr, memine fe la aqane eatr itre ej. Nge qale catre jë së koi Iehova me amë panëne la Baselaia ngöne la mele së. Tro lai a hnëkë së kowe la ijine traqa la pun. (Hna ama. 22:20) Jëne mele së hi lai! w16.07 2:15-17

Tro fe la faipoipo a catr, e hnei lue trefën hna catre “ixomi hninekeune me inuekeun.” Pine laka, lue atr ka tha pexeje kö nyidro, tro pala hi nyidroti lai a ngazo, ketre koi ketre. Nge e cili hi la ijine tro nyidro a xomi ini qa ngöne la itre tria i nyidro, me inine troa nue la ngazo i ketre, me amamane la ihnim hna qaja hnei Tusi Hmitrötr. Ame la ihnimi cili, tre celë hi “otene ka nyipi loi.” (Kol. 3:14) Tro la lue trefën a amamane la ihnimi cili, e hnei nyidroti hna ixomihninekeun, me menyik, me catre melëne la ihnim, ke “tha ate meku ngazo kö” la ihnim (1 Kor. 13:4, 5) Haawe, e traqa jë la ketre jol, loi e tro lue trefën a canga seng qëmekene troa lö la jö. (Efe. 4:26, 27) Nyipici laka, nyipi ewekë la ipië ke tha hmaloi kö troa qaja ka hape, “ekölö hi ni, menu hë ni la hnenge hna akötrë eö.” Ngo tro lai a xatuane la lue trefën troa elë hune la jol, me acatrene la casi nyidro. w16.08 2:6

Hnei Iesu ekö hna catre cainöjëne la maca ne la Baselaia. Nge hnei nyidrëti mina fe hna xomi ijine troa inin me hnëkëne la itretre drei nyidrë. Hnei nyidrë hna amamai angatr la aqane troa inine la itre atr, me thupëne hnyawane la itre hlue i Akötresie. Matre, hnene la itretre dreng hna inine troa ujë tune la atre thupën aloine la itre mamoe. (Mat. 10:5-7) Hnei Filipo mina fe hna catre cainöj, ngo hnei angeice fe hna xomi ijine troa inine me hnëkëne la itre nekö i angeic jajinyi troa hane huliwa tui angeic. (Ite hu. 21:8, 9) Enehila mina fe, nyipi ewekë pala hi tro sa inin me hnëkë itre xan. Pine nemen? Ame ngöne la itre ekalesia e cailo fen, ala nyimu la itre atr ka tha hane petre kö xomi bapataiso. Matre, nyipi ewekë troa inin me hnëkë angatr. Loi e tro sa xatua angatr troa trotrohnine la enyipiewekëne la troa e me inine la Tusi Hmitrötr cas. Nge loi e tro fe sa hnëkë angatr göne la huliwa ne cainöj, me göi troa inine la itre atr. Ketre, loi e tro mina fe sa inin me hnëkëne la itre trejine trahmanyi ka xötrei xomi bapataiso, matre tro fe angatr elanyi a hane xome la hnëqa ne drikona me qatre thup. Nge ame lai, tre hnëqa ne la ekalesia asë troa inin me hnëkëne la itre atren ej. w16.08 4:1, 2

Ame la easë a ce huliwa memine la itre trejin, easë hi lai a acatrene la imelekeu së memine la casi së. Ketre, easë fe lai a acatrene la lapaune së kowe la itre hnei Iehova hna thingehnaean jëne la Baselaia i Nyidrë. Haawe, ame la easë a acatrene la itre ime ka thip, easë hi lai a xatuane la itre trejin troa cile catr, me lapa mekune la mel elany. (Is. 35:4) Nge, easë fe hi lai a ketre acatrene la itre sipu ime së, me lapaune së kowe la mel elany. Ame la easë a lapa mekune la aqane amelene Iehova ekö la nöje i Nyidrë, kolo fe hi lai a acatrene la lapaune së, me mejiune së koi Nyidrë. Matre, ‘the kucakuca kö la lue ime i eö’ e traqa ju la itre jol me xou! (Zef. 3:16) E tro eö a sipo ixatua koi Iehova, tro kö la ime ka catre i Nyidrë a aegöcatrenyi eö, me xome xatua eö matre traqa kowe la itre manathithi ne la Baselaia, laka calemi catre hë.—Sal. 73:23, 24. w16.09 1:16-18

Ame la kola iëne la aqane heetr hnene la itre hlue i Iehova, angatr a iën thenge la trepene meköt ka mama e caha. Easa saze hnaheetre thenge la ijin, la kola hedredrei maine hnötr, maine hnene la aqane mele së, maine hnene la itre ewekë ka traqa koi së, ngo ame pe, tha saze kö la itre trepene meköti Iehova. (Mal. 3:6) Ame ngöne la itre ijine hedredrei, nango jole pi hë troa iëne la itre iheetr ka ijij nge ka amamane la ipië me metrötr. Ngo hetre madrinene la itre trejin la easa thupëne la aqane heetre së. Tha hna heetrëne kö la itre iheetr ka fedr koi ngönetrei, maine ka hlupahlupa pena. (Iobu 31:1) Matre ame fe la easë a mekune troa sië hnagejë maine sië piscine, loi e tro sa thupëne hnyawa la hnaheetr hne së hna troa sie fë. (Ite edomë 11:2, 20) Nge, ngacama ala nyimu la itre atr e celë fen ka sie fë maillot de bain, ngo loi e tro sa thupëne la nyine tro sa sie fë matre tro pala kö së a atrunyi Akötresie. w16.09 3:11, 12

Hnei Iesu ekö hna majemine hnyinge kowe la angetre dreng, matre troa atre la mekuna i angatr. Loi e tro fe nyipunieti a hnyingëne la mekuna ne la itre nekö i nyipunie, nge drenge hnyawa ju la nyudreni a fe la hni nyudren. Maine tha canga kapa kö la nekönatr la itre ini qa hnine la Tusi Hmitrötr, xomihni ju nge xatua nyëne jë troa ketre thele la itre mekune ka sa la itre hnyinge i nyën. Ewekë ka loi lai la tro la itre nekö i nyipunie a hnying, ke kolo lai a hape, aja i nyudren troa atre. Hnei Iesu fe lo hna hane hnying lo nyidrëti a co. (Luka 2:46) Atrepengöi nyudreni hnyawa jë. Hapeu, ka mejiune nyudreni koi Iehova? Angatre kö a mejiune kowe la hna qaja hnene la Tusi Hmitrötr? The mekune pi kö laka, hnene laka angatr a cainöje trootro me sine la itre icasikeu, haawe, itre ka lapaune hë angatr koi Iehova. Thele jë la itre ewekë ka nango ajolë nyudreni troa lapaune koi Iehova. Nge the mano kö ithanata koi nyudren ngöne la epuni a ce huliwa. Thithi jë thatraqai nyudren ngöne la epuni a ce lapa, maine ngöne la epuni a thithi cas. w16.09 5:3-5

Ala nyimu la Itretre Anyipici Iehova enehila ka catre aeatrëne la hna perofetane hë, ene la troa cainöj kowe la “nöjei nöj’ asëjëihë, me nöjei tribu, me ite qene hlapa, me nöjei ate.” (Hna ama. 14:6) Epuni fe kö la ketre e angatr ka inine la ketre qene hlapa? Hetre itre mesinare, nge hetre itre xane fe ka cainöj ngöne la itre götrane nöj ka aja ixatua. Ame itre xa trejin, angatre hë ngöne la ekalesia ka qaja la ketre qene hlapa kö ngöne la nöje i angatr. Nyipi ewekë tro la itre hlue i Iehova asë a amë panëne la imelekeu i angatr me Iehova ngöne la mele i angatr, memine fe la imelekeu ne la hnepe lapa i angatr me Iehova. Ngo, ame itre xa ijin tru la jole së, matre tha hmaloi kö troa ini Tusi cas. Nge jole catre hmaca kö kowe la itre ka sine la ekalesia ka qaja la ketre qene hlapa kö. Maine nyipici laka, loi e troa inine la qene hlapa hnene la itre ka sine la ekalesia ka qaja la ketre qene hlapa, ngo nyipi ewekë fe tro angatr a thupëne matre tro pala hi angatre a inin ajuine la Wesi Ula i Akötresie.—1 Kor. 2:10. w16.10 2:1-3

Ala nyimu la itre trejin enehila ka madrine ngöne la huliwa i Iehova ngacama kola akötrë angatr. Ame itre xan e angatr tre, hna akalabusin e Érythrée, Singapour, me Corée du Sud, ke xele kö angatr ma “xome la taua.” Xalaithe hi la itre hlue i Iehova hna akalabusine me qanangazone tune la itre trejin celë. Ngo ala nyimu la itre ka mel ngöne la akötr ke, itre ka puafala angatr, maine hna traqa la hulö koi angatr, maine ga isi la nöje i angatr. Ame itre xan, hnei angatr hna xötrethenge la tulu i Aberahama, Isaaka, Iakobo, me Mose. Hnei angatr hna nue pe la itre mo i angatr, me hnëqa i angatr ngöne la nöj matre troa huliwa i Akötresie. Nemene la ka xatuane la itre trejin troa nyihlue i Iehova cememine la madrin? Hnene la ihnimi angatr koi Iehova, me lapaune ka catre i angatr kowe la itre hnei Nyidrëti hna thingehnaean. Tha luelu kö angatr laka, tro kö Nyidrëti a nyijune kowe la itre ka nyihlue nyipici koi Nyidrë. Tro Nyidrëti a aijijë angatr troa mele epine palua ngöne la fen ka hnyipixe, nge ame e cili, patre hë la thiina ka tha meköti kö.—Sal. 37:5, 7, 9, 29. w16.10 3:15, 16

Ame la kola traqa la xou me kucakuca koi Ieremia perofeta, hnei Iehova hna qaja axeciëne koi angeic ka hape, tro Nyidrëti a xatua angeic. (Iere. 1:6-10) Hnei Iehova fe hna upe la angela troa aegöcatrenyi Daniela perofeta ka qatre hë. Hnene lai angela hna hë Daniela ka hape, “ate hna hanyin.” (Dan. 10:8, 11, 18, 19.) Hapeu, tro kö epuni a ithuecatrene la itre trejin, ene mina la itre pionie, me itre ka qatrë hë ka thatreine hë kuca la itre hna majemine kuca ekö? Maine nyipici laka, nyimu macatre ne ce mele Iehova me Iesu, ngo ame lo Iesu e celë fen, atre hnyawa hi Iehova ka hape, nyipi ewekë tro pala kö Nyidrëti a hamë ithuecatre kowe la nekö i Nyidrë. Matre alua drenge Iesu la keme i nyidrëti e ithanata qa hnengödrai. Kolo ijine Iesu a nyiqaane la huliwa ne cainöje i nyidrë, me ngöne lo macatre tixenuë i nyidrë e celë fen. Öni Iehova: “Dei la Nekönge hniminang ; ini a madi nyidë.” (Mat. 3:17; 17:5) Eje hi laka hna thuecatre i Iesu lo Iehova a qaja amamane la etrune la ihnim me madrine i Nyidrë. Qëmekene tro Iesu a mec, hnei Iehova hna upe koi Iesu la ketre angela, matre troa ithuecatr me akeukawane la hni Iesu, ke, tru pala ha la hleuhleu i Iesu.—Luka 22:43. w16.11 1:7, 8

Tha ka hmaloi kö troa xomehnöth la trenge hni së. Hnene laka, isa qenenöje së kö, me isa hane ngönetrei së kö, maine jë troa akötrë së hnei ketre, maine qaqa së pena. Ame e cili, tha madrine kö së, nge easa wesitr. Ketre, tru catre hmaca kö la hleuhleu së, e hna akötrë së hnene la trejin me easë. Pane mekune ju la etrune la itre jol hne së hna neën, e hne së hna xötrethenge la eamo celë! (Ite edomë 16:32) Tusi Hmitrötre fe a upi së troa nue la ngazo i ketre. Öni Iesu lo, e tha nue kö së la ngazo i ketre, ketre tha tro kö Iehova a nue la ngazo së. (Mat. 6:14, 15) Haawe, nyipi ewekë tro sa catre xomihni, me saqe nue la ngazo i ketre. Maine tha xomehnöthe kö së la itre trenge hni së, tro së lai a lapa fë elëhni, nge tro fe hë së lai a methinëne la atr. Maine pena tro së lai a ithanatane matre tro la itre trejin ne la ekalesia a nyi xöle së.—Lev. 19:17, 18. w16.11 3:4-6

Pine laka ka ajane troa e me inine la Tusi Hmitrötr, hnei Charles Russell me itre xan ju kö hna nyiqaane ini ajuine la Tusi Hmitrötr lo macatre 1870. Hnei Charles Russell hna pane thel la hmi ka hamëne la itre ini ka nyipici. Angeice pë hë a xome jë la itre ini hna hamën hnene la itre hmi asë, itre ka lapaune ju hë koi Akötresie maine itre ka lapaune koi itre xa haze, me ce wange itre ej memine la hna qaja hnene la Tusi Hmitrötr. Angeice hë a trotrohnine e cili ka hape, pëkö ala casi thene la itre hmi cili ka xötrethenge hnyawa la hna qaja hnene la Wesi Ula i Akötresie. Ame hnei angeic hna ithanata jë memine la itre hene ne hmi ka ala nyimu. Angeic a thele matre tro angatr a kapa la itre ini hnei angeic me itre sine huliwa i angeic hna öhn e hnine la Tusi Hmitrötr. Nge, aja i angeic tro fe angatr a hane ce thawa itre ej ngöne la uma ne hmi angatr, ngo, xele kö la itre hene ne hmi. Haawe, trotrohnine hë Russell me gurupe i angeic, lo itre hna hën ka hape, Itretre Ini Tusi Hmitrötr ka hape, tha tro kö angatr a ce huliwa i Akötresie memine la itre atrene la hmi ka thoi. w16.11 4:14

Nyipici laka, tha easë kö a nyixetë, me hmo hnei ka haitr, me itre xa ewekë ju kö ka ngazo. Ngo, loi e tro fe sa ananyine la nöjei ewekë hna xelen hnei Iehova. Ka tune la troa kuci huliwa ka sis, loi e tro sa ananyine la nöjei nyine iamadrinë ka amamane la itre iatr ka sis. Ka tune fe la troa hmo hnei kahaitr, tha loi kö troa ij uti hë la drenge së ka hape, nango hmo hë së. (1 Kor. 6:9-11) Loi e tro sa thele troa cile catr ngöne la itre itupath ka tune la, ke ijije hi. Haawe, thele jë së troa eatrëne la hna qaja hnei Paulo ka hape: “The joxu kö la ngazo ngöne la ngönetei nyipunie ka troa mec, ene la denge thenge hnei nyipunie la ite aja ne ej.” (Rom. 6:12; 7:18-20) Nyipici laka, thatreine kö së troa kötrene la nöjei huliwa ka ngazo, ngo e hne së hna isine troa cile catr qëmekene la nöjei itupath, easë hi lai a amamane ka hape, hetre hni ne ole së kowe la ihnimi gufa i Akötresie me Iesu. w16.12 1:19-21

Hnei Iesu hna qaja axeciëne ka hape, e tro sa sipone la uati hmitrötr kowe la Keme së, tro Nyidrëti lai a hamën. (Luka 11:10-13) Kola xatua së hnene la uati hmitrötre i Akötresie, ene la mene i Nyidrë troa melëne la itre thiina i Nyidrë, Akötresie Kapucatinasë. (Kol. 3:10) Hna hëne la itre thiina cili e hnine la Tusi Hmitrötr ka hape, “wene la [u]a.” E hne së hna thel troa melëne la itre thiina celë, tro ha lolo la aqane imelekeu së me itre xa atr. Ketre, tro fe a trianyi së hnene la itre ewekë ka troa ahacene la hni së. Nyipi ewekë la thiina ka ipië matre troa mejiune kowe la “ime ka mene i Akötesie” me ‘nue koi Nyidrë’ la itre hace së. (1 Pet. 5:6, 7) Maine ka hni ka ipië epun, tro Iehova a xatua epun me thupë epun. Eje hi laka, ame la epuni a atre la hnei epuni hna atreine kuca, me thatreine kuca, tha epuni kö a qale kowe la sipu inamacane i epun. Matre tha epuni hë lai a hnehengazo menu ke, epuni hë a qale catr koi Akötresie.—Mika 6:8. w16.12 3:7, 12

Hnei Noa hna catre cainöjëne la maca. Hnene la huliwa celë hna acatrene catrëne la lapaune i angeic. Ketre, hnei angeice hna trongëne hnyawa la itre hna amekötine hnei Iehova göne la aqane troa cane la aka. (Heb. 11:7) Nyipi ewekë fe tro sa catre “huliwa i Joxu.” (1 Kor. 15:58) Loi e tro sa ixatua ngöne la hnë xupi uma, me nyihnyawa Uma ne Baselaia me Uma ne Asabele. Loi e tro fe sa saen ngöne la itre ijine asabele, me ixatua ngöne la itre Bethela, me ngöne la itre uma ne ujë qene hlapa. Ngo ame la ka nyipi ewekë tre, ene la troa catre cainöj ke, celë hi lai ka troa acatrene la mejiune së kowe la itre drai elany. Nge, ame la easa ce thawa la mejiune së memine la itre atr, easë pala hi a lapa catr ngöne la gojenyi ne mel!—1 Kor. 9:24. w17.01 1:8, 9

Loi e tro fe sa metrötrëne la aqane axecië mekune hnene la itre trejin. Pine nemen? Pine laka, hetrenyi së asë la atreine troa ië ewekë, ngo tha kolo kö lai a hape, troa ca mekune hna axeciëne pala hi hnene la lue keresiano. Ka nyipici fe hi lai ngöne la aqane ujë së, memine la aqane nyihlue i Iehova së. E trotrohnine hi së ka hape, tro kö sa isa kepe thangane la hne së hna axecië mekun, haawe, tro hë së lai a metrötrëne la aqane ië ewekë ne la itre trejin, ngöne fe la itre götrane ka co ne la mele i angatr. (1 Kor. 10:32, 33) Hnei Iehova hna aijijëne la atr troa ketre sipu axecië mekun, celë hi atr lai hna nue gufan. (2 Kor. 3:17) Loi e tro sa wang atrune la ahnahna celë ke, ej a aijijë së troa axecië mekune hnyawa, me aijijë së fe troa amamane la ejuine la ihnimi së koi Iehova. Matre, loi e tro pala hi sa ië ewekë hnyawa matre troa atrunyi Iehova, me metrötrëne la aqane ië ewekë i itre xan. w17.01 2:15, 17, 18

Tha tro kö sa thele troa sipu selë së, maine nyi waina i atr, ngo tro pe sa “hni ka menyike me thilimek [maine, lapa loi hni].” (1 Pet. 3:3, 4; Iere. 9:23, 24) Ame la hne së hna mekune göi së kö tre, kola mama ngöne la aqane ithanata së, me ujë së. Maine jë, tro sa thel matre troa atrunyi së hnene la itre atr ke, hetre ewekë ka tru hne së hna kuca, maine hetre ewekë hne së hna atre, maine hetre itre atr hne së hna atre. Maine pena tro sa amamane koi itre atr la ketre ewekë ka tru hne së hna kuca, ngo hna xatua së pe hnei itre xan. Pane mekune ju la pengöi Iesu. Maine ju tro hi nyidrëti a amamane kowe la itre atr la etrune la inamacane i nyidrë matre troa hai nyidrë. Ngo, Wesi Ula i Akötresieti pala hi la hnei Iesu hna amexej. Tha aja i nyidrëti kö tro la itre atr a atrunyi nyidrë. Hnei nyidrëti pala hi hna thele troa atrunyi Iehova. w17.01 4:12

Tha ka jole kö koi nyidro troa atrepengöne la wathebo cili. Nge ketre, tha ka jol kö troa trongëne ke, nyimutre la itre xa wene sinöe ka lolo ngöne la lapa. Jëne la ketre un, hnei Satana Diabolo hna iaö Eva matre tha tro kö angeic a drei Iehova, Keme i angeic. (Gen. 3:1-5; Hna ama. 12:9) Hetre mekune hnei Satana hna amejëne kola hape, hna wathebone la atr troa xen “la wene la nöjei sinöe ne la hlapa.” Kösë öni angeic: ‘Eö a qaja ka hape, tha ijiji eö kö troa kuca la sipu aja i eö?’ Thupene lai, öni angeic koi Eva: “Tha trojë kö nyipo a mec.” Angeic e cili a thoi. Ame hnei angeic hna thel troa iaö Eva me hape, tha nyipi ewekë kö troa drei Akötresie. Öni Satana: “Ate hmekune kö Akötesie laka ngöne la drai ne tro nyipoti a xeni wen’ ej, tro ha maca la lue meke i nyipo.” Öni Satana, tha ajane kö Iehova tro nyidroti a xen la wene sinöe wanga tru jë la inamacane i nyidro. Ame hë e cili, hnei angeic hna qaja la trengathoi celë me hape, ‘Tro hë epon a lue akötresie, matre atrehmekune fe la loi me ngazo.’ w17.02 1:8, 9

Öni Isaia, tro nyidrëti a “mekene me ate musi.” (Is. 55:4) Nge ame Daniela, hnei angeic hna qeje Mesia ka hape, tro nyidrëti a “Joxu [maine, Meken].” (Dan. 9:25) Kola mama laka, Iesu Keriso hi la “mekene” la nöje i Akötresie. (Mat. 23:10) Canga saqe hi la itretre dreng xötrethenge nyidrë, nge xecie hnyawa koi angatr ka hape, celë hi atre lai hna iëne hnei Iehova. (Ioane 6:68, 69) Nemene la ka anyipicine lai koi angatr? Ame lo ijine kola bapataiso Iesu, hnei Ioane hna öhne “la hnengödrai hna thawa, memine la [u]a kola sheshë hui anganyidë kösë piny.” (Mar. 1:10-12) Ame ngöne lo ijine Iesu a kuca la huliwa i Akötresie e celë fen, hnene la uati hmitrötre i Akötresie hna hamë trenge catre i nyidrë matre troa inine la itre atr, me kuca la itre iamamanyikeu. (Ite hu. 10:38) Hnene fe la uati hmitrötr hna xatua Iesu troa melëne la itre thiina ka lolo, ene la ihnim, me madrin, me lapaune ka catr. (Ioane 15:9; Heb. 12:2) Pëkö ketre meken ka amamane ka hape, hetrenyi thei angeic la uati hmitrötre i Akötresie tune lai. Eje hi laka, Iesu hi la hna iën hnei Iehova troa nyi mekene la nöje i Nyidrë. w17.02 3:15, 16

Hnene la ange aposetolo hna nyiqaane elemekene la ekalesia i keresiano lo Penetekos macatre 33. Öni Tusi Hmitrötr, “Peteru a ce cile memine la ala cako [maine 11,]” me tro fë la itre ini ne iamele kowe la ka ala nyimu. (Ite hu. 2:14, 15) Ala nyimu thei angatr la itre ka kapa la hmi keresiano. Thupene lai, hnene la itre ka xötrei lö hna “cate kowe la hna inine hnei ang’ aposetolo.” (Ite hu. 2:42) Ange aposetolo la atrekë hnëqane la troa musinëne la mani ne la ekalesia. (Ite hu. 4:34, 35) Angatre fe a inine la itre hlue i Akötresie, me thithi thatraqai angatr, me hape: “Tro pala kö huni a cate ngöne la thith, memine la huliwa ne la wesi ula.” (Ite hu. 6:4) Ketre, angatr a upe la itre keresiano ka atreine huliwa troa cainöj ngöne la itre götrane tha hna ketr pala kö. (Ite hu. 8:14, 15) Ame hë e thupen, kolo fe hë a nyixane la ange aposetolo hnene la itre xa qatre thup hna iën matre troa elemekene la ekalesia. Angatre hi lo lapa ne xomi meköt, nge ka elemekene la nöjei ekalesia asë.—Ite hu. 15:2. w17.02 4:4

Kola jole koi së troa atre la aqane troa atrunyi itre atr pine laka, hna löth la itre atr hnene la aqane ujë ne la fene i Satana. Ala nyimu la itre atr ka xome la itre xa trahmanyi maine föe pena ceitu me itre idrola. Tha atrunyi angatre kö thenge la aja i Iehova. Nge, itre atr pena ha a atrunyi angatre menu me xome ceitu angatr me Akötresie. Kola xome la aqane heetr, me aqane ujë, me thiina ne la itre hene ne politik me hmi, me itre ka elo ngöne film, me itre xa ka hlemu ju kö. Atre hnyawa hi la itre keresiano ka hape, tha loi kö troa atrune la ketre atr tune lai. Iesu hmekuje hi la tulu ka pexej nyine tro sa xötrethenge. (1 Pet. 2:21) Tha tro kö sa thëthëhmine ka hape, “ngazo asë hë la nöjei ate, me tha traqa kowe la lolo i Akötesie.” (Rom. 3:23) Matre, pëkö ketre atr ka ijij nyine troa nyihluen. E atrune menune hë së la ketre atr, tha madrine kö Iehova. w17.03 1:6-8

Nemene la ka troa amamane koi së ka hape, easa nu apexejenyi së kö koi Iehova? Loi e tro sa isa waipengö së, me hape: ‘Tro kö ni a drengethenge Iehova, ngacama jol pi hë? Eni kö a isine matre tha tro kö a adrone la ekalesia?’ Nemene la nyine tro eö a kuca e traqa ju upe trön eë la ketre atr hnei eö hna hnim ka tha ietra kö? Tro kö eö a isine troa ananyine la atr ka tune lai? Nemene la pengöne la hni eö e cili? Tui Asa, ame itre xa ijin, tro së lai a mekune ka hape, kola icilekeu me easë hnene la nöjei atr asë. Maine jë, itre sine ini eö, maine itre porofesöre i eö a hnyimasai eö ke, Atre Anyipici Iehova eö. Maine pena, kola jele hmo eö hnene la itre sine huliwa i eö ke, eö a xomi mano göi troa sine la asabele, maine pena tha eö kö a thel troa hane huliwa atrun. Ame ngöne la itre ijine cili, mejiune ju koi Iehova, tui Asa. (2 A. l. ite jo. 14:11) Thithi jë koi Nyidrë, nge catre pi, nge catre jë kuca la ka meköt. Hnei Iehova lo hna aegöcatrenyi Asa, ketre tro fe Nyidrëti lai a aegöcatrenyi eö. w17.03 3:6-8

Öni Tusi Hmitrötr, tha tro kö sa nyimenyime axeciëne la itre mekune ka tru. Loi e tro sa xomi ijine matre troa waipengöne hnyawane la nöjei götrane lai jol, matre tro sa axecië mekune hnyawa. (1 Thes. 5:21) Qëmekene troa axecië mekun, loi e tro la he ne hnepe lapa a xomi ijine troa ithel e hnine la Tusi Hmitrötr, me e hnine la itre itusi së. Loi e tro fe angeic a dreng hnyawane la mekuna ne la itre atrene la hnepe lapa. Hnei Akötresieti lo hna upi Aberahama troa dreng la föi angeic. (Gen. 21:9-12) Loi e tro fe la itre qatre thup a xomi ijine troa ithel. Maine hetre ithuemacanyi ka hnyipixe hna kapa hnei angatr, tro angatre lai a saze la ketre mekune hnei angatre hë hna axeciën. Tha tro kö angatre lai a xou troa ujë tun, ngacama tha metrötrë angatre ju hë hnei itre xan. Loi e tro la itre qatre thup a atreine tulu ewekë, me hni ka ipië, nge hetre ajane troa saze la itre mekune hna axeciëne hë, e ka nyipiewekë. Nge ketre, nyine loi koi së asë troa xötrethenge la tulu i angatr. Tro lai a xatuane la ekalesia troa mele tingeting, me cas.—Ite hu. 6:1-4. w17.03 2:16