Diseba

Ame ekö, itre atr a ihë kowe la hnalapa i angatr matre troa ce xen ke, angatr a ajan troa ce sinee, maine ce mele tingeting. (Gen. 18:1-8; A. ame. 13:15; Luka 24:28-30) Drei la itre hne së hna troa canga kapa? Loi e tro sa hëne la itre trejine ka ce me easë e hnine la ekalesia. Pine laka, tro palahi a ngazo catre la fen, haawe, nyipiewekë catr tro së, itre trejin, a inyipicikeu, me ce mele tingeting. Ame la trejin ka wange trongëne la itre ekalesia, tre, angeic a aja hnë meköl. Ketre tune mina fe la itre ka sine la itre ini qaathei Iehova, me itre ka saen troa xupi uma. Nge, tune kaa la itre ka pëhë hnalapa thupene la itre hulö? Angatr a aja hnë meköl ngöne la ijine kola xupe hmaca la uma i angatr. Tha tro pi kö sa mekune ka hape, itre ka trene uma ka tru hmekuje hi la ka ijij troa ikep. Anyimua kapa ha angatre lai la itre trejin. Nge tune kaa fe epun, ijiji epuni kö troa hane ikep, ngacama co ju hë la hnalapa i epun? w18.03 15 par. 6; 16 par. 9

Nemene la ka troa xatua së troa “mejë hmaca”? Tha hnene kö la sipu trengecatre së, ngo hnene pe la emenene la uati hmitrötr. (Fil. 4:13) Ame fe la xomehnöth, tre, celë hi ketre igötranene la wene ne la ua. Maine tro sa catre thith, me inine la Tusi Hmitrötr me sine thel ej, tro hë sa atreine hnöth la mele së. Nge tune kaa e jole koi epuni troa e Tusi Hmitrötr, maine pë pena kö aja thei epun? The cile kö. Maine tro epuni a thele Iehova, tro Nyidrëti a xatua epuni troa hetre ‘hni ne ajan’ kowe la Wesi Ula. (1 Pet. 2:2) Sipo Iehova jë troa xatua epuni troa atreine hnöth la mele i epun. Tro ha hetre ijine i epuni troa inine la Tusi Hmitrötr. Maine jë itre hnepe menetre hi ne tro epuni a ini Tus ngöne la xötrei. Ngo ame hë e thupen, tro ha hmaloi trootro, nge hetre aja i epuni hë troa ini Tus. Ketre, tro fe a hetre madrine i epuni troa sine thele la itre mekuna i Iehova ka sisitria.​—1 Tim. 4:15. w18.03 29 par. 5-6

Qëmekene tro la ka ini Tusi a xomi bapataiso, loi e tro angeic a atre la nyipici göi Akötresie, memine la aja i Nyidrë kowe la itre atr memine la ihnadro. Loi e tro fe angeic a atre la hnei Iehova hna hnëkën matre troa amelene la nöjei atr. (1 Tim. 2:3-6) Tro ha catre la lapaune i angeic e thupen, nge tro hë angeice lai a trongëne la itre wathebo i Akötresie, me sisine la hnei Nyidrëti hna sisin. (Ite hu. 3:19) Ka nyipiewekë catre lai ke, tha tro kö Iehova a kapa la hna sa xepu hnene la atr ka kuca la itre ewekë hnei Nyidrëti hna xele ma wang. (1 Kor. 6:9, 10) Ngo, hetre ketre ewekë kö nyine tro angeic a kuca. Ame la atr ka ajan troa sa xepu koi Iehova, nyipiewekë tro angeic a sine la itre icasikeu ne la ekalesia, me catre cainöjëne la maca ka loi, me ini itre xan. (Ite hu. 1:8) Loi e tro la ka ini Tus a pane kuca la itre ewekë celë. Thupene lai, tro hë angeice lai a sa xepu koi Iehova jëne la thith, me xomi bapataiso. w18.03 6 par. 12

Pine nemene matre ië Maria jë troa nyi thine i Iesu? Pine laka, angeic a thel troa ce mekun me Iehova. E jë la hnei Maria hna qaja lo kola iöhnyi me Zakaria me Elisabethe. (Luka 1:46-55) Ka tru koi Maria la Wesi Ula i Akötresie, nge atre hnyawa hi angeic la Itre Hna Cinyihane Qene Heberu. (Gen. 30:13; 1 Sam. 2:1-10; Mal. 3:12) Nyipiewekë catre kö koi Maria me Iosefa la hnëqa hna athipe koi nyidro, hune la sipu aja i nyidroti kö. Thupene la hna faipoipo, tha hnei nyidroti kö hna canga ce meköl trefën. Hnei nyidroti pe hna treqene hnyawa matre mala Iesu pi. (Mat. 1:25) Ketre, hnei Maria hna goeëne hnyawa la nöjei huliwa hna kuca hnei Iesu la nyidrëti a tru trootro, me drenge hnyawa la itre ewekë hnei nyidrëti hna qaja. Eje hi laka, ka tru koi Maria la itre hna thingehnaean hnei Akötresie göne la Mesia. Loi e tro fe sa nyitipu Maria, me thel troa kuca la aja i Akötresie. w18.02 21 par. 11

Nemene la aqane tro sa lapaun me idrengethenge tui Iobu? Ngacama isa pengöne kö la mele së, ngo loi e tro palahi sa amë panë Iehova ngöne la mele së. Loi e tro sa qale koi Nyidrë, me drengethenge Nyidrë cememine la hni së ka pexej. Ka nyipiewekë catre hmaca kö koi së troa ujë tune lai, hui Iobu ekö. Ame enehila, tha sihngödri hë koi së la pengöi Satana, memine la itre nyinyithiina i angeic. (2 Kor. 2:11) Jëne la Tusi Hmitrötr, ene mina fe la tusi Iobu, easa atre la kepin matre Akötresie a nue la akötr. Nge, jëne la hna perofetan hnei Daniela, atre hë së laka, ketre musi la Baselaia i Akötresie, nge Iesu Keriso la ka cilëne la Baselaia cili. (Dan. 7:13, 14) Nge, easenyi hë tro la Baselaia cili a musi kowe la fen asë, me apatrene la itre akötr. Kolo fe a amamane hnene la hna melëne hnei Iobu laka, loi e tro sa amamane la utipine së kowe la itre trejin ka akötr. Tui Iobu, tro fe angatr a ithanata menu. (Ate cai. 7:7) Ngo, tha tro pi kö sa mekuhnine menu angatr, me qaja ka hape, hetre ngazo hnei angatr hna kuca. Loi e tro pe sa thele troa trotrohnine la akötre i angatr. E hne së hna ujë tune lai, easë hi lai a nyitipu Iehova Keme së, ka ihnim me ka menyik.​—Sal. 103:8. w18.02 6 par. 16; 7 par. 19-20

Alanyimu la itre atr ka pi tru ke, itre ka mingöming e tro sa goeën, maine itre ka hlemu, me ka atreine elo miuzik, nge atre catr, nge hna atrune hnene la itre atr. Hetrenyi asë hi Davita la itre pengöne cili, ngo tha hnei angeice kö hna pi tru, me pi draië. Thupene la hnei Davita hna ngaa Goliatha, hnei Saulo hna hamëne la nekö i nyidrë nyine föi Davita. Ngo, öni Davita: “[Drei ni] . . . mate tro ni a [tresi] ne la joxu?” (1 Sam. 18:18) Ame enehila, itre hlue i Iehova a thel troa ipië tui Davita. Kola ketr la hni së la easa atre ka hape, ka ipië Iehova, lo Kapucatinasë. Easa thel troa trongëne la itre eamo celë, ka hape: “Xetëneju nyipunie la ihnimi ka tru, me utipin, me thina ka loi, me hni ka ipië, me thina ka menyik, me xomi hni ahoeany.” (Kol. 3:12) Ketre, “tha ate selëne kö la ihnim, nge tha ate pi tru kö.” (1 Kor. 13:4) E mama hnyawa hi kowe la itre atr la thiina ka ipië the së, tro angatre lai a hane ajan troa atre Iehova. w18.01 28 par. 6-7

Tro fe sa hane sajuëne la itre huliwa ka tru. (Ite hu. 4:34, 35; 1 Kor. 16:2) Tune la troa kuië ahnahna matre troa sajuëne la huliwa ne nyihnyawane la Uma ne Baselaia së. Maine pena troa kuië mani matre sajuëne la huliwa i Akötresie ngöne la itre ijine asabele. Nge, e hna lepe la itre trejin ngöne la ketre götrane hnene la hulö, tro fe së lai a hamëne la ixatua së. Easë fe a kuië ahnahna göi troa sajuëne la huliwa ne la itre mesinare, me itre pionie hut, me itretre iwai trootro, memine la itre ka huliwa ngöne la Hnalapa Ne Xomi Meköt, me ngöne la nöjei Bethela e cailo fen. Loi e tro asë hi sa sajuëne la huliwa i Akötresie ngöne la itre drai ne la pune celë. Nyimutre la itre ahnahna hna hamëne ngöne la gaa sihngödr. Ame la easa kuië ahnahna hnine la itre trengene manie ngöne la Uma Ne Baselaia, maine jëne jw.org, pëkö ka atre la etrune manie hne së hna hamën. Nge, tune kaa e tha tru kö la hnei epuni hna hamën? Kola mama laka, ame la itre ahnahna hna majemine kapa hnene la organizasio tre, itre neköi ahnahna ka co. w18.01 19 par. 10-11

Nyipiewekë tro la keresiano a xomi bapataiso ke, jëne mele hi lai. (Mat. 28:19, 20) Ame la eö a xomi bapataiso, eö hi lai a amamane ka hape, hnei eö hë hna sa xepu koi Iehova. Hnei eö hna sisinyi troa hnimi Iehova, me amë panëne la huliwa i Nyidrë ngöne la mele i eö. Tha tro pi kö eö elanyi a hace fë la mekun hnei eö hna axeciën, lo eö a nue Iehova troa amekötine la itre jë i eö. Ame la itre ka thatre Iehova, tre, itre atrene la fene i Satana. Nge, tha Satana kö a nyipiewekëne la mele i angatr, memine fe la mele i eö. Ame la aja i angeic, tre, tro eö a ce xöle me angeic, me nuetriji Iehova matre tha tro kö eö a hetrenyi la mele ka tha ase palua kö. Pane mekune jë la aqane amanathithi eö hnei Iehova qaane lo eö a sa xepu me xomi bapataiso. Hnene laka, hnei eö hë hna nue la mele i eö koi Nyidrë, haawe, casi hi la mekuna i eö memine la atre cinyihane la Salamo kola hape: “Xölenge Iehova ; tha tro kö ni a qou ; nemene la ewekë tro ate a kuca koi ni?” (Sal. 118:6) Pëkö ewekë ka sisitria hune la troa ce xöle me Iehova, me atre laka, easa amadrinë Nyidrë. w17.12 23-24 par. 1-3

Ame itre xa ijin, kola nango aelëhni së hnene la aqane ithanata maine aqane ujë ne la ketre trejin, maine pena easë la ka aelëhni ketre. Maine nyipici laka, ketre itupath lai koi së, ngo, ijine tro së lai a amamane koi Iehova la hni së ka nyipici. Haawe, loi e tro sa thel troa ce huliwa memine la itre trejin. Ka tru angatr koi Iehova, ngacama hetre hnepe ngazo i angatr. Ketre loi e tro fe sa nyitipu Nyidrë. Tha tro jë kö Iehova a apatrene la itre itupath ka traqa koi së. Easa trotrohnine lai jëne la hna melën hnei Iosefa. Ame lo angeic a thöth, hnene la itre trejine me angeic hna zalu koi angeic. Ame hnei angatr hna salemë angeic nyine hlue e Aigupito. (Gen. 37:28) Tha sihngödri kö koi Iehova la ewekë ka traqa koi Iosefa, nge kola akötrë Nyidrëti fe hnene la aqane qanangazo angeic, enehmu i Nyidrë. Thupene lai, hna upezö Iosefa ka hape, hnei angeic hna thel troa angazone la föi Potifara, ame hna akalabusi angeic. Kola mama jëne la hnei angeic hna melën laka, tha hnei Iehova kö hna apëne la itre jol ka traqa koi angeic. Ngo ame pe, tha hnei Akötresieti kö hna nuaxöji Iosefa. Öni Tusi Hmitrötr, “Ce Iehova me angeic, nge hnei Iehova hna amanathithine la hnei angeice hna kuca.”​—Gen. 39:21-23. w18.01 9-10 par. 12-14

E tro ketre a hnying koi epun ka hape, ‘Nemene la itre ini ka tru ka nyitrepene la lapaune i epun?’ Maine jë, tro epuni a qaja ka hape, Iehova la Atre Xup, nge Nyidrëti hi la Qeqene Mel. Epuni fe a mejiune koi Iesu, nge ame koi epun, meci nyidrëti hi la thupene mel. Ketre, xecie koi epun ka hape, troa aparadraisone la fen elany, nge tro la itre hlue i Akötresie a hetrenyi la mel ka tha ase palua kö. Ngo, tro fe kö epuni a qeje melehmaca ka hape, ketre ini lai ka tru koi epun, nge ka nyitrepene la lapaune i epun? Maine nyipici laka, easa mejiun troa mele pe qa ngöne la akötr atraqatr me mele palua e celë fen, ngo nyipiewekë tro la ini göi melehmaca a nyitrepene la lapaune së. Nyipiewekë la melehmaca kowe la lapaune së. Maine tha hna amele Iesu hmaca ju, haawe, tha tro kö nyidrëti a joxu e hnengödrai, nge ka gufa la maca hne së hna tro fë. (1 Kor. 15:12-19) Ngo, tha luelue kö së laka, hna amele Iesu hmaca, nge ka catr pala hi la lapaune së koi Akötresie, Atre amelene hmaca la itre ka mec.​—Mar. 12:18; Ite hu. 4:2, 3; 17:32; 23:6-8. w17.12 8 par. 1-2

Pëkö utipin thene la angetre faresaio kowe la itre atr. Angatr a goeëne atrune la ngazo hna kuca, nge tha goeëne pë hë la pengöne la atr. Hnene la itre xan e angatr hna öhnyi Iesu a xen thei Mataio, öni angatre jë hi kowe la itretre dreng: “Hna uëne laka ce xeni la Ate ini nyipunie me ite telona me ite ka ngazo?” Hnei Iesu hna sa, me hape: “Tha nyipi kö la tene dösinöe koi angete egöcat, ngo loi koi ange tene mec. Ngo trojë nyipunie, a inine la pengöne la, ka hape, ‘Ajange la ihnim, ngo tha huje kö ;’ ke tha traqa kö ni troa hëne la ite ka meköt, ngo ite ka ngazo.” (Mat. 9:9-13) Iesu kö e celë a kapa la huliwa ne la itre atr ka ngazo? Ohea. Atraqatre la aja i nyidrë tro angatr a ietra. Celë hi götrane ka tru ne la maca hnei nyidrëti hna tro fë. (Mat. 4:17) Mama hnyawa hi koi Iesu ka hape, alanyimu la itre “telona, me ite ate ka ngazo” ka thele troa ujë. Tha angatre kö a traqa kowe la hnalapa i Mataio göi tro hi a xen. Angatr a traqa ke, aja i angatr troa xötrethenge Iesu. (Mar. 2:15) Ngazo pe, alanyimu thene la angetre faresaio ka goeën angazone la itre atre cili, ngo tha celë kö lai aqane goeëne Iesu. w17.11 13 par. 2; 16 par. 15

Atraqatre la madrine së troa hane ketre atrene la ekalesia. Ame la easa kapa la itre ini qa hnine la Wesi Ula i Akötresie ngöne la itre icasikeu, me itö ithuecatrekeu, tre, celë hi ka xatua së troa wangatrune la edrö së. Ngo, ame itre xa ijin, hnene laka, tha itrotrohni kö së, haawe, kola cia la isazikeu thene la itre trejin. Nge, e tha canga nyinyine kö së, tro hë lai a nyiqaane ihmönyinyi. (1 Pet. 3:8, 9) Tha tro pi kö sa nue la ihmönyinyi troa thapa la edrö së. Paulo a qaja koi së la nyine tro la keresiano a kuca ka hape: “Xetëneju nyipunie la ihnimi ka tru, me utipin, me thina ka loi, me hni ka ipië, me thina ka menyik, me xomi hni ahoeany, tui ange hna iëne hnei Akötesie ange ka hmitöte me hnimina ; loi e ixomi hninekeune me inuekeune nyipunie, maine hete gele i kete ate koi kete ; hna nue nyipunie hnei [Iehova, MN], kete tro nyipunie a tun.”​—Kol. 3:12, 13. w17.11 27 par. 7-8

Maine hna humuthi ketre hnene la ketre atre Isaraela ngo tha hna thë pe, loi e tro angeic a kötre kowe la hlapa hnë kötre zae. Nge tro angeic a amamane la pengöi angeic kowe la itre qatr ngöne la qanahage ne la hlapa. Loi e tro angatr a kepe angeice hnyawa. Ame hë e thupen, tro angatr a upi angeice hmaca kowe la itre qatr ne la hlapa hna mec lo lai atr. (Num. 35:24, 25) Maine hna amekötin hnene la itre qatr ka hape, tha hna thë kö matre meci pi la atr, haawe, tro ha nue hmaca la ka kötre mel kowe la hlapa hnë kötr zae. Pine nemen matre loi e tro la ka kötre mel a wang la itre qatr ne la hlapa? Tro la itre qatr a thupën matre tro pala hi a pë ethan la nöje Isaraela. Nge tro fe a aijijën la ka kötre mel troa hane kapa la utipine i Iehova. Önine la ketre atr ka inamacan, e tha tro kö a canga wange la itre qatr hnene la ka kötre mel, troa humuthi angeic . . . ke, tha hnei angeice kö hna xötrethenge la hna amekötin hnei Iehova. E tha kötre kö angeic kowe la ketre hlapa hnë kötre zae, meköti kowe la ketre atrene la hnalapa ne la atr hnei angeic hna humuth troa humuthi angeice pena. w17.11 9 par. 6-7

Iehova palahi enehila a isigölin, me thue trengecatrene la itre hlue i Nyidrë jëne la itre angela. (Mal. 3:6; Heb. 1:7) Qaane lo 1919, lo kola lö pi la nöje i Iehova qaathei Babulona Atraqatr, hnene la itre ithupëjia hna thele jëne matre tha tro kö la hmi ka wië a kökötr. (Hna ama. 18:4) Ngo, tha ie kö la itre huliwa i angatr. Pine laka, itre angela a isigöline la nöje i Iehova, haawe, tha tro pi kö sa xouene laka, tro la nöje i Iehova elanyi a lapa hmaca fene la hmi ka thoi. (Sal. 34:7) Tro pe sa catre madrin, me kuca catrëne la huliwa i Iehova. Thei easë la trongene isi i Iehova. Ame ngöne la ijine akötr atraqatr, tro la itre angela a isigöline la nöje i Nyidrë, me lepe apatrene la nöjei ka icilekeu memine la musi Iehova. (2 Thes. 1:7, 8) Drei lai ketre drai ka tru! w17.10 28 par. 10-11

E hetre atrene la hnepe lapai epun hna upetröneë, maine ka sipu trotrije la ekalesia, tro epuni lai a akötr. Hna aceitunëne lai memine la kola li hele epun. Matre nemene la aqane tro epuni a cile hut? Catre jë kuca la itre huliwa i Iehova. Ame la epuni a qëmeke kowe la itre akötr ka tune lai, nyipiewekë tro epuni a acatrene la lapaune i epun. Loi e tro epuni a e la Tusi Hmitrötr, me hnëkën me sine la itre icasikeu. Catre jë cainöjëne la maca ka loi, nge sipo trengecatre jë koi Iehova matre troa cile hut. (Iuda 21) Tune kaa e tha patre kö la akötr? The kucakuca kö! Catre jë huliwa i Iehova. Tro lai a xatua epun troa xomihnine la akötre ka ej thei epun. Celë hi hna kuca hnene la atre cinyihane la Salamo 73. Hna tria la itre mekuna i angeic, ngo hnei angeic hna catre kuca la huliwa i Iehova. Celë hi ka aijijë angeic troa wenë amekötine la mekuna i angeic. (Sal. 73:16, 17) Maine tro epuni a catre kuca la huliwa i Iehova, tro fe a xatua epun tune lai. w17.10 16 par. 17-18

Ame la Satana a ithanata koi Eva ngöne la hlapa e Edena, kösë angeic a thele la loi koi Eva. Ngo, kola mama jëne la itre huliwa i angeic ka hape, tha eje kö. (Gen. 3:4, 5) Ame Davita joxu, tre, hetre sinee i angeic, Ahithofela la ëjen. Ngo, hnei Ahithofela hna huliwa thoi koi Davita göi troa hetre thupen. Kola mama ngöne la itre huliwa i angeic ka hape, tha nyipi sinee kö. (2 Sam. 15:31) Ame enehila, itre ka iamenumenu me itre xane ju kö a aciane la gomegom e hnine la ekalesia. Angatr a qaja la “tenge ewekë ka menyike me nyine atrun.” (Rom. 16:17, 18, MN) Angatr a pi mama fë ka hape, angatr a nyipiewekëne la itre trejin, ngo ame pe, itre atr ka tha imeku. Ame la ihnim ka thoi, tre, ka ngazo ke, ihnimi lai nyine troa amenune la atr. Maine nyipici laka, atreine së troa iaöne la atr, ngo thatreine kö së troa iaö Iehova. Öni Iesu, troa catre la thupene kowe la itre ka huliwa iaö. (Mat. 24:51) Matre loi e tro sa isa waipengö së me hape, ‘Ka nyipici kö la ihniming? Maine pena, ketre atr ni ka tha imeku me ka huliwa thoi?’ w17.10 8 par. 6-8

Ame la easa e la Tusi Hmitrötr kowe la ketre atr, easë hi lai a nue Iehova troa ithanata koi angeic. Ka hetre menen catre kö la ketre xötre hna iën hnyawa hune la itre ithanata hne së hna troa qaja. (1 Thes. 2:13) Ame la epuni a cainöje trootro, epuni kö a thele troa e la Tusi Hmitrötr kowe la itre atr? Maine nyipici laka, easa e la Tusi Hmitrötr kowe la itre atr hne së hna cainöje kow, ngo ame pe, tru la ka thatre la alien ej. Celë fe hi pengöne la itre atr ekö lai ngöne lo hneijine lo itre pane keresiano, nge ka eje fe enehila. Tha tro kö sa mekune laka, trotrohnine hi la atr la xötre hna e koi angeic. Loi e tro sa amexeje hmaca la itre hnaewekë maine mekun ka tru ne lai xötr, me qejepengöne la alien. Aqane tro hi së lai a ketr la hni me mekune ne la itre atr.​—Luka 24:32. w17.09 25 par. 7-8

Iehova a ajane tro la keresiano a utipine la itre atr ka lapa easenyi angeic, me itre trejine me angeic. (Ioane 13:34, 35) Ame la ketre aliene la “utipin,” tre, kola hape, “ce akötr.” Ame la atr ka hetre utipin, tro angeice lai a thele troa xatuane la itre ka akötr me thele ijin. Hetre aja së troa amamane la utipine së la easa goeëne la itre atr a akötr thupene la hna traqa koi angatr la ketre hulö. Hlemu hë la itre hlue i Iehova hnene la ixatua hnei angatre hna hamën ngöne la itre ijine cili. (1 Pet. 2:17) Hanawange la hna qaja hnene la ketre trejine föe ne Zapo. Ka mel angeic ngöne la götran nöj hna lep hnene la sa me gejë madra lo 2011. Öni angeic, hna xatua angeic me akeukawanyi angeic la kola öhne la itre ka traqa ne ixatua qa ngöne la itre götrane ka nyimutre ne Zapo matre troa nyihnyawane la itre uma me Uma Ne Baselaia. Öni angeice fe: “Hnene la ewekë cili ka traqa, matre öhne jë ni laka, tru la hnei Iehova hna nyipiewekë hun. Nge, ame la Itretre Anyipici Iehova, tre, itre atr ka meku ketre me ketre. Nge the qaja kö la itre trejin ka alanyim e cailo fen, kola thith thatraqai hun.” w17.09 11 par. 12-13

Pine nemene matre loi e tro sa thele troa xomehnöth la itre ewekë hna lapa fë e kuhu hni së? Hanawange la pane kepin: Ame la atr ka xomehnöthe la itre ewekë ka ej e kuhu hni, tre, tha tru menu kö la itre jol hnei angeic hna cile kow. Nge ka lolo la aqane imelekeu i angeic me itre xan, nge angeic a thelejën matre tha tro kö angeic a wesitr, maine hleuhleu menu palaha. Ame la hnaaluen: Maine easa ajane tro palahi sa nyisinee i Akötresie, nyipiewekë tro sa cile catr ngöne la itupath, me xomehnöthe la itre aja së ka ngazo. Tha celë kö hna kuca hnei Adamu me Eva. (Gen. 3:6) Tui nyidro, hetrenyi fe la itre jole ka tru ka ej thene la itre atr enehila, ke, tha hnei angatre kö hna xomehnöthe la itre sipu aja i angatr. Trotrohnine hnyawa hi Iehova laka, itre atr ka tha pexeje kö së, matre jole koi së troa hetrenyi la xomehnöth. Hetre aja i Nyidrëti troa xatua së matre tro sa atreine xomehnöthe la itre aja së ka ngazo.​—1 Ite jo. 8:46-50. w17.09 3-4 par. 3-4

Ame la ketre ijin, tha hna nue kö la itre trejin ka isa hane ngönetrei kö troa ce icasikeu e Afrique du Sud. Ngo, ame lo 18 Diseba 2011, hetre icasikeu ka ketrepengön hna kuca ngöne la ketre hnë elo ka tru e Johannesburg. Nge hna sine lai hnene la ala 78 000 nge hetre munën lao itre trejin qa Afrique du Sud me qa ngöne la itre nöj ka easeny, nge ka isa hane ngönetrei kö. Önine la ketre hen ne la hnë elo cili ka hape: “Pëkö ketre itronyi alanyim ka lolo thiina hnenge hna öhne ngöne la hnë elo celë. Ka heetre hnyawa asë hi epun. Hnei epuni hna nyidrawane hnyawane la hnë elo. Ngo isa hane ngönetrei epuni kö.” Kola mama jëne la itre mekun hna qaja hnene la itre atr ka tha ce hmi kö me easë laka, ka ketrepengöne kö la lapa ne la itre trejin e cailo fen. (1 Pet. 5:9) Pine nemene matre ka ketrepengöne kö së hune la itre xa organizasio? Pine laka, jëne la ixatua ne la Tusi Hmitrötr, me uati hmitrötre i Akötresie, easa isine troa ‘unatrije la atre ka hekö.’ Nge easa thele troa “xetëne la ate ka hnyipixe.”​—Kol. 3:9. w17.08 17-18 par. 2-3

Öni Tusi Hmitrötr, ka xulu la xomihni qa ngöne la uati hmitrötre i Akötresie. Maine patre ju la ixatua i Akötresie, thatreine jë kö la atr troa xomihnine la itre jole ka tru catr. Ketre ahnahna qaathei Akötresie la thiina cili, nge ame la easa melën, easë lai a amamane la ihnimi së koi Iehova me kowe la itre atr. E tha ka xomihni kö së, ketre tha ka catre kö la ihnimikeu së itre trejin, me koi itre xan. (1 Kor. 13:4; Gal. 5:22) Kola hapeue la troa xomihni? Kola hape, troa cile hut ngöne la itre jole ka tru me hetrenyi pala hi la aqane waiewekë ka loi. (Kol. 1:11; Iako. 1:3, 4) Ketre, hnene la xomihni hna xatua së troa mele nyipici koi Iehova, ngacama traqa ju hë koi së la nöjei jol. Tro eje lai a sewe së troa itëkeun ngöne la easa akötr. Öni Tusi Hmitrötr, loi e tro sa atrehmekune la enyipiewekëne troa atreine itreqe. Ketre ini lai ka tru ka mama ngöne Iakobo 5:7, 8. w17.08 4 par. 4

Maine eö la ketre thöth, atre hnyawa hi eö laka, qëmekene troa tro ga nanyi troa ngenu, loi e troa pane hnëkë, me mekune la götran hnei eö hna troa tro ngön. Hna aceitunëne la mel memine la troa ngenu, nge ame la ijine troa hnëkë tre, kolo ijine eö a thöth. Nyipici laka, tha ka hmaloi kö troa hnëkën la mele i eö. Ngo öni Iehova ngöne la topik së, the xou kö. Iehova a ithuecatre koi eö troa hnëkë hnyawa thatraqane la mele i eö elany. (Ate cai. 12:1; Mat. 6:20) Aja i Nyidrë tro eö a mele madrin. Kola mama lai jëne la itre hnei eö hna goeën, me dreng, me tupath, ene lo itre hnei Nyidrëti hna xup. Hetre ketre aqane amamane Nyidrë la aja cili. Iehova a hamë së la itre eamo, me amamane koi së la aqane tro sa hetrenyi la mel ka lolo. Celë hi matre, ame la kola thipetrij hnene la itre atr la itre eamo i Nyidrë, tha madrine kö Nyidrë. Öni Nyidrë koi angatr: “[Hnei nyipunie hna] iëne la tha hnenge hna ajan . . . hana wang, tro la ite hluenge a madin, ngo tro pe nyipunie a hmahma ; hana wang, tro la ite hlueng’ a hë draië kola aciaci la hni.” (Is. 65:12-14) Ame la easa axecië mekune hnyawa ngöne la mele së, easë hi lai a amamane laka, easa atrunyi Iehova.​—Ite edomë 27:11. w17.07 22 par. 1-2

Atre hnyawa hi Iehova la isa göhnen ne la itre wëtresij; ketre, atre eö hnyawa hi hnei Nyidrë, la hnei ö hna lapa ngön, la hni eö, me itre aja i eö! Atrepengöne hnyawa hi Iehova la hace ka ej thei epun, nge hetre mene me aja i Nyidrë troa xatua epun. (Sal. 147:5) Maine jë, jole catre pala ha koi epun troa xomihnin la itupath. Atre hnyawa hi Iehova la itre ifego së, me “mekune laka so ne hnadro shë.” (Sal. 103:14) Pine laka, itre atr ka tha pexeje kö së, ene pe casi pala hi la itre tria së, matre tro lai akucakucane la hni së. Maine pena, easa hace pine la itre ithanata hne së hna qaja, maine hnene la itre aja së ka ngazo, maine hnene laka, hetre hne së hna zalu piin. Maine eje hi laka, ka pexeje Iehova, ngo ame pe atrepengö së kö hnei Nyidrë, “tha nune ate kö la inamacane i nyidë.” (Is. 40:28) Hapeu, hnei epuni hë hna öhne la lue ime i Iehova ka catr, me thepe epun qa ngöne la itupath?​—Is. 41:10, 13. w17.07 18-19 par. 6-8

Hnene la ketre trejin ne Sri Lanka hna nue la uma me hnepadro i angeic matre hnë icasikeu, me hnë asabele, nge hnë mele fe hnene la itre trejin ka huliwa i Akötresie o drai. Ketre jëne manie lai ka tru pi hë hna nu, ngo ketre ixatua ka tru kowe la itre trejin e cili ka tha trene manie kö. Ame ngöne la ketre nöj hna wathebon troa cainöj, hnene itre trejin hna nue la itre uma i angatr matre nyi Uma Ne Baselaia. Celë hi ka aijijëne la itre pionie me itre xane ju kö ka tha trene manie troa hetre hnë icasikeu, nge pëkö nyine nyithupen. Hnene la ketre trejine föe hna kuië manie lapa thatraqane la huliwa ne la Baselaia. Öni angeic: “Hetre ketre ewekë hnenge hna melëne ngöne la itre macatre ka ase hë. Ame la eni a nue la itre mong, ketre kolo fe hi a ahmalane la hnying troa catre ham koi itre atr. Nge ketre, saqe hi ni hmalahnine troa nue la ngazo i ketre, me xomihnine la itre atr, me elë hune la itre ihmönyinyi, me kapa la itre ihaji.” w17.07 9 par. 9-10

Ngacama tha trotrohnine kö Iobu la itre akötre ka traqa koi angeic, ngo tro kö a traqa la ijine tro angeice thele la kepin matre hnei Iehova hna nue angeic troa akötre catr tune lai. Maine troa traqa la itre mekune cili, tro angeice lai a mekune hmaca lo itre ithanata i Iehova koi angeic. Tro lai a akeukawane la hni angeic, me xatua angeic troa hetrenyi la aqane waiewekë ka loi. (Sal. 94:19) E tro sa lapa mekune la ewekë ka traqa koi Iobu, tro fe lai a hane wenë amekötine la aqane waiewekë së me akeukawanyi së. Ame la tusi Iobu tre, ketre igötranene la Wesi Ula i Iehova hna cinyihane “nyine ini shë, mate hete mejiune shë hnene la xomi hni me keukawa qa ngöne la ite hna cinyihan.” (Rom. 15:4) Hanawange la ini ka tru koi së qa ngöne lai: Tha tro pi kö sa nue la itre ejolene la mel troa lapane la hni së, wanga tha mama pi koi së lo jol ka tru, ene la troa anyipicine la musi cile i Iehova. Tui Iobu, tro sa mele nyipici koi Iehova, ngacama tha ka hmaloi kö. Easë hi lai a amamane ka hape, easa sajuëne la musi cile i Iehova. w17.06 24 par. 9; 25 par. 13-14

Atre hnyawa hi Iesu laka, ka nyipiewekë catr kowe la itretre drei nyidrë troa hane mano. Ame la ketre ijin, hna catre cainöje trootro hnene la itretre dreng, matre Iesu a qaja jë koi angatr la ka mama ngöne la topik ne la drai. Ka hetre eloine koi së la itre ijine mano me itre ijine kuci madrin. Ngo loi e tro sa thupën wanga xome jë la mele së hnene itre ej. Hanawange la aqane ujë ne la ka ala nyimu ekö lo hneijine la itre pane keresiano: “Tro sha xeni me iji, ke elanyi la tro sha mec.” (1 Kor. 15:32) Aqane ujë ne fe hi la itre atr enehila. Nemene la ka troa xatua së matre tha tro kö sa sasaithi tulu ngöne la kuci madrin? Ame la ketre nyine kuca, tre, ene la troa iëne la ketre wiik me fejane la etrune la itre hawa hne së hna xome thatraqane la itre huliwa i Iehova. Thupene lai, fejane ju la etrune la traem hne së hna xom göi kuci madrin, tune la kuci elo, maine goeë tele, maine elo video, ngöne pala hi la wiike cili. Hetre nyine tro kö sa amekötin?​—Efe. 5:15, 16. w17.05 24-25 par. 11-13

Ame ngöne la ceitune i Iesu, nyidrëti a qaja la atr ka itö me salemëne la itre penina. Hnei angeic hna öhne la ketre penina ka tru alameken. Atraqatre pala ha la aja i angeic troa hetrenyi la penina cili, ame hnei angeic hna salemëne la nöjei ewekë i angeic, me itöne ej. Eje hi laka, ka tru koi angeic la penina cili! Kola aceitunëne la nyipici, ene la Baselaia memine la ketre penina ka tru alameken. E hnine së la Baselaia tune lo atre ajane la penina, tro së lai a nu asë pe la nöjei ewekë matre troa nyijinine la Baselaia. (Mar. 10:28-30) Zakaio la ketre tulu. Trenamo hë angeic ke, hna atrekënö la manie ne la itre atr. (Luka 19:1-9, MN) Ngo, ame la ketre drai, hnei Zakaio hna drei Iesu e qeje Baselaia. Hna ketri angeic hnyawa hnene lai, matre mekune jë hi angeic troa saze. Öni angeic: “Hanawang, joxu, eni a hamëne la sine la itre hnenge hna hetrenyi kowe la itre ka pë ewekë, nge e hetre hnenge hna ënön, tro ni a të koi foa lao etrune lai.” Hnei Zakaio hna të hmaca lo manie hnei angeic hna xom qaathene la itre atr, nge tha aja mo hmaca kö angeic. w17.06 10 par. 3-5

Ame la itre trejin hna iëne hnene la keme me thin troa xatuane la itre nekönatr, tre, loi e tro angatr a thuecatre i nyudreni pala hi troa metrötrëne la keme me thine i nyudren. Matre, loi e tro angatr a qaja aloine la keme me thin, ngo tha tro kö a xom la hnëqa i keme me thin, ene la troa hiane la itre nekönatr. Ketre, ame la itre ka hamë ixatua, tro angatr a thupëne la aqane ujë i angatr, matre tha tro kö a mekuhnine menu angatr hnene la itre trejin, maine hnene la itre xa atr. (1 Pet. 2:12) Ngacama kola aja ixatua hnene la keme me thin, ngo hnëqa i nyidro pala hi la troa inine la nyipici kowe la itre nekönatr. Nge, tro pala hi nyidroti a alamekëne la ixatua hna hamëne hnene la itre xa trejin. Keme me thine fe, sipo ixatua jë thei Iehova ngöne la thith, nge catre pi. (2 A. l. ite jo. 15:7) Wangatrune jë la imelekeu ne la nekö i epun me Iehova, nge pine pë hë la sipu aja i epun. Isine jë matre troa ketr la hni ne la nekö i epun hnene la Wesi Ula i Akötresie. The mano pi kö troa mejiune laka, tro la nekö i epuni a hane nyihlue i Iehova elany. w17.05 12 par. 19-20

Hnene la lue atr ka ngazo hna upezön menune la ketre atr. Matre hna jelengazo angeic, me humuthi angeic. Pane mekune jë la kola goeëne lai hnene la itre atr ka hnine la meköt, me öhne la kola tranyi humuthi angeic memine la itre nekö i angeic! Tha ketre ifejicatre kö lai. Celë hi ka traqa koi Nabotha, ketre hlue i Iehova ka nyipici, me ka mel lo ijine Ahaba joxu a mus e Isaraela. (1 Ite jo. 21:11-13; 2 Ite jo. 9:26) Ame la Ahaba Joxu a qaja koi Nabotha la aja i angeic troa itöne la vine i Nabotha, me hamëne la vine ka sisitria i angeic, hna thipëne hnei Nabotha. Hnei Nabotha hna thipëne la sipo i Ahaba joxu ke, ka icilekeu memine la wathebo i Iehova. Kola wathebone la angetre Isaraela troa salemëne paluane la hnepadro ne la itre xötrapane i angatr. (Lev. 25:23; Num. 36:7) Matre, Nabotha a drengethenge Iehova. w17.04 23 par. 1; 24 par. 4

Drei la itre ka troa mele pe thupene la kola apatrene la itre atr ka ngazo? Hnei Iehova hna thingehnaeane ka hape: “Tro la ange ka menyike a hetenyi la nöj, nge tro angat’ a madine la tingetinge atraqat.” Kolo fe a qaja e thupen ka hape: “Tro ha la ange ka meköti a hetenyi la nöj, me lapa palua kö ngön’ ej.” (Sal. 37:11, 29) Drei la “ange ka menyike” memine la “ange ka meköt”? Ame la itre ka menyik tre, itre atr ka ipië, nge ka thele troa atre Iehova me drengethenge la itre hnei Nyidrëti hna amekötin. Ame la itre ka meköt, kola qaja la itre ka hetre aja troa kuca la itre ewekë ka meköti koi Nyidrë. Ame ngöne la fen enehila, nyimutre catre kö la itre ka ngazo hune la itre ka meköt. Ngo ame ngöne la fene ka hnyipixe, itre ka menyik, me ka meköti hmekuje hi la itre ka troa nyialiene la fen, nge tro angatr a aparadraisone la ihnadro! w17.04 10-11 par. 5-6

Hnene la ihnimi së koi Akötresie matre easa hnime la itre trejin, ene mina fe la itre ka akötr. (1 Ioane 3:17, 18) Ame lo kola traqa la jiin ekö kowe la itre pane keresiano, hnene la ekalesia hna hnëkën la ixatua nyine iupi fë. (Ite hu. 11:28, 29) Hnei Paulo aposetolo hna thuecatrene la itre keresiano troa hane hnimi trenyiwa. (Rom. 12:13) Öni Peteru fe, “Ihnimi trenyiwa jë ketre koi ketre, the nyi ulili fë kö.” (1 Pet. 4:9, MN) Pine laka hna ithuecatrene la itre keresiano troa kuca la loi kowe la itre trejin ka ihamë ngöne la itre xa götran, eje hi laka, tro fe sa kuca la loi kowe la itre trejin ka cile kowe la itre jol maine hna akötrën pena pine la lapaune i angatr! Tha ekö catre kö ngöne la götrane ahië ne Ukraine, hnene la Itretre Anyipici Iehova hna kötre mel qa ngöne la itre hnalapa i angatr, ke, kola isi, me iaxösisi. Hetre ka mec thei angatr. Ngo, hnene la itre trejin ne la itre xa götran e Ukraine, me Russie, hna kapa ngöne la itre hnalapa i angatr la itre ka kötre mel. Ame ngöne la lue nöje cili, tha hnene kö la itre trejin hna nyi “sine ne la fen,” ngo hnei angatre pe hna catre “cainöjëne la wesi ula.”​—Ioane 15:19; Ite hu. 8:4. w17.05 4 par. 6-7