Nofeba

Ame la easa sipu hnöth la mele së tre, easë hi lai a xomehnöthe la itre ewekë matre troa lolo la aqane ujë së me aqane mekune së. Tha hna hnaho së kö cememine la atreine troa sipu hnöth la mele së, ngo hne së pe hna inin. Ame la kem me thin a inine la nekönatr “ngöne la ini me ihaji [Iehova],” nyidroti hi lai a xatuane la nekö i nyidro troa inamacan, me atreine sipu hnöthe la mele i nyën. (Efe. 6:4) Ceitune hi memine la itre atr ka atre Iehova, nge itre ka tru hë. Ngacama atreine hë angatr hnöthe la mele i angatr, ngo ame pe, tha itre keresiano ka macaje pala kö. Ame hë la angatr a xetrëne la “ate ka hnyipixe” me thele troa xötrethenge Keriso, angatre hi lai a kökötre me macaje trootro. (Efe. 4:23, 24) Haawe, nyipiewekë tro sa catre xomehnöth. w18.03 29 par. 3-4

Hnei Iehova memine la organizasio i Nyidrë hna hë së kowe la itre icasikeu. Ketre, aja së troa kapa hnyawa la itre ka sine la itre icasikeu, ene mina fe la itre ka xötrei traqa. (Rom. 15:7) Angatre fe la itre hna hën hnei Iehova, matre loi e tro sa kepe angatr hnyawa, ngacama tha ceitu së kö me angatr, nge isapengöne kö la aqane heetre së me angatr. (Iako. 2:1-4) Maine epuni a öhne la ketre e lapa cas, hë angeice jë troa ce lapa me epun. Tro angeice lai a madrin e tro epuni a xatua angeic troa trotrohnine la aqane trongene la icasikeu, maine troa ithel ngöne la Tusi Hmitrötr. Celë hi aqane tro sa ‘majemine troa hnime la itre trenyiwa.’ Ame itre xa ijin, kola traqa kowe la ekalesia së la ketre trejin ka troa hamë cainöj, maine ka iwai trootro, maine ka nyitrengewekëne la Bethela. Hapeu, ijije kö tro sa könë angeic ngöne la ijine cili? (3 Ioane 5-8) Ka lolo catr e tro sa hë angeic kowe la hnalapa së matre troa hutihut, maine ce xen. w18.03 15 par. 5, 7

Pane mekune jë la tulu i Saulo, atre Iudra. Hna hnaho angeic ngöne la nöj ka sa xepu hë koi Iehova. Ngo hnene la angetre Iudra hna tha idrei, ame hnei Iehova hna nuetriji angatr. Ka catre trongëne Saulo la itre hna majemine kuca hnei angetre Iudra ngöne la hmi. Matre, hnei angeic hna axösisine la itre keresiano. Ngo, ame la ketre ijin, hnei Iesu, lo mele hmaca ha nyidrë, hna ithanata meköti koi Saulo qa hnengödrai. Nemene hë la hna kuca hnei Saulo? Hnei angeic hna kapa madrine la ixatua i Anania, ketre atre dreng. Öni Tusi Hmitrötr: “Ame hna goepi angeic, me cilejë, ame hna bapataiso angeic.” (Ite hu. 9:17, 18; Gal. 1:14) Hna hë angeice pë hë e thupene ka hape, Paulo aposetolo. Pane mekune jë! Ame ju hi la angeic a trotrohnine laka, Iehova a eatrëne la aja i Nyidrë jëne Iesu, canga xomi bapataiso ju fe hi angeic. (Ite hu. 22:12-16) Celë hi ewekë ka traqa enehila thene la itre ka ini Tusi Hmitrötr, itre thöth me itre qatr. w18.03 5-6 par. 9-11

Hace catre pi hë ekö, la mele i Iakobo. Hnei Esau, sipu trejin me angeic, hna thel troa humuthi angeic. Nge, hna iaö angeic hnei Labana, keme ne la lue föi angeic. (1 Kor. 2:14-16) Ngo, hnei Iakobo palahi hna catre lapaune kowe la hna thingehnaeane hnei Iehova koi Aberahama. Atre hnyawa hi angeic laka, troa eatrëne la hna thingehnaeane cili jëne la lapa i angeic, matre angeic a thupë nyudreni hnyawa. (Gen. 28:10-15) Hnei Iakobo palahi hna lapa mekune lai, ngacama kola mel nyipine la itre atr ka kuca la “ite huliwa ne la ngönetei.” Ame lo kola thel troa humuthi angeic hnei Esau, hnei angeic hna sipo iele Iehova troa amele angeic. Öni angeic: “Hnei cilieti hna ulatin, ka hape, Tro ni a kuca la loi koi ’ö, nge tro ni a amanane la ite matra i ’ö mate tune la ngöni ne hnagejë lo tha nune e ke mana.” (Gen. 32:6-12) Ka catre la lapaune i Iakobo kowe la itre hnei Iehova hna thingehnaean, nge hnei angeic hna amamane lai ngöne la aqane mele i angeic. w18.02 20 par. 9-10

Hna saze la pengöne la mele i Iobu. Ame ngöne la xötrei, kola qaja hnei Tusi Hmitrötr göi angeic ka hape, “sisitia la ate cili hune la nöjei ate ne kohië asë.” (Iobu 1:3) Ketre atre ka trenamo, ka hlemu, nge hna atrun. (Iobu 29:7-16) Ngo, tha hnei Iobu pi kö hna mekun ka hape, sisitria kö angeic hui itre xan, maine pena tha nyipiewekë kö Akötresie ngöne la mele i angeic. Hnei Iehova hna hë Iobu ka hape, “hlueng.” Tha mano kö Satana akötrë angeic. Hnei Satana hna nyijëne matre tro Iobu a mekun ka hape, qaathei Iehova la itre akötr. (Iobu 1:13-21) Nge, ame pena la köni sinee i angeic, hnei angatr hna qaja la itre trenge ithanata ka akötrë angeic. Öni angatr, Iehova a nyithupen koi Iobu pine la itre huliwa i angeic ka ngazo. (Iobu 2:11; 22:1, 5-10) Ngo, hnei Iobu hna mele nyipici koi Iehova. Thupene la itre hulö celë, hnei Iehova hna hamën hmaca koi Iobu la itre hnane la itre ewekë i angeic ka patr, nge hna nyixan, a alu. Nge, hnei angeic hna mele hmaca kö koi 140 lao macatre thupen. (Iako. 5:11) Ame ngöne la ijine cili, hnei Iobu hna catre nyihlue i Iehova cememine la hni ka pexej. w18.02 6 par. 16; 7 par. 18

Ame kowe la itre atr ka hetrenyi la itre thiina ka ngazo cili, ka sisitria kö angatr hui itre xan qa ngöne la itre hnei angatr hna atreine kuca, memine la pengöi angatr, me itre mo i angatr, maine itre hnëqa hna cilën. Hetre aja i angatr troa atrunyi angatre kö. Önine la ketre ka inamacan: “Ame e kuhu hni angatr, kösë hetre haze laka, angatr a thil koi angatre kö.” Hna xele ma wang la thiina cili hnene la itre atr, nge goi xele fe ma wang hnene la itre ka pi tru. Xele catre Iehova ma wange la atr ka pi tru. (Ite edomë 6:16, 17) Ka nanyi catre angeic qaathei Akötresie. (Sal. 10:4) Diabolo hi lo atre pi tru. (1 Tim. 3:6) Nge, tro fe a hane löthe la itre hlue i Iehova hnene la thiina cili. Uzia joxu ne Iuda la ketre atr ka nyipici koi Iehova ngöne la itre macatre ka nyimutre. Ngo, öni Tusi Hmitrötr: “Nge catë hë nyidë, nyidëti a pi tru mate hnëjinepi ; ke nyidëti a thina ka ngazo koi Iehova Akötesi nyidë.” Hnei Uzia hna tro kowe la ēnē me dreu sinöe ka pui loi, ngo tha hnëqa i angeice pe. Thupene lai, hna hane traqa koi Hezekia joxu la pi tru, ngo ngöne hi la hnepe ijine ka co.​—2 A. l. ite jo. 26:16; 32:25, 26. w18.01 28 par. 4-5

Kola mama e hnine la Tusi Hmitrötr laka, hnene la itre hlue i Iehova ekö hna hane sajuëne la huliwa i Nyidrë. Ame itre xa ijin, angatr a ham göi troa sajuëne la ketre huliwa ka tru. (Eso. 35:5; 2 Ite jo. 12:4, 5; 1 A. l. ite jo. 29:5-9) Ame ngöne la hneijine la itre pane keresiano, hna lepe la itre trejin ne Iudra hnene la jiin. ‘Ame hnei angetre drenge hna ce ithanatan troa iupi fë la itre ixatua kowe la itre trejine ka lapa e Iuda, thenge la hnei angatre hna isa atrein.’ (Ite hu. 11:27-30) Nyimu pengöne aqane troa ham. Ame ngöne la hneijine la itre pane keresiano, hetre itre ka salemëne la itre hlapa me itre uma i angatr, me hamëne pë hë la manie kowe la ange aposetolo. Nge, ange aposetolo a xome la manie cili troa xatuane la itre trejin ka aja ixatua. (Ite hu. 4:34, 35) Hnene la itre xa keresiano hna isa ami manie matre troa kuië ahnahna thatraqane la huliwa i Akötresie. Matre, ka ham asë hi la itre hlue i Iehova, itre ka pë ewekë ju hë maine itre ka trenamo.​—Luka 21:1-4. w18.01 18 par. 7; 19 par. 9

Nyimutre la itre ewekë hne së hna atreine kuca hnene la sipu trengecatre së, ngo loi e tro sa trotrohnine hnyawa laka, hetre ifego së. Hnei Paulo aposetolo hna kuca la itre ewekë ka nyimutre, ngo thatreine kö angeice eatrën asë la itre hnei angeic hna mekun. Matre ame la angeic a fe la hni angeic koi Iehova, öni Nyidrë: “Pexeje la menenge ngöne la kucakuca.” Mama hnyawa koi Paulo la enyipicine la trengewekë i Iehova. Matre, öni angeic: “E kucakuca ni, celë hi ijin cate ni.” (2 Kor. 12:7-10) Nemene la aliene lai? Atre hnyawa hi Paulo laka, thatreine kö angeic eatrën asë la itre hnei angeic hna mekun hnene la sipu trengecatre i angeic. Matre, nyipiewekë tro angeic a thele ixatua thene la Atre trene men. Uati hmitrötre i Akötresie la ka troa thue trengecatre i angeic ngöne la itre ijine kucakuca. Ketre, uati Akötresie la ka troa aijiji angeic troa eatrën la itre huliwa ka tha hmeku i angeice kö. Haawe, e hne së hna kapa qaathei Iehova la uati hmitrötr, tro hë së lai a hetre trengecatr! w18.01 9 par. 8-9

Ame la kola ajan hnene la nekö i epun troa xomi bapataiso, pane inine jë la itre jia ne huliwa hna hamëne hnene la organizasio i Iehova thatraqane la keme me thin. Thupene lai, thele jë la nyipi ijin, nge ithanata amenyikenyi jë kowe la nekö i epun. Nge qaja jë hë koi angeic ka hape, ka nyipiewekë catr lo hnei angeic hna sisinyi koi Iehova, me xomi bapataiso, nge tro kö angeic a kepe manathith qa ngön. Keme me thine fe, hnëqa i epun troa hiane la nekö i epun ngöne “la ini me ihaji [Iehova].” (Efe. 6:4) Loi e tro epuni a ini nyudren la hna qaja hnei Tusi Hmitrötr, me xatua nyudren matre troa xecie e kuhu hni nyudren ka hape, nyipici la itre ini cili. E catre hë la lapaune i nyudren, nyudreni ha sa xepu koi Iehova, me kuca asë la hnei nyudreni hna atrein ngöne la huliwa i Nyidrë. Tro la Wesi Ula i Iehova, me uati hmitrötr, memine la trengecatr hnei epuni hna nue a “ainamacanë [nyudren] kowe la mel.” w17.12 22 par. 17, 19

Ame lo kola 100 lao macatre i Daniela, easenyi hë tro nyidrë a mec. Hnei nyidrëti kö hna mejiune laka, troa amele nyidrëti hmaca? Eje hi! Öni Akötresie koi nyidrë ngöne la pune la tusi Daniela ka hape: “Trojë eö uti hë la pun ; ke tro eö a mano.” Atre hë nyidrë laka, ame la itre ka mec, angatr a mano, nge “pëkö . . . wangate hmekun, me inamacan, ngöne la hua.” (Ate cai. 9:10) Ngo, tha celë kö la pun koi Daniela. Hnei Iehova hna hamë nyidrë la ketre mejiun ka lolo catr. Celë hi ka mama ngöne la topik ne la drai celë. Thatre kö Daniela la ewekë ka troa traqa. Ngo, ame la hnei nyidrë hna atre, tro nyidrë a mec, me mano. Ngo, ame la Akötresie a qaja ka hape, “Tro eö a . . . cile ngöne la edö i ’ö,” kola anyipicine koi Daniela laka, troa amele nyidrë hmaca elany. Tro lai a eatr, “e tixenuë hë la ite drai,” kola hape, thupene la itre macatre ka nyimutre ne meci hë nyidrë. w17.12 7 par. 17-18

Hnei Iehova hna upe la itre qatre ne Isaraela troa thiina ka meköt tui Nyidrë. Loi e tro angatr a pane atre la itre ewekë ka traqa ngöne la ijine mec la atr hna humuth. Thupene lai, angatr a thele troa atre la kepin matre humuthe pi lai atr, me atre la thiina ne la ka ihumuth, me itre huliwa i angeic ekö. Ame hë e cili, tro hë angatr a axeciën ka hape, tro ha utipin maine tha tro kö a utipi angeic. Ketre, tro angatr a thel ka hape, ‘Hnene kö la ka kötre mel hna humuth la atr hnei imethinë?’ (Num. 35:20-24) Nge, e hetre atre anyipicin, loi e troa lue ka anyipicin, nge ame hë e cili, tro ha tranyi angeic. E mama hnyawa ha la jol kowe la itre qatr, tro pena ha angatr a wange hnyawane la pengöne la ka ihumuth. Loi e tro la itre qatre a atreine waiewekë, ene la troa thele fe la itre ewekë ka tha mama kö koi lue mek, memine la kepine matre traqa pi kowe lai ihumuth. Ka nyipiewekë koi angatr la uati hmitrötre i Iehova matre tro angatr a hetrenyi la itre thiina i Nyidrë, ene la troa atreine waiewekë, me hetre utipin, me thiina ka meköt.​—Eso. 34:6, 7. w17.11 16 par. 13-14

Ame la easa nyiqaane inine la Tusi Hmitrötr, easa atre la itre xa trenge nyipici ka lolo. Ame ngöne la xötrei, hne së hna inin laka, Iehova la Atre Xupi së, nge hetre aja i Nyidrë kowe la itre atr. Hne së fe hna inin laka, hnei Iehova hna upe la nekö i Nyidrë kowe la fen matre troa mec, nyine thupene mel me thepe së qa ngöne la ngazo me mec. Ketre, hne së hna inin laka, tro la Baselaia i Akötresie a apatrene trij la akötr, nge tro hë sa mele epine palua e celë fen, ngöne la tingeting, me madrin. (Ioane 3:16; Hna ama. 4:11; 21:3, 4) Celë hi itre trenge nyipici lai hna hëne ka hape, ka hekö. Ame itre xa ijin, kola qejepengöne ahnyipixen la ketre hna perofetan ne la Tusi Hmitrötr, maine ketre xötre pena. Maine hetre ini hna qejepengön ahnyipixen, nyipiewekë tro sa xomi ijine troa waipengön eje hnyawa, me troa sine thel ej. (Ite hu. 17:11) Eje hi laka, tro së lai a thele troa trotrohnine hnyawa la itre mekune ka tru hna qejepengön ahnyipixen. Ngo tro fe sa thele troa atre la eisapengönene la aqane trotrohnine ekö me enehila ngöne la itre götrane ka co. E tro sa waipengöne hnyawa lai, tro hë la itre ini ka hnyipixe a nyi xa aliene la trenge nyi së, ene la itre trenge nyipici ne la Tusi Hmitrötr. w17.06 12-13 par. 15-16

Loi e tro sa hmekën la itre ijine ka troa tupathi së troa ena la itre trepene meköti Iehova. E tro la lue trejin a nyiqaane iatre, loi e tro nyidroti a canga ami ifego göi troa iketr, me iaba, maine göi troa lapa cas. (Ite edomë 22:3) Ketre, loi e tro sa hmekëne la itre ijine easa tro kowe la itre xa nöj göi huliwa, maine ngöne la easa ce huliwa, trahmanyi me föe. (Ite edomë 2:10-12, 16) Thupëne hnyawane ju la itre ijine eö a kucakuca, maine hleuhleu pena. Itre ijine lai laka, easa ajane tro ketre a nyipiewekë së, nge the qaja kö e hace catre hë la hni së. Maine tro lai a traqa koi eö, qale jë koi Iehova, nge thele ixatua jë thene la itre trejin.​—Sal. 34:18; Ite edomë 13:20. w17.11 26 par. 4-5

Tha Iehova kö a wangahmalohmaloeëne la humu atr. Matre, e hetre hna humuthe hnene la ketre atre Isaraela, tro fe a humuthi angeic hnene la ketre atrene la hnalapa ne lai ka mec, hna hën ka hape, “ate cili wezipo (maine atre itö madra).” (Num. 35:19) Tro la atre ihumuth a të hnene la sipu mele i angeic la mele ne la ka mec. Maine tha hna canga humuthe kö la atre cili, tro ha apuingazone la Nöj Hna Thingehnaean, matre tha hmitrötre hë ej me wië. Öni Iehova lo: “The tro kö nyipunie a angazone la nöje nyipunie a lapan, ke, ame la madra [ne la atr hna anenin], te, ate angazone la nöj.” (Num. 35:33, 34) Nemene la ewekë ka traqa e meci pi ketre hnei ketre ngo tha hna thë pe? Maine eje hi laka, tha hna thë kö, ngo zöi angeic la kola meci la atr. (Gen. 9:5) Ame e cili, öni Iehova, loi e troa utipi angeic. Tro angeic a kötrene lo atre itö madra, me lö kowe la hlapa hnë kötre zae ga easeny, ke, sikisi lao hlapa hnë kötre zae ekö. Ame hë la angeic a traqa e cili, tha seseune hë angeic la mele i angeic. Ngo loi e tro angeic a lapa e cili uti hë la kola mec la atre huuje ka sisitria.​—Num. 35:15, 28. w17.11 9 par. 3-5

Celë hi hna kuca hnene la ketre trejin föe qa Australie. Ka icilekeu catr la keme ne la föi angeic kowe la nyipici, nge ka canga elëhni. Matre, e mekune hë angeic me föi angeic troa hë nyidrë ngöne telefon, nyidroti mina a sipone la ixatua i Iehova matre tro palahi a menyike la aqane ithanata i nyidro koi nyidrë. Nge, hna sa traemene hi la ihë matre tha tro kö a isi ithanata me nyidrë göi hmi. Nyipici laka, tro palahi lai a isazikeu la itre mekune i epun memine la itre sinee i epun ka tha hmi kö. Tro lai a ajolëne la hni epun ke, tru la ihnimi epun koi angatr, nge aja i epun troa amadrinë angatr. Ngo, the thëthëhmine kö laka, loi e troa tro pa la ihnimi epun koi Iehova hune la ihnimi epun kowe la hnepe lapa i epun. Maine jë, tro angatre lai a trotrohnine la enyipiewekëne troa nyihlue i Iehova. Ngo, thatreine kö epuni troa musinë ketre me ketre troa kapa la nyipici. Tro kö angatre lai a öhne la itre eloine la troa xötrethenge la itre trepene meköti Iehova. Iehova a aijijë angatre fe troa hane axeciëne troa nyihlue i Nyidrë tui epun.​—Is. 48:17, 18. w17.10 15-16 par. 15-16

Tha tro hmekuje kö a qaja ka hape, “Ka tru catr la ihniming koi eö.” Ngo, loi e tro fe a amaman. E hetre ka pë thene la itre xa trejin tune la iheetr maine xen, loi e troa xatua angatr, ngo tha hnei ithanata hmekuje kö. (Iako. 2:15, 16) Ceitune hi lai memine la easa thith koi Iehova matre troa elë la etrune la itre ka troa cainöje trootro. Tro la ihnimi së koi Nyidrë me kowe la itre atr a upi së troa thith tune lai, ngo tro fe sa ketre sipu catre cainöje trootro. (Mat. 9:38) Öni Ioane aposetolo, nyipiewekë tro sa ihnim “hnene la huliwa me nyipici.” Haawe, loi e troa “pë thoi ngön” la ihnimi së. (Rom. 12:9; 2 Kor. 6:6) Ame itre xa ijin, tro la atr a pi mama fë ka hape, ka ihnim angeic ngo ka lue iqëmeke pe. Tha ka ce tro kö la ihnim memine la troa huliwa iaö. Pëkö eloine e troa ujë tune lai. w17.10 8 par. 5-6

Maine easa ajane troa hetre menen la Wesi Ula i Akötresie kowe la mele së, nyipiewekë tro sa e lapan ej. Loi e tro sa e ej e nöjei drai. Nyipici laka, tru catre la itre jole së enehila. Ngo tha tro pi kö sa nue la ketre ewekë memine fe la itre hnëqa së troa sewe së troa e la Tusi Hmitrötr. (Efe. 5:15, 16) Hetre itre trejin ka e e hmahmakany, itre xan ngöne la ketre hnepe ijine ne la drai, nge itre xan a e e jidri catre hë. Casi hi la mekuna i angatr memine la hna qaja hnene la atre cinyihane la Salamo, kola hape: “Atraqate la ajange kowe la wathebo i cilie, ini a mekune kow’ ej’ o drai.” (Sal. 119:97) Nyipici laka, nyipiewekë tro sa e la Tusi Hmitrötr. Ngo, loi e tro fe sa lapa mekun ej, maine thel ajuin la hne së hna e. (Sal. 1:1-3) Tro hë së a hetrenyi la inamacan qa hnine la Tusi Hmitrötr, me mele thenge ej. Matre, e ju hë së la Tusi Hmitrötr ngöne ipepa, maine ngöne tablet maine itre xa aparei ju kö, ngo ame la aja së, tre, tro la Wesi Ula i Akötresie a ketr la hni së. w17.09 24 par. 4-5

Ngo hetre itre ijine laka, tha ijije së kö tro sa utipine la itre atr. Hanawange la tulu i Saulo Joxu: Ame koi angeic, hnei angeic hna utipi Agaga, Joxu ne Amaleka, lo ithupëjia memine la nöje i Akötresie, matre tha humuthi Agaga ju kö. Ngo, hnei Iehova pe hna upi Saulo troa humuthe asë la itretre Amaleka. Hnene la tha idrei Saulo, ame hnei Iehova hna nuetriji angeic matre tha tro hmaca kö a joxu. (1 Sam. 15:3, 9, 15) Iehova la Atre Amekötin ka sisitria, nge ka atre la sipu aliene hni ne la atr. Nge atre kö Nyidrëti la ijine troa utipine la itre atr. (Ite teije 2:17; Ezek. 5:11) Easenyi hë matre amekötine jë Nyidrëti la nöjei atr asë ka xele ma drengethenge Nyidrë. (2 Thes. 1:6-10) Tha ijine tro hmaca kö Iehova lai a utipine la itre atr ka ngazo. Ngo, ame la kola lep apatrenyi angatr elany, Nyidrëti hi lai a utipine la itre atr ka meköt, ene lo itre hnei Nyidrëti hna troa amelen. Eje hi laka, tha easë kö la ka amekötin ka hape, troa mel maine mec la ketre atr. Ngo, qa së pe troa xatuane la itre atr enehila. w17.09 10-11 par. 10-12

Iehova Akötresie la ka xatua së troa melëne la thiina celë, ene la xomehnöth. Pëkö ejolene koi Nyidrë, ke ka pexeje Nyidrë, ngo jole catre pi hë koi së, ke itre atr ka ngazo së. Eje hi laka, nyimutre catre la itre jole thene la itre atr enehila pine laka, patre kö la thiina cili thei angatr. E patre kö la thiina cili thene la atr, tro angeic lai a wangacone la itre huliwa ka nyipiewekë catr, maine tha huliwa hnyawa ngöne la hna ini, maine thei maseta. Ketre, tro fe angeic a ithanata akökötreny, maine iji menu la kahaitr, maine isi pena, maine troa seihnacil, maine xomi gufa menu, maine kuca la itre hna majemine ka ngazo, maine troa lapa kalabus, me hleuhleu, maine hetre mec ka solesol, maine upune ngo tha ajane pe. (Sal. 34:11-14) Nge e cili hi la kola mama laka, patre kö la xomehnöthe thene la itre atr enehila. Ngo, tha sesëkötre kö së, ke, hnei Tusi Hmitrötre hna perofetane hë ka hape, ketre hatrene lai laka, easa melëne la itre drai tixenuë.—2 Tim. 3:1-3. w17.09 3 par. 1-2

E hetrenyi the së la “tingetinge qaathei Akötesie,” tha tro kö së lai a seseu menu, nge ketre ka lapa hnyawa la itre hni së me itre mekune së. Tha luelue kö së laka, Iehova a nyipiewekë së, nge aja i Nyidrë tro pala hi a tro loi la mele së. (1 Pet. 5:10) Ketre, kola thupë së qa ngöne la itre mekune ka iajolë me ka iakucakucany. Easenyi hë matre traqa pi la akötr atraqatr kowe la nöjei atr. (Mat. 24:21, 22) Thatre kö së la ewekë ka troa isa traqa koi së elany. Ngo, eje hi laka, tha tro pi kö sa hnehengazo menu göne la ijine cili. Maine nyipici laka, thatre asë kö së la itre ewekë hna troa kuca elany hnei Iehova, ngo ame pe, atre hnyawa hi së la pengöi Akötresie. Mama cile hnyawa koi së la itre hnei Nyidrëti hna kuca ekö kowe la itre hlue i Nyidrë. Kola mama laka, traqa ju hë la nöjei pengöne ewekë, ngo tro kö Iehova a nyijëne matre eatre pi la aja i Nyidrë. Nge ame la aqane tro Nyidrëti lai a eatrën, tre, tro së lai a hain! Haawe, ame la nöjei ewekë hnei Iehova hna kuca koi së, tre, itre xa pengöne aqane tro së lai a melën la “tingetinge qaathei Akötesie ka sisitria kö hune la nöjei mekun asë.” w17.08 12 par. 16-17

“Uti hë eu?” Celë hi hnyinge i Isaia ekö me Habakuka. (Is. 6:11; Hab. 1:2) Ame laka hnyinge jë fe Iesu tune lai ngöne la ketre ijin, ke kola mele xötreithi nyidrëti hnene la itre ka tha lapaun. (Mat. 17:17) Tro fe hi lai a hane traqa koi së la mekune cili. Maine jë, hetre ewekë ka tha meköti kö hna kuca koi së. Maine pena, hna tithi së hnei mec, maine easa utipië trootro. Maine jë, easa seseu, ke easa melëne la itre “ijine ka aköte.” (2 Tim. 3:1) Maine pena, hnene la aqane ujë ne la itre atr ka lapa xötreithi së hna akucakucanyi së. Ngo ame la ka ithuecatre koi së, tre, ene la troa atre ka hape, tha hnei Iehova kö hna jelengazone la itre hlue i Nyidrë pine hnyinge tune lai ekö. Nemene la ka troa xatua së la kola traqa koi së la ketre jol ka tru? Hane hi la hna sa hnei Iakobo ngöne la topik ne la drai enehila. w17.08 3-4 par. 1-3

Ajane i Iesu, tro la itretre drei nyidrë a nyisineene la itre atr e hnengödrai jëne la itre “tenga mo ka tha meköti kö.” Ame la aqane tro sa huliwane hnyawane la itre mo së, tre ene la troa kuië ahnahna thatraqane la huliwa ne cainöj e cailo fen, huliwa hna qaja amë hë ekö, nge ka eatr enehila. (Mat. 24:14) Hetrenyi thene la nekönatre jajinyi ne Inde la ketre trengene mani, nge hnei angeice pala hi hna nyialiene hnene la itre neköi pies. Tha itöne hë angeic la itre neköi nyimo göne troa nyialiene lai. Ame hë la kola tiqa la trengene mani, angeice hë lai a nu asë la manie hnei angeic hna amë acon thatraqane la huliwa ne cainöj. Hnene la ketre trejin ne Inde, trene hnëngenu, hna hamë ono kowe la hnë ujë qene hlapa e Malayalam. Ame koi angeic, ka nyipiewekë kö la ahnahna celë hune la troa hamë manie ke, angatr pala hi a itö ono. Celë hi “inamacane” lai. Ketre tune mina fe, itre trejin ne Grèce a hamë oel, me fromage, me itre xa xeni ju kö kowe la Bethela. w17.07 8 par. 7-8

Ame la angetre Iudra a po e Babulona, tha pi nyima kö angatr. Angatr a ajan troa akeukawanyi angatr. Matre, hnei Iehova hna xatua angatr, tune lo aqane qaja amë hë hnene la Wesi Ula i Iehova. Hnei Koreso ne Peresi hna ngaa Babulona me qeje Iehova ka hape: “Hnei nyidëti hna upi ni troa xupe la uma i nyidëti e Ierusalema.” Öni angeice mina fe kowe la angetre Isaraela: “Dei e nyipunie sine la nöjei ate i nyidë asë ? Tro Iehova Akötesi angeic’ a ce me angeic ; nge trojë angeic.” (2 A. l. ite jo. 36:23) Ketre ewekë lai ka akeukawane la hni ne la angetre Isaraela e Babulona! Hnei Iehova hna akeukawane la nöje Isaraela, ngo memine fe la isa atrene ej. Nge Nyidrëti fe a ujë tun enehila. Akötresie la “ate axapone la angete thë fë hni, me atuthe la ite eate i angat.” (Sal. 147:3) E hetre sine meci së, maine ka hace la hni së, tha luelue kö së laka, Iehova a wangatrunyi së. Tru la aja i Nyidrë troa akeukawan me axapone la hni së. (Sal. 34:18; Is. 57:15) Nyidrëti a hamë së la inamacan me trengecatr matre tro sa atreine cile kowe la nöjei jol ka traqa koi së.​—Iako. 1:5. w17.07 18 par. 4-5

Iehova la Atr ka sisitria e koho hnengödrai me e celë fen. Itre ewekë i Nyidrëti asë hi la nöjei ewekë. (1 A. l. ite jo. 29:11, 12) Nge, ka hame catre Nyidrë. Tru la ole së laka, hnei Nyidrëti hna ce thawa me easë la itre trengamo i Nyidrë! Nemene la itre trengamo cili? Kola qaja la (1) Baselaia i Akötresie, (2) huliwa ne cainöj, (3) itre nyipici ne la Wesi Ula i Nyidrë. Ngo, e tha hmeke kö së, tro së lai a thëthëhmine la enyipiewekëne la itre ewekë cili. Matre, loi e tro pala hi sa lapa mekune lai, me hnine catrëne itre ej. Nyipiewekë fe tro sa amekötine la mele së matre troa hane nyijinine la Baselaia i Akötresie. (Rom. 12:2) Ngo, tha tro kö a hmaca e cili la itre trengecatre së. Tha tro kö sa nue la ketre ewekë, tune la aja mo, maine itre aja ka sis, troa ananazijëne la aja së kowe la Baselaia.​—Ite edomë 4:23; Mat. 5:27-29. w17.06 9 par. 1; 10 par. 7

Ame la mekune ka tru ngöne la porotrike i Iehova me Iobu, tre, Nyidrëti a thele matre tro angeic a trotrohnine ka hape, ka pë pengöne catre angeic xajawa i Nyidrë. Ngo, tha qaja kö Nyidrë la qaane la itre akötre i angeic. Ketre, hnei Nyidrëti hna amamane koi Iobu ka hape, hetre itre xa jole ka tru catre hmaca kö hune la itre jol ka traqa koi angeic. (Iobu 38:18-20) Hnene la itre ithanata i Iehova hna xatua Iobu troa wenë amekötine la aqane waiewekë i angeic. Hapeu, ka catrehnine kö la aqane ithanata i Iehova koi Iobu, thupene la hna akötr? Ohea. Nge ketre, tha mekuna i Iobu fe kö lai. Trotrohnine hi Iobu la aliene la itre ithanata i Iehova, nge ka tru koi angeice la itre eamo i Nyidrë. Matre öni angeic: “Menu hë ni la hnenge hna qaja, nge eni a ietra ngöne la xaxau me hnatresij.” Hnei Iobu hna drenge hnyawa la itre eamo i Iehova, ame hnei angeic hna saze la aqane waiewekë i angeic. (Iobu 42:1-6, MN) Thupene lai, hnei Iehova hna qaja kowe la itre sinee i angeic ka hape, madrine catre Nyidrë koi Iobu pine la lapaune i angeic.​—Iobu 42:7, 8. w17.06 24-25 par. 11-12

Nemene la ka troa amamane ka hape, ka meköt la aqane goeëne së la huliwa i maseta? Tro sa isa waipengö së me hape, ‘Eni kö a wangatrune la huliwang, nge kolo pë hë a ihuline la troa huliwa i Iehova?’ E tro sa thele troa sa la hnyinge celë, tro lai a mama hnyawa koi së la hne së hna hnine catrën ngöne la mele së. Hnei Iesu hna amamane koi së la nyine tro sa amë panën ngöne la mele së. Ame la ketre ijin, hnei nyidrëti hna pane tro troa iöhnyi me Maria me Maretha. Maretha e cili a canga hnëkëne jë la xen thatraqai nyidrë, ngo Maria pe kö a lapa ezi Iesu me drei nyidrëti e hamë ini. Matre Maretha a eetr, ke tha xatua angeice kö hnei Maria. Iesu a qaja jë koi Maretha la ka mama ngöne la topik ne la drai. (Luka 10:38-42) Hetre ini ka tru e celë hnei Iesu hna hamën. Nyipiewekë tro sa iëne la “götrane ka loi,” ene la troa amë panëne la huliwa i Akötresie ngöne la mele së. Tha tro kö e cili a ajolë së hnene la itre hna ajan thatraqane la mele së, nge tro hë sa amamane la ihnimi së koi Keriso. w17.05 24 par. 9-10

Hnene la keme me thin hna kapa la hnëqa qaathei Iehova, ene la troa inine la nyipici kowe la itre nekönatr. Tha hna nue kö la hnëqa cili kowe la itre qaqa hmunë, maine ketre pena. (Ite edomë 31:10, 27, 28) Ngo, tro nyidroti lai a aja ixatua göi troa ketr la hni ne la nekö i nyidro ke, tha nyipi atre kö nyidro la qene hlapa ne la nöj. E sipo ixatua jë hnei nyidro, tha kolo kö lai a hape, nyidroti a kötrene la hnëqa i nyidro. Ngo, ketre aqane tro nyidroti lai a hiane la itre nekö i nyidro “ngöne la ini me ihaji ne la Joxu [Iehova].” (Efe. 6:4) Maine jë, tro nyidroti lai a easenyine la itre qatre thup matre troa kapa la itre ixatua göi aqane troa kuca la hmi hnepe lapa, me thel la itre xa sinee ka lolo thatraqane la itre nekönatr. Tro nyidroti fe a könën, e itre xa ijin, la itre xa hnepe lapa troa ce kuca me angatr la hmi hnepe lapa. Ketre, hetre itre ini hnene la itre thöth hna kapa qaathene la itre trejin ngöne la angatr a ce cainöj, me ce kuca la itre xa huliwa.​—Ite edomë 27:17. w17.05 11-12 par. 17-18

Thupene la hna thuemacanyi Iosefa hnene la angela ka hape, Heroda joxu a mekun troa humuthi Iesu, hnei angeic me föi angeic hna kötre sai Iesu, me po e Aigupito. Hnei angatr hna lapa e cili uti hë la meci Heroda. (Mat. 2:14, 19-21) Itre macatre thupene lai, ‘hna aijene la itretre drei Iesu asë kowe la nöjei götrane nöje Iuda me Samaria’ ke, hna traqa la iaxösisi. (Ite hu. 8:1) Atre hnyawa hi Iesu ka hape, alanyim thene la itretre drei nyidrë ka troa kötre mel qa ngöne la itre hnalapa i angatr. Öni nyidrë: “E axösisi nyipunie ngöne la kete lapa, kötejë kowe la kete.” (Mat. 10:23) Celë hi lai hna melëne hnene la itre thauzane lao Itretre Anyipici Iehova. Alanyimu thei angatr la itre ka meci sineen, nge luzi asë hë la itre ewekë i angatr. Nyimu jol hna cile kow hnene la itre ka kötre mel qa ngöne la hnalapa i angatr, maine ka mel ngöne la hunapo. Alanyimu la ka iji menu la ka haitr, me elo mani, me atrekënö, me kuci ngazo. Ngo hnene pala hi la Itretre Anyipici Iehova hna catr ngöne la nyipici, ke ej thei angatr laka, troa hetre pun la mele i angatr ngöne la hunapo, tune la hna nyipune la mele ne la angetre Isaraela ekö ngöne la hnapapa. Celë hi matre hetrenyi pala hi angatr la aqane waiewekë ka loi.​—2 Kor. 4:18. w17.05 3-4 par. 2-5

Tro pala hi a kuca koi së la itre ewekë ka tha meköti kö ngöne la mele ne la fene celë. Ala xalaithe hi la itre ijine troa kuca koi epun maine ketre trejin hnei epuni hna atre la ewekë ka tha meköti kö e hnine la ekalesia. The thixötre pi kö. Mele nyipici jë pe koi Iehova, me sipo ixatua koi Nyidrë jëne la thith, me lapa qale catre koi Nyidrë. The thëthëhmine kö laka, itre atr ka tha pexeje kö së, matre ame itre xa ijin, tha nyipi trotrohnine kö së la jol, nge thatre pengöne hnyawa kö së la nöjei götrane ne lai jol. The iqeji kö, ke, tro lai a atrune catrëne lai jol. Nge ketre, the qale kö kowe la sipu inamacane i epun, ngo thele jë pe troa nyipici koi Iehova me treqene tro Nyidrëti a amekötine lai. Tro hë Iehova e cili a kepe epun me amanathithi epun. Loi e eje e kuhu hni epun laka, tro pala hi Iehova, lo “Atre Amekötine ka sisitria” ne la fene asë a kuca la meköt, “ke meköti asë la ite jë i nyidë.”​—Gen. 18:25; Deu. 32:4. w17.04 22 par. 17

Nemene la pun kowe la itre atr ka xele ma ujë, nge ka sajuëne la fene celë la kola traqa la akötr atraqatr? Ase hë Iehova thingehnaean laka, tro Nyidrëti a apatrene la atr ka ngazo qa ngöne la ihnadro. (Sal. 37:10) Alanyimu enehila la itre atr ka kuca juetrëne la ngazo, nge tha hna tranyi angatre pi kö. (Iobu 21:7, 9) Ngo Tusi Hmitrötr a amekunë së ka hape: “Eje kö la lue xajawa i nyidë hune la ite jëne la nöjei at, nge öhne asë nyidë la ite hna feke ca hnei angat. Pëkö melöhlem, nge pëkö ahnuene la mec, mate troa za ngöne hnei angete kuca la ngazo.” (Iobu 34:21, 22) Matre, pëkö ewekë ka sihngödr xajawa i Iehova. Öhne asë hi Nyidrë la nöjei ewekë ka ngazo hna kuca. Thupene e Amagedo, tro sa goeëne la hna jilapa hnene la itre atr ka ngazo, ngo tha öhnyi angatre hë së. Patre palua ha angatr!​—Sal. 37:12-15. w17.04 10 par. 5