Maac

Hetre trejine kö e hnine la ekalesia hnei epuni hna xele ma hën kowe la hnalapa i epun? Maine jë, thatreine kö epuni troa könëne la trejin ka hetre thiina hnei epuni hna xele ma wang. Öni Tusi Hmitrötr, e tro epuni a kapa hnyawa la itre atr, ene mina fe la itre ithupëjia me epun, troa lolo la aqane imelekeu i epun me angatr. (Ite edomë 25:21, 22) E tro epuni a kepe ketre kowe la hnalapa i epun, tro lai a xatua epuni troa elë hun la itre mekun ka ngazo, me lapa tingeting me angeic. Tro hë epuni a goeë angeic tune la aqane goeë angeic hnei Iehova lo Nyidrëti a e angeic koi Nyidrë. (Ioane 6:44) Ame la kola upi epun hnene la ihnim troa könë angeic, nge tha mekune kö angeic, tre, kola saze la aqane imelekeu i epon. Nemene la aqane troa xecie koi epuni laka, ihnim la ka upi epun troa ujë tun? Loi e tro epuni a trongëne la eamo hna hamëne ngöne la topik ne la drai enehila. Loi e tro palahi a ej ngöne la mekuna së laka, sisitria kö la itre trejin hu së. Hetre ini nyine tro sa xom qa ngöne la aqane lapaun angatr, me catr, me itre xa thiina ju kö. E tro sa mekun la itre thiina ka lolo ka ej thei angatr, tro lai a akökötrene la ihnimi së koi angatr, me thue aja së tro palahi a ikep. w18.03 19 par. 18-19

Ame la ketre itupathi ka tru kowe la kem me thin, tre, ene la troa drengethenge la itre hna amekötine ngöne la kola upetröneë la nekönatr. Hna qaja hnene la ketre trejine föe ngöne la kola upetröneë la nekö i eahlo jajiny, ka hape: “Hnenge hna thele e hnine la itre itusi së la ketre kepin ka troa aijijë eni troa iöhnyi memine la nekönge jajinyi me aping.” Ngo hna xatua eahlo hnene la föi eahlo troa trotrohnine laka, ka tru hë angeic. Nyipiewekë tro pe nyidroti a mele nyipici koi Iehova. Thupene la itre macatre, kola kapa hmaca la nekö i eahlo e hnine la ekalesia. Önine la thin: “Angeic a metrötrë nyio ke, hnei nyio hna drengethenge Akötresie.” Maine troa upetröneë la nekö i epun, hapeu, tro kö epuni a ‘lapaune koi Iehova hnene la hni ka pexej’? Tro kö epuni a amamane koi Nyidrë laka, ‘tha epuni kö a lapa qale kowe la hnei epun hna trotrohnin’? (Ite edomë 3:5, 6) Haawe keme me thine fe, catre pi kapa la ihaji Iehova, me drenge la itre hnei Nyidrëti hna amekötin, ngacama hace koi epun. The trije kö la ihaji, ngo drenge ju pe me kapa! w18.03 31 par. 12-13

Tha hna amekötine kö hnei Tusi Hmitrötr la macatre ka ijij troa xomi bapataiso. Ame la aliene la hna hape, troa “inine” ngöne Mataio 28:19, tre, kola qaja la troa thele matre tro la atr a hane ketre atre drei Iesu. Ame la atre dreng tre, kola qaja la atre ka thel troa trotrohnine la itre ini qaathei Iesu, me trongëne itre ej. Matre, loi e tro la keme me thin a inine la nekönatr, e co petre kö, matre tro nyën a nue la mele i nyën koi Iehova, me ketre atre drei Keriso. Eje hi laka, tha ijije kö kowe la itre medreng troa xomi bapataiso. Ngo, Tusi Hmitrötr a amamane ka hape, ngacama co petre kö la nekönatr, ngo ijiji nyëne hi troa trotrohnin, me wangatrune la itre nyipici ne la Tusi Hmitrötr. Timoteo la ketre atre dreng ka mekun troa nyihlue i Iehova lo co petre kö, nge catrecatre la lapaune i angeic. (2 Tim. 1:5; 3:14, 15) Nge, ame la kola sasaithe la 20 lao macatre, hna hamë angeic la ketre hnëqa ka tru ngöne la ekalesia.​—Ite hu. 16:1-3. w18.03 9 par. 4-5

Ame la easa atre Iehova, hne së hna saze la aqane mele së. Nge, easë palahi a amekötine la mele së thupene la hna xomi bapataiso. Pine laka, itre atr ka tha pexeje kö së, hetre ewekë nyine tro palahi a amekötin the së. (Fil. 3:12, 13) Maine thöthi së, maine qatr, ngo loi e tro sa isa waipengö së, me hape: ‘Drenge kö ni laka, easenyi catre ni koi Akötresie? Tune kaa la thiinang, ka ihmeku palahi memine la thiina i Keriso? Nge tune kaa la pengöne la hning, me aqane ujëng ngöne la itre icasikeu, me ngöne la itre xa götran? Nemene la ka mama ngöne la itre porotrikeng? Nemene la ka mama ngöne la aqane heetreng me isej, memine la kola haji ni? Nemene la aqane ujëng la kola traqa la itupath? Hapeu, ka nyipi atre kö ni?’ (1 Kor. 14:20) Tro la aqane sa la itre hnying celë a amamane la ejuine la imelekeu së me Iehova. w18.02 24 par. 4-5

Easa melën la hneijine ka ketre pengöne kö. Iehova a acasine la itre atr “qa ngöne la ite xöte nöj’ asë, me ite tribu, me nöjei ate, me ite qene lapa,” tune la hna qaja amë hë hnei Tusi Hmitrötr. Kola qaja la “nöje ka cate,” traqa koi 8 milio lao atr ka madrin, nge ka “nyi hlue i [Akötresie] e lai me jid.” (Hna ama. 7:9, 15; Is. 60:22) Tha hna traqa tune kö ekö laka, itre atr ka alanyimu a hnimi Iehova, memine la itre atr. Hna qaja fe hnei Tusi Hmitrötr ka hape, troa mama thene la itre atr ka pë ihnimin koi Akötresie la ihnim göi thupen. Öni Paulo aposetolo göne la itre drai ne la pun ka hape, tro la itre atr a “hnimi angate kö, me meciu mani,” me “itete ajane la nyine amadine ngo tha ajane kö koi Akötesie.” (2 Tim. 3:1-4) Ka isazikeu catre la itre aja cili memine la “ajane” maine ihnim koi Akötresie. Ihnimi lai ka ukun la itre atr troa isa meku angatre hi, nge ka hamë gomegom ngöne la mele i angatr. w18.01 22 par. 1-2

Hnene la lapaun, me inamacan qaathei Akötresie hna thupë Noa, matre tha kei ju kö angeice kowe la itre ewekë hna methinën hnei Iehova. Hnene laka, aja i Noa troa nyisinee i Iehova, haawe, hnei angeic hna ananyine la itre atr ka tha lapaune kö koi Nyidrë, me ka icilekeu me Nyidrë. Tha hane fe kö amenu Noa hnene la itre dremoni ka uti kowe la fen, tune la itre xa atr. Alanyimu la ka haine la mene ne la itre dremoni, goi atrunyi angatre fe ceitu me itre haze. (Gen. 6:1-4, 9) Ketre, atre hnyawa hi Noa laka, aja i Iehova tro la atr a hnaho, me atiqane la ihnadro. (Gen. 1:27, 28) Matre, ame lo kola isa xomi föe hnene la itre dremoni, mama hnyawa ha koi Noa laka, ka ngazo la aqane ujë cili. Nge, mama cile hnyawa pi hi la kola hetre nekö i angatr ke, itre nekönatr ka tru matrane catre kö hune la itre xa nekönatr. Ame hë e thupen, Iehova a thuemacanyi Noa ka hape, tro Nyidrëti a axulune la ketre iwë ka troa lepe apatrene la itre atr ka ngazo. Hnene la lapaune i Noa kowe la trengewekë i Iehova hna upi angeic troa cane la aka, nge celë hi ka amele angeic me hnepe lapa i angeic.​—Heb. 11:7. w18.02 11 par. 8

E hnei eö hna kei kowe la ngazo, the luelue kö laka, aja i Iehova troa nue la ngazo i eö. Aja i Nyidrë troa xatua eö matre tro eö a hetre imelekeu hmaca me Nyidrë. Ngo, loi e tro eö a kapa la ixatua i Nyidrë jëne la itre qatre thup. (Ite edomë 24:16; Iako. 5:13-15) Matre, the hmitre kö! Jëne tro hi eö lai a kapa la mele ka tha ase palua kö. Ngo, tune kaa ju hë e ase hë nue la ngazo i eö, ngo tha tingetinge pala kö la hni eö pine lai ngazo? Hnei Paulo aposetolo hna hane hace fë la itre ngazo i angeic ekö. Öni angeic: “Ini la ka co ne la nöjei aposetolo, tha ijije troa hë ni aposetolo qa ngöne la hnenge hna axösisine la ekalesia i Akötesie.” (1 Kor. 15:9) Hnei Iehova hna kepe Paulo, ngacama hetre ngazo i angeic ekö, nge aja i Nyidrëti tro angeic a trotrohnine lai. Maine eö a ietrane hnyawa la ngazo i eö, me qaja amamane koi Iehova me kowe la itre qatre thup, tro Iehova lai a nue la ngazo i eö. Ame hë e cili, kapa ju ke, aja i Iehova hi lai!​—Is. 55:6, 7. w18.01 11 par. 17-18

E aja së troa nyisinee i Iehova, loi e tro sa drei Nyidrë, me ithanata koi Nyidrë. Easa drei Nyidrë la easa inine la Tusi Hmitrötr. Kolo fe a qaja la easa e me mekun ajuine la Wesi Ula i Akötresie, memine la itre itusi së. Ame la easë a ini Tusi cas, tha easë kö a inine göne hi matre atre gufane la itre ithuemacany, tune la easa hnëkë troa itupath. Loi e tro pe a ceitu memine la easa ihamë ngöne la ketre götrane laka, kola mama trootro la itre xa pengöi Iehova. Tro hë së lai a easenyi koi Akötresie, nge ketre tro fe Nyidrëti a easenyi koi së. Hetre jia ne huliwa hna hamën hnene la organizasio i Iehova matre troa xatua së troa ini Tusi cas. Ame ngöne jw.org, hetrenyi la hna hape, “Qu’enseigne réellement la Bible ? (Fiches d’étude)” Tro lai a acatrene la lapaune së kowe la itre ini hne së hna mejiune kow.​—Sal. 119:105. w17.12 25 par. 8-9

Tro ha hetrenyi la mele tingeting pine laka “troa tiqa la fene hnengödrai hnene la ate hmekunyi Iehova.” Thatreine kö la itre öni troa atre Iehova, matre ame la hna perofetane celë tre, kola qaja la itre atr ka saze. (Is. 11:6, 7) Alanyimu la itre trejin ekö ka ujë ceitu me itre öni, ngo itre ka ce mele tingetinge hë enehila me itre atr. Tro epuni lai a e la itre hnei angatr hna melën ngöne la hna hape, “Saze Hë La Mel, Hnei Tusi Hmitrötr,” ka mama ngöne la site së jw.org. Ame thene la itre hlue i Iehova enehila, hetrenyi la itre ka ujë tun ekö, ngo hnei angatr hna ‘xetrëne la atre ka hnyipixe, lo hna xupe tui Akötresie ngöne la thiina ka meköt, me thiina ka hmitrötre me nyipici.’ (Efe. 4:23, 24) Ame la kola atre Iehova, trotrohnine hë angatr la enyipiewekëne troa trongëne la itre hna amekötin hnei Nyidrë. Celë hi ka xatua angatr troa saze amekötin la itre ini hnei angatr hna lapaune kow, me itre mekuna i angatr, me itre aqane ujë i angatr. Tha ka hmaloi kö troa saze, ngo tro la uati Akötresie a xatuane la itre ka ajan troa amadrinë Nyidrë. w18.01 31 par. 15-16

Öni Tusi Hmitrötr, ame la itre hna amelene hmaca a tro hnengödrai tre, hna amele angatr “isa ala casi thenge la isa göhne i angatr.” Haawe, tro fe a hane tro loi la melehmaca e celë fen. Matre easa isa thel, me hape: ‘Ame göne la itre ka hnyipi mec, tro kö a canga amele angatr hmaca la kola xejë lo musi Keriso ka Ca Thauzane Lao Macatre? Hapeu, tro kö a amelene hmaca la itre hlue i Iehova ekö, itre mekene la nöj matre troa xomiujine la itre hlue i Iehova ngöne la fene ka hnyipixe? Nge tune kaa la itre atr ka tha nyihlue i Iehova kö? Eu la ijine memine la götrane hnë troa amejë angatr?’ Nyimutre la itre mekune hne së hna isa hnyingëne thel. Ngo, loi e tro sa itreqe hnyawa me öhne lai elany. Tha tro kö sa hnehengazone menune la itre ewekë cili enehila. Tro sa haine elany la aqane ameköti ewekë i Iehova. Loi e tro sa isa acatrene la lapaune së koi Iehova enehila. Ase hë Nyidrëti sisinyi jëne la madra i Iesu ka hape, tro kö Nyidrëti a mekun la itre atr ka mec, me amele angatr hmaca.​—Ioane 5:28, 29; 11:23. w17.12 14 par. 20-21

Hetre thangan ka loi la itre eamo hna hamën hnei Iehova jëne Paulo kowe la hnepe lapa. Kola qaja kowe itre trahmany ka hape: “Isa hnimeju la ite ifënekö i nyipunie, nge the akötë angat.” Ame la trahmanyi ka ihnim, angeic a wangatrune la föi angeic. Angeic a drenge la mekuna ne la föe, me nyipiewekëne la hnei föe hna qaja. (1 Pet. 3:7) Hetre ijine laka, tha trongëne kö angeic la hnei föe hna qaja. Ngo, tro angeic a axecië mekune hnyawa, e tro palahi angeic a nyipiewekën la hna qaja hnei föe. (Ite edomë 15:22) Ame la trahmanyi ka ihnim, tha angeice kö a musinëne la föi angeic troa metrötrë angeic. Angeice pe a kuca asë la hnei angeic hna atreine matre tha tro kö a jol kowe la föe troa metrötrë angeic. E troa hnime la föe me itre kuku hnene la trahmany, tro hë la hnepe lapa a nyihlue i Iehova cememine la madrin. Ketre, tro hë angatr a kapa elanyi la thupe i angatr. w17.11 28 par. 12; 29 par. 15

Hnei Paulo aposetolo hna cinyihane kowe la itre keresiano ne Kolose lo kola akalabusi angeic e Roma lo itre macatre 60-61 M.K. Hnei angeic hna amexeje koi angatr la enyipiewekëne troa hetrenyi la “wangate hmekun.” (Kol. 1:9) Öni Paulo: “Celë hi hnenge hna qaja, wanga iaö nyipunie hnei kete ate hnene la [aqane iele nyipunie]. Wange kö ke [iaö] nyipunie hnei kete ate hnene la pi inamacane me tenge iaö nyine amenun, thenge la edomë i ate, me ite ini hnapane ne la fen, nge tha thenge Keriso kö.” (Kol. 2:4, 8) Paulo a amamane la kepine matre ka tria la aqane mekune ne la ka alanyim, memine la kepin matre angatr a ajane catrëne la itre aqane mekune i fen. Ame la itre xa aqane mekune cili, kola ukune la itre atr troa mekun menune ka hape, ka sisitria kö angatr hui itre xan. Haawe, Paulo a ajan matre, jëne la tusi celë, tro angatr a lepetrij la itre aqane mekune i fen, memine la itre hna majemin ka ngazo.​—Kol. 2:16, 17, 23. w17.11 20 par. 1

Nemene la nyine troa nuetrij hnene la keresiano matre tro pala hi a utipi angeic hnei Iehova? Loi e tro angeic a nuetrije la itre ewekë ka tru koi angeic, nge ka xomi angeice kowe la ngazo. (Mat. 18:9) Maine itre sinee i eö a huli eö kowe la itre ewekë hna methinën hnei Iehova, tro kö eö a hmaca troa ce tro me angatr? Maine jole koi eö troa xomehnöthe la aja troa iji kahaitr, tro kö eö a neëne la itre ijin ka troa upi eö troa iji menu la kahaitr? Maine jole koi eö troa xomehnöth la itre aja i ngönetrei, tro kö eö a neën la itre film, me itre sit ngöne Ëternet, maine itre xa jëne ju kö ka troa aciane thei eö la itre aja ka sis? The thëthëhmine kö laka, ame asë hi la itre trenge catr hne së hna kuca matre troa drengethenge Iehova, tre, jëne mele së hi lai. Pëkö ketre ewekë ka akötrë së catre hune la troa atre ka hape, hna nuetriji së hnei Iehova. Nge pëkö ketre ewekë ka sisitria catre hune la troa atre ka hape, hna “utipi [së] hnene la ihnimi ka epine palua” i Iehova.​—Is. 54:7, 8. w17.11 11 par. 12

Kola qaja ngöne Zakaria 5:4 (MN) ka hape, tro la hnëjine “a lö hnine la uma ne la atrekënö” nge, tro ej a “a lapa hnine la uma cili, me dreuthe triji ej.” Matre, Iehova la ka amaman, me nyithupene kowe la atre kuca la ngazo nyipine la nöje i Nyidrë. Maine tro la ka atrekënö a juetrëne la huliwa i angeic kowe la polis, me kowe la maseta i angeic, me itre qatre thup, me kowe la keme me thin, ngo thatreine kö tro angeic a juetrën koi Iehova. Tro Iehova a thelejën matre mama pi la nöjei pengöne aqane huliwa atrekënö. (Heb. 4:13) Ketre madrine ka tru koi së troa ce mel memine la itre atr ka isin troa huliwa nyipici “ngöne la nöjei ewekë asëjëihë”! (Heb. 13:18) Kola akötrë Iehova hnene la nöjei pengöne aqane huliwa atrekënö. Ketre manathithi koi së troa atre, me xötrethenge la itre trepene meköti Nyidrë, matre tha tro kö la aqane ujë së a adrone la ëje i Nyidrë. Tro hë lai a trianyi së hnene la iameköti Iehova thatraqane la itre atr ka tha idrei. w17.10 17 par. 6-7

Nyipiewekë catr la troa lapa tingeting memine la itre trejin. Ame itre xa ijin easa mekun laka, pëkö ka trotrohni së, maine tha meköti kö la aqane ujë koi së hnei ketre, ngo loi e tro pala hi sa thele la tingeting. (Rom. 12:17, 18) Maine jë, hne së hna akötrë ketre, haawe, loi e tro sa qejemenu, nge qa kuhu hni së. Nyipiewekë catre la tingeting e hnine la faipoipo. Tha loi kö e tro la lue trefën a ujë kösë lue ka ihnim qëmekene la nöjei atr, nge ame la nyidroti a lapa cas tre, kola xele ma ithanata, maine ithanata akökötreny koi ketre, nge goi isi fe. Nyipiewekë fe tro sa nue hnyawane la ngazo hna kuca koi së. E hna akötrë së hnei ketre, hna thë ju hë, maine tha hna thë kö, ngo easa nue la ngazo i angeic, nge tha easa hmaca kö a mekun lo hna kuca. E ajane së troa nue hnyawa la ngazo i ketre, tha tro kö sa mekune lapane lo hnei angeic hna kuca. Ame la ihnim tre, “tha ate meku ngazo kö.” (1 Kor. 13:4, 5) E tro sa lapa fë trengehni, tro hë lai a puje trootro la aqane imelekeu së me Iehova, memine la aqane imelekeu së me itre trejin.​—Mat. 6:14, 15. w17.10 7 par. 14-15

Nemene la thangane la maca i Zakaria kowe la angetre Iudra ngöne la ijine cili? Hnei Iehova hna sisinyi troa xatuan, me isigöli angatr utihë afenesine angatr la uma ne hmi. Celë hi ka thue mejiune i angatr. Ngo, hetre itre atr ka thel ka hape, ‘Nemene la aqane tro la ala xalaithe hi a eatrëne la huliwa ka tru cili?’ Hetre ewekë hnei Zakaria hna qaja, nge ka apatrene thei angatr la xou me luelu. Traqa ha Heledai, Tobia, me Iedaia troa xatua angatr, nge öni Iehova, alanyim pala kö la itre ka troa “traqa me xupe la ēnē i Iehova.” Tha luelue kö la angetre Iudra laka, tro Iehova a sajuëne la huliwa i angatr. Angatr a bëeke jë troa xupe la uma ne hmi, ngacama hna wathebone hë hnene la joxu ne Peresi. Kösë iwetr ka tru qëmeke i angatr la wathebo cili, ngo hnei Iehova hna canga apatren. Ame hë e cili, hna umuth la uma ne hmi lo macatre 515 qëmeke i Keriso. (Ezera 6:22; Zaka. 4:6, 7) Ngo, hetre ketre aliene kö la itre trengewekë i Iehova, nge ka eatr enehila. w17.10 26 par. 17

Hetre hnëqa ka tru hnei Solomona hna kapa. Hnei Iehova hna ië angeic troa cilën la huliwa ne xupe la ēnē, kola qaja la uma ne hmi e Ierusalema. Nge pëkö uma ka tun hna kuca! Tro ej a “sisitia cat, me hlemu me lolo ngöne la nöjei nöj.” Nge ame la ka nyipiewekë catr, tre, “[uma] i Iehova Akötesie.” (1 A. l. ite jo. 22:1, 5, 9-11) Tha luelue kö Davita Joxu laka, tro Iehova a xatua Solomona. Ngo, “nekönate ka pujepuje Solomona,” nge ka thatrein. Hapeu, hetrenyi kö thei angeic la catr matre troa kapa la hnëqa cili? Maine tro pena angeic a thipën, ke thöthi angeic nge ka thatrein. Eje hi laka, e aja i angeic troa eatrëne lai, nyipiewekë tro angeic a catr me kuca la huliwa. Maine patre ju thei Solomona la catr, tro hë la xou a sewe angeic troa kuca la huliwa, nge ngazo catre hë lai. Tui Solomona, easa ajan la ixatua qaathei Iehova matre hetre catre së troa eatrëne la huliwa hnei Nyidrëti hna ahnith koi së. w17.09 27 par. 1-2; 28 par. 4-5

Nemene jë la pengöne la mele së e patre kö la Tusi Hmitrötr? Eje hi laka, pëkö eamo nyine troa xatua së ngöne la mele së. Nge tha tro kö sa atre la nyipici göi Akötresie, me göne la mel, me göne la pengöne la itre drai elany. Ketre, tha tro kö së lai a atre la itre hna kuca hnei Iehova kowe la itre atr ekö. Eloine pe, hnei Iehova hna hamë së la Wesi Ula i Nyidrë, ene la Tusi Hmitrötr. Hnei Nyidrëti hë hna qaja amë ka hape, tro ha cile huti la maca ne ej epine palua. Kola mama la mekune cili ngöne Isaia 40:8, nge hna amexeje hnei Peteru aposetolo. Ame la xötre cili, tre, kola qaja la maca i Akötresie kowe la nöjei atr asë, ngo kolo fe a qaja la Tusi Hmitrötr. (1 Pet. 1:24, 25) Celë hi hna trotrohnine hnene la itre atr ka hnine la Wesi Ula i Akötresie. Nge ame ngöne la itre hadredre lao macatre, hnei angatr hna isine troa ujëne la Tusi Hmitrötr, me thelejën tro la itre atr a hetreny. Ngo jole pi hë ke, tru la itre icilekeu hnei angatr hna qëmeke kow. Casi hi la aja i angatr me Iehova, laka, tro la itre atr ka alanyim a “mele me wangate hmekune la nyipici.”​—1 Tim. 2:3, 4. w17.09 18 par. 1-2

Hetre hna melëne hnene la itre thöth enehila, nge ka ceitu memine la hna melëne hnei Iosefa ekö. (Gen. 39:7) Hanawang la hna melën hnei Kim, ketre trejin jajiny. Hnene la itre sine ini angeic hna majemine selëne la itre huliwa ka sis hnei angatr hna kuca e mecixen me sabath. Ngo, ame Kim, pë fe kö nyine tro angeic a hane qaja. Ame koi angeic, “pëkö ka hnimi angeic, me ka pi porotrik me angeic.” Nge, ame pena kowe la itre sine ini angeic, ka hmo angeic ke, pëkö hnei angeic hna iatre memin. Ngo, ka inamacan la aqane ujë i Kim. Atre hnyawa hi angeic laka, ame la ijine thöth tre, kolo ijine lai kola catrehnine catr la aja ne troa kuci ngazo. (2 Tim. 2:22) Hna hnying koi angeic hnei itre xan ka hape, “Nyipi jajinyi pala kö eö?” Angeice hi lai a qaja jë koi angatr la kepine matre tha ka ce meköle trefëne kö angeic. Easa madrin kowe la itre thöth ka nyihlue i Iehova. Ka xecie hnyawa koi angatr troa cile catr ngöne la ihuline troa kuci ngazo. Nge, ka madrine fe Iehova koi angatr! w17.09 4 par. 8; 5 par. 10

Nyimenyime hi la itre atr elëhni, me ithanata akökötreny, me iqaqa. E kola ujë tune ngöne la hnepe lapa, akötr asë hi la itre atren. Tusi Hmitrötr a hmekë së matre tha tro kö sa elëhni, me ithanata akökötreny, me sue menu. (Efe. 4:31) Celë hi qaane la itre isi. Ame kowe la ka alanyim enehila, tha ngazo kö e troa isi hnei elëhni. Ngo, e troa ujë tune lai, kolo lai a thaipiëne la Atre Xupi së. Alanyimu la itre trejin ka nuetrij la thiina i angatr ekö, me xetrën la atr ka hnyipixe. (Kol. 3:8-10) Ame la ketre igötranene la atr ka hekö tre, ene la thoi. Alanyim la itre atr ka thoi matre tha tro kö a nyithupei impôts, maine göi troa triane la itre ethane la ngazo hna kuca. Ngo, “Akötesieti ka nyipici” Iehova. (Sal. 31:5) Matre Nyidrëti a amekötine kowe la itre hlue i Nyidrëti asë troa “isa qeje nyipici,” nge tha tro kö a “ithoikeu.” (Efe. 4:25; Kol. 3:9) Kola mama e celë laka, nyipiewekë tro sa qaja la nyipici ngacama jole ju hë me nyine hmahman.​—Ite edomë 6:16-19. w17.08 15 par. 3, 5; 15 par. 12-13, 15

Ame enehila, Iehova a xatua së jëne la Wesi Ula i Nyidrë, ene la Tusi Hmitrötr. Önine la atre cinyihane la Salamo, “kola xöte nyimenyime la wesi ula i nyidë [maine trengewekë i Nyidrë]” matre troa xatua së. Iehova a xatua së thenge la aja i Nyidrë nge ngöne la nyipi ijin. Pane mekune jë së la ixatua hne së hna kapa qa hnine la Tusi Hmitrötr, me qa ngöne la itre itusi ne “la hlue ka nyipici me ka inamacan,” me qa ngöne la JW Télédiffusion, me site së jw.org, me qaathene la itre qatre thup, me qaathene la itre trejin. (Mat. 24:45) Öhne kö epun ngöne la mele i epun la aqane nyimenyime Iehova xatua epun. Atre hnyawa hi la atre cinyihane la Salamo laka, hnei Iehova hna iën la nöje Isaraela ekö qa ngöne la nöjei nöj ne la fen matre troa nöje i Nyidrë. Angatre hmekuje hi la nöje ka kapa la “wesi ula” i Nyidrë memine la “itre wathebo” i Nyidrë. (Sal. 147:19, 20) Ketre manathith ka tru fe koi së enehila troa hane hë së hnene la ëje i Akötresie. Tru la madrine së laka, easa atre Nyidrë, nge hetrenyi së la Wesi Ula i Nyidrë matre troa xatua së. Ketre, easa imelekeu hnyawa me Nyidrë. Tune la atre cinyihane la Salamo 147, nyimu kepine matre tro sa “atrunyi Ia,” me xatuane la itre atr troa hane ujë tune lai. w17.07 15 par. 15-16; 15 par. 18

Hnene la itre hlue i Iehova ka huliwa i Nyidrë o drai enehila hna isine troa trongëne la eamo i Paulo; ala 1 milio nge sine angatr. Angatr a ujë trije la itre mo hna mama fë hnene la fene celë. Angatr a lapa mekune lo trepene meköt, kola hape: “Tro la ate pane sipo ewekë a nyi hlue ne la ate pane hamë ewekë.” (Ite edomë 22:7) Ame la aja i Satana, tro sa nue asë la traeme së, me trengecatre së, matre tro sa nyihluene la fen ka salem. Ame itre xan, tru catr la itre gufa i angatr göi uma, me loto, me ini, me faipoipo. Maine tha hmeke kö së, tro së lai a lapa fë gufa koi nyimu macatre. Matre, easë lai a inamacane la easa ahmaloeëne la mele së, me neëne la itre gufa, me tuluth la aqane itö. Tha tro hë së lai a nyihluene la fen ka salem enehila, nge pë hë ka sewe së troa nyihlue i Iehova hnyawa.​—1 Tim. 6:10. w17.07 10 par. 13

Meköt tro Iehova a mus. Ka pexeje la aqane huliwane Nyidrë la musi Nyidrë. Öni Nyidrë: “Ini Iehova ate ihnim, me amekötin, me kuca la ka ijije e celë fen ; ke ini a madine la ite ewekë cili.” (Iere. 9:24) Tha Iehova kö a axeciëne la ewekë ka meköt thenge la itre wathebo i atr. Nyidrëti pe a acile la itre trepene meköt, nge thenge la meköti Nyidrë ka pexej, Nyidrëti a hamëne la itre wathebo kowe la itre atr. Önine la atre cinyihane la Salamo: “Thiina ka meköt me meköt la trepene la therone i Cilie.” Matre, ame la itre wathebo i Nyidrë me itre trepene meköt, me itre mekune hnei Nyidrëti hna axeciën, tre, itre ka meköti asë hi. (Sal. 89:14) Öni Satana lo, tha ka meköti kö la aqane musi Iehova. Ngo, thatreine pe angeice hamëne la thiina ka meköt kowe la fen. w17.06 28 par. 5

Iehova la qaane la nyipici. (Sal. 31:5) Nge, hetre aja i Nyidrë troa ce thawa la trenge nyipici cili me easë. Matre, hne së hë hna inin itre ej ngöne la easa inine la Tusi Hmitrötr, me itre itusi së, me ngöne la easa sine la itre asabele, me itre icasikeu ne la wiik. Nge hetre itre xa trenge nyipici hmaca kö hne së hna troa kapa, nge tro hë sa hetrenyi lo hnei Iesu hna hën ka hape, “tenge nyi,” kola qaja la itre trenge nyipici “ka hnyipixe me ka hekö.” (Mat. 13:52) Maine tro sa thele la itre trenge nyipici tune la aqane thele së la itre trengamo hna juetrën, tro Iehova lai a xatua së troa nyialiene la “tenge nyi” së. (Ite edomë 2:4-7) Tro së lai a eatrëne tune kaa? Nyipiewekë tro sa inine lapane la Tusi Hmitrötr memine la itre itusi së me ithel. Tro së lai a öhne la itre trenge nyipici ka “hnyipixe.” (Ios. 1:8, 9; Sal. 1:2, 3) Ketre tune mina fe, e atre hë së la ketre nyipici, hetre aja së lai troa thele la itre xan. w17.06 12 par. 13-14

Kola mekune lo xötre ne 1 Korinito 7:28 hnene la ketre thupëtresij ka tha faipoipo kö, lo kola hape, “tro ha hete aköte i ngönetei” la itre ka faipoipo.” Angeic a ithanata kowe la ketre qatre thup ka qatre hë, nge ka faipoipo, me hnying koi nyidrë ka hape: “Nemene la ‘akötre’ cili, nge nemene la aqane tro ni a cile kow, e traqa jë ni faipoipo?” Qëmekene tro la qatre thup a sa la hnying, nyidrëti a upe la thupëtresij troa pane mekune la ketre ewekë hna amexeje hnei Paulo, kola hape, Iehova la “Akötesieti ate akeukawan’ asë; lo ate akeukawa huni ngöne la aköte huni asë.” (2 Kor. 1:3, 4) Tha sihngödri kö koi së laka, tru la hna hnimi së hnei Iehova, nge Nyidrëti a akeukawanyi së ngöne la ijin easa akötr. Pane mekune jë la itre ijine hnei Iehova hna xatua epun, me eatrongë epun jëne la Wesi Ula i Nyidrë. Matre, xecie hnyawa koi së laka, Nyidrëti a thele la nyine loi koi së tune la hnei Nyidrëti hna kuca ha ekö kowe la itre hlue i Nyidrë.​—Iere. 29:11. w17.06 3 par. 1-2

Nyipici laka, itre ka po a aja xen, me hnaheetr, nge ame la itre trejin me easë angatre fe a ajane troa akeukawane la hni angatr, me ajane la ixatua qa hnine la Tusi Hmitrötr. (Mat. 4:4) Loi e tro la itre qatre thup a xatua angatr me hamëne la itre itus ngöne la qene hlapa i angatr. Tro fe la itre qatre thup a thel la ketre trejin ka ithanatane la qene hlapa i angatr. Ka nyipiewekë catre lai ke, ala nyimu la itre ka po, ka kötre mel me nu asë pe la itre hnei angatr hna majemi kow. Iananyi hë angatr memine la hnepe lapa i angatr, me itre atrene la nöje i angatr, me ekalesia i angatr. Matre nyipiewekë troa mama koi angatr la ihnimi Iehova, memine la ihnimi ne la itre trejin. E tha ketri angatre kö hnene lai, tro hë angatr a thele ixatua thene la itre atr ne la nöje i angatr, ngo tha ka nyihlue i Iehova pe. (1 Kor. 15:33) E tro sa thele jëne matre tro angatr a lapa madrin ngöne la ekalesia, easë hi lai a ce huliwa me Iehova, ene la “troa thupëne la ite tenyiwa. Tha ijiji angatre pala kö troa bëek hmaca kowe la hnalapa i angatr, ke, mele pala kö lo itre ka thele troa ihumuth. Ketre, thatreine kö tro la itre ka po, a thëthëhmine la itre akötre ka traqa ngöne la mele i angatr. Loi e tro sa isa waipengö së me hape, ‘Maine hnenge ju hna melëne la itre ewekë celë, nemene la ajang tro la itre atr a ujë koi ni?’​—Mat. 7:12. w17.05 7 par. 15-16

Pine laka, easa melëne la fene i Satana ka ngazo, haawe, nyimu kepine matre easa kucakuca e itre xa ijin. (1 Ioane 5:19) Ngo, e tha hmekëne kö së, tro ha nanazije la lapaun, me ihnimi së koi Iehova. Hetrenyi la itre jol ka traqa koi së, ke easa qatre trootro, maine hetre sine meci së, maine hnene la itre jole göi mani. Maine jë, easa hleuhleu ke, tha kuca ha së la itre ewekë tune lo hne së hna mekun. Maine pena, haitr la mele së, ke, tha tro loi kö la mele së thenge lo hne së hna ajan. Traqa ju hë koi së la itre jol ka nyimutre, ngo tha tro pi kö sa mekune ka hape, hnei Iehova hna nuetriji së. Mekune ju la itre ithanata ka akeukawanyi së ngöne Salamo 136:23: “Lo ate meku shë ngöne la hna aipië shë ; ke epine palua la ihnimi nyidë.” Tha luelue kö së laka, Iehova a drenge la itre xëwe së, nge tro kö Nyidrëti lai a eatrëne itre ej.​—Sal. 116:1; 136:24-26. w17.05 17 par. 8

Tune la hna qaja ngöne Galatia 2:11-14, hna traqa koi Peteru la xoue atr. (Ite edomë 29:25) Atre hnyawa hi Peteru la mekuna i Iehova göne la itre ethen. Ngo, angeic a xouene e tro la itre keresiano itretre Iudra ka traqa qa Ierusalema a wang angazo angeic pine ce tro memine la itre keresiano itretre ethen. Hnei Paulo hna jelë Peteru ka hape, ka lue iqëmek angeic, nge ka mele hnihni. (Ite hu. 15:12; Gal. 2:13) Ka ipië Peteru, matre hnei angeic hna kapa la kola ameköti angeic hnei Paulo. Tha hna qaja kö hnei Tusi Hmitrötr ka hape, hna xom qaathei Peteru la itre hnëqa i angeic. Hnei angeic hna cinyihane e thupen la lue tusi laka, itre igötranene pë hë la Tusi Hmitrötr. Ngo, hnei Iesu, tane la ekalesia hna thue huliwa i angeice pala hi. (Efe. 1:22) Ijine hi lai tro la itre trejin ne la ekalesia a nyitipu Iesu, memine la Keme i nyidrë, ene la troa nue la ngazo i Peteru. Eloine pe, pëkö trejin ka thixötr hnene lai. w17.04 25 par. 16-18

Hnei Iehova hna lepe la lue lapa cili matre patre pi la itre huliwa ka ngazo. Nyidrëti fe a amë lai “nyine hatene” kowe la itre atr ka ngazo enehila. Tune lo aqane apatrene Iehova la itre huliwa ka sisi ekö, tro fe Nyidrëti a apatrene itre ej enehila ngöne la Nyidrëti a troa lepe la fen celë. Nemene la ka troa nyihnane la itre huliwa ka ngazo elany? Ame ngöne la fen ka hnyipixe, nyimutre la itre huliwa ka lolo hne së hna troa kuca. Tro sa aparadraisone la ihnadro, me xup la itre uma koi së me kowe la itre atr hne së hna hnim. Nge, easë fe a troa kapa la itre milio lao atr hna amelene hmaca, me ini angatr la pengöi Iehova, memine la itre hnei Nyidrëti hna kuca kowe la itre atr. (Is. 65:21, 22; Ite hu. 24:15) Ame ngöne la ijine cili, tro sa kuca la itre huliwa ka troa amadrinë së, nge ka atrunyi Iehova! w17.04 13 par. 11-12

Ame la Iefetha a sisinyi koi Akötresie, tre, atre hnyawa hi nyidrë, laka, ame fe la ketre atr hnei angeic hna pane troa ixelë memin, tre nekö i angeic jajiny. Haawe, atre ju hë angeic maine thatre pena, ngo tha ka hmaloi kö kowe la lue trenekön la hnei kem hna sisinyi koi Iehova. Ame la Iefetha a öhne la nekö i angeic jajiny, hace pi hi la hni angeic. Nge hna pane tro hnene la nekö i angeic troa “treije pine la jajinyi gufa i angeic.” Pine nemen? Pëkö nekö i Iefetha trahmany, nge ketre tha tro hë la nekö i angeic jajiny a hane faipoipo me hnaho. Matre tro ha nyipune e cili la matra i Iefetha me ëje ne la hnepe lapa i angeic. Ngo ame koi nyidroti asë, hetre ketre ewekë kö ka sisitria hune lai. Öni Iefetha kowe la nekö i angeic: “Hnenge hna ewekë koi Iehova, nge tha ’teine kö troa hmaca.” Öni nyën: “Kucajë koi ni tune lo hna xulu qa ngöne la qe i nyipë.” (A. ame. 11:35-39) Ngacama jole pi hë koi Iefetha me nekö i angeic, ngo tha mekune pi kö nyidro troa thë la hna nyi xepu koi Iehova maine hna sisinyi pena. Eje hi laka, lue atr ka nyipici nyidro.​—Deu. 23:21, 23; Sal. 15:4. w17.04 4 par. 5-6

Hetre itre ewekë ka tha meköti kö hna kuca koi Iosefa. Ame la hnapan, hnene la itre trejine me angeic hna salemë angeic nyine hlue, nge 17 lao macatre i angeic petre kö. Ame hë e thupen, hna upezöne menu angeic ka hape, hnei angeic hna thele troa xolouthe la föe ne la maseta i angeic. Nge hna akalabusi angeic pine lai. (Gen. 39:11-20; Sal. 105:17, 18) Maine nyipici laka, ketre hlue i Iehova angeic, ngo tru catre kö la akötr thei angeic, nge kösë pëkö manathith. Ngo, thupene la 13 lao macatre, saze pi hi la mele i angeic. Hna nue angeic qa kalabus, nge angeice fe la ketre atre mus, hnaaluene thupe i Farao e Aigupito. (Gen. 41:14, 37-43; Ite hu. 7:9, 10) Eje hi laka, nyimu ewekë pi hë ka tha meköti kö ka traqa koi Iosefa. Ngo hapeu, haitre kö la hni Iosefa hnene la itre ewekë cili? Hnei angeice kö hna mekune ka hape, hna nuetriji angeic hnei Iehova? Ohea. Hnei angeice hna xomihnin me treqene hnyawa. Ame la ka xatua angeic, tre, ene la lapaune i angeic koi Iehova. Mama hnyawa koi angeic la ime i Iehova ngöne la itre ijine cili. Kola mama lai ngöne la aqane ithanata i angeic kowe la itre trejine me angeic, kola hape: “Hnei nyipunie hna mekune troa angazo ni, ngo hnei Akötesieti hna mekune nyine aloine pe, mate troa eate tune la drai celë troa amelene la nöjei ate ka ala nyimu.” (Gen. 50:19, 20) Ka xecie hnyawa koi Iosefa laka, tha ka gufa kö la troa treqe Iehova. w17.08 3 par. 6; 3 par. 12-13